27.08.2019, 9:51
Қараулар: 391
Бас редакторлардың дәстүрлі басқосуы

Бас редакторлардың дәстүрлі басқосуы

Сырым ауданында «Бас редакторлар клубының»  көшпелі мәжілісі өтті.

Бұл – «Жайық Пресс» медиахолдингінің өткен жылдан бастап қолға алған, қазір дәстүрге айналған шараларының бірі. Оған «Жайық Пресс «ЖШС директоры Рауан Сәбитов, республикаға танымал журналист Есей Жеңісұлы, Ақтөбе облысы, Ойыл аудандық «Ойыл» газетінің редакторы Серікбай Қойбағаров, Сырым ауданының құрметті азаматы, ардагер журналист Махмет Қажиахметов және аудандық газеттердің редакторлары қатысты.

Қонақтарды «Сырым елі» газетінің редакторы Бауыржан Ширмединұлы Сырым шыққан төбедегі кесенеден қарсы алды.

Қонақтар аудан орталығында Қадыр алаңындағы ақын ескерткішіне аялдап, онда Сырым ауданының құрметті азаматы, ардагер журналист Махмет Қажиахметов қонақтарға «Қош келдіңіздер!» айтты. Республикалық Қадыр оқулары байқауының бас жүлдегері, 400 өлеңі мен «Қызыл кітап» поэмасын жатқа айтатын Темірлан Маратов ақынның «Балалықсыз балалық» атты өлеңін нақышына келтіре оқыды. Ақын ескерткішіне «Жайық Пресс» ЖШС директоры Рауан Сәбитов пен журналист Есей Жеңісұлы гүл шоқтарын қойды.

Одан кейін редакторлар аудан әкімінің орынбасары Асланбек Сарқұловпен бірге Алаш саябағында болып, Алаш арыстарының мүсіндерімен танысты. Мұнда «Өрімтал» жас тілшілер фестивалінің аудандық кезеңінің жеңімпазы, С. Жүнісов атындағы республикалық байқаудың арнайы жүлде иегері Жанерке Матышева Ғұмар Қараштың «Көреміз бе?» атты өлеңін оқыды.

*  *  *

Бас редакторлар клубының көшпелі мәжілісінің ресми бөлімі аудан әкімдігінің кіші мәжіліс залында өтті. «Сырым елі» газетінің редакторы Бауыржан Ширмединұлы жыл басынан бергі «Сырым елі» газетінің жасалған жұмыстары туралы баяндады. «Жайық Пресс» ЖШС директоры Рауан Сәбитов, аудандармен жұмыс бөлімінің редакторы Тоқтар Кенжеғалиев, «Жайық Пресс» ақпараттық агенттігінің басшысы  Нұрлыбек Рахманов аудандық газеттердің жұмыстарын саралап, мақтаулы жақтарын және қамшы басу керек тұстарын ашып айтты. Республикалық басылымдарда елеулі еңбек етіп келетін журналист Есей Жеңісұлы аудандық газеттердің жұмысын бір жүйеге келтіріп, қадағалап отырған «Жайық Пресс» медиахолдингіне, халықтың көкейіндегісін  жариялап келетін аудандық газеттерге разылығын білдірді.

*  *  *

«Бас редакторлар клубының» көшпелі отырысы республикалық басылымдарда елеулі еңбек етіп жүрген танымал журналист Есей Жеңісұлының шеберлік сыныбымен жалғасты. Шеберлік сыныбына бас редакторлар, «Сырым елі» газетінің штаттан тыс тілшілері  мен  жас  тілшілері  қатысты.

Шынар МОЛДАНИЯЗОВА,

Сырым ауданы