Іскер  әйелдер сөзден  іске  көшті

Апта­ның  басында  БҚО кә­сіпкерлер  палатасын­да  іскер  әйел­дер  кеңесінің  кеңейтілген  отырысы  өтті.  Бас­қо­суға  об­лыс  әкімі­нің  бірінші  орынбасары  Мұхтар  Манкеев  қатыс­­­ты.

Өңірлік кәсіпкерлер палатасы жанын­да­ғы іскер әйелдер ке­ңесінің төрайымы Ляна Тұрсынованың айтуынша, биыл іскер әйелдердің,  әсіресе, ауылдық жерлердегі нәзік жан­дылардың  белсенділігін артты­рып, ауыл шаруашылығы сала­сын­дағы кәсіпкерлікті дамыту көзделген.

– Ауылдың тұрмыс жағдайын­да бастамалары, тың ойлары бо­ла тұра, әйелдерге кәсіпкерлігін жүргізу, оны одан әрі дамыту оңайға соқпайды.  Екінші дең­гейдегі банктер несие беруге ке­пілзат сұрайды. Банктер ауылда­ғы жылжымайтын мүлікті ба­ға­лай бермейді. Алайда біздің нәзік жандылар кәсіпкерлікті бас­тауға, дамытуға құштар. Іскер әйел­дер қауымдастығы оларға жөн сілтейді, бағыт-бағдар бере­­­ді, сөйтіп, бір-бірімізге қолдау көр­сетеміз, – деді Ляна Тұрсы­нова.

Республика бойынша алып қа­расақ, облыстағы ақ жаулық­ты­лардың кәсіпкерлік белсенділігі төмен, оның себебін қажетті ақ­параттың жеткіліксіздігінен із­деу қажет. Облыстар арасында Ақ Жа­йық өңірі кәсіпкерліктегі әйел­дердің үлес-салмағы жөнінен ке­йінгі орындарда. Біздің  өңірдегі114 мың кәсіпкерлік субъектісі ішінен 31 мыңының басшылы­ғында әйелдер екен. Қазіргі мін­дет – облыс көлеміндегі кәсіп­­кер­ліктегі қыз-келіншектердің бел­сенділігін көтеру, сол арқылы экономиканы одан әрі дамыту.

Кеңес отырысы барысында қатысушыларға қаржылай қол­дау тетіктері, соның ішінде бірінші кезекте «100 сауда нүктесі» жо­басы, «Бизнестің  жол  картасы –2020»  бизнесті қолдау мен дамы­тудың бірыңғай бағдарламасы, «Қарапайым заттар экономикасы»  және басқа да бағдарлама­лар жайында түсіндірілді.

– Әйелдер арасындағы кә­сіп­керлікті дамыту үшін қандай қолдау тетіктерін жасақтай ала­мыз? Әкімдік тарапынан сіздер­ге есігіміз ашық, қажетті қол­даукөмекті беруге дайынбыз. Сіз­дер­дің прагматикалық көзқа­рас­тарыңыз, қолға алған, бастаған іс­теріңізге жүйелі қарайтында­­ры­ңыз, жанкешті еңбектеріңіз та­бысқа бастайды. Сондықтан әйел­дер кәсіпкерлігінің белсенді да­муы облыстың дамуына серпін береді. Ауыл шаруашылығы саласында сіздер қолға алатын «Өн­діруден өңдеуге» жобасын об­лыс көлемінде іске асыруға болады. Елімізде кәсіпкерлікке 70-тен астам мемлекеттік қол­дау те­тігі жасақталған.  Гранттық қар­жысы 3 млн теңгеден 5 млн тең­геге дейін өскен стартап жоба­лардан бастап, несие пайызын субсидиялау, банктерге кепіл­дік беру, сондай-ақ экспорт­қа тауар шығарушыларға  логисти­калық шығынын өтеу тетіктері қол­да­ныста. Экс­порт­­қа тауар шыға­­ра­тын кәсіп­кер­лер­ге бұрын өнді­­­ріс орнына ше­кара­ға дейінгі ло­гис­тикалық шығын­­­дары субси­­дия­ла­нып келсе, ен­дігі жерде жағ­дай өзгертілді. Мысал­ға, Орал­дан не Бөкей ордасы ау­даны­нан Ре­сейдің Владивос­ток қа­ла­сына жет­­кізетін болсаңыз, сол жол шы­ғы­нының 50%-ы суб­си­­дия­­ла­нады. Осындай те­­тіктердің бар екенді­гін айтып, тү­сінді­руі­міз керек, – деді Мұхтар Манкеев.

Басқосуда кәсіпкерлікті да­­­мы­туға жер учаскелерінің жетіспейтіні  айтылды.

«Даму» кәсіпкерлікті дамыту қоры  БҚО филиалының өкілдері биыл 100 жер учаскесінің жеті жыл мерзімге аукцион арқылы жалға беріле­ті­нін айтты. Жуықта 22 жер учаскесі сауда-саттық­қа шыға­ры­лады. Облыс әкімі­нің бі­рін­­ші орынбасарының айтуын­ша, ауыл шаруа­шы­лығы жәрмең­келе­рі­нің кә­сіпкерлерге қолайлы болуы бас­­ты назарға алынған. Қазір жәрмеңке­лер «Весы» сау­­да үйінде өткізіліп жүр. Сол жер­ге қиындықсыз қатынауға үш ау­­тобус шығарыл­ған. Өз тауарла­рын әкеп, сауда қызметін көр­сетушілер қыста сыртта тұрмай­ды, ғи­мараттың ішін­де ыңғай­лы орын­дар бө­лін­ген. «Облыс әкі­­мі­­нің тапсырма­сы бо­йын­ша жәр­мең­кені тұрақ­ты өткі­зуге қо­лай­лы орын та­уып, ұйымдастыру жос­пар­ланды. Біз сол сауда ор­нын күтіп ұстай­тын, жәрмеңке­ні апта сайын өзі ұйымдасты­ра­тын жеке әріптесті іздейміз», – деді Мұх­тар  Манкеев.

Елімізде әйелдердің 60%-ы ша­­­ғын кәсіпкерлік саласында жұ­­мыс  істейді.Біздің өңірде де солай. Жиын­да кеңес мүшелері өз жұмыс­та­ры, кәсіпкерлікті жа­ңа баста­ған әріптестері  жайында  әңгімеледі.

Әйелдер кеңесі өңірде үш жо­баны қолға алмақ. «Нөлден бас­талатын бизнес» жобасы бойынша жеті баланың анасына кәсіп­керлікті бастауға қолдау көр­се­тіледі. Кәсіпкерлікті бастаушы әйел сала негіздеріне байланыс­-ты білім алған соң, грант­тық қар­жы алуға өтініш береді. Кеңес оған сиыр сауу аппара­тын алу­ға көмектеседі. Екінші жо­ба – «Ауыл­дағы 50 әйел». Бұл  бо­йын­ша ауыл-аудандардағы 50 бел­­сен­ді кәсіпкер-әйелдің бизнес бас­тамаларына қолдау көрсе­тіл­мек. Табысты кәсіпкер – ақ жау­лық­тылар оларға көмек ретінде шеберлік сыныптарын өткізеді, оқытады, тәжірибелерімен бөлі­седі. Үшінші «Өндіруден өңдеу­ге» жобасы бойынша жеке шаруа­шы­лықтардағы ауыл шаруашы­лығы өнімдерін өңдеушілерге жет­кізу көзделген. Бастамада қа­натқақты жоба ретінде екі ауданда қолға алынбақ. Мұндай жобаларды жергілікті атқарушы құ­рылымдармен бірлесіп іске асыру жоспарланған.

Кеңес отырысынан кейін қа­ты­сушылар кондитерлік және ұн өнімдері өндірісі бойынша «Евенеева Б. Ж.» ЖШС-ның базасында шеберлік сыныбына қатысты. Мұндай жиындарды екі айда бір рет  өткізу  жоспарланған.

Гүлбаршын  ӘЖІГЕРЕЕВА,

«Орал  өңірі»