Тег: ‘Гүлбаршын ӘЖІГЕРЕЕВА’


Цифрлық индустрияны дамытудың жаңа мүмкіндіктері

Күні: , 22 рет оқылды

Бейсенбіде  Орал  қаласындағы «ҚПО б. в.» компаниясының  бас  кеңсесінде  цифрландыру мәселелері  бойынша  форум  өтті. Оның жұмысына Қазақстан Республикасы Премьер-министрінің орынбасары Асқар Жұмағалиев,  облыс әкімі Алтай Көлгінов, «ҚПО б. в.» компаниясының бас директоры Эдвин Блом қатысты.

Басқосуда Қазақстан Республикасы Премьер-министрінің орынбасары Асқар Жұмағалиев  Елбасының қолдауымен елімізде жүзеге асырылып жатқан «Цифрлық Қазақстан» бағдарламасының тиімділігіне тоқталды. Оның айтуынша, цифрландыру арқылы мемлекеттік құрылымдарда халыққа көрсетілетін қызметтердің, шағын және орта кәсіпкерлікке жататын кәсіпорындардың жұмыстарының тиімділігін арттыру көзделген.  «Жаңа технологияларды енгізу арқылы мемлекеттік қызмет көрсетуді оңтайландырып, жұмсалатын уақытты қысқартып, жеке және заңды тұлғалардың мемлекеттік қызмет алу барысындағы шығынын азайтуымыз керек.  Кеше өңірдің бірқатар цифрландыру жобаларымен танысқанымызда, мемлекеттік қызмет көрсетуді оңтайландыратын жобалар көңілден шықты. Бұл мәселеге Елбасы үлкен мән-маңыз беріп отыр. Елбасы мемлекеттік қызмет көрсетуді 2019 жылы 80%-ға, 2020 жылға қарай 90%-ға  цифрландыруды тапсырды. Біз бұл тапсырманы орындаймыз», – деді Асқар Жұмағалиев. Оның айтуынша, БҚО-да ауыл шаруашылығы саласын цифрландыру жұмыстары жүруде, бірқатар цифрлық технологиялармен жұмыс істейтін шаруашылықтар, кәсіпорындар бар. «Жоспар бойынша 2022 жылға дейін ауыл шаруашылығы саласының 100-ден астам кәсіпорын-шаруашылығы цифрлық технологияларға көшулері тиіс. Облыс әкімдігі және агроөнеркәсіп кешені бұл тұрғыдан сенім үдесінен шығады деп есептеймін. Үкімет барлық бастамаларға мейлінше қолдау көрсетеді. Өндірісшілермен сөйлескенімізде, цифрландыруға көшуде адамдар мен инфрақұрылымдарға қатысты түйткілдерге «сүрінетінін»  естідік», – деген А. Жұмағалиев өңірдегі цифрландыруға қатысты нұсқау-тапсырмаларын берді.

Форумда сөз алған облыс әкімі Алтай Көлгінов «Цифрлық Қазақстан» бағдарламасы бойынша жүзеге асырылып жатқан жұмыс-жобалар жайында әңгімеледі. Ақ Жайық өңірінде экономиканың басты салаларында цифрландыру бойынша 40-тан астам жоба жүзеге асырылуда. БҚО денсаулық сақтау саласы қанатқақты жобаны қарқынды жүзеге асыруда. Бүгінде Орал қаласы мен барлық аудан орталықтары 100% ақпараттық жүйемен қамтылған және 121 есеп беру формасының 106-сы қағазсыз, электрондық түрде жүргізіледі. Қала тұрғындарының электронды денсаулық паспорттары жасақталған, сондықтан дәрігер бұрынғыдай қағаз жазып отырмайды, алтын уақытын «басы ауырып, балтыры сыздап» келген адамға бөледі. Соның арқасында дәрігердің науқастарды қабылдайтын 15 минуты жарты сағатқа ұзарды. Жедел медициналық жәрдем бригадалары планшеттермен және GPS бағыттаушылармен қамтамасыз етілген, басқару жүйесінің аутоматтандырылуы арқасында «Жедел жәрдемнің» шақырту бойынша келуі 12 минуттан 9 минутқа дейін, яғни 3 минутқа қысқарған. Сонымен қатар барлық емханаларда электронды кезекті басқару жүйесін енгізу ем-дом алуға келген тұрғындардың ағынын реттеп, дәрігерге кезекпен кіру уақытын жарты сағаттан 15 минутқа  дейін  азайтты.

Білім беру саласындағы балабақшаға кезекке тұру және балабақшаға қабылдау үрдістері аутоматтандырылып, бұл жүйе адам қатысынсыз, ашық өтетін болды және тұрғындарға қолайлы жағдай туғызды. Облыстағы мектептердің  58,6%-ы – интернеттен қағыс қалған  шалғайдағы шағын комплектілі мектептер, биылғы қыркүйек айында 225 шағын мектеп 100%-ға Bilimbook компьютер-трансформерлермен қамтылды.

Облыс әкімі ВІМ технологиясын қолданысқа енгізу жұмыстары жайына тоқтала келе, жаңа кардиологиялық орталықтың құрылысы 3Д жобалау бойынша жобаланып, салынатынын айтты. Сондай-ақ тұрғындарға қолайлы болу үшін «Қолжетімді әкімдік» жобасы «жандандырылды». – «Жер телімін алу актісін үйлестіру»  қызметін аутоматтандыру жобасы жер алушылардың мемлекеттік құрылымдардың рұқсатын алуға жұмсайтын уақыты 2-3 айдан 5-12 күнге дейін қысқарды.  «Zem.kz» порталында жер телімдерін жалға алу құқығын сату аукциондары электронды түрде өткізілуде. Мұның өзі тұрғындарға мемлекеттік құрылымдарға бармай-ақ, онлайн режімінде саудаға қатысу мүмкіндігін береді. Жер қатынастары саласында конкурс, аукциондарды өткізу үшін әлемдегі ең ірі «Bitfury и Dasco Consulting» блокчейн компаниясымен блокчейн технологияларын енгізу жобасы іске қосылмақ. Грузиядағы жер қатынастары саласындағы блокчейн технологиясын енгізу тәжірибесі жерге қатысты құқық ақпараттарының қорғалу деңгейін арттыруға, аудитті жеңілдетуге, қашықтан құжаттарды рәсімдеуге көмектесті, — деді облыс әкімі.

Оның айтуынша, 2019 жылдың қаңтарынан бастап облыстың геоақпараттық порталы жұмыс істейді. Ондағы ғарыштан түсірілген түсірілімдер жер телімдерін өз бетімен пайдалану, жерді мақсатсыз пайдалану, егіс алқаптарының жағдайы, егін шығымдылығын болжау, жер пайдаланушылардың шекараларды бұзу фактілерін анықтауға септігін тигізеді.

Сонымен қатар тұрғын үй-коммуналдық шаруашылығы саласында IoT желісін құру жұмыстары 2016 жылы басталып, бүгінде Орал қаласы LP-WAN базалық стансамен толықтай қамтылып отыр. Соның арқасында жылу, жарық, су есептеу құралдарының көрсеткіштері қашықтықтан бақыланады. Қала әкімдігі мен тұрғындар арасындағы байланысты нығайту мақсатында алдағы қаңтар айынан бастап қаланың (109) коммуналдық-апаттық қызметінің call-орталығы жұмыс істемек. Бір орталыққа қоңырау шалу арқылы тұрғындардан түскен арыз-шағымдармен жұмыс істеу қызметінің сапасы жақсарып, қызмет  жеделдігі  артады.

– Әлемде орын алып жатқан пайдалы жаңа өзгерістерден қалмау үшін, барлығымыз жұмыс тәсілдерімізді, басқару құралдарымызды жаңғыртып, жағымды өзгерістерге жол беруіміз керек.  «Digital Aqjaiyq» аясында енгізілетін жаңа технологиялар мен шешімдер – өңіріміздің барлық саласына едәуір серпін беретіні сөзсіз, — деді Алтай Көлгінов.

«Бүгінгі кездесу Қазақстан Республикасындағы цифрлық технологияларды жасақтау және бизнес процестерді аутоматтандыру салаларындағы жергілікті және халықаралық компанияларға қазақстандық мазмұнды дамытуға жаңа серпін береді», – деді форумға қатысушыларға «ҚПО б. в.» компаниясының бас директоры Эдвин Блом.

Форум барысында «ҚПО»-ның жоғары оқу орындарының студенттерін қолдау, әсіресе, олардың технологиялық жобаларды жасақтау дағдыларын қалыптастыруға жағдай туғызуды көздейтін, әріптестікті нығайту жөніндегі меморандум қабылданды. Оған ҚР Білім және ғылым министрлігі, БҚО әкімдігі, «KazEnergy» ассоциациясы, «ҚПО б. в.» компаниясы  қол  қойды.

Цифрландыру форумында «KazEnergy» ассоциациясының мұнайгаз және энергетика салаларын дамыту жөніндегі атқарушы директор Рүстем Қабжанов,  «Азаматтарға арналған үкімет» мемлекеттік корпорациясы» коммерциялық емес акционерлік қоғамының басқарма төрағасы Абылай Оспанов,  «ҚПО»-ны цифрландырудың жол картасы» туралы «ҚПО» жобасын дамыту директоры Пьерлуиджи Амено,  «ҚПО» жобасының өзара әрекеттестік және интеграциясы менеджері Мауро Мартуфи және өзгелері сөз қозғады.  Форумға қатысушылар облыс әкімдігінің және «ҚПО»-ның сессияларына қатысып, цифрлық жобаларды өндіріске енгізу, ІТ қауымдастығын және цифрлық индустрияны  дамыту мүмкіндіктері  жайында  пікір  алмасты.

Гүлбаршын   ӘЖІГЕРЕЕВА,

«Орал   өңірі»


1 теңге ұсақ бақыр болғанымен, ол – ұлттық валютамыз!

Күні: , 50 рет оқылды

… Кеңестер заманында Оңтүстік Қазақстан облысынан Алматыға оқуға келген жастарынан өзбек акаларымның қазақтың «құрысыншы» деген сөзінен байыдым дейтін мысалын талай рет естігенбіз. Ой жіберіп қарасаңыз, расында солай. Сөйтсек, Өзбекстан астанасы Ташкенттегі көп қабатты ірі сауда орындарының бірінде сіріңке жоғары қабатта сатылады екен. Ал өзағаңдар оны сатып алып, сол сауда орнының есік алдында отырып, бір тиын тұратын сіріңкені екі тиынға, яғни бағасына баға үстеп сатып, пайда табатын көрінеді. Сіріңке үшін жоғары қабатқа көтерілуге ерінген біздің ағайындар «Құрысыншы, бір тиынға бола жүрем бе?» деп қолдарын бір-ақ сілтеп, бір тиын тұратын затты екі тиынға ала салады екен.  Сол ғадеттен әлі арыла алмай жүргеніміз жоқ па осы?!

Әрине, бүгінгі заман басқа, еліміз тәуелсіздік алып, мемлекетіміздің өз ақшасы, төл теңгеміз айналымға шыққанына биыл 25 жыл толып отыр.  Бірақ қазіргі уақытта да бір теңгеге көзқарас сол салғырттық, немкетті күйде қалғандай көрінеді. Күнделікті тірлікте «Ақша тиыннан құралады» деп сайрағанымызбен, көзге ұсақ көрінетін тиын-тебенді үнемдеп, ұқыптап ұстауға мойнымыз жар бермейтіні шындық. Бірақ айналаңыздағы толған сауда орындарынан бір тиыныңыз жетпей жатса, алайын деп тұрған тауарыңызды кейбір сатушының қолыңызға ұстата салуы неғайбыл.

Өйткені «ақша тиыннан құралатынын» басқа білмесе де, сауда айналасындағылар жақсы біледі. Осыны ескерген ҚР Ұлттық банкі жақында мерейтойлық «Теңгеге 25 жыл» деген номиналы 5000 және 500 теңгелік күмістен және номиналы 100 теңгелік мельхиор қоспасынан жасалған мәнеттерді айналымға шығарды. Бірінің салмағы 1 келі, екінші түрінің салмағы 62,2 грамм болатын  коллекциялық күміс мәнеттер небары 200 және 1000 данамен шығарылып, жылдам сатылып кеткен. Аз таралым-мен шығарылатын мәнеттерге коллекция жасаушылардың, яғни нумизматтардың құштарлығы сондай күшті, сондықтан ондай мәнеттер ән сағатта өтіп кетеді. Банк мамандарының айтуынша, мәнеттердің  дизайны да көп жағдайда олардың өтімділігін арттыруда рөл атқарады.

Теңгенің мерейтойына арналып шығарылған мерейтойлық мәнеттер номиналы ең төмен  1 теңгеге арналған. Еліміздің басты белгілерінің бірі болғанымен, бұл  1 теңгені көпшілік бағалай бермейді, бала екеш балаға дейін оны ақша деп менсінбей, сәлсінетінін қайтерсіз. «Бір тиын туралы бір түйін» деген өлеңінде жерлес ақын Айбатыр Сейтақ замандасымыз жерден бір тиынды көтеріп алған жігітіне ренжіген қызына:

– Қалқам, бұдан тудырмағын кері ұғым,

Бұл бақырдан неге сонша жерідің?

Баю үшін алған жоқпын мен оны, Көтердім мен Отанымның Гербін! – деп бір тиынның мемлекеттік маңызын көрсетуші еді.

Шын мәнісінде қомақты ақшаның өзі осы бір теңгеден басталатыны көп жағдайда ескеріле бермейді. Жаңадан шыққан коллекциялық күміс мәнеттердің бет жағындағы (аверсінде) жылтыр бетінде 1997 жылғы үлгідегі номиналы 1 теңгелік мәнеттің алтындатылған бейнесі жарқырайды. Ал сырт жағында (реверсінде) 1993 жылғы үлгідегі қазақстандық мәнеттердің аясында номиналы 1 теңгелік банкнот бейнеленген. Осылайша Ұлттық банк 1 теңгенің ақша айналымындағы мән-маңызына тереңірек үңілткендей болды. Бұл, әрине, қуанышты жағдай.

Банк мамандарының айтуынша, 1997 жылы алғаш шығарылған 1 теңге бүгінде ең қымбат мәнетке айналған. Өте жақсы сақталған сол теңгені бүгінде коллекция жасаушылар 1-2 мың теңгеге сатып алады. Жалпы, қазақ-стандық дизайнерлердің шебер қолынан шыққан коллекциялық мәнеттер әлемдік нарықта үлкен сұранысқа ие. Тек мәнеттердің ғана емес, сонымен қатар теңге банкнотасының дизайны айрықша көркем. Содан да теңге банкнотасы үш мәрте 2011, 2012 және 2013 жылдары дүниежүзіндегі ең  үздік қағаз ақша ретінде танылды. Әлемнің ақша жасау технологиясының соны жетістіктері бойынша жасалған теңгенің  16 құпия қорғаныс белгісі бар. Сондықтан америкалықтар теңгенің технологиясына сүйене отырып, доллардың қауіпсіздігі шараларын күшейткен деседі. Сондай-ақ теңге әлемдегі жалғыз екі тілді валюта саналады.

Қалай болғанда да, еліміздің төл теңгесі тәуелсіздігіміздің символы, ұлттық экономиканың темірқазығы, өзге елге «жем» болмаудың, байлығымызды сақтаудың басты құралы екені сөзсіз. Сондықтан теңге, ұлттық валюта күні  –  еліміздегі барша халықтың ортақ мерекесі. Әрі бүгін – қаржыгерлердің төл мерекесі. Мереке құтты  болсын!

Гүлбаршын   ӘЖІГЕРЕЕВА


«Мұсылман марқұмды пәктеу де – сауап»

Күні: , 218 рет оқылды

… Бірер жыл  турасында  ауылдағы  жамағайын  апайымыз  қайтыс  болып, сүйекті  жуатын ақ  жаулықты  табылмады. Марқұмның  ет  жақын туыстары  өзі  сүйретіліп  әрең  жүрген  кейуананы білгеніңізді  айтып  тұрсаңыз  болды  деп,  екі-үш жас келінмен  бірге  ішке  кіргізді.  Бұл тек  бір ауылға тән  жағдай емес, өткенде  Сырым  ауданындағы оқырмандармен  кездесуде  де  осы  мәселе  көтерілді. Бір  ауылда  сүйекті  жууға  кіретін  жалғыз  қартаң  әйел  қалыпты. «Қара  жерге  жылан  кірсін»  демекші, бірақ  ертең  сол  кісі  олай-бұлай  болып  кетсе,  басқасын айтпағанда  ол  кісіге кім  кіреді?  Жасы-жасамысы бар  нәзік  жандылар  түрлі  себептерді  алға  тартып, қайтыс  болған  кісіні  арулау рәсімдерінен  ат-тондарын  ала  қашатын  бопты. Сонда  бара-бара  не  боламыз, неге  бұлай деген  сұрақтар,  жалпы жаназаны дұрыс  атқару  жөнінде  ҚМДБ-ның  БҚО  бойынша өкіл  имамы Еркебұлан  Қарақұловпен  әңгімелестік.

Өкіл имамның айтуынша, имандылық, теологиялық немесе  шариғат қағидалары тұрғысынан бақилық болған кісіні жуындырып, пәктеп, жаназасын шығарып, содан кейін жер қойнына тапсыру – иісі мұсылманның қастерлі міндеті.

– Пайғамбарымыз (оған Алланың салауаты мен сәлемі болсын) бірнеше істерге, яғни мұсылман бауырыңның қал-жағдайын сұрауға, сонымен қатар жаназаға асығыңдар деген. Сүйекке марқұмның ет жақын туыстары, жанашырлары, жақын-жұрағаты кіреді. Қазақ халқы ежелден  осыны ұстанған, шариғатымыз да, асыл дініміз де мұны құптайды. Әрине, ешкімге сен кіресің деп міндеттей алмаймыз. Ер адамға ерлер, әйелдерге әйел заты кіру керек. Ал егер де марқұмның жақын туысы болмай жатса, жуындыруды білетін бір мұсылман адам кірсе, жарап жатыр. Кейде мәйітті жуындыруға топырлатып 5-6 адам кіргізеді. Алайда олар сүйекті көтеруге көмектеспесе, жуындыруға 2-3 адам жеткілікті. Сүйекке кіруге жаназаға келгендердің көпшілігі сасқалақтап, суырылып шыға қоймайды.  «Әлі өлгім келмейді», «сүйекке кірсем, ажалды асықтырып жіберемін» деп ырымдап, бас тартатындар бар. Әсілі, мұндай сауапты істен сырт қалуға болмайды. Біз – мұсылманбыз, өзекті жанға өлім хақ, өлімнен ешкім қашып құтылмақ емес. Ол – ақиқат. Ешбір пенде өзінің қашан және қай жерде қайтыс болатынын біле алмайды. Сондықтан халық бұл – менің дінім, болмысым, дәстүрім деп қабылдап, қалыптасқан әлгіндей психологиялық кедергіні бұзу керек. Сүйекті жууға қатысу арқылы сауапқа ие болуға ұмтылған жөн.   Яғни, мұсылман марқұмды пәктеу де – сауап.

Ата-бабамыздың жолымен Әбу Ханифа мәзһабын ұстанып келе жатқан халықтың ұрпағымыз. Садақа-жиындарды өткізгенде Құран оқытамыз.  Ендеше, түбіміз – мұсылман, яғни ислам діні бізге өгей емес, сол себепті өгейлік қарым-қатынасты тоқтатуымыз керек. Сонда ғана психологиялық кедергілерден өте аламыз. Кей жағдайларда дененің бір жерде ұзақ уақыт жатып қалуына, жол апатынан ауыр жарақат алып, дене мүшелері түгел болмаған жағдайда, түсіністікпен қарауға болады. Ондайда психологиялық тұрғыдан мықты адамдар ғана кіреді немесе үлкен қалаларда марқұмды жуындыруға адамдарды жалдауға болады, – деді өкіл имам.

Жаназа   намазына   ерлер   тұрады

Жаназа және жерлеу рәсімдері жөнінде Қазақстан мұсылмандары діни басқармасының бастамасымен жарық көрген «Жаназа және жерлеу рәсімдері» атты кітабында жан-жақты айтылған. Өңірімізде өкіл имамның бастамасымен, ардагерлер кеңестерінің қолдауымен бірнеше ауданда жаназа пәтуасын ысырапсыз, шариғатқа сай өткізу қолға алынды.  Сондықтан молдаға жаназаны шариғат тұрғысынан өткізуге қолдау көрсету – әрқайсымыздың парызымыз.

«Жаназаға 200-300 адам келеді, соның 7-8-і ғана жаназа намазына шығады, өзгелері митингке келгендей қарап тұрады. Жаназаның негізгі мағынасы төбеңізді көрсетіп, көңіл айту, маңыздысы, қайтыс болған кісіге сауап мол болсын, сұрағы жеңіл болсын деп дәрет алып, жаназа намазына тұру. Әйелдер жаназа намазына тұрмайды, тек төбе көрсетіп, көңіл айтады. Сондықтан ер-азаматтар жаназаға келгенде үйден дәрет алып, жаназа намазына тұрамын деп келу керек. Пайғамбарымыз  40 адам жаназаға тұрса, марқұмның күнәсі кешіріледі деген. Барлығы шетінен Құран оқысын, намазға жығылсын, діндар болсын демейміз. Жаназаға ғана осындай қарым-қатынасқа ие болсақ, сонда ғана сүйекке кіру мәселесіндегі түйткілді тарқатамыз», – деп түсіндірді  облыстың  бас  имамы.

Шеге  қағу  шариғатта   жоқ

Өкіл имамның айтуынша, алдымен қайтыс болған адамның барлық киімін шешіп, оң бүйіріне жатқызып, жүзін құбылаға қаратып, ақ матамен жауып қояды. Қайтыс болған адамның жинақы жатуына байланысты атқарылатын амалдарды білгеннің зияны жоқ. Мысалға, марқұмның аяқтарының үлкен башпайларын жіппен байлау, білектерін және жағын байлау. Бұл медициналық тұрғыдан құпталады, өйткені өлі дене жайылып кетпейді.  Ал марқұмның «мойны қатпай кетті» деп шеге  қағу – шариғатта  жоқ  нәрсе.

«Әдетте садақаларда сөйлеушілер «Өмір бар жерде өлім бар» деп мойындай отырып, «мұндай жағдай орын алмасын» немесе «жаман жағдай болмасын» деп Алланың әміріне қарсы келіп жатады, оның орнына «Қайғыңызға ортақпыз, Алла сабыр берсін» деген жөн. Кейде мәйітті есіктен басымен немесе аяғымен шығару керек деп дауласады. Қалай ыңғайы келеді, солай шығарасыз», – деді   Еркебұлан Ибрайымұлы.

Бас имамның айтуынша, жаназа оқыған имам-молдаларға ақы берілмейді. Ал үй иесінің садақа деп ниет етіп атағаны болса, алуға рұқсат етіледі. Қабір қазу физикалық күшті талап етеді, олардың қызмет ақысы төленуі керек. Қабір қазушы еңбекақысын сұрап жатса, ол күнә емес. Сүйекке кіргендерге көбінесе қайтыс болған адамның заттары таратылады. Марқұмның киім-кешегін таратқанда, оны жаман ырымға балап алмау әбестік саналады. Ал сүйекті жууға пайдаланған шелек, бақырашты кейін тұрмыста пайдалануға болады.

Қабір қандай тереңдікте қазылуы тиіс деген сұрақ та көпшілікті мазалайды.  «Қабір жер қыртысының жағдайына қарай қазылады. Егер тік түсірілетін болса, онда тақтайлар қабірдің бетіне жабылады. Сондай-ақ топырағы құлап кетпейтіндей етіп жанама қазуға болады. Қабірдің тереңдігі денені көтеріп, отырған деңгейде болуы керек. Бастысы, оның терең не кеңдігінде емес, бөлек үй іспеттес болуында», – деді өкіл имам.

«Шариғат бойынша марқұмның жаназасы үшін жетісін, қырқын, жүзін, бір жылдығын беру талап етілмейді. Бұл –  біздің ата-бабаларымыздан жалғасып келе жатқан әдет-ғұрпымыздың көрінісі.

Ағайынның басын қосып, садақа дастарқанын жаю сауапты іс болмақ. Ең бастысы, онда ысырапшылдыққа жол бермеу керек. Имамға, молдаға көбірек уақыт беріліп, сол жерде уағыз айтылса дейміз», – деді  өкіл имам Еркебұлан  Қарақұлов.

Гүлбаршын   ӘЖІГЕРЕЕВА,

«Орал   өңірі»


«Кублей» Қытайға ет шығарады

Күні: , 65 рет оқылды

ҚР Сыртқы сауда палатасы баспасөз қызметінің хабарлауынша, батысқазақстандық «Кублей» ЖШС  Қытайға ет экспорттайтын болды.

Шанхайда импорт тауарлар мен қызмет түрлерінің «China International Import Expo» халықаралық көрмесі өтуде. Оған 130 мемлекеттен 2800 компания қатысып, өз өнімдерін ұсынып отыр. Көрмеге Қазақстаннан 302 компания қатысып, өндіріс, ауыл шаруашылығы, машина жасау, туризм және тағы басқа салалар бойынша тауарлар мен қызметтерін жарнамалауда.

Аталмыш халықаралық көрме аясында қазақстандық «Кублей» ЖШС мен «Karamay Yuguanfu Foreign Trade Co Ltd» (Қытай) арасында Қытайға 20 мың тонна сиыр мен қой етін экспорттау бойынша келісімшартқа қол қойылды. Мамандардың айтуынша, бұл серіктестіктің Қытайға ет шығару жөніндегі алғашқы келісімі.

Гүлбаршын   ӘЖІГЕРЕЕВА,

«Орал   өңірі»


Ангусты Дакотадан тасымай-ақ, Ақтөбеден «жалға» әкелуде

Күні: , 131 рет оқылды

Ақ Жайық өңірінде мыңғыртып  мал өсіруге барлық жағдай жасалған. Соңғы уақытта экологиялық тұрғыдан таза өнім саналатын етті сыртқа шығаруға мүмкіндік беретін бұрынғы «жабық» қақпалар ашылып жатыр. Енді ауыл-аудандағылар қарапайым сиырды емес, асыл тұқымды мал өсіруге ниетті. Биылғы тамыз айынан бастап көршілес Ақтөбе облысынан өңірімізге ангус тұқымды мал әкеліне бастады.

Көршілес облыстағы ет кластерінің бір тізбегі «АқТеп» ЖШС-мен облыс шаруашылықтарының арасындағы экономикалық байланыс, алысберіс нығая түсті. Бөрлі, Қаратөбе, Жаңақала, Сырым, Шыңғырлау аудандарының шаруашылықтары аталмыш серіктестіктен асыл тұқымды ангус сиырларын «жалға алып» өсіруде. Тез салмақ қосатын, еті мәрмәр болатын 2128 баспақ, соның ішінде 1999-ы аналық, 129-ы аталық мал әкелінген. Аудандардың ішінен ең көп мал алған – Бөрлі ауданы. Бұл аудандағы 6 шаруашылық 800 аналық, 48  бұқа  әкеліп, баптауда.

Облыстық ауыл шаруашылығы басқармасы басшысының орынбасары Сатқан Өмірзақовтың айтуынша, «АқТеп» өзінің «Ірі қараны жалға беру» ішкі бағдарламасы бойынша асыл мал өсіргісі келетін шаруашылыққа 100 аналықты және 6 бұқаны жеті жылға жалға береді. Оның үстіне серіктестік бұқаны екі жыл сайын жаңасына  ауыстырып  тұрады.

– Шаруагер жалға алған малды кері «АқТеп»-ке 7 жылда 100 қа-шар, 200 бұқашық етіп қайтаруы тиіс. Әрі ірі қараны төлі есебінен екінші жыл дегенде кері қайтаруды бастайды. АҚШ-тың Солтүстік Дакота штатынан ангус тұқымды 100 аналық алатын болсаңыз, оның әр басы сертификатымен  850 мың теңгеге шығады. Ал 100 бас 85 миллион теңге тұрады. Әрине, «АқТеп»-тің талабы қатаң, олай болмаса тағы болмайды. Бірақ серіктестіктің бағдарламасының арқасында Бөрлі ауданына 1 млрд. теңге тұратын асыл мал келді. Алдымен серіктестіктегілер мал алғысы келетін шаруагермен сөйлесіп, ол туралы ел-жұртпен пікірлеседі. Көшедегі көлденең көк аттыға асыл малды ұстата салмайтыны айдан анық. Малды жалға берушінің талаптары бойынша мал өсірушінің кемінде әр басқа 20 гектардан жайылым жері, жем-шөп дайындайтын базасы, техникасы сайма-сай болуы тиіс. Ангус тұқымды малға суды емін-еркін жүріп ішетіндей жағдай жасалуы керек. Бұл малға қысқы суықта қораның қажеті жоқ, ықтасын болса, жарап жатыр. Өйткені Солтүстік Дакота мен өңіріміздің климаты ұқсас. Ең басты артықшылығы, серіктестіктің ветеринар маманы асыл малды күтудің жай-жапсарын түсіндіреді, тегін кеңесін береді. Ал қажетті дәрі-дәрмек, дәрумендерін нарықтағыдай емес, өз қақына ұсынады. Шаруа адамы тек жалға алынған малды дұрыс бағып, мал басын асылдандыру жолында тер төге еңбектенсе жарады, – деді Бөрлі аудандық ауыл шаруашылығы бөлімінің басшысы Алтынбек Бексейітов. Оның айтуынша, ауданға әкелінген 800 аналықтан тараған малдың төлдерін, соның ішінде аталықтарын аудандағы өзге шаруашылықтардың ірі қарасын асылдандыру үшін әрі қарай тарату көзделуде.

Мамандардың айтуынша, «Ақ-Теп»-тің жеке бағдарламасының басты артықшылығы – ол екінші деңгейдегі банктер мен несие институттары сықылды малыңды да, мүлкіңді де кепілдікке сал деп қинамайды, пайыздық өсім деген жоқ. Орта есеппен 7 жыл ішінде 100 аналықтан 600 төл алынатын болса, соның 100 қашарын, 200 бұқашығын, яғни 10 айға дейін өсіріп, кері қайтарасың. Сонда өзіңде тең жарты мал пайдаңа қалады. Тағы бір айтарлығы, малды жалға берушіге кері қайтаратын 200 бұқашықтың асыл болуы міндетті емес. Мұны да мал баққан ағайынның  ұпайы  деуге  болады.

«Жақсыдан үйрен, жаманнан жирен» дегендей, осындай мүмкіндікті өңіріміздегі 5 ауданнан өзге аудандар да елеп-ескерсе жөн болар  еді.

Гүлбаршын   ӘЖІГЕРЕЕВА


Авиабилет құны арзандауы мүмкін

Күні: , 37 рет оқылды

2019 жылы елімізде авиабилет құны арзандауы мүмкін. Бұл туралы  курсив.кz порталы жазды.

Бұл әңгімені бұдан бұрынырақ, биылғы қыркүйек айында өткен Үкімет сағатында халық қалаулылары қозғаған болатын. Онда Инвестиция және даму вице-министрі Тимур Тоқтабаев алдағы жылы елімізде өндірілетін керосин көлемі жеткілікті болып, авиабилеттер құны 20-25%-ға арзандайтынын айтып, ел-жұртты қуантты.

Енді қазан айында БҚО активімен кездесу барысында ҚР Энергетика министрі Қанат Бозымбаев та айтылған ақпаратты растады. Оның айтуынша,  биыл Қазақстанға 300 мың тонна керосин сырттан тасымалданады, әзірге сырттан тасымалданатын керосинге  тәуелділік 45%-ды құрайды.

Елімізде жыл сайын 400 мың тонна  авиа керосин өндіріледі. Министрліктің ұсынған мәліметіне сүйенсек, биылғы жылдың аяғына таман  керосинге деген қажеттілік  650 мың тоннаға жетпек. Ал 2019 жылы еліміздегі керосин өндірісі 690 мың тонна көлеміне дейін өседі деп күтілуде. Қанат Бозымбаевтың сөзіне сүйенсек, алдағы жылы ұшақтар отандық керосинмен 100% қамтылып, оның бағасын да реттеу мүмкін болмақ. Сондай-ақ «Орал» халықаралық әуежайын стандартқа сай қылудың арқасында халықаралық рейстерді жиі ұйымдастыру мүмкіндігі туады. Министр «өз қолымыз өз аузымызға» жетіп, керосиннің бағасын белгілеуде тәуелсіздік алғанымызбен, бағасы арзан сұйықтық кедендік шекарасы жоқ, ортақ нарыққа «ағып» кетуі ықтимал деген  қорқынышын  жасырмады.

Биыл аталмыш министрлік өңіріміздегі мұнай өңдеуші  «Конденсат»  АҚ-мен  еліміздегі үш мұнай өңдеуші зауытпен қатар ішкі нарықтарға мұнай өнімдерін жеткізуді арттыру үшін қажетті шикізатпен қамтамасыз ету жөнінде меморандумға қол қойды. Сонымен қатар мұнай өңдеу зауытына магистральды мұнай құбырлары мен теміржол арқылы қазақстандық өндірушілердің мұнайын жеткізудің кестесі бекітілді. Бүгінде «Конденсат» ішкі нарыққа жоғары октанды бензин мен еуропалық сапалы дизель отынын өндіруде.

Гүлбаршын   ӘЖІГЕРЕЕВА


Екі жақты әріптестік жаңа мүмкіндіктерге жол ашады

Күні: , 41 рет оқылды

Батыс  Қазақстан облысы  Ресей Федерациясының  Самара  облысымен  өзара тиімді  әріптестікті дамытуда.

Қазақстан және Ресейдің шекаралық әріптестігінің ХV форумы қар-саңында БҚО делегациясы жұмыс сапарымен Самара облысына барды. Осы іссапар аясында облыс әкімі Алтай Көлгінов Самара облысының губернаторы Дмитрий Азаровпен  кездесті.

– Екі жақты әріптестіктің ерекше сипаты қос мемлекеттің басшыларының арасында берік қалыптасқан тиімді байланыстың мазмұнымен нақтыланып, қос өңірдің басшылығын қарым-қатынастың көкжиегін кеңейте түсуге жетелейді.  Елбасымыз Нұрсұлтан Әбішұлы Назарбаев біздің елмен достық тарихы ғасырлар қойнауынан бастау алатын Ресей Федерациясын Қазақстан Республикасының басты стратегиялық әріптесі, тату көршісі екенін және солай бола беретінін ұдайы айтып келеді, – деді  Алтай  Көлгінов.

Алтай Көлгінов атап көрсеткендей, өткен жылы БҚО мен Ресейдің аймақтары арасындағы тауар айналымы 600 млн. АҚШ долларынан асты. Биылғы жылдың сегіз айы ішінде сыртқы тауар айналымы 420 млн. долларды құрады, яғни көрсеткіштер 15,8%-ға өсті. Кездесу барысында облыс әкімі Ақ Жайық өңірінің экономикалық, инвестициялық және туристік әлеуеті жөнінде әңгімеледі. Бүгінде БҚО аумағында шетелдік фирмалардың 86 филиалы, 238 халықаралық инвесторлармен біріккен кәсіпорын жұмыс істейді және олардың басым көпшілігі Ресей  Федерациясынан.

– Елбасы көлік-логистикалық инфрақұрылымды дамытуға ерекше мән-маңыз беруде. Өңірдегі іскерлік белсенділікті арттыру үшін әуежай ғимараты қайта жаңғыртылады. Қазірдің өзінде түрлі қалалар мен елдерге, соның ішінде Мәскеуге және Франкфуртқа тұрақты тікелей рейстер ашылды. Орал – Саратов бағытындағы жол құрылысы аяқтала келді. Осы құрылыс жұмыстары барысында шекарада сегіз жолақты жол салынады. Оралдан Ресей Федерациясының оңтүстік аймақтарына дейінгі жол құрылысы жұмыстары жалғасуда. 2019 жылы Самара облысымен арадағы шекарада сегіз жолақтық жол салу жоспарланды. Сонымен қатар алдағы жылы Орынбор облысына дейінгі жолды жөндеу жұмыстары басталады, – деді  Алтай  Көлгінов.

БҚО әкімі екі өңірдің туризм саласындағы әріптестігін кеңейту, облыстар арасында әуе қатынасын қалыптастыру, балалар-жасөспірімдер туризмін дамыту жөніндегі ұсыныстарын білдірді. Айтқандай, балалар-жасөспірімдер  туризмі ТМД елдері арасындағы көшбасшы үштікке кіреді, аталмыш орталыққа ЮНЕСКО клубы мәртебесі берілген.

Самара облысының губернаторы Дмитрий Азаров қос мемлекеттің басшыларының екі жақты әріптестікке сапалы жаңа міндеттер жүктеп отырғанын, соған орай жұмыс қарқынын арттыру қажеттігін атап өтті. Бүгінде әріптестіктің көптеген бағыты бар, солардың кейбір бөлігі табысты жүзеге асырылуда. Шекаралас өңірлердің кәсіпорындары арасында өзара тиімді кооперация қалыптасқан. «Зениттехсервис» ЖШС ұшқышсыз ұшақ аппараттарын жасақтау, жинақтау, өндіріске енгізу бағытында кластерлік инжинирингтік орталықпен және Самара инженерлік лабораториясымен бірге жұмыстануда. Орал механикалық зауыты «Электросила» кәсіпорнына иінді білік жеткізеді, «ТехремКомплект» зауытынан қосалқы бөлшектер алады, «Гидроприбор» ҒЗИ» АҚ «Самтехнонефть» кәсіпорнымен мұнай құбырларын тазалау, химиялық реагенттерді пайдалану арқылы мұнай өткізу қарқынын көтеру технологиялары салаларында бірлесіп жұмыс істеу үшін келісімдер жүргізуде. Сонымен қатар Батыс Қазақстан облысының көптеген мекеме-кәсіпорны тамақ, жеңіл өнеркәсібі және өзге де салаларда ре-сейлік компаниялармен әріптестік  орнатқан.

Жұмыс сапары барысында екі жақты әріптестікті экономика, ауыл шаруашылығы және өнеркәсіп салаларында одан әрі кеңейтуді көздеген бизнес кездесулер өтті. Кездесу соңында өңірлер арасында сауда-экономикалық, ғылыми-техникалық, әлеуметтік, мәдени-гуманитарлық салалардағы әріптестік жөнінде келісімге қол қойылды. Бұдан кейін БҚО делегациясы өңірдегі бірқатар әлеуметтік-экономикалық маңызды нысандарды аралап, «ИДК Мать и дитя» жоғары технологиялы медициналық орталықта және  «Агропарк» агрологистикалық кешенде болып, жұмыстарымен танысты. Облыстың ірі кәсіпорындарының басшылары өз өнімдерін «Агропарк» кешеніне жеткізуге, ауыл шаруашылығы, өнеркәсіп, денсаулық сақтау, туризм салаларында әріптестік орнатуға және  тәжірибе  алмасуға  уағдаласты.

Гүлбаршын   ӘЖІГЕРЕЕВА,

«Орал   өңірі»


Нұржан ҚАЛИШАНОВ, «Даму» кәсіпкерлікті қолдау қоры» АҚ БҚО филиалының басшысы: Кәсіпкерге көмек көп

Күні: , 377 рет оқылды

Дамыған елдерде шағын және орта кәсіпкерліктің үлесіне ішкі жалпы өнімнің 70-80%-ы тиесілі, ал бізде бұл көрсеткіш әзірге 27%-дың айналасында. Сондықтан кәсіпкерлікті дамыту мақсатында нарықтағыдан әлдеқайда төмен пайызбен несиелейтін мемлекеттік бағдарламалар жасақталып, іске қосылған. Алайда кәсіпкерлер мемлекеттік қолдау-көмекке  қол жеткізудің, құжат жинаудың қиындығын айтады. Біз кәсіпкерлердің мемлекеттік бағдарламалар бойынша қандай көмек-қолдау ала алатыны жайында әңгімелемекпіз.

– Нұржан Бауыржанұлы, кәсіпкерлер қандай мемлекеттік бағдарламалар бойынша көмек-қолдау ала алады?

– «Даму» кәсіпкерлікті дамыту қоры» АҚ кәсіпкерлерге арналған өнімдер мен қызметтердің ауқымды спектрін ұсынады. Соның ішінде екінші деңгейдегі банктер арқылы несие беру бағдарламаларын іске асырады, лизингтік мәмілелерді қаржыландыру, пайыздық мөлшерлемелерді субсидиялау, кепілдік беру, консультациялық қолдау, ақпараттық-аналитикалық материалдарды тарату жұмыстарымен айналысады.

«Даму» қоры кәсіпкерлердің екінші деңгейдегі банктерден алынатын несиелері бойынша сыйақы мөлшерлемелерін субсидиялаудың және банктердің алдында кәсіпкерлердің несиелерін кепілдендірудің қаржылық агенті болып табылады, сонымен қатар «Бизнестің жол картасы – 2020» мемлекеттік бағдарламасының аясындағы кеңес беру бағдарламаларының операторы қызметін атқарады.

– Шағын және орта бизнесті қаржыландырудың өңірлік бағдарламасы бойынша қаржыландыру бағдарламасы қалай жүруде?

– Батыс Қазақстан облысы аумағында тіркелген және жобаларын жүзеге асырып жүрген кәсіпкерлер «Даму Ақжайық» өңірлік бағдарламасы бойынша 8,5%-дан аспайтын,  50 000 000 теңгеге дейін, мерзімі 84 айға дейінгі несиені пайдалана алады. Облысымыздың моноқалаларында, шағын қалаларында, елді мекендерінде өз ісін бастаған  жас кәсіпкерлерге несиені салалық шектеусіз алуына болады. Басқа жағдайларда кәсіпкерлердің жобалары басым салаларға сәйкес болуы қажет. Бағдарлама бойынша «Халық банкі», «Банк ЦентрКредит» жұмыстанады.

– Қазіргі уақытта қайта өңдеу саласының кәсіпорындарына қаншалықты қолдау көрсетілуде?

– Қайта өңдеу өнеркәсібі саласындағы шағын және орта кәсіпкерлікті қолдаудың «Даму-Өндіріс» бағдарламасы жұмыс істейді. Бұл бағдарлама қайта өңдеу өнеркәсібі саласындағы шағын және орта кәсіпорындарға 6%-бен ЕДБ арқылы несие алуға мүмкіндік береді. Нақты мысал келтірсек, өңірде шиналарды қайта өңдеу саласындағы өндірісті қолға алған компаниялардың бірі – «Кама-Центрге» мемлекеттік қолдау көрсетілді. Аталмыш компания кең ауқымды резеңке жабындарын өндіру мақсатында ескі аутокөлік шиналарын және басқа да резеңке өнімдерін қайта өңдеу жобасын биылғы ақпан айында Оралда іске қосты. Жобаның шамасы 200 млн. теңгені құрады.

– Нұржан Бауыржанұлы, өзін-өзі жұмыспен қамтушыларға арнайы бағдарлама бар ма? «Еңбек» бағдарламасы бойынша қанша адам несие алды?

– Өткен жылдың тамыз айынан бастап «Даму» қоры «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» бағдарламасын» жүзеге асыруда. «Даму» қоры осы бағдарламаның қалаларда жүзеге асырылуына жауап береді. «Еңбек» бағдарламасы  жүзеге асырылатын қалалар тізіміне Батыс Қазақстан облысы бойынша Орал және Ақсай қалалары енгізілді. «Даму»  қорының филиалы осы екі қаладағы кәсіпкерлерге «Еңбек» бағдарламасы аясында қолдау-көмек көрсетеді. Ал ауылдық жерлердегі өзін-өзі жұмыспен қамтып отырған азаматтар «Ауыл шаруашылығын қаржылай қолдау қоры» мен «Аграрлық кредиттік корпорация» АҚ-лар арқылы несие серіктестіктері тарапынан қаржыландырылады. Бағдарламаға жұмыссыздар, кәсіпкерлік әлеуеті бар өзін-өзі жұмыспен қамтыған адамдар және ісін жаңа бастаған кәсіпкерлер қатыса алады. Қатысушылар міндетті түрде «Бастау Бизнес» жобасы аясында кәсіпкерлік негіздерін оқыту курстарынан өтуі тиіс. Сондай курстан өткені туралы сертификаты болған жағдайда ғана несие беріледі. Ісін жаңа бастаған кәсіпкерлерге бизнесін дамыту үшін несие жұмыспен қамту орталығының жолдамасымен кем де-генде екі  адамға жаңа тұрақты жұмыс орнын құрғанда беріледі. Бағдарламаның ерекшелігі сонда – несиені төмен 6%-бен  алуға болады. Берілетін несие шамасы 6,5 мың АЕК-қа дейін. Несиелендірудің ұзақ мерзіміне келсек, инвестициялауға бес жылға дейін, айналым құралдарын толықтыруға үш жылға дейін ұсынылады.

Азаматтар, негізінен, өздері жақсы білетін салаларды таңдайды. Біреуге қызмет етіп жүрген азаматтар несие алып, өздері бизнес ашып жатыр. Мәселен, жақында шаштаразда жалдамалы қызметкер болып жұмыс істеп жүрген маман несие алып, жеке шаштараз ашты. Нақты мысалдарға келсек, өз ісін жаңадан бастаған кәсіпкер Малика Абдулова балаларды түзету және дамыту «Радуга» Монтессори орталығын ашу үшін біздің қор арқылы «Еңбек» бағдарламасы бойынша несие алды. Бұл қаржыға ғимарат сатып алып, жеке дүкенін де ашты. Ал «Гармония Сервис» ЖШС-ның негізін қалаушы, жас кәсіпкер Абзал Өтегенов Орал қаласынан кілемдерді тазалайтын кәсіпорынды ашуға несие алып, керек жабдықтарды сатып алды. Кәсіпкерге несие алу үшін «Даму» қоры тарапынан 85% көлемінде кепілдеме берілді. Қаламыздың тағы бір тұрғыны Ақұштап Құспан «Еңбек» бағдарламасы бойынша несие алып, бұл қаржыға ғимарат сатып алды және жеке сұлулық салонын ашты. Мұндай мысалдар жеткілікті.

– «Даму» тарапынан сауда саласындағыларға  қолдау-көмек  бар ма?

– Сауда саласындағы ісін жаңа бастаған  кәсіпкерлер «Еңбек» бағдарламасына қатыса алады. Ал моноқалалар, шағын қалаларда және елді мекендерде жобаларын жүзеге асырушылар салалық шектеусіз «БЖК-2020» бағдарламасына қатыса алады.

– Мемлекеттік бағдарламалардың шарттары нарықтағы өзге бағдарламаларға қарағанда қаншалықты тартымды?

– Мемлекеттік бағдарламалардың ең басты мақсаты – кәсіпкерлердің несиелері бойынша ауыртпашылығын төмендету. Оның ішінде жеңілдетілген несиелер, пайыздық мөлшерлемені 40-50%-ға дейін субсидиялау арқылы төмендету және банктердің алдында кәсіпкерлердің несиелерін 85%-ға дейін кепілдендіру.

– «Даму» арқылы мемлекеттік қолдау-көмек алу үшін құжат көп керек пе? Қандай кепілдік сұралады?

– Мемлекеттік бағдарламалар бойынша қаржылай қолдауға ие болғысы келетін азаматтар «Даму» қорының филиалына келуіне болады. Бізде филиал жанында кәсіпкерлерге қызмет көрсету орталығы бар. Орталық мамандары келушілерге бағдарлама шарттары мен тетіктері бойынша толық ақпарат береді. Олардың жоспарын, идеяларын тыңдап, қызмет түріне, қажет қаражат көлеміне, кәсібінің орналасу жеріне байланысты ең тиімді бағдарламаны таңдайды. Мемлекеттік бағдарламалардың ішінен кәсіпкер үшін ең тиімдісін таңдап, құжатын жинауға көмектесеміз. Мемлекеттік бағдарламаларға қатысуға өтініш беру үшін кәсіпкерлерге банктердің ішкі талаптарына сай және банктің кепілдік саясатына сәйкес құжаттарды толық тапсыру қажет. Соңында толық дайын болған құжаттарды екінші деңгейлі банктердің қарауына жібереміз. Одан әрі банктер өздерінің ішкі талаптарына сай жобаларды қарап, қаржыландырады.

– Нұржан Бауыржанұлы, соңғы сұрақ: несиесі бар кәсіпкерлер мембағдарламалар бойынша көмек ала алады ма? Қандай банктермен жұмыс істейсіздер? «Дамудағылар»  бизнес-жоспар жасауға көмектеседі ме?

– Егер кірісіңіз жеткілікті болып, ай сайынғы төлемді жаба алсаңыз, несие алуға еш кедергі жоқ. «Даму» қоры барлық банкпен жұмыс істейді. Банктер арасында кәсіпкерлерді несиелендіру бойынша «Сбербанк» және «Халық банк» белсенді жұмыс істеуде.  «АТФ», «Банк ЦентрКредит» банктерінің де көрсеткіші жаман емес.

Бизнес-жоспар бойынша кеңес алу және тегін әзірлеуге «Атамекен» ҰКП-дағы мамандар қолдау көрсетеді.

Сұхбаттасқан  Гүлбаршын   ӘЖІГЕРЕЕВА,

«Орал  өңірі»


Ешкімнің нұсқауынсыз жұмысшыларын қуантты

Күні: , 32 рет оқылды

Елбасы  «Қазақстандықтардың  әл-ауқатының  өсуі:  табыс  пен  тұрмыс  сапасын  арттыру»  атты  Жолдауында  отандастарымыздың  әл-ауқаты,  ең   алдымен,  табыстарының  тұрақты  өсімі  мен   тұрмыс  сапасына байланысты  екендігін   атап   көрсетті.  Үкіметке  2019  жылдың  1  қаңтарынан  бастап  ең  төменгі  жалақыны  1,5 есе,  яғни  28  мыңнан  42  мыңға  дейін  өсіруді  тапсырды.  Сонымен  қатар «Бұл  барлық  сала  бойынша түрлі меншік  нысандарындағы  кәсіпорындарда жұмыс істейтін  1  миллион  300  мың   адамның  еңбекақысын  тікелей  қамтиды», – деп  айқын көрсетіп берді.  Бұл  бастаманы  Ақ  Жайық өңіріндегі  ірі  мекеме-кәсіпорындар  бірден  іліп  әкетті. Солардың бірі  «Желаев  нан комбинаты»  АҚ  басшылығы  ешкімнің  нұсқауынсыз,  өз  бастамаларымен  ең   төменгі  жалақы  мөлшерін  көтеруге  шешім  қабылдады.

Желаев нан өнімдері комбинаты» АҚ ұжымында  560 адам еңбек етіп, нәпақасын тауып жүр. Аталмыш АҚ-ның директоры Эдуард Федорченконың айтуынша, Елбасының тапсырмасына орай алдағы 2019 жылды күтпей-ақ, ең төменгі жалақы алатын жұмысшылардың жалақысын 10%-ға көтеруге шешім қабылданған. Қазіргі уақытта комбинатта ең төменгі жалақы мөлшері – 50 мың теңге болса, ондай көлемдегі жалақыны 26 адам алады. Олар негізінен техникалық қызметкерлер, аула сыпырушылар,  асхана  қызметкерлері.

– Акционерлік қоғам басшылығы жыл сайын еңбеккерлердің жалақысын өсіріп отырады. Мысалға, 2017 жылы ұжымдағылардың жалақысы 20%-ға өсті. Биыл тағы 10 пайызға көтеріп отырмыз. Жыл соңына таман және құрылтайшылардың жиналысынан кейін 2019 жылға жалпы қызметкерлердің жалақысын өсіру мүмкіндігі қарастырылмақ. Жылма-жыл еліміздің, өңіріміздің және комбинаттың игілігі, өркендеуі жолында тер төгіп жүрген еңбеккерлеріміздің табысын молайтып, қолдап отырамыз, – деді аталмыш АҚ-ның директоры Эдуард Федорченко.

Бүгінде Желаев комбинаты макарон өнімдерінің 20-дан астам түрін өндіреді. Макарон өндірісі желісінің қуаттылығы айына 4 мың тоннаны құрайды. Желаев астығы өзінің сапасымен ертеден танымал. Оны өндіру қуаттылығы айына 7,5 мың тонна шамасында. Комбинаттың  өнімдері өз елімізде, қала берді Ресейде үлкен сұранысқа ие. Сондай-ақ оралдық комбинаттың өнімдері Түркіменстанға, Өзбекстанға, Тәжікстанға, Ауғанстанға  экспортқа  шығарылуда.

Биылғы жыл басында кәсіпорынның №3 макарон фабрикасында қуаттылығы сағатына 2 мың келі өнім шығаратын жаңа италияндық «РАVАN» желісі орнатылды.  Қазір жаңа құрылғы қуатын толықтай пайдалануға жетісті. Онда жылына 14 мың тоннадан астам макарон өнімдері шығарылуда. Аталмыш фабрикада 80 адам жұмыс істейді. Э. Федорченко жаңа макарон цехын салуда мемлекеттің көмек-қолдауы болғанын, яғни цех құрылысына және ондағы құрал-жабдықтарды орнатуға жұмсалған шығын мемлекет есебінен өтелгенін айтты. Ендеше, Желаев комбинаты иелерінің бизнестің қоғам алдындағы әлеуметтік жауапкершілігін сезінуі, өз қызметкерлерін  қамқорлауы  да  көңілге  қонымды.

– Тыңнан қосылған цехта сапалы астықтан макаронның жаңа 12 түрі өндіріледі. «Мартин», «Честная цена» және өзге де сауда белгісімен сағатына 2 тонна, бір күнде 30 тоннаға дейін өнім өндіреміз, төрт ауысыммен жұмыс істейміз. Елбасының тапсырмасымен жалақымызды өсіріп жатыр, қуаныштымыз. Табысыма көңілім қанағаттанады, – деді №3 макарон фабрикасының ауысым технологы Шынар Шүңірекова. Әріптесінің сөзін ауысым шебері Леонид Гехт та қолдады. Өйткені табыстың, яғни жалақының тұрақты өсімі  әр жұмысшыға қуаныш сыйлап, оның отбасының тұрмыс-тіршілігін жақсарта  түсері  анық.

Гүлбаршын   ӘЖІГЕРЕЕВА,

«Орал   өңірі»


2 мың тонна ет – экспортқа

Күні: , 56 рет оқылды

Өңіріміздегі Ресеймен шектесетін кейбір ауыл-аудандарға қарағанда, шекарадан алшақтау жатқан аудандардың ет экспорттауға деген құлшынысы ерен.

Елбасы Жолдауларында ауыл шаруашылығы өнімдерін, соның ішінде етті сыртқы нарықтарға шығаруды 2,5 есеге ұлғайту міндеті қойылғаны белгілі. Осы тұрғыдан келгенде, биылғы тамыз айынан бергі уақытта мемлекеттік шекара сызығынан алшақтау жатқан үш аудан шаруаларының ет экспорттауға деген ұмтылысы қарқынды. Облыстық ауыл шаруашылығы басқармасы басшысының орынбасары Сатқан Өмірзақовтың айтуынша, Қаратөбе ауданындағы «Сатыбалды» шаруа қожалығы (жетекшісі – Е. Мұқанов) Ресейдің Самара қаласына 10 тонна ірі қараның етін шығарып үлгерді. Жаңақала ауданындағы «Бірлік» мал зауыты» ЖШС (жетекшісі –  Қ. Ешімов)  көршілес ресейліктерге 15 тонна, Ақжайық ауданындағы «Батыс Нық» мал сою пунктін жалға алып отырған «Batys Meat» ЖШС 19 тонна ет өткізді. Тек осы үш ауданның ет экспортына қосқан  үлесі  44  тоннаны  құрап  отыр.

Биыл батысқазақстандық тауар өндірушілер сыртқа 2 мың тонна ет шығаруды жоспарлаған. Бүгінде ол 1 915 тоннаға жетіп, 95,8 пайызға орындалған. Ал қой етін сыртқа шығару көлемі 180 тонна болса, қазіргі уақытта 494 тонна ет экспортқа шығарылып, межені үш есеге жуық артығымен орындауға қол  жеткізілген.

Гүлбаршын   ӘЖІГЕРЕЕВА,

«Орал  өңірі»


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика