Тег: ‘Темірболат ТОҚМАМБЕТОВ’


Қысқы маусымға 97% дайын

Күні: , 34 рет оқылды

Өткен жұма күні облыс әкімі Алтай Көлгінов Орал қаласындағы бірнеше нысанның жылыту маусымына дайындық барысын арнайы барып  көрді.

Биыл облыста жалпы аумағы 40 шақырымдық жылу жүйесін жөндеу қарастырылған. Оның 11,5 шақырымы Орал қаласында болса, қалғаны Ақсайда. «Нұрлы жол» бағдарламасы аясында жалпы құны 2 млрд. теңгені құрайтын ұзындығы 32 шақырымнан асатын жылу желілерін қайта құру бойынша алты жоба іске асырылуда. Бүгінгі күнде Орал қаласында 6 шақырым, ал Ақсайда 15,8 шақырым жылу желісі жөнделді. Сондайақ денсаулық сақтау саласына жататын 35 нысанның 31-і, мәдениет саласына қарайтын 20 нысанның 16-сы, білім саласындағы 49 нысанның 48-і, қырық төрт балабақшаның 42-сі жылыту маусымына дайын. Қазіргі таңда қаламыздағы №19 орта мектеп ғимараты мен «Солнышко» балабақшасына жөндеу жұмыстары жүргізілуде. «Жайықжылуқуат» АҚ бас директоры Мұрат Бәйменовтің айтуынша, биыл үш жылыту қазандығы жөндеуден өткізілген. Сонымен қатар жылыту құбырларының да қысқы мерзімге дайындығы  пысықталды.

– Қаламызды жылумен қамтитын ЖЭС алдағы жылыту маусымына дайын. «Нұрлы жол» бағдарламасы аясында биыл төрт жылу магистралін жөндеуді қолға алған болатынбыз. №7 және №2 жылу магистральдарының жөндеу жұмыстары толығымен аяқталды. №8 жылу магистралінің жалпы ұзындығы 1 175 метрді құрайды. Соның 365 метр құбырлары ауыстырылды. Сол маңдағы 21 тұрғын үй ыстық сумен қамтылды. Қалған 810 метр жылу магистраліне алдағы жылы жөндеу жұмыстарын қайта жалғастыратын боламыз. Енді №4 жылу магистралі жөнделуде. 1986 жылы салынған бұл магистральды жөндеу кезінде сол маңдағы  көп қабатты 4 тұрғын үйге қосалқы жолмен ыстық су беріліп отыр. Жалпы, жылу магистральдарының барлығы қыркүйек айының соңына дейін жөнделіп бітетін  болады, – деді  ол.

Облыс басшысы қаламызды жылумен қамтитын ЖЭС-тың қазіргі жағдайымен танысып, ондағы мамандармен пікір алмасты. Қаладағы 1 160 көп қабатты үйге сынақ жүргізілген. Қазіргі таңда 947 тұрғын үй қысқа дайын деген құжатқа ие. «Жайықжылуқуат»  АҚ бас директорының сөзіне қарағанда, әлеуметтік нысандарға жылу  беру басталуда. Бүгінгі күні шаһарымыз қысқы маусымға 97% дайын.

Облыс басшысы жылыту маусымына жауапты тұлғаларға жұмыстарын тиянақты әрі уақтылы орындауды тапсырды.

Темірболат  ТОҚМАМБЕТОВ,

 «Орал   өңірі»


Жұлдыз жауған түн

Күні: , 34 рет оқылды

Қала күніне орай өткізілген мерекелік шаралар легі шаһарымыздағы П. Атоян атындағы стадионда жалғасын тапты.

Стадион әдеттегідей жұртшылыққа лық толы болды. Әдемі көріністермен бастау алған мерекелік шара жергілікті өнерпаздардың концерттік бағдарламасына ұласты. Кешті танымал әртіс Тәуекел Мүсілім жүргізді.

– Құрметті қала тұрғындары, сіздерді шаһарымыздың туған күнімен шын жүректен құттықтаймын! Қаламыз күннен-күнге көркейіп келеді. Биылғы жылы 3000-нан астам баспана бой көтеруде. Оқу орындарында білім алатын студент жастарға арналып бес жатақхана салу жоспарлануда. Ескірген үйлерді жаңарту жұмыстары алдағы уақытта да жалғасын табатын болады. Жолдар салынып, жаңа көпіріміз пайдалануға берілді.

«Орал» халықаралық әуежайын күрделі жөндеуден өткізу қолға алынуда. Сөйтіп, әдемі де әсем қаламыздың көркін одан сайын шырайландыруға бәріміз де атсалысатын боламыз.

Астана, Ақтөбе, Атырау және сонымен қатар Ресейден келген қонақтарымызға ризашылығымызды білдіреміз. Бүгін Сабантой мерекесін өткіздік. Оған Татарстан президенті Рустам Минниханов келіп, бірнеше нысандарды аралап көрді. Алдағы уақытта зауыттарымыз бір-бірімен достық қарым-қатынаста жұмыс жасап, өңіріміздің экономикасына зор үлесін қосатын болады. Еліміздің дамуына жастарымыздың септігі тиетіндігіне сенеміз. Мереке құтты болсын, – деді салтанатты кеште сөз алған облыс әкімі Алтай Көлгінов. Бұдан соң өңір басшысы «Орал Полимер» ЖШС-ның басшысы Роберт Ирменов, Тимур Әминов («Қаз-Хол» ЖШС), Замир Ықсанов («Караванный Путь» ЖШС), Замир Сәрсенбаев («СВС Батыс» ЖШС), Ольга Попова («ПМК-117» ЖШС), Сергей Потиченко («Альтаир» ЖШС), Валерий Голоухов («Автокомбинат» ЖШС) сияқты бір топ кәсіпорын жетекшілеріне алғысхат табыс етті. Марапатталғандардың қатарында Жанна Кенжина («ДСК Приоритет» ЖШС), «КА-Строй ЛТД» ЖШС-ның участке басшысы Бақыт Бектұрғанов пен аталмыш мекеменің қауіпсіздік жөніндегі инженері Данияр Дәулетбаев та болды. Сондай-ақ шаһар басшысы Мұрат Мұқаев қаламыздағы сала үздіктерін марапаттап, оларға бағалы сыйлықтар ұсынды.

Қашанда қонақжай оралдықтар бұл жолы да қазақ еліне танымал өнерпаздарды асыға күтті. Кеш көркі қызған сәтте қазақ эстрадасының жұлдыздары Айдана Меденова мен Олжас Абай бірнеше ән орындап, оралдықтарға ерекше көтеріңкі көңіл күй сыйлады.

Темірболат   ТОҚМАМБЕТОВ,

«Орал өңірі»


Қала күні қарсаңындағы қоныстой

Күні: , 60 рет оқылды

Кеше Қала күні мерекесіне орай  «7-20-25» мемлекеттік бағдарламасы бойынша Орал қаласының  Депо аумағындағы салынған жаңа  6 қабатты тұрғын үйдің кілті табысталды.

Салтанатты шараға облыс әкімінің орынбасары Бағдат Азбаев, Орал қаласы әкімінің орынбасары Мирболат Нұржанов, тұрғын үйдің құрылысын жүргізген мердігер – «Оралполимер» ЖШС директоры Роберт Ирменов қатысты.

Тұрғындарды Қала күнімен және осы мерекемен орайлас келген қоныстойларымен құттықтаған  облыс әкімінің орынбасары Б. Азбаев бүгінгі таңда қарқынды іске асып жатқан мемлекеттік-жеке меншік серіктестік аясында қаламыздағы көптеген апатты тұрғын үй иелері жаңа пәтерлі болып жатқандығын, биылғы жылдың өзінде бірнеше баспана қолданысқа берілетіндігін айтып өтті. Пәтер иелеріне кілт табыстау рәсімінен кейін Бағдат Оразалдыұлы қоныстой иелеріне «құтты болсын» айтып, пәтерлердің жай-күйін  шолып  шықты.

Айта кетерлігі, мемлекеттікжеке меншік серіктестік аясында қазіргі таңда Оралда 12 үй сүрілді, 11 үйді бұзу жоспарлануда, 5 үйдің құрылысы жүріп жатыр, 1 үй тапсырылса, 7 үйдің құрылысы алдағы  уақытта  басталмақ.

Аяужан  КЕРЕЕВА,

«Орал  өңірі»

Темірболат  ТОҚМАМБЕТОВ

Роберт  ИРМЕНОВ,

«Оралполимер» ЖШС директоры:

– Бүгінгі тапсырылған тұрғын үй – «7-20-25» мемлекеттік бағдарламасы бойынша мемлекеттік-жеке меншік серіктестік аясында салған алғашқы нысанымыз. Жалпы саны 132 пәтердің 32-сі баспаналары апатты деп танылған тұрғындарға берілсе, қалған 100 пәтерді банктер арқылы сатылымға шығардық. Аталған мемлекеттік бағдарлама бойынша тағы 2 үйді тапсыруды жоспарлаудамыз.

Надежда СУРОВА,

Орал қаласының тұрғыны:

– Аталған мекенжай бойынша орналасқан үйден 2006 жылы пәтер сатып алдым. Апатты жағдайдағы баспанамызды мемлекеттік бағдарлама бойынша жаңасына айырбастау мүмкіндігін иеленіп, бүгін 2 бөлмелі пәтердің кілтін алдым. Қуанышымда шек жоқ!


Өлеңтіге жол салынып, Үшанаға су келді

Күні: , 60 рет оқылды

Дүйсенбі  күні  облыс  әкімі  Алтай  Көлгінов  Сырым және  Қаратөбе  аудандарында  жұмыс  сапарымен  болып  қайтты.

Алдымен өңір басшысы Орал – Ақтөбе күре жолының 75-шақырымында әр жолаушы тоқтап, тағзым ететін Дәдем ата деп аталып кеткен Жұмағазы хазірет жерленген  киелі  орынға  соқты.

– Бұл орынға жолаушылар дұға етумен бірге Дәдем атаның басына барып, бұлақтан су алады. Өткен жылы Астана, Алматыдан келген комиссия бұл жерге толықтай талдау жүргізіп, «Қазақстанның 100 киелі орны» тізіміне кіргізген болатын. Дәдем ата қорымының Қазақстанның киелі жерлерінің қатарына енуі зерттеу жұмыстарына жаңалық әкеледі деген сенімдемін. Жұмағазы Хазіретті тану арқылы өлкеміздің тарихы байи түсер еді. Бұл жерге шетелден туристер де көп келеді. Заманауи технологиялар олар үшін түсінікті болады деп ойлаймын. Өзіміз зиярат орнының басынан кітапхана ашуды жоспарлап отырмыз. Көгілдір отын, электр жарығы, ауыз су барлығы тартылған. Тек ауа райының  лайсаң уақытында халық жолдан қиналады. Қатқыл жол болмаған соң мұнда жету өте қиын. Болашақта бұл мекенді үлкен рухани орталыққа айналдыру жоспарымызда бар. Сондай-ақ алдағы уақытта бұл жердің кіреберісіне қақпа орнатып, киелі орындардың қатарына кіргізілгендігі туралы белгі орнатуда ойда бар, – дейді «Дәдем ата» қорының  директоры  Ғарифолла  Жанбозов.

– Бұл жер өңір халқының көп келетін, киелі орындарының бірі. Жол тарту мәселесі көп жылдардан бері айтылып келеді. Алдағы уақытта өтетін облыстық мәслихаттың кезекті сессиясында қаражат қаралады. Сосын жобалық-сметалық жобасын жасақтап, көктемде жол салу жұмыстарын бастау керек. Мұны Сырым ауданының әкімі Төлеген Төреғалиевке жолдың жобалық-сметалық құжатын дайындауды тапсырамын, – деді облыс әкімі Алтай Көлгінов.  Алдағы уақытта әкімнің ұсынысына орай әулиенің өмірбаянынан сыр шертетін заманауи технологияларды пайдалану немесе QR-код орнату мәселелерін қолданбақ.

Сондай-ақ өңір басшысы Сырым ауданы орталығымен іргелес орналасқан Өлеңті ауылындағы қашықтығы 1000 метрді құрайтын жаңа тас жолдың құрылысымен танысты.

Мердігер «АнушҚұрылыс» ЖШС тапсырылған жұмысты тамыз айына дейін толық аяқтады. Орындалған жобаның мемлекеттік қабылдауы әлі болған жоқ.

Өңір басшысы жаяу жүргінші  жолдарының  салынуын  тапсырды.

Сонымен қатар облыс әкімі Қаратөбе ауданына қарасты Үшана ауылында «Өңірлерді дамыту – 2020» бағдарламасының «Ақбұлақ» бағыты аясындағы таза ауыз судың іске қосылу салтанатының  куәсі болды. Қаратөбе су қоры көзінен Шөптікөл, Үшағаш, Соналы, Сулыкөл және Үшана елді мекендеріне таза ауыз су жүргізіліп, ауылдағы ағайынды қуантуда. Бес елді мекенді сапалы ауыз сумен қамтыған жобаға бюджеттен 915 041 96 млн. теңге бөлінген. Су құбыры желісінің жалпы ұзындығы 128, 762 шақырымды құрайды. Бас мердігер «KazConstructionGroup» ЖШС-ның бас директоры Мұратбек Мұхамбедиевтің айтуынша, Қаратөбе су қоры көзінен Үшана ауылына дейінгі елді мекендерге  су құбыры желісі толықтай тартылған. Нәтижесінде 823 нысан су жүйесімен жабдықталып, бес елді мекендегі 4231 тұрғын  таза  ауыз  сумен  қамтылды.

– Елбасымыз елді мекендерге таза  ауыз су жеткізу жөнінде тапсырма берген болатын. Сол тапсырмасына сәйкес қазіргі таңда Қаратөбе ауданына қарасты бес елді мекенге таза ауыз суы келіп жетті. Бұның өзі мемлекеттің халыққа  деген қамқорлығы. Осыдан екі ай бұрын Елбасымыз өңірімізге келіп, көптеген өзекті мәселенің шешілуіне үлкен қолдау білдірді. Қазталов – Жәнібек аудандары арқылы Бөкей ордасы ауданы, оның ішінде Хан ордасына дейін 336 шақырым жол жөнделетін болды. Орынборға баратын 144 шақырымдық тас жол салынады. Екі жылдың ішінде 110 елді мекенге ауыз су жеткізілді. Яғни 2 мың шақырым су құбыры тартылды. Өткен жылы жұмыстың бастамасын қарап кеткенбіз. Міне, бүгін сіздердің қуаныштарыңызға ортақтасайық деп келіп отырмыз. Сол келген сапарымызда медициналық пунктті қалпына келтірілсе деген ұсыныс айттыңыздар. Осы орайда Елбасымыздың «Рухани жаңғыру» бағдарламасының «Туған жер» жобасы аясында өз қаражаты есебінен Мұратбек Мұхамбедиев бауырымыз сіздерге медициналық пункт салып берді. Елге деген жанашырлық танытып жатқан осындай азаматтарға алғысымызды білдіреміз, –  деді  Алтай  Сейдірұлы.

– Біз ширек ғасырға жуық тұщы судан қиындық көрген халықтың біріміз.

Аудан орталығынан 60 шақырым қашықтықта орналасқан Үшана ауылының тұрғындарына бұған дейін қысы-жазы аудан басшыларының көмегімен ауыз суды тасымалдап тұрды. Кезінде осыдан 18 шақырым жердегі Сулыкөл ауылынан техникамен ауылымызға ауыз су жеткізіп тұратын еді. Одан бөлек үшаналықтар қар суын ерітіп ішкен кездерімізде болды. Міне, сол қиындықтардың бәрі  бүгінде артта қалғандай. Өткен жылы басталған жұмыс бүгін аяқталып, «Ақбұлақтың» игілігін көріп отырмыз. Бұған ауылымыздың үлкен-кішісі  дән ризашылығын білдіруде. Бұның өзі үлкен қуаныш, – дейді Үшана ауылының  тұрғыны  Аман  Жүсіпқалиұлы.

Үшаналықтардың таза ауыз суға қол жеткізгендігіне куә болған өңір басшысы одан әрі жоғарыда айтылған Мұратбек Қайырсапаұлының жеке қаражатымен салып берген медициналық пунктінде болды. Қос бірдей жақсылыққа кенеліп отырған үшаналықтардың қуанышында шек жоқ.

– Ауыл халқының ем-домын алуға жағдай жасап отырған Мұратбек Қайырсапаұлына үлкен рақметімізді айтамыз.

Осындай жарық әрі кең ғимаратта қызмет жасағанымызға қуанамыз. Құрал-жабдықтары жеткілікті, – дейді ауыл фельдшері  Жұмагүл  Дүйсенова.

Темірболат   ТОҚМАМБЕТОВ


Тәуелсіздігіміздің жауһары

Күні: , 37 рет оқылды

Астана  күні  қарсаңында ҚР  Тұңғыш  Президенті  алаңында    «Астана – ұлы дала  елордасы»  атты  мерекелік  концерт  өтті.

Бүлдіршіндерін ерткен қала тұрғындары мерекелік шараны тамашалауға арнайы жиналды. Салтанатты шарада сөз алған облыс әкімінің орынбасары Ғабидолла Оспанқұлов жиылғандарды Астананың 20 жылдық мерекесімен құттықтады.

– Астана – біздің ұлы даламыздың, тәуелсіздігіміздің жауһары іспетті. Көзді ашып жұмғанша өте шыққан 20 жылда Астанада қаншама еңбек атқарылды. Аз ғана уақыттың ішінде дүние жүзіне белгілі ғимараттар бой көтеріп, дүниежүзілік шаралар, бітімгершілікке шақырған жиындар өтті. Күні кеше ғана Астананың төрінде, «Жеңіс» даңғылының бойында М. Мәметованың ескерткіші бой түзеген «Ақжайық» тынымбағын астаналық тұрғындарға  табыстадық.  Тынымбақтағы бүлдіршіндерге  арналған ойын алаңы мен әуенді субұрқақты тамашалаған астаналықтар батысқазақстандықтарға шынайы ризашылығын білдіруде. Астанамыздың 20 жылдық мерекесі құтты болсын! – деді  Ғабидолла Абдоллаұлы.

Мерекелік шарада  ҚР Президентінің Жарлығымен әр салада еңбек етіп жүрген бірнеше  өңір тұрғындары еліміздің  қалыптасуы мен дамуына қосқан елеулі үлесі үшін «Астанаға – 20 жыл» мерекелік медалімен марапатталды. Олардың қатарында «Домостроитель» өндірістік кооперативінің директоры В. Власов, облыстық клиникалық аурухананың дәрігері  С. Қайыпбергенов, №8 облыстық дарынды балаларға арналған мамандандырылған мектебінің мұғалімі С. Шаяхметова, облыстық экологиялық-биологиялық орталығының директоры  Ф. Кержикова  бар.

Мерекелік концертте жергілікті өнерпаздарға қоса, өзге облыстардан арнайы келген әншілер қала тұрғындарына көтеріңкі көңіл күй сыйлады.  Әсіресе, «Тәуелсіз елміз»  композициясы, дәстүрлі әндер шеруі жиылған жұртшылыққа  әдемі  әсер  сыйлады.

Гүлжамал   ЖОЛДЫҒАЛИ,

«Орал   өңірі»

Суреттерді  түсірген  Темірболат  ТОҚМАМБЕТОВ


Он шақырымдық «DUATHLON»

Күні: , 48 рет оқылды

Орал қалалық мәдени және демалыс саябағында Астана қаласының 20 жылдығына арналған «DUATHLON» жарысы  өтті.

Спортты жанына серік еткен 150-ге жуық қала тұрғыны жалпы қашықтығы 10 шақырымды құрайтын жолды жүгіріп өтті. Оның  2,5 шақырымын жаяу жүгіріп, бес шақырымын велосипедпен жүріп, қалған 2,5 шақырым  қашықтығын жаяу жүгірді. Сайысқа дуатлоншылармен бірге облыс әкімі Алтай Көлгінов пен қала әкімі Мұрат Мұқаев та қатысып, белсенділік танытты.

Баршаңызды сүйікті қаламыз, еліміздің жүрегі, Елордамыз Астананың 20 жылдығымен құттықтаймын! Сіздерге өзімнің, әріптестерімнің атынан шынайы ризашылығымды білдіргім келеді. Мерекелік демалыс екеніне қарамай, таңғы жетіде спортты қолдап, он шақырымдық қашықтықты жүгіру және велосипедпен жүру – ол үлкен күшті талап етеді.  Елбасы бізге спортты дамыту барысында барлық жағдайды жақсартуды міндеттеді. Соны қазіргі таңда атқарып келеміз. Жыл сайын жаңа спорт алаңдары, спорт кешендері, стадиондар бой көтеруде. Шалғай ауылдарда мектеп, балабақшалар, соның ішінде спорт алаңдары салынуда. Өткен жылдан бері 50 аула абаттандырылды, оның жиырмасында спорт алаңқайлары салынды. Біз мұнымен тоқтамаймыз. Жастар стадионын қайта жаңғыртып тапсырдық. Ол жерде жазда футболмен, қыста допты хоккеймен айналысуға болады. Оралдың табиғаты спортпен айналысуға, денсаулықты күтуге керемет. Шаһардың өзі саябақ. Елбасымыз келгенде «Ең таза қалада тұрасыңдар» деп пікірін білдірді. Табиғатымызды сақтау үшін еңбек етуіміз керек. Ол үшін денсаулық, ал денсаулықты түзеу үшін спортпен айналысу қажет. Спортық шараны қолдағандарыңызға рақмет. Өңірлердің дамуы – елдің дамуы. Біз Астанаға қарап бой түзейміз. Мейрам құтты болсын! – деді облыс әкімі Алтай Көлгінов.

Дуатлон жарысында ерлер арасынан Станислав Грицкевич бірінші орынды жеңіп алса, екінші және үшінші орындарды Артур Жүгінісов пен Әбілшайық Ерғалиев өзара бөлісті. Әйелдер арасында Анастасия Вавилина үздік деп танылды. Дария Черноярова екінші, Гүлзада Хабиева үшінші орынды иеленді. Спорттық шаралар да әрдайым белсенділік танытып жүрген Даниял Мырзағалиевте  арнайы сыйлықпен марапатталды.

Темірболат  Тоқмамбетов,

«Орал  өңірі»


«Ақжайық» астаналықтардың сүйікті орнына айналмақ

Күні: , 168 рет оқылды

Кеше елордада «Ақжайық» тынымбағы ашылды. «Өңірлердің Астанаға тартуы» жобасы аясында Батыс Қазақстан облысы салған бұл тынымбақтың ашылу салтанатына ҚР Президенті Нұрсұлтан Назарбаев қатысты.

Мемлекет басшысы шара барысында қазақтың қаһарман қыздарының бірі, Кеңес Одағының Батыры Мәншүк Мәметованың ескерткішіне гүл шоқтарын қойып, тынымбақты аралап көрді. Содан кейін Елбасы облысымыздың жұртшылық өкілдерімен, елордадағы «Сарыарқа» ауданының тұрғындарымен және Мәншүк Мәметованың туыстарымен әңгімелесті. Нұрсұлтан Әбішұлы «Өңірлердің Астанаға тартуы» жобасының елорданы әлеуметтік әрі мәдени тұрғыда дамыту ісіндегі маңыздылығын атап өтті. Елбасының сөзіне қарағанда, 20 жыл тарих үшін қас-қағым сәт. Дегенменде осы уақыт аралығында елдегі тыныштықтың, халқымыздың бірлігінің арқасында еңселі елордамыз 1 млн.-нан аса тұрғыны бар Алаш жұртының асқақ айбарына айналды.

Шара барысында облыс әкімі Алтай Көлгінов батысқазақстандықтар атынан елордалықтарды мерекемен құттықтады.

– Біз Астанамыздың 20 жылдығына арнап елордалықтарға тынымбақты тарту етіп отырмыз. Бұрын дәл осы жерде ескі үйлер болған. Астана қаласы әкімдігінің көмегімен ол үйлер бұзылып, инженерлік инфрақұрылымдар ауыстырылды. Біз 1,5 гектар жерді алып жатқан жерге абаттандыру жұмыстарын жүргізіп, жарық шамдарды орнаттық. Мұнда амфитеатр, балалар ойын алаңы, кітап оқуға арналған орындар, әуенді субұрқақ, лабиринт, баскетбол және жүгіру алаңдары бар. Бұл тынымбақ Жеңіс даңғылының бойында болғаннан кейін онда Кеңес Одағының Батыры Мәншүк Мәметоваға арнап ескерткіш орнатуды жөн көрдік. Себебі, Мәншүк Мәметова – тек бір өңірдің емес, барша қазақ елінің батыры. Сондықтан бұл ескерткіштің Астанада тұруын заңдылық деп санадық, – деді облыс әкімі Алтай Көлгінов.

Аталмыш ескерткіштің авторы – елімізге танымал мүсінші Мұрат Мансұров.

Бұған дейін Қазақ хандығының 550 жылдығына, Керей мен Жәнібек хандарға, Оралдағы Құрманғазы мен Динаға арналған ескерткіштер сияқты туындыларды өмірген әкелген Мұрат Амангелдіұлының айтуынша, биіктігі 6,1 метрді құрайтын ескерткіш 4-5 айдың ішінде жасалды. Жалпы, мүсіннің өзі қола болса, тұғыры гранит тастан тұрғызылды. Ескерткіш батырдың фотосуреттеріне қарап және Оралдағы М. Мәметова атындағы мемориалдық музейдің өкілдерімен ақылдасып жасалды.

Темірболат  ТОҚМАМБЕТОВ,

Астана  қаласы


«Жол саласына инвестиция тарту қажет»

Күні: , 46 рет оқылды

Бүгінде  облыста  өндірілген  өнімдерді  Қытайға  экспорттау мақсатында   жұмыстар  жүргізілуде.  Аспан  асты  елінің  нарығында  батысқазақстандық  бизнесмендер  үшін  жаңа  мүмкіндіктер  ашылмақшы.

Бұл туралы облыс әкімі  Алтай Көлгінов  инвестициялар тарту жөніндегі кеңес отырысында мәлімдеді. Жиынға «Kazakh Invest» ҰК» АҚ  басқарма төрағасының орынбасары Біржан Қанешев арнайы қатысты.

Басқарма төрағасының орынбасары Біржан Қанешев айтып өткендей, былтыр құрылған ұлттық компания бүгінде еліміздегі жобалардың жүзеге асуына инвестиция тартумен дендеп айналысып жатыр. Олар ел үшін маңызды жобаларды жинақтап, үкімет қарауына  ұсынады.

«Kazakh Invest»  ҰК» АҚ-ның облысымыздағы өкілдігінің директоры Әнуар Ниетқалиевтың айтуынша, аймақтық өкілдік жергілікті атқарушы құрылымдармен, қаржы институттарымен бірлесіп, белсенді жұмыс жасауда. Өз сөзінде ол облыстағы инвестиция қажет ететін  құны 739 млн. АҚШ доллары болатын жаңа 9 жобамен және жалпы сомасы 2,6 млрд. АҚШ долларына тең  қолданыстағы 11 жобамен таныстырды. Олардың ішінде құс фабрикасын кеңейту мақсатында бройлерді жемдейтін 24 қосымша орын салуға арналған инвестициялық жоба бар. Егер ол жүзеге асса, «Жайық ет» ЖШС жылына 7 мың тонна бройлер етін дайындайды. Ал «Eurasian Logistics» ЖШС көлік-логистикалық орталығын салуды жоспарлап отыр. Сонымен қатар жобада отель, жанармай құю бекеті мен ауыр жүк көліктерін жуатын орын да қарастырылған. Ауыл шаруашылығы кешеніне қатысты «Батыс Марка Ламб» ЖШС ұсақ мал бордақылайтын алаң құрылысын салу жобасын  жүзеге  асырғысы  келеді.

Осы жерде Алтай Сейдірұлы «Crown Батыс» ЖШС-ның бордақылау алаңын модернизациялау жөніндегі жобасы бойынша ұлыбританиялық компаниямен меморандумға қол қойылғанын атап өтті. Бұл жұмыстар жақын күндері  басталмақшы.

Басқосуда сондай-ақ асфальт-бетон зауытының жобасы таныстырылды. Инвестор «Адал Арна Алматы» ЖШС өкілі Борис Горловтың айтуынша, Бөрлі ауданының Пепель разъезінде салынатын зауыт жобасының құны шамамен 2,5-4,0 млн. АҚШ долларын  құрайды.

– Облыста жолдарды жөндеу басты басымдыққа ие. Сондықтан да инвестицияны осы салаға тарту қажет. Өкінішке орай, біздегі асфальт-бетон зауыттары заманауи стандарттарға сәйкес емес.

Ал бұл зауыт жаңа технологияларды қолданатын болса, келешегі бар жоба болғалы тұр. Облыстағы жол салумен айналысатын кәсіпорындардың деңгейі де төмен. Сол үшін жол кәсіпорындары инвестиция тартып, өздерінің материалдық-техникалық базаларын модернизациялауы керек. Жол салуға қажетті шикізаттың болмауы да бұл сала  жұмысының қарқынын төмендетіп, сапасына кері әсер етеді. Инвесторлар битум шығаруды ойластыру керек деп ойлаймын. Өйткені битум сапалы болса, асфальт та сапалы болады, – деді Алтай Сейдірұлы.

Тасқала ауданында тез пісетін алма бағын қалыптастыру жобасымен «ТексасЭдвансдРисечСенте» ЖШС директоры Газиз Исаев таныстырды. Бұл жобаны жүзеге асыруға өңірдің экологиялық және климаттық жағдайы сәйкес келеді. Оған қолдау білдірген облыс басшысы өңірге тап осындай интенсивті бақша қажет екенін атап өтті. Аталмыш компанияның елімізде жұмыс тәжірибесі бар. Ауыл шаруашылығы министрлігінің мәліметіне сәйкес, елімізде алманың 40 пайызы импортталады екен. Соның ішінде біздің де облыс бар. Егер түрік компаниясының жұмысы жақсы жүрсе, облыстағы бағбандардың да олардан бағбандықтың жаңа қыр-сырын үйренуге мүмкіндіктері болмақ. Ал мұндай тез пісетін бақтар Алматы және Түркістан облыстарында  жақсы  дамыған.

Инвесторлардан соң мінберге шыққан ҚР Мемлекеттік қызмет істері және сыбайлас жемқорлыққа қарсы іс-қимыл агенттігі БҚО бойынша департаментінің басшысы Болат Исақов «Инвестиция мен бизнесті сыбайлас  жемқорлықтан қорғау» жобасымен таныстырды. Оның хабарлауынша, «DOING BUSINESS 2018» рейтингісі бойынша Қазақстан 190 елдің арасында 36-орын иеленеді. Бүкіләлемдік экономикалық форум шеңберінде айтылған 2016-2017 жылдардағы жаһандық бәсекеге қабілеттіліктің индексінде әлемнің 138 елі арасында Қазақстан 53-орын алған. Ал инвесторларды қорғау бойынша еліміз 2011 жылдан бері 36-орыннан 3-орынға көтерілген.

Өз кезегінде сөз алған Бөрлі ауданының әкімі Санжар Әлиев ауданның инвестициялық әлеуеті туралы жан-жақты баян етті. Елбасы тапсырмасының бірі – көлік-логистикалық инфрақұрылымның тиімділігін арттыру. Соған орай ауданда транзиттен түсетін кірісті көбейту шаралары алынбақ. Бұл мемлекеттің инфрақұрылымға жұмсаған қаражатын аз уақыт ішінде қайтарып алуға мүмкіндік береді.

– Аудан аумағында республикалық маңызы бар 100 шақырымнан асатын «Подстепный – Елек – РФ» аутокөлік жолы бар. Біз жүк ағынына талдау жүргізіп, ағымдағы жылдың бес айында тек Ресей Федерациясының шекарасынан 17 мың дана аутокөлік өткенін анықтадық. Аудан аумағындағы аутокөлік жолы учаскелеріндегі жол жиегіндегі жолаушыларға қызмет көрсететін орындар  жоқ. Тек Бөрлі ауылында екі жол бойындағы кафе және 2016 жылдан бері тоқтап тұрған жанармай құю стансасы бар. Жол жиегінде қызмет көрсететін нысандар ұлттық стандарттарға сәйкес келмейді, – деген Санжар Жұматайұлы осы олқылықтарды жою үшін арнайы шаралар қолға алынғанын айтты.

Ауыл шаруашылығы саласына тоқталған аудан әкімінің айтуынша, ауданда картоптан басқа көкөністер, сүт және ет өнімдері өзге өңірлерден әкелінеді. Сүт және ет өнімдерін өндіру және қайта өңдеумен «Нұр» шаруа қожалығы мен «Шайдецкий» жеке кәсіпкерлігі айналысып келеді. Шағын жылыжайлар салу жобасын жүзеге асыру бойынша жұмыстар басталған. Аудан аумағында қуаттылығы 1МВт болатын 50 жел генераторын қондыру жоспарлануда. Бұл үшін Ақсай қаласының солтүстік бөлігінде 100 га жер телімі 49 жылға пайдалануға берілген.

Әлеуеті зор инвестициялық жобаларға қолдау көрсететін кеңес барысында өңірдегі инвестициялық климатты жақсарту бағытындағы жобалар жан-жақты талқыланып, облыс басшылығы тарапынан  тиісті  тапсырмалар  берілді.

Ясипа  РАБАЕВА,

«Орал  өңірі»

Суреттерді  түсірген  Темірболат  ТОҚМАМБЕТОВ


«Салалық кәсіпорындар бәсекелестікке сай жабдықталуы керек»

Күні: , 56 рет оқылды

Кеше  ҚР  Қорғаныс  және  аэроғарыш  өнеркәсібі  министрі  Бейбіт  Атамқұлов  жұмыс  сапарымен  Орал  қаласына келді. Министр  облыс  әкімдігі ғимаратында  өткен  жиында облыс бойынша  индустрияландыру  және  қорғаныс  өнеркәсібіне  қатысты  тапсырмалардың  уақтылы  орындалуын Елбасы  басты  назарда ұстап отырғанын айтты.  Жиынға  облыс  әкімі   Алтай Көлгінов, қорғаныс  саласына  қатысты  өнім  шығаратын  зауыттардың  басшылары,  шекара  қызметі  және  құқық  қорғау  құрылымдарының өкілдері  қатысты.

– Бір ай бұрын мемлекет басшысы Батыс Қазақстан облысында жұмыс сапарымен болып, қорғаныс өнеркәсібі кәсіпорындарын көріп, оларды жаңғыртуға байланысты нақты тапсырмалар берген еді. Бүгін соған қатысты негізгі бағыт-бағдарды саралап, көтерілген мәселелерді талқылаймыз. Оның ішінде салалық кәсіпорындарды бәсекелестікке сай жабдықтау жайы қамтылады. Облыста қорғаныс өнеркәсібінің төрт кешені орналасқан. Бұл бағытта 2 мыңдай адам еңбек етеді. Өңірдегі қорғаныс өнеркәсібінің кәсіпорындары былтыр 13 млрд. теңгеге жуық өнім шығарды, – деді  ҚР Қорғаныс және аэроғарыш өнеркәсібі министрі Бейбіт Атамқұлов.

Министр сол күні «Батыс Қазақстан машина жасау компаниясы» АҚ кешені мен «Зенит» зауытында болды. Айта кетейік, «Зенит» зауытында 1993-2017 жылдар арасында еліміздің Қарулы күштеріне сыйымдылығы 240 тоннаға дейін жететін 27 катер мен кеме шығарған. Былтыр кәсіпорын шығарған өнім құны 8,7 млрд. теңгені құрады. Биылғы қаңтар-мамыр айларында 640 млн. теңгеге жуық өнімді шығарды. Бұл өткен жылғы есептік көрсеткіштен 87,7%-ға төмен. ҚР ҰҚК шекара қызметі сұранысы үшін «Барыс» кемесін шығаруға және екі кемені жеткізуге келісім жасалған. Қазіргі уақытта кәсіпорын жүктемесінің 25%-ын құрайтын  бұл  тапсырыс  жеткіліксіз  көрінеді.

«Батыс Қазақстан машина жасау компаниясы» АҚ кешенінде 500-ден астам адам еңбек етеді. Бұл компания Орталық Азия мен Қазақстан аумағына қару-жарақ пен оқ дәрі, сонымен қатар мұнай-газ жабдықтарын шығарады.

Биылғы қаңтар-мамыр айларында кешен өнімінің көлемі 1813,4 млн. теңгені құраған. Яғни, былтырғы көрсеткішпен салыстырғанда 9,9%-ға аз.

Нұртай   ТЕКЕБАЕВ,

Орал   қаласы

Суретті  түсірген  Темірболат  ТОҚМАМБЕТОВ


«Сапалы сервис болса, туризм жанданады»

Күні: , 52 рет оқылды

Сенбі  күні облыс  әкімі  Алтай  Көлгінов  жұмыс  сапарымен  Теректі  ауданында  болды.  Ондағы  құрылыс  жұмыстарының  жай-жапсарымен  танысып,  тұрғындармен  де  жүздесті.

Облыс басшысы алдымен аудан орталығы – Федоровтағы үш қабатты 36 пәтерлік тұрғын үй құрылысының басында болды. Тұрғын үй кезегінде тұрған теректіліктерге жалға берілетін бұл үйді  «Альтаир» ЖШС-ы салып жатыр. Бүгінде іргетасын  құю жұмыстары басталған үйдің үш бөлмелі пәтердің аумағы 70 шаршы метр, екі бөлмелі пәтер 50 шаршы метр болмақ. Бұл нысанға жергілікті және республикалық бюджеттен 436 688,14 мың теңге бөлініп отыр.

– Үйдің алды, айналасы әдемі болу керек. Сондай-ақ ауыл тұрғындарын осы жерде жұмыспен қамту қажет. Ең бастысы, жұмыс сапалы болсын. Ал қаражат жағынан мемлекет қолдау көрсететін болады, – деген Алтай Сейдірұлы үй ауласының абаттандырылуына ерекше мән беру керектігін атап айтты. Маусым айында құрылысы басталған бұл үйді мердігер қараша айында  табыстауды көздеп отыр. Алты техника мен 15 адам жұмылдырылған құрылыста жұмыс көлемі ұлғайған жағдайда жұмысшы саны елу  адамға  дейін  көбеймекші.

Бұдан соң Алтай Сейдірұлы осы ауылдағы бір қабатты 16 арендалық тұрғын үймен де танысты. Мердігер «Өтеш» ЖШС-ның учаске бастығы Ақболат Ізболатовтың айтуынша,  бұл  үй  Астана күні қарсаңында тұрғын үй кезегінде тұрған жандарға берілмек. Әр үйдің жалпы көлемі 80,7 шаршы метрді  құрайды.

Ауыл тұрғындары мен облыс басшысы осы су жаңа үйлердің қасында  кездесті.

– Теректі, біз апта ішінде аралап шыққан оныншы аудан болып отыр. Сапар барысында Президент ұсынған бағдарламалар бойынша атқарылып жатқан жұмыстармен танысып,  тұрғындармен кездесіп, ақылдасып жүрміз. «Нұрлы жер» бағдарламасы бойынша кезекте тұрған теректіліктер үшін екі үй салынып жатқанын көрдік. Осының өзі – аудан дамуының бір көрсеткіші. Ауылдық жерлерде де баспаналар бой көтеруде. Алайда құрылыс жұмыстарын жүргізгенде әркім өз қалауынша емес, заман талабына және  егжей-тегжей жоспарға сай салулары керек. Құрылыс сапалы, ыңғайлы болғаны жөн. Қарап отырсақ, үйлерді саламыз, ал аулада бір тал жоқ, алды тып-тықыр болып тұрады. Тал-теректі міндетті түрде әкім келіп егіп беруі керек емес шығар. Күзде, көктемде ауыл тұрғындары жұмылып, ағаш екендері жөн. Әсіресе, жастар атсалысуы қажет. Ал  Шалқар көліне келетін болсақ, ол – біздің байлығымыз. Біріншіден, көлді таза ұстауымыз, екіншіден, туристерді тартуымыз керек. Сапалы сервис болса, туризм де жанданады, – деді халықпен кездескен Алтай Сейдірұлы.

Ауыл тұрғындары алдында аудан әкімі Кәрім Жақыпов  Теректінің әлеуметтік-экономикалық дамуы жөнінде баяндады. Аудан  басшысы айтып өткендей, Жайық-Шалқар каналына су жіберетін шалқымалы-насосты бөгет құрылысы жүріп жатыр.  Мердігер «Real Story Invest» ЖШС салып жатқан құны 133,444 млн. теңге болатын бөгет іске қосылған жағдайда  19 мың гектар жер суландырылып,  40 шақырымнан астам жерге Жайықтың суы жеткізілетін болады. Ал ол жерлерде осы суды пайдаланатын  30-дан  астам шаруа қожалығы бар. Яғни бөгеттің  мал өсірген ағайынға пайдасы  шаш етектен болғалы тұр. Сарыөмір ауылында «АлатауАльданАгро» ЖШС аумағы 867, 36 м2 болатын 46 орындық сауықтыру лагерін салуда. Ол үшін жергілікті бюджеттен 101, 333 млн. теңге қаражат бөлінген.  Ақжайық елді мекенінде де үш қабатты көп пәтерлі тұрғын үй салынуда. Үй мен оның инженерлік инфрақұрылымына облыстық қазынадан 85,9 млн. теңге бөлінген. Аудан басшысы  мал және егін шаруашылықтарының  да  жай-күйіне  тоқталды.

Одан әрі Алтай Сейдірұлы «Подстепный-Федоров-РФ шекарасы» тасжолының күрделі жөндеу жұмыстарымен танысты. «ТүркістанЖолСервис» ЖШС салып жатқан жолға республикалық және жергілікті бюджеттен 2,597  млрд. теңге бөлінген. Жалпы  ұзындығы 19,363 шақырым болатын бұл тас жол 4-санатты жолға жатады. Аудандық маңызы бар бұл жол төсемінің кеңдігі 10,0 метр болмақ.

«Махорин» ЖШС-да болған әкім ондағы шаруашылық жайымен танысты. Негізінен мал және өсімдік шаруашылықтарымен айналысатын серіктестікте бүгінде жетпіс адам еңбек етуде. Өткен жылы 4,700 млн. теңге демеуқаржыға қол жеткізген. Шаруалардың айтуынша, 1200  га егілетін еркекшөп ауа райының қолайсыздығына байланысты жөнді өспеген. Сондай-ақ 600 га алқапқа судан шөбін  еккен. Жалпы, биыл мал азығын жеткілікті етіп даярлауға мүмкіндік бар. Қазір серіктестікте 1300 ірі қара бар болса, жыл соңына дейін олардың санын 1600-1700 жеткізу жоспарланып отыр.

– Жуырда өңірге келіп кеткен Президент Нұрсұлтан Әбішұлы Назарбаев облыстағы жолдарға бөлінетін қосымша қаражатқа қодау білдірген болатын. Оралдан  Орынборға баратын 144 шақырым жол шекараға дейін жөнделмекші. Ол үшін Елбасы тапсырмасымен үкімет тарапынан қаражат бөлінеді. Биыл жолдың жобалау-сметалық құжаттары дайындалады. Келер жылы екінші санатты төрт жолақты жол құрылысы басталмақ. Ал бұл жолдың теректіліктер үшін маңызы зор болмақ. Жолдың сапасы адам өміріне де, экономикаға да әсер етеді. Сондықтан да қауіпсіздікке баса мән беріледі. Жол салу тұрғындарды  жұмыспен қамтуға  да оң ықпал етпек. Күні бүгін ауданда  450 шақырымнан астам жолды жөндеу басталды. Оларға  қажетті қаржының басым көпшілігі республикалық бюджеттен бөлінуде. Жасалып жатқан жұмыстардың барлығы бақылауды қажет етеді, сондықтан да жергілікті жерлерге арнайы барып танысудамыз. Тұрғындарды мазалайтын тағы бір мәселе – таза ауыз сумен қамту. Өткен жылы облыстағы 55 елді мекенге су берілсе, биыл 50 елді мекен қамтылмақ. Бұл жұмыстар сол ауылдардың тұрғындарының ертеңгі күнге деген сенімін нығайтады, су сапасын жақсарту арқылы тұрғындар денсаулығын да жақсартамыз. Жасыратыны жоқ, сумен қамтуда біздің облыс республика бойынша соңынан санағанда үшінші орында тұр. 2020 жылы сумен қамтуды 55 пайызға жеткізгіміз келеді. Жалпы, екі жыл ішінде өңірімізде 2000 шақырым  су құбыры жүргізілді. Ал Теректі ауданында  5 млрд. теңге қаражатқа үлкен жұмыстар атқарылуда. Олардың ішінде жеті  елді  мекенге газ жүргізу, 52 шақырым жол салу, екі ауылға ауыз су өткізу бар.

Ауданды аралаудағы мақсат – жергілікті жерлерде «Нұрлы жер», «Нұрлы жол» бағдарламаларының және «Президенттің бес әлеуметтік бастамасының» жүзеге асу барысын қарау. Бұл іс-шаралардың Теректі  ауданында  да жақсы жүріп  жатқанының куәсі болдық, – деді  Алтай Сейдірұлы сапар соңында  журналистерге  берген  сұхбатында.

Ясипа   РАБАЕВА,

«Орал   өңірі»

Cуреттерді  түсірген  Темірболат  ТОҚМАМБЕТОВ


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика