Мұрағат: 30.11.2018


Құрметті батысқазақстандықтар!

Күні: , 83 рет оқылды

Сіздерді  Қазақстан  Республикасының  Тұңғыш Президенті  күні  мерекесімен  шын  жүректен құттықтаймын!

Қазақ халқы үшін жеті – киелі де қасиетті сан. Биыл жетінші жыл қатарынан аталып өтілетін Тұңғыш Президент күні – көпұлтты халқымыздың ынтымағы мен ауызбіршілігін бекемдей түсетін нағыз халықтық мерекеге айналды. Сындарлы шақта бірлік пен елдікті, татулық пен достықты ту етіп, тәуелсіздікті баянды, егемендікті еңселі ете білген ұлт көшбасшысы, сарабдал саясаткер Нұрсұлтан Назарбаевтың рөлі қашан да жоғары. Егемендіктің арқасында тарихымыз түгенделіп, тіліміз, дініміз қайта оралып, мемлекеттік шекарамыз шегенделді. Қазақстан әлемнің алпауыт елдері санасатын, жаһандық деңгейдегі жарқын істердің жасампаз ұйытқысы бола алатын, іргесі берік ірі мемлекетке айналды. Бүгінде Елбасы есімі  Қазақстан, Отан, Тәуелсіздік, Бірлік ұғымдарымен қатар  айтылады.

Елбасы Н. Ә. Назарбаев жуырда жарық көрген «Ұлы даланың жеті қыры» атты мақаласында «Өткенін мақтан тұтып, бүгінін нақты бағалай білу және болашаққа оң көзқарас таныту – еліміздің табысты болуының кепілі» деген болатын. Ендеше, Тұңғыш Президентіміз Нұрсұлтан Назарбаевтың тәуелсіздікті тұғырлы, бейбітшілікті баянды ету жолындағы айшықты үлесін лайықты бағалап, Қазақстанды Мәңгілік елге айналдыру жолында бір мақсат-мүддеге жұмылып, еселі еңбек ету – әрқайсымыздың және баршамыздың  басты  міндетіміз.

Сіздерді Тұңғыш Президент күнімен құттықтай отырып, шаңырақтарыңызға құт-береке, әр бастамаларыңызға сәттілік, тәуелсіз Қазақ елінің  кемелденуі  жолындағы  еңбектеріңізге  толағай  табыс  тілеймін!

Ізгі   ниетпен, Батыс   Қазақстан   облысының   әкімі   Алтай  КӨЛГІНОВ


Соналыда Нұрсұлтан Назарбаев тұрады

Күні: , 242 рет оқылды

Соналы ауылының мектебінде Елбасымен аттас оқушы бар дегенді естіп, аталған мектеп мұғалімдерімен хабарласқан болатынбыз. «Бізде оқушы қос Нұрсұлтан бар. Сізге керегі Нұрсұлтан Назарбаев па?» демесі бар ма?!  Қапелімде түсінбей қалғаныммен, мәселенің мән-жайы сәлден соң белгілі болды. Соналы ЖОББМ-да 8-сынып оқитын Нұрсұлтан есімді екі өрен бар екен. Соның біреуінің аты мен тегі Нұрсұлтан Назарбаев (суретте сол жақта) болып шықты.

Аталған мектептегі Елбасымен аттас оқушының бірі Нұрсұлтан Батыржанұлы Қайырқұлов болса, екіншісі Нұрсұлтан Елтайұлы Назарбаев екенін білген соң, іле-шала оқушымен телефон арқылы тілдестік.

Әлемге танымал есім мен текті иемденген өрен Ақтөбе қаласындағы №36 мектептен ауыл мектебіне биылғы оқу жылы  ауысып, білім алуда. Нұрсұлтан дүниеге келгенде алты алаштың аяулы азаматы болсын, елге сыйлы Елбасындай тұлға болсын деген ниетпен есімін Назарбай атасы қойыпты.

Мектеп мұғалімдерінің айтуы бойынша Нұрсұлтанның сабақ үлгерімі жақсы көрінеді. Биология, физика пәндеріне қызығушылығы жоғары екен. Пәндік олимпиаданың аудандық кезеңіне биология пәнінен қатысуға дайындалып жүр.

Нұрсұлтанның өзін сөзге тартқанымызда, бос уақытында кітап оқығанды, Мұқағали Мақатаевтың өлеңдерін жаттағанды жақсы көретіндігін жеткізді. Өзінің өлең шығаратынын да жасырмады. Сабақтан тыс уақытта достарымен шахмат, футбол ойнағанды ұнатады екен.

– Есімім мен тегімнің Елбасымен бірдей болуы маған зор жауапкершілік жүктейді. Мектепте достарым, құрбыларым «Елбасы келе жатыр» деп әзілдейді. Осының өзі маған үлкен сенім, күш-қуат сыйлайды. Ата-анам, туыстарым, мұғалімдер менен болашақта үлкен үміт күтеді. Баршаның назарында болған соң үлгілі болуды міндетім деп білемін, теріс қылық көрсетуге хақым жоқ деп есептеймін, – дейді оқушы Нұрсұлтан.

Көңілі таза, ортасына сыйлы, көпшіл оқушының ойымен біз де келістік. Елі үшін қызмет қылар үлкен  азамат  болуын  тіледік.

Серікбай   ХАСАНОВ,

Қаратөбе  ауданы


Кіреберіс жап-жарық

Күні: , 47 рет оқылды

Тұңғыш Президент күні қарсаңында Ақжайық ауданындағы Тайпақ ауылының халқы айтулы бір қуанышқа кенелді. Мұнда Орал – Атырау күре жолынан ауылға кіреберіс жолды жарықтандыру жобасы сәтті аяқталып, іске қосылды. Осыған орай алдымен мәдениет үйінде салтанатты жиын өтті.

Елбасы Нұрсұлтан Назарбаевтың «Болашаққа бағдар: рухани жаңғыру» атты мақаласынан  туындаған «Туған жер» бағдарламасының негізінде демеушілердің көмегімен жүзеге асқан аталмыш жоба ата-жұртты қастерлеп, көркейту перзенттік қасиетті парыз екенін тағы бір  әйгіледі. Салтанатта аудандық мәслихат хатшысы Сәлімгерей Сиражев осы хақында ой-толғамдарын кеңінен ортаға салды.

– Елбасымыз Нұрсұлтан Назарбаевтың «Болашаққа бағдар: рухани жаңғыру» атты мақаласы және жақында ғана жарық көрген «Ұлы даланың жеті қыры» атты бағдарламалық еңбегі сайып келгенде, рухани қазынамызды еселеуді, мемлекетшілдік пен отаншылдық идеясын алаулатуды көздейтін, қанша уақыт өтсе де еш құнын жоймайтын қастерлі құжаттар болып табылады. Міне, бүгінгі қуанышымыз еңселі елдіктің бір еспаты болып табылады. Елге қамқорлық жасау – шынайы патриотизмнің көрінісі, елжандылықтың дәлелі.

Тұңғыш Президент күні қарсаңындағы жағымды жаңалық ұзағынан болсын! – деді  ол.

Мәслихат хатшысы жарықтандыру жобасының жетекшісі Есенаман Жарылғасовқа аудан әкімінің естелік сыйлығын, осы істің жүзеге асуына қолдан келгенше жәрдемдескен Мәжит Оңдағанов, Төлеген Шманов, Алтай Қилышев сияқты тағы басқа азаматтарға  алғысхаттар  табыстады.

2017 жылы аудан бойынша «Туған жерге тағзым!» акциясы аясында 11 млн. 586 мың теңгенің 21 жобасы жүзеге асты. Ал биыл 52 млн. 160 мың теңгені құрайтын 39 жоба ойдағыдай мәреленді. Жалпы, жоспарланған 44 жобаның жетеуі Тайпақ ауылдық округінің еншісінде.

– Жыл басында өткен жерлестер форумының бір үлкен нәтижесі, міне, осы. «Көз қорқақ, қол батыр» дегендей, алғашында кібіртіктеп кіріскен жобалар ойдағыдай жүзеге асып, елжанды азаматтардың еңбегі жанған күн болып тұр. Ел жастарының басы қосылып, халықтың бірлігінің арқасында біткен іс игілікке жарасын, – деді Ақжайық ауданының құрметті азаматы, еңбек ардагері Әленғали Кереев. Сонымен қатар ол 2020 жылы ақиық ақын Жұбан Молдағалиевтың 100 жылдығы екенін еске салды. Азаматтарды осынау мерейтойға жан-жақты атсалысуға  шақырды.

Тайпақ ауылдық округінің әкімі Болат Шәленов бүкіл жақсылыққа жанашыр, ынтымақшыл жігіттерге шын көңілден алғысын арнады.

Осыдан кейін ауылдың кіреберісіндегі жарық шамдары іске қосылды. Тайпақ түлектері болып табылатын, бүгінде Оралдағы, «Б. Құрылыс» ЖШС-ның директоры Есенаман Жарылғасов пен кәсіпкер Жандос Айтмағанбетов жетекшілік еткен бұл жұмысқа 13 млн. 780 мың теңге жұмсалған.

Бұл қаржының көп бөлігі осы жомарт жандарға тиесілі. Тұрғындар да шама-шарықтарынша қаржылай көмектескен. Ұзындығы 3 километр 300 метрді құрайтын желіге 70 темірбетонды бағана орнатылды. Су жаңа трансформатор алынып, іске қосылды. Әрқайсысы 11 мың тұратын электр үнемдегіш шамдар Малайзиядан сатып алынған.

Бұл «Рухани жаңғыру» бағдарламасы аясында Тайпақта жоспарланған 7 жобаның алтыншысы екенін айта кеткен жөн. Жоғарыда айтылғандай, сәуір айында ауылда өткен жерлестер форумында азаматтар осы жобаларды жүзеге асыруға уағдаласқан еді. Форумға облыс орталығынан, аудандарымыздан, Ақтөбеден, Атыраудан 130-дан астам тайпақтық түлектер келді. Осында елдегі жақсылықтарға елең ете жүретін белгілі спортшы, самбо күресінен әлемнің төрт дүркін чемпионы Ерболат Байбатыров 2002-2003 жылғы мектеп түлектерінің атынан ауыл қорына 1 млн. теңге аударғаны әлеуметтің қуанышын тіпті еселей түскен еді.

Жеке кәсіпкер Бекет Мұстафиев пен Қадыр Бақмановтың жетекшілігімен жүзеге асқан жоба құны 470 мың теңге тұратын «Тайпақ – менің жүрегімде!»  атты мемориалдық тақтаның орнатылуы, Тайпақ мектеп-гимназиясының дене тәрбиесі пәнінің мұғалімі Жасұлан Қауеновтың жетекшілігімен, 1983-1984 жылғы туған ауылдастардың қолдауымен 2 млн. 200 мың теңгеге екі көшедегі тал егілген алаңдардың қоршалуы, Талғат Мұхамедияров пен ауыл тұрғындарының бастамасымен Шабдаржап ауылында 3 млн. 200 мың теңгеге Жайық өзенінен аулаларға техникалық су құбырының тартылуы көріктендіруге, тұрмыс-тірлікті түлетуге молынан  септесті.

Биыл әйгілі ақын Сағат Әбдуғалиевты ұлықтау шаралары да мәдени-рухани тынысқа серпіліс әкелді. Ақын рухына арналып аймақтық жазба ақындар мүшәйрасы ұйымдастырылып, кеудетұғыры орнатылды. Марат Қуанышәлиевтің жетекшілігімен, халықтың қолдауымен салынған ескерткіштің құны 1 млн.  теңгені құрады.

Тайпақтағы пошта бөлімшесінің басшысы Әділғазы Жұмағазиевтың жетекшілігімен 1978 жылы туған құрдастар мәдениет үйі үшін 2 млн. теңгеге жазғы сахна орнатып берді.

Енді жыл соңына дейін Жанат Таскентовтың жетекшілігімен әр жылдардағы түлектер 4 млн. 500 мың теңгеге Тайпақтың кіреберісіне арка орнатпақ. Сондай-ақ Құрман Байсықов атындағы орта мектептің түлегі, бүгінде Базаршолан ауылдық округінің әкімі Ерлан Темірғалидың жетекшілігімен, 1966 жылғы туғандардың демеушілігімен 750 мың теңгеге Тайпақта балалар ойын алаңы салынады.

Серік Бектұрғановтың жетекшілігімен ауыл көшелеріне аялдамалар салу  да  көзделіп  отыр.

Бекболат   ҚАЛЕНОВ,

Тайпақ   ауылы,

Ақжайық   ауданы


35 қоғамдық көлік жаңартылды

Күні: , 38 рет оқылды

Қарашаның  29-ы күні  ҚР  Тұңғыш  Президенті  алаңында облыс  әкімі  Алтай  Көлгінов пен  Орал  қаласының  әкімі Мұрат  Мұқаевқа  жаңа қоғамдық  көліктер таныстырылды.  Биыл  қала  ішінде жолаушы  тасымалымен айналысатын  «Ақжол-авто», «Оралтехсервис»  пен  «Батыс Дилижанс»  компаниялары Ресейдің  Павлов  аутобус  зауытынан  «Vektor»  ныспылы 35  аутобус сатып  алды.  Қала тұрғындары  №7,  20  және  39 маршрут  бағытында  таза  да ыңғайлы,  70  адам  еркін  сиятын  көліктермен қатынайды.

Бір аутобусқа төрт бейнекамера орналастырылған, оның екеуі салон ішінде. Облыс орталығында 28 қалаішілік, 12 саяжай және қала маңына қатынайтын алты маршрут бағытында 455 қоғамдық көлік жүреді. 455 қоғамдық көліктің 133-і – шағын аутобустар. 2016 жылы шағын аутобустар қатарында 130 «ГАЗель» болса, биыл олардың саны 50-ге дейін азайтылды. Жыл басында қоғамдық көліктердің 65 пайызы тозығы жеткен деп есептелінсе, қазір бұл көрсеткіш 54 пайызға дейін төмендеді.

– Қаладағы жолаушы тасымалдайтын 6 кәсіпорынның үшеуі 35 жаңа қоғамдық көлік алды. Оларға екінші деңгейлі банктерден несие берілді. Келесі жылы жолаушы тасымалымен айналысатын кәсіпорындарға «БРК-лизинг» компаниясы арқылы елімізде құрастырылатын «Daewoo» маркалы 135 аутобус алуды жоспарлап отырмыз. Сонда қоғамдық көліктердің ішінде ескіргендері 27 пайызға дейін төмендейді. Қазіргі уақытта «Цифрлық Қазақстан» бағдарламасы ауқымында «Uralsk Smartsity» тұжырымдамасын іске асыру мақсатында жол картасымен жұмыстанудамыз. 28 қалалық маршрут бойынша барлық көлікте GPS құрылғысы орнатылған.

«InfoBus mobilе» қосымшасы арқылы маршруттар қозғалысын 73 мың қолданушы онлайн бақылай алады. Биыл тоғыз бағыттағы маршрут бойынша жолақыға арналған көлік карталарын қолданысқа енгіздік. 2017 жылдың 8 қарашасынан бастап, №3, 5, 7, 10, 33, 35, 39, 43 маршрут көліктері SMS BUS бағдарламасы арқылы ұялы телефон хабарламасымен жолақы төлем жүйесіне қосылды. Жыл соңына дейін барлық маршрут электронды билетпен қамтамасыз етіледі, – деді Орал қаласының әкімі Мұрат Мұқаев.

– Біздің компанияға №2, 20, 23, 30 «д» маршрут бағыттары тиесі-лі. Биыл №20 маршрут көліктерін түгел жаңартып, 15 жаңа «Vektor» аутобусын іске қосып жатырмыз. Сол үшін «Сбербанк» банкісінен 300 миллион теңге несие алынды. Келесі жылы «БРК-лизинг» компаниясы арқылы 50 көлік алуға тапсырыс бердік. 50 көліктің 30-ы алып аутобустар болмақ. Оларды №2 машрут бойынша жолаушы тасымалына пайдаланамыз, – деді «Оралтехсервис» ЖШС директорының орынбасары Александр Баклан.

Айта кетейік, Орал қаласы бойынша жолдың ұзындығы – 616 км. Соның ішінде 387 километрі асфальтталған. Соңғы үш жылда 18 млрд. теңгеге 145 км жол жөнделді. Биыл 7,5 млрд. теңге қаражатына ұзындығы 50 көшенің жолы жаңғыртылуда. Оның ішінде екі нысан бойынша жөндеу келесі жылы жалғасады. 2019 жылы 5,5 млрд. теңгеге 19 көше бойындағы 33 шақырым жолды жөндеу жоспарланған.

Нұртай   АЛТАЙҰЛЫ,

«Орал   өңірі»


Тұңғыш Президент күніне арналды

Күні: , 49 рет оқылды

Кеше  Хадиша  Бөкеева  атындағы  облыстық қазақ  драма театрында  ҚР Тұңғыш  Президенті  күніне  арналған салтанатты  шара  өтті.

Мерекелік шара облыс әкімі Алтай Көлгіновтің құттықтау сөзімен ашылды.

– Елбасының жүргізіп отырған қазақстандық даму жолы мен моделі әлемдік белгілі көшбасшылар тарапынан зор қызығушылық туғызуда. Оның жетекшілігімен еліміз ешкімге ұқсамайтын экономикалық даму жолын бастады. Даму қарқыны жағынан ХХІ ғасырдағы озық дамушы мемлекеттердің қатарына қосылды. Нұрсұлтан Назарбаев жас мемлекетті экономикасы орнықты елдердің қатарына қосты. Еліміз тәуелсіздікке қол жеткізгелі бері Елбасы Нұрсұлтан Назарбаев тарапынан жаһандық қауіпсіздікті қамтамасыз ету жолында атқарылған жұмыстар орасан зор. 2009 жылдың желтоқсан айында Біріккен Ұлттар Ұйымының Бас ассамблеясы ядролық сынақтарға қарсы іс-қимылдың халықаралық күні ретінде жариялау туралы Қазақстанның бастамасын бірауыздан қолдады. 2016 жылдың сәуір айында Вашингтон қаласында өткен Ядролық қауіпсіздік жөніндегі қорытынды саммит кезінде Қазақстан Президенті халықаралық қоғамдастықты ядросыз әлем құруға шақырған өзінің кең көлемді «Әлем. ХХІ ғасыр» манифесін жария етті. Мемлекет басшысының 2017 жылы сәуір айында шыққан «Болашаққа бағдар: рухани жаңғыру» атты бағдарламалық мақаласы барша қоғамымызға зор сілкініс әкелді. Елбасы ХХІ ғасырдағы жаңа ұлттың, «жаңа қазақтың феномені» ұғымын айқындап, жаһандану дәуіріндегі «қалыптасқан, әмбебап қазақстандық азаматтың» формуласын ұсынды. Таяуда Елбасымыз «Болашаққа бағдар: рухани жаңғыру» бағдарламасының жалғасы іспетті «Ұлы даланың жеті қыры» атты терең мазмұнды, тағылымы мол мақаласын жариялап, қалың жұртшылықты бір серпілтіп тастады. Тарихымыздың «жеті қырын» атап, тарих тұғырынан бағамдап, қоғамымызға терең зерделеуге үн қосты. Қазіргі таңда халықаралық аренада еліміз жеткен жетістіктер аз емес.

Қазақстанның 2010 жылы Еуропадағы қауіпсіздік және ынтымақтастық ұйымына төрағалық етуі, 2011 жылы қысқы Азия ойындары, 2017-2018 жылы Біріккен Ұлттар Ұйымының қауіпсіздік кеңесіне мүше болуы, халықаралық «Экспо – 2017» көрмесінің, «Азиада – 2017» қысқы универсиада ойындарының Қазақстанда өтуі, өзге де жетістіктер Қазақстанның халықаралық дәрежеде мойындалғандығының белгісі. Тұрақты ішкі саяси ахуал, ұлтаралық татулық пен дінаралық келісім, мемлекеттік құрылысты ұтымды жүргізу – тәуелсіз еліміздегі тұрақтылықтың нышаны. Бүгінгі Қазақстан Республикасының Тұңғыш Президенті күніне арналған шарамыздың мақсаты – Елбасымыздың төл мемлекетімізді қалыптастырудағы, саяси және әлеуметтік-экономикалық реформаларды сәтті жүргізудегі, сонымен қатар елімізде бейбітшілік пен келісімді, қауіпсіздікті қамтамасыз етудегі рөлін талқылау. Баршаңызды Қазақстан Республикасының Тұңғыш Президенті күнімен құттықтаймын! Халқымыз байқуатты, елін жарқын болашаққа жетелеген Елбасымыз аман болсын! Тәуелсіздігіміз баянды, елдігіміз ғұмырлы болғай! – деді облыс әкімі құттықтау сөзінде.

Алтай Сейдірұлы еліміздің қарыштап дамуына үлес қосып, еселі еңбегімен танылып жүрген жандарға «Астана – 20 жыл» мерекелік медалін табыс етті. Марапатқа ие болғандар арасында еңбек ардагерлері, әр түрлі саланың қызметкерлерімен қатар ТДК-42 телеарнасының операторы Манарбек Көшәлиев, «Қазақстан» РТРК» АҚ БҚО филиалының редакторы Мұнайдар Балмолда, «Жайық Пресс» ЖШС директорының орынбасары Ғайсағали Сейтақ секілді жергілікті БАҚ саласының белгілі мамандары да бар.

Салтанатты шара мерекелік концертке  ұласты.

Нұртас   НАБИОЛЛАҰЛЫ,

«Орал   өңірі»


Цифрлық индустрияны дамытудың жаңа мүмкіндіктері

Күні: , 24 рет оқылды

Бейсенбіде  Орал  қаласындағы «ҚПО б. в.» компаниясының  бас  кеңсесінде  цифрландыру мәселелері  бойынша  форум  өтті. Оның жұмысына Қазақстан Республикасы Премьер-министрінің орынбасары Асқар Жұмағалиев,  облыс әкімі Алтай Көлгінов, «ҚПО б. в.» компаниясының бас директоры Эдвин Блом қатысты.

Басқосуда Қазақстан Республикасы Премьер-министрінің орынбасары Асқар Жұмағалиев  Елбасының қолдауымен елімізде жүзеге асырылып жатқан «Цифрлық Қазақстан» бағдарламасының тиімділігіне тоқталды. Оның айтуынша, цифрландыру арқылы мемлекеттік құрылымдарда халыққа көрсетілетін қызметтердің, шағын және орта кәсіпкерлікке жататын кәсіпорындардың жұмыстарының тиімділігін арттыру көзделген.  «Жаңа технологияларды енгізу арқылы мемлекеттік қызмет көрсетуді оңтайландырып, жұмсалатын уақытты қысқартып, жеке және заңды тұлғалардың мемлекеттік қызмет алу барысындағы шығынын азайтуымыз керек.  Кеше өңірдің бірқатар цифрландыру жобаларымен танысқанымызда, мемлекеттік қызмет көрсетуді оңтайландыратын жобалар көңілден шықты. Бұл мәселеге Елбасы үлкен мән-маңыз беріп отыр. Елбасы мемлекеттік қызмет көрсетуді 2019 жылы 80%-ға, 2020 жылға қарай 90%-ға  цифрландыруды тапсырды. Біз бұл тапсырманы орындаймыз», – деді Асқар Жұмағалиев. Оның айтуынша, БҚО-да ауыл шаруашылығы саласын цифрландыру жұмыстары жүруде, бірқатар цифрлық технологиялармен жұмыс істейтін шаруашылықтар, кәсіпорындар бар. «Жоспар бойынша 2022 жылға дейін ауыл шаруашылығы саласының 100-ден астам кәсіпорын-шаруашылығы цифрлық технологияларға көшулері тиіс. Облыс әкімдігі және агроөнеркәсіп кешені бұл тұрғыдан сенім үдесінен шығады деп есептеймін. Үкімет барлық бастамаларға мейлінше қолдау көрсетеді. Өндірісшілермен сөйлескенімізде, цифрландыруға көшуде адамдар мен инфрақұрылымдарға қатысты түйткілдерге «сүрінетінін»  естідік», – деген А. Жұмағалиев өңірдегі цифрландыруға қатысты нұсқау-тапсырмаларын берді.

Форумда сөз алған облыс әкімі Алтай Көлгінов «Цифрлық Қазақстан» бағдарламасы бойынша жүзеге асырылып жатқан жұмыс-жобалар жайында әңгімеледі. Ақ Жайық өңірінде экономиканың басты салаларында цифрландыру бойынша 40-тан астам жоба жүзеге асырылуда. БҚО денсаулық сақтау саласы қанатқақты жобаны қарқынды жүзеге асыруда. Бүгінде Орал қаласы мен барлық аудан орталықтары 100% ақпараттық жүйемен қамтылған және 121 есеп беру формасының 106-сы қағазсыз, электрондық түрде жүргізіледі. Қала тұрғындарының электронды денсаулық паспорттары жасақталған, сондықтан дәрігер бұрынғыдай қағаз жазып отырмайды, алтын уақытын «басы ауырып, балтыры сыздап» келген адамға бөледі. Соның арқасында дәрігердің науқастарды қабылдайтын 15 минуты жарты сағатқа ұзарды. Жедел медициналық жәрдем бригадалары планшеттермен және GPS бағыттаушылармен қамтамасыз етілген, басқару жүйесінің аутоматтандырылуы арқасында «Жедел жәрдемнің» шақырту бойынша келуі 12 минуттан 9 минутқа дейін, яғни 3 минутқа қысқарған. Сонымен қатар барлық емханаларда электронды кезекті басқару жүйесін енгізу ем-дом алуға келген тұрғындардың ағынын реттеп, дәрігерге кезекпен кіру уақытын жарты сағаттан 15 минутқа  дейін  азайтты.

Білім беру саласындағы балабақшаға кезекке тұру және балабақшаға қабылдау үрдістері аутоматтандырылып, бұл жүйе адам қатысынсыз, ашық өтетін болды және тұрғындарға қолайлы жағдай туғызды. Облыстағы мектептердің  58,6%-ы – интернеттен қағыс қалған  шалғайдағы шағын комплектілі мектептер, биылғы қыркүйек айында 225 шағын мектеп 100%-ға Bilimbook компьютер-трансформерлермен қамтылды.

Облыс әкімі ВІМ технологиясын қолданысқа енгізу жұмыстары жайына тоқтала келе, жаңа кардиологиялық орталықтың құрылысы 3Д жобалау бойынша жобаланып, салынатынын айтты. Сондай-ақ тұрғындарға қолайлы болу үшін «Қолжетімді әкімдік» жобасы «жандандырылды». – «Жер телімін алу актісін үйлестіру»  қызметін аутоматтандыру жобасы жер алушылардың мемлекеттік құрылымдардың рұқсатын алуға жұмсайтын уақыты 2-3 айдан 5-12 күнге дейін қысқарды.  «Zem.kz» порталында жер телімдерін жалға алу құқығын сату аукциондары электронды түрде өткізілуде. Мұның өзі тұрғындарға мемлекеттік құрылымдарға бармай-ақ, онлайн режімінде саудаға қатысу мүмкіндігін береді. Жер қатынастары саласында конкурс, аукциондарды өткізу үшін әлемдегі ең ірі «Bitfury и Dasco Consulting» блокчейн компаниясымен блокчейн технологияларын енгізу жобасы іске қосылмақ. Грузиядағы жер қатынастары саласындағы блокчейн технологиясын енгізу тәжірибесі жерге қатысты құқық ақпараттарының қорғалу деңгейін арттыруға, аудитті жеңілдетуге, қашықтан құжаттарды рәсімдеуге көмектесті, — деді облыс әкімі.

Оның айтуынша, 2019 жылдың қаңтарынан бастап облыстың геоақпараттық порталы жұмыс істейді. Ондағы ғарыштан түсірілген түсірілімдер жер телімдерін өз бетімен пайдалану, жерді мақсатсыз пайдалану, егіс алқаптарының жағдайы, егін шығымдылығын болжау, жер пайдаланушылардың шекараларды бұзу фактілерін анықтауға септігін тигізеді.

Сонымен қатар тұрғын үй-коммуналдық шаруашылығы саласында IoT желісін құру жұмыстары 2016 жылы басталып, бүгінде Орал қаласы LP-WAN базалық стансамен толықтай қамтылып отыр. Соның арқасында жылу, жарық, су есептеу құралдарының көрсеткіштері қашықтықтан бақыланады. Қала әкімдігі мен тұрғындар арасындағы байланысты нығайту мақсатында алдағы қаңтар айынан бастап қаланың (109) коммуналдық-апаттық қызметінің call-орталығы жұмыс істемек. Бір орталыққа қоңырау шалу арқылы тұрғындардан түскен арыз-шағымдармен жұмыс істеу қызметінің сапасы жақсарып, қызмет  жеделдігі  артады.

– Әлемде орын алып жатқан пайдалы жаңа өзгерістерден қалмау үшін, барлығымыз жұмыс тәсілдерімізді, басқару құралдарымызды жаңғыртып, жағымды өзгерістерге жол беруіміз керек.  «Digital Aqjaiyq» аясында енгізілетін жаңа технологиялар мен шешімдер – өңіріміздің барлық саласына едәуір серпін беретіні сөзсіз, — деді Алтай Көлгінов.

«Бүгінгі кездесу Қазақстан Республикасындағы цифрлық технологияларды жасақтау және бизнес процестерді аутоматтандыру салаларындағы жергілікті және халықаралық компанияларға қазақстандық мазмұнды дамытуға жаңа серпін береді», – деді форумға қатысушыларға «ҚПО б. в.» компаниясының бас директоры Эдвин Блом.

Форум барысында «ҚПО»-ның жоғары оқу орындарының студенттерін қолдау, әсіресе, олардың технологиялық жобаларды жасақтау дағдыларын қалыптастыруға жағдай туғызуды көздейтін, әріптестікті нығайту жөніндегі меморандум қабылданды. Оған ҚР Білім және ғылым министрлігі, БҚО әкімдігі, «KazEnergy» ассоциациясы, «ҚПО б. в.» компаниясы  қол  қойды.

Цифрландыру форумында «KazEnergy» ассоциациясының мұнайгаз және энергетика салаларын дамыту жөніндегі атқарушы директор Рүстем Қабжанов,  «Азаматтарға арналған үкімет» мемлекеттік корпорациясы» коммерциялық емес акционерлік қоғамының басқарма төрағасы Абылай Оспанов,  «ҚПО»-ны цифрландырудың жол картасы» туралы «ҚПО» жобасын дамыту директоры Пьерлуиджи Амено,  «ҚПО» жобасының өзара әрекеттестік және интеграциясы менеджері Мауро Мартуфи және өзгелері сөз қозғады.  Форумға қатысушылар облыс әкімдігінің және «ҚПО»-ның сессияларына қатысып, цифрлық жобаларды өндіріске енгізу, ІТ қауымдастығын және цифрлық индустрияны  дамыту мүмкіндіктері  жайында  пікір  алмасты.

Гүлбаршын   ӘЖІГЕРЕЕВА,

«Орал   өңірі»


Құрметті азаматтар!

Күні: , 22 рет оқылды

Сіздерді Қазақстан Республикасының 2014 жылғы 11 сәуірдегі №188-V «Азаматтық қорғау туралы» Заңына сәйкес 2018 жылдың 6 желтоқсанында «Баршаның назарына!» дыбыстық сигналын беру арқылы аумақтық құлақтандыру жүйесін тексеру жүргізілетіні туралы хабардар етеміз. Осыған байланысты Сіздерден сабыр сақтауларыңызды сұраймыз.

БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика