Тег: ‘Нұрбек Оразаев’


«Орыстар» аздай, енді «армяндар» шықты…

Күні: , 215 рет оқылды

Бірден мәселенің басын ашып алайық, әңгіме әсте ұлтаралық қарым-қатынас жөнінде емес. Мәселе Ресей Федерациясынан тіркеуден шығарылғанымен, ресейлік нөмірмен Батыс Қазақстан облысының аумағында тайраңдап жүрген темір тұлпарларда болып тұр. Дәлірек айтқанда, әңгіменің бәрі әлгіндей көлікті тақымына басқан батысқазақстандықтардың өздеріне барып тіреледі. Өйткені олар өздері тізгіндеген көлік еш жерде тіркелмегендіктен, жол жүру ережесін бұзуға тым үйір көрінеді. Облыс аумағындағы көптеген жол-көлік оқиғаларына түрткі болған ресейлік нөмірлі көліктердің лаңы аздай, енді оларға Армениядан әкелінген аутоарғымақтардың тізгінін ұстағандар қосылды…

Биылғы жылы күні бүгінге дейін облыс аумағында 308 жол-көлік оқиғасы тіркелген. Соның 187-сі ресейлік нөмірлі аутокөліктердің қатысуымен орын алған. Жаңағы 308 жол-көлік оқиғасының кесірінен өкінішке орай, 341 адам жарақат алып, 96 адам қаза тапқан. Өткен жылдың осы кезеңімен салыстырғанда жол-көлік оқиғаларынан жарақат алғандардың саны төмендегенімен, қаза тапқандардың саны артып отыр.

Жергілікті полиция басқармасы берген деректер осылай дейді. Заңды тіркеуге тұрмайтын, жергілікті жерге салық төлемейтін, басқаша айтқанда, «ауадағы» көліктерден келетін кесірлердің көп екендігі жоғарыдағы цифрлардан анық байқалады.

Арзан бағаға көршілес Ресейден қарша жауған, осы жердің жолын таптап, ауасын ластап жүрсе де, «пропискаға» тұрмайтын, қазынаға көк тиын пайда әкелмейтін «келімсек» көліктердің көбейіп кеткендігі туралы дабыл қаққандығымыз күні кеше секілді еді. Іргелес мемлекеттен келген көліктерді жергілікті жердің заңына қайтсек бағындырамыз деп бас қатырып жүргенімізде, батысқазақстандықтар Армения асып, арзан аутоарғымақты сол жақтан таси бастады.

Бүгінде қала көшелерінде Армениядан әкелінген, сол мемлекеттің нөмірін таққан көліктер қаптап жүр. Ебін тауып, екі асайтын «пысақайлар» бұны бизнес көзіне де айналдырып алыпты. Олар туралы деректі сол елдің көлігін тізгіндеген кісіден немесе ғаламтордағы деректерден оп-оңай табуға болады.

– Осы кезге дейін мініп келген көлігімнің әбден тозығы жетті. Аутосалоннан жаңасын сатып алуға қалта көтермейді. Отбасылы болған соң бірнеше жылға несие алғанды да жөн көрмедім. Қазір жұрттың бәрі арзан аутоны Армениядан әкеліп жатыр ғой. Содан біреулерден ақысын төлесең, сол елге ертіп барып, көлік алып беруге жәрдемдесетін «делдалдардың» телефон нөмірлерін сұрап алдым. Алғашында «Армения қайда, біз қайдамыз?» деп қорыққам, соңынан тәуекелге бел будым. Әлгі адаммен хабарласып, қанша қаражатымның бар екендігін, қандай көлік алғым келетінін айттым. Ол да өз еңбегінің бағасын жасырмады. Сөйтіп, 40-50 мың теңгені «көшбасшыға» беретін болып келістік. Өзім секілді арманындағы көлігін арзан бағаға алғысы келетін бауырларыммен бірге минивенге мініп, Арменияға аттанып кеттік. Жолшыбай кімге қанша сомаға қандай көлік керек екендігін біліп алған жолсерігіміз сол жақтағы әріптестерімен байланыс ұстап отырды. Барған бойда әркімнің көздеген көліктерінің бірнеше нұсқасын дайындап қойыпты. Таңдағанымызды алып, есептесіп, елге қайттық. Бұрын қайда,  қанша жыл жүргенін білмеймін, әйтеуір, сырты бүтін көлік алғанымызға біз де риза, діттеген жұмысымызды бітіріп, олжалы оралған делдал да разы. Енді қанша жыл кәдеме жарарын уақыт көрсетер, – дейді Бақберген есімді кейіпкеріміз.

Шынымен де, қазіргі таңда еліміздегі аутокөліктердің бағасы айтарлықтай қымбат. Қазақстанда құрастырылған отандық өнім тиімді пайызбен несиеге  берілсе де, оны бірнеше жыл бойы өтеуге халықтың аса ықылас танытпайтыны ақиқат. Сол себептен, жұртшылық Еуразиялық одақтың мүмкіндігін пайдаланып, Ресей, Қырғызстан, Армения секілді елдерден ескі көліктерді әкелуде.

Өткен жылдың қазан айынан бастап Еуразиялық одаққа мүше мемлекеттерде көлік құралдарына жеңілдетілген тәртіп енгізілгені мәлім. Яғни бұрын одақтас елдерде тіркелген көліктер алты айдан соң шекарадан кері шығуы немесе уақытша тіркелуі тиіс болса, бұдан былай бұл шектеудің күші жойылды.

– Бүгінгі таңда облыс көлемінде 140 мыңнан астам көлік құралы заңды түрде тіркелген. Ал Еуразиялық одаққа мүше елдерден әкелінген көліктердің нақты саны белгісіз. Шет мемлекеттерден келген аутокөліктерді тіркеуге алу заңмен белгіленбеген. Біздің өңір Ресей Федерациясының бес бірдей облысымен шекаралас болғандықтан, сол елден әкелінген көлік саны күрт артып отыр. Оның басты себебі, ол жақтағы аутокөлік бағасының арзандығында. Батысқазақстандықтар Ресейден қалтасындағы қаражатына ыңғайлы келетін көлікті емін-еркін шекарадан өткізіп, осы жақта пайдалана береді. Оған ешқандай тыйым жоқ. Жергілікті полиция қызметіндегі іздеу бөлімі шетелдік нөмірлі көліктердің есебін жүргізуге тырысып-ақ бағуда. Ұйымдастырылған шаралар барысында ресейлік нөмірлі аутокөліктерді тоқтатып, құжаттарын тексеріп, тізімге енгізуде. Бүгінде біздің тарапымыздан тіркеуге алынған ресейлік нөмірлі аутокөліктердің саны мыңнан асты. Сол тізімге тіркелген көліктер туралы ресейлік әріптестерімізге көліктің заңдылығы, есепте тіркелуі туралы сұраныс жолдаймыз. Бұл тек іс-шаралар барысында анықталғаны ғана. Негізі олардың саны едәуір көп екендігі белгілі. Осы уақытқа дейін мемлекеттік тіркеу нөмірлері арқылы ресейлік әріптестерімізге жолданған 400-ге жуық  сұраныстың 100  шақтысына жауап келді. Нәтижесінде 20-дан астам көліктің жоғарыда аталған Ресей облыстарының есебінен шығарылғандығы, үш көліктің іздеуде екендігі  анықталды. Бізде тіркеуде бар, бірақ бұрынғы жүрген өңірінде есепте жоқ аутокөлік иелерін жолдан тоқтатып немесе тұрғылықты жерлеріне барып, мемлекеттік нөмірлерін тәркілеп, көліктерін айыппұл тұрағына қойғызу шаралары жүргізілуде. Былтыр шекаралас облыстармен өзара ынтымақтастық меморандумына қол қойылған болатын. Сондықтан бұл бағытта жұмыс жақсы жолға қойылды, – дейді БҚО ПД жергілікті полиция қызметі басқармасы бастығының орынбасары, полиция подполковнигі Кенжебек Құспаев.

Егер шет мемлекеттерден әкелінген аутокөлік «ЕУРО-4» стандартына сәйкес болса, онда біздің мемлекетке заңды түрде кіргізе алады. Бірақ көлік иелері біздің мемлекетке тіркеуге қойып, нөмір алу үшін қыруар қаражат жұмсауы керек. Ол шығындар көліктің өзіндік құнынан 2-3 есе асып кететіні анық.

Армениядан әкелінген көліктерді сатып, пайда табушылардың саны да артқан. Ғаламтордағы көлік сатуға арналған парақшаларды қарасаңыздар да, темір тұлпар базарына бара қалсаңыз да, сол елдерден әкелінген аутодан көзіңіз сүрінеді. Сырты жылтырап тұрған көліктердің бағасы да әжептәуір арзан.

Жергілікті полиция қызметі басқармасы ұсынған деректерге сүйенсек, Армениядан әкелінген аутокөліктер жаңа әрі сапалы болғандықтан шығар, бұл көліктердің қатысуымен жол-көлік оқиғасы әзірге орын алмаған. Тіркеуге қойылмағандықтан, бүгінгі таңда олардың нақты саны да белгісіз. Полицейлер тұрғылықты  жерін таппай, тайраңдаған темір тұлпар иелеріне көшедегі жол белгілері, жылдамдықты сақтау тәртібі, бейнебақылау камералары секілді шектеулер тіптен соқпайды екен. Шетел нөмірлі көліктердің қатысуымен болған жол-көлік оқиғаларының көбеюіне де осы жүгенсіздік ең басты себеп көрінеді.

Шыны керек, осыдан 15-20 жыл бұрын көлік байлық пен барлықты байқатса, бүгінде қарапайым күнделікті қозғалыс құралына айналған. Құп делік, қаракөз ағайынның жағдайы жақсарып, заманына лайық тірлік кешкеніне, әрине, қуанамыз. Алайда, қалтаға қолайлы болғанмен, өзіміздің емес, өзгенің экономикасын өркендетуге үлес қосып жатқанымыз, ел ішіндегі көлік «қоқысын» тазартамыз деп жүргенде, жанымыздан келіп «біреудің тамтығы» кіріп жатқандығы өкінішті-ақ.

Жергілікті жердің жолымен жүгенсіз жүріп, қоршаған ортаға зиян келтіретін, салық пен полициядан бой тасалайтын «келімсек» көліктерге белгілі бір заңдылықтың, тәртіптің керегі айдан анық. Бұл мәселе, әсіресе, Атырау, Ақтөбе, Маңғыстау облыстары мен біздің өңірде өршіп тұр. Орын алған түйткілдің түйінін шешіп, белгілі бір заң немесе ортақ ереже қабылданбаса, күні ертең кең байтақ даламыздың темір қоқысына айналмасына кім кепіл?

Нұрбек   ОРАЗАЕВ,

«Орал   өңірі»


Алтай КӨЛГІНОВ, облыс әкімі: «Атқарылған істерге тоқмейілсімейміз»

Күні: , 52 рет оқылды

Кеше Батыс Қазақстан облысының әкімі Алтай Көлгінов Орталық коммуникациялар қызметінде баспасөз конференциясына қатысып, өңірдің әлеуметтік-экономикалық дамуы және мемлекеттік бағдарламалардың  жүзеге асырылуы туралы баяндады.

– Биыл алғашқы жартыжылдықта ішкі жалпы өнім 0,6% өсіп, 1,2 трлн. теңгені құрады. Өткен сегіз айда өңдеу өнеркәсібіндегі экспорт көлемі 26% өсіп, 150 млн. долларға жетті. Өңірдегі өнім өндіру көлемі 2,5 трлн. теңгені құрады. Негізгі капиталдағы инвестиция көлемі 0,5% ұлғайып, 316 млрд. теңгеге жетті. Сыртқы инвестиция көлемі 197 млрд. теңгені құраса, оның негізгі ка-питалдағы үлесі 62%. Батыс Қазақстан облысы 2,5 мың тонна ет және ет өнімдерін экспорттап, қой етін сыртқа сату бойынша жоспарымыз үш есе артығымен орындалды. Мұндай көрсеткіштерге қол жеткізуге Елбасы тапсырмаларын орындауға бағытталған жүйелі және кешенді іс-шаралар тікелей әсер етті, – деді облыс әкімі Алтай Көлгінов.

Мұнан соң өңір басшысы облыс экономикасы мен халықтың әл-ауқатын арттыру бағытында маңызды рөл атқаратын әр салаға  жеке-жеке  тоқталды.

 

Ауыл  шаруашылығына 2,5  миллиард  теңге  инвестиция

Биыл облыста ауыл шаруашылығын қолдау шараларына 12 млрд. теңге бөлінген. Ауыл шаруашылығындағы жалпы өнім 104 млрд. теңгені құрап, өңірде дәнді дақылдардың жалпы егістік көлемі 513 мың гектарға жетті. Сонымен қатар өңірге 2,5 млрд. теңгеден астам инвестиция тартылып, агроөнеркәсіптік кешенде бірқатар жобалар  жүзеге  асуда.

Облыста индустрияландыру картасына сәйкес құны 22 млрд. теңгені құрайтын 10 жобаны іске қосу арқылы 362 жаңа жұмыс орны ашылады деп күтілуде. Жалпы өңірде 61 жоба жүзеге асып, 3300 жұмыс орны ашылды. Бұл жобалардың құны 346 млрд. теңгені  құрайды.

Өңірдегі шағын және орта бизнес сектордың үлесі 40%-ды құрайды. Бұл көр-сеткіш бойынша біздің облыс республикада үшінші орында. «Бизнестің жол картасы – 2020» бағдарламасы аясында жалпы құны 100 млрд. теңгені құрайтын 831 жоба қаржыландырылған. Сондай-ақ құры-лыс саласында 2,7 млрд. теңгені құрайтын 57 жобаға инфрақұрылым тартылған. Облыс әкімінің баяндауынша, шағын және орта бизнеспен айналысатындар саны алты пайызға артып, 40 мың субъектіні құраған. Облыста бұл салада еңбек ететіндердің саны 10 пайызға  немесе 115 мың адамға өскен.

Көп  қабатты  26  тұрғын  үй  салынуда

Елбасының Жолдауында еліміздің аумақтық дамуына жаңа тәсілдерді енгізуді қамтамасыз ету, сондай-ақ «Нұрлы жол» және «Нұрлы жер» бағдарламаларын 2025 жылға дейін ұзарту туралы айтылған болатын. Биылғы жылы осы бағдарламаларға сәйкес Батыс Қазақстан облысына 36,3 млрд. теңге бөлінді. Атап айтқанда, «Нұрлы жол» бағдарламасы бойынша 19,1 млрд. теңге, «Нұрлы жер» бағдарламасына 17,2 млрд. теңге қарастырылған.

– «Нұрлы жер» бағдарламасымен өңірімізде 3134 пәтерді құрайтын көп қабатты 26 тұрғын үйдің құрылысы жүргізілуде. Сонымен қатар аудан-ауылдарда 104 тұрғын үй салынуда. Жыл соңына дейін облыс орталығында 688 пәтерді құрайтын 6 көп қабатты тұрғын үй, аудан-ауылдарда 139 пәтерді құрайтын 83 тұрғын үй пайдаланылуға берілмек, – деді Алтай Көлгінов.

Өңірде жеке инвесторлардың есебінен 1400 пәтерлі үй салынған болса, солардың ішінен 100 пәтер «7-20-25» бағдарламасы бойынша берілген. Ал 280 пәтер аталған бағдарлама бойынша берілуге дайын тұр.

Бүгінде Орал қаласында апатты жағдайдағы 44 тұрғын үй тіркелген. Сол үйлерді бұзып, орнына жаңа көп қабатты үйлер салу мақсатына жеке инвесторлардан 13,5 млрд. теңге қаржы тартылып, бүгінде 17 үй қайта салынуда. Бұл үйлер бірінші кезекте бұрынғы тұрғындарға тегін берілетін болады. Ал қалған пәтерлер «7-20-25» мемлекеттік бағдарламасымен берілмек. Құрылысы жүріп жатқан бес көп қабатты үйдің екеуінің құрылысы аяқталып, жақын күндері пайдаланылуға берілетін болады.

Елбасы Нұрсұлтан Назарбаевтың «Президенттің бес әлеуметтік бастамасы» атты халыққа Үндеуінің аясында 1800 студенттерге арналған бес жатақхана салу жұмыстары  жүргізілуде.

Жол   салу   жүйелі

«Нұрлы жол» бағдарламасы аясында жыл сайын облыс аумағындағы 500 шақырымдай жолдарға жөндеу жүргізілуде. Тек биылғы жылдың өзінде 450 шақырым жол салу үшін 32 млрд. теңге бөлінді. Республикалық маңызы бар жолдардың 285 шақырымында жөндеу жұмыстары жүргізілді.

– Жыл сайын біздің өңір арқылы 1 миллион 200 мыңдай аутокөлік, 4 миллиондай жолаушы өтеді. Жақын жылдары бұл көрсеткіштің өсе түсері анық. Сондықтан болашақта Саратов, Самара және Атырау бағытындағы күре жолдарды байланыстыратын жол құрылысы жобасын бастау жоспарда бар. Бұл жоба жүзеге асқан жағдайда ауыр жүк көліктері уақыт пен қашықтықты үнемдейді және облыс орталығына кіріп, көлік ағынына кедергі келтірмейтін болады, – деді А. Көлгінов.

Облыс әкімі келтірілген мәліметтерге сүйенсек, биыл облыс орталығында 8,8 млрд. теңге қаражатқа ұзындығы 50 шақырымды құрайтын 50 көше жолдары жөнделген. Сонымен қатар шаһардағы Депо ауданы маңындағы төрт жолақты көпір күрделі жөндеуден өтіп,  пайдаланылуға  берілді.

Мемлекет басшысының тапсырмасына сәйкес, келесі жылдан бастап Жәнібек, Бөкей ордасы аудандарына қатынайтын тас жолдың құрылысы басталады.

Орал  қаласы  мен   үш  аудан  100%  газбен  қамтылған

БҚО-да биыл 44 елді мекендегі 16 мың халықты көгілдір отынмен қамту мақсатында 8 жоба жүзеге асырылуда. Бұл мақсатқа 1,6 млрд. теңге қаражат бөлінген. Бүгінгі таңда Ақжайық, Бөкей ордасы, Зеленов, Жәнібек аудандары аумағындағы 24 елді мекенге газ тарту жұмыстары аяқталып, тоғыз мыңнан астам ауыл тұрғыны көгілдір отынның рахатын көруде. Қалған 20 ауылға газ тарту жұмыстары келер жылы аяқталатын болады. Осы жұмыстар мәреге жеткенде өңірдің көгілдір отынмен қамтылуы 95 пайызға жететін болады.

Халықты таза ауыз сумен қамту жыл басында 40,5 пайызды құрады. Жалпы ұзындығы 1000 шақырымды құрайтын ауыз су құбырларын тарту және жаңарту жұмыстарына 4,5 млрд. теңге қаражат бөлінген. Бүгінде 56 мың тұрғыны бар 50 елді мекенді таза ауыз сумен қамту жұмыстары жүргізілуде. Ол елді мекендердің 17-сі таза ауыз суға қол жеткізген болса, жыл соңына дейін 23 ауыл таза суға қосылатын болады.

Сонымен қатар құны 2,5 млрд. теңгені құрайтын Жаңақала ауданындағы топтық су құбырын салу нәтижесінде 8 елді мекен таза суға қол жеткізді.  Алдағы екі жыл ішінде өңірдегі тағы 50 елді мекенге су құбырын тарту арқылы 2020 жылы облыстағы таза сумен қамту деңгейі 50%-дан асатын болады.

Облыс орталығында жылу және сумен қамту жүйесін жаңғырту мақсатында құны 1,5 млрд. теңгені құрайтын 5 жоба жүзеге асты. Ақсай қаласында сыртқы жылу желілері қайта жөнделді. Атқарылған жұмыс нәтижесінде Ақсай қаласындағы жылу және су желілерінің тозуы 43%-дан 7%-ға төмендеді.

Айта кету керек, бұл жобаларды жүзеге асыру барысында 176 адам  жұмыспен  қамтылды.

Балабақшалар 500-ге   жетті

Елбасы Н. Ә. Назарбаев 5 жыл ішінде білім, ғылым және денсаулық сақтау салаларына жұмсалатын қаражатты жалпы ішкі өнімнің 10 пайызына дейін жеткізу қажеттігін атап өтті. Осыған орай, өңірдегі білім беру ұйымдарының материалдық-техникалық базасын нығайту үшін биыл 3 млрд. теңгеге жуық қаражат бөлінген.

– Күні кешеге дейін балабақшаларда орын жетіспеу мәселесі өткір болып келді. Мемлекеттің қолдауы мен жеке кәсіпкерлердің белсенділігінің нәтижесінде балабақшалар саны 500-ге жетті, оның 52-сі – жеке балабақшалар. Балаларды кезекке қою Орал қаласында электронды жүйеге көшірілді. Облыста 1 жастан 6 жасқа дейінгі балаларды мектепке дейінгі біліммен қамтамасыз ету 70%-ды, 3 жастан 6 жасқа дейін 100%-ды құрайды, – деді Алтай Көлгінов.

Сонымен қатар облыста «Bilim Land» білім беру порталының жоғары сапалы мазмұнын қамтамасыз ету, қалалық және ауылдық мектептердің білім беру ресурстарына тең қолжетімділігін арттыру мақсатында барлық 225 (100%) шағын жинақты мектепке жалпы құны 312 млн. теңгені құрайтын 567 бірлік «Білім кітапшасы» компьютер-трансформерлер сатып алынған. «Нұр Отан» партиясымен бірге 15 IT-сынып ашылып, IT-лицей жұмыс істей бастады. Келесі жылы партиялық жоба бойынша тағы 50 IT-сынып ашылмақ.

Айта кетейік, биылғы жылы Орал қаласының Деркөл кентіндегі 600 орындық, Ақжайық ауданының Шабдаржап ауылындағы 200 орындық мектеп, Ақсай қаласындағы 240 орындық балабақша, Зеленов ауданының Дариян ауылында 100 орындық интернаты бар 300 орындық мектеп, Бөкей ордасы ауданы Сайқын ауылындағы мектептің 70 орындық интернат пайдалануға берілді.

Жоғары оқу орындарында мамандарды даярлау үшін соңғы екі жылда облыста сұранысқа ие мамандықтар бойынша жергілікті бюджеттен 300 грант бөлінген.

Кардиоорталыққа  жаңа  ғимарат

– Денсаулық сақтау саласында мемлекеттік-жекешелік әріптестік аясында екі жоба жүзеге асты. Аталған жоба аясында облыстық ауруханаға құны 550 миллион тұратын магнитті-резонансты томограф алынса, Шыңғырлау ауданының Лубен ауылында жобалық құны 117 млн. теңгені құрайтын, ауысымына 35 адамды қамтитын дәрігерлік амбулатория салынды. Сонымен қатар Орал қаласында заманауи құрал-жабдықпен қамтылған кардиоорталыққа жаңа ғимарат салу жоспарлануда, – деді облыс әкімі.

Сондай-ақ өңір басшысы облыстағы қағазсыз құжат айналымы, медицина саласында цифрлық технологияларды пайдалану  туралы  сөз  етті.

Айта кету керек, Батыс Қазақстан облысында өлім бойынша ісік аурулары 7,3%-ға, қан айналымы жүйесі аурулары 10%-ға, ал туберкулез 21%-ға төмендеді.

100  спорт алаңы  салынбақ

– Бұқаралық спортты дамыту, халық арасында салауатты өмір салтын қалыптастыру мақсатында облыс көлемінде 50 спорт алаңдары салынып, пайдалануға берілді. Бұл бағыттағы жұмыстарға «Samruk-Kazyna Trust» әлеуметтік жобаларды дамыту қоры үлкен қолдау білдіруде. Жергілікті бюджет есебінен Ақжайық, Қазталов, Жаңақала, Тасқала аудандарынан 5 дене шынықтыру-сауықтыру кешенін салу жоспарланған. Сондай-ақ «Нұр Отан» партиясымен бірлесіп жасалған жол картасы аясында 100 спорт алаңдарын салу жоспарланып отыр, – деді А. Көлгінов.

Соның нәтижесінде жыл соңында бұқаралық спортпен шұғылданатын өңір тұрғындарының 30%-ын  құрайтын  болады.

40-тан   астам   жоба   жүзеге   асырылуда

Батыс Қазақстан облысында цифрландыру жұмыстары жүйелі жүргізіліп келеді. Мемлекеттік қызмет түрлері жаппай электронды форматқа көшірілуде. Бүгінгі таңда өңірде «Smart City» тұжырымдамасына сәйкес «Қолжетімді әкімдік», «Smart Uralsk» орталығы, «Мамандандырылған ХҚКО», «Көші-қон ХҚКО» ашылып, қалыпты жұмыс жасауда.

Сондай-ақ жер қатынастары саласында жер ресурстарының бірыңғай порталы ашылып, «Жер  учаскесін таңдау актісін бекіту» қызметі автоматтандырылды. Бұрын азаматтар таңдау актісін алу үшін 3 ай күту керек болса, қазір бұл қызмет 5-12 күн аралығында көрсетілетін болды. Облыс орталығының және аудандардың ауруханалары интернетті 100% қамтамасыз ету мақсатында да бірқатар ауқымды жұмыстар атқарылуда. Аталған сала министрлігінің қолдауымен келер жылы 60, ал 2020 жылы 33 елді мекен сапалы интернет қызметімен қамтылатын болады.

– Адам көп шоғырланған жерлерге бейнебақылау камераларымен жабдықтау жұмыстары қарқын алуда. Облыс аумағында орнатылған 6000 бейнебақылау камералары көше қылмысын 20 пайызға төмендетуге септігін тигізді. Сонымен қатар Орал қаласында қосымша 20 жылдамдықты өлшеуіш құрылғы мен көлік ағыны көп 50 көшеге бейнебақылау камераларын орнату жоспарлануда, –  деді  Алтай  Көлгінов.

«Қызғалдақ»  фестивалі   өтеді

– Елбасы Нұрсұлтан Әбішұлы Назарбаевтың стратегиялық маңызға ие «Болашаққа бағдар: рухани жаңғыру» бағдарламасы біздің өңірде де белсенді жүзеге асырылуда. Бұл жұмыста депутаттық корпус үлкен қолдау көрсетіп келеді. Бағдарлама аясында биыл 175 мыңға жуық адамды қамтыған 350-ден астам маңызды шара өткізілді. Демеушілер мен меценаттар көмегімен 166 жоба жасалды. Облыс орталығында меценаттар арқылы ерекше мұқтаж адамдарға арналған құны 200 млн. теңгені құрайтын үй құрылысы жүргізілуде. Жоспарымызда тағы 43 жоба бар.

Республикалық қасиетті орындар тізіміне енген облыстағы 7 нысанға жолдар тарту мен инфрақұрылым жасау бойынша жұмыстар қолға алынуда. Аталған жұмыстардың нәтижесінде ішкі туризм дамып, облысқа келетін туристердің саны артады деп күтілуде.

«Қазақстан – 2050» жалпыұлттық қозғалысымен бірге «Crowdsourcing.kz.» жобасы іске асуда. Бүгінгі күні 150-ден астам жоба ұсынылып, дауыс берілді. Іріктелген жобаларды Орал қаласы әкімдігі жүзеге  асыратын  болады.

«Рухани жаңғыру» бағдарламасының жалғасы ретінде Елбасының «Ұлы даланың жеті қыры» атты мақаласы жарияланды. Жаһандық құбылыстар қарқынды жүріп жатқан кезеңде мемлекетіміздің дамуына жаңа рухани дем берген мақаланы Ақжайық өңірі толықтай қолдайды. Атқа міну мәдениеті туралы өз мақаласында Елбасы кеңінен тоқталды. Жылқыны қолға үйреткен Ұлы даланың ұрпақтары болғаннан кейін бұл дәстүр біздің өміріміздің ажырамас бөлігі. Жақында Орал қаласында жеке кәсіпкердің 300 млн. теңге қаражатына «Саят» атты этно-туристік орталық ашылып, ат спортының дамуына үлес қоса бастады.

Біздің археологтардың мазмұнды жұмыстарының нәтижесінде Орал қаласының жанынан орта ғасырлық Жайық қалашығының орны табылды. Бұл қалашық «Қасиетті орындар» тізіміне енгізілді. Орта ғасырдың өзінде биік қорғандар, металл бұйымдарын жасаған ұстаханалар, моншаның орны анықталып отыр. Болашақта бұл орынды ашық аспан музейі жасап, туристер тартуды жоспарлап отырмыз.

Президент өз мақаласында «Қазақстан – алма мен қызғалдақтың отаны» деп атап өтті. Алдағы көктемде Батыс Қазақстан облысында халықаралық «Қызғалдақ» фестивалі ұйымдастырылмақ. Бұл жобаның мақсаты, патриотизмнің басты ерекшелігі – туған өлкеге, оның мәдениетіне, салт-дәстүріне ерекше көзқарас қалыптастыру. Жер бетінде қызғалдақтың 120-дан астам түрі бар. Батыс Қазақстан облысындағы Қараөзеннің жағасында, 400 гектарды  алып жатқан алқапта 12 түрлі-түсті қызғалдақ өседі. «Қызғалдақ» фестивалі 2019 жылдың 1-10 мамыр аралығында ұйымдастырылады.

Президентіміз өз мақаласында атап өткен Түркі әлемі мәдениеті мен славян мәдениетінің тоғысқан тұсы – Ақжайық өңірінде туристік орындар жеткілікті. Біздің өңірге қош келесіздер! – деп қорытындылады баяндамасын облыс әкімі.

Нұрбек  ОРАЗАЕВ,

«Орал  өңірі»


Балық неге қырылды?

Күні: , 61 рет оқылды

Өткен аптаның соңында фейсбук және ватсап желілерінде Сырым ауданына қарасты Тоғанас ауылы маңынан өтетін Шолақ Аңқаты өзенінде мұздың табандап қатуы салдарынан бірнеше мыңдаған балық шабағының қырылып қалғандығы туралы хабарламалар тараған болатын.

Орын алған жағдайдың мән-жайын білмек оймен БҚО орман шаруашылығы және жануарлар дүниесі аумақтық инспекциясына хабарластық.

– Әлеуметтік желілердегі шабақтардың қырылуы туралы ақпарат бізге 16 қараша күні түсті.

Жарияланған ақпараттың дұрыстығын тексеру мақсатында біздің инспекция, жергілікті атқарушы құрылым және табиғат қорғау полициясы мүшелерінен құрылған жедел топ жолға шықты. Оқиға орнына барған топ шын мәнінде Тоғанас ауылы маңындағы Шолақ Аңқаты өзенінде балық шабақтарының қырылуы орын алғандығын анықтады. Аталған өзен бойына орнатылған су өткізгіш қақпаны жөндеу жұмыстары жүргізіліп жатырған болатын. Сол маңдағы ауыл тұрғындарының өзеннің екінші бетіне қатынауына арнап тың жерден уақытша топырақ бөгет салынған. Ескі қақпа мен уақытша бөгеттің арасында әжептәуір су қалған. Ауа райының күрт суытуы салдарынан өзен үзіндісінің жағалаулары табандап қатқан. Тайыз суда жүрген әртүрлі балық шабақтары да мұзбен бірге қатып қалған. Мұзға айналған өзен үзіндісінің аумағы 1800 шаршы метрді құрайды. Ал қырылған шабақтың саны шамамен 900 мыңнан асады деп есептелуде. Өзеннен алынған мұз сынықшаларынан анықталғандай, бұл жерде табан, қызылғанат, торта тұқымдас балық шабақтары қырылған. Бұл өзендегі шабақтардың жаппай қырылуы адами факторға байланысты екені анық. Қазіргі таңда орын алған жағдайдың нақты мән-жайын анықтау үшін арнайы комиссия құрылуда. Аталған комиссия кінәлі тарапты және келтірілген шығын көлемін анықтап, заң шеңберінде жауапқа тартылуын қадағалайтын болады, – деді аталған инспекцияның балық шаруашылығы бөлімінің басшысы Қайрат Ибраев.

Нұрбек    ОРАЗАЕВ,

«Орал  өңірі»


Бес балалы әкенің базынасы

Күні: , 81 рет оқылды

«Биылғы жылдың мамыр айында телефон арқылы хабарласқан «қайырымды жандарға» оңбай алданған болатынмын. Астанадағы Еуразия бірінші телеарнасының «Пендеміз ғой» бағдарламасынан шиеттей бес баланы жалғыз тәрбиелеп отырған әке ретінде шақырту алып, артынша 900 мың теңге көмек аударамыз деп хабарласқан адамға қарызданып, 125 мың теңге аударып жібердім. Бір сөзбен айтқанда, ашкөз қарақшылардың тұзағына түстім. Енді сол ақшаны қайтарамын деп бармаған жерім, баспаған тауым қалмады. Құқық қорғау құрылымдарының да есігін тоздырдым. Бақандай алты ай өтсе де, ешбір нәтиже шықпай тұр. Бас-аяғы 40 мың теңге еңбекақымен бес баланы асырап отырған мен үшін 125 мың теңге аз ақша емес. Енді кімге, қайда барып мұңымды айтсам болады?» – дейді Орал қаласының тұрғыны Сержан Мұқанов есімді азамат.

Бұл азаматтың басына түскен оқиға турасында газетіміздің биылғы 31 мамырдағы №58 санында «Жығылғанға жұдырық» жұмсаған кім?» атты мақалада толыққанды қаузаған болатынбыз. Жоғын жоқтаған кейіпкерімізге қоңырау шалып, жағдайын сұрауымыз мұң екен, іштегі шерін ақтара жөнелді. Уақыт тауып, үйіне де іздеп бардық.

– Шүкір, ел қатарлы тұрмыс кешуге тырысып бағудамын. Жұмысымды істеп, аз да болса, еңбекақымды алып отырмын. Үлкен қызым биыл қаладағы педагогикалық колледжге грант арқылы оқуға түсті. Ұлым мен екі қызым осы маңдағы №10 мектепте оқиды. Үш жастан енді асқан Әйгерім есімді қызым «Заңғар» балабақшасына барып жүр. Жағдайымды естіп-білгендер көмек қолдарын созуда. Әсіресе, Ораза айт, Құрбан айт мерекелерінде халық көп көмек көрсетті. Балаларды сабаққа дайындауға да жәрдемдескендер болды. Жүрегіне мейірім ұялаған жандар ақшалай немесе мектепке қажетті киім-кешек алып берді. Жетіспегенін өзім толтырдым. Бәріне дән ризамын. Кейде ұсынған көмектерін қабылдауға да қысыламын. Себебі менің осындай жағдайға тап болуыма ол адамдардың еш қатысы жоқ. Мен бес баланы солар асырап, өсіруі үшін дүниеге алып келген ештеңем жоқ қой. «Басқа түссе, баспақшыл» дегендей, тағдырдың жазғанын көріп келемін. Балаларым маған ашып айтпаса да, аналарының жоқтығына үйренісіп қалғандай. Кей кезде қиналып қалатындарын да іштей сеземін. Жақында сегізінші сыныпта оқитын қызымның өзін-өзі тану пәнінен жазған шығармасын оқып, көз жасыма ерік бердім. «Анамызға керегіміз болмаса да, әкеміз біздер үшін тыным таппай еңбек етіп, бағып-қағып отыр. Папаның қиналып жүргенін де жақсы білеміз. Біз әкемізді өмір бойы құрметтеп өтуге тиіспіз» деп жазыпты. – Іштей қан жыласам да, ұл-қызымның ақылды, мейірімді болып өсіп келе жатқанына қуандым. Соларды жетілдіру үшін қолымнан келгенін аямаймын. Басқа шарам жоқ, – деді Сержан.

Кейіпкеріміз Әміржан Камалов басшылық ететін «Камал Ойл» ЖШС-да күзетші болып қызмет істейді. Жұмысы үйіне жақын. Медколледж ауданында орналасқан шағын ғана жер үйінің айналасы да жинақы. Ауладан шолан мен монша да салып жатыр. «Құрылысқа қажетті материалдарды алуға, ауланы қоршауға жеке кәсіпкерлер көмектесті. Бірі керек-жарақты әкеліп берсе, енді бірі дәнекерлеу жұмыстарын тегін жүргізді», – дейді Сержан.

Үйдің ішінде де мұнтаздай тазалық. Екінші ауысымда оқитын қыздары түстік астарын ішіп, сабаққа қамдануда. Балалардың жайлылығы үшін үй ішінен жуынатын бөлме мен әжетхана жабдықталған. Бұл істе де облыстық прокуратура мен қалалық әкімдік көмек қолдарын созыпты.

Шаңырақтың берекесін келтіретін отананың жоқтығы болмаса, қалғаны өз орнында. Бес баласының көздерін жәудіретіп, тастап кеткен «көкек ананың» хабары  туралы сұрағанымызда, кейіпкеріміздің қабағын кірбің шалғанын байқадық.

– Еш хабарласпайды. Екінші қызым тамыз айында алғашқы мүшел жасқа толды. Сол күні аман-сау жоқ, тек қана «туған күніңмен!» деп жазып жіберіпті. Мамыр айынан бері әр ай сайын 12-13 мың теңге алимент салумен ғана шектеледі. Ол ақша кішкентай қызымның балабақшасына төлеуге де жетпейді. Қайта мемлекет тарапынан алатын 40 мың теңгеге жуық балалар жәрдемақысының көмегі зор. Балаларымның анасы осы Орал қаласында жүр деп естимін. Бірақ іздеп келген емес. Оған еш уайым-қайғысыз, қара басының қамымен жүрген ұнайды. «Күміс алқа» иегері ретінде жәрдемақы алады. Балаларға тиесілі алиментті дұрыс төлеуін немесе аналық құқығынан біржолата айыруын өтініп, сотқа арыз жазғалы отырмын, – дейді кейіпкеріміз.

Кейіпкеріміз алаяқтардың жемтігіне айналып, қыруар ақшадан айырылған соң облыстық ішкі істер департаментіне шағымданған. Кейін қалалық ішкі істер бөліміне, қалалық прокуратураға да арызын арқалап барыпты. Бір өкініштісі, ол құзырлы мекемелерге барғанда жолыққан адамдардың аты-жөндерін жазып, не есінде сақтап алмаған. «Облыс әкіміне де жаздым. Олар қала әкіміне жолдады. Қалалық прокуратурада менің ісіммен шұғылданып жатқандар «таба алмай жатырмыз» деуден әрі аса алмай отыр. Алты айдан бері еш нәтиже болмай тұр. Сол кезде хабарласқан адамның телефон нөмірі, ақшаны аударған есепшот нөмірі болса да, ақшаны қайтару мұншалықты қиын болады деп ойламаппын. Әрине, өзімнен де бар. Алдағанға иланып, ақшаны аударып жібергенім үшін әлі күнге өкінемін. 125 мың теңге менің отбасым үшін аз ақша емес. Кінәлі кісіні анықтап, ақшамды тезірек қайтарып беруге көмектессеңіздер екен», – дейді Сержан Мұқанов.

Өзінен өрбіген балапандарын өзектен итермей, бауырына басып, адам етемін деп талпынған бес балалы әкенің базынасы осындай. «Қалалық прокуратурадан осы адам хабарласады» деген соң оның телефон нөмірін алып, қоңырау да шалдық. Ұялы байланыстың екінші ұшында тұрған жауапты тұлғадан «Бұл іс туралы телефон арқылы еш мәлімет бере алмаймыз. Ресми түрде хат жолдаңыз» деген жауап алдық. Заңдылық жағынан ол да дұрыс шығар. Дегенмен, осы мақаланы құзыретті құрылым басшылары мен өкілдері оқып танысар, аталған істің тезірек оң шешімін табуына ықпал етер, осы басылым арқылы тиесілі жауап берер деген мақсатпен жариялауды жөн көрдік.

Нұрбек  ОРАЗАЕВ,

«Орал  өңірі»


Үшінші сектордың үлесі артпақ

Күні: , 39 рет оқылды

Кеше  БҚО  үкіметтік  емес ұйымдарының  VIII форумы өтті. Бұл  алқалы жиында азаматтық  қоғам институттарының  өкілдері  өзара  пікір  алмасып, қазіргі  өзекті  мәселелерді  ортаға  салды.  Басқосу барысында айтылған  маңызды  ой-пікірлер мен  ұтымды  ұсыныстар қараша  айының  27-28-і  күндері  Астана  қаласында Елбасының  қатысуымен  өтетін  республикалық  форумда  талқыланбақ.

Азаматтық қоғам және мемлекет: Диалог. Ынтымақтастық. Жауапкершілік» тақырыбында өткен форумға өңірімізге жұмыс сапарымен келген ҚР Қоғамдық даму министрі Дархан Кәлетаев, «Қазақстанның Азаматтық Альянсы» ЗТБ президенті Асылбек Қожахметов  және облыс әкімі Алтай  Көлгінов  қатысты. Сондай-ақ форум жұмысына мемлекеттік құрылымдардың өкілдері, әртүрлі деңгейдегі мәслихаттардың депутаттары, облыстық және аудандық үкіметтік емес ұйымдардың басшылары, кәсіподақ ұйымдарының төрағалары, қоғамдық кеңестердің мүшелері, этномәдени бірлестіктердің жетекшілері  мен  БАҚ  өкілдері қатысты.

Облыстағы мемлекеттік құрылымдар және азаматтық қоғам институттары арасындағы іскерлік әріптестікті нығайту бағытындағы жұмыстарды жүргізуді мақсат еткен форумда «Рухани жаңғыру» бағдарламасының орындалуы, «Азаматтық қоғам институттарын дамыту болашағы», «Жастар және қоғам» тақырыптары талқыланды.

– Кез келген мемлекеттің негізгі тірегі – азаматтық қоғам. Саясаттану ғылымында үкіметтік емес институттардың қоғам мүддесі  үшін жұмыс істеу жүйесін азаматтық қоғам деп айтады. Елбасы үкіметтік емес ұйымдардың мүмкіндіктерін терең түсініп, жоғары бағалайды. Және оларға ерекше көңіл аударып, үнемі қолдау көрсетеді. Мемлекет басшысының «Қазақстан жолы – 2050: Бір мақсат, бір мүдде, бір болашақ» атты Жолдауында мемлекет, үкіметтік емес сектор және бизнес арасындағы өзара іс-қимылдың жаңартылған тәсілдері керек деп атап өтті. VIІ Азаматтық форумдағы ұсыныстарды іске асыруда қажетті шешімдер қабылданып, облыстағы мемлекеттік құрылымдар және азаматтық қоғам институттары арасында іскерлік әріптестік қатынасты нығайту бағытындағы жұмыстар жүргізілуде. Батыс Қазақстан облысында жергілікті атқарушы билік пен қоғамдық ұйымдар арасында өзара тығыз қарым-қатынас орнатылып, азаматтық бастамаларды жүзеге асыруға атсалысып жүрген қоғамдық ұйымдардың қатары жыл сайын артып келеді. 2016 жылдан бері облыстық қоғамдық кеңес белсенділігін көрсетіп, мемлекеттік құрылымдармен қоян-қолтық жұмыс істеп келеді. Олар 30-ға жуық отырыс өткізіп, облыс әкімінің төрт рет есебін тыңдады. Елбасымыздың биылғы Жолдауында берген тапсырмаларын орындауға қоғамның әрбір саласында еңбек етіп келе жатқан үкіметтік емес ұйымдар да үлестерін қосуы шарт. Азаматтық қоғамы қалыптасқан деп жиі айтылатын америкалықтар да «Азаматтық қоғамның ұраны «барлығын үкімет істесін» емес, «Біз өзіміз жасайық!» болуы керек» деген қанатты сөз бар. Бұл – барлығын үкіметтік емес ұйымдар жасасын деген сөз емес. Мемлекет тарапынан азаматтық қоғамды дамытуға бағытталған кешенді жұмыстар да, қаржыландыру да тұрақты түрде жүргізілуде. Мысал үшін айтар болсақ, облысымызда мемлекеттік-әлеуметтік тапсырыс көлемі соңғы алты жылда 6 есеге өскен. Егер 2012 жылы 138 млн. теңге бөлініп, 120 жоба жүзеге асырылса, биыл 834 млн. теңге қаржыға 200-дей жоба жүзеге асырылуда. 2016 жылы төрт басқарма ғана қоғамдық ұйымдармен мемлекеттік-әлеуметтік тапсырыс арқылы жұмыстанса, қазіргі таңда ол жалпы саны 32 мемлекеттік құрылымға жетті, соның ішінде алты басқармаға көбейді. Өңіріміздегі үкіметтік емес ұйымдардың саны артып келеді. Осыдан он жыл бұрын олардың саны 150 ғана болса, қазір 655. Бұл дегеніміз – азаматтық қоғам дамуының нақты көрсеткіші. Азаматтық секторды дамытудағы барлық қол жеткізілген табыс – бұл біздің бірлескен еңбегіміздің нәтижесі. Облысымызда азаматтық қоғамды дамытуға бағытталған іс-шаралар алдағы уақытта да жалғасын таппақ. Осындай жемісті де пайдалы бірлескен еңбегіміз алда кездесер өзекті мәселелерді шешуде тың серпін береріне сенім білдіремін, – деді Алтай Көлгінов  өз  баяндамасында.

Өңір басшысының мәлімдеуінше, облыста сондай-ақ саяси партиялардың 6 филиалы, 50 этномәдени орталық, 15 кәсіподақ ұйымы бар. Облыстық, қалалық және аудандық деңгейде 14 қоғамдық кеңес жұмыс істейді. Аталған қоғамдық кеңестерде 369 мүше болса, оның 77 пайызы – азаматтық сектор өкілдері.

ҮЕҰ-ның азаматтық бастамаларын қолдауға арналған құралдардың бірі мемлекеттік-әлеуметтік тапсырыс болып табылады. Соңғы бес жылда бұл тапсырысты қаржыландыру көлемі 6 еседен астамға артып (2013 жылы 158 млн. теңге болған болса, биылғы жылы 834 млн. теңгеге жеткен), тиісінше, жобалардың саны өскен. Осыдан бес жыл бұрын 114 жоба болған болса, қазіргі уақытта оның саны 198-ді  құрайды.

Соңғы үш жылда мемлекеттікәлеуметтік тапсырыстарды жүзеге асыратын облыстық мемлекеттік құрылымдардың саны үштен алтыға дейін өскен. Мемлекеттік-әлеуметтік тапсырысты іске асыру барысында облыстық деңгейде жастар саясаты, ішкі саясат, тілдерді дамыту, жұмыспен қамтуды үйлестіру, діни істер және денсаулық сақтау басқармасы секілді алты құрылым жұмыс істейді.

Әлеуметтік маңызы бар жобаларды жүзеге асыруға қатысатын ҮЕҰ-ның саны жылдан-жылға артып келеді. Биылғы жылы мемлекеттік-әлеуметтік тапсырысты іске асыруға 147 ҮЕҰ қатысуда, оның 57-сі ауылдық жерден. Жергілікті атқарушы құрылымдар бөлген 613 миллион теңге қаражаттың басым бөлігі мүгедектігі бар адамдарға, оның ішінде жеке көмекшілерге, оңалту қызметтеріне, инватакси қызметтеріне, бейімдеу курстарына және т.б. әлеуметтік қолдау шараларын жүзеге асыруға бағытталған. Биылғы жылы ҮЕҰ-лар 630-дан астам маңызды мәдени, әлеуметтік және саяси іс-шара өткізіп, 67 мың  адамды  қамтыған.

Еліміздің Қоғамдық даму министрі Дархан Кәлетаев барлық өңірде өтіп жатқан форумның өзара тәжірибе алмасу, ынтымақтастықты дамыту, жаңа білім игеруде маңызы зор екеніне тоқталды. Сондай-ақ ол қоғамдық ұйымдардың статистикасын айта келіп, дамудың негізгі  проблемасын  атап  өтті.

– Жалпы, республика бойынша 22 мыңнан астам ҮЕҰ тіркелген. Әділет министрлігі ұсынған мәліметтерге сүйенсек, БҚО-да 717-ден астам ұйым бар. Олардың басым көпшілігі белсенді жұмыс істеп келеді. Дегенмен базаға тіркелген заңды тұлғалардың біразы жұмыс істемейді. Яғни, республика бойынша қоғамдық ұйымдардың үштен бірінің аты бар да, заты жоқ. Осы және өзге де мәселелерді шешетін уақыт жетті. ҮЕҰ-ның саны жылдан-жылға көбейіп келеді, демек, еліміздегі азаматтық секторды жаңартуға тура келеді. Осы саладағы заңнаманы қайта қарау қажеттілігі туралы ұсыныстар бар. Аймақтың әлеуметтік маңызды мәселелерін шешуде үкіметтік емес сектордың үлесін арттыру қажет.

Батыс Қазақстан облысы еліміздегі қарқынды дамып келе жатқан бес қабілетті өңірдің қатарына кіреді. Ақ Жайық өңірінде, әсіресе, өндірістік және аграрлық кешен жақсы дамуда. Менің ойымша, Батыс Қазақстан облысы еліміздің Еуропасы іспеттес. Бұл жердің халқын өз ой-пікірлерін ашық айта алатын, жарқын болашаққа сеніммен қарайтын халық деп білемін. Орал қаласы – тың ойлар мен жобалардың алдыңғы легінен табылатын шаһар.  Бұл өңірдегі азаматтық ұғым да өндіріс немесе бизнес саласы секілді жақсы жетілген.  Бұлардың барлығы Елбасымыздың саясаты мен осы жердегі билік пен халықтың жұмыла атқарған еңбегі деп білемін. Алдағы уақытта да бұл өңір өз даму қарқынын баяулатпай, ел экономикасына сүбелі үлес  қосады деген ойдамын, – деді  министр.

Сондай-ақ форумда «Қазақстанның Азаматтық Альянсы» ЗТБ президенті Асылбек Қожахметов, өңірлік филиал атынан Меруерт Санкаева, «Ғылыми зерттеулерді қолдау қоры» қоғамдық қорының жетекшісі Айболат Құрымбаев,  «Нұр» қоғамдық бірлестігінің төрайымы Вера Шохина сөз алып, өз ой-пікірлерін  ортаға  салды.

Айта кетейік, Батыс Қазақстан облысы азаматтық қоғамды дамытудың қанатқақты жобасын жүзеге асырушы өңір ретінде таңдалып алынған болатын. Осы мақсатта форум шеңберінде ҚР Қоғамдық даму министрлігі, Батыс Қазақстан облысының әкімдігі

және «Қазақстанның Азаматтық Альянсы» ЗТБ арасында азаматтық қоғам институттарын дамытуға жәрдемдесу туралы келісімге қол қойылды. Сонымен қатар шара барысында «Облыс аумағындағы азаматтық бастамалар мен үшінші секторды дамытуға қосқан үлесі үшін» бірқатар үкіметтік емес ұйымдар мен қоғамдық бірлестік мүшелері министрліктің және облыс әкімінің Алғысхаттарымен марапатталды. Олардың қатарында «Нұр» балалар үйі мен мектеп-интернаттары түлектерінің Батыс Қазақстан одағы» қоғамдық бірлестігінен Геннадий Франк, «Демеу» мүгедектерді қолдау қоғамы» қоғамдық бірлестігінің төрағасы Біржан Қожақов, БҚО «Болашақ» корпоративтік қорының директоры Салтанат Тұманбаева бар.

Түстен кейін форум жұмысы «Әлеуметтік жобаларды қаржыландыру көздері», «Азаматтық қоғам және мемлекет: әлеуметтік бастамаларды тиімді іске асыру жолдары», «Қоғамның әлеуметтік мәселесін шешудегі ҮЕҰ рөлі» тақырыбындағы секция отырыстарына жалғасты.

Нұрбек    ОРАЗАЕВ,

«Орал   өңірі»


Тоғыз айдың табысы толымды

Күні: , 37 рет оқылды

Биылғы жылы  облыстағы жалпы өңірлік өнім көлемі 1,2 трлн. теңгені  құраған.  Бұл  өткен жылғы  көрсеткішпен  салыстырғанда,  0,6%-ға артық. Елдің жалпы  ішкі  өніміндегі біздің  өңірдің  үлесі 4,9%-ды  құрап, республика  бойынша облыс  жетінші орынға  тұрақтаған.  Өңдеу  өнеркәсібіндегі  экспорт көлемі  ағымдағы  жылдың  сегіз  айында  147,9 млн. долларға  жетіп, 25,6%-ға ұлғайған. Облыс  1,5 мың тоннадан  астам  етті  бірнеше  шетелге шығарып, Қазақстанға  қатысты  ет  экспорты бойынша  бірінші  орынға көтерілген.

Бұл туралы облыстық мәслихаттың кезекті ХХ сессиясында облыс әкімі Алтай Көлгінов 2018 жылдың алғашқы тоғыз айында атқарылған жұмыс туралы баяндамасында  мәлімдеді.

– Биылғы жылғы Елбасының Жолдауы халық табысының артуына, тұрмыс сапасын көтеруіне, өмір сүру үшін қолайлы ортаның қалыптасуына бағытталған. Өңірдегі барлық аймақтық бағдарлама Жолдауда айқындалған мақсат пен міндеттерге сәйкес жасақталды. Биылғы жылдың мамыр айында Елбасы Нұрсұлтан Әбішұлы Назарбаевтың біздің өңірімізге жасаған жұмыс сапары өңіріміздің дамуына тың серпін берді. Мемлекет басшысы облыстың әлеуметтік-экономикалық дамуы бойынша нақты тапсырмалар жүктеді. Атап айтар болсақ, күн тәртібінен түспеген жол мәселесі, өңір экономикасында өзіндік орны бар өндіріс ошақтарының проблемалары талқыланды. «Зенит» және «Гидроприбор» зауыттары бойынша 3 жылға тапсырыстармен қамту жөніндегі келісімге қол жеткізілді. Энергетика министрлігі «Конденсат» АҚ-мен мұнайды тасымалдау кестесін бекітті. БҚМК (ЗКМК) АҚ негізінде қазақстандық арнайы өнімдердің жаңа өндірістерін игеру бойынша еуропалық компаниямен озық технологияларды өңірімізде іске асыру қарастырылды. «Омега» өндіріс ошағының аумағында «Орал трансформатор зауыты» екінші зауыт салуды жоспарлауда. «Квант»  компаниясы өнім түрлерін көбейту және өндірісті кеңейтуді қаржыландыру бойынша Даму банкімен несие бөлу жөнінде келісімге қол жеткізді. Республикалық маңызға ие Орынбор облысына дейінгі 144 шақырым жолын қайта жаңғырту бойынша «Қазавтожолдың» қатысуымен жобалық-сметалық құжаттама әзірлеуге конкурс жарияланды. Қазталов, Жәнібек және Бөкей ордасы аудандарына апаратын 275 шақырым республикалық маңызды автожол құрылысына, «Қазавтожол» күрделі жөндеу жұмыстары бойынша жобалық-сметалық құжаттама әзірлеуде. Аталған жол құрылысы жұмыстарын келер жылы бастап, алдағы үш жыл көлемінде толықтай аяқтау жоспарлануда, – деді  өз баяндамасында облыс әкімі  Алтай  Көлгінов.

Мұнан соң өңір басшысы облыс экономикасымен халықтың әл-ауқатын арттыру бағытында маңызды рөл атқаратын әр салаға  жеке-жеке  тоқталып  өтті.

 

Өнеркәсіп  өнімінің  көлемі 1,8 трлн.  теңгеге  жеткен

Өңдеу өнеркәсібінің нақты көлем индексі 9%-ға артып, 137 млрд. теңгені құраған. Өңдеу өнеркәсібіндегі жалпы қосылған құны 50 млрд. теңгені құрап, нақты көрсеткіште 17%-ға артты. Еңбек өнімділігі 26%-ға өсіп, бір адамға 9 мың АҚШ долларынан асты. Негізгі капиталға салынған инвестициялардың көлемі 4,5 пайызға артып, 273 миллиардтан астам теңгені құрады. Сыртқы инвестициялар 165 млрд. теңгені құрап, олардың негізгі капиталдағы үлесі 60%-дан асқан. Бұл көрсеткіш бойынша Батыс Қазақстан облысы республикада жетекші орында.

Индустрияландыру картасына сәйкес құны 22 млрд. теңгені құрайтын 10 жоба іске қосылып, 362 жұмыс орнын ашу жоспарланып отыр. Бүгінгі күні жобалардың жартысы іске қосылды, қалғандары жылдың соңына дейін пайдалануға  беріледі.

 

2,5 миллиард  теңгеден астам  инвестиция

Биылғы жылы ауыл шаруашылығын қолдау шараларына 12 млрд. теңге бөлінген. Бұл көрсеткіш өткен жылмен салыстырғанда 30%-ға артық. Ауыл шаруашылығындағы жалпы өнім 104 млрд. теңгені құрады. Дәнді дақылдар алқабының аумағы 513 мың гектарға жеткен. 244 мың гектар егін алқабынан 168 мың тоннадан астам астық жиналды. Өңірдегі қысқы дәнді дақылдардың жалпы көлемі 76 мың га құрайды. Алдағы қыс маусымына 1,5 млн. тонна мал азығы жиналып, бұл бағыттағы жоспар 103,2%-ға орындалды. Сонымен қатар өңірге 2,5 млрд. теңгеден астам инвестиция тартылып, агроөнеркәсіп кешенінде бірқатар жобалар жүзеге асқан. Нәтижесінде «Кублей» компаниясында малдың қалдықтарын қайта өңдеу бойынша инвестициялық жоба іске қосылды. «Теректі май» компаниясында күнбағыс майын өндіретін зауыт қайта жаңғыртудан өтіп, өз өнімдерін экспортқа шығаруда. «Желаев нан өнімдерінің комбинаты» АҚ-да макарон өнімдерін өндіретін фабрика іске қосылды. Зеленов ауданында «DMD PRODUCTION» компаниясы қуаттылығы жылына 1000 тонна болатын консервіленген көкөністер мен жемістерді өндіруге арналған зауыт салуда. «Орал жылыжай комбинаты» жалпы аумағы  5 га құрайтын жылыжай кешенінің құрылысын  жүргізуде.

 

«Киров – Шежін»   каналы   іске  қосылмақ

Жаңақала ауданындағы жалпы суармалы жер учаскелерінің аумағы 16,5 мың гектарды құрайтын «Төртқұлақ – Қарасу» суару құрылғыларына күрделі жөндеу жүргізілуде. Бұл өз кезегінде мал шаруашылығын дамытуға мүмкіндікті кеңейтпек. Сондай-ақ «Орал – Шалқар» каналын сумен жабдықтауға арналған қалқымалы сорғы станциясы бар су қоймасын салу қолға алынды. Бұған қоса жалпы ұзындығы 180 шақырымды құрайтын «Киров – Шежін» каналы қараша айында іске қосылмақ. Ақжайық ауданының аумағындағы «Солянка – Азынабай – Тайпақ» каналын, Ақжайық су қоймасын күрделі жөндеу және қайта қалпына келтіру бойынша кешенді жұмыстар жүргізілуде. Сонымен қатар суармалы ауданы 15 мың гектардан астам «Сакрыл» және «Мамай» суармалы жүйелерін қалпына келтіру үшін жобалық-іздестіру жұмыстары  жүргізілуде.

 

Кәсіпкерлікке   қолдау   көп

Өңір басшысының баяндауынша, шағын және орта бизнеспен айналысатындар саны 6%-ға артып, 40 мың субъектіні құрады.

Облыста бұл салада еңбек ететіндердің саны 9 пайызға  немесе 115 мың адамға көбейген.

Өңірдегі шағын және орта бизнес секторының үлесі 40%-ды құрайды. Бұл көрсеткіш жөнінен біздің облыс республика бойынша  үшінші  орында.

«Бизнестің жол картасы – 2020» бағдарламасы аясында жалпы сомасы 100 млрд. теңгені құрайтын 831 жоба қаржыландырылған. Сондай-ақ құрылыс саласында 2,7 млрд.  теңгені құрайтын 57 нысанға инфрақұрылым  тартылған.

Осы жобалар аясында 28 мыңнан аса жұмыс орны сақталып, 5 мыңнан аса жаңа жұмыс орындары ашылды. Сонымен қатар қайтарымсыз гранттық қаржыландырумен 109 жаңа бизнес жоба қолдау тауып, оларға 226 млн. теңге қаржы бөлінген.

 

Мемлекеттік   бағдарламаларға   36,3   млрд.   теңге

Елбасының Жолдауында еліміздің аумақтық дамуына жаңа тәсілдерді енгізуді қамтамасыз ету, сондай-ақ «Нұрлы жол» және «Нұрлы жер» бағдарламаларын 2025 жылға дейін ұзарту туралы айтылған болатын. Биылғы жылы осы бағдарламаларға сәйкес облысқа 36,3 млрд.  теңге бөлінген. Атап айтқанда, «Нұрлы жол» бағдарламасы бойынша 19,1 млрд. теңге, «Нұрлы жер» бағдарламасына 17,2 млрд. теңге қарастырылған. Соның ішінде 450 шақырым жол салу үшін 32 млрд. теңге бөлінді. Республикалық маңызы бар жолдардың 285 шақырымына жөндеу жұмыстары жүргізілуде. Бірінші кезекте биылғы жылы 56,3 шақырымды құрайтын Орал – Саратов автожолының жөндеу жұмыстары аяқталады. Саратов облысымен шекаралас аумақта бұрынғы екі жолақты жолдың орнына сегіз жолақты жол ашылатын болады.

Облыс орталығында 8,8 млрд. теңге қаражатқа ұзындығы 50 шақырымды құрайтын 50 көше жолдары жөнделді. Бұл қаражаттың 6,3 млрд. теңгесі «ҚПО б. в.» компаниясы есебінен бөлінген. Бұл қаражатқа Орал қаласында Құрманғазы,  М. Мәметова, Темір Масин, Асан Тайманов секілді ірі көше жолдары  жөнделген.

 

3461  пәтерлі  тұрғын  үйлер  салынуда

Еліміздегі «Нұрлы жер» бағдарламасымен өңірімізде 3134 пәтерді құрайтын 26 көп қабатты тұрғын үйдің құрылысы жүргізілуде. Сонымен қатар аудан-ауылдарда 327 пәтерлік  104 тұрғын үй салынуда. Жыл соңына дейін облыс орталығында 688 пәтерлі 6 көп қабатты тұрғын үй, аудан-ауылдарда 139 пәтерді құрайтын 83 тұрғын үй пайдаланылуға берілмек.

Жеке инвесторлардың есебінен 1400 пәтерлі үй салынған болса, солардың ішінен 75 пәтер «7-20-25» бағдарламасы бойынша берілген. Ал 280 пәтер аталған бағдарлама бойынша берілуге дайын тұр.

Бүгінде Орал қаласында апатты жағдайдағы 44 тұрғын үй тіркелген. Сол үйлерді бұзып, орнына жаңа көп қабатты үйлер салу мақсатында жеке инвесторлардан 13,5 млрд. теңге қаржы тартылып, бүгінде 17 үй қайта салынуда. Бұл үйлер бірінші кезекте бұрынғы тұрғындарға тегін берілетін болады. Ал қалған пәтерлер «7-20-25» мемлекеттік бағдарламасымен берілмек. Құрылысы жүріп жатқан бес көп қабатты үйдің екеуінің құрылысы аяқталып, жақын күндері пайдаланылуға берілетін  болады.

Облыс орталығындағы халық саны жыл санап өсіп келеді. Бүгінде шаһарда 336 мыңнан астам адам тұрады. Жақын жылдары облыс орталығындағы халық саны 500 мыңға жетеді деген болжам бар. Пәтер кезегінде тұрған тұрғындарды баспанамен қамту мақсатында «Ақжайық» шағынауданын салу қолға алынуда. Аумағы 450 гектар жерді қамтитын шағынауданда 150-ден астам көп қабатты тұрғын үй салынбақ. Барлық инфрақұрылымы тартылған ауданды мектеп, балабақша секілді әлеуметтік нысандармен қамту жағы да қарастырылған. Жаңа ауданға Шаған өзені үстінен жаңа көпір салынатын болады.

 

44 елді  мекенге  газ, 50  ауылға  таза  ауыз  су тартылуда

Ағымдағы жылы 44 елді мекендегі 16 мың халықты көгілдір отынмен қамту мақсатында 8 жоба жүзеге асырылуда. Бұл мақсатқа 1,6 млрд. теңге қаражат бөлінген. Бүгінгі таңда Ақжайық, Бөкей ордасы, Зеленов, Жәнібек аудандары аумағындағы 24 елді мекенге газ тарту жұмыстары аяқталып, тоғыз мыңнан астам ауыл тұрғыны көгілдір отынның рахатын көруде. Қалған 20 ауылдарға газ тарту жұмыстары келер жылы аяқталатын болады. Осы жұмыстар мәреге жеткенде, өңірдің көгілдір отынмен қамтылуы 95 пайызға жететін болады.

Жалпы ұзындығы 1000 шақырымды құрайтын ауыз су құбырларын тарту және жаңарту жұмыстарына 4,5 млрд. теңге қаражат бөлінген. Бүгінде 56 мың тұрғыны бар 50 елді мекенді таза ауыз сумен қамту жұмыстары жүргізілуде. Ол елді мекендердің 17-сі таза ауыз суға қол жеткізген болса, жыл соңына дейін 23 ауыл таза суға қосылатын болады.

 

50   IT-сынып   ашылмақ

Облыста 1 жастан 6 жасқа дейінгі балаларды мектепке дейінгі біліммен қамтамасыз ету 69,4%-ды, 3 жастан 6 жасқа дейін  100%-ды  құрайды.

Мектепке дейінгі ұйымдар желісі 26 бірлікке көбейіп, олардың саны 500-ге жетті, оның ішінде 52-сі – жеке балабақшалар. «Bilim Land» білім беру порталының жоғары сапалы мазмұнын қамтамасыз ету, қалалық және ауылдық мектептердің білім беру ресурстарына тең қолжетімділігін арттыру мақсатында барлық 223 (100%) шағын жинақты мектепке жалпы құны 312 млн. теңгені құрайтын 567 бірлік «Білім кітапшасы» компьютер-трансформерлер сатып алынды. «Нұр Отан» партиясымен бірге 15 IT-сынып ашылып, IT-лицей жұмыс істей бастады. Келесі жылы партиялық жоба бойынша тағы 50 IT-сынып ашылмақ.

Биыл Орал қаласының Деркөл кентіндегі 600 орындық, Ақжайық ауданының Шабдаржап ауылындағы 198 орындық мектеп, Ақсай қаласындағы 240 орындық балабақша, Зеленов ауданының Дариян ауылында 100 орындық интернаты бар 300 орындық мектеп, Бөкей ордасы ауданы Сайқын ауылындағы мектептің 70 орындық интернат пайдалануға берілді.

Жоғары оқу орындарында  мамандарды даярлау үшін облыста сұранысқа ие мамандықтар бойынша жергілікті бюджеттен  100  грант  бөлінді.

Сонымен қатар 5 апатты мектеп пен үш ауысымдағы 5 мектепті жою бойынша Білім және ғылым министрлігімен бірлесіп жұмыс жасалуда.

– Денсаулық сақтау саласында мемлекеттік-жекешелік әріптестік аясында екі жоба жүзеге асты. Аталған жоба аясында облыстық ауруханаға құны 550 миллион тұратын магнитті-резонансты томогроф алынса, Шыңғырлау ауданының Лубен ауылында жобалық құны 117 млн. теңгені құрайтын, ауысымына 35 адамды қамтитын дәрігерлік амбулатория салынды. Сонымен қатар Орал қаласында заманауи құрал-жабдықпен қамтылған жаңа кардио орталық ғимаратын салу жоспарлануда. Бұқаралық спортты дамыту, халық арасында салауатты өмір салтын қалыптастыру мақсатында облыс көлемінде 30 спорт алаңы салынып, пайдалануға берілсе, жыл соңына дейін 23 спорт алаңының құрылысы аяқталмақ. Бұл бағыттағы жұмыстарға «Samruk-Kazyna Trust» әлеуметтік жобаларды дамыту қоры үлкен қолдау білдіруде. Жергілікті бюджет есебінен Ақжайық, Қазталов, Жаңақала, Тасқала аудандарынан 5 дене шынықтыру-сауықтыру кешенін салу жоспарланған. Сондай-ақ «Нұр Отан» партиясымен бірлесіп жасалған жол картасы аясында 100 спорт алаңын салу жоспарланып отыр. Елбасы Нұрсұлтан Әбішұлы Назарбаевтың стратегиялық маңызға ие «Болашаққа бағдар: рухани жаңғыру» бағдарламасы аясында биыл 175 мыңға жуық адамды қамтыған 350-ден астам маңызды шара өткізілген. Демеушілер мен меценаттар көмегімен 166 жоба жасалды. Облыс орталығында меценаттар арқылы ерекше мұқтаж адамдарға арналған құны 200 млн. теңгеге үй құрылысы жүргізілуде. Республикалық қасиетті орындар тізіміне енген облыстағы жеті нысанға жолдар тарту мен инфрақұрылым жасау бойынша жұмыстар қолға алынуда. Аталған жұмыстардың нәтижесінде ішкі туризм дамып, облысқа келетін туристердің саны артады деп күтілуде. «Қазақстан – 2050» жалпыұлттық қозғалысымен бірге «Crowdsourcing.kz.» жобасы іске асуда. Бүгінгі күні 150-ден астам жоба ұсынылып, дауыс берілді. Ұсынылған жобалардың ең жақсысын Орал қаласы әкімдігі жүзеге асыратын болады.

Биылғы тоғыз ай ішінде өңіріміз осындай әлеуметтік-экономикалық даму көрсеткіштеріне қолжеткізіп отыр. Бұл – барлық мемлекеттік құрылымның және азаматтық қоғам өкілдерінің бірлесіп атқарған жұмыстарының нәтижесі.  Біз атқарылған жемісті жұмыстарымызбен тоқтап қалмай, алдымызда тұрған зор міндеттерді жұмыла атқаруға тиіспіз. Халқымыздың әл-ауқатын жақсартуға бағытталған «Нұрлы жол», «Нұрлы жер», «7-20-25»  мемлекеттік және басқа да салалық бағдарламаларды сәтті жүзеге асыруымыз қажет. Бұл тапсырмалар Елбасының Жолдауында нақты айқындалған. Сондықтан баршаңызды еліміздің бәсекеге қабілетті 30 мемлекеттің қатарына кіруіне, облысымыздың одан әрі көркеюіне үлес қосуға шақырамын, – деп қорытындылады  баяндамасын  облыс  әкімі.

 

Құсайын  МҰҚАНОВ, №13  Қаратөбе  сайлау  округінен сайланған  депутат:

– Елбасымыз Нұрсұлтан Әбішұлы Назарбаевтың жыл сайынғы халыққа Жолдауында айтылған тапсырмаларды басшылыққа ала отырып, Қаратөбе ауданында да ауыз толтырып айтуға болатын ауқымды жұмыстар атқарылуда. Ауданымыз 100 пайыз көгілдір отынмен қамтылған. Сонымен қатар биылғы жылдың өзінде бес елді мекенге таза ауыз су келді. Бірнеше спорттық қалашық салынды.  Осындай ауқымды жұмыстар алда  да  жалғасын  табады  деп  сенемін.

Александр  ПОТИЧЕНКО, №23  сайлау  округінен  сайланған депутат:

– Қазіргі уақытта облыс орталығында да, аудандарда да автокөлік жолдарының құрылысына ерекше көңіл бөлінгеніне қуаныштымын. Оралда жолдарды салу үшін шамамен 9 млрд. теңге бөлінген. Бұл 50 шақырымнан астам жолды асфальттауға мүмкіндік берді. «Нұрлы жер» бағдарламасы бойынша көп қабатты үйлер салынуда. Тұрғындарға «7-20-25» мемлекеттік бағдарламасы арқылы пәтерлер беріле бастады. Біздің компания мемлекеттік бағдарламаларды жүзеге асыруға өз үлесін қосып келеді. Қазіргі уақытта біз Орал қаласында 400 пәтерге арналған екі көп қабатты үй, Тасқала ауданының орталығындағы 72 пәтерлі, Теректі ауданы Федоровка ауылында 36 пәтерлі тұрғын үй салудамыз. Келер жылы  500 пәтер тапсыруды жоспарлап отырмыз. Деркөл кентінде спортпен шұғылданатын балаларға арналған спорттық интернат салынуда. Аталған нысан келер жылы пайдалануға беріледі. Тұтастай алғанда, біздің өңірдің әлеуметтік-экономикалық даму динамикасы  жақсы  деңгейде.

Темірғали   ЕСКЕНДІРОВ,  №1  Деркөл  сайлау  округінен сайланған  депутат:

– Бүгінгі сессияда өңір басшысы ағымдағы жылдың тоғыз айындағы атқарылған жұмыстармен қатар облыстың әлеуметтік-экономикалық даму көрсеткіштері туралы жан-жақты қамтыған есеп берді. Соңғы жылдары облыс, қала және аудандық деңгейде бірқатар жаңа жобалар жүзеге асырылуда. Облыс әкімі барлық ауданда болып, атқарылған жұмыстармен танысып, ол жерлердегі шешімін таппай тұрған мәселелерді шешуге үлкен үлес қосып жүргенін білеміз. Облыс орталығы мен аудандарда инвестициялық жобалар жүзеге асып, жаңа әлеуметтік нысандар бой көтеріп, саябақтар мен спорт алаңдары көптеп салынуда. Сонымен қатар бірқатар аудан-ауылдар көгілдір отынмен, таза ауыз сумен, сапалы жолдармен қамтылуда.

Осы игі істердің барлығын бірлесіп атқарған  еңбектің  жемісі  деп  білемін.

Нұрбек  ОРАЗАЕВ,

«Орал  өңірі»


Нан қымбаттамайды

Күні: , 86 рет оқылды

Күнделікті  тұтынатын  тауар  бағасын  негізсіз  өсіргендер  жауапкершілікке  тартылатын  болады.

Бұл туралы облыс әкімінің бірінші орынбасары Игорь Стексовтың төрағалығымен, өңірдегі нан өнімдерін өндіруші ірі кәсіпорындардың жетекшілерінің қатысуымен өткен жиында айтылды. Басқосуда әлеуметтік маңызы бар азық-түлік тауарларының тізіміне кіретін сұрыпты нан бағасын  бекіту  турасында  айтылды.

Аталған жиынға нан өнімдерін өндіруші «Антипов» ЖК, «Попков» ЖК, «Доценко» ЖК және «Желаев КХП» АҚ, «Белес Агро» ЖШС секілді ұн тарту мекемелері қатысты.

Өзекті мәселе талқыланған жиында ұн тарту кәсіпорындарында бірінші сұрыпты нан бағасын әр бөлкесінің құнын 70 теңге шамасында тұрақтандыру үшін ұн мөлшерінің жеткілікті екендігі айтылды. Бүгінде бірінші сұрыпты ұнның келісі 95-96 теңге шамасында. Аталған сала кәсіпорындарының басшылары нан бағасын қымбаттатпайтындықтарын  айтты.

Сондай-ақ «№1 нан зауыты» атынан жарияланған «Нан өнімдерін өндіруші барлық кәсіпорын нан бағасын өсіргелі жатыр» деген ақпаратты аталған кәсіпорын  басшысы  жоққа  шығарды.

– Бірінші сұрыпты нан бағасы 70 теңге көлемінде сақталады.

Басқа кәсіпорын басшылары атынан жалған ақпарат таратуға, өңір тұрғындарының тұрмыс деңгейіне тікелей әсер ететін алыпсатарлыққа жол берілмейді. Өзара келісіп, бағаны негізсіз көтерген жайттар тіркелген жағдайда арнайы тексерістер жүргізіп, заң шеңберінде жауапкершілікке тартатын боламыз, – деді  Игорь  Стексов.

Айта кетейік, биылғы жыл басынан бері әлеуметтік маңызы бар азық-түлік тауарларының бағасы 0,6 пайызға арзандаған. Атап айтқанда, картоп 24 пайызға (105 теңгеден 80 теңгеге), пияз 10,5 пайызға (95-тен 85 теңгеге),  жұмыртқа 17 пайызға (231 теңгеден 190-ға), күнбағыс майы 1,2 пайызға арзандаған.

Сонымен қатар халық күнделікті тұтынатын тауар бағасын тұрақтандыру мақсатында апта сайын ауыл шаруашылығы жәрмеңкесі ұйымдастырылуда. Жыл басынан бері 156 рет жәрмеңке өткізіліп, 480,7 миллион теңгенің  өнімі  сатылған.

* * *

Қараша айының алғашқы күні әлеуметтік желідегі тәуелсіз басылымдардың сайттарында Орал қаласында нан бағасы қымбаттағаны туралы ақпарат жарияланған болатын. Жұма күні туындаған түйткілдің түйінін шешу мақсатында нан өнімдерін өндіруші кәсіпорындарға пресс-тур ұйымдастырылды.

Бұқаралық ақпарат құралдары өкілдері алдымен өңірдегі нан өнімдерін шығаратын «Толецкий» жеке кәсіпкерлігінде болды. Кәсіпорын директорының орынбасары Антон Маркушиннің айтуынша, бүгінде нанның құны бұрынғысынша бірқалыпты бағада сатылуда.

– Біздің кәсіпорын өндіретін нан өнімінің бағасы биыл қымбаттамайды. Бүгінгі таңда бірінші сұрыпты нан 70 теңгеден, жоғары сұрыпты ұннан дайындалған нан  90 теңгеден сатылуда. Әрбір жеке кәсіпорын шығынға жұмыс жасамайтыны анық. Әзірге қоймадағы бар ұнды пайдаланудамыз.

Астықтың жаңа легін қандай бағамен алатынымыз әзірге белгісіз. Нан пісіруге қажетті қант бағасының келісі бұрын 180-190 теңге болса, қазір 122 теңгені құрап отыр. Оған электр  энергиясы, көгілдір отын, тасымал шығындары қосылады. Егер ұн бағасы биылғы жылдағыдай 10-15 теңгеге қымбаттайтын болса, нан бағасын осы қалыпта ұстап отырамыз деп еш кәсіпорын кепілдік бере алмайды, – дейді Антон Маркушин.

«Доценко» шаруа қожалығының құрылтайшысы Николай Трегубовтың айтуынша, нан бағасы жақын күндері қымбаттамайды. Себебі нан өнімдерін өндіруге қажетті астықты кәсіпорын өз егіс алқаптарында өсіреді екен. «Бүгінде қоймада астығымыз бар.

Қорымыз жеткен уақытқа дейін нан бағасын өсірмейміз. Бүгінде біздегі бір қап ұнның құны 4350 теңге тұрады. Наубайханада тәулігіне 1500-1800 бөлке жоғары сұрыпты, 1000-1100 дана бірінші сұрыпты нан пісіріледі», – деді Николай  Викторович.

Ал Орал қаласы әкімінің орынбасары Сергей Доляның айтуынша, әкімдік жанынан нан бағасын реттеуге байланысты арнайы комиссия құрылған. Кәсіпкерлік, ауыл шаруашылығы бөлімдері, қалалық әкімдіктің мамандарынан құрылған комиссия шаһардағы нан өнімдерін өндіруші кәсіпорындарды аралап шығып, талдау жасаған. Сондай-ақ кәсіпорын басшыларымен де тілдескен. Бүгінгі таңда бірінші сұрыпты астықтан пісірілген нанның бөлкесі 70 теңгеден, жоғары сұрыпты нан 90 теңгеден артық қымбаттамайтын көрінеді. Барлық кәсіпорын бірқалыпты жұмыс жасап жатыр. Астықтың қоры  да  жеткілікті.

Нұрбек   ОРАЗАЕВ,

«Орал   өңірі»


«Ел тарихын тұлғалар жасайды»

Күні: , 52 рет оқылды

«Патриотизм – кіндік қаның тамған жеріңе, өскен ауылыңа, қалаң мен өңіріңе, яғни туған жеріңе деген сүйіспеншіліктен басталады»

(ҚР Президенті Н. Ә.  НАЗАРБАЕВТЫҢ  «Болашаққа бағдар:  рухани жаңғыру» бағдарламалық мақаласынан)

Сейсенбі күні Орал қаласындағы Салтанат сарайында «Рухани жаңғыру» бағдарламасы аясында туған жерінің игілігі үшін жарқын істерімен танылған өңір меценаттарын «Жомарт жүрек –  2018»  сыйлығымен  марапаттау  форумы  өтті. Шара барысында биылғы жылы меценаттардың көмегімен «Туған жер» бағдарламасы аясында жүзеге асқан және болашақта іске асырылатын Орал қаласы, сондай-ақ 12 аудан әкімдіктерінің әлеуметтік  жобаларының  көрмесі  ұсынылды.

Форумға облыс әкімі Алтай Көлгінов, қала және аудан әкімдері, облыстық мәслихаттың депутаттары, басқарма басшылары, зиялы қауым өкілдері, меценаттар мен үкіметтік емес ұйымдардың жетекшілері қатысты.

– Ақ Жайық – ата дәстүрінен айнымаған, салтына берік, ұлттық құндылықтарды қадір тұтатын қасиетті өңір. Бізде елдің қамын өз мүддесінен биік қойып, атамекеннің  абыройын асқақтатып жүрген азаматтар аз емес. Елбасы Нұрсұлтан Әбішұлы Назарбаев «Болашаққа бағдар: рухани жаңғыру» бағдарламалық мақаласында «Туған жерге, оның мәдениеті мен салт-дәстүрлеріне айрықша іңкәрлікпен атсалысу – шынайы патриотизмнің маңызды көріністерінің бірі» деп атап өтіп, нақты міндеттер жүктеді. Ел тарихы тұлғалар арқылы жасалатынын ескерсек, Ақ Жайық өңірінде көптің алғысына бөленіп жүрген жандар жеткілікті. Бұл – атадан келе жатқан игі дәстүрдің бүгінгі жалғасы, қазақы қасиетіміздің айқын белгісі. Ағайынға болысу, әлсізді демеу, жасы кішіні қолдау – адамзатқа тән мейірімділік пен кеңдіктің көрінісі. Қазіргі таңда «Рухани жаңғыру» бағдарламасы алты принципке негізделіп, алты арнайы жоба, алты кіші бағдарлама арқылы жүзеге асырылуда. Аз ғана уақыттың ішінде қыруар жұмыстар атқарылды. Ең бастысы, туған өлкесін дамытуға белсене кіріскен жандардың қатары көбеюде. Осы уақытқа дейін облыс бойынша 60 әлеуметтік нысан пайдалануға берілді. Әсіресе, өңір меценаттары спорт, денсаулық, білім салаларына көбірек көңіл бөліп келеді. Қазіргі таңда облыстағы әрбір елді мекенде спорт кешендері мен балалардың ойын алаңдары, мектептерде арнайы кабинеттер жабдықтап, материалдық-техникалық әлеуетті жаңарту, аудандық музейлерді тың дүниелермен толықтыру, жөндеу жұмыстарын жүргізу, ескерткіштер орнату секілді шаралар атқарылуда. Бізге сонымен қатар республикалық қорлардың да көмегі тиюде. «Самұрық Қазына Траст» ұлттық қоры мен «Асыл мирас» қайырымдылық қоры облысымыздағы спорттық-әлеуметтік инфрақұрылымдардың дамуына зор үлес қосты. Биылғы жылы да «Атамекен» кіші бағдарламасы аясында 134 меценаттың қатысуымен 166 жоба жүзеге асырылып, түрлі деңгейде шаралар өтті. Оның 138-і ауылдық округтерде, 20 жоба аудандық деңгейде, сегізі облыс орталығында жүзеге асты. Елбасы Нұрсұлтан Әбішұлы Назарбаев биылғы бесінші қазандағы халыққа Жолдауында да «Рухани жаңғыру» бағдарламасы одан әрі жалғасатынын атап өтті. Аталған бағдарлама аясында өңірімізде іске асырылған қайырымдылық және әлеуметтік маңызды шараларға жұмыла қатысқандарыңыз үшін  сіздерге шынайы ризашылығымды білдіремін, – деді Алтай Көлгінов. Содан соң облыс басшысы өңірдің, ауыл-аймақтың дамуына зор үлес қосып жүрген бірқатар меценаттарға «Жомарт жүрек» сыйлығы мен алғысхат табыс етті.

«Жыл меценаты» аталымымен «Автокомбинат» ЖШС-ның директоры Валерий Голоухов, «Жылдың әлеуметтік жауапты ұйымы» аталымы бойынша «Uniserv» ЖШС-ның бас директоры Нұрғазы Сәтбаев, «Алтын ұя» аталымымен «Конденсат» АҚ директорлар кеңесінің төрағасы Валерий Жүнісов марапатталды. Ал «Туған өлке» аталымы бойынша «Отделстрой» ЖШС-ның директоры Валентина Михно, «КТК» ЖШС-ның директоры Сержан Айтжан, «БелесАгро» ЖШС-ның директоры Мұрат Жәкібаев, «Батыс Пауэр» ЖШС-ның директоры Жасұлан Жақыпов және Батыс Қазақстан облысының  этномәдени  бірлестігі  марапатталды.

Валерий Голоухов басшылық ететін «Автокомбинат» ЖШС «Рухани жаңғыру» бағдарламасы аясында өз қаражаты есебінен «Әмбебап дүкеннің» маңында тынымбақ салып, қала күніне тарту жасады.

Кәсіпкер бұл жұмысқа 58 млн. теңге жұмсаған. Ересектердің тынығуы мен балалардың ойнауына арналған тынымбаққа арықтар тартылып, су құбыры жүргізіліп, жасыл  желек  пен  екпе  шөп  егілді.

– Бүгінде кәсіпкерлікті дамытуға мемлекет тарапынан зор қолдау көрсетілуде.

Өз  ісін дамытамын деген жанға түрлі мемлекеттік бағдарламалар мен жеңілдіктер  қарастырылған. Соның қайтарымы ретінде өңірдегі әлеуметтік маңызды жобаларды жүзеге асыруға, мәдениет пен спорт, білім саласын дамытуға жеке кәсіп иелері де атсалысу керек. Біз ар-ұятты, отансүйгіштікті, өз елін, жерін, қаласын шынайы сүйетін өскелең ұрпақ тәрбиелеуіміз керек, –  деді кәсіпорын басшысы Валерий Голоухов. Сонымен қатар шара барысында өңіріміздің өркендеуіне елеулі үлес қосып жүрген 14 батысқазақстандық облыс әкімінің ал-ғысхатымен марапатталды. Олардың қатарында «ГазПромПроект» ЖШС-ның директоры Михаил Кульпин, ақжайықтық «Сәбит» шаруа қожалығының жетекшісі Ерболат Құрманғалиев, Бөрлі ауданындағы «АқсайБизнесСтрой» ЖШС-ның бас директоры Анвар Агаев сынды бір топ жомарт жандар бар.

Айта кетейік, аталған форумда облыс бойынша үздік деп танылған 29 меценатқа 11 аталым бойынша «Жомарт жүрек» сыйлығы табысталған болатын. Сахна төріне көтерілген облыстық мәслихаттың хатшысы Мәлік Құлшар, Қазақстан Республикасының еңбек сіңірген қайраткері, ақын Ақұштап Бақтыгереева, «Нұр Отан» партиясы облыстық филиалы төрағасының бірінші орынбасары Серік Сүлеймен, өлкетанушы, елге сыйлы қария Жайсаң Ақбай құттықтау сөз сөйлеп, бірқатар меценатты «Жомарт жүрек» сыйлығымен марапаттады.

Биылғы жазда «Асыл мирас» орталығының бастамасымен Орал қаласында аутизм дертіне шалдыққан балаларға жәрдем беруге арналған көпбейінді орталық ашылған болатын. Орталық 15 жасқа дейінгі аутистік спектр дертіне шалдыққан балаларды қабылдайды. Орталық әдістемесі халықаралық зерттеулерге негізделген. Ғылыми кеңесшілер ата-аналарға ақпараттық және психологиялық қолдау көрсетеді. Осындай игі бастаманы қолға  алған «Асыл мирас» орталығының негізін қалаушы Болат Өтемұратов «Жүректен жүрекке» аталымы бойынша марапатталды.

– Қайырымдылық танытып, әлеуметтік маңызы бар жобаларды жүзеге асырғандығыңыз үшін өңір тұрғындары және өз атымнан зор алғыс айтамын. Сіздердің азаматтық ұстанымыңыз бен ұлтжандылығыңыз, жанашырлығыңыз көптеген қазақстандықтарға үлгі болмақ, – деді меценаттардың бірін марапаттаған Ақұштап Бақтыгереева.

Ал «Әлеуметтік саланың дамуына қосқан үлесі үшін» аталымын иеленген «Самұрық Қазына» акционерлік қоғамы  550 миллион теңгеге 11 спорт қалашық салды. Сол игі бастаманың нәтижесінде 20 мыңнан астам батысқазақстандық заманауи жабдықталған спорт алаңдарында жаттығуға мүмкіндік алды.

Маңызы зор шараға арнайы шақырылған еліміздің танымал әншілері Айгүл Иманбаева мен Қазбек Қасымның орындауындағы әндер мерекелік кештің шырайын аша түсті.

Нұрбек   ОРАЗАЕВ,

«Орал   өңірі»

Медхат ҚАМБЕТОВ,

БҚО әкімі аппаратының «Қоғамдық келісім» КММ-ның басшысы, «Туған өлке» аталымының иегері:

– Біздің  облыста  53  этномәдени  бірлестік болса, соның 16-сы облыс орталығында орналасқан. Бірлестіктер күнделікті жоспарлы жұмыстарынан тыс туған ел мен жерге жақсылық жасаудан тартынған емес. Биылғы жылдың көктемінде Зеленов ауданына қарасты Көшім ауылдық округінің Өркен ауылына «Достық» бағын сыйға тарттық. Бұл жұмысқа шаһардағы барлық этномәдени бірлестіктер жұмыла атсалысты. Өз қаржыларына салынған баққа 360 түп ағаш отырғызылды. «Бірлесе көтерген жүк жеңіл» дегендей, бұл берекелі іс ынтымақтың, бірліктің арқасында жүзеге асқан игілік.

Роберт ИРМЕНОВ,

«Орал Полимер» ЖШС директоры, «Әлеуметтік саланың дамуына қосқан үлесі үшін» аталымының иегері:

– Біздің компания ұзақ жылдан бері көп қабатты тұрғын үй салумен айналысады. Бүгінге дейін өз қаражатымыздың есебінен облыс орталығында 20-дан астам көп қабатты тұрғын үй салдық. Соңғы жылдары жергілікті әкімшілікпен бірлесіп, мемлекеттік-жеке меншік әріптестік аясында ескі үйлердің орнына жаңа көп қабатты тұрғын үй салумен айналысудамыз. 2016 жылы қыс мезгілінің қарсаңында Орал қаласындағы төрт пәтерлі тұрғын үй өртеніп кеткен болатын. Панасыз қалған тұрғындарға көмек қолымызды созып, өртенген үйдің орнына су жаңа баспана салып бердік. Еңбегіміз еленіп, осындай марапатқа ие болғанымызға қуаныштымын.

Нұрдәулет АЙБОЛАТОВ,

Қазталов ауданы Қошанкөл ауылындағы Ғ. Бегалиев атындағы мектептің оқушысы, «Батыл жүрек» аталымының иегері:

– Мен ата-анаммен Қошанкөл ауылында тұрамын. Әкем Асқар Аткешев – жеке шаруа. Анам Гүлжан Сисенова – мектепте мұғалім. Үйдегі үш ұлдың кенжесімін. Биылғы 5 мамырда тоғанға батып бара жатқан үш жасар баланы құтқарып қалған едім. Сол себепті бүгін үлкен марапатқа ие болдым. Өте қуаныштымын. Бірақ мен ол кезде мақтану немесе марапат алуды мақсат тұтқан жоқпын. Бар ойым сол баланың өміріне араша түсуде болды. Ол жерде менің орнымда болған әрбір жан сәбиді құтқаруға бел буатыны анық. Дегенмен, менің аз да болса, ерлігімді ескеріп, марапатқа ұсынған аға-апаларыма ризамын.


Күздің соңы, қыстың басы

Күні: , 48 рет оқылды

Атам қазақ қараша айын күздің соңы, қыстың басы ретінде қарастырады. Соның айғағындай, күн суытып, қаһарлы қыстың келе жатқанынан хабар бере бастады. Күздің соңғы айына тән құбылмалы ауа райы мен алдағы қысқа ешкім үзілді-кесілді болжам жасай алмасы анық. Дегенмен, осы мәселеге «Қазгидромет» РМК-ның облыстық филиалындағы мамандар не дер екен?

Ауа райын бақылайтын мекеме нақты мәлімет таратпаса да, күн ілгері болжам баршылық. Негізгі қызметі күн қабағын қадағалау болып табылатын мекеме ұсынған деректерге сүйенсек, қараша айында ауа райы құбылмалы болады. Себебі, синоптикалық үдерістер жиі алмасатын көрінеді. Күн райы бір жылып, бір суытады.

Бет қаритын «сарышұнақ» аяздардың алғашқы легі қараша айының үшінші онкүндігінде сезілмек. Болжамға сенсек, ол кездерде ауа температурасы түнде -15-тен -20 градусқа дейін төмендесе, ал күндіз -60, -110 шамасында аяз болуы тиіс.

– «Қазгидромет» РМК ұсынған ұзақ мерзімді болжамға сәйкес еліміз үшін алдағы қыс мезгілі суық әрі қар мол болады деп күтілуде. Биылғы жылдың соңғы, келер жылдың алғашқы айында түрлі антициклондарға байланысты ауа температурасы күрт төмендейді. Дегенмен, қар аз жауады. Алайда алдағы қыста қардың дені ақпан, наурыз айларында жауады деп күтілуде. Ақпанда ауа температурасы жылдағыдан 1-2 градусқа төмен болады деп отырмыз. Көктемнің басында суық пен жылы күндер жиі алмасып, әрі қар мен жауын-шашын да жиі кезектеседі. Наурызда жауын-шашынның мөлшері әдеттегіден мол болады, – дейді инженер-синоптик Альбина  Кузнецова.

Мамандардың айтуынша, болжамның жүзеге асу ықтималдығы 55-60 пайызға тең, кейін бір айға, онкүндікке және одан да қысқа мерзімге жасалған болжамдар бойынша нақтыланып  отырады.

Қалай дегенде де, қылышын сүйретіп, қыр астына келіп қалған «кәрі құданың» бейқамдықты көтермейтіні хақ. Демек, даладағымыз да, қаладағымыз да алты ай қысқа қамданысты ширатқанымыз абзал.

Нұрбек   ОРАЗАЕВ,

«Орал   өңірі»


Жүгіру маусымы қорытындыланды

Күні: , 35 рет оқылды

Елбасы  әр  жылғы  Жолдауында  халықтың денсаулығының  кепілі – бұқаралық  спортты дамытуға  баса  мән  береді.

Президенттің  қойған  міндеттерін  іске асыру мақсатында  бүгінгі  таңда  өңірімізде халыққа  салауатты өмір салтын насихаттап, тұрғындардың спорттық белсенділігін арттыруды көздеген ауқымды жұмыс жүйелі жүргізіліп келеді.

Өткен сенбіде Орал қаласында жүгіру маусымының жабылуына орайластырылған жеңіл атлетикалық кросс өтті. Кросқа облыс әкімі Алтай Көлгінов пен бірқатар мекеме басшылары, спортты жанына серік еткен шаһар тұрғындары қатысты.

– Демалыс күні екендігіне қарамай, уақыт тауып, жүгіру маусымының жабылуына келгендеріңіз үшін алғыс айтамын. Елбасымыз жыл сайынғы халыққа арнаған Жолдауында бұқаралық спортты дамытуға көп көңіл бөлу қажеттігін айтады. Жергілікті тұрғындардың салауатты өмір салтын ұстанып, спортпен айналысуына барлық жағдайды жасауға тырысудамыз. Алдағы қыс айларында шаңғы тебу, конькимен сырғанау секілді спорт түрлерімен айналысуды дамытатын боламыз, — деді жарыстан соң облыс әкімі Алтай Көлгінов.

Аталған шараға үлкенді-кішілі 400-ден астам шаһар тұрғыны қатысты. Жеңілатлетикалық крос-қа атсалысып, ерекше ерік-жігер танытқан қала тұрғындары аталымдар бойынша алғысхатпен, естелік сыйлықтармен марапатталды. Атап айтқанда, «Спорттық отбасы» аталымымен Сейітовтер әулеті, «Ең жас қатысушы» аталымымен Аяулым Мұқсин, «Белсенді қатысушы» ретінде Ирина Хромцова танылды.

Нұрбек   ОРАЗАЕВ,

«Орал   өңірі»

Темірлан  ЖҮНІСОВ,

№28  орта  мектептің  оқушысы:

– Екі жыл бойы спорттың кикбокс түрімен айналысамын. Бүгін белгіленген жүгіріс жолының 2 шақырымнан астамын бағындырдым. Әрине, оңай болған жоқ. Бірақ адам өзіне мақсат қойып, соған қол жеткізуге талпыну керек деп есептеймін. Өзім қатарлы жасөспірімдерді жаман әдеттерден аулақ болып, спортпен шұғылдануға шақырамын.

Ирина  ХРОМЦОВА,  қала  тұрғыны:

– Спортпен он жасымнан бастап шұғылданып келемін. Жасым 56-дан асса да, салауатты өмір салтын ұстануға тырысамын. Жүгіру маусымының ашылуынан бастап, әр шарадан қалған емеспін. Енді қыс айларында шаңғы тебуге шығатын боламыз. Әр адам өзінің дені сау болуы үшін спорттан қол үзбеу керек. Қазіргі жасөспірімдер смартфондар мен гаджеттерге үңіліп отырғанша, спортпен шұғылданған әлдеқайда тиімді екендігін түсінсе деймін.

Жадыра  МҰҚАШЕВА, қала  тұрғыны:

– Бүгінгі жеңілатлетикалық кросқа отбасымызбен қатысуды жөн көрдік. Өзім қаладағы №40  мектепте дене шынықтырудан сабақ беремін. Жүгіруге мектептің 7-сынып оқушыларын да алып келдім. Екі қызым әлі кішкентай болса да, олардың спортпен шұғылдануына үлкен мән беремін.

Қыздарыммен бірге үш шақырымдай жүгірдік. Ал оқушыларым белгіленген қашықтықты  толық  бағындырды.


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика