Тег: ‘Нұртас НАБИОЛЛАҰЛЫ’


Жеңістің алғашқы шеруі

Күні: , 44 рет оқылды

Осыдан  тура  73  жыл  бұрын  алғашқы  Жеңіс  шеруі  24  маусымда  Мәскеу  қаласында  өткені  тарихтан  белгілі.  Осы  атаулы  күнге орай  Орал  қаласындағы ҰОС  және  еңбек  ардагерлері  жылдағы дәстүр  бойынша биыл  да  бас  қосты.  Аталмыш  жиынға  облыс әкімі Алтай  Көлгінов  арнайы  қатысып,  ардагерлерді  құттықтап, сый-құрмет  көрсетті.

– 1945 жылы 24 маусымда Мәскеу қаласында өткен Ұлы Жеңістің алғашқы шеруінде 15 мың адам сапқа тұрған болатын. Аталмыш шеруге бүгінгі Батыс Қазақстан облысы бойынша екі-ақ адам қатысқан екен. Оның бірі бүгінде марқұм болған, 1916 жылы дүниеге келіп, соғыстан кейінгі бейбіт өмірде аудандық атқару комитетінде төраға, бірінші хатшы қызметтерін абыройлы атқарып, елге танылған азамат Мырзахмет Тәжмұқанов болса, екіншісі – ҰОС ардагері, бүгінде Орал қаласы мен Батыс Қазақстан облысының құрметті азаматы атанып отырған КСРО және Қазақстан прокуратурасының құрметті қызметкері Иван Гапич. Иван Степанович  1923 жылы 2 ақпанда осы күнгі Астана, бұрынғы Ақмола қаласында дүниеге келіпті. Ұлы Отан соғысы жылдарында Польша, Чехословакия, Украинаны азат етуге қатысқан. Оның зейнетке шыққанша 20 жыл үздіксіз қызмет еткен ұжымы – Батыс Қазақстан облысының прокуратурасы. Нақтырақ айтқанда, 1966-1986 жылдар аралығында Батыс Қазақстан облысы прокурорының бірінші орынбасары лауазымын атқарған. Иван Гапич «Ерлігі  үшін», «Кенигсбергті алғаны үшін» медальдарымен, «Қызыл Жұлдыз»,  үшінші дәрежелі жауынгерлік Даңқ, «Құрмет» ордендерімен марапатталған қадірлі ардагер, — дейді аталмыш басқосуды жүргізген еңбек  ардагері  Жайсаң  Ақбай.

Жеңіс  сарбазы, соғыс және еңбек ардагері Иван Гапич өміріндегі сол бір қуанышты кезеңді әлі күнге дейін ерекше тебіреніспен еске алады.

– Жеңіс күні  мен үшін ең қастерлі мереке. Бұл қуаныштың көкірегімді кернегені соншалық, сол сәтте жүрегім жарылып кетердей көрінген еді. Соғыстың біткеніне, өз міндетіңді абыроймен атқарып, тірі қалғаныңа қалайша қуанбассың!  Егер бірнеше жыл қатарынан күн демей, түн демей өліммен үнемі бетпе-бет келген болсаң, өмірді мүлде өзгеше бағалайсың. Алғашқы Жеңіс шеруіне қатысатынымды естігенде айрықша қуандым. 1945 жылдың 24 маусым күні Мәскеу қаласында жаңбыр жауып тұрды. Бізді ертерек сапқа тұрғызды. Сол себепті парад басталғанша киімімізден су өтіп, айтарлықтай жаурап үлгердік. Бірақ мұны ешқайсымыз  елең қылмадық. Сол түнгі аспанның ерекше әдемі көрінісі, мерекелік салюттің салтанаты күні кешегідей есімде, — дейді қарт майдангер Иван  Степанович.

Нұртас   НАБИОЛЛАҰЛЫ,

«Орал  өңірі»

Суретті  түсірген  Александр  КУПРИЕНКО


Анна Франктың күнделігі

Күні: , 97 рет оқылды

Облыстық тарихи-өлкетану музейіне келген «Анна Франк. Тарих сабағы» атты жылжымалы көрме бүгінгі таңда Қадыр Мырза Әли атындағы мәдениет және өнер орталығында жұмысын жалғастыруда.

Ұйымдастырушылардың айтуынша, бұл көрме 31 мамыр күні облыстық тарихи-өлкетану музейінде ашылған. Аталмыш көрме екі апта бойы көрушілер назарына ұсынылғаннан кейін, байырғы Оралдың жаңа ауданында тұратын көптеген тұрғындардың тамашалауына мүмкіндік туғызу мақсатында Қадыр ақын атындағы рухани орталыққа әкелінген. Мұнда көрме шілденің біріне дейін келушілер назарына ұсынылмақ.

– Тақырыбына әйгілі «Анна Франк күнделігі» арқау болған бұл жылжымалы көрме Нидерланд патшалығының астанасы Амстердам қаласындағы Анна Франк музей-үйі қызметкерлерінің ұйытқы болуымен, Фридрих Эберт қорының Алматы қаласындағы өкілдігінің ұйымдастыруымен өтіп отыр. Аталмыш көрме осы уақытқа дейін әлемнің алпыс шақты елінде болған. Астана қаласындағы «Еркіндік қанаты» қоғамдық қоры осы көрменің тұтас еліміз бойынша ұйымдастырылуын үйлестіреді. Ал Батыс Қазақстан облысы бойынша үйлестіруші – «Ғылыми зерттеулерді қолдау» қоры. Бізге бұл көрме Ақтау қаласы арқылы келді. Оған дейін еліміздің Астана, Алматы, Тараз секілді көптеген қалаларында болған. Бұл көрменің бір ерекшелігі – таныстырушы экскурсоводтар оқушылар мен студент жастардан таңдалады. Өйткені көрменің бас кейіпкері Анна Франк аталмыш күнделігін 13 жасында жазған, жастай саяси қуғынның құрбанына айналған. «Еркіндік қанаты» қоғамдық қорының өкілдері Орал қаласына келіп, оқушылар мен студенттердің арасында үш күнге созылған тренинг ұйымдастырды. Оқушылар тренинг аясында жылжымалы көрмені таныстыруға қажетті білім алып, арнайы дайындықтан өтті. Жылжымалы көрме адам құқығы, бостандығын насихаттау, қандай да бір ұлтқа келесі бір ұлттың үстемдік жүргізуін болдырмау, фашизмді әшкерелеу идеясын көтереді, – дейді «Ғылыми зерттеулерді қолдау» қорының директоры Айболат Құрымбаев.

Холокост құрбаны, еврей қызы Анна Франк туралы деректерде оның 1929 жылы Германияда дүниеге келгені жазылады. Гитлер билікке келген соң нацистік террордан отбасымен бірге Нидерландта тығылып жүреді. Ол танымал «Анна Франк күнделігінің» авторы. «Анна Франк күнделігі» – нацизмді айқындап суреттейтін құжат. Бұл кітап кішкентай қыздың тағдырын миллиондаған адамдардың қайғысымен біріктіре алғандықтан, бірден әлемдік бестселлерге айналған көрінеді. Бір айта кетерлігі, ғаламтордан Анна Франк күнделігінің кітап түріндегі басылымдарына қатысты оның түпнұсқа қолжазбамен сәйкес келмейтіні, тіпті қолжазбаның бірнеше нұсқасы бар екендігі, яғни мұның редакцияланған еңбекке жататыны туралы материалдарды, осыған орай тартысқа толы пікірлерді де кездестіруге болады.

– Облыстық өлкетану музейінде жылжымалы көрмені тамашалауға күніге 360-тай адам келді. Біз тыным таппастан көрмені таныстырумен болдық. Бельгиядан, Ресейдің Самара қаласынан келген туристер де болды. Бізді бұл жұмысқа «Ғылыми зерттеулерді қолдау» қорының директоры Айболат Шамұратұлы қызықтырып шақырған болатын. Ешқандай ақы алмай, ерікті түрде өзімізге ұнайтын жұмысты атқарып, жазғы демалысымызды рухани тұрғыда мәнді етіп өткізуге тырысып жүрміз, – дейді биыл Орал қаласындағы №30 мектептің сегізінші сыныбын тәмамдаған Ару Энгельс және Ділназ Сайлауова.

Нұртас  НАБИОЛЛАҰЛЫ,

«Орал  өңірі»


«Біздің міндет – халыққа қызмет»

Күні: , 36 рет оқылды

23 маусым – ҚР Мемлекеттік қызметшілер күніне орай Хадиша Бөкеева атындағы облыстық қазақ драма театрында салтанатты жиын өтті.

Салтанатты шараға облыс әкімі Алтай Көлгінов арнайы қатысып, мемлекеттік қызметшілерді атаулы мерекемен құттықтады.

— Құрметті мемлекеттік қызметшілер! Сіздерді кәсіби мерекелеріңіз – Қазақстан Республикасы Мемлекеттік қызметшілер күнімен шын жүректен құттықтаймын! Біз өңірімізде мемлекеттік қызметті тартымды әрі тұрақты ету жолында Елбасы Нұрсұлтан Әбішұлы Назарбаев қабылдаған «100 нақты қадам» Ұлт жоспары мен мемлекеттік қызмет туралы ұлттық баяндаманы қалыптастыру қағидасын басшылыққа алып келеміз. Өңірімізде мемлекеттік қызметті жетілдіру үшін үш негізгі басымдық анықталған. Олар – меритократия қағидасының сақталуы, ашықтық пен жариялылықтың қамтылуы және көрсетілетін қызметтерді цифрландыру. Өңірімізде 4 мыңнан аса мемлекеттік қызметші бар. Меритократия қағидасына және ротацияға сәйкес соңғы екі жылда орталық – өңір, өңір – орталық және облыс – аудан, аудан – облыс жүйесі бойынша жұмыстар атқарылуда. Мемлекеттік құрылымдардағы 100-ге жуық басшылық лауазымға қызметшілер осы қағидаттарға сай тағайындалды. Қызметі бойынша жоғарылаған азаматтардың 95 пайызы – жергілікті кадрлар. Сонымен қатар  мемлекеттік қызметшілерді жыл сайын оқыту жұмыстарын ұйымдастырып келеміз. Соның ішінде 14 мемлекеттік қызметші Президенттің «Болашақ» стипендиясымен білім алып, облысымызда қызмет атқаруда. Біз мемлекеттік құрылымдардың ашық болуын басшылыққа алып келеміз. Жылына төрт мәрте «Ашық әкімдік» шарасы өткізіледі. Әрбір өткізілген сайын өтінішпен келетін 200-300 азаматқа облыс және қала әкімдігінің басшыларынан бастап бөлім мамандарына дейін мәселенің мән-жайын түсінікті әрі қарапайым тілде түсіндіріп, түйткілді проблемаларын шешуге ықпал етуде. Аптасына екі рет өңірлік коммуникациялар қызметінде өзекті тақырыптарға арнайы брифингтер ұйымдастырылып  жүр. Екінші жартыжылдықта әрбір аудан әкімі ақпарат құралдары өкілдерінің сұрақтарына жауап беретін болады. Балабақша мен емханалардағы электронды кезек, жер телімдерін аукцион арқылы бөліп беру, қалалық әкімдіктің бірінші қабатында ашылған «Ашық әкімдік» қызметтерге қолжетімділікті арттырды. Ашылғанына тура бір жыл ішінде 56 мыңнан астам азаматқа қызмет көрсетілген. Мемлекеттік саясатты қолдап, оны жүзеге асыру жолында еңбек етіп жатқан әрбір мемлекеттік қызметшінің үлесі зор. Осындай қажырлы еңбекті қажет ететін саладағы жұмыстарыңыз үшін баршаңызға алғыс айтамын! Жаңа табыстар жолында дендеріңізге саулық, отбасыларыңызға бақыт тілеймін! — деген облыс әкімі бірқатар мемлекеттік қызметшілерді марапаттады.

Қазталов ауданы әкімінің орынбасары Нұретден Құтқожинге «Үздік мемлекеттік қызметші» төсбелгісі табысталса, Батыс Қазақстан облысы әкімінің кеңесшісі Жарқын Жұмаділов, БҚО денсаулық сақтау басқармасының басшысы Қанат Төсекбаев, Қазталов ауданының әкімі Абат Шыныбеков ҚР Мемлекеттік қызмет істері және сыбайлас жемқорлыққа қарсы ісқимыл агенттігі төрағасының алғысхатымен марапатталды. Тағы бірқатар мемлекеттік қызметшілерге облыс әкімінің алғысхаты  табыс етілді. Сондай-ақ ҚР Мемлекеттік қызметшілер күніне орай өткен облыстық спартакиадада жүлделі орындар алған Орал қаласы әкімдігінің, облыс әкімдігінің және Бөрлі ауданы әкімдігінің құрамаларына да марапат тапсырылды.

Лауазымды міндеттерін үлгілі атқарған, қызметінде жоғары нәтижелерге қол жеткізген бірқатар мемлекеттік қызметшілер ҚР Мемлекеттік қызмет істері және сыбайлас жемқорлыққа қарсы ісқимыл агенттігінің БҚО бойынша департамент басшысы, Әдеп жөніндегі кеңестің төрағасы Болат Исақовтың алғысхатына ие болды. Олардың қатарында «Мемлекеттік  қызмет – елдің мүддесіне адал еңбек» эссе байқауының бірінші орын иегері болған Орал қаласындағы №5 мектептің оқушысы Данияр Қадыржанов та болды. Болат Әлмұханұлы құттықтау сөзінде мемлекеттік қызмет сапасын жақсарту бағытындағы  оң өзгерістерге  жанжақты тоқталды. Ол сондай-ақ  мемлекеттік қызметшілер арасындағы «Үздік тәлімгер – 2018» байқауының жеңімпаздарын марапаттады.

Мемлекеттік қызмет ардагері Мырзағали Мұхамбетов барша  мемлекеттік қызметшіні  кәсіби мерекелерімен құттықтап, денсаулық,  жемісті еңбек тіледі.

Мерекелік шара Ғарифолла Құрманғалиев атындағы облыстық филармония әртістерінің концерттік  бағдарламасына  ұласты.

Нұртас   НАБИОЛЛАҰЛЫ,

«Орал  өңірі»


Транзиттік әлеует артады

Күні: , 152 рет оқылды

Бейсенбі күні өңірімізге іс-сапармен келген ҚР Инвестициялар және даму министрі Жеңіс Қасымбек пен облыс әкімі Алтай Көлгінов «Нұрлы жол» бағдарламасы аясында жүзеге асып жатқан «Орал – Тасқала – РФ шекарасы» аутожолын жаңғырту жұмыстарымен танысты.

Министрге аталмыш жоба жайында «ҚазАвтоЖол» ҰҚ» АҚ басқарма төрағасының орынбасары Берік Желдікбаев баяндап берді.

– «Орал – Тасқала – РФ шекарасы» аутожолының жалпы ұзындығы 100 шақырымдай болса, былтыр оның 27 шақырымы жаңғыртылды. Бүгінгі таңда қалған 70 шақырымнан астам бөлігін қалпына келтіру жұмыстары қарқынды жүріп жатыр. Жол жаңғыртуға қажетті қаражат жеткілікті түрде бөлінді. Жұмысты жүргізуге керекті барлық жағдай жасалған. Бүгінгі таңда жол бойында үш үлкен асфальт-бетон зауыты жұмыс жасап тұр. Осы жылдың желтоқсан айына дейін аталмыш бағыттағы аутожолды қалпына келтіру жұмысын толықтай бітіреміз деп есептеп отырмыз. Аутожол бойынан болашақта жаңғыртудан өткен жолды күтіп ұстауды жүзеге асыратын жол пайдалану мекемесін салудамыз. Бұл жол облыстың туристік кластерін дамытып, транзиттік әлеуеті күрт артады деп сенеміз. Жол үлкен транзиттік ағынға есептеліп салынуда. Қуаттылығы 13 тоннаға дейінгі көліктерді өткізе алады. Бүгінгі таңда бұл жолмен тәулігіне 3 мыңдай көлік өтетін болса, келешекте бұл көрсеткіштің екі есеге дейін артатыны даму жоспарында қарастырылған. Көліктер тоқтайтын аялдамалар, әжетханалар салу да осы жоба аясында іске аспақ, – деді  Берік  Дәулетқанұлы.

Аталмыш бағыттағы аутожолды жаңғырту жұмыстарына 124 техника, 400-дей жұмысшы жұмылдырылған. Министр мердігер компанияға жол құрылысына қажетті материалдарды уақытылы, тиімді бағамен сатып алу мәселелеріне ерекше мән беру керектігін ескертті. Ол сондайақ жұмыс қара суыққа дейін созылмай, қарқынды әрі сапалы түрде жүргізілер болса, қосымша қаражат бөлуді  қарастыруға  болатынын  айтты.

Осы жерде Жеңіс Махмұдұлы Батыс Қазақстан облысындағы республикалық маңызы бар жолдарды дамыту жоспарымен де танысып, әрі қарайғы сапарын Қазталов  ауданында  жалғастырды.

Облыс  орталығымен  Қазталов,  Жәнібек,  Бөкей  ордасы аудандарын  байланыстыратын  республикалық  маңызы бар жолды  күрделі  жөндеу келесі  жылы  мамыр  айында  басталады. Бұл  жайында  Жалпақтал  ауылынан  асып,  Қазталовқа бет алған  қара  табан  жолдың  бойында  өткен  көшпелі  кеңес  отырысында  ҚР  Инвестициялар   және  даму  министрі  Жеңіс  Қасымбек айтты.  Сондай-ақ   кеңес  отырысына  Мәжіліс  депутаты Бақтияр  Мәкен, облыс  әкімі  Алтай  Көлгінов  және  аудандардан  келген  ардагерлер  қатысты.

Елбасы тапсырмасына сәйкес, келесі жылы күрделі жөндеуге министрлік қомақты қаражат бөледі. Жобаны неғұрлым қысқа мерзімде орындау көзделуде. Облыс әкімі Алтай Көлгінов қаражат берілгесін, мердігерлер анықталып, жол құрылысы бірден басталатынын айтты. Жиында «ҚазАвтоЖол» ҰҚ» АҚ басқарма төрағасының орынбасары Берік Желдікбаев биыл облыстағы автожолдарды жөндеуге 13 млрд. теңге бөлінгенін айтып өтті. Оның ішінде жолдарды қайта жаңғыртуға 9,2 млрд. теңге, күрделі және орташа жөндеуге 2,6 млрд. теңге қарастырылған. Самара – Шымкент трассасы бойындағы Сырым өткізу бекетін 1,2 млрд. теңгеге жөндеуге жобалық-сметалық құжат әзірленген. Жоба нәтижесінде Сырым бекетіндегі көліктерді бөгеу азайып, транзиттік тасымал ағыны ұлғаяды. Биыл облыс бойынша 223 шақырым автожолға орташа жөндеу жүргізіледі. Мердігерлер анықталып, іске кіріскен. Орташа жөндеу қазан айында  аяқталмақ.

– Президенттің тапсырмасына сәйкес республикалық комиссия құрылып, Чапаев – Қазталов – Жәнібек – Сайқын бағытындағы 470 шақырым автожолдың жағдайын зерттеді. Автожолдың 160 шақырымы жөнделген. Биыл Қазталовқа дейінгі 35 шақырымын асфальттау басталды. Келесі жылы қалған 275 шақырым бөлігінің 30 шақырымын орташа, 245 ша-қырымын күрделі жөндеу жоспарлануда. Яғни, құрылыс жобасы бойынша асфальтты жабын төсеу, жол бойына аялдамалар орнату, су өткізу құбырларын салу қамтылады. Жәнібек ауданының аумағындағы Ресеймен шекаралас бекетті сегіз көлік өткізе алатындай жаңғырту, жүк салмағын автоматты анықтайтын жүйені орнату, тынығу алаңының құрылысы мен жарық шамдарын орнату жоспарланады. Қазіргі уақытта алты жобаға тендер рәсімі жарияланды. Жылдың соңына дейін дайындалатын жобалық-сметалық құжатта аудан тұрғындарының ұсыныс-пікірлері ескеріледі. Автожолды жөндеу Ресейге тікелей шығуға жеңілдік туғызады, жолаушылар мен жүк тасымалын ұлғайтады және Бөкей ордасы ауданының туристік әлеуеті артады, – деді  Берік  Желдікбаев.

Жиында ҚР Инвестициялар және даму министрлігі Автомобиль  жолдары комитеті төрағасының орынбасары Сайранбек Бармақов жол жағдайын шұғыл зерттеуге келген комиссия құрамында болғанын айтты. Оның сөзінше, Чапаев – Қазталов жолының ұзындығы 253 шақырым болса, бүгінге дейін соның 157 шақырымы жөнделді. Қазталов ауданы орталығына жақындағанда басталатын бетонды жолға орташа жөндеу жүргізіледі. Ал 165 шақырым болатын Қазталов – Жәнібек автожолының 142 шақырымы, сонымен қатар 103 шақырым Өнеге – Сайқын жолы сын көтермейтін деңгейде болғандықтан, күрделі жөндеуге  шешім  қабылданды.

Биыл Чапаев – Жалпақтал – Қазталов жолын күрделі жөндеу жалғасуда. «Uniserv» ЖШС Қазталовқа дейін 35 шақырым жолды жөндеуді бастады. Жол салуға компания 60 адамды жұмысқа алған. Қазіргі уақытта жұмысшылар екі ауысымда еңбек етуде. Жиында сөйлеген облыстық жолаушылар көлігі және автомобиль жолдары басқармасының басшысы Медет Шакаевтың мәліметінше, облыстағы жергілікті маңыздағы жолдың жалпы ұзындығы 5 мың шақырымнан асады.

Соның 1300 шақырымы ғана жөнделген. Биыл 70 шақырымнан астам автожолды жөндеуге 7 млрд. теңгеден астам қаржы бөлінді.

Ал Орал қаласындағы жол құрылыстарына осындай мөлшердегі қаражат жұмсалады. Оның ішінде екі жоба ауқымды. Біреуі биыл аяқталады деп күтілетін Депо көпірінің құрылысына 2,3 млрд. теңге құйылды. Екіншісі, Нефтебаза кентіндегі көпір құрылысын жөндеуге 5,8 млрд. теңге бағытталды. Айта кетейік, облыстағы республикалық маңызы бар жолдың ұзындығы 1400 шақырымға жуық. Биыл 331 шақырым автожолды жөндеу жоспарланған.

Көшпелі кеңеске көршілес үш ауданның тұрғындары атынан қатысқан ардагерлер Елбасы тапсырмасына қатысты жедел шара алынып жатқанына ризашылық білдірді. ҚР Инвестициялар және даму министрі Жеңіс Қасымбектің айтуынша, Жалпақтал – Қазталов жолын күрделі жөндеп жатқан «Uniserv» жобаны еңсере түссе, жыл соңына дейін республикалық бюджеттен 1,2 млрд. теңге қаражат бөлінеді.

– 2019 жылдың бюджетіне Қазталов – Жәнібек – Сайқын бағытына бөлінетін қаражат есебін міндетті түрде енгіземіз. Келесі жылдан бастап Мемлекет басшысының тапсырмасына орай еліміздегі жергілікті маңызы бар жолдарды жөндеуге 150 млрд. теңге бөлінеді. Батыс Қазақстан облысына бұл мақсатта жыл сайын 5 млрд. теңге көлемінде қаражат бөлініп отырса, енді қаражат көлемін ұлғайтамыз, – деді  Жеңіс  Қасымбек.

Қазталов аудандық ардагерлер ұйымының төрағасы Уәлиолла Әбішев жол жөндеуге байланысты ауқымды жұмыс басталғанда құрылыс материалын тасымалдау қыруар қаржыны талап ететінін айтып, Ресей тарапымен тиімді келіссөздер жүргізіп, оңтүстік аудандардағы теміржол бекеттерін осы мақсатта пайдалану мүмкіндігі жөнінде министрден  сұрады.

– Алдағы уақытта Атырау облысындағы Индер ауданынан  Александр Гай бекетіне теміржол тарту жобасын іске қоспақпыз. Жобаның техникалық-экономикалық негіздемесі әзір. Бірақ оның құрылысын 2-3 жыл шамасында бастауды жоспарлаудамыз. Қазіргі уақытта облыс аумағындағы республикалық жолдарды жөндеуге басым көңіл бөлінуде. Биыл Орал – Тасқала – РФ бағытындағы автожолды күрделі жөндеу аяқталған соң, республикалық бюджеттен бөлінетін қаражаттың басым бөлігі облыстың оңтүстік аудандары арқылы өтетін күре жолды жөндеуге бағытталады. Соған сәйкес жаңа жұмыс орындары ашылады. Автожолды жөндеуге жергілікті тұрғындар да тартылады. Министрлікке жобалық-сметалық құжатты әзірлеушілер қаражаттың нақты мөлшерін айтса болды, ауқымды жобаны жүзеге асыруға қаражат жеткілікті.

Ал теміржол бағыты бойынша  көрші Ресеймен келісімге келе отырып, қысқа уақытта Оралдан Алматы мен Астана қалаларына қатынайтын «Тұлпар – Тальго» пойызын іске қосудың өзі үлкен жетістік болды, – деді ҚР  Инвестициялар және  даму  министрі  Жеңіс  Қасымбек.

Нұртас  НАБИОЛЛАҰЛЫ,

Нұртай  АЛТАЙҰЛЫ,

«Орал  өңірі»


Музей ісін дамыту – жаңашылдықты талап етеді

Күні: , 75 рет оқылды

Кеше  біздің  облыста  Елбасының «Рухани  жаңғыру» бағдарламасы  аясында  «Ақжайықтың  қасиетті  орындары» атты республикалық  өлкетанушылар  форумы   басталды.

Дүйсенбі күні Орал қаласындағы Достық үйінде аталмыш форумның ашылуы, пленарлық және секциялық отырыстары өтті. Жиынға ҚР Мәдениет және спорт министрлігі музейлер және кітапханалар басқармасының бас сарапшысы Назгүл Қадрымбетова, «Kazmuseum.kz» қорының жетекшісі, музейтанушы Нұрсерік Жолбарыс, тарих ғылымдарының кандидаты, мемлекеттік тарихи-мәдени «Есік» қорық-музейінің ғалым хатшысы Ғалия Файзуллина, сондай-ақ еліміздегі музей директорлары мен өлкетанушылар, өлкемізге танымал тұлғалар мен музей  ардагерлері  қатысты.

Облыс әкімінің орынбасары Ғабидолла Оспанқұлов форумды ашқан алғысөзінде өңірімізде «Рухани жаңғыру» бағдарламасы аясында жүзеге асырылып жатқан істерге жан-жақты тоқталып өтті.

– Бүгінгі басқосуда өлкетану, музей ісін заманға сай жаңғырту мәселелері сөз болады. Бұл бағытта өздеріңіздің жиған білім-тәжірибелеріңіз ортаға салынады. Нәтижесінде Үкіметке нақты ұсыным жолданбақ. Елбасымыз көтеріп отырған цифрландыру бағытында музей саласына қатысты қандай істер атқара аламыз? Ұлыбританияда музейлерге ерекше көңіл бөлінеді. Онда музей ісіне қатысты менеджмент жақсы дамыған. Яғни, музей – бизнестің де қайнар көзі. Осы орайда біз де адам санасының қызығушылығын оятатын өлкетану бағытындағы аңыз-әңгімелерді жаңғыртуымыз керек. Биыл 5, 6, 7-сынып оқушыларына арналған өлкетану оқулығы дайындалып бола келді. Өте құнды кітап жарық көрмек. Біздің тарихи тұлғаларымыз, тарихи-мәдени ескерткіштеріміз туралы деректердің бәрі бір кітапқа жиыстырылған. Бұл жасөспірімдеріміздің өз өлкесін тануына, тарихына үңілуіне ықпал етеді, Отанымызды сүюге жетелейді. Сондықтан жас пен кәрі бірдей өлкетану ісіне бет бұруы қажет, – деді Ғабидолла Абдоллаұлы.

БҚО мәдениет, архивтер және құжаттама басқармасының басшысы Қадырболат Мұсағалиев жүргізген отырыстың барысында ҚР Мәдениет және спорт министрлігі музейлер және кітапханалар басқармасының бас сарапшысы Назгүл Қадрымбетова еліміздегі музей ісінің соңғы жылдардағы даму  қарқыны  туралы  баяндады.

– Жалпы статистикаға сүйенетін болсақ, 2001 жылы елімізде барлығы 103 музей болса, бүгінгі ресми мәліметтер бойынша 238 музей жұмыс жасайды. Оның 234-і мемлекеттік болса, төртеуі жеке музей. Музейге келушілердің саны да жыл санап артып келеді. Мәселен 2001 жылы 3 млн. 261 мың болса, 2012 жылы 5 млн.-нан артылды. Негізгі қордағы экспонаттар саны 2001 жылы 1 млн. 700 мыңнан асқан болса, бүгінгі таңда 2,5 млн.-ға жуықтады. 2011 жылы музейлеріміз 6 мың 400-ден астам көрме ұйымдастырған болса, 2017 жылғы деректе бұл көрсеткіш 10 мыңға жақындаған. Бүгінде 191 музей интернет желісіне қосылған. Олардың саны 2011 жылы 163 болған еді, – дейді Назгүл Нұржанқызы. Назгүл Қадрымбетова жиын барысында үздік музей қызметкерлерін ҚР Мәдениет және спорт министрлігінің алғысхатымен марапаттады. Марапатталғандар арасында музей ісінің ардагері Сара Танабаева, Сырым Датұлы атындағы  тарихи-өлкетану музейінің басшысы Айнагүл Ойшыбаева бар.

БҚО тарихи-өлкетану музейінің директоры Мирболат Ерсаев екі ғасырға жуық терең тарихы бар өзі басқаратын музейдің өткені мен бүгіні туралы жан-жақты баяндап, аталмыш салаға қатысты проблемалық мәселелерді де ортаға салды.

– Қазақстандағы барлық музейлердің проблемасы ұқсас. Бастысы – музей ғимараттарының жәдігерлерді сақтау мен көрерменге ұсынуға арналмағандығы. Қайта қалпына келтіруге мемлекеттен қыруар қаржы бөлінудің арқасында көптеген музей қайта жабдықталды. Бірақ бәрі бірдей емес. Музейге арналған арнайы ғимарат еліміздегі көп музейге арман екені шындық. Саланың басты проблемасының бірі – кадр. Бүгінде музей көбейіп келеді. Ал арнайы маман әзірлеу әлі де жеткіліксіз. Мықты тарихшы мамандардың салаға тартылмау себебі – жалақының басқа салалардан төмендігі. Бұл салада жүргендер – музейді сүйетіндер, ақшасына қызығып жүрген ешкім жоқ. Музей саласындағы проблеманың бірі  – музейлердің ортақ кеңістігінің жоқтығы. Әр өңірдің музейлері өз алдына бір арал сияқты. Тәжірибе алмасу, алмасып көрме өткізу аздау. Аймақаралық жобалар, тәжірибе алмасу, семинар, конференциялар керек-ақ. Музейлердің ең басты проблемасы – халық тарту. Бүгінгі таңда өзінің көрерменін музей тауарын сатып алушыға айналдырған музей ғана жеңімпаз бола алады. Ол үшін музей өзінің қызметін үнемі сапалы көрсетуге тиіс. Бұл ретте уақыт талабына сай маркетинг, менеджмент қызметін пайдалануымыз керек. Ал маркетинг, менеджмент – музей үшін жаңа ұғымдар. Бірақ заман талабына сай осы істерді де игеруге тиіспіз. Әрине, бүгінгі ғаламторлық заманда музейге адам тартуды тек жарнама арқылы шешу қиын, сондықтан заманауи жаңа технологияларды да іске қоспаса болмайды. Мысалы, шетелдік музейлердің ерекшелігі ІТ технологияларын кеңінен пайдалануы, өз жәдігерлерін техникалық тұрғыдан ұсынулары. Шетел музейлерінде жәдігерді саналы түрде ұғу үшін барлық жағдай жасалып, көрермен мен музей арасында интерактивті қарым-қатынас толық орнатылған. Мәселен, орман суретін көріп тұрса, ормандағы ағаштар сыбдырын естиді немесе музыкалық аспаптан сазды әуен шығады. Бұл көрерменге жәдігерді көріп қана қоймай, сезінуге мүмкіндік береді. Сондықтан музей ісін алға сүйреу, ІТ технологияларын ендіруді қажет етіп тұр. Бұл, әрине, оңай шаруа емес. Бірақ біз осы қиын істі игеруді жайлап бастап жатырмыз. Қорда жәдігер көп, оның бәріне орын жоқ. Сондықтан біз 3D-экскурсия жасайтын құрылғы алып, сол тасада қалатын жәдігердің бұрынғы қалпын, тарихын жеткізгіміз келеді. Ішінара кейбір жәдігерлерді ғаламторға шығару арқылы ел назарын аударып, қызықтырудамыз. Музей жайлы әлеуметтік роликтер де шығардық. «Музей түні» сияқты шараларымыз халықтық мерекеге айналып келеді. Мұндағы басты мақсат – келушілер санын көбейту, тарихымызды, бастауымызды, құндылықтарымызды насихаттау. Музейдің жұмысы оның қазынаға қанша қаржы түсіргенімен өлшенбейді. Музей – мәдениет, ал мәдениет – дұрыс қоғам қалыптастырудың кілті, келешекке жол салу. Біздің мақсат – музейді заманауи, қолжетімді, қызықты ету.

Сол себепті біз музейде театрландырылған қойылым жасауды дамытып келеміз, – деді Мирболат Бижанұлы.

Жиынға қатысушы меймандар әлем елдеріндегі музей ісін басқарудың озық үлгілері туралы қызықты деректерді егжей-тегжейлі баяндай отырып, Қазақстандағы музейлердің жұмысын жаңаша қалыптастыру бағытында ой қозғады. Әрі қарай облыстық тарихи-өлкетану музейінде жалғасын тауып, өңіріміздің киелі жерлерін аралауға ұласатын форум жұмысы осы аптаның аяғына дейін  жалғаспақ.

Нұртас  НАБИОЛЛАҰЛЫ,

«Орал  өңірі»


«Ғұмардың жазып кеткен хаты өлмейді»

Күні: , 146 рет оқылды

Ақын, ағартушы, Алаш  қайраткері  Ғұмар  Қараштың  шығармалары мен  өмір  жолы  туралы  деректерді  қамтыған  үш  томдық жинақтың  тұсауы  кесілді.

Жинақтың таныстырылымына ардагер журналистер, ғалымдар, өзге де зиялы қауым өкілдері қатысты.

– Ғұмар Қараш үш томдығының жарық көруі үшін ұзақ жұмыстандық. «Орал өңірі» және «Приуралье» газеттерінің 95 жылдығына орай газеттердің алғашқы сандарын түгендеу барысында аталмыш басылымдардың бастауында көптеген тарихи тұлғалардың тұрғанына көзіміз жетті. Сондай тұлғалардың бірі Ғұмар Қараш еді. Оның қазақ жерінде газеттердің алғаш рет және жүйелі түрде жарық көріп тұруына тікелей еңбек сіңіруі біздің осы тұлғаға деген қызығушылығымызды одан сайын арттыра түсті. Сөйтіп газеттерімізбен бірге Ғұмар шығармаларын түгендеуді де қолға алдық. Осы орайда Ғұмар Қараштың Мәскеуде тұратын немересі Надежда Қарашева бізге атасының көптеген мұрасын табыс етті және олардың көпшілігі бұрын жарияланбаған тың дүниелер болып шықты. Еңбектің жинақталу барысында жобамызды Алматыдағы зиялылардың ортасында таныстырғанымызда, ғалым Светлана Смағұлова өзінің қолындағы «Айқап» газетінің аудармаларын тұтастай беріп жіберді. Сондай-ақ Ғұмар Қарашқа шәкірт болған Ақмәди Есқалиевтің ұрпақтары аталарынан мұра болып сақталған қолжазбаларды әкеліп берді. Бірнеше адаммен сұхбаттастық. Осылайша үш томдықтың толықтырылуына көптеген адам еңбек сіңірді, – деді аталмыш еңбектің жарық көруіне жетекшілік жасаған «Жайық Пресс» ЖШС-ның бас директоры  Жантас  Сафуллин.

Жинақты құрастырушылар оның іші-сыртының бірдей мағыналы болып шығуына мән берген. Кітап мұқабасына өрнек ретінде араб қарпінде «Ғұмар Қараш» деген жазулар, сондай-ақ «Қазақстан» газетінде қолданылған терең мазмұнды оюлар салынған. Бір шетіне аталмыш жинақты электронды нұсқада оқуға және Ғұмар өлеңдерін аудионұсқада тыңдауға мүмкіндік беретін gumar.kz сайтының QR-коды орналастырылса, мұқабаның келесі бетіне әдебиетші-ғалым Есмағамбет Ысмайыловтың «Ғұмар Қараш – Абайдан кейінгі дәуірдегі XX ғасыр басындағы қазақ әдебиетінде іргелі орын алатын ірі классик ақын…» деген пікірі жазылған.

Жинақтың бірінші томында ағартушы ақынның поэзиялық шығармалары, екінші томында ой-толғамдар мен мақалалары, ал үшінші кітабында Ғұмардың көзін көрген замандастарының естеліктері, сондай-ақ зерттеу еңбектер  топтастырылған.

Қазбек  ҚҰТТЫМҰРАТҰЛЫ,

журналист, баспасөз  тарихын  зерттеуші:

– Бүгінгі үш томдықтың тұсаукесері тұтас халқымыз үшін қуанышты оқиға деп ойлаймын. Бұл – алты жылға созылған жұмыстың нәтижесі. Осы бір ұжымдық еңбегіміздің нәтижелі болып, бүгінгі күнге жеткеніне қуаныштымын. Бұл кітаптың негізгі жүгі Ғұмар Қараштың немересі Надия апайдың өзі тапсырған 17 бумадан тұратын материалдары. Біздің мақсатымыз Ғұмар Қараштың осы кезге дейін жан-жақта шашылып жүрген барлық мұрасын барынша бір жерге жинақтап, зерттеушілерге, ғалымдарға ұсыну болды. Жалпы, Ғұмартануда ашылмаған бет әлі көп. Оның мысалын осы кітап шығып кеткеннен кейін де көріп жатырмыз. Мен жақында ғана Уфа архивінен келдім. Онда Орынбор мұсылмандар діни басқармасының 1860 жылдан бері қарайғы құжаттары жинақталған. Бөкей ордасындағы мешіт-медреселердің метрикалық кітаптарын қараған кезде Ғұмар Қараштың өз қолымен толтырған метрикалық кітаптары қолымызға түсті. Ол жерде 1903 жылдан бастап Тарғын қисымының бірінші ауылында имам, хатиб, мударис қызметін атқарғандығы, өз қолымен жазылған шағын өмірбаяны сақталған екен. Бұл мәліметтер әзірге ғылыми айналымға еніп үлгермеген. Ғұмар Қараштың туған жылы жайында әр түрлі пікірлер болды. Ғалымдар соңында 1875 жылы туған деген ұйғарымға келген еді. Ал біз Уфадан көрген құжатта өз қолымен 1874 жылы дүниеге келгенін жазған екен. Және Ғұмардың діни бастауыш білімді ауыл молдасынан, одан кейін Жалпақталдағы Ғұбайдолла Ғалікеев қазіреттен алғандығы айтылатын. Бірақ жоғары діни білімді қайдан алғандығы  белгісіз еді. Біреулер Қазанда оқыды десе, енді біреулері Стамбулда оқыған болуы мүмкін деді. Алайда нақты құжат жоқ еді. Енді Ғұмардың Уфада, Қазанда оқығандығы жөнінде, қандай қазіреттерден білім алғандығы жөнінде  өз қолымен жазылған құжат табылды. Мұның бәрі Ғұмардың тұлғасын анықтауда, оның еңбектерін зерттеуде әлі де көп тер төгу керек екенін көрсетіп тұр. Ғұмар Қараш аз ғұмыр кешсе де, өте белсенді қызмет еткен, көп жазған. Төңкеріске дейін-ақ он шақты кітап шығарған жан-жақты адам. Сондықтан ол кісінің өмір жолын, еңбегін, қазаққа қылған қызметін санаулы адамдар ғана емес, университеттер, ғалымдар зерттеуі керек деп ойлаймыз. Үлкен жұмыстар алда тұр. Бүгінгі жұмыстардың барлығы Жантас Набиоллаұлының ұйымдастыруымен, өте бір еңбек сіңіруімен жүзеге асқанын айта кету керек. Шынына келгенде, біздің «Жайық Пресс» тек қана газет шығарумен айналысады ғой. Бізге ғылыми жұмыстармен айналысуға арнайы қаржы бөлініп, ешқандай қолдау жасалмаса да, жекелеген азаматтардың бастамасымен, еңбегімен осындай нәтижелі істер шығып жатыр. Ғұмардың жазып кеткен хаты өлмейді. Оның көптеген пікірлері күні бүгін жазылғандай,  әлі  күнге  дейін өзекті.

 

Дариға  МҰШТАНОВА,

ақын,  ардагер  ұстаз:

– Жоғалған қазынамызды қолымызға соқырға таяқ ұстатқандай етіп жинап бергендеріңізге қатты қуанған қазақтың бірімін. Бұл руханиятқа қосылған үлкен үлес. Кітапты парақтап келіп қалғанда, тарам-тарам қазынаның бір жерге жинақталғанын бірден байқайсың. Құндылығы да осында. Өзім ұстаз болғандықтан, Ғұмар Қараштың «Дұрыс бер, дәріс берсең, теріс берме» деген сөзі көзіме оттай басылды. Ғұмардың бұл сөзі әр мектепте, тіпті министрлікте жазылып тұруы тиіс деп есептеймін. Ғұмар Қараш аумалы-төкпелі заманда басын қатерге тіге жүріп, қоғамдағы кемшіліктерді ашық айтқан, сөйтіп жүріп өзіне жау тапқан. Әйтсе де, мұқалмаған. Келеңсіздіктерді түзету жолында батыл түрде әрекет қылған қайраткер тұлға. Еңбекті оқып отырғанда бүгінгі білім саласына енгізетін тың тақырыптардың өте көп екені ұстаз көзіне айқын аңғарылады. Сөз қолдану мәнері, жоғалған сөздер, ауыз әдебиеті, дәстүрлер – бәрі қылаң беріп өтеді. Жекелеген ғылыми жобаларға сұранып тұрған тұстары аса мол. Өзі қастандықпен өлтірілген соң, мұрасының өзі бұғауда болған асыл тұлғаның еңбектерін жинақтап, қолымызға ұстатқан құрастырушыларға айтар алғысымыз шексіз. Барша қазаққа құтты болсын! Әрі қарай алып кету сіз бен бізге міндет!

 

Нұрлан  СӘДІР,  блогер:

– Ғұмар Қараш атамыздың шығармашылығымен осы ұлы ойшыл, қоғам қайраткерінің туғанына 125 жыл толу құрметіне ұйымдастырылған ақындар мүшәйрасына қатысқан кезімнен бастап таныса бастадым. Тұп-тура бүгінгі менің жасымда дүниеден өтіп кеткен Ғұмар Қараштың жанжақтылығы адамды еріксіз таңдай қақтырады. Қоғамға прогрессив дін өкілі керек болған кезде – молда болды, ақпарат құралына мұқтаж болғанда – газет шығарды, ел тағдыры қыл үстінде тұрғанда – саясаткерге айналды, бір сөзбен айтқанда, оны елге қызмет етудің ғажап үлгісі ретінде ұсынуға болады. Қазір БҚО ішкі саясат басқармасының ұйымдастыруымен, алты киелі орынның қатарында Ғұмар Қараштың өмірін, шығырмашылығын насихаттау жұмыстары қолға алынып жатыр. Мектеп оқушылары үшін Ғұмар Қарашқа арналған өлеңдер топтамасын әзірлеу, театрландырылған көрініс сценарийін жазу, шығарма тақырыбын және мазмұндама мен диктант мәтіндерін әзірлеу кіретін бұл жұмыстарға белгілі бір дәрежеде мұрындық болғанымды мақтан тұтамын. Өз басым Ғұмар Қараштай ғұламаға арналған театрландырылған көрініс сценарийіне атсалысуға әзірмін.

Бақтылы  БОРАНБАЕВА, тарихшы:

– Бұл еңбек – қазақ ұлтының тарихына қосылған жаңа үлес, ақтаңдақтардың анықталғаны. Жалпы сананы серпілту, ұлттық рухты ояту заманымен тұспа-тұс шығып отыр. Бұл – қазақтың құлдық санадан арылуына қажет дүние. Рухани жаңғыру дегеннің өзі – тарихи мұраларды жаңғырту. Сол арқылы жаңа мәдениетке көтерілу. Дүние жүзіндегі рухани жаңғырулардың бәрі осылай дамыған. Ендеше, шағын ғана ұжымның атқарған осынау еңбегі баға жетпес  құндылық  дер  едім.

Жәнібек  ИСМУРЗИН, тарихшы:

– Бүгін Батыс Қазақстан өлкесінің мәдени-рухани өміріне байланысты үлкен іс-шара өтіп отыр.

Мұны тарихымызды кейінгі ұрпаққа жеткізу үшін жасалып отырған игі іс деп білеміз. Ғұмар Қараш – тектілердің тұяғы. Тарихшы ретінде XVIII-ХIХ ғасыр маманы болғандықтан, Ғұмардың аталары, Бөкейлікте өмір сүрген Оразақай, Нияз би деген тарихи тұлғалар туралы архивтік құжаттармен жақсы таныспын. Ғұмар Қараш өзінің мақалаларында Оразақай деген бүркеншік атты қолданады. Бөкей ханның тұсында болған Нияз би кейбір билер сияқты сол дәуірдегі көлеңкелі жақтары қалған адам емес. Атақты тұлға болған. Бөкейдің хан кеңесіне ұсынған тұлғаларының бірі. Ғұмар – азаттық қозғалыстың ХХ ғасыр басындағы жаңа толқынының белді мүшесі. Жалпы, осы топырақта өмір сүріп, тұлғалық деңгейге жеткен қайраткерлердің өмірлері қым-қуыт қайшылықтарға және өзара ұқсастықтарға толы. XVIII ғасырдағы азаттық қозғалыстың басшысы – Сырым Датұлы. Сырымның сүйегі Хиуада қалған дейді, бірақ нақты анықталмай отыр. Сондай-ақ XIX ғасырдың 30-жылдарындағы атақты Исатай Тайманұлының жерленген жері әлі табылған жоқ. Қастандықпен шауып өлтірілген Ғұмар Қараштың да мүрдесінің қайда қалғаны белгісіз. Ғұмар Қарашты зерттеуге алғаш түрен салғандардың бірі, еңбектері жарыққа шықпай кеткен Мұстафа Ысмағұлов еді. Тәуелсіздік жылдары ішінде Ғұмар Қараш тақырыбына қалам тербеген әдебиетші, тарихшылардың Ысмағұловтың жазбасына соқпай кеткендері жоқ. Олардың еңбектеріндегі кейбір деректердің Мұстафа Ысмағұлов жазбаларынан алынғанын кәсіби зерттеуші анық көре алады. Бүгінгі жарыққа шығып отырған жинаққа Ысмағұлов еңбектерінің енуі – тарихқа қосылған үлкен үлес. Ғұмар Қараш ұлтының дамуына ықпал еткен энциклопедист ғалым, яғни жан-жақты тұлға. Ұлтқа қызмет еткен Әлихан Бөкейхановтың, Міржақып Дулатовтың, қазақтың маңдайына біткен тағы басқа таланттардың шығармалары жан-жақты жинақталып, жарық көрді. «Неге біздің өңірімізден сондай еңбек шықпайды екен?» деп ойлайтынбыз. Бүгінгідей жинақтың жарыққа шығуы тек біздің облыс көлемінде емес, мемлекет көлеміндегі өте қуанышты жағдай. Жалпы, ғылымның өзі шексіз. Ғұмар еңбектері үш томдық жинақпен таусылып қалды деп айта алмаймыз. Керісінше бұл жинақтар кейінгі ізденістерге, Ғұмарға қатысты шет мемлекетте шашылып жатқан архивтік мұралардың түгенделуіне жол ашады деп есептейміз. Өз басым өткен жылы жазылған Елбасы мақаласынан бері осы уақытқа дейін «Рухани жаңғыру» аясында өңірімізде атқарылған істердің ең құндысы – осы үш томдықтың жарыққа шығуы деп айтар едім. Менің жеке көзқарасым бойынша, бұл таныстырылым «Жайық Пресс» деңгейінде ғана емес, үлкен масштабта жасалуы тиіс. Жинақтың саны көбейтіліп, кітапханаларға, мектептерге таратылуы керек. Өйткені Ғұмар тек қана дінтанушы немесе философ емес, оның еңбектері телегей теңіз.

Нұртас  НАБИОЛЛАҰЛЫ,

«Орал өңірі»


Ән өнерінің майталманы

Күні: , 33 рет оқылды

Қадыр Мырза Әли атындағы облыстық мәдениет және өнер орталығында Бүкілодақтық телевизиялық әншілер байқауының лауреаты, Мұхит Мерәліұлы атындағы республикалық әншілер байқауының бас жүлде иегері, дәстүрлі әнші, термеші Аманкелді

Ғұбайдуллинді еске алуға арналған «Сал-серілердің сарқыты» атты кеш өтті.

Кешке жиылған көпшілік алдымен Амангелді Ғұбайдуллиннің өмірі мен шығармашылығы туралы жарық көрген мақала-материалдар, сондай-ақ көзі тірісінде тұтынған заттары қойылған көрмені тамашалады. Өнер иесі туралы бейне-слайд көрсетілді.

Шараға арнайы қатысқан облыстық мәдениет, архивтер және құжаттама басқармасының бас шысы Қадырболат Мұсағалиев өнерсүйер қауымға құтты болсын айтып, кештің мән-маңызына тоқталып өтті. Аманкелді Ғұбайдуллиннің жерлестері атынан сөз алған Сырым аудандық мәслихатының хатшысы Шынар Дүйсенғалиева әншінің жұбайы Балсекер апайға қазақы дәстүрмен шарқат сыйлап, иығына камзол жапты.

Өнер иесінің інісі, Марабай Құлжабайұлы атындағы аймақтық-республикалық әнші-термешілер байқауының лауреаты, Ғарифолла Құрманғалиев атындағы медальдің иегері, әнші-термеші Мұхамбет Мамықов, шәкірті, елімізге белгілі дәстүрлі әнші, ҚР Мәдениет қайраткері Қайрат Кәкімов Аманкелді Ғұбайдуллиннің репертуарында болған дәстүрлі әндерді орындады.

Ардагер-журналист Тихон Әліпқали, ақын Сағынтай Бисенғалиев, әншінің жиен ағасы Махамбет Ерниязов, шәкірті, ҚР мәдениет саласының үздігі, әнші-термеші Мұсағали Бектенов Аманкелді Ғұбайдуллин туралы естеліктерімен бөлісті.

– Мен Амангелдімен жұмыс барысында танысып, білістім. Шамамен ол жетпісінші жылдардың кезі еді. Ол кезде біздің Оралда кәсіби мәдениет мекемелері аздау болды. Қазақ драма театры болған жоқ, филармония ғана бар еді. Қазақ өнерінің негізі ауылда өсіп, қаулап, гүлденіп келе жатты. Сол кезде біздер ауылдағы әнші, күйші, өнерпаздардың бәрін жадымызға түйіп, соны газет бетінде көбірек жазып отыруға, солардың мерейін өсіруге барынша атсалыстық. Амангелді алғашқы көргенімнен-ақ назарыма ілікті. Өнерпаз көп қой, солардың ішінде Амангелді кездесе қалғанда, топтың ішінен соған барып амандасатын едім. Ол көптеген байқауда үздік шығып жүрді. Мәдени үгіт бригадаларының құрамында эстрадалық бағыттағы әндер айтқанда да оған ешкім теңесе алмады. Эстраданың керемет жұлдыздарымыз деп жүргендердің бәрі оның алдында бәсең түсіп жататын. Ол өзі әзілқой да болатын. Сосын керемет ізденгіш, көп оқитын адам еді. Әншілігі өз алдына, қолынан кітап, журнал түспейді. Әсіресе, «Жұлдызды» құшақтайды да жүреді. Ішіндегі пікірлерін жасырмай, ашық айтады. Оған көп нәрсе ұнамай да жатады. «Мынаның жазғаны оңды дүние емес, осы қалай жазушы болып жүр, қалай ақын болып жүр?» деп айтып-айтып тастайтыны да бар. Ғарифолла Құрманғалиевтің туғанына 80 жыл толуына орай облыстық филармонияда концерт ұйымдастырдық. Сол концертке Мекес Төрешев, қыстың көзі қырауда сонау Қазталовтан Хатимолла Бердіғалиев келді.

Аманкелді Ғұбайдуллин, Мұхит  Бірәнов секілді әнші-термешілер де болды. Өзім сол концертті жүргіздім. Кеш аяқталуға жақындағанда әншілер ұбап-шұбап әлі келіп жатыр. Әйтеуір жақсы кон-церт болды, кеш мазмұнды өтті, жұрт сүйсінді. Концерттен соң, Мекес, Аманкелді, Хатимолла – бәріміз біздің үйге бардық. Түнімен отырып ән салдық. Сонда Мекес өнер жағына келгенде Аманкелдіден өзін төмендеу санап, кәдімгідей қысылып отыратынына куә болдым. Амангелдіні ешкім ұмыта алмайды. Ол бірегей талант еді ғой. Ән әлеміндегі Мұхит, Ғарифолла мектебінің белді ту ұстаушысы болды. Сондықтан да оны әлі ұмыта алмай, бүгінде қаншама халық жиналып, зал толып отыр. Аманкелді талайдың жүрегін жылытты, жанын жадыратты, санасына шуақ сәуле құйды. Ол таза талант әрі пенде ретінде де бір таза адам. Ешкімге қастық ойлаған жоқ, ешкімнің жолын кескен жоқ. Ол туралы қаншама өлеңдер жазылды. Алдағы уақытта да Әбекеңнің рухы асқақтай берсін! – деді Тихон Әліпқали.

Кеш барысында экраннан Аманкелді Ғұбайдуллиннің өз орындауындағы «Жадыңда болсын, ерлерім» термесі тыңдалды. Сонадайдан сорғалата құйылтып келіп, ерекше екпінмен нақпа-нақтап төкпектете жөнелетін өнеріне куә болған жұртшылық, сүйікті әншісінен сандаған жыл бойы көз жазып қалған тыңдарманы өнер иесімен қайта қауышқандай күйде, айрықша ықыласпен қошемет танытты.

– Әбекеңнің бір әдеті – домбыраны тұрғызбайтын еді. Кейде қаншама әнші отырса да, пенделік әңгімеге кіріп кетіп, әзіл-қалжыңға ойысып, домбыраның жарға сүйеніп қалатын кезеңдері болады ғой. Әбекең кіріп келеді де, «Ана домбыра нағып тұр? Әкел бері қарай» дейтін. Сосын шырқап жөнеледі. Ол ән салған кезде «Терезелеріңді ашып қойыңдар. Жардың сылағы түсіп қалмасын. Дұрыстап майлап па едіңдер?» деп әзілдеп қоятынмын. Әбекең жұмбақ жан еді. Жұмбақ күйінде кетті. …96-ның қаңтарында Әбекеңнің дүние салғанын естідік. Естіген күні аудандық «Тайпақ таңы» газетіне «Өзіңді жоқтап жылады ма екен..?» деген жыр-жоқтау жаздым. Бұл өлең аудандық газетке басылғанымен, облыстық газетке жетіп үлгерген жоқ. Бүгінгі рухани жаңғыру кезеңінде Әбекеңдей талантты тұлғаның туған елінде оның есімін еске салып тұрарлықтай бір іс атқарылуы тиіс. Саз мектебіне аты берілсе немесе Амангелді сыныбы ашылса деген жүрекжарды тілегіміз бар, – деген ақын Сағынтай Бисенғалиев жоғарыда аталған, өзінің саңлақ әншіге арнап жазған  жырын  оқып  берді.

Маң-маң да басқан марғасқам едің,

Ажалға қайтіп алдырдың, аға?

Жалына ерте жармасқан едің,

Әніңді кімге қалдырдың, аға?

Астана – ауылға ғажап әніңді

Жүруші ең жиі тыңдатып, аға,

Ақ жеңешем мен балаларыңды

Кеткенің бе шын шулатып, аға?

Заман еді бұл қандай назалы,

Өзіңді жоқтап өкінеді елің.

Маңдайда соры, таңдайда зары,

Бұл өнер неткен жетімек еді.

Сағынып сені жас тамған кезде,

Түсер-ау еске мол мұраң бірақ.

Ғарекең мәңгі аттанған кезде,

Түсті деуші еді домбыраң құлап.

Жасаурап көзі қырда шынардың

Өзіңді жоқтап жылады ма екен?

Сен кеткен күні бір жас ұланның

Ақ домбырасы құлады ма екен?

Ғарифолланың дара тұяғы,

Тағдыр да өстіп мұңайтады екен.

Қайран, Әбекем, «Қанапияны»

Дәл сендей енді кім айтар екен?

Не шара, бізге жанның қалауын,

Кім берер, қош бол, жан ағам енді.

Көтеріп биік әннің жалауын,

Рухың жүрсін жағалап елді.

ХІ республикалық халық аспаптарында орындаушылар конкурсының І жүлде иегері, Аманкелді ағамыздың кіндік қызы Мөлдір Жалмұханбетова Ықыластың күйі «Жезкиікті» қылқобызда орындаса, кішкене немересі Нұрым Аманкелді атасына арнап шығарған өлеңін оқып берді. Әншінің зайыбы Балсекер апай шараны ұйымдастырушыларға алғыс айтып,  ризашылығын  жеткізді.

Еске алу кеші әншінің немересі Нұршат Ғұбайдуллиннің орындауындағы Фариза Оңғарсынованың сөзіне жазылған Қалдыбек Құрманәлінің әні «Жайықтың толқындарымен»  қорытындыланды.

Нұртас   НАБИОЛЛАҰЛЫ,

«Орал   өңірі»


600 адамды қанатының астына алған ұйым

Күні: , 35 рет оқылды

Облыстық жедел медициналық жәрдем стансасындағы бастауыш кәсіподақ ұйымы өңіріміздегі денсаулық сақтау мекемелерінің кәсіподақтары арасында белсенді жұмысымен көш бастап келеді.

Аталмыш ұжым өткен жылы жедел жәрдем стансасы қызметкерлерінің аймақтық сайысынан жеңімпаз атанып, байқаудың Астана қаласында өткен республикалық кезеңіне де қатысқан. Республикалық сайыста облысымыздағы жедел жәрдем стансасының жекелеген қызметкерлері үздік шығып, әр түрлі марапаттарға ие болған. Ал кәсіби саладағы қандай да болмасын байқауға қатысу сол саладағы кәсіподақ ұйымының тікелей ұйымдастыру қолдауымен жүзеге асатыны  түсінікті.

Сара Кабдушева – облыстық жедел медициналық жәрдем стансасындағы №3 қосалқы стансаның аға фельдшері, аталмыш мекемедегі бастауыш кәсіподақ ұйымының төрайымы.

– Мекемемізде барлығы 700-ден аса қызметкер еңбек етеді. Осыдан екі жарым жыл бұрын бастауыш кәсіподақ ұйымына жаңадан төрайым болып сайланған кезімде аталмыш ұйым құрамында 240 қызметкер болса, бүгінгі таңда бұл көрсеткіш 603 адамды құрап отыр. Бастауыш кәсіподақ ұйымы мекеменің қоғамдық бағыттағы жұмыстарының бәріне тікелей араласып отырады. Мысалы, бүгінгі таңда ұжымдық жұмысымызда мемлекеттік тілдің аясын кеңейту бағытындағы әрекеттеріміз тиісті нәтижесін беріп келеді. 2017 жылы «Мәңгілік Ел: Қазақстанның кемел болашағы» атты II республикалық байқауда мемлекеттік тілді дамытуға үлес қосқан «Үздік мекеме» аталымын жеңіп алдық. Спорттық сайыстарда ылғи алдыңғы орыннан көрініп келеміз. Футбол командасы қандай сайыстан да бірінші орын әкеліп жүр. Ұжымда әрбір мейрам-мереке атаусыз, сый-сияпатсыз  қалмайды, – дейді ол.

Сара Күлесқызының аталмыш ұжымдағы бастауыш кәсіподақ ұйымының жұмысын жандандыру бағытындағы істері тындырымды, нәтижеге толы болғанымен, өзінің атқарған қызметтерін баяндауға келгенде мейлінше аз сөзді, тұйық жан екендігін аңғардық. Мекемедегі бастауыш кәсіподақ ұйымының тыныс-тіршілігі туралы оның белсенді мүшелері ашыла әңгімелейді.

– Ұжымымыздағы бастауыш кәсіподақ ұйымының жұмыс жүргізу дағдысы жоғары деңгейде қалыптасқан. Былтырғы және биылғы облыстық деңгейде өткізілген салалық бастауыш кәсіподақтар сайысында біздің ұйымның жеңімпаз атануы – осы сөзіміздің айқын дәлелі. Өткен жылы біздің бастауыш кәсіподақ ұйымы «Ең үздік бастауыш кәсіподақ ұйымы» деген аталымға ие болды. Кәсіпорын аясында кәсіби, мәдени, спорттық немесе әдет-ғұрыптық бағытта қандай да бір шара өтуі тиіс болса, ол шаралар мекемедегі бастауыш кәсіподақ ұйымының тікелей қолдауымен үнемі жоғары деңгейде ұйымдастырылып, ұжым қызметкерлерінің көңілінен шығып отырады. Қызметкерлерді, кәсіподақтың белсенді мүшелерін, соның ішінде жас мамандарды ынталандыру бағытында әр тоқсан сайын сый-сияпат жасалады. Бастауыш кәсіподақ ұйымы ұйымдастыратын шараларға мекеме қызметкерлерінің қатысуы өте белсенді. Бізде санитарлық қызмет атқаратын Нұрбек Әбдрешов есімді жас жігіт кәсіподақ ұйымдастырған барлық шараны өзінің жеке бейнекамерасына түсіріп, монтаждайды. Ол түсірілімдер бастауыш кәсіподақ ұйымының мұрағатында мұқият сақталады. Ортақ іске қолұшын созуда белсенділік танытқан мұндай қызметкерлердің еңбегі бастауыш кәсіподақ ұйымының назарынан тыс қалмайды. Мекемеміздегі кәсіподақ ұйымы қаламыздағы, еліміздегі, сондай-ақ шетелдегі мәдени, рухани, курорттық орындарда демалыс ұйымдастыру мәселелерін де үнемі назарда ұстайды, – дейді аталмыш мекемедегі мемлекеттік тілді енгізу, дамыту және редакциялау бойынша маман Роза Дүзеева. Роза Талғатқызы ел тәуелсіздігінің 25 жылдығына орай денсаулық сақтау мекемелері арасында ұйымдастырылған «Мәңгілік Ел: Қазақстанның кемел болашағы» атты I республикалық байқауда «Денсаулық сақтау саласындағы үздік тіл маманы» аталымын иеленге-нін айта кетейік.

Аталмыш бастауыш кәсіподақ ұйымы жанұясында ұзаққа созылған сырқат жандары бар қызметкерлерге материалдық тұрғыда тұрақты түрде көмек көрсетіп келеді. Қызметкерлерге әр түрлі мейрамдарда сауықтыру кешендеріне тегін сертификаттар беріледі. Мұның сыртында бастауыш кәсіподақ ұйымы алдағы уақытта мекеме ауласынан қызметкерлерге арналған спорт алаңын салуды да қолға алмақшы. Сондай-ақ ұжымдағы жұмысшылардың балаларын жазғы лагерлерде демалтуға да қолдау білдіреді. Нақтырақ айтқанда, балалар лагерінде демалу қаражатының жартысын бастауыш кәсіподақ ұйымы төлейді. Бұл орайда бірінші кезекте жанұя жағдайлары, көп балалы отбасынан болуы ескеріледі.

– Өткен жылы қызым «Қазақстандық денсаулық сақтау қызметкерлерінің салалық кәсіптік одағы» қоғамдық бірлестігі БҚО филиалының қолдауымен «Еуразия» балалар лагерінде демалған еді. Бұл демалыстан кішкентай қызымның үлкен әсер алғаны соншалықты, жаз шыққалы «Лагерьге тағы да жолдама бермес пе екен, Сара Күлесқызынан сұраңызшы» деп мені жиі мазалайтын болды, – деп күледі аталмыш мекемедегі шақыртуларды қабылдау жөніндегі диспетчер  Нұргүл  Дүйсенбаева.

Облыстық жедел медициналық жәрдем стансасындағы бастауыш кәсіподақ ұйымы мекеме жұмысшылары үшін былтыр Татарстанның Қазан қаласына саяхат ұйымдастырған. Осы сапардың медицина қызметкерлеріне сыйлаған ұмытылмастай әсері туралы орталық залалсыздандыру бөлімінің фельдшері Лариса Гриценко сағаттап әңгімелеуге  дайын.

– Біз Қазан қаласына тарихи-архитектуралық ескерткіштермен танысу мақсатында барған болатынбыз. Маған Татарстанда мұсылман және христиан діндері өкілдерінің бейбітшілік пен келісімде өмір сүріп жатқаны және аталған екі дінге қатысты тарихи ескерткіштердің бірдей сақталып тұрғаны жағымды әсер қалдырды. Қазан қаласынан 60 шақырымдай қашықтықта орналасқан, айналасын Еділ өзені айнала ағатын Свияжск аралында болдық. Бұл жер өзінің көне тарихымен орыс фольклорындағы «Буян аралын» еске түсіреді. Мұндағы ең ескі архитектуралық ескерткіш Иван Грозныйдың әмірімен тұрғызылған. Осы аралда шегесіз тұрғызылған көне шіркеу бар. Және бұл мекен шіркеулерінің көптігімен ерекшеленеді. Бүгінгі таңда осы аралға тұрғындарды қоныстандырып, таза туристік аймаққа айналдырған. Тұрғындары негізінен балық кәсіпшілігімен айналысады. Сондай-ақ жылқы шаруашылығы, ара шаруашылығы, өзге де табиғатпен үндескен көне кәсіптің түрлері ерте кездегідей табиғи қалпында сақталған. Бір сөзбен айтқанда, ертегі әлеміне тап болғандай күйге енесің. Сауда орнынан бөшкеге салып сатылатын балды көруге болады. Бұрынғыдай арбаға жегілген аттарды көрдік. Мұндағы ішіне балық салып пісірілген бәліштің дәмі тіл үйіреді. Аралдың бай тарихынан алған әсеріміз өте мол. Ондағы ескілікті көріністер мен тұмса табиғаттан айрықша қуат алғандай болдық. Айнала қарағай, шырша өскен. Кемеге міндік. Үш күн бойына аралдың таза ауасымен тыныстадық. Төртінші күні Қазан қаласына бардық. Бұл қалада әйгілі ақын Марина Цветаева жерленген. Осы қалада тарихта алғаш рет жасыл дәрі (зеленка), ацетилсалицил қышқылы, өзге де түрлі дәрі-дәрмектер ойлап табылған. Қазан қаласындағы жаңа заманғы ең ірі ескерткіштердің бірі – Құл-Шәріп мешітімен таныстық. Құл-Шәріп мешітінің әсемдігін сөзбен айтып жеткізу мүмкін емес. Бұл кәсіподақ ұйымының есебінен Астана қаласына алғаш рет барып, сондағы жаңа мешітті көргенде алған әсерімді еске салды. Сол жолы Астана қаласына кәсіподақ саласындағы көшбасшылық, менеджмент тақырыбындағы оқыту семинарына барған болатынмын. Аталмыш сапарда елорданың көрікті жерлерін аралап, айрықша әсерге бөленгеніміз де өз алдына бөлек әңгіме. Осы оқыту семинарының нәтижесі болса керек, ұжымымызда аз уақыттың ішінде бастауыш кәсіподақ ұйымына кірушілердің қатары күрт өсті. Мен бүгінгі таңда 25 жылдық еңбек өтіліммен жоғары санаттағы фельдшер ретінде 64 мың 700 теңге жалақы аламын. Менің айтқым келгені, саяхаттап демалу үшін жоғары жалақыға ие болу шарт емес. Біздің ұжымымыздағы бастауыш кәсіподақ ұйымының белсенді әрекеті нәтижесінде танымдық бағытта, тәнді сауықтыру бағытында көптеген саяхаттарға шығып тұрамыз. Былтыр жазда әріптестеріміз бастауыш кәсіподақ ұйымының белсендісі ретінде маған жолығып, Шалқар көліне барып демалғылары келетіні туралы ұсыныс айтты. Мен бұл ұсынысты кәсіподақ ұйымының төрайымы Сара Күлесқызына жеткізгенімде, ол бірден қолдау танытты. «Егер кісілер жиналса, тегін көлік мәселесін шешіп, жол азығына қаражат бөлеміз» деді ол. Сөйтіп біздің ұжымның қызметкерлері өздерімен бірге балаларын, жұбайларын ілестіріп, табиғат аясына демалысқа шықты. Далада шай қайнатуға шоқ самаурын ала шықтық. Мол етіп қарбыз сатып алдық. Мен бұл жолы Шалқар көліне де алғаш рет барған едім. Теңіздей шалқыған көлді, көл жағалай тігілген киіз үйлерді көріп, таң-тамаша болдым. Ал биылғы қыста Сара Күлесқызы бізге ерекше демалыс ұйымдастырды. Кәсіподақ қаржысынан турбаза жалдап, шаңғы, коньки және қаршанамен сырғанадық. Саяхаттан алған әсерлеріміз естен кетпейді, – дейді Лариса  Александровна.

Нұртас НАБИОЛЛАҰЛЫ,

«Орал өңірі»


Балаларға су жаңа спорттық алаң

Күні: , 53 рет оқылды

1 маусым — Халықаралық балаларды қорғау күніне орай Орал қаласындағы Циолковский көшесі №10 үйдің маңынан балаларға арналған спорт және ойын алаңдары ашылды.

Салтанатты шараға қала әкімінің орынбасары Мирболат Нұржанов қатысып, аула тұрғындары мен балаларды аталмыш мерекемен құттықтады.

— Қаламыз бойынша өткен жылдан бері осындай 20 алаңды салу жоспарланған болса, соның бірін қазір ашқалы тұрмыз. Қалалық бюджет және өзге де көздерден қаржы қарастыру арқылы спорттық алаңдар және балалар алаңқайлары бой көтеріп келеді. Жазғы демалыста оқушылар бос жүрмей, осындай алаңдарда спортпен шұғылданып, келесі оқу жылына жақсы дайындықпен келеді деп сенеміз. Бүгін осы жерде футбол, волейбол, стритбол және бүлдіршіндерге арналған ойын алаңдары қолданысқа берілуде, — деді ол.

Аталмыш спорт алаңының құрылысын жүргізген мердігер «Dizain D.A.» ЖШС аула тұрғындары мен балғын спортшыларға спорт жабдықтарын сыйға тартты. Тұрғындар қала басшылығына және алаңды салып шыққан құрылысшыларға алғыстарын білдірді. Циолковский көшесі №10 үйдің тұрғыны Дәметкен Илашева әжей жаңадан ашылған стритбол алаңына кіріп, құтты болсын айтып, қазақтың дәстүрімен шашу шашты.

— Осы спорт және ойын алаңын салып шығу үшін 42 миллион теңге қаражат бөлініп, тұтастай игерілді. Жоспар бойынша құрылыс жұмыстары шілде айында аяқталуы тиіс еді. Алайда уақытынан ертерек бітіріп, 1 маусым – балалар мерекесінде ашуға үлгерттік. Алаң бес бөліктен тұрады, барлық қажетті абаттандыру жұмыстары жүргізілді. Алаңға бейнебақылау орнатылғанын айта кету керек, — дейді аталмыш серіктестіктің өкілі  Мейрам Ерғалиев.

Осыған ұқсас спорт және ойын алаңдары дәл осы күні қаламыздағы №19 мектепте, Қадыр Мырза Әли атындағы шағынауданда, сондай-ақ Зашаған кентіндегі Мұрат Мөңкеұлы көшесінде де ашылды.

Нұртас НАБИОЛЛАҰЛЫ,

«Орал өңірі»


БҚО-дағы «Жаңғыру жолы»

Күні: , 37 рет оқылды

Қадыр  Мырза  Әли атындағы  мәдениет  және  өнер  орталығының  амфитеатрында  БҚО  Қазақстан  халқы  ассамблеясының  «Жаңғыру жолы»   жастар  қозғалысының  бастау алуына  арналған  салтанатты  шара  өтті.

Жиынға БҚО Қазақстан халқы ассамблеясының жастар қанаты, ауданауылдардағы белсенді жастар, студенттер, жастар ұйымдарының өкілдері және еріктілер қатысты.

– Қадірменді жастар! Тұтас еліміз бойынша құрылған «Жаңғыру жолы» жастар қозғалысының алғашқы қадамы құтты болсын! Елбасымыздың салиқалы саясатының арқасында елімізде 130-дан астам ұлт өкілдері тату-тәтті өмір сүруде. Келесі ұрпаққа дамыған, бүкіл дүние жүзінде беделі бар тәуелсіз мемлекетімізді тапсыру деген үлкен жауапкершілігіміз бар. Осы міндетті атқаруда, жастар, сіздердің рөлдеріңіз ерекше.

Әлемде қазақтың дәстүрі мен мәдениеті, тілі, тарихы ұмытылмайтындай дәрежеге жеткізу «Рухани  жаңғыру» бағдарламасының негізгі мақсаты болып есептеледі. Бүгін бүкіл жастарды біріктіретін жастар қозғалысының негізгі мақсатын айқындау, түсіндіру үшін жиылып отырмыз. Өздеріңізді осы жастар қозғалысына белсенді түрде қатысады деген үмітіміз зор. Елбасымыз жуырда ғана сіздерге «Өзге қырыңды тап» деген үлкен бейнеүндеу жолдады. Мұның негізгі мақсаты – денсаулығымызды сақтау үшін әрқашанда қимылда болып, денемізді шынықтырып тұруымыз  керек екенін насихаттау. Осы бастаманы белгілі қоғам қайраткерлері, талай жастарымыз қолдап әкетуде, біздің жастарымыз да құр қалмауы керек. Жолдарыңыз ашық, жарқын болсын, еліміз дами берсін! Әрдайым осындай жақсы іс, игі бастамалардың басынан жүздесейік! – деді облыс әкімінің орынбасары Ғабидолла Оспанқұлов жастарды құттықтау сөзінде.

Амфитеатрға жиылған жастар «Біздің күшіміз бірлікте!», «Болашаққа бірлікпен!», «Жастар қуатты Қазақстан үшін!» деп қосыла ұрандатты.

– «Жаңғыру жолы» не себептен ассамблея жанынан құрылуда? Себебі Қазақстан халқы ассамблеясы — Елбасымыздың елдің басын біріктіру үшін ойлап тапқан әлемде жоқ институты. Елордада өткен республикалық жастар конференциясына Батыс Қазақстан облысы жастарының атынан қатысып, тың идеялармен жігерленіп, жауапкершілік арқалап келгендеймін. Республикалық дәрежеде өткен конференцияда жастар белсенділік танытты. Өйткені Елбасымыз «Ел болашағы – жастардың қолында» деп жастарға сеніп, қолдау танытып отыр. Барлық жастарды «Рухани жаңғыру» бағдарламасын бірге жүзеге асыруға шақырамын. Жаңғыру жолы – біздің жолымыз, жаңғыру жолы – жастар жолы! – деді Астанада өткен «Жаңғыру жолы» республикалық жастар конференциясына қатысып келген «ҚАЗИИТУ» ғылыми-білім кешенінің студенттік ректоры Нұрзада  Сақтағанов.

Жүргізушілер жиылған жастар үшін «Жаңғыру жолы» жастар қозғалысы платформасының мәтінін оқып шықты. Мұнан кейін сахна төріне Игорь Спиридонов бастаған 16 этномәдени бірлестіктің  жас өкілдері, БҚО Қазақстан халқы ассамблеясы «Жаңғыру жолы» жастар қозғалысының жұмысшы штабының мүшелері көтерілді. Штаб жетекшісі Игорь Спиридонов аталмыш жастар қозғалысының жұмысшы тобын әр аудан, ауылдарда құру туралы бастама көтерді. Ол сондай-ақ облыстағы жастар қозғалысының 2018 жылы атқаратын шараларының бірқатарын атап өтті. Олардың қатарында  жастар қозғалысының жұмысшы штабтарын құру, саяси қуғын-сүргін құрбандарын еске алу күніне арнап «Тағзым» акциясын өткізу, жастарды жігерлендіретін өзге де түрлі кездесулер, байқаулар ұйымдастыру  жоспарлары  бар.

БҚО Қазақстан халқы ассамблеясы төрағасының орынбасары, хатшылық меңгерушісі Ғайса Қапақов штаб жетекшісі Игорь Спиридоновқа «Жаңғыру жолы» жастар қозғалысының жалауын табыстау үстінде қозғалыстың алғашқы қадамына сәттілік тілеп, жастарға зор сенім білдірді. Енді БҚО жастары аталмыш жалауды әрі қарай әлеуметтік желі арқылы виртуалды түрде Қызылорда облысының жастарына табыстайды.

Сөйтіп, Қызылорда жастары «Жаңғыру жолы» жастар қозғалысының алғашқы салтанатты жиынын өткізу эстафетасын қабылдап алады.

Салтанатты шара барысында әнші, биші жастар өнер көрсетіп, патриоттық  әндер шырқалды.

Нұртас   НАБИОЛЛАҰЛЫ,

«Орал   өңірі»


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика