Мұрағат: 06.12.2018


Дала абызына ескерткіш

Күні: , 42 рет оқылды

Таяуда шыңғырлаулықтар тағы бір қуанышты сәттің куәсі болды. Ауданымыздың көркіне көрік қосқан Асан қайғы бабамыздың ескерткіші ашылды.

Таяуда шыңғырлаулықтар тағы бір қуанышты сәттің куәсі болды. Ауданымыздың көркіне көрік қосқан Асан қайғы бабамыздың ескерткіші ашылды.

Елбасының  жақында ғана жарияланған «Ұлы даланың жеті  қыры» мақаласындағы «Дала фольклорының антологиясы» және «Ұлы даланың ұлы есімдері» айдарында айтылғандай, атақты және тарихи тұлғаларға арналған ескерткіштер орнату бағытындағы шараларға орай аудан орталығында «Дала аңызы» атты Асан қайғы бабамыздың мүсіні бейнеленген шағын архитектуралық нысан бой көтерді.

Ескерткіштің ашылу салтанатында сөз алған аудан әкімі Альберт Есалиев Асан қайғы бабамыз туралы аңыздарға тоқталып, осынау архитектуралық нысанның мән-маңызын айтқан соң, жергілікті өнерпаз Азамат Қалиев «Жерұйық» күйін орындады. Одан кейін ауданымыздың зейнеткер ұстазы Кітәбия Абдуғазиева мен  облыстық «Эрудит»  байқауының жеңімпазы, 11-сынып оқушысы Темірлан Байғалиев ескерткіштің ашылу рәсімін жасады.

 Көлемі 6 шаршы метрді, биіктігі 2 метрді құрайтын ескерткіштің бой көтеруіне ауданнан шыққан меценат Юсуп Қазиев демеушілік жасады. Ал ескерткіштің авторы – ҚР Суретшілер одағының мүшесі, мүсінші Ибрагим Айгенов. Суретші-мүсіншілер Ахмет Ерғалиев пен Зәкижан Исламбеков автормен бірлесе отырып, ескерткішті оны екі ай уақыт ішінде аяқтады.

Айсұлу   АРЫСТАНОВА,

Шыңғырлау   ауданы


Чемпион туған жерінде

Күні: , 27 рет оқылды

Таяуда қазталовтықтар Румыния астанасы Будапеште өткен самбодан әлем чемпионатының жеңімпазы Нұрбол Серіковті қарсы алды. Дүниежүзілік доданың жеңімпазына аудан халқының ықыласы ерекше болды.

Отанымыздың абыройын асқақтатқан азаматты аудан әкімі Абат Шыныбеков қабылдады.

– Бүгін – аудан үшін ерекше күн. Мереке қарсаңында чемпионымызды қабылдап отырмыз. Шағын ғана ауылдан түлеп ұшқан азаматтың мұндай жеңісі – біз үшін мәртебе. Осындай жеңісті күнде көк байрақты желбіреткен сізді  жас ұрпақ үлгі тұтады.  Өзіңізбен бірге бапкерлеріңіз де келіп отыр. Бұл кісілерге де өзімнің алғысымды айтқым келеді. Спортшының бабын келістіріп додаға салудың өзі өнер. Сіздердің еңбектеріңіздің арқасында Нұрболдың бағы жанды, – деді аудан басшысы. Чемпион мен оның бапкерлеріне аудан әкімінің атынан алғысхат пен сыйлықтар табысталды.

Гүлнұр   ҚАЗБЕК,

Қазталов   ауданы


120 отбасының қуанышы және “Naryn”

Күні: , 34 рет оқылды

1 желтоқсан – ҚР Тұңғыш Президенті күні 120 оралдық  отбасы  қоныстойын тойлады. Зашаған кентінің аумағындағы тоғыз қабатты тұрғын үйді  «ЖайықСельСтрой» ЖШС салған. Облыс әкімі Алтай Көлгінов қуаныш иелеріне  жаңа  пәтерлердің  кілттерін  салтанатты  жағдайда  табыс етті.

– «Нұрлы жер», «Қолжетімді  баспана – 2020» мемлекеттік бағдарламалары арқылы баспанаға мұқтаж жандар үй алуда. Былтыр облыс бойынша 1300 адамға пәтер берілді. Биыл 3500 отбасыға арналып, Орал қаласында 24, Ақсайда 2 көп қабатты үй, ал аудандарда 104 үй тұрғызылуда. Келесі жылы қала маңындағы аумағы 450 гектар жерде жаңадан бой көтеретін «Ақжайық» шағынауданында 150-ден астам үйдің құрылысы басталады. Қазіргі уақытта құрылыс орнына инженерлік-коммуникациялық желілер тартылуда. Ел ішіндегі осындай жақсылықтардың кең қанат жаюына Елбасының ықпалы зор. Көпұлтты Қазақстан халқының бірлігі нығая берсін! – деді Алтай Сейдірұлы.

Облыс әкімі өңірде урбанизация үдерісі белсенді жүріп жатқанын атап өтті. Әкімнің айтуынша, алдағы жылдары Орал қаласы тұрғындарының саны 500 мыңға жетпек.

Зашаған кентіндегі 120 пәтерлік 9 қабатты үйдің құрылысы 2017 жылы маусым айында басталған. «Нұрлы жер» мемлекеттік бағдарламасы ауқымында жүргізілген үйдің құрылысына республикалық және жергілікті бюджеттен 1 млрд. теңге бөлінді. Жаңа баспанаға Орал қаласында үй кезегінде тұрғандар мен  «Тұрғын-үйқұрылысжинақ банкінің» салымшылары  ие  болды.

*   *   *

ҚР Тұңғыш Президенті күні Орал қаласында «Naryn» спорт кешені ашылды. Кешеннің ашылуына облыс әкімі Алтай Көлгінов пен Орал қаласының  әкімі  Мұрат  Мұқаев  қатысты.

– Елбасы отандастарымызға арналған Жолдауларында халықтың денсаулығын нығайту басты назарда екенін үнемі айтып келеді. «Naryn» спорт кешені жеке инвестиция есебінен салынды. Өңірімізде спорттық нысандар көптеп бой көтеруде. Бөрлі ауылында 400 миллион теңгеге жуық қаражатқа 320 орындық спорт кешені тұрғызылды. Орал қаласында келесі жылы спортпен айналысатын жастарға арналған мектеп-интернат пайдалануға беріледі. Аудандарда спорт кешендерін салуды бастаймыз. Қазіргі уақытта Жаңақала мен Жәнібек аудандарында бой көтеретін спорттық нысандардың жобалық-сметалық құжаттамасы дайын. Елбасымыз бұқаралық спортты дамытуға жағдай жасау керектігін айтты. «Нұр Отан» партиясы өңірімізге 100 спорт алаңын тарту етеді. Бұл бағытта бірлесе жұмыстанудамыз, – деді облыс әкімі Алтай Көлгінов.

Спорттық ғимараттың кіреберісіне керілген лентаны спорт ардагері, Қазақстанның еңбек сіңірген жаттықтырушысы Жұбанышқали Жәрдемов пен «Рио Рио» ЖШС-ның басшысы  Эльмира Таспихова қиды.

Мемлекеттік-жеке меншік әріптестік аясында салынған «Naryn» спорт кешені – «Рио Рио» ЖШС-ның меншігінде. Облыстық мәслихаттың депутаты, жеке инвестор Аманкелді Таспиховтың айтуынша, жобаны Орал қаласының әкімдігі ұсынған.  Ғимарат Р. Егізбаев көшесінде бұзылған екі ескі үйдің орнына тұрғызылды. Кешен құрылысы қыркүйек-қазан айларында жүргізілді. Инвестор оған 150 млн. теңге көлемінде қаржы жұмсады. Кешен ауданы – 453,7 шаршы метр. Ғимарат ішінде волейбол, баскетбол, бадминтон және би залы бар.

«Naryn» спорт кешенінде ҚР Тұңғыш Президенті күніне орай үстел теннисінен сайыс өтті. Оған қалада тұратын мүгедектер, ардагерлер және мемлекеттік қызметшілер қатысты. Айта кетейік, Тұңғыш Президент күні Орал қаласы маңындағы Деркөл кентінде тағы бір спорттық кешен пайдалануға  берілген  болатын.

Нұртай   ТЕКЕБАЕВ,

«Орал   өңірі»


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика