Кеше  облыс  әкімінің  орынбасары Бағдат  Азбаевтың  төрағалығымен еліміздегі  «7-20-25»  бағдарламасын өңірімізде  іске  асырудың  жай-күйін талқылаған  жиын  өтті.

– Ағымдағы жылдың наурыз айында Мемлекет басшысы Қазақстан халқының әл-ауқатын жақсартуға бағытталған бес әлеуметтік бастамасында әрбір отбасына баспана алудың жаңа мүмкіндіктерін беруге арналған «7-20-25» бағдарламасын әзірлеуді ұсынған болатын. Содан бері бағдарламаның жобасы әзірленіп, заңнамалық қолдау тетігі бекітілді. Осылайша, нақты іске асырылатын бағдарлама бойынша банктерде алғашқы несие бере бастады. Бүгінгі жиында аталған жоба аясында бағдарламаның негізгі талаптары, қандай мүмкіндіктер бар, ипотекалық қарыздар қайдан және қандай мерзімге беріледі, бастапқы жарна, несие алушыға қойылатын талаптар туралы талқылайтын боламыз, – деді Бағдат Азбаев.

Айта кетейік, бұл бағдарлама арқылы тұрғын үй сатып алу мақсатында Астана, Алматы, Ақтау және Атырау қалалары үшін бағаның ең жоғары шегі 25 миллион теңге, ал қалған өңірлер үшін 15 млн. теңге деп белгіленген болатын. Мақсатты индикаторларға сәйкес ипотекалық несиелердің жалпы көлемі 1 триллион теңгені  құрайды.

Басқосуда ҚР Ұлттық банкінің Батыс Қазақстан облыстық филиалы директоры Қозыбақ Құлбарақов аталған бағдарламаның талаптарына тоқталып өтті.

Оның айтуынша, бағдарламаға меншік құқығында баспанасы және басқа да ипотекалық қарыздары жоқ Қазақстанның әрбір азаматы қатыса алады. Бағдарлама қатысушысының кәсіпкерлік немесе еңбек қызметінен тұрақты расталған кірісі болуға тиіс. Қазіргі таңда «Баспана» ипотекалық ұйымы «Центркредит» банкімен, «Қазақстан Халық банкімен», «Еуразия» банкімен, «Цесна» банкімен, «АТФ» банкімен, «РБК» банкімен және «Тұрғын үй құрылыс жинақ банкімен» келісімге қол қойды. «Сбербанк» пен «Форте банк» бағдарламаға қызығушылық танытты және техникалық жұмыстарды аяқтағаннан кейін «7-20-25» ипотекалық бағдарламасы жөніндегі келісімге қол қоюға дайын. Аталмыш бағдарлама бойынша пәтер алу үшін тиісті құжаттардың болуы жөніндегі талаптар айқындалды. Атап айтқанда, әлеуетті қарыз алушы банкке еңбек немесе кәсіпкерлік қызметтен кірісінің болуын растайтын құжаттарды, ипотекалық тұрғын үй қарыздары бойынша өтелмеген берешегінің болмауы туралы мәліметті, тұрғын үйінің болмауы туралы анықтаманы, сатып алатын тұрғын үй құжаттарын және тәуелсіз бағалаушының бағасын  ұсынуға  тиіс.

– Аталған бағдарламаны іске асыру мақсатында  ҚР Ұлттық банкі БҚО филиалы шілде айының басынан бері екінші деңгейдегі банк филиалдары өкілдерімен мәжіліс өткізді. Облыс тұрғындарына жаңа бағдарлама жөнінде ақпарат беру мақсатында жергілікті бұқаралық ақпарат құралдарына материалдар жарияланып, сондай-ақ әр түрлі мекемелерде түсіндірме жұмыстары жүргізілуде.  Халықты ақпаратпен қамту көлемін кеңейту үшін Ұлттық банк филиалы тарапынан бағдарлама туралы мәліметтерді жергілікті телеарна, радио және баспа құралдарына орналастыру үшін облыстық ішкі саясат басқармасынан мемлекеттік тапсырыс шеңберінде жүзеге асыру мүмкіндігін қарастыруды сұраймыз, –  деді  Қозыбақ  Әбуұлы.

Бұдан соң құзырлы мекемелер мен құрылыс компаниясының өкілдері аталған бағдарлама туралы өз ойларын ортаға салып, түйткілдерге  тұшымды  жауаптар  алды.

– Бұл бағдарлама 4 шілдеден бастап елімізде жүзеге асырыла бастады. Бірінші күннен бастап Астана, Алматы, Ақтау, Өскемен және Орал қалаларындағы «Центркредит» банкі филиалдары арқылы бірнеше адам тұрғын үйге қол жеткізді. Біздің банкке алғашқы болып келген тұрғын аталған бағдарлама бойынша көлемі 62 шаршы метрді құрайтын, екі бөлмелі пәтерді рәсімдеді. «КазХол» ЖШС құрылыс компаниясы салған тұрғын үйді таңдаған. Ол 20 пайызды құрайтын алғашқы жарнаны төлеп, несиені 15 жылға рәсімдеді. Ай сайынғы төлем 70 мың теңге шамасын құрады. Жалпы, бағдарлама іске қосылғалы бері қызығушылық танытқан 25 адамға бағдарлама туралы кеңес берілді. Үш тұрғын несие алуға тапсырыс берген болса, олардың екеуі бүгінде мақұлданды, – деді  «Центркредит» банкі филиалының өкілі Аида  Ипатова.

Жиынды қорытындылаған Бағдат Оразалдыұлы бұқаралық ақпарат құралдары мен әлеуметтік желілер арқылы түсіндіру жұмыстарын үнемі жүргізуді, сондай-ақ бағдарламаға қатысты кез келген ақпаратты жедел әрі толық көлемде ұсыну керектігін  айтты.

Нұрбек  ОРАЗАЕВ,

«Орал  өңірі»

Осы  мақаланы  жазбас  бұрын  бірнеше  адамға:  «Сіз  бір  бүйрегіңізді  танымайтын  адамға  берер  ме  едіңіз?»  деген  сұрақ қойып,  шағын  сауалнама  жүргіздім. Сұрақ  қойған  жандардың басым  бөлігі: «Құдай  сақтасын,  балама,  жұбайыма,  бауырларыма  беруім  мүмкін, ал  танымайтын  адамға… Егер  менің  денсаулығыма  зиян  келсе,  балаларымды  кім  асырайды?» деген  бағытта  сырғытпа  жауап  берді.

Шынында да, танымайтын адамға бір бүйрегін бере салу екінің бірінің қолынан келе бермейді. Олай болса, өз қалауымен өзгеге өмір сыйлап, қуанышқа бөлеген кейіпкеріміз Абзал Әділовті бейбіт күннің батыры деп бейнелесек те жарасады. Әңгімеміздің басы «Танымайтын адамға бүйрегіңізді беруге шешім қабылдарда қиналған жоқсыз ба?» деген  сұрақпен  басталды.

Жай жымиып алған кейіпкерім  әңгімесін  бастады.

– Бірде теледидардан «Жан жылуы» бағдарламасынан қызылордалық Жанар Базарбекова деген қыздың  бүйрекке зәру екенін естіп қалдым. Сол бойда ақшам болғанда, қаражат салып, көмектесермін деп телефон нөмірін жазып алдым.  Бұл 2016 жыл болатын. Екі-үш айдан соң Жанарға хабарласып, қал-жағдайын сұрадым. Бір жылдай амандығын біліп, телефон арқылы  сөйлесіп жүрдім. Сөйтіп, оған бүйрегімінің бірін беруге шешім қабылдадым. Ол, әрине, оңай болған жоқ. Бір жылдай ойландым.

Бірақ әу бастан-ақ, жаны қиналған жандарға көмектессем деген ой  барлық қорқынышымды жеңді. 2017 жылдың маусымында жолға шығайын деп дайындалып жүргенмін. Бірақ Жанар хабарласып, өзіне күйеуінің бүйрегі келіп тұрғанын айтып, «Мүмкін болса,  шымкенттік Жәмила деген қызға көмектессеңіз» деген ұсыныс айтты. Мен бірден келісіп, Шымкентке жолға шықтым. Ол жақта мені Жәмиланың анасы мен еріктілер тобы күтіп алды. Бір-екі күн қонақ болып, олармен танысып-біліскен соң, анализдерімді тапсыра бастадым. Анализдерімнің қорытындысы  жақсы болып  шықты. Дегенмен, бізге ота Шымкентте емес, Алматыда жасалатын  болды. Өткен жылдың 20 қазанында  бізге ота жасалып, менің бір бүйрегімді Жәмилаға салды. Ота сәтті өтті. Қазіргі күнде Жәмиланың жағдайы жақсарып келеді. Мен оған хабарласып, бүйрегімді сұрап тұрамын, – деп жымиды әңгімесінің соңын әзілге шаптыра сөйлеген  Абзал.

Ол – Ақжайық ауданы, Алмалы ауылының тумасы. Ата-анасы екі бөлек кеткендіктен, 5 жасынан бастап нағашы ағасы мен жеңгесінің қолында  тәрбиеленген. Сондықтан да ол нағашы жеңгесін «Мама» деп атайды. Өзін нағашысының  баласымын деп есептейтін Абзал қаламыздағы №40 орта мектепте білім алған. Ол бала кезінде тентектеу болғанын, балалыққа тән кішігірім бұзақылық жасап, нағашыларының көңіліне  қаяу түсірген сәттер де болғандығын жасырмайды. Әйтсе де, оның ақкөңіл, мейірімді,  өзгеге қолұшын беруге дайын тұратын қарапайым азамат болып қалыптасуына өскен ұясы ықпал еткені анық. «Осындай игі қадамға баруыма нағашыларымның тәрбиесі де әсер еткен шығар. Өйткені, олар «Біреудің ала жібін аттама, өтірік айтпа» деп  жиі  айтатын»  дейді ол.

Адамдарға тек жақсылық жасауға ұмтылатын кейіпкерімізден жаңа басталған отбасылық өмірі туралы  сұрадық.

– Жұбайым Әйгеріммен ғаламтор арқылы таныстық. Екі айдай сөйлесіп жүріп, бірден ғашық болдым. Ол да Шымкенттің қызы. Мінезі ашық, өзі қарапайым. Қаламыздағы балабақшалардың бірінде қызмет етеді. Тойымыз «Sky» кафесінде өтті. Бір қуанғаным, тойды өткізген асаба, фото, бейнеоператорлар, көлік жүргізушілері өз қызметі үшін ақша алған жоқ. Мейірімді адамдарға алғысым шексіз. Той жақсы өтті. Алдағы уақытта өз баспанамызды алып, бақытты отбасының қатарын  көбейткіміз  келеді, – дейді  сөзге  сараң  кейіпкеріміз.

Біз шымкенттік Жәмиланың анасы Құрманкүл Құлмырзаевамен ұялы телефон арқылы хабарласып, Жәмиланың қал-жағдайын  сұрадық.

– Жәмиламның жер басып, аман-есен жүргені әуелі Алла, сосын Абзалымның арқасы. Аллаға мың да бір шүкір.  Сонау алыстан «Алла разылығы үшін» деп  арнайы келіп, қызыма бір бүйрегін беріп,  екінші өмір сыйлаған Абзалыма екі дүниенің жақсылығын тілеймін.  Осыдан екі-үш жыл бұрынғы жағдаймен салыстырғанда Жәмиламның жағдайы жақсы. Денсаулығы жайлап,  қалыпқа түсіп келеді. Абзалым жаныма жалау болып, менің баламдай болып кетті. Төрт-бес ай,  бір үйдің адамдарындай бірге тұрдық. Қиналып, жыласам: «Апа, жылама, бәрі жақсы болады» деп демеу болып, қамқорлық танытты. Ол келіп, «бүйрегін беремін» дегенінде де, әрі қуандық, әрі қорықтық. Бірақ ол күндердің бәрі артта қалды. Қазіргі күнде «Сіздің ауру балаңызға бүйрегімді сыйлаймын» дейтін адам миллионның ішінде біреу шығар, – дейді ерекше толқып тұрған  Жәмиланың  анасы.

– Мен қарапайым пендемін. Жастықпен, балалықпен біліп, білмей жасаған қателіктерім де болды. Ең бастысы, жүрегім адамдарға жақсылық жасағанымды қалады. Менің қолымнан келгені осы болды. Бір адамға бүйрегімді сыйладым. Енді Жәмила да өмірдің қызығы мен қуанышын көріп, бақытқа бөленсе екен деймін, – дейді мейірімді  жігіт.

Гүлжамал   ЖОЛДЫҒАЛИ,

«Орал   өңірі»

Трансплантация  тарихы

Трансплантация мәселесі 1902 жылы-ақ ғалымдар арасында қызығушылық тудырған болатын. Сол жылы австриялық зерттеуші Э. Ульман жануарлардың бүйрегін ауыстыруды тәжірибе жүзінде іске асырған болатын. Әлемде адамға тұңғыш трансплантация отасын хирург Ю. Вороной жасаған. 1950 жылдың 17 маусымында АҚШ-та бүйрек трансплантациясының отасы жасалды. Бұл отадан соң емделуші бес жыл өмір сүрген. Ең алғашқы трансплантациялық оталардың тек бүйрекке жасалуының өзіндік себебі бар. Адамның екі бүйрегі бар, сондықтан бір бүйректі донорға ешбір кедергі келтірмей алып, екінші адамға салуға болады. Әлемдік тәжірибеге көз жүгіртсек, трансплантациялық отадан кейін 37 жыл өмір сүрген адам да болыпты.

Бұрынғы КСРО аумағында да трансплантация кеңінен дамыған. Мәселен, 1951 жылы ғалым В. Демихов тұңғыш рет иттің жүрегін ауыстырған. 1967 жылы Біріккен Араб Әмірліктерінің ғалымы Кристиан Барнард адамның жүрегін ауыстыру отасын тұңғыш рет жүзеге асырған  екен. Міне, осы уақыттан бері өмірге қажетті мүшелердің трансплантациясы дами түсті. Бүгінде әлемде адам ағзасының мүшесін жасанды мүшемен немесе жасанды тінмен ауыстыру тәжірибесі де бар.

Бұл – медицина  саласының заман  ағымына сай  дамуының  нәтижесі.

(Мәлімет  ғаламтордан  алынды)

Ауыл – алтын бесік. Ауылдың топырағына аунап өскен баланың еңбекке ерте араласатыны да жасырын емес.  Ойын баласына бір мезет ауылдың үлкендері шөп шапқызып, тезек тасытып, тас соқтыратын. Алты-жеті  баладан  біріктіріп, қариялардың үйіне көмекке жіберетін. Бір үйге шөп келсе, айырларын арқалап, көршінің балалары лезде жинала қалатын. Қарап тұрсаңыз, мұның өзінде үлкен тәрбиелік мән жатыр.  Ал қазір ше? Қазіргі таңда сол көріністерді жиі көрмейміз. Бірақ  жуырда Сырым ауданы Жырақұдық ауылына барғанымызда, Сырым есімді баланың жасап жүрген тірлігіне разы болдық. Не істейді дейсіз ғой?

Қара шаруаға жаны жақын Ұзақбайдың ұлы Сырым қой қырқу маусымында  қолынан қырықтығы түспейді екен. Өзінің үйінде қырқатын қой болмаса да, әкесінің қасынан қалмай, өзгелердің қойын қырқу кезінде үйреніп алып, содан бері тынымсыз еңбектеніп келеді. Қой қырқу кез келген адамдардың қолынан келер, бірақ көбісінің бұл кәсіпке жолағысы жоқ. Қой жүнінің жағымсыз иісі мен жүнге толған шоғайнасы қырқуға мұрша бермес. Әсіресе, қой малын көптеп бағып отырғандар үшін ол  үлкен шаруа. Айтпақшы, қырқу науқаны кезінде қойшылар Сырымды үйіне іздеп келетін болыпты. Қарапайым отбасыдан шыққан оның апасы Жанар биыл 11 жылдық мектепті сәтті аяқтаса, інісі Оралхан 8-сыныпты тәмамдады. Бұл күнде Оралхан күрестің дзюдо, самбо түрлерімен айналысып, облыстық додаларда топ жарып жүр. Жоғарыда аталған бір үйдің үш баласының ауыз толтырып айтарлықтай жетістіктеріне ата-анасының берген тәлім-тәрбиесі  елді  сүйсінтеді.

— Осыдан үш-төрт жыл бұрын әкеме көмектесе жүріп үйреніп алдым. Кейін қой қырқу науқанында өзім шығатын болдым. Қолыма жаңа қырықтық (қой қырқатын қайшы) алып, қырдағы малшылардың қойларын қырқып беремін. Бір қойды қырқу құны — 250 теңге. Сөйтіп тапқан тиын-тебенімді өз қажеттілігіме жұмсаймын. Қазіргі таңда күніне 20-25 қой қырқамын. Ол да қой жүнінің сапасына байланысты. Егер жүні көтеріліп, бабына келген болса, қырқу кезінде еш қиындық туғызбайды. Қырықтықтың жарамдылығы – бір жыл. Келесі жылы жаңа қырықтықпен шығуға тура келеді. Өткен жылдың жазында жүздің үстінде қой қырықтым, – дейді  Сырым  Бақи.

«Еңбек етсең, емерсің» демекші, Сырымның кішкентай күнінен еңбекке араласып жүргендігі – тұрғыластарына үлгі. Қазіргі таңда кейіпкеріміз аудан орталығындағы Сырым колледжінде ауыл шаруашылығы мамандығы бойынша  білім  алуда.

Темір  БОЛАТ,

Сырым  ауданы

2018  жылдың  12  маусым  күнгі  «Орал өңірі»  газетінің №63  санында  «Қабыршақты  көң-қоқыс  пен  өлексеге  тола  бере  ме?»  атты  мақала  жарияланған  болатын.

Редакциямызға  Ақжайық  ауданының  әкімі  Әділ  Жоламанов  мақалада  баяндалған  жағдай бойынша  атқарылған  жұмыстарды  ресми хабарлап,  4  шілде  күні  төмендегідей  мәтінде  хат (№7-19/939)  жолдады.

Қабыршақты ауылында ауыл активімен екі рет жиналыс өткізіліп, жиналыс барысында ауыл ішінің тазалығы, ҚР «Ветеринария туралы» заңының 25-бабының талаптарына сай  мал иесі мал кенеттен өлген жағдайда, ауырған немесе олар әдеттен тыс мiнез көрсеткен жағдайларда ветеринария саласындағы мамандарға шұғыл хабарлау, мемлекеттiк ветеринариялық-санитариялық инспекторлар келгенге дейiн жануарларды оқшаулап ұстау жөнінде шаралар қолдану тиістігі жөнінде түсіндіру жұмыстары жүргізілді. Қабыршақты ауылы бойынша екі мәрте санитариялық тазалық, сенбілік ұйымдастырылып, Көшім өзенінің жағасы, ауыл көшелері толық тазалаудан өтті. Осындай сенбіліктер алдағы уақытта да жүргізілетін болады. Ауыл ішінде өсіп тұрған ағаштардың түптерін қопсыту және әрлеу жұмыстары жүргізілді. Тұрғындардың қыс мезгілінде шығарылған көң-қоқыстарын шаруа қожалықтарының техникаларымен (3 трактор) ақылы түрде шығару жұмыстары жүргізілуде. Күні бүгінге барлығы 828 тонна көң-қоқыс шығарылды. Бұл жұмыс әлі де жалғасуда. Ауыл активінің және ақсақалдар кеңесінің келісімімен тозығы жеткен Лениннің  ескерткіші  алынды.

Мал моласының айналасы жиналып, қазіргі уақытта жаңа бейімделген шұңқыр қазылып, жергілікті құрылыс материалымен шұңқырдың беті жабылып, профлист қаңылтырымен айналасы қоршалып, қақпа орнатылды. Сонымен қатар аудандық бюджеттен 2 500 000 теңге көлемінде қаражат бөлініп, Қабыршақты ауылында жаңадан мал моласының құрылысын  жүргізу  жоспарлануда.

Қабыршақты ауылдық округінің әкімі С. Бимағанбетов жұмыстан босату туралы өз еркімен жазған өтініші негізінде атқаратын лауазымынан босатылды. Ақжайық ауданының ветеринария бөлімінің басшысы М. З. Нуралиевке аудан әкімінің 2018 жылғы 18 маусымдағы №68 өкімімен атқаратын лауазымына толық сәйкес еместігі туралы ескерту түріндегі жаза қолданылды. Ақжайық аудандық ветеринариялық станциясының  директоры уақытша міндетін атқарушы Қ. Б. Курмановқа Қазақстан Республикасы Ауыл шаруашылығы министрлігі Ветеринариялық бақылау және қадағалау комитетінің Ақжайық аудандық аумақтық инспекциясының тексерісі қорытындысымен 20 айлық есептік көрсеткіш мөлшерінде әкімшілік айыппұл салынды. Қабыршақты ауылдық округі ветеринариялық пункт меңгерушісі Г. Шутеева жұмыстан босату туралы өз еркімен жазған өтініші негізінде атқаратын қызметінен босатылды. Ақжайық аудандық ветеринария бөлімінің бас маманы Ж. Б. Сдыковаға Қазақстан Республикасы Ауыл шаруашылығы министрлігі Ветеринариялық бақылау және қадағалау комитетінің Ақжайық аудандық аумақтық инспекциясының тексерісі қорытындысымен «ескерту» түріндегі әкімшілік хаттама толтырылды.

2016 жылы Қабыршақты ауылында бруцеллез ауруының қойешкі малдары арасында көп таралуына байланысты сауықтыру жұмыстары жүргізілген болатын.

Сауықтыру жұмыстары аясында Әсия Аймурзинаның қойларынан қан алынып, ветеринариялық зертхананың SO-16-1-01(08)-01394-А-С, SO-16-L-01108-01395-А-С сараптама актісі негізінде екі бас қой малы бруцеллезге оң нәтиже берген. Ақжайық ауданы ветеринария бөлімінің бас маманы 2016 жылғы 13 мамырда №53 санды нұсқаманы мал иесі  Әсия Аймурзинаның жолдасы С. Хайруллинге табыстаған. Мал иесі ветеринариялық-санитариялық қағида талаптарына сай 15 күн ішінде ет комбинатына тапсыруы тиіс еді. Алайда мал иесі бруцеллезге шалдыққан малдарын өз қажеттіліктеріне сойып алған. Осыған байланысты әкімшілік іс қозғау үшін тиісті құжаттар жинақталып, аудандық ветеринариялық инспекцияға ұсынылды. Аталған мал иесінің іс-әрекеті ветеринариялық-санитариялық қағида талаптарына сай дұрыс-бұрыстығы сот отырысында қаралып, оған әкімшілік айыппұл салынды. 2016 жылы сауықтыру жұмыстарын жүргізу барысында төлдерге арналған сырға кешіктіріліп жеткізілуіне байланысты төлден қан алу жұмыстары кестеден қалыс жүргізілді. Жалпы, Қабыршақты ауылында 2016 жылы жүргізілген сауықтыру жұмыстарының нәтижесінде 161 бас қой-ешкі оң нәтиже беріп, ет комбинатына тапсырылды. Бруцеллезге шалдыққан малдың иелеріне тиісті өтемақы төленді. 2017 жылы қой-ешкі малдары арасында бруцеллез ауруы тіркелген жоқ. 2018 жылдың 6 айында ауылдық округ бойынша 4 бас қой малынан бруцеллез ауруы анықталып, ет комбинатына  тапсырылды.

Бруцеллез ауруының адамдарға жұғуының негізгі көзі саналатын қой-ешкі малы арасында бруцеллез ауруының алдын алу мақсатында аудан бойынша 2016 жылы сегіз елді мекенде сауықтыру жұмыстары жүргізілген болатын. Нәтижесінде 2017 жылдың 6 айында бруцеллезге 474 бас қой-ешкі малы шалдыққан болса, 2018 жылдың 6 айында 143 бас қой-ешкі шалдығып, үш есеге азайып отыр. Бруцеллез созылмалы өтетін аурулардың қатарына жататындықтан, оны тез арада жойып жіберу қиындық туғызуда. Алайда осы аурудың алдын алу бойынша жұмыстар тиісті нәтижеге қол жеткізілгенге дейін жүйелі түрде жүргізілетін болады.

Шілденің  12-сі  күні  БҚО  әдеп жөніндегі  кеңесінің  кезекті отырысында  Зеленов  ауданы Рубежин  ауылының  әкімі  А. Жаңабаевқа  қатысты  тәртіптік  іс  материалы  қаралды.

ҚР Мемлекеттік қызмет істері және сыбайлас жемқорлыққа қарсы іс-қимыл агенттігі облыстық департаментінің мемлекеттік қызмет саласын бақылау басқармасының бас маманы Думан Ермановтың мәліметінше, ауыл әкімі қарауындағы қызметкерлердің іссапар қаражатынан екі жыл бойына бес мың теңгеден қаржы жинап отырған. Бұл  қаражаттың нақты әкімшілік қажеттілігіне жұмсалған-жұмсалмағаны беймәлім. «Мемлекеттік қызмет туралы» ҚР заңының 52-бабы мен 1-тармағы бойынша мемлекеттiк қызметшілерге ҚР Үкiметi айқындайтын тәртiппен қызметтiк iссапарларға арналған шығыстары өтеледi. Әкім мемлекеттік қызметшілер құқын бұзып, олардан заңсыз жолмен қаржы жинаған. 2018 жылғы сәуірдің 9-ында ауыл әкімі аппаратының бас маманынан бес мың теңге жинағаны анықталды. Тексеру барысында куәгер ретінде жауап алынған бас маман, бухгалтер Аймурзиев аппарат қызметкерлерінен ақша жиналатынын растады. Әкімшіліктің «Ford Mondeo» қызметтік көлігінің жүргізушісі Байғазиев бірнеше мәрте өз еркімен 5 мың теңгеден бухгалтерге ақша бергенін айтты. Оған бұл қаржы қаладан газет тасуға және интернет модеміне бірлік салуға, көлікті жөндеуге жұмсалатыны түсіндірілген. Бас маман Әбікешевтің сөзінше, Айбар Жаңабаев 2015 жылы желтоқсан айынан бастап әкім болып тағайындалғалы мемлекеттік қызметшілердің іссапар ақысынан қаржы жинау басталған. Куәгерлер мен алдын ала тексеру материалы есебінше іссапар қаражатынан шамамен 190 мың теңге жиналған. Осы жерде басын ашып айта кетелік, жиналған қаражат ауыл әкімінің жеке мүддесіне емес, ауыл әкімі аппаратының ортақ шаруасына жұмсалғандығы анықталған. Сөйте тұра, ауыл әкімінің қарауындағылардан ақша жинауы  заңға  қайшы  әрекет.

– Әкім болып келгеннен кейін бір маман үш интернет модеміне өз қалтасынан ылғи ақша салып отыратынын айтып шағымданды. Сосын ұжымды жинап, ортақ қаражат шығарып отыруды ұсындым. Сонымен қатар  қызметтік көлік жиі бұзылатын болған соң, жөндетуге тура келеді. Бұл ісімнің заңсыз екенін мойындаймын, – деді Айбар Жаңабаев.

– Сіз әкімсіз. Ұжым ұсынысыңызды заңды бұйрық ретінде қабылдайды. Басшыға кім қарсы шығады?! Оларды қорғаудың орнына құқығын бұзып отырсыз, – деді ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің облыстық департаментінің басшысы, әдеп кеңесінің төрағасы Болат Исақов. Әдеп жөніндегі кеңес мүшелері Зеленов ауданының әкімі Асхат Шахаровқа Рубежин ауылының әкімі Айбар Жаңабаевты мемлекеттік қызметке кір келтіретін заңға қайшы әрекетке жол бергені үшін атқаратын лауазымына толық сәйкес еместігі жөнінде әкімшілік шараға тарту жөнінде ұсыныс хат жолдауды мақұлдады.

Кеңес отырысында көліктегі қоғамдық денсаулық сақтау департаменті Орал бөлімшелік қоғамдық денсаулық сақтау басқармасының басшысы Айтқали Батыровтың тәртіптік ісі қаралды. Орал көлік прокуратурасының өкілі Шаһзада Әлібекованың түсіндіруінше, биылғы мамыр айында Орал бөлімшелік қоғамдық денсаулық сақтау басқармасы Оралдан басқа қалаларға қатынайтын пойыздарды тексеру барысында жыл басынан алты әкімшілік іс қозғаған. Наурыз айында Орал – Алматы бағытында жүретін жолаушылар пойызын тексеріп, акт құжатында ішек құртының бактериясы табылуына қатысты төрт фактіні және басқа да бұзушылықтарды көрсеткен. Сол  үшін жолсерікті ғана жауапқа тартып,  оған  айыппұл  салған.

– Арнайы қолғап болмағаны, су шүмегінің бұзылғаны немесе басқа бұзушылықтар болғаны үшін неге жолсеріктер ғана кінәлі? Тексерушілер ҚР Әкімшілік құқықбұзушылық кодексіне сәйкес, хаттама толтырған кезде жауапқа тартылғандарға, жеті күн ішінде төлеген жағдайда айыппұлдың 50 пайызын ғана өтеуге болатынын түсіндірмеген. Және бактерияның табылуына байланысты кешенді тексеру жүргізіп, заңды және лауазымды тұлғаларды, мәселен, бұл іске жауапты «Жолаушылар тасымалы» АҚ басшылығын жауапқа тартуды ұсынбаған.

Яғни тексеру жүйелі ұйымдастырылмаған, – деді Шаһзада Әлібекова.

Орал бөлімшелік қоғамдық денсаулық сақтау басқармасының басшысы Айтқали Батыров басқарма мамандары пойызды бір сағат ішінде тексеріп үлгермейтінін айтып ақталды.

– Мемлекеттік қызметші өзінің міндетін тиімді атқарып, жұмыс уақытын дұрыс ұйымдастыра білуі тиіс. Сондықтан ұжым қызметкерлерін жауапты іске жүйелі жұмылдырмай, міндетіне салғырт қарағаны үшін Айтқали Батыровқа қатаң сөгіс ретінде ескерту беруге ұсыныс жасаймын, – деді облыстық әдеп кеңесінің төрағасы Болат Исақов. Төраға ұсынысын кеңес мүшелері  бірауыздан  қолдады.

Кеңес отырысында Орал қаласының әкімі Мұрат Мұқаев жер телімдерін бөлуді заңға сәйкес жетілдіру және бұл үрдіске жариялық пен ашықтық сипат беруді қамтамасыз ету бағытында атқарылып жатырған жұмыстар жөнінде баяндады. Сонымен қатар осы жиында әдеп кеңесінің төрағасы Болат Исақов облыстық қоғамдық денсаулық сақтау департаменті басшысының орынбасары, осы мекемедегі тәртіптік комиссияның төрағасы Нұрлыбек Мұсаевқа тәртіптік комиссияның жұмысын жетілдіруді және сыбайлас жемқорлыққа жол бермейтін жұмыстарды  ширатуды   тапсырды.

Нұртай  ТЕКЕБАЕВ,

«Орал  өңірі»

Бейсенбі  күні  ҚР  Қоғамдық  даму  министрлігі  Азаматтық қоғам  комитетінің  төрағасы  Әлия  Ғалымова  жұмыс  сапарымен өңірімізде  болды.

Облыс әкімдігінде комитет басшысының қатысуымен өткен кездесуде облыс әкімінің орынбасары Ғабидолла Оспанқұлов, облыстық азаматтық қоғам өкілдері, үкіметтік емес ұйым мүшелері бас қосты.

Кездесуде сөз алған Әлия Қайратқызы мемлекетпен азаматтық сектордың өзара іс-қимыл жасау саласындағы мемлекеттік саясаттың бағыт-бағдарларын және осы саладағы түйткілді мәселелерді шешу жолдары туралы айтып өтті. Сондай-ақ ол мемлекеттік әлеуметтік тапсырыстарды қалыптастыру, оларды іске асыру бағытындағы атқарылар жұмыстарға, қайта құрылған министрліктің алға қойған міндеттері мен мақсаттарына тоқталды.

Айта кетейік, ағымдағы жылдың 13 маусымында Мемлекет басшысы «Коммерциялық емес ұйымдардың қызметі туралы кейбір заңнамалық актілерге өзгерістер мен толықтырулар енгізу туралы» заңға қол қойды. Бұл заң мемлекеттік әлеуметтік тапсырыстың тиімділігін және ашықтығын арттыруға бағытталған. Заңда мақсатты топтардың, ҮЕҰ ұсыныстары бойынша сұраныстарды зерттеу және талдау негізінде мемлекеттік сатып алуды қалыптастыру үдерісіне бірыңғай көзқарастар келтірілген. Сондай-ақ азаматтар мен үкіметтік емес ұйымдарға өздерінің ұсыныстарын тиісті мемлекеттік құрылымдарға ұсыну арқылы бұл процеске белсенді қатысуға мүмкіндік берді. Бұдан басқа мемлекеттік сатып алу  стандарттары енгізілді, бұл жобаның әлеуметтік әсерін арттырады. Мемлекеттік сатып алулардың нәтижелерін бағалау жүргізілді, бұл жобаның тиімділігін және халықтың қызметтер сапасымен қанағаттану дәрежесін анықтауға мүмкіндік береді.

Жиында жергілікті үкіметтік емес ұйымдар мен қоғамдық бірлестіктердің өкілдері өз ойлары мен пікірлерін ортаға салды. Айтылған түйткілдердің ішінде ұзақ мерзімді жобаларды қаржыландыру, қоғамдық кеңес құрамдарын қайта қарастыру, оның құрамындағы мемлекеттік құрылым өкілдерінің санын азайтып, азаматтық қоғам өкілдерінің үлесін көбейту туралы мәселелер бар.

Әлия Қайратқызы айтылған ұсыныстардың орынды екендігін, осы түйткілдерді шешу жолында жұмыстар жүргізіліп жатқандығын жеткізді.

Сондай-ақ комитет басшысы өңірлік «Рухани жаңғыру» кеңсесінде болып, жұмыс барысымен  танысты.

Нұрдәулет  АСЫЛ

Ұлыбританиядағы  Қазақстан  Республикасының  елшілігі  мен  ҚР  Ауыл  шаруашылығы  министрлігінің  қолдауымен  құрамында  облысымыздағы  «Кублей»,  «Жайық  Ет»  және  «Батыс  Пауэр»  сынды  үш  ірі  кәсіпорын  басшылары  бар  БҚО  делегациясы  Ұлыбританияға  барды.

Облыс делегациясы биылғы Астана экономикалық форумы барысында қол қойылған меморандумды жүзеге асырудың тиімді механизмін әзірлеу үшін «Dunbia» компаниясымен келіссөз жүргізіп, олардың өндірістік нысандарын (сою, орау, өңдеу цехтарын) аралады. «Dunbia» компаниясының бас кеңсесінде ет өңдеудің толық циклі бойынша жобаның іске асырылу барысы талқыланды.

– ҚР Президенті Нұрсұлтан Әбішұлы Назарбаев атап өткендей, аграрлық сектор экономиканың жаңа қозғаушы күші болуы керек. Біздің өңір ауыл  шаруашылығында, әсіресе, мал шаруашылығында үлкен әлеуетке ие. Сондықтан біз сіздермен бірге аймақтың агроөнеркәсіптік кешенін дамыту мақсатында жемісті ынтымақтастық орнатуға ниеттіміз. Бізді қалдықсыз өндіріс технологиясы және ет өнімдерін терең өңдеуді қолдану аясындағы тәжірибеңіз өте қызықтырып отыр, – деді облыс әкімі Алтай Көлгінов.

Жиында «Dunbia» компаниясы батысқазақстандықтармен бірге жұмыс істеуге, маркетинг саласында өз тәжірибесімен бөлісуге дайын екенін білдірді. Шетел нарықтарына қазақстандық етті ілгерілетуді қамтамасыз етуге мүдделі. «Жайық Ет» компаниясының директоры Т. Ескендіров атап өткендей, «Dunbia» сияқты жаһандық компаниялардың қазақстандық жобаларды іске асыруы мен инвестициялауы қазақстандық кәсіпорындардың деңгейін елеулі түрде көтеріп, басқа шетелдік инвесторлар үшін үлгі  бола  алады.

Қос тарап өкілдері ауыл шаруашылығын цифрландыру саласын дамыту мақсатында өткен жұмыс сапары өте жемісті  болғанын  атап  өтті.

Батысқазақстандық делегация сондай-ақ «Farm Wizard» компаниясының өндірушіден тұтынушыға дейінгі өнімнің жеткізілуін қадағалау жүйесімен танысты. Аталмыш бағдарлама тұтынушыға жануардың (қай үйірден, қай шаруашылықтан екендігін) туғаннан бастап, етінің үстел басына келгенге дейінгі бүкіл өмірін бақылауға мүмкіндік береді. Бұл жұмыс бағыты ауыл шаруашылығын цифрландыру үшін қойылған міндет талаптарына сәйкес жүзеге  асырылатын  болады.

Айта кету керек, «Dunbia» – қызыл ет өнімдерін қайта өңдеу бойынша әлемдегі жетекші компаниялардың бірі. Олар бөлшек және көтерме сауда үшін сиыр еті, қой еті мен шошқа етін өндірумен қатар, жергілікті, ұлттық және халықаралық деңгейде тамақтандырумен де айналысады. Аталған компанияға Ұлыбритания мен Ирландиядан қарауында 1 миллионнан астам ірі қара мал және 3 миллионнан астам қойы бар 25 кәсіпорын кіреді. Өндіріске 30 мыңнан астам фермер тартылған және 7 мың адам жұмыспен қамтылған. Әлем елдерінде компанияның 50-ден астам өкілдігі жұмыс істейді. Кәсіпорын тұрақты экономикалық өсімді көрсетіп келе жатыр және айналым қаражаты 2 млрд. евроны құрайды. «Dunbia» еуропалық нарыққа жоғары сапалы өнім жеткізуші болып табылады, оның ішінде «McDonalds», «Tesko», «M&S» және т.б. ірі сауда желілерімен жұмыс жасайды. Сондай-ақ, компания агроөнеркәсіптік кешенде мамандар дайындайтын еуропалық университеттермен серіктес болып табылады  әрі компания гранттар  да  тағайындайды.

Мәди   ЫҚЫЛАС

Бейсенбі  күні  облыстық  мәслихатта  «Гендерлік  саясатты  іске  асыруда  мемлекеттік құрылымдар  мен үкіметтік  емес ұйымдардың  өзара  іс-қимылы. Аймақтық  ынтымақтастық  тәжірибесі»  атты  халықаралық  конференция өтті.  Шара  барысында қонақтар өңірдегі қыз-келіншектер  басшылық  ететін  кәсіпорын-дардың  өнімдері  қойылған көрмеге куә  болды.

Аталмыш басқосуды  ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссиямен бірлесіп облыс әкімдігі ұйымдастырған. Жиынға ҚР Парламенті Мәжілісінің депутаттары, жергілікті атқарушы құрылымдардың, үкіметтік емес ұйымдардың өкілдері және Ресейдің Орынбор, Самара, Саратов облыстарынан келген іскер әйелдер қатысты.

Нәзік жандылар ел экономикасының дамуына зор үлес қосып келеді. Айта кетсек, облысымыз бойынша 188 әйел басшы лауазымдық қызметте жүрсе, оның екеуі ҚР Парламенті Сенаты мен  Мәжілісте депутат, біреуі облыс әкімінің орынбасары және төрт әйел аудан әкімдерінің орынбасарлары болып еңбек етуде. Сондай-ақ облыстағы 48 мың кәсіпкерлік субъектісінің 19-ын, яғни облыстағы компаниялардың 41 пайызын бизнес-ледилер басқарып  отыр.

Жиынның модераторы болған Ұлттық комиссия төрағасының орынбасары Елена Тарасенко еліміздегі отбасылық-гендерлік саясатты іске асырудағы қабылданған пәрменді шаралар мен жетістіктер туралы айтты.  Сондай-ақ ол елімізде отбасы және гендерлік саясатқа ерекше көңіл бөлініп келе жатқанын және  Елбасының 2016 жылы отбасы институтын  қолдауға бағытталған отбасылық және гендерлік саясат тұжырымдамасына қол қойғанын жеткізді.  Тұжырымдама 2030 жылға дейін жүзеге асатын болады.

Конференцияда сөз алған облыс әкімінің орынбасары Ғабидолла Оспанқұлов  гендерлік саясаттың өңірде жүзеге асырылу барысы туралы баяндады.

– Биыл еліміздің бас қаласы Астанаға да, халықаралық ұйымдардың тиімді алаңына айналған ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның құрылғанына да 20 жыл болып отыр. Мереке қарсаңында Елордаға Ақ Жайықтан Мәншүк Мәметованың ескерткіші сыйға тартылды. Отан үшін от кешкен қазақтың  қаһарман қызының бейнесі Астана төріне көрік беруде. Сол ескерткіш арқылы Елордаға келген шетелдік қонақтар қазақ қыздарының қайсар екенін білетін болады. Сонымен қоса осыдан 20 жыл бұрын облыста  «Жайық өңірінің әйелдер кеңесі» құрылды. Аталмыш кеңес жұмысын жүйелі жүргізіп, РФ-ның Орынбор, Астрахан, Саратов облыстарымен достық қарым-қатынас орнатты. Оннан астам халықаралық жобалар дайындады. Өңірде «Іскер әйелдер қауымдастығы», «Жайық дауысы», «Арба», «Ақ отау»  секілді қоғамдық бірлестіктер гендерлік саясатты жүзеге асыруда. Біз Орал қаласының отбасы және гендерлік саясат мәселелері талқыланатын халықаралық басқосу орталығына айналғанын  қалаймыз. Бұл орайда сала мамандарының тәжірибесі де жеткілікті. Осы кезге дейін Ақ Жайық өңірінде республикалық, халықаралық маңызы бар бірнеше форумдар ұйымдастырылды. Батыс Қазақстан облысы Елбасының «Нұрлы жер», «Нұрлы  жол» бағдарламалары бойынша жұмыстарды жүйелі жүргізіп келеді. Аудан-ауылдарға көгілдір отын, ауыз су кіргізіліп, жолдар салынуда. Енді Орал қаласында «Ақжайық» шағынауданы бой көтеретін болады. Кез келген салада қыз-келіншектерді кездестіру қиын емес. Сол себепті барша нәзік жандылардың деніне саулық, отбасына амандық, еңбектеріне жеміс тілеймін, – деді Ғабидолла Абдоллаұлы.

ҚР Парламенті Мәжілісінің депутаты Құралай Қарекен әйел адамның құқықтары мен мүмкіндіктері және стратегиялық бағдарламаларға қосар үлесі туралы  ойын  жеткізді.

Ал  РФ  Орынбор облысының вице-губернаторы Павел Самсоновтың айтуынша, қазіргі қыз-келіншектер бұрынғыдай отбасы, ошақ қасында қалып қойған жоқ. Олар саясатта да, кәсіпкерлікте де, құрылыс саласы секілді ауыр жұмыстарда да межелі жетістікке  жетуде.

– Ресейде нәзік жандылардың әр салада жұмыс жасауына жағдай жасалған. Сондай-ақ оның отбасындағы ана, жар, келін ретіндегі орнына  басымдық беріліп,  насихатталуда. Өйткені қандай қайсар әйел болса да, арқа сүйейтін отағасынсыз жетістікке жете алмасы анық. Бүгінгі конференцияға қатысып отырған нәзік жандыларға айтарым, қай салада жүрсеңіз де, туған жеріңіздің гүлденуіне үлес қосып, отбасындағы берекенің бастауы екеніңізді естен шығармаңыз, — деді Павел Васильевич.

«Самара облысының әйелдер кеңесі» қоғамдық ұйым төрағасының орынбасары Татьяна Ерошкинаның айтуынша, кеңестердің  құрамында сол өңірде тұратын  1739 мың  қыз-келіншек бар. Қоғамдық ұйымның мақсаты – әйелдердің шешім қабылдау қабілетін дамытып, билік құрылымдарымен байланыс орнатудың  маңыздылығын  түсіндіру.

– Кеңестегі әр сегізінші әйел ғылыми атақ қорғаған. Сондықтан ғылыми-тәжірибелік конференцияға нәзік жандылар жиі қатысып, өзіндік көзқарастарын білдіреді. Ғылыми-тәжірибелік конференциялардан соң бизнестегі  келіншектердің тәжірибесі, ақыл-кеңесі жазылған басылымдар жарияланады. Біздің облыста жыл сайын «Аналар күні», «Жылдың үздік әйелі», «Ауыл бикесі» секілді шаралар ұйымдастырылады. Сондай-ақ «Біздің байлығымыз – ұлттық жанұя», «Балаларға денсаулық», «Ұзақ өмір сүрудің жолы» секілді әлеуметтік жобаларға гранттар бөлінеді. Ресейдегі әйелдер кеңесі «Ресей жесірлері» атты қайырымдылық акцияларын да жиі өткізеді, – дейді Татьяна Петровна.

Конференция барысында отбасының беделі, ана мен баланы қорғау, қыз-келіншектердің  мүмкіндіктерін кеңейту мәселелері  кеңінен талқыланды.

Гүлсезім   БИЯШЕВА,

«Орал   өңірі»

Биыл елімізде балаларды бірінші сыныпқа қабылдау ережесі өзгерді.  Осы уақытқа дейін алты жасқа толған балалар ғана бірінші сыныпқа қабылданатын. Ел Үкіметінің 2018 жылдың 10 мамырдағы қаулысына сәйкес ағымдағы жылдың соңына дейін алты жасқа толатын балалар да бірінші сыныпқа қабылданады.

Білім заңнамасындағы бұл өзгерісті болашақ оқушылардың ата-аналары әр түрлі қабылдап отыр. Бірі қазіргі мектеп бағдарламасының күрделілігін алға тартып, балаларының ерте бастан партаға отырғанына қарсылық танытса, өзгелері керісінше бала мектепке неғұрлым ерте барса, оқу бағдарламасын тез әрі жеңіл қабылдайды деген пікір білдіруде.

— Бірінші сыныпқа қабылдау ережесі өзгергенін тұңғышым балабақшаны бітірер кезде білдім.

Қызым желтоқсан айында алты жасқа толады. Құжаттарды алып,

Орал қаласындағы бір мектепке бардым. Мектеп директоры алғашында даярлық сыныбына қабылдаймыз деп құжаттарымызды алып қалғанымен, бірер күннен соң қызымның бірден бірінші сыныпқа қабылданатынын айтты. «Жоғарыдан келген бұйрық солай, жыл соңына дейін алты жасқа толатын балалардың барлығы даярлық сыныбына емес, бірінші сыныпқа қабылдануы тиіс» деп отыр. Қазір қызымды ақылы даярлық курсына апарып жүрмін.

Даярлық сыныбына бармағандықтан, мектеп бағдарламасын меңгеріп кетуі қиын болатын шығар, — дейді алғашқы оқу жылы жақындаған сайын көңілі алаңдаған Орал қаласының тұрғыны Бибігүл Ержанова.

Ал бес жасар Қарақаттың анасы Кәмшат Өскінова заңдағы өзгеріске қуанып отыр. «Қазан айында алтыға толатындықтан, келер жылға дейін күтудің қажеті шамалы. Қызым өз қатарластарымен бірге оқитын болды» дейді ол.

Бірінші сыныпқа қабылдау ережесіндегі өзгерістер әлеуметтік желілерде қызу талқылануда. Әсіресе, Whatsapp  желісінде «биыл алтыға толатын баламды даярлық сыныбына қабылдамай жатыр», «келер жылдан бастап даярлық сыныбы мүлдем болмайды екен» деген ақпараттар желдей есіп жүр.

Мәселенің анық-қанығын білмекке облыстық білім басқармасына бардық. Басшының орынбасары Зәуре Ғұмарованың айтуынша, осыған дейін бірінші сыныпқа ағымдағы жылдың 1 қыркүйегінде толық алты жасқа толған балалар қабылданып келген еді. Алайда аталмыш талап ата-аналардың наразылығын тудырғандықтан, дайындық деңгейіне қарамастан, ағымдағы күнтізбелік жылы алты жасқа толатын барлық баланың бірінші сыныпқа қабылдануын қамтамасыз ететін жаңа талап енгізіліп отыр. Алайда бұл барлық бес жасқа толған балаларды мектепке дейінгі ұйымдардан шығару дегенді білдірмейді.

— Қазіргі таңда бұл мәселе Орал қаласының мектепке дейінгі ұйымдарында көтеріліп келеді. Қалалық білім беру бөлімі бес жасқа толған балалар бойынша талдаулар жасап, ата-аналармен түсіндіру жұмыстарын жүргізуде. Кейбір ата-аналар заңдағы өзгерісті дұрыс түсінбей жүр. Ережеде қыркүйек-желтоқсан айларында туған балалардың биылдан бастап 1-сыныпқа бара алатыны туралы жазылған. Ешкім де бес жасар баланы даярлық сыныбына емес, бірінші сыныпқа беруге тиіссің деп міндеттеп отырған жоқ, — дейді Зәуре Базарғалиқызы.

Облыс орталығында мектепалды даярлық мектеп жанындағы 28 шағын орталықта және 42 мектептегі даярлық сыныптарында  жүзеге асырылса, олардың елуі балабақша режімінде, яғни таңертеңнен кешке дейін жұмыс істейді.

— Микроучаскелер бойынша сұрақтар өте көп түседі. Білім алушының ата-анасы немесе өзге де заңды өкілі білім алу үшін кез келген білім беру ұйымын таңдауға құқылы. Бірінші кезекте тұрғылықты жері бойынша сол мектеп аумағындағы балалар қабылданады,  қалған орындарға ата-анасының өтініші негізінде өзге аумақтарда тұратын балалар орналастырылады, — дейді З. Ғұмарова.

Мектепке құжат қабылдау уақыты 1 маусым мен 30 тамыз аралығын қамтиды. Қажетті құжаттар тізімінен бұған дейін міндетті болған мекенжай анықтамасы алынып тасталды. Яғни ата-ананың және өзге де заңды өкілінің өтініші, баланың туу туралы куәлігінің көшірмесі, денсаулық жағдайы туралы анықтама және екі дана 3х4 көлеміндегі фотосурет қажет. Білім беру ұйымына қабылдаудан бас тартқан жағдайда ата-аналар облыстық білім басқармасына 26-04-68, 26-04-65 және 26-05-04 телефондары арқылы шағымдана алады.

Динара   ЖҰМАБЕКҚЫЗЫ,

«Орал  өңірі»