21.01.2019, 20:15
Қараулар: 42119
Қызылшадан қалай сақтанамыз?

Қызылшадан қалай сақтанамыз?

Ержан  ТОҚБУРИН,  Ақсай  қаласы:

– Еліміздің біраз аумағында, мәселен, Астана мен Алматыда, сондай-ақ Ақмола облысы бойынша қызылша дерті өршіп тұрғанын бұқаралық ақпарат құралдары арқылы біліп отырмыз. Осы орайда біздің облысымыздағы ахуал қандай?

Жалпы, қызылшадан  сақтанудың  қандай  жолдары бар?

Жайдар  ҚҰРМАНОВ,

БҚО қоғамдық денсаулық сақтау департаментінің басшысы:

– Облыста эпидемиологиялық жағдай тұрақты. Соңғы үш жылда қызылшамен ауру оқиғалары тіркелген жоқ.

Биыл әлемнің көптеген елінде қызылша ауруы асқынып тұр.

Соның ішінде Ресейде 4185, Украинада 38 мыңнан астам, Қытайда 29 мыңнан астам, Қырғызстанда  1238 қызылшамен ауру жағдайы тіркелген. Дүниежүзілік денсаулық сақтау ұйымының мәліметі бойынша, қызылшадан 68 өлім жағдайы тіркелген. Олар қызылшамен сырқаттанудың өсуін қызылшаға қарсы вакцинациямен аз қамтылумен байланыстырады.

Республика бойынша өткен жылы 576 қызылшамен сырқаттану жағдайы тіркелді. Соның ішінде 14 жасқа дейінгі балалар 84%-ды құрады.

Ауру оқиғалары, негізінен, қызылшаға қарсы екпе алмаған балалар арасында тіркелуде. Нақтырақ айтқанда, бұл көрсеткіш қызылшамен сырқаттанушылардың 76%-ын құрап отыр.

2019 жылдың басынан бері 323 қызылшамен ауырған жағдай тіркелді, оның 70%-ын 14 жасқа дейінгі балалар құрайды.

Біздің облыста қызылшаның алдын алу мақсатында іс-шаралар күшейтілуде, облыстық денсаулық сақтау басқармасында қызылшаның алдын алу бойынша облыстық штабтың отырысы өтті. Бұдан басқа медициналық ұйымдар мен мектептердің медициналық қызметкерлерінің қызылшаға қырағылығын күшейту мақсатында оқыту семинарлары өтуде.

Қызылша – дене қызуының жоғарылауы, жөтел, мұрын бітуі, тамақтың ауыруы және бөртпемен сипатталатын вирустық табиғатты жіті жұқпалы ауру. Ауру көзі – ауру адам, берілу жолы – ауа, тамшы.

Қызылшаның   белгілері:

Алғашқы белгілері: жалпы әлсіздік, дене қызуының көтерілуі, бас ауруы, мұрын бітуі, тамақтың ауыруы, жарықтан қорқу, көздің қызаруы, жас ағу (конъюнктивит), жөтел;

Негізгі белгілері: бастан бастап, одан кейін дененің төменгі бөлігіне және аяққа дейін түсіп таралатын, бүкіл денеге бөртпе шығу және ауыз қуысындағы қызыл дақтар.

Қызылша пневмония (өкпенің қабынуы), бронхит, энцефалит (ми қабығының қабынуы) сияқты асқынулармен қатар келгенде қауіпті. Мұндай жағдайда медициналық көмекке кеш жүгінгенде және қосымша ауыр аурулар болған жағдайда өлімге әкелуі мүмкін.

Қызылшаны емдеудің тиімді және ерекше әдісі жоқ. Қызылшадан тиімді қорғау вакцинация болып табылады. Қазақстанда қызылшаға қарсы егу екі рет жүргізіледі: біріншісі, 1 жаста және екіншісі, 6 жаста. Қызылшаға қарсы вакцинациялау үшін қызамық және паротитті компоненттермен біріктірілген (ҚҚП) қауіпсіз және тиімді вакцина қолданылады.

Ұсыныстар:

– Ата-аналар өз баласының қызылшаға қарсы екпесінің болуын егу құжаттарынан тексеруі қажет, вакцинация болмаған жағдайда қызылшаға қарсы профилактикалық егуді алу;

– Катаралды құбылыстар (дене қызуының жоғарылауы, бас ауруы, әлсіздік) мен аурудың алғашқы белгілері байқалса және бөртпе пайда болған кезде дәрігерге міндетті түрде қаралу, қызылша ауруына тексеруден өту және оның барлық нұсқауларын орындау қажет.

Қызылша ауруының топтасқан жағдайларын болдырмау үшін ата-аналар жіті респираторлық ауру белгілері бар балаларды мектепке дейінгі балалар ұйымдарына, мектептерге апармауы тиіс, себебі қызылшаның бастапқы белгілері салқын тию ауруларына өте ұқсас.

Есіңізде болсын, ауруды емдеуден гөрі алдын алу әрқашан оңай!

Жаңалықтар

Басқа да мақалалар