Тег: ‘Гүлсезім БИЯШЕВА’


1414 нөміріне хабарласыңыз…

Күні: , 19 рет оқылды


Сейсенбі  күні  өңірлік  коммуникациялар қызметі  алаңында өткен  брифингке «Азаматтарға  арналған  үкімет»  мемлекеттік корпорациясы»  коммерциялық  емес  акционерлік  қоғамы облыстық  филиалдарының  басшылары  қатысты.  Атап айтқанда,  БҚО  бойынша  «Халыққа  қызмет  көрсету  орталығы»  департаментінің  директоры Марат  Бассаров,  БҚО  бойынша  «Әлеуметтік  төлемдерді  ведомствоаралық  есептеу  орталығы»  департаментінің  директоры  Асқар  Қожымов,  БҚО  бойынша  жер кадастры  және  жылжымайтын  мүлікті  техникалық тексеру департаментінің  директоры  Нұрбек  Қанаев  2017  жылы атқарған  жұмыстарын  қорытындылап,  биылғы  жылдағы  жұмыс жоспарларымен  бөлісті.


«Халыққа қызмет көрсету орталығы» департаментінің директоры Марат Бассаровтың айтуынша, «Азаматтарға арналған үкімет» корпорациясы Қазақстанның реестрінде тіркелген барлық мемлекеттік қызмет түрлерінің  83%-дан астамын көрсетуде.

Тұтастай алғанда, 2017 жылы облыста «Халыққа қызмет көрсету орталығы» департаменті арқылы 1,3 млн.-нан аса мемлекеттік қызмет көрсетілген, соның – 946 мыңы электронды форматта.

Жылжымалы түрдегі халыққа қызмет көрсету орталықтары шалғайдағы елді мекендердің тұрғындарына – 31 546 мемлекеттік қызмет, сондай-ақ мүмкіндігі шектеулі жандардың үйлеріне барып, оларға 2693 мемлекеттік қызмет көрсеткен.

– Біз қазіргі қолданыстағы мемлекеттік қызмет түрлері мен үрдістерін ұдайы талдап, автоматтандыруға жататын қызмет түрлерін анықтаймыз. Сонымен қатар үлгі жобадағы фронт-кеңселердің дизайнын жасаймыз. 2017 жылдың төртінші тоқсанында қаладағы екі бөлімнің және Те-ректі, Тасқала, Зеленов аудандарындағы бөлімдердің бірігуі жүзеге асырылды, – деді Марат Владимирович.

Департамент басшысының мәліметінше, Сырым және Бөкей ордасы аудандарындағы кеңсе арқылы қолға алынған азаматтық хал-актілерін тіркеу бойынша қызмет көрсету жобасы азаматтарға туу туралы куәлікті бұрынғыдай екі жұмыс күні ішінде емес, үш сағаттың ішінде алуға мүмкіндік беруде.

Сонымен қатар ХҚКО «Қазпошта» АҚ-мен бірлесіп, барлық елді мекендердегі пошта тораптары арқылы құжаттарды қа-былдау және дайын құжаттарды беру жобасын бастады. Оның көмегімен ауыл тұрғындары 66 мемлекеттік қызмет түрін алуда.

Қазақстандықтар тарапынан ең көп сұраныс, қызығушылық тудырған пилоттық жоба перинаталдық орталықтарда дүниеге келген нәрестелерге жанжақты қызмет көрсету болып табылады. Яғни, осы жоба аясында босанған әйелдер енді перзентханадан шықпай-ақ, сәбидің туу туралы куәлігін алуға, бір реттік жәрдемақыға құжат толтыруға, сәби бір жасқа келгенше берілетін жәрдемақыға құжат толтыруға және сәбиді балабақша кезегіне қоюға мүмкіндік берілуде. 2017 жылы облыстағы перинаталдық орталықтарда сәбидің дүниеге келуіне орай 6072 композиттік қызмет көрсетілген.

Сондай-ақ мүмкіндігі шектеулі жандар, ҰОС-ның ардагерлері «Азаматтарға арналған үкімет» жобасы аясында 1414 нөміріне хабарласу арқылы ХҚКО орталығының мобильді тобын үйге шақырта алады.

ХҚКО-да мүмкіндігі шектеулі азаматтарға кедергісіз орта қалыптастыру, оларға барынша қолайлы қызмет көрсету мақсатында биылғы жылы «Есту және сөйлеу қабілеттері бұзылған тұлғаларға онлайн-сурдоаударма» сервисін  іске  қосқан  болатын.

Брифингте сөз алған БҚО бойынша «Әлеуметтік төлемдерді ведомствоаралық есептеу орталығы» департаментінің дирек-торы Асқар Қожымов мекеме көрсететін қызмет түрлері көлемінің тұрақтылығын атап өтті.

– Біздің департаменттен мемлекеттік қызмет түрлерін алатын азаматтардың жалпы саны өзгерген жоқ, бұрынғы деңгейде қалып отыр. Нақты айтқанда, ай сайын 145 мыңға жуық адамға қызмет көрсетеміз. Олар ай сайын біз арқылы 260 төлем түрлерін алады (зейнетақы, түрлі жәрдемақылар). 2017 жылы жасалған барлық төлемдердің жалпы сомасы облыс бойынша 82 млрд. теңгеден асты. Ағымдағы қаңтар айынан бастап зейнетақы мөлшері өскенін білесіздер. Соған сәйкес 2018 жылы төлемдердің жалпы сомасы да көбейетін болады», – деп сөзін түйіндеді Асқар Темірболатұлы.

БҚО «Жер кадастры және жылжымайтын мүлікті техникалық тексеру» департаментінің директоры Нұрбек Қанаевтың айтуынша, мекеменің Орал қаласында және 12 ауданда өз бөлімшесі бар. Оларда 200-ден аса маман жұмыс жасауда. 2017 жылы департамент сәйкестендіру құжатын, мемлекеттік жер актілерін, техникалық төлқұжаттар, жер телімдерін бағалау актілерін беру, жерге орналастыру секілді 30 мыңнан аса мемлекеттік қызмет түрлерін көрсеткен. Одан бөлек мекеме топырақты зерттеумен, геоботаникалық жұмыстармен, жер телімдерінің кадастрлық құнын белгілеуге әсер ететін жайылымдардағы шөптің шығымдылығын  зерттеумен  айналысуда.

 Гүлсезім  БИЯШЕВА,

«Орал  өңірі»


Пәтерін сатамын деп, бар ақшасынан айырылды

Күні: , 55 рет оқылды


Адамдарды аяқ астынан сан соқтырып кететін  алаяқтар тыйылмай тұр.  Жуырда пәтерін  саттыққа шығарған Орал қаласының тұрғыны  есеп шотындағы 17 миллион теңгесінен қағылып, жер сипап қалды.


Орал қалалық ІІБ баспасөз қызметінің мәліметіне сүйенсек, оқиға былай басталған. 2017 жылдың желтоқсан айының соңғы күндерінде қала тұрғыны үйін сатамын деп әлеуметтік желілерге хабарландыру берген. Хабарландыру бойынша іле-шала бейтаныс азамат хабарласып, пәтерін сатып алатындығын жеткізеді. Сондай-ақ олар «Сіздің есеп шотыңызға пәтер құнының жарты ақшасын  аударамыз.  Ол үшін сіздің жеке есеп шотыңыз бен жеке куәлігіңіздің нөмірлері керек» деп пәтер иесінің сеніміне кіреді. Алаяқтардың айтқанына сенген азамат  жеке басын куәландыратын құжатын, банкомат карточкаларын фотоға түсіріп, ватсап желісі арқылы салып жібереді. Алаяқтар оны мобильді деректерге бекітіп, азаматтың есеп шотындағы 17 миллион теңгені аударып алады. Содан кейін қылмыскерлер банк қызметкерлеріне күдік ұялатып алмас үшін банкоматтағы ақшаны бір күнде емес, аз мөлшерден араға күндер салып, алып отырған. Бірнеше күннен кейін банкке барған азамат есеп шотындағы ақшаның мүлдем жоқ екеніне көз жеткізеді.

Қазіргі таңда Орал қалалық ІІБ алаяқтық фактісін сотқа дейінгі тергеп-тексерудің бірыңғай тізіліміне енгізіп, ҚР Қылмыстық Кодексінің 190-бабының 4-бөліміне сай қылмыстық іс қозғаған.  Тәртіп сақшылары  тергеу нәтижесінде алаяқтардың аты-жөнін  анықтаған. Қазір олар іздестірілуде.

Орал қалалық ІІБ бастығының орынбасары Нұрлан Бисенов тұрғындарды алаяқтардан сақ болу үшін бейтаныс адамға жеке құжаттардың нөмірлерін бермеу қажеттігін ескертеді.

Гүлсезім БИЯШЕВА,

«Орал өңірі»


Құдайдан да қорықпайды екен…

Күні: , 46 рет оқылды


Ұрыда ұят, намыс, обал-сауап деген түсінік болмайтыны белгілі. Алайда, олардың харам әрекеттерін Алланың жердегі қасиетті орны – мешітте жасауы, тіптен шектен шыққандық демей не деуге болады?! Соған қарағанда, олар Құдайдан да қорықпайтын болып тұр ғой.


Жуырда Оралдағы Тәжиден Батырұлы атындағы қалалық мешіттегі  жамағаттың қалтасынан ақша ұрлап жүрген атыраулық азаматтың ісі әшкере  болып, әрекеті елді шулатты.

Орал қалалық ішкі істер бөлімі баспасөз қызметінің мәліметіне сүйенсек, құлшылық үйінде азғындыққа барған ұрының қылмысы жедел басқару орталығына қосылған мешіттегі бейнебақылау камерасына түсіп қалған. Адамдардың көзіне дәрет алмақшы болып көрінген А. есімді азамат мешіт жамағаты намаз оқуға кеткен кезде олардың сырт киімдерінің қалтасын тіміскілеп, ақшаларын жымқырған. Орал қалалық ішкі істер басқармасына қарасты Абай полиция бөлімінің қызметкерлері жедел іздестіру шараларын жүргізу барысында 25 жастағы еш жерде жұмыс жасамайтын, бұған дейін де істі болған Атырау қаласының тұрғынын ұстады. Бұлтартпас дәлелдермен ұсталған ұры өз кінәсін мойындап отыр. Үш күннің ішінде 370 мың теңге жымқырғанын өз аузынан айтқан. Суық қолды арамза мешіттегі бейнебақылауға түсіп қалмаса, әлі талай қалтаны қағуы мүмкін еді.

Қазіргі таңда бұл факті бойынша ҚР Қылмыстық кодексінің 188-бабының 2-бөліміне сай төрт эпизодпен сотқа дейінгі тергеу жұмыстары жүргізілуде.

                                                                                 Гүлсезім БИЯШЕВА,

«Орал өңірі»


Айбар Хайырханов: «Мен үшін халықтың қошемет-пейілі – ең үлкен марапат»

Күні: , 35 рет оқылды

Ақ Жайық өңірінде күміс көмей, жезтаңдай әншілер баршылық. Сондай талант-дарындардың бірі — Айбар Хайырханов десек, жаңылыспаспыз.  Өнерімен көпке жаққан Айбар орда бұзар отыз жасқа толғанда, ҚР Президенті Нұрсұлтан Назарбаевтың  Жарлығымен «Ерен еңбегі  үшін»  медалімен марапатталды.

Қазталов ауылындағы ұстаздар отбасында дүниеге келген Асқардың Айбары бала күнінен ән-жырға құмар болып өскен. Әкесі марқұм Асқар Хайырханұлы Хасанов тарих пәнінің мұғалімі болса, анасы Күләш Қадемқызы Хасанова физика пәнінің мұғалімі екен. Екеуі де Оралдағы А. С. Пушкин атындағы педагогикалық институтын тәмамдаған. Анасы жас кезінде өз ортасында мың бұралған биші, ал әкесінің отырыстарда әу дейтін әдеті болыпты. Бүгінде анасы – Қазталов ауданындағы әжелер ансамблінің белсенді  мүшесі. Еліміздің еңбек сіңірген қайраткері, жыршы, термеші Хатимолла Бердіғалиев кейіпкеріміздің нағашысы, яғни әжесінің інісі болғандықтан, өнер кейіпкерімізге қан арқылы дарыған десе де болады. Осындай өнерлі отбасында дүниеге келген ол мектеп қабырғасында домбыра үйірмесіне қатысып, қоғамдық шараларға белсенді атсалысқан. Әсіресе, сол кезде мектеп жанынан ашылған тәрбие орталығындағы домбыра үйірмесіне сабақ берген Өтеген Шоқпанов пен аудандық мәдениет үйінің жанынан ашылған саз үйірмесіне жетекшілік еткен Боранқұл Сәртөк есімді ұстаздарынан әнге деген қызығушылығы оянады. 2004 жылы М. Өтемісов атындағы Батыс Қазақстан мемлекеттік университетінің мәдениет және өнер факультетіне вокал мамандығы бойынша оқуға қабылданады. Жоғарғы оқу орнында КСРО халық әртісі, Ермек Серкебаевтың шәкірті, тенор дауысты әнші Қуанышбай Бижановтан дәріс алады. Білім ордасында саз өнерінің қыр-сырын меңгереді. 2008 жылы оқуды тәмамдаған соң, бір жыл аталмыш білім ордасында қызмет атқарады. Кейін Алматы қаласының Боралдай кентінде әскери қызметін өтейді. Оралған соң туған ауылындағы Сағит Садықов атындағы мәдени орталыққа әдіскер болып қызметке қабылданады. 2011 жылы Әсем есімді арумен шаңырақ көтеріп, келесі жылы тұңғыш перзенті Айсұлтан дүниеге келеді. Жұбайы Әсем Сапуанқызы өнерден құр алақан емес, ол да М. Өтемісов атындағы Батыс Қазақстан мемлекеттік университетін мәдени-тынығу жұмысы мамандығы бойынша тәмамдаған.

Жас отбасы 2012 жылы Орал қаласына көшіп келеді. Отағасы Ғарифолла Құрманғалиев атындағы облыстық филармонияға әнші-солист болып қабылданып, күні бүгінге дейін осы өнер шаңырағында еңбек етуде.

– Отбасындағы бес қыздың ортасында өскендіктен, кішкентай  кезімде жасық, ұялшақ болдым. Ренжіп қалсам, жылап аламын. Жоғары сыныптарға көшкенде, қоғамдық жұмыстарға араласып, сахнаға, көпшіліктің алдына шығып үйренген соң ашыла түстім. Өйткені, сахна киелі, ұялшақтығыңды ұмыттырады, бойыңдағы өнеріңді көрерменге жеткізіп, көңілінен шығу үшін өзіңді еркін ұстайсың.  Сегізінші сыныпта оқып жүргенде нағашым Хатимолла Бердіғалиев домбырасын сыйлады. Сол кездегі қуанышымды сөзбен айтып жеткізе алмаймын. Сол сәттен бастап домбыра тартып үйрене бастадым. Мектепті бітірген соң жоғарғы оқу орнына түсіп, оны тәмамдағасын қызметке қабылдандым. Өңірдегі белгілі өнер ошағы Дәулеткерей атындағы халық аспаптар оркестрінің дирижерлері ҚР еңбек сіңірген қайраткері Қырымгерей Қажымов пен оркестрдің бас дирижері, «Құрмет» орденінің иегері Еркін Нұрымбетов ағаларыммен шығармашылық тығыз байланыстамын. Репертуарымның кеңдігі де өнердегі осы ағаларымның үлесі. Қандай байқауға қатыссам да, ақыл кеңестеріне жүгінемін. Жеткен жетістіктерім де осы жандардың арқасында деп білемін, – дейді Айбар Асқарұлы.

Кейіпкеріміз жас та болса, өнер жолында жетістіктерге қол жеткізіп үлгерген. Айта кетсек, 2006 жылы «А. С. Пушкиннің сөзіне жазылған романстар мен әндер» атты облыстық вокалистер байқауында дипломант атанса, келесі жылы М. Өтемісов атындағы БҚМУ-дың 75 жылдығына орай ұйымдастырылған облыстық вокалистер конкурсының III дәрежелі лауреаты және облыстық «Дала дарындары» фестивалінің I дәрежелі лауреаты атанған. 2011 жылы ҚР Тәуелсіздігінің 20 жылдығы аясында Астана қаласындағы Бейбітшілік және келісім сарайында Елбасы қатысқан мерекелік концертте өнерімен облыс мәртебесін асқақтатқаны үшін облыс әкімі Б. Ізмұхамбетовтің алғысхатын иеленген.

Ал 2013 жылы Талдықорған қаласында өткен КСРО халық әртісі, композитор М. Төлебаевтың туғанына 100 жыл толуына орай ұйымдастырылған «Кестелі орамал» атты республикалық вокалистер байқауында ІІІ орын алыпты. Кейін 2015 жылы мәдениет және өнер қызметкерлері күнінде мәдениет және өнер саласының дамуына қосқан үлесі үшін облыс әкімі Алтай Көлгіновтің атынан «Ақжайықтың дауысы» дипломымен марапатталған. Сондай-ақ 2016 жылдың қараша айында КСРО және ҚР-ның халық әртістері, ағайынды әншілер Ришат және Мүслім Абдуллиндердің туғанына 100 жыл толуына арналған «Егіз әуен, қос қанат» атты ҚР-ның еңбек сіңірген қайраткері Хатимолла Бердіғалиевпен қосыла ән шырқады. Сол жылы Қазақстан Республикасының Президенті Жарлығымен «Ерен еңбегі үшін» медалімен марапатталды. Ал 2017 жылы сәуір айында Қазақстанның халық әртісі, әнші-композитор Әшір Молдағайыновтың туғанына 80 жыл толуына байланысты Орал қаласында өткен республикалық вокалистер байқауында  лауреат  атанды.

Айбар – қазақы ырымдарға сенетін жан. Әсіресе, көпшіліктің алдына шыққанда тіл-көзден сақтану үшін костюмінің не смокингінің ішкі қабатына түйреуіш тағуды әдетке айналдырған. Үйден шыққанда оң аяқпен аттауды да жөн санайды. Ал сахналық киімдерін Меңдібек Нұрғалиев есімді оралдық ісмер азаматқа тіктіртеді екен.

– Бірде гастрольдік сапармен Татарстан Республикасының астанасы Қазан қаласына бардық. Мен Джоаккино Россинидің «Севильдік шаштараз» деген операсының Фигар каватинасын орындауым керек еді. Аталмыш операның тарихына тоқталсақ, Севиль қаласында жалғыз шаштараз болған. Ол барлық тұрғындардың шашын қиып, әрлеп үлгереді екен. Бұл каватина шаштараздың атынан айтылатын әзіл өлең түрінде болатын. Дирижер Еркін Шаяхметұлына операның әуені басталып кеткен соң өз тактамда сахнаға шығатынымды айтып, бұрынғы сценарийге өзгеріс енгізгелі тұрғанымды ескерттім. Менің ойым, операның әуені басталған соң есіктің ар жағынан «Ла-ла-ла-лай-ла» деп басталатын жаңғырық дауысыммен сахнаға шығу болатын. Мұны Еркін аға екеуміз ғана білеміз, ал оркестр хабарсыз. Содан оркестр әуенді бастап кетті. Бір кезде жанымда тұрған ҚР еңбек сіңірген әртісі Қанатқали аға (Қожақов) «Сенің айтатын операң басталды. Шық-шық!» деп есікке қарай итермеледі. Ал мен ар жағынан біреу есікті ашып қалмасын деп аяғыммен итеріп, қолыммен жауып тұрмын. Қарасам, оркестрдегі қыз-жігіттер де жан-жағына қарап, жанарларымен мені іздеуде. Жаңғырық дауыспен сахнаға жүгіріп шыққанда, көрермендер ду етіп қол шапалақтады. Мен үшін бұл қошемет ерекше әсер қалдырды. Негізі операны орындап болған соң залда 2-3 минут тыныштық орнап, содан соң көрермендер ықыласын көрсететін. Сол кезде өнер адамы үшін залдағы көрермендердің қошеметі қымбат екенін түсіндім. Яғни, мен үшін халықтың қошемет-пейілі – ең үлкен марапат, – дейді ол.

Опера, романс, дәстүрлі әндерді орындағанда ерекше рухтанып, әсер алатын кейіпкеріміз отбасында бақытты жар, қос құлынының асқар таудай әкесі. Бақытты отбасының сыры махаббатта, сыйластық пен түсіністікте деп білетін отағасы бос уақытын отбасына арнап, перзенттерін таза ауада серуендетіп, сурет салып  үйреткенді жаны қалайды.

Гүлсезім БИЯШЕВА,

«Орал өңірі»


Жаңғырған аурухана

Күні: , 17 рет оқылды


Күрделі  жөндеуден  өткен  Теректі  аудандық  орталықтандырылған  ауруханасы   тұрғындар  игілігіне  берілді.


Бейсенбі күні өткен аурухананың ашылу салтанатына ҚР Парламенті Мәжілісінің депутаттары Зәуреш Аманжолова және Бақтияр Мәкен, сондай-ақ облыс әкімі Алтай Көлгінов  арнайы  қатысты.

Нысанның құрылыс жөндеу жұмыстары өткен жылдың шілде айында басталған болатын. 479 млн. 839 мың теңге жұмсалған жөндеу жұмыстарына қаржы облыстық бюджеттен бөлінген. Жөндеу «Кварцспецсервис» ЖШС-ның мердігерлігімен жүзеге асып отыр. 1984 жылы  бой көтерген бұл ғимарат осы күнге дейін  күрделі жөндеу  көрмеген.

– Былтыр Батыс Қазақстан облысында 19 денсаулық сақтау нысаны күрделі жөндеуден өтті. Соның бірі осы Теректі аудандық орталық ауруханасы. Өткен жыл Теректі ауданы үшін жемісті болды. Ауылдарға газ тартылып, «Ақбұлақ» бағдарламасы бойынша ауыз су барды. Жол мен жалпы орта білім беретін мектептер жөндеуден өтті. Мұның барлығы – халықтың игілігі үшін мемлекеттің жасаған қамқорлығы, сондай-ақ  Елбасының саясаты бойынша мемлекеттік бағдарламалардың жүзеге асуының нәтижесі. Жалпы, денсаулық сақтау саласында атқарылған істер көп. Соңғы екі жылда облысқа 80 жедел жәрдем көлігі сатып алынды. Маман даярлау мәселесіне де ерекше назар аударудамыз. Биыл жергілікті бюджет есебінен 24 мектеп түлегінің медициналық жоғары оқу орнындағы оқу ақысы төленуде. Олар оқу бітіріп келген соң келісімшарт бойынша дәрігерлер жетіспейтін медициналық мекемелерде қызмет ететін болады. Өткен жылы облысқа 84 жас маман келсе, оның 42-сі дәрігер болғандықтан сұраныс бойынша аудандарға жіберілді. Тұрғындардың игілігі үшін жасалатын жұмыстар мұнымен тоқталмақ емес. Болашақта Елбасы тапсырған цифрландыру саясаты бойынша ауқымды жұмыстар атқарылмақ, – деді облыс әкімі Алтай  Көлгінов.

Ауыл тұрғындарының атынан сөз алған медицина саласының ардагері Татьяна Креймер аудандық аурухананы күрделі жөндеуден өткізуге атсалысқан  азаматтарға  алғысын  айтты.

Ғимараттың сырты жылытқыштармен және қаңылтыр қаптамамен қапталған. Ондағы массаж бөлмесі, шаруашылық корпусы, емделушілерге арналған палаталар, зертханалар, неврология, хирургия, балалар хирургиясы бөліміндегі барлық жиһаздар мен медициналық құрылғылар заманауи  үлгіде  жабдықталған.

Теректі аудандық орталықтандырылған ауруханасының директоры Зейіл Мағзомовтың мәліметінше, ауруханада амбулаторлық ем қабылдауға 45, күндізгі стационарға 35 орын бөлінген.  Бүгінде аталмыш ауруханада 35 дәрігер өз қызметтеріне  кіріскен.

Аурухананың ішін  аралап, қызметкерлерімен кездескен ҚР Парламенті Мәжілісінің депутаты Зәуреш Аманжолова өзінің дәрігерлік тәжірибесімен бөлісті. Облыс әкімі Алтай Көлгінов сала мамандарының ұсыныс-пікірлерін тыңдады.

Гүлсезім  БИЯШЕВА,

«Орал  өңірі»,

Теректі ауданы

Суретті  түсірген  Айбатыр  НҰРАШ


«Өткен жылға өкпем жоқ…»

Күні: , 21 рет оқылды


Жуырда Елбасы «Қазақстанның 100 жаңа есімі» жобасының жеңімпаздарымен жүздескен еді. Бірнеше айға созылған іріктеу нәтижесінде жасампаз еңбегімен ел жұрттың алғысына бөленген сала мамандары республика бойынша үздік шыққан жүздіктің қатарына енді. Оған біздің облыстан әр саладағы үш маман іліксе, солардың бірі – ҚазИИТУ ғылыми-білім кешенінің құрылтайшысы Ақсерік Әйтімов.


Бірнеше жыл ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің облыстық департаменті жанындағы қоғамдық кеңес төрағасы, сондай-ақ облыстық мәслихаттың депутаты, «Жаңару» сыбайлас жемқорлыққа қарсы жалпыхалықтық қоғамдық қозғалысы республикалық филиалының директоры, ҚР Ұлттық инженерлік академиясы Батыс Қазақстан филиалының төрағасы, облыстық қоғамдық кеңес хатшысы, облыстық қайырымдылық қызметі бойынша үйлестіру кеңесінің төрағасы қызметтерін атқарып жүрген ол, «Қазақстанның 100 жаңа есімі» жобасында қоғам бөлімі бойынша жеңімпаз атанды. Тауық жылын сәтті аяқтаған Ақсерік Сарыұлы «Өткен жылға өкпем жоқ, келер жылдан үміт көп», – дейді.

– 2017 жылдағы басты қуанышым – «Қазақстанның 100 жаңа есімі» жобасына еніп, Елбасымен кездесу мәртебесіне ие болғаным. Осы орайда мені қолдап, дауыс берген жерлестеріме, дос-жарандарыма, әріптестеріме, студенттерге зор ризашылығымды білдіргім келеді. Егемен еліміздің білім саласын дамытуға қосқан еңбегім еленгеніне қуаныштымын. Жастарға сапалы білім беру үшін 1993 жылы ашқан шағын «Андас» оқу орталығы мен ҚазИИТУ ғылыми-білім кешені, республикалық жоғарғы технологиялар колледждері іргелі оқу орындарына айналды. Қоғамда мыңдаған адамның компьютерді үйренуден бастап, арнаулы орта, жоғары білім берудің жаңа жүйесінің қалыптасуына атсалысқаныма ризамын. Бұл оқу орын-дары заманауи материалдық-техникалық базамен толық қамтамасыз етілді. IT-технологиясы мүмкіндігі негізінде құрылған хай-тек, робототехника лабораторияларын ашып, күн энергиясын пайдаланудың гелиоэлектромобил жобасын іске асырғанымызды мақтанышпен айтар едім. Елордасында өткен «ЭКСПО – 2017» халықаралық көрмесіне ҚазИИТУ кешенінде жасалған жел энергиясынан қуат алатын құрылғыны қойдық. Сондай-ақ университет оқытушылары студенттермен бірге күн сәулесінен қуат алатын жеңіл аутокөлік те ойлап тапты. Цифрлы экономика бағытын дамытуда ҚазИИТУ ғылыми-білім кешені «Транс» ғылыми-зерттеу институтының мемлекеттік грантын ұтып алды. «ЭКСПО-ға» көрмесі аясында инженер ғалымдар қатысқан дүниежүзілік конгрессте ұйымдастырушылар құрамында болдық. Тауық жылында бізге мол мүмкіндіктер берілді. 2018 жылы да ұжымның ауызбірлігінің арқасында жетістікке жете беретінімізге сенемін. Жаңа жыл жерлестеріме жағымды жаңалықтар алып келсін деп тілеймін, – дейді Ақсерік Әйтімов.

Гүлсезім БИЯШЕВА,

«Орал өңірі»


Шырайлы шыршатой

Күні: , 9 рет оқылды


ҚР  Президентінің  балаларға  арналған  дәстүрлі  жаңажылдық  шыршасы  біздің  өңірімізде  Хадиша  Бөкеева  атындағы облыстық  қазақ   драма  театрында   өтті.


Елбасы шыршасына облысымыздың әр түкпірінен келген 9-13 жас аралығындағы ата-анасының қамқорлығынсыз қалған, табысы аз және көп балалы отбасылардың және  оқуда, шығармашылықта, спорт саласында жетістікке  жеткен  180  ұл-қызы  қатысты.

Жаңажылдық кеште ертегі кейіпкерлері болып киінген балғындар Аяз ата мен Ақшақарды асыға күтті. «Балапан» арнасындағы «Еріншектер елі» мультфильмінің кейіпкерлері Спортакус пен Стефани шырша тойын қыздыра түсті. Жәнібек пен Керей хандардың балалық шақтары туралы «Қазақ елі» ертегісі, сондай-ақ «Рухани жаңғыру» құсының ерлігі әсерлі сахналанды. Ал «Ертегілер әлемі», «Рамзамза, рамзамза, гули-гули», «Бум-бум-ла-ла-ла» биі шырша қонақтарының езуіне күлкі үйірді. Мерекелік бағдарлама сәтінде шыршаны айналып, ән салған бүлдіршіндер Елбасы Нұрсұлтан Назарбаевтың құттықтау сөзін LED экран арқылы тікелей  желіде  тыңдады.

– Қымбатты балалар! Жаңа жыл мерекесі – әр бала  асыға күтетін мерейлі мейрам. Мен өздеріңді және еліміздегі барлық балаларды жаңа жылмен шын жүректен құттықтаймын! Сендер тәуелсіз елдің бақытты ұрпағысыңдар. Біз сіздердің ақылды да алғыр, зерделі де зерек болып өскендеріңді қалаймыз! Ата-ананың үкілі үмітін ақтап, халқымыздың асқақ рухын сақтаңдар. Бүгінгі шырша тойы есте қалатын ерекше кеш болады деп сенемін. Асқақ армандарың орындалып, Тәуелсіз елімізбен бірге өсіп-өніп, көркейе беріңдер! – деді ҚР Президенті  Нұрсұлтан Назарбаев.

Балғындардың риясыз күлкісі мен жарқын  дауыстары шырша тойының шырайын  келтірді. Осы мерекеге арнайы келген облыс әкімі Алтай Көлгінов жаңа жылдық шыршаның шамын жақты. Содан соң балаларға ақжарма тілегін арнап,  Елбасының  әр балаға арналған құттықтау жеделхатын оқып берді. Жеделхатта «Айналайын! Келе жатқан 2018 жылмен шын жүректен құттықтаймын!  Жаңа жылда ұлы білім әлеміне деген сенің шынайы талабың өссін! Жастық жалынмен ой-өрісің дамып, кеңейсін! Туған халқыңмен барша адамзат игілігі үшін ғаламдық өркениеттің интеллектуалдық байлығын талмай игере  бер!»  деп  жазылған.

Содан соң балалардың назарына жыл кейіпкерлерінің, Аяз  ата мен Ақшақардың, Алдар көсе мен мыстан кемпірдің  қатысуымен  ертегі  көріністері  ұсынылды.

Облыстық білім басқармасының берген мәліметіне сүйенсек, бұл шыршатойын өткізуге облысымыз бойынша 17 миллион теңгеге жуық қаражат жұмсалған. ҚР Президенті атынан жаңажылдық шыршаға қатысқан әр өренге құны 86 мың 100 теңге тұратын сыйлық берілді. Оның ішінде қысқы бас киім, сырт киім, аяқ  киім, спорттық костюм, спорттық аяқ киім, жемпір, шалбар, күзгі күрте  және  күлше-кәмпит секілді  тәтті-мәтті  бар.

Гүлсезім  БИЯШЕВА,

«Орал  өңірі»


«Рухани жаңғыру» музейі ашылды

Күні: , 15 рет оқылды


Ел егемендігінің 26 жылдығына орай Орал қаласында «Рухани жаңғыру»  музейінің тұсауы кесілді.


Ұлттық құндылықтарды ұлықтайтын музей Елбасы Нұрсұлтан Назарбаевтың «Болашаққа бағдар: рухани жаңғыру» бағдарламалық мақаласы аясында облыс әкімдігінің ұйытқы болуымен, облыстық тарихи-өлкетану музейінің ұйымдастыруымен ашылды.

«Рухани жаңғыру» музейінің бірінші залы «Батыс Қазастан облысының киелі жерлері» деп аталады. Мұнда интерактивті картаның көмегімен Қазақстанның киелі жерлерінің тізіміне енген өңіріміздегі алты нысанмен танысуға болады. Келесі бөлім ұлттық баспасөз тарихынан сыр шертеді. Үшінші экспозициялық залда өткен ғасырдағы азаттық үшін күрескен қайраткерлердің өмірі туралы мәліметтер жинақталған. Ал «Жаңарған өлке» атты төртінші залда еліміздің бас қаласы Астана мен Орал шаһарының бүгінгі жетістіктері туралы баяндалады. «Рухани жаңғыру» музейінің ашылу салтанатына облыс әкімі Алтай Көлгінов, ақын Ақұштап Бақтыгереева, өлкетанушы Жайсаң Ақбай, сондай-ақ өзге де танымал тұлғалар қатысты.

– Ақ Жайық атырабында бірнеше тарихи оқиғалар орын алғаны белгілі. Бүгін ата-бабаларымыздың ерлігінің, даналығының арқасында тәу етер тәуелсіздігіміздің 26 жылдығын тойлап отырмыз. Жыл өткен сайын еліміз көркейіп, дамып келеді. «Нұрлы жер» бағдарламасы бойынша биылдың өзінде облысымызда 1700 отбасы баспаналы болды, 500 шақырым жол жөнделді, 55 елді мекенге таза ауыз су, 35 елді мекенге көгілдір отын берілді. Шағын және орта бизнес дамуда. Елбасының «Болашаққа бағдар: рухани жаңғыру» бағдарламалық мақаласы аясында Қазақстанның киелі жерлері бекітілді. «Рухани жаңғыру» музейінің ашылуына «Kaz Construction Group» компаниясының бас директоры Мұратбек Мұхамбедиев қолдау көрсетті. Бұл ғимарат 1893 жылы салынған. Ескі ғимаратты қайта қалпына келтіріп, рухани ордаға айналуына қолұшын созған азаматқа алғысым зор. Бүгінгі қасиетті мереке – Тәуелсіздік күнімен баршаңызды құттықтаймын! Тәуелсіздігіміздің тұғыры берік болсын, – деді облыс әкімі құттықтау сөзінде.

«Рухани жаңғыру» музейінің ашылу салтанатында халықаралық «Алаш» сыйлығының иегері, ақын Ақұштап Бақтыгереева және өңірімізге танымал өлкетанушы Жайсаң Ақбай лента қию рәсімін жасады.

 Гүлсезім БИЯШЕВА,

«Орал өңірі»


Допты хоккей додасы басталды

Күні: , 12 рет оқылды


Кеше  шаһардағы мұз айдыны спорт сарайында допты хоккейден  республикалық  IV қысқы спартакиадасы  бастау алды.


 ҚР Тәуелсіздік күніне арналған спорттық жарыстың ашылу салтанатына облыс әкімінің орынбасары  Ғабидолла Оспанқұлов, ҚР Ұлттық штаттық командалар және спорт резерві дирекциясы директорының орынбасары  Еркеғали  Карбозов, сондай-ақ допты хоккейден ҚР мемлекеттік жаттықтырушысы Оралбай Жақсымбетов пен облыстық дене шынықтыру және спорт басқармасының басшысы Әсия Аманбаева қатысты.

Сайыстың ашылу салтанатында сөз алған облыс әкімінің орынбасары Ғабидолла Оспанқұлов спортсүйер қауымды Тәуелсіздік мерекесімен құттықтады.

– Елбасы Нұрсұлтан Әбішұлының қолдауымен елімізде спорт саласы қарқынды дамып келеді. Спортпен шұғылданып, салауатты өмір салтын қалыптастырамын деген жандарға барлық жағдай жасалған. Соның арқасында спортшыларымыз әлемдік додаларда топ жарып, абыроймен оралып жүр. Солардың ішінде батысқазақстандық спортшылардың да үлесі зор. Ал  қысқы ойын түрлерінен допты хоккейден республика бойынша “Ақжайық” командасы зор жетістіктерге қол жеткізіп келеді. Бұл турнирдің Тәуелсіздік күні қарсаңында өтуі көңілге қуаныш ұялатады. Баршаңызды Тәуелсіздік мейрамымен құттықтаймын! – деді облыс әкімінің орынбасары Ғабидолла Оспанқұлов.

Содан соң ҚР Ұлттық штаттық командалар және спорт резерві дирекциясы директорының орынбасары Еркеғали Дәулетханұлы жиналған қауымды республикалық IV қысқы спартакиадасының ашылуымен  құттықтап, спортшыларға  сәттілік тіледі.

Жарыста республиканың түкпір-түкпірінен келген сегіз команда бақ сынауда.

Гүлсезім БИЯШЕВА,

«Орал өңірі»


«Smart Uralsk» шақырады

Күні: , 28 рет оқылды

Оралдағы Шаған жағалауы көшесінің бойындағы №84 мекенжайында халыққа қызмет көрсететін «Smart Uralsk» орталығы ашылды.


Аталмыш орталықтың мақсаты – Елбасы Нұрсұлтан Назарбаевтың цифрландыру туралы тапсырмасы аясында азаматтарға мемлекет тарапынан көрсетілетін қызметтер сапасын арттыру. «Smart Uralsk» орталығының қызметіне күніне кемі 300 адам жүгінуде. Орталық жариялылық және жемқорлықтың алдын алу мақсатында жұмыс жасайды. Қызмет көрсету орталығына жүгінген тұрғындар қажетті көмекті 15-20 минут аралығында алмақ. Электронды кезек жүйесі іске қосылған. Смарт орталықта тұрғындарға көрсетілетін қызмет түрлері де көбейген. Айта кетсек, бұрын халыққа қызмет көрсету орталығында 618 қызмет түрі көрсетілсе, бұл орталықта олардың саны 641-ге жеткен.

Қала әкімі Мұрат Мұқаев «Орал – смарт қала» жобасын таныстырғанда ПИК-тердің жұмысы цифрлана бастағанын және қала мектептерінің барлығына бейнебақылау камералардың орнатылғанын атап өтті. Шаһардағы аулалардың бейнебақылау камерасымен қамтылуына орай қылмыстың ашылу деңгейі артқан. Келесі жылы «Орал – смарт қала» жобасы аясында қаланың барлық аудандарына Wi-fi қондырғысы орнатылып, барлық коммуналдық қызмет ақысын бір жерден немесе ғаламтор арқылы тез әрі ыңғайлы төлеуге жағдай жасалмақ.

Сонымен қоса әр кіреберіске (подъезд) және аулаға бұлтты бейнебақылау камералары орнатылып, барлық маршруттар GPS қондырғымен қамтылмақ.

– Елбасының тапсырмасына орай, цифрландыру, яғни «Бір терезе» қағидасы бойынша ашылып отырған «Smart Uralsk» орталығы халыққа қызмет көрсетудің сапасын жетілдіруді көздейді. Мұнда қарапайым халық пен кәсіпкерлерге қызмет көрсететін «Атамекен» Ұлттық кәсіпкерлер палатасы, «Қазақинвест» ҰК, жергілікті атқарушы құрылымдар мен басқа да салалардың өкілдері отырады. Сондай-ақ, құқықтық қызмет көрсетудің де қолжетімді әрі жедел болуын қамтамасыз ету үшін прокуратура қызметкерлері де көмек көрсетеді. Бір ғана мысал айта кетейін, бұрын кәсіпкер жер теліміне рұқсат қағазын алу үшін 14 мекемеге барып, әрқайсысына бес күн жұмсайтын болса, алдағы жылдан бастап осы қызметтердің бәрін электронды түрде бес-ақ күннің ішінде ала алады.

Яғни, қызмет көрсету мерзімі 14 есе қысқармақ, – деді орталықтың ашылу салтанатында сөз алған облыс әкімі Алтай Көлгінов.

Осы жиында «Атамекен» Ұлттық кәсіпкерлер палатасы басқарма төрағасының орынбасары Олжас Қаржауов, облыс прокуроры Сапарбек Нұрпейісов құттықтау сөз сөйлеп, орталықтың жұмысына сәттілік тіледі.

Гүлсезім БИЯШЕВА,

«Орал өңірі»


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика