Тег: ‘Қазталов  ауданы’


Қара сабын

Күні: , 43 рет оқылды

Туған ауылым Саралжынға барғанда, әжем Күләштің (2011 жылы 83 жасында қайтыс болды.) адамға ұстата бермейтін сандықшасын аштым. Сандықшада әжемнің көзі тірісінде ұстаған бұйымдары сол қалпында тұр. Көзім қағазға оралған затқа түсті. Ашып қарасам, кәдімгі қазіргі күнде біз қолданып жүрген кір сабын, қара сабын. Бірақ сандықшаның ішіндегі қара сабын сәл өзгешелеу көрінді. Анам маған бұл сабынның қалай пайда болғанын айтып берді.

– Өткен ғасырдың соңғы он жылы халық үшін де, билік үшін де өте ауыр кезең болды. Дүкендерде күнделікті қолданылатын шаруашылық тауарлары былай тұрсын, қант пен шайға дейін құрып кетті. Азық-түлікті тек арнайы талонмен беретін.

Сол кезде әжеміз үйдегілерге: «Даладан алабота жинап алып келіңдер» деп тапсырма берді. Өзі ошақтағы қара қазанға малдың сүйегін қайнатты. Даладан әкелінген алаботаны өртеп, күлін алып, суға салып тағы қайнатты. Оған қайнаған сүйектің майын қосты. Бірақ осы жұмыстарды жасап жатқанда біздерді қасына жақындатпады. Оның мәнісін соңынан түсіндік. Мұндай іс жасағанда бөтен көз болмауы керек. Өйткені ол «айнығыш» болып кетеді деген ырым бар көрінеді. Сонымен қатар  «сабындай бұзылғыш» деген сөз тіркесі де осыдан шықса керек. Жаңағы күлді  қоюланғанша қайнатып, артынан түрлі ыдыстарға құйып қойды. Ол құрғап, қатып,  сабын болып шықты. Бұл сабынның  тарихы осы, – деді анам.

Мен  осы әңгімеден соң,  жас ұрпақ халық талқысынан өткен тамыры терең ұлттық құндылықтар мен бірегей рухани игіліктер жүйесін ұмытпауымыз керек деген ойға келдім.  Елбасымыздың өзгелердің тәжірибесін, ең озық үлгілерін атап көрсете келіп, Жапония мен Қытайдың бүгінгі келбеті  – осы мүмкіндіктерді пайдаланудың тиімді үлгісі деп өзінің «Рухани жаңғыру» мақаласында атап көрсеткенін білеміз. Ал біз жоғарыда айтқан осы үлгілерді күнделікті өмірде іске асырмасақ та, біле жүргеніміз жөн деп есептеймін.

Мөлдір  ӘНУАРБЕК,

Қазталов  ауданы


Бершімбай соры туралы не білеміз?

Күні: , 50 рет оқылды

Бершімбай сорының маңынан қоныс тепкен «Әли» шаруа қожалығына барғанда, осы қожалықтың мүшесі Баймағамбет деген азаматтың аузынан: «Ана жақта Мырзағали көлі бар» деген сөзді естіп қалдым. «Қай Мырзағали?» деп сұрағанымда, «Саралжын ауылында тұрған Мырзағали Мусин ғой» деді.

Сәл шегініс… Мырзағали ағаны жақсы танитын едім. 70-жылдары өмірден озды. Бала кезімізде үлкендерден «Мырзағали соғыстан қашқан. Ол 1930-40 жылдары әскери комиссариатта қызмет істеген. Орыс тіліне жетік еді және сауатты жаза білген», деген әңгімені жиі еститінбіз. Бұл адамның сауатты екенін өзіміз де көрдік. Үнемі қолында «Правда» газеті жүруші еді. Оның қашқын аталуы қалай болған?

Әскери комиссариатта қызмет істеп жүрген кезінде істі болған. Себебі белгісіз. Соғыс басталған кезде оған шақырту келеді. Мырзағали ағамыз оған мойынсұнбай бой тасалайды. Басқа бір ауылға барып, колхоздың жұмысына араласады. Әлгі ауылдың адамдарына: «Мен орыспын. Орталықтан осы жаққа жұмысқа жіберді», –  деген. Расында да, ағамыздың көзі көк, өңі сары болатын. Әрі орысша мүдірмей таза сөйлегесін, ауылдың аңқаулары оны  орыс  деп  ойласа  керек…

Қашқын болып жүргенде Бершімбай сорының қамысының арасында тығылған. Қамыстың арасынан лашық (жертөле) жасаған. Қасында соғыстан қашқан өзі сияқты Қасқыр, Шолпан деген адамдар болыпты. Бір қызығы, лашық-жертөленің алдынан кіріп, артынан бірнеше метр жерден шығатын аузы да болған. Бір күні Шолпан мен Қасқырды осы жерден НКВД-ның адамдары ұстап алып кетеді. Бұл кезде Мырзағали ағамыз азық іздеп, ауылдарға қарай кетіпті. НКВД-ның адамдары екеуін ұстағаннан кейін жертөленің екінші аузын бітеп кеткен. Оның тығылатын жеріне келе жатқан кезінде құрықтамақшы болған. Соны байқап қалған ол қашып жертөлеге келеді. Екінші аузынан шығайын десе, бітеп тастаған. Ұстауға келгендер оны  жертөледен шығару үшін айналасындағы қамысты өртеген. Амалсыздан қолға түсіп, қолына кісен салынып, айдалып кете барыпты. Соғыс біткеннен кейін жазасын өтеп, елге оралған. Ауылда ұзақ жыл шопан болды. Бірақ ағамыз басынан өткерген осы хикая туралы  тіс  жарғанын  естіген  жоқпыз.

Бұл сол бір сұрапыл, қиын замандағы адам тағдырының бір көрінісі болатын. Мырзағали ағамыз бен Нұрсұлу апамыздан төрт ұл, бір қыз. Қызы Жұмабике, баласы Жұмағазы бүгінде Атырау қаласында тұрады. Ал ең кенжесі Талғат  Қызылорда  жағында.

Бершімбай сорының жанындағы ағамыз тығылған жер Мырзағали көлі атанып, бүгінгі ұрпаққа аңыз болып жетіп отыр. Ал осыны көргенде «адамзаттың Айтматовы» жазған «Бетпе-бет» хикаятындағы басты кейіпкер Смайыл – Мырзағали аға болып көзімізге  елестеді…

Серік   ЖҰМАҒАЛИЕВ,

Қазталов   ауданы


65 шақырымды 5 сағат 37 минутта жүгіріп өтті

Күні: , 111 рет оқылды

Өткен  жылы  Бостандық ауылының   желаяқтары  Мержан  Серіков  және  Еділжан  Қосболов 47 шақырымды  жаяу  жүгіріп  өтіп,  жұртшылықты  таңғалдырған  еді.

«Апырмай, Жыланбаевтар қасымызда жүр екен ғой» деп қазталовтықтар  қайран  қалған  болатын.

26 маусым күні Мержан мен Еділжан өздерінің туған ауылына қатысты «Бостандықтық марафон» атағын қалыптастыру үшін 65 шақырым жерді жүгіріп өтті. Таңғы сағат 4:00-де басталған жүгіру Бостандық – Қаракөл – Әжібай – Қазталов – Бостандық  ауылына  дейінгі 65 шақырымды  артқа тастап, желаяқтар 9:37-де Бостандыққа келді. Бір өкініштісі, Еділжан Қосболов бұрыннан алған жарақатына байланысты Қазталов ауылында марафонды тоқтатса, 24 жастағы Мержан діттеген мақсатына жетті. Бірнеше күннен бері 40 градустан түспей тұрған ми қайнатар ыстықта жүгіріп өту – нағыз  мықтылық.

Міне, бостандықтық «Жыланбаевтар» Астананың 20 жылдық мерекесі алдында  осындай  сый  жасады.

Мөлдір  ӘНУАРБЕКҚЫЗЫ,

Қазталов   ауданы


Осы жұрт Аралсорды ұмытты ма?

Күні: , 26 рет оқылды

Тақырыпты осылай бастауымыздың да жөні бар. Сонау 60-шы жылдардың ортасында қазіргі Бесқұлаш аймағына жақын (Әжібай ауылдық округіне қарасты) Ащыөзектің бойында түсінікті тілмен айтқанда, геологиялық зерттеу қалашығы (городок) орналасты. Бұл қалашықтың орналасқан жері Жәнібек ауданының Тайыр Жароков атындағы кеңшардың құрамына кіргенмен де, негізінен Қазталов ауданымен қарым-қатынаста болды.

Ал осы Ащыөзектің бойында орналасқан геологиялық барлау экспедициясының бұрғылау жұмысы тереңдігі жөнінен сол кезде Америкадағы бұрғылау жұмысынан кейінгі ең терең бұрғылау рекордын жасаған көрінеді. Былайша айтқанда, бұл жердегі бұрғылау жұмысы 9 мың метрге дейін барған екен. Осы қалашық сол кезде ғажайыпты еске түсіретін. Маң далада сол заманға лайық аурухана, монша, сегізжылдық орыс мектебі, түрлі техникалық жарақтандырылған шеберханалар және біздің аудан орталығы емес, облыс орталығы тұрғындарының түсіне де кірмейтін азық-түлікпен қамтылған дүкендер болды. Көшелері жасыл желекке малынып тұрды. Сор суының жиналған жерде суға шомылу жағажайы да болды. Дүкендерде адам қолына сол кезде түсе бермейтін шұжықтардың (колбаса), бау-бақша өнімдерінің түр-түрі толып тұрды. Ауылдың адамдары: –Біздер тамақты Москвадан алдыртамыз, – деп әзілдейтін. Мұны ағаларымыз және бүгінгі замандастарымыз көре қалды. Ең алғаш рет қазіргі әскери алып техникаларды да осы қалашықтан көргенбіз. Сонымен қатар осы геологиялық барлау экспедициясының бір орталығы қателеспесек, Жаңақала ауданының Мәстексай аймағында орналасты. Сол жерге Саралжын ауылы арқылы күн сайын қатынасатын. 1967 жылы Мәстексайдағы барлау мұнарасы Тереңкөл ауылдық округінің (Қалабай бөгетінің маңы) аймағына көшірілді. Мұнараны Саралжынның үстімен төрт алып тракторы сүйреп өткені әлі есімде. Сол мұнара Кеңес үкіметі тарағанға дейін тұрды. Осы мұнараны Кеңес үкіметі тарап жатқан кезде біреу құлатып, металлом қылып тапсыруға алып кетіпті. Сол алмағайып кезде мұнараны ешкімге бермей сақтап қалғанда, бүгінгі күнде оны реконструкция жасап, аудан орталығына немесе Нұрсай ауылына әкеліп, бүгінгі тәуелсіздіктің нышанын бейнелейтін бір ескерткіш жасауға да болады екен деген бір ой келеді. Бірақ мұндай ақыл ол кезде болмай қалды ғой…

Енді Аралсор қайда дейміз ғой? Жетпісінші жылдардың басында геологиялық барлау экспедициясы басқа жаққа көшірілді. Қалашық Тайыр Жароковтың бір бөлімшесіне берілді. Бірақ тұщы су көзі болмағандықтан, ол бөлімше тарап кетті. Үйлер қиратылып, әркімнің еншісіне тиді. Бүгінде осы қалашықта тұрып, жұмыс істеген орыс, қазақ ұлттарының көбі Орал қаласында тұрады. Ауыл адамдарымен араласқан солар біраз уақытқа дейін хабарласып, қонаққа келіп тұратын еді. Аралсордың тарихын неге айтып отырмыз? Осыны жақсы білетін адамдар сиреп барады. Бұл да біздің тарихымыз. Осы жерімізге орналасқан ғажайып қалашықтың макетін жасап, жабдықталып жатқан музейге қойса, бүгінгі өсіп келе жатырған ұрпақ туған жерін тереңірек таныр еді…

Серік  ЖҰМАҒАЛИЕВ,

Қазталов  ауданы


Перзенттік пейіл ауыл-аймақты ажарландыруда

Күні: , 23 рет оқылды

«Рухани  жаңғыру» бағдарламасының  өңірлерде  жүзеге  асуын  саралау үшін  ҚР  Президенті Әкімшілігінің  мемлекеттік инспекторы  Есет  Бәйкен жетекшілік  еткен  топ  Қазталов  ауданында  болды.

Облыс әкімінің орынбасары Ғабидолла Оспанқұлов бастап келген мәртебелі меймандар алдымен Талдыапан ауылдық округіне қарасты Сарықұдық ауылында кәсіпкер Нұрлыбай Жолдыбаевтың демеушілігімен салынған медициналық пункттің жұмысымен танысты. Содан кейінгі сапар Жалпақтал ауылында жалғасты.

Жалпақталда «Рухани жаңғыру» бағдарламасы аясында атқарылған іс аз емес. Мәселен, әр жылғы түлектер өз қаражаттарымен ауылдық мешітті қалпына келтіріп, балалар ойын алаңы мен футбол алаңын ел игілігіне пайдалануға берді. Сонымен қатар мәдениет үйінің алаңы мен субұрқақ салынып, Ұлы Отан соғысы ардагерлерінің ескерткіш тақталары жаңартылды. «Менің жүрегім – Жалпақтал» атты жарық-диодты тақта, кіреберіс жолға ауыл аты жазылған конструкциялық белгі орнатылды. Биыл 1966 жылғы мектеп түлектері туған ауылына 13 Социалистік Еңбек Ері мен екі Кеңес Одағы Батырының мүсіндерін орнатты. Бұл жұмыстарға 10 миллион теңге шамасында  қаражат  жұмсады. Ал 1978 жылы мектеп бітіргендердің бастамасымен құны 1 млн. теңге тұратын «Жастар саябағы» ашылды. 1981 жылы дүниеге келген ауылдың жастары 4 млн. теңге қаражат жұмсап, «СТРИТ ВОРКАУТ» спорттық  алаңын  сыйға  тартты.

Жалпақтал мәдениет үйінде өткен дөңгелек үстел барысында «Рухани жаңғыру» аясында атқарылып жатқан жұмыстар турасында сөз болды.

– Ауылдың, елдің жастарының демеушілігінің арқасында ауданымыздың көркейіп, дамып келе жатқанын мақтанышпен айтамыз.

Өткен мамыр айында аудан бойынша түлектердің демеушілігімен жалпы құны 40 млн. теңгенің, соның ішінде жалпақталдық түлектердің демеушілігімен 24 миллион теңгенің түрлі жобалары іске асты, – деді аудан әкімі Абат Шыныбеков.

Облыс әкімінің орынбасары Ғабидолла Оспанқұлов бұл бағытта облыс көлемінде атқарып жатқан жұмыстар жөнінде баяндап, алда тұрған жоспарлармен бөлісті. Олардың ішінде аудан-ауылдың өркендеуіне меценаттарды тарту, рухани кештер өткізу, кітаптар шығару сынды жобалар бар.

Осы кездесу барысында облыстық мәслихат депутаты Мағауия Есмағұлов, Жалпақтал ауылдық ардагерлер ұйымының төрағасы Ғилым Едекешев меценаттардың туған ауылдары үшін жа-салатын игі істеріне атқарушы билік тарапынан көмек-қолдаулар болса деген ұсыныс-пікірлерін жеткізді.

– «Рухани жаңғыру» бағдарламасының жүзеге аса бастағанына бір жыл болса, ал Қазталов ауданында  бұл бағыттағы істер 2009 жылы басталып кеткен екен. Міне, содан бері қанша жұмыстар атқарылды. Бұл өзге өңірлерге үлгі-өнеге боларлық нәрсе. Алда ауқымды істер мен жаңа жобалардың жоспарланып отырғандығы да қуантады. Осыдан-ақ аудандағы даму үрдісі жыл өткен сайын қарқын алып келе жатқанын көруге болады, – деген ҚР Президенті Әкімшілігінің мемлекеттік инспекторы Есет Бәйкен облыста және Қазталов ауданындағы атқарылған істерге оң бағасын берді.

Құрамында орталық мемлекеттік құрылым өкілдері бар топ Ақпәтер ауылында да болды. Мұнда олар еңбек ардагері Кәрім Өтеғұловтың демеушілігімен жасалған «Ана мен бала» монументі және Ақпәтер тарихи-өлкетану музейінің жұмыстарымен танысып, жеке кәсіпкер Самат Хасановтың демеушілігімен салынып жатқан медициналық-амбулаториялық пунктті көріп, бұл жұмыстарды  жоғары  бағалады.

Тұрарбек  ҚАЙЫРҒАЛИҰЛЫ,

Гүлнұр  ҚАЗБЕК,

Қазталов  ауданы


Ілкімді істер – өркендеу өрісі

Күні: , 406 рет оқылды

Өткен  сенбіде  облыс  әкімі  Алтай  Көлгінов  Қазталовта  жұмыс  сапарымен  болып, аудан  тұрғындарымен  кездесіп, жүріп  жатқан  құрылыс   жұмыстарымен  танысты.

Облыс   басшысы  әуелі  аудан  орталығындағы  салынып  жатқан  саз  мектебінде  болды. Номиналдық қуаты 24 оқушыға арналған саз мектебінің жобалық құны – 87 млн. 615,9 мың теңге. Бұл жобаға облыстық бюджет есебінен әзірге 44 млн. 500 мың теңге бөлініп, құрылыс жұмыстарын «Жолаушы жол» ЖШС жүргізуде. Алдағы уақытта саз мектебінде би, музыкалық аспаптарды үйрету сыныптары, концерттік залы, гардероб, санитарлық торабы іске қосылады  деп  жоспарлануда.

Құрылыс нысанын аралап көрген облыс әкімі, ауыл ақсақалдары, мәслихат депутаттары және қоғамдық ұйым өкілдерімен кездесті.

– Қазталов ауданында ауқымды жобалар жүзеге асуда. Жалпақталдан асқан қатқыл табанды жолды аудан орталығына тарту  бағытындағы жұмыс басталып кетті. Сонымен қатар биыл аудандағы 13 елді мекенді көгілдір отынға қосу жұмыстарын бастап жатырмыз. 16 елді мекенге газ тартуға жобалық-сметалық құжаттар дайындалуда. Соның сыртында Қазталов, Жалпақтал ауылдарының ішкі жолдарын жасау да қолға алынуда. Бұдан басқа тұрғын үй құрылысы да бар, – деді  кездесуде  Алтай  Сейдірұлы.

Кездесу барысында Қазталов ауданының әкімі Абат Шыныбеков ауданның әлеуметтік-экономикалық дамуы туралы баяндаса, ауыл ақсақалдары осындай жұмыстар үшін облыс әкіміне ел атынан ризашылықтарын жеткізді. Мәселен, еңбек ардагері Тұрақбай Дүйсенов ауданда соңғы жылдары ел қуанарлық істердің жүзеге  асып  жатқанын  айтты.

–Ауданымызда елді мекендерді көгілдір отын, таза ауыз сумен қамту үлкен қарқынмен жүруде, – деді ол. – Сонымен қатар өткен жылы аудан орталығында 100 орындық мектеп жанындағы интернат, 22 тұрғын үй салынып, пайдалануға берілсе, биыл сол жұмыстар жалғасып, Қазталовта саз мектебі, Жалпақтал ауылында тұрғын үй құрылысы жүргізілуде. Ауыл шаруашылығы саласын дамыту мақсатындағы мемлекеттік бағдарламалардың игілігін халық көріп отыр. Елбасының  сарабдал  саясатының  арқасында  республикамыздың,  соның  ішінде  облыс,  ауданымыздың  дәулеті  артып келеді. Еңсесі биік егемен  елдің  жарқын  болашағы  жолында  қазталовтықтар  да  уақытпен  санаспай,  еңбек  етуде.

 Бұдан кейін өңір басшысы ат басын Бозоба-Қайыңды бағытындағы Қараөзен өзені арқылы өтетін қалқымалы көпір бағытына бұрды.

Айта кетейік, бұрынғы қалқымалы көпірдің істен шығуына байланысты Қайыңды, Болашақ ауылдық округтерінің тұрғындарына аудан орталығымен қатынас қиындап, Жалпақтал арқылы айналма жолмен жүруге тура келді. Міне, сол мәселенің түйіні шешіліп, жаңадан жасалған қалқымалы көпір 15 мамыр күні ашылған болатын. Бұл қалқымалы көпірді В. Самсонов жетекшілік ететін «Орал жөндеу компаниясы» ЖШС 52 млн. 724 мың теңгеге салған. Ұзындығы 42 метр, ені 6 метр, жүк көтеруі  қуаты 20 тоннаға дейін жететін көпір сапалы салынған. Осы қалқымалы көпір арқылы өткен жолаушылар Қайыңды, Болашақ ауылдары арқылы Тасқала – Орал бағытындағы тас жолға тікелей шыға алады.

Қайыңды ауылының тұрғындары атынан еңбек ардагері Мұнайдар Карин:  «Біздер өткен жылы сізге осы өзен үстінен көпір салу мәселесін жеткізген болатынбыз. Сіз және аудан әкімі Абат Абайұлы да бұл мәселенің оң шешімін табатынын айттыңыздар. Енді, міне, соның нәтижесін көріп отырмыз. Ауыл халқы осы жасалған игілікті іске риза болуда.

Бұл Елбасымыздың халыққа жасап жатқан істерінің ауылдық жерде орындалуын көрсетіп отыр.

Ал бұл жұмыстар сіздердің басшылықтарыңызбен іске асырылды. Аудан орталығы және ауданның басқа тұрғындары да осы көпірдің игілігін көретін болады. Сондықтан сізге халықтың ризашылығы шексіз, – деді.

Ауданымызда «Мал баққанға бітеді» деген қағидамен қазақтың кең даласында төрт түлікті: үйір-үйір жылқыны, табын-табын сиырды, отар-отар қойды мыңғыртып өсіруді  меңгерген шаруалар баршылық. Солардың бірі – «Перизат» шаруа қожалығы. Ақпәтер ауылдық округіндегі Талғат Қабденов жетекшілік ететін бұл қожалықта болған облыс әкімі шаруашылықтың жай-күйімен танысты. «Перизат» 2016 жылдан бері асыл тұқымды еділбай қойын өсіруді қолға алған. Шаруашылық бүгінгі күнде осы қой тұқымын 1000 басқа жеткізіп отыр. Сонымен қатар шаруашылықта 100 бас жылқы, 300 бас ірі қара малы бар. Шаруашылықты аралап көрген өңір басшысы қожалық жетекшісінің жұмысына табыс тіледі.

«Өңірлерді дамытудың 2020 жылға дейінгі бағдарламасының» Ақпәтер ауылындағы ілкімді істердің бірі – былтырдан бері «Ақбұлақ» бағыты бойынша таза  ауыз су құбырына реконструкциялау жұмыстарының  жүргізілуі. Оған  республикалық бюджеттен 239 млн. 689,4 мың теңге бөлінген.  Ұзындығы 18,731 шақырымды құрайтын су құбыры арқылы  1014 адам таза ауыз сумен қамтылмақ. Облыс басшысы мердігер «БатысгазСтрой» ЖШС-ның өкілдерімен кездесіп, жұмыстың сапалы әрі уақтылы жүргізілуі қажеттігін ескертті. Сонымен қатар осы кездесуде ауыл тұрғындары техникалық су тарту жұмыстарына көңіл бөлінсе деген ұсыныстарын  жеткізді.

Ауданымызда жүзеге асып жатқан ауқымды жобаның бірі – Киров – Шежін каналының 3-кезеңінің құрылысы.  Ұзындығы 47,9 шақырымды құрайтын бұл канал іске қосылған кезде Ресейдің  Еділ өзенінен келетін су тәуелділігі азаяды. Түпкі  мақсат – Жайық суын Қараөзенге әкелу. Жобалық құны 2 млрд. 291, 123 млн. құрайтын бұл жұмыстарға республика бюджетінен 1 млрд. 967,98 млн. көлемінде қаржы бөлінді. Аталған жоба жүзеге асса, жыл сайын Жайықтан Қараөзенге 50 млн. текше метр көлемінде су айдалып, бұл өз кезегінде жылына 600700 млн. теңге бюджет қаражатын үнемдеуге мүмкіндік береді.

Құрылыс жұмыстарын «АзияТехСтрой» ЖШС жүргізіп жатыр. Киров – Шежін каналының қайта құру жұмыстарын көрген Алтай Сейдірұлы бұл  жұмыстарды уақтылы да сапалы аяқтау  қажеттілігін айтты. Алда 4-кезеңнің жұмыстары тұр.

Ақпәтер ауылының тұрғыны, еңбек ардагері Кәрім Өтеғұловтың сөзіне қарағанда, осы жерде орын тепкен шаруа қожалықтарының бәрі де су тапшылығын  көріп отырған болатын. Енді осы канал іске қосылса, елдің қуанышында шек болмас еді. Бір айта кетер жәйт, осы канал арқылы бөгеттерге су айдау, жайылымдарға су шығару сынды жұмыстар да атқарылса, шаруа адамдарының  да  риза  болары  сөзсіз.

Өңір басшысы Жаңажолда болған кезде ауылдағы кіреберіс және ауылішілік жолдарды күрделі жөндеу жұмыстарымен де танысты. Жаңажол ауылының кіреберісі мен Жалпақтал ауылына апаратын шығаберіс жолдарына және ауыл ішіндегі үш көшеге ұзындығы 7,5 шақырым болатын қатқыл табанды жол салу жұмыстары басталған. Сонымен қатар төрт көшеге жаяу жүргінші жолы да жасалып жатыр. Бұл құрылыс жобасына республикалық бюджет есебінен 704 млн. 887 мың теңге қаражат бөлініп, құрылыс жұмыстарын «Айдана» ЖШС жүргізуде.

– Елбасымыздың «Төртінші өнеркәсіптік революция жағдайындағы дамудың жаңа мүмкіндіктері» атты биылғы Жолдауында «Ішкі өңірлік қатынастарды жақсарту үшін аутожолдардың жергілікті желісін жөндеу мен қайта салуға арналған қаржы көлемін көбейту керек» деп атап көрсеткен болатын. Елбасымыз айқындап берген сол мақсат орындалып жатқанына куә болып отырмыз. Ауданда алғаш рет қатқыл табанды жол төсеу үшін жергілікті маңызы бар жолдарға қаржы бөлініп, өздеріңіз көріп отырғандай, сол жол құрылысы Жаңажол ауылына да келіп жетті. Ауылға былтыр таза ауыз су келсе, енді, міне, ауыл ішіндегі жолдың да мәселесі шешіліп жатыр. Осындай игілікті істер басқа да ауылдарда жалғасын табу үшін  жергілікті атқарушы  билік құрылымдарымен бірге жұмыстанатын боламыз, – деді  жаңажолдық  тұрғындармен жүздескен  Алтай  Сейдірұлы.

Қазталовтықтардың бүгінгі тыныс-тіршілігін жақсы бағалаған облыс әкімі  игілікті  істер  жалғасын  табатынын  айтып, ортақ  іске  үлестерін  қосып  жүрген  жандарға өз ризашылығын білдіріп, облыс  орталығына  аттанып  кетті.

Қайрат   ЖАҚЫП,

Қазталов   ауданы


Жарайсыңдар, жалпақталдық түлектер!

Күні: , 766 рет оқылды

Отанға деген патриоттық сезім туған жерді құрметтеуден басталады. Елбасымыздың «Болашаққа бағдар: рухани жаңғыру» мақаласының «Туған жер» бағдарламасы да әр қазақстандықтың кіндік қаны тамған атамекенін түлету қажеттігіне бағытталған.

Қазталов ауданының Жалпақтал ауылында өз туған өлкесінің көркеюіне атсалысып жүрген азаматтар аз емес. Әр жылғы түлектер өз қаражаттарымен ауылдық мешітті қалпына келтіріп, балалар ойын алаңы мен футбол алаңын ел игілігіне пайдалануға берді. Сонымен қатар мәдениет үйінің алаңы мен субұрқақ салынып, Ұлы Отан соғысы ардагерлерінің ескерткіш тақталары жаңартылды. «Менің жүрегім – Жалпақтал» атты жарық диодты тақты, ауылға кіреберіс жолға ауыл аты жазылған конструкциялық белгі орнатылды.

Жалпақтал ауылында орталық саябақта Жалпақтал ауылының 1966 жылы туған түлектері «Батырлар аллеясын» сыйға тартты. Мұнда 13 «Социалистік Еңбек Ері» мен екі Кеңес Одағы Батырының мүсіні орналасқан. Бұл жұмыстарға мектеп бітіргендеріне 35 жыл болған түлектер 10 миллион теңге шамасында  қаражат  жұмсады. Салтанатты жиында «Батырлар аллеясының» лентасын Ұлы Отан соғысының ардагері Жұбат Сәрсембиев және мектеп бітіргеніне 35 жыл толған түлек, Қазақстан Республикасының Даму және инвестициялар министрлігінің жауапты xатшысы Замир Сағынов қиды.

Тұрғындарды «Батырлар аллеясының» ашылуымен облыстық мәслиxат xатшысы Мәлік Құлшар, аудан әкімі Абат Шыныбеков сөз сөйледі.

1983 жылғы түлектердің атынан сөз сөйлеген Замир Сағынов:

– Бұл аллея – түлектердің туған жерге деген сүйіспеншілігінен, еңбек ерлері мен батырларымызға деген құрметінен туған тарту. Туған еліміз түлей берсін, көркейе берсін. Мұндай істер алда жалғасын таба береді деп сенеміз, – деген лебізін білдірді. Сонымен қатар аудандық ақсақалдар алқасының төрағасы Нағым Ризуанов ақ батасын берді.Сол күні Жалпақтал ауылында 1978 жылғы мектеп бітірген түлектердің тартуымен «Жастар саябағы» да ашылды. Саябақтың ашылуында құттықтау сөз алған аудан әкімі Абат Шыныбеков түлектерге xалықтың алғысын жеткізсе, 1978 жылғы түлектер атынан сөйлеген Талғат Нығметов:

– Елге деген маxаббаттан туған осындай сый ауыл жастарының сүйікті орнына айналып, еліміз көркейе берсін! – деген тілегін білдірді. Сонымен қатар 1978 жылғы түлектерге Жалпақтал ауылдық ардагерлер кеңесінің төрағасы Ғилым Едекешев, ауылдық округ әкімі Самиғолла Ақмурзин ризашылықтарын білдіріп, алғысxат табыс етті. Саябақтың лентасын салтанатты қию рәсімі соғыс ардагері Жұбат Сәрсембиев пен түлек Айгүл Тасыбаеваға берілді.

Ал жалпақталдық 1998 жылғы түлектердің тартуымен құны  4 миллион теңге тұратын «СТРИТ ВОРКАУТ» жаттығу спорт алаңы ашылды.

– Бәріңізді ашылып отырған жаңа заманауи жаттығу спорт алаңының ашылуымен құттықтаймын! Сіздердің күштеріңізбен, демеушілігіңізбен сыйға тартып отырған тартуларыңыз елдің, ауылдың дамуына қосқан үлкен үлес деп білеміз. Осы мамыр айында аудан бойынша түлектердің демеушілігінмен жалпы құны 40 миллионның, соның ішінде жалпақталдық түлектердің демеушілігімен 24 миллион теңгенің жұмыстары атқарылып, ел игілігіне табысталды. Сіздерге мың алғыс, түлектер, – деді аудан әкімі Абат Шыныбеков. Сонымен қатар ҚР еңбек сіңірген жаттықтырушысы Нұрлан Қауметов те түлектерге алғысын жеткізді. Түлектер атынан сөз алған Сенім Раxметуллин түлектердің туған  жерге  деген  тілегін  жеткізді.

Шараға жиналғандар: «Жарайсыңдар, жалпақталдық  түлектер! Туған жерді түлетуге қосқан үлестеріңізге ел риза!» – деген жүрекжарды ризашылықтарын арнап жатты.

Мөлдір  ӘНУАРБЕКҚЫЗЫ,

Қазталов  ауданы


Күре жолдың бойында жұмыс қызар күн жақын

Күні: , 44 рет оқылды

Таяуда облысымызға жұмыс сапарымен келген Елбасы Нұрсұлтан Назарбаев Бөкей ордасы мен Жәнібек аудандарына асфальт жол салу қажеттігін қадап айтқан болатын. Осыған орай таяуда өңірімізге ҚР Инвестициялар және даму министрлігі Автомобиль жолдары комитеті төрағасының орынбасары Сайранбек Бармақов, «ҚазАвтоЖол» ҰК» АҚ басқарма төрағасының орынбасары Берік Желдікбаев пен осы ұлттық компанияға қарасты сапаны бақылау департаментінің директоры Дмитрий Бессонов, сондай-ақ «Қазжол»  ҒЗИ» АҚ вице-президенті Ербол Айтбаев келді. Олар Қазталов, Жәнібек және Бөкей ордасы аудандарында болып, ел-жұртпен жүздесті.

Биыл жобалық-сметалық  құжаттама дайындалады

Құзырлы құрылым өкілдерімен кездескен Қазталов ауданының әкімі Абат Шыныбеков жол салу жобасына аудан аумағынан өтетін жол бойында қонақүй, кемпинг, жанармай құю, техникалық қызмет көрсету нысандары, тамақтану және сауда нүктелерін орналастыру үшін алаңдар жасауды енгізуді ұсынды. Сонымен қатар Қазталов Ресейдің Александров-Гай ауданымен шектесетіні белгілі. Қазіргі таңда бұл екі арада «Фомин» өткізу бекеті қысқартылған режімде жұмыс жасауда. Дегенмен бұл бекетті болашақта ашу жұмыстары екі ел үкіметі арасында келісілуде. Сол себепті Абат Абайұлы осы шекара бекетіне дейінгі 14 шақырым жолды асфальттау жөнінде де ұсыныс айтты.

Сондай-ақ Астанадан келген лауазым иелері Нұрсай ауылының тұрғындарымен жүздесіп, жоспарларымен бөлісті.

– Өздеріңізге белгілі, Елбасы Батыс Қазақстан облысына жасаған жұмыс сапары кезінде Үкіметке Жәнібек, Бөкей ордасы аудандарына қатқыл табанды жол салуды тапсырған болатын. Осы мәселеге байланысты арнайы топ құрылып, жолға шықтық. Бүгінде осы аудандар бағытындағы 500 шақырымдай жолдың 250 шақырымы тасжол. Жол негізі екі бағытта, яғни Қазталов – Жәнібек және Өнеге – Бисен – Сайқын бағытында салынатын болады. Бұл сапарымыздың басты мақсаты – жол жағдайымен танысу. Нақтылап айтқанда, жолға орта не күрделі жөндеу қажеттілігін және құрылыс материалдардың қай түрлерін жергілікті жерден табуға болатынын анықтау.  Биыл, бұйыртса, жобалық-сметалық құжаттама дайындалып, келесі жылы жұмысты бастайтын боламыз, – деді ҚР ИДМ Автомобиль жолдары комитеті төрағасының орынбасары Сайранбек  Бармақов.

Құрылыс  материалдары  теміржолмен тасымалдануы мүмкін

Жол саласының бір топ лауазымды тұлғалары Жәнібек ауданында да болды. Оларды аудан әкімі Азамат Сафималиев пен жергілікті ақсақалдар Ұзынкөл ауылының тұсынан күтіп алды.

Аудан басшысы меймандарға аудан мен облыс орталығына  дейін қатынайтын жол мәселесін баяндап берді. Кездесу кезінде аудандық қоғамдық кеңестің төрағасы Бекет Әліпқалиев, аудандық ардагерлер кеңесінің төрағасы Амангелді Уәлиев Жәнібек пен Орал қаласы аралығындағы жолдың түйткілдерін айта келіп, Президенттің тапсырмасынан кейін сеңнің қозғалғанына аудан жұртшылығының шексіз қуанышта екенін, Оралмен екі ортаға қатқыл табанды жол салынған жағдайда көптеген түйінді мәселенің шешілетінін, Волгоград облысы арқылы көршілес Ресейдің басқа да өңірлеріне дейін жол ашылып, барыс-келістің  жақсаратынын  баяндады.

Мұнан соң құзырлы құрылым өкілдері көршілес Ресейге өтетін Жәнібектегі шекаралық өткізу пунктіне табан тіреді. Бұл жерге келгесін аудан әкімі меймандарға осы аралықтан Ұзынкөл ауылына шығатын асфальт жолға дейін жеті шақырым қашықтыққа қатқыл табанды жол төсеу туралы ұсынысын жеткізді. Келген жол мамандарының сұрауы бойынша шекарашылар өткізу пунктінен күніне 30-50 аралығында жүк және 200-250 жеңіл автокөлік өтетінін мәлімдеді. Жол саласының басшылары, сондай-ақ өткізу пунктінің жанынан сегіз жолақты көлік ағынын реттеуіш құрылғылар орнату жайындағы жоспарларын ортаға салды. Меймандар бұдан соң аудан орталығындағы теміржол тұйығында болып, болашақта қатқыл табанды жолға тасымалданатын материалдарды теміржол тұйығы арқылы жеткізу мүмкіндігі жөніндегі  пікір-ұсыныстарын  айтты.

Жамантаудың қиыршық тасы  кәдеге жарай ма?

Бөкей ордасына ат басын бұрған жол мамандарын бөкейлік атқамінерлер Жәнібек ауданының Өнеге ауылының маңынан қарсы алды. Аудан әкімі Нұрлан Рахымжанов жолай қонақтарды аудан тарихымен, қазіргі тыныс-тіршілігімен таныстырып, Бисен мен Хан ордасы ауылдары бағытындағы бұрылыстар мен Сайқынның кіреберісіне аялдатып, осы жерлерге алаңқайлар салуды жобаға енгізуді сұрады. Бұдан кейін меймандар аудандық мәдениет үйі маңынан орын тепкен Кеңес Одағының Батыры Мәншүк Мәметованың ескерткіші жанында өздерін күтіп тұрған бір топ ауыл үлкендерімен кездесіп, онда ҚР ИДМ Автомобиль жолдары комитеті төрағасының орынбасары Сайранбек Бармақов іссапарларының мақсатын баяндап, жанындағы әріптестерін таныстырды.

– Біздің компаниядағы осы өңірдің жігіттері «Жерлестеріміздің  жол жөніндегі жанайқайы Елбасына жетіп, енді нақты іс бастала тын болды ғой» деп қуанғандарының мәнісін енді ұғындым, –  деп сөз бастаған «ҚазАвтоЖол» ҰК» АҚ басқарма төрағасының орынбасары Берік Желдікбаев әскери полигон аумағынан босаған Жамантау төбешігі маңындағы қиыршық тас кәдеге жараса, ол атқарылар жұмыстың құнын арзандатып, салу мерзімін қысқартуға әсер ететінін жеткізді. Жобалау, тендер өткізу, ашылатын жұмыс орындары жайы да  сөз  болды.

Ауыл ақсақалдары Ноқаш Қадымов, Чарльз Қойшыбаев, Елдос Кенжеғалиев және «Нарын шуағы» әйелдер қоғамдық бірлестігінің төрайымы Гүлжан Бисекенова елжұрттың тілегін Мемлекет басшысына жеткізген аудан, облыс басшыларына, Парламент депутаттарына, халықтың өтінішіне құлақ асып, Үкіметке тапсырма берген Елбасыға ризашылықтарын  жаудырды.

Ұсыныс-пікірлердің, тұрғындар өтініштерінің ескерілетінін айтқан жол саласының мамандары Жамантауға да барып, ол жердегі қиыршық тастарды көрді. Енді оның кәдеге асуын құзырлы мекемелер анықтап, қорытындысын шығаруы тиіс. Егер тастың сапасы жақсы болып, тиісті талаптарға сәйкес келсе, онда жол салу жұмыстары Сайқыннан басталмақ.

Жұртшылықтың жүйкесін жұқартып жүрген күре жолдың өн бойына  қан жүгіретін күннің қашық еместігін осылайша көпшілік  анық сезінгендей  болды.

Мөлдір ӘНУАРБЕКҚЫЗЫ,

Қазталов ауданы,

Нұрымбек ЖАПАҚОВ,

Жәнібек ауданы,

Каримолла ҒАЙСИН,

Бөкей ордасы ауданы


Қылқалам шеберіне ескерткіш

Күні: , 63 рет оқылды

Жалпақтал мәдениет үйінің алаңында белгілі суретші Сәкен Ғұмаровтың ескерткіші ашылды.

Сәкен жас кезінен өнерге жақын болып өскен.

Әкесі, Қазақстанның еңбек сіңірген мәдениет қызметкері Мұхамбетжан Ғұмаров жетекшілік еткен Жалпақтал халық театрында қызмет еткен. Кейін Батыс Қазақстан облыстық орыс драма театрында әртіс, облыстық телестудияда бас режиссер болып қызмет еткенімен, суретшілігімен кеңінен танылды. Негізінен кескіндеме саласында қызмет еткен ол шығармаларын абстракциялық бағытта (поставангардизм) жазды. Суреттеріне бағзы заман түркілерінен бастап әскери полигондар зардабын тартқан Бөкей ордасының тыныс-тіршілігін арқау етті. Туындыларын түсіну қиын болғандықтан, ол кеңестік дәуірде көпке дейін мойындалмады. Тек 1985-1995 жылдары Алматы, Орал, Киев, Мәскеу және басқа қалаларда жеке көрмелері қойылып, суретшіге үлкен табыс әкелді.

Әйгілі суретші ескерткішінің ашылуына орай Жалпақталда өткен салтанатты шарада  Қазталов ауданының әкімі Абат Шыныбеков, өлкетанушы Жайсаң Ақбай, «Казкоммерцбанк» АҚ, Орал филиалының төрағасы, С. Ғұмаров атындағы қордың тең төрағасы Мерғат Ахметов, техника ғылымдарының докторы, академик Талан Оразғалиев, ҚР мәдениет қайраткері, мәдениет саласының ардагері Нұрлан Шақанаев суретші туындылары кейінгі ұр-паққа рухани мұра болып қала  беретіндігін  атап өтті.

Ескерткіш Мерғат Сисенғалиұлының бастамасымен және Талан Қабдрашитұлының қолдауымен жүзеге асып отыр. Шара барысында қылқалам шебері туралы «Ғарыш мінезді адам» атты қысқа метражды фильм көрсетіліп, «С. Ғұмаровтың жұлдызды ырғағы» атты ғылыми-тәжірибелік  конференция  өтті.

– Әсемдік әлеміне дара тынысымен келген Сәкен ағаның ғұмыры онша ұзақ болмағанымен, өнердегі қолтаңбасы біздің мәңгі жүрегімізде. Ғаламат сурет салатын және сол суреттермен адамды емдейтін тума таланттың өмірде болғанын айтып қана қоймай, оны еске алып, кейінгі ұрпаққа таныстырып отыру әр адамның қасиетті парызы деп есептеймін. Бүгінгі ғылыми-тәжірибелік конференция жұмысы Сәкен Ғұмаровтың ғұмырын әрі қарай насихаттап, жалғастыру, – деген аудан басшысы Абат Абайұлы конференция жұмысына сәттілік тіледі. Конференцияда өлкетанушы Жайсаң Ақбай, Қазақстан Суретшілер және Еуразия дизайнерлері одағының мүшесі Қуандық Мәдір, С. Ғұмаров атындағы облыстық музейдің меңгерушісі Ермек Айдарханов, Жалпақтал өнер мектебінің ұстазы Бейбіт Мұқанов сөз алып, Сәкен Ғұмаровтың өмір жолы мен еңбектеріне тоқталып, ой-пікірлерін, ұсыныстарын ортаға салды.

Тұрарбек   АҚМУРЗИН,

Қазталов   ауданы


Жауынгер еді ұстазым…

Күні: , 47 рет оқылды

Әлеуметтік  желідегі  поштама  түскен  xаттардың  ішінде  «Апа, мен  Разиолла  Қажығалиевтің  қызымын,  қалай  xабарласуға  болады?» деген  жазбаға  көзім  түсті  де,  дереу  жауап  бердім.  Хабарласқанда «Әкем  туралы  мақала  жаздырайын  деп  едім, 9 мамыр  жақын  қалды   ғой…»  деді  мұңды  үнмен.  Кездесуге  келістік.

Уақыт жете ме дүнияда, сөйлесуге мұрша жоқ, қолыма қомақты қоржынды (пакет қой) ұстатты. Сол сәтте жүзінен бір марқа мақтаныш ізі жүгіріп өткендей болды. Қалған сұрақтарды сосын телефонмен сұрап алармын деп келістім. Үйге келген соң қоржын да, ұйқы да шайдай ашылды. Тағдыр тұр бір ғана сөмкеге сыйып. Бізге география сабағын оқытқан Разиолла мұғалімнің біз білмейтін, өзі ешқашан әңгімелемеген тағдыры…

Әскери билет бастаған бір буда құжаттардан соғыс иісі, дұрысы оқ-дәрінің иісі әлі шығып тұрғандай. Сырын ішке бүккен тағдыр әр жерден бір шаңытып, қылаң беріп өтеді. Ол 1925 жылдың 16 тамыз күні Ресейдің Александр Гай ауданында дүниеге келіпті.

Әкесі 1927 жылы  қайтыс болған. Алтыншы кластан соң Фурманов педучилищесінің әзірлік курсының тыңдаушысы болған. Одан кейін Қарағандының Балқашынан бір-ақ шығып, мыс қорыту заводында слесарь болып жұмыс жасаған. Шамасы, ФЗО-ға ілігіп кеткен болуы керек. Кейін 1941 жылы Орал педагогикалық институтына оқуға түскенде соғыс басталады. Жасы он сегізге толуға дәл үш ай қалғанда, яғни 1943 жылдың мамыр айында Қарағанды облысы, Балқаш ауданының әскери комиссариатынан соғысқа аттанады. 1944 жылы, Разиолла аға соғыста  жүргенде анасы  қайтыс  болады.

…Мұғалімнің осал жауынгер болмағанын сарғайған құжаттар жарыса баяндайды. Пулеметші, барлаушы, барлаушылар отрядының командирі, взвод командирі, батальон командирі… Жиырмаға да толмаған балаң жігітті соғыстың қалай ысқаны көрініп-ақ  тұр. Үш рет жараланған, 1944 жылы ІІІ дәрежелі «Даңқ» орденін,

1945 жылы соғыс бітуге екі ай қалғанда «Қызыл Жұлдыз» орденін алған. Медальдар тізбегі жазып  кетсең,  тіпті  көпке  жетеді…

Әскерден 1950 жылы бір-ақ босаған. Еңбек жолдары да қызық болған сияқты. Бірден Фурманов аудандық білім бөлімінде екі жыл инспектор болады. Содан кейін Орал пединститутында бес жыл оқып, диплом алып шығады да, екі жыл Жамбыл облыстық білім бөлімінде инспекторлық қызмет атқарады (ол кезде жолдамамен жіберетін «отработка» деген бар ғой). Одан да елге қайтып келеді. Сол келгеннен зейнетке шыққанша Көктерек орта мектебінде еңбек етті. Әскери дайындық пен географиядан сабақ беретін. «ҚР халық ағарту ісінің озық қызметкері» атағын 1973 жылы алған.

Ал  партияға 1962 жылы ғана кірген. Ол кезде соғыста шайқас алдында топ-тобымен партияға өткізген емес пе жауынгерлерді? Осыған қарап, «ұстазым тумай жатып теперіш көрген емес пе екен» деген ой келеді. Қарасам, аты-жөні де ептеп сыр шертетіндей.  Қажығалиев Разиолла! Тегін ат емес қой. Ресейге жер аударылды ма екен, әлде өздері ауа көшті ме екен… Және бір қызығы, жолдасы  Қара Мөңкенің (Мұрат Мөңкеұлының) ұрпағы болып шықты…

…Ол кісі өзі туралы да, соғыс туралы да ештеңе айтпайтын. Жеңіс күнінде де орден-медальдарын кеудесіне топырлатып тағып шыққанын мүлде көргенім жоқ. Тек қана орден-медальдарының планкілерін ғана тағатын, қатарқатар қылып. Өте жылы, біртүрлі жылы адам болатын. Соғыс туралы сұрасаң, жауап бермей, түсі бұзылып, жылағысы келіп кететін.

«Сендер ондайды көрмеңдер!» дейтін тек қана. Географияның майын тамызатын. Украина, Польшаны айтқанда, картаны шұқып тұрып, аумағын көрсетіп, «мына жерлерді біз табанымызбен басып өттік» дейтін. Оның географиясы ылғи тариxпен байланысып жататын. Германияның саясаты, соғыс жоспары, қай жерге дейін келгені, қалай шегініп, қалай күйрегені туралы жұдырығын түйіп, құлашын жайып құшырлана түсіндіретін. Сосын «Берлинде соғыс солай аяқталды!»  дейтін. Мейірімді көздері сұстанып кететін ондайда. Бірақ өзінің бастан кешкендері туралы, сол Берлинді алушылардың бірі өзі болғаны, сол шайқаста соңғы жарақатын алғаны туралы, тіпті ең болмаса, әскерде жеті жыл жүргені туралы да бәрібір тіс жармайтын. Жүрегінің тұсын сипалап жіберетін сұрақ қоя бастасақ. Қабағы еріксіз жиырылып кететін сосын. «Контузия алған» деп ұлдар қатты сыйлап та, «қолы қатты» деп ығысып та жүретін. Кім біледі, ішінде қандай құпиялар

кеткенін… Олай да бұлай лақтырған тарпаң тағдырдан аман қалғанына тәубе етіп, енді еске ал-мауға тырысқан ішкі қорғанысы ма…, әлде бір өкініш-нала ма, әйтеуір жанарының ар жағында бір тамшы жас іркіліп тұратындай сезілетін. Жан жарасы деген сол ма екен әлде? Қан көргеннен шошынған, ыршыған бозбала-көңіл сол күйі жылады да жүрді ме  екен өмір  бойы.

Биік екенсіз-ау, Ұстаз! Пенделіктен ада, мақтаннан аман, даңғойлықтан тыс, жәй ғана бейбіт күннің бағасын білетін азамат болатынсыз.

…Соғыстан қайтқан солдаттардай қарауытқан орден-медальдарыңызды көргенде жылап жібердім. Мүмкін, жанарыңыздан ақыры төгілмей кеткен Сіздің көз жасыңыз шығар бұл.

Болар-болмас «сылдырмақтарымызды» кеудемізге тағып, «батыр да біз, ер де біз» бола қалатынымыз есіме түсіп, ұялып кеттім. Сондайды алуға құмартып, таласып, қырылып жататынымыз тағы бар-ау…

Маяктар – Сіздер екенсіздер  ғой, қарап тұрсам, мына лағып  бара жатқан біздерге тағы бір сабақ  беріп кетіңіздерші, Мұғалім… 9  мамыр  келе  жатыр.

Дариға   МҰШТАНОВА,

Көктерек   ауылы,

Қазталов   ауданы


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика