Өткен  сенбіде  облыс  әкімі  Алтай  Көлгінов  Қазталовта  жұмыс  сапарымен  болып, аудан  тұрғындарымен  кездесіп, жүріп  жатқан  құрылыс   жұмыстарымен  танысты.

Облыс   басшысы  әуелі  аудан  орталығындағы  салынып  жатқан  саз  мектебінде  болды. Номиналдық қуаты 24 оқушыға арналған саз мектебінің жобалық құны – 87 млн. 615,9 мың теңге. Бұл жобаға облыстық бюджет есебінен әзірге 44 млн. 500 мың теңге бөлініп, құрылыс жұмыстарын «Жолаушы жол» ЖШС жүргізуде. Алдағы уақытта саз мектебінде би, музыкалық аспаптарды үйрету сыныптары, концерттік залы, гардероб, санитарлық торабы іске қосылады  деп  жоспарлануда.

Құрылыс нысанын аралап көрген облыс әкімі, ауыл ақсақалдары, мәслихат депутаттары және қоғамдық ұйым өкілдерімен кездесті.

– Қазталов ауданында ауқымды жобалар жүзеге асуда. Жалпақталдан асқан қатқыл табанды жолды аудан орталығына тарту  бағытындағы жұмыс басталып кетті. Сонымен қатар биыл аудандағы 13 елді мекенді көгілдір отынға қосу жұмыстарын бастап жатырмыз. 16 елді мекенге газ тартуға жобалық-сметалық құжаттар дайындалуда. Соның сыртында Қазталов, Жалпақтал ауылдарының ішкі жолдарын жасау да қолға алынуда. Бұдан басқа тұрғын үй құрылысы да бар, – деді  кездесуде  Алтай  Сейдірұлы.

Кездесу барысында Қазталов ауданының әкімі Абат Шыныбеков ауданның әлеуметтік-экономикалық дамуы туралы баяндаса, ауыл ақсақалдары осындай жұмыстар үшін облыс әкіміне ел атынан ризашылықтарын жеткізді. Мәселен, еңбек ардагері Тұрақбай Дүйсенов ауданда соңғы жылдары ел қуанарлық істердің жүзеге  асып  жатқанын  айтты.

–Ауданымызда елді мекендерді көгілдір отын, таза ауыз сумен қамту үлкен қарқынмен жүруде, – деді ол. – Сонымен қатар өткен жылы аудан орталығында 100 орындық мектеп жанындағы интернат, 22 тұрғын үй салынып, пайдалануға берілсе, биыл сол жұмыстар жалғасып, Қазталовта саз мектебі, Жалпақтал ауылында тұрғын үй құрылысы жүргізілуде. Ауыл шаруашылығы саласын дамыту мақсатындағы мемлекеттік бағдарламалардың игілігін халық көріп отыр. Елбасының  сарабдал  саясатының  арқасында  республикамыздың,  соның  ішінде  облыс,  ауданымыздың  дәулеті  артып келеді. Еңсесі биік егемен  елдің  жарқын  болашағы  жолында  қазталовтықтар  да  уақытпен  санаспай,  еңбек  етуде.

 Бұдан кейін өңір басшысы ат басын Бозоба-Қайыңды бағытындағы Қараөзен өзені арқылы өтетін қалқымалы көпір бағытына бұрды.

Айта кетейік, бұрынғы қалқымалы көпірдің істен шығуына байланысты Қайыңды, Болашақ ауылдық округтерінің тұрғындарына аудан орталығымен қатынас қиындап, Жалпақтал арқылы айналма жолмен жүруге тура келді. Міне, сол мәселенің түйіні шешіліп, жаңадан жасалған қалқымалы көпір 15 мамыр күні ашылған болатын. Бұл қалқымалы көпірді В. Самсонов жетекшілік ететін «Орал жөндеу компаниясы» ЖШС 52 млн. 724 мың теңгеге салған. Ұзындығы 42 метр, ені 6 метр, жүк көтеруі  қуаты 20 тоннаға дейін жететін көпір сапалы салынған. Осы қалқымалы көпір арқылы өткен жолаушылар Қайыңды, Болашақ ауылдары арқылы Тасқала – Орал бағытындағы тас жолға тікелей шыға алады.

Қайыңды ауылының тұрғындары атынан еңбек ардагері Мұнайдар Карин:  «Біздер өткен жылы сізге осы өзен үстінен көпір салу мәселесін жеткізген болатынбыз. Сіз және аудан әкімі Абат Абайұлы да бұл мәселенің оң шешімін табатынын айттыңыздар. Енді, міне, соның нәтижесін көріп отырмыз. Ауыл халқы осы жасалған игілікті іске риза болуда.

Бұл Елбасымыздың халыққа жасап жатқан істерінің ауылдық жерде орындалуын көрсетіп отыр.

Ал бұл жұмыстар сіздердің басшылықтарыңызбен іске асырылды. Аудан орталығы және ауданның басқа тұрғындары да осы көпірдің игілігін көретін болады. Сондықтан сізге халықтың ризашылығы шексіз, – деді.

Ауданымызда «Мал баққанға бітеді» деген қағидамен қазақтың кең даласында төрт түлікті: үйір-үйір жылқыны, табын-табын сиырды, отар-отар қойды мыңғыртып өсіруді  меңгерген шаруалар баршылық. Солардың бірі – «Перизат» шаруа қожалығы. Ақпәтер ауылдық округіндегі Талғат Қабденов жетекшілік ететін бұл қожалықта болған облыс әкімі шаруашылықтың жай-күйімен танысты. «Перизат» 2016 жылдан бері асыл тұқымды еділбай қойын өсіруді қолға алған. Шаруашылық бүгінгі күнде осы қой тұқымын 1000 басқа жеткізіп отыр. Сонымен қатар шаруашылықта 100 бас жылқы, 300 бас ірі қара малы бар. Шаруашылықты аралап көрген өңір басшысы қожалық жетекшісінің жұмысына табыс тіледі.

«Өңірлерді дамытудың 2020 жылға дейінгі бағдарламасының» Ақпәтер ауылындағы ілкімді істердің бірі – былтырдан бері «Ақбұлақ» бағыты бойынша таза  ауыз су құбырына реконструкциялау жұмыстарының  жүргізілуі. Оған  республикалық бюджеттен 239 млн. 689,4 мың теңге бөлінген.  Ұзындығы 18,731 шақырымды құрайтын су құбыры арқылы  1014 адам таза ауыз сумен қамтылмақ. Облыс басшысы мердігер «БатысгазСтрой» ЖШС-ның өкілдерімен кездесіп, жұмыстың сапалы әрі уақтылы жүргізілуі қажеттігін ескертті. Сонымен қатар осы кездесуде ауыл тұрғындары техникалық су тарту жұмыстарына көңіл бөлінсе деген ұсыныстарын  жеткізді.

Ауданымызда жүзеге асып жатқан ауқымды жобаның бірі – Киров – Шежін каналының 3-кезеңінің құрылысы.  Ұзындығы 47,9 шақырымды құрайтын бұл канал іске қосылған кезде Ресейдің  Еділ өзенінен келетін су тәуелділігі азаяды. Түпкі  мақсат – Жайық суын Қараөзенге әкелу. Жобалық құны 2 млрд. 291, 123 млн. құрайтын бұл жұмыстарға республика бюджетінен 1 млрд. 967,98 млн. көлемінде қаржы бөлінді. Аталған жоба жүзеге асса, жыл сайын Жайықтан Қараөзенге 50 млн. текше метр көлемінде су айдалып, бұл өз кезегінде жылына 600700 млн. теңге бюджет қаражатын үнемдеуге мүмкіндік береді.

Құрылыс жұмыстарын «АзияТехСтрой» ЖШС жүргізіп жатыр. Киров – Шежін каналының қайта құру жұмыстарын көрген Алтай Сейдірұлы бұл  жұмыстарды уақтылы да сапалы аяқтау  қажеттілігін айтты. Алда 4-кезеңнің жұмыстары тұр.

Ақпәтер ауылының тұрғыны, еңбек ардагері Кәрім Өтеғұловтың сөзіне қарағанда, осы жерде орын тепкен шаруа қожалықтарының бәрі де су тапшылығын  көріп отырған болатын. Енді осы канал іске қосылса, елдің қуанышында шек болмас еді. Бір айта кетер жәйт, осы канал арқылы бөгеттерге су айдау, жайылымдарға су шығару сынды жұмыстар да атқарылса, шаруа адамдарының  да  риза  болары  сөзсіз.

Өңір басшысы Жаңажолда болған кезде ауылдағы кіреберіс және ауылішілік жолдарды күрделі жөндеу жұмыстарымен де танысты. Жаңажол ауылының кіреберісі мен Жалпақтал ауылына апаратын шығаберіс жолдарына және ауыл ішіндегі үш көшеге ұзындығы 7,5 шақырым болатын қатқыл табанды жол салу жұмыстары басталған. Сонымен қатар төрт көшеге жаяу жүргінші жолы да жасалып жатыр. Бұл құрылыс жобасына республикалық бюджет есебінен 704 млн. 887 мың теңге қаражат бөлініп, құрылыс жұмыстарын «Айдана» ЖШС жүргізуде.

– Елбасымыздың «Төртінші өнеркәсіптік революция жағдайындағы дамудың жаңа мүмкіндіктері» атты биылғы Жолдауында «Ішкі өңірлік қатынастарды жақсарту үшін аутожолдардың жергілікті желісін жөндеу мен қайта салуға арналған қаржы көлемін көбейту керек» деп атап көрсеткен болатын. Елбасымыз айқындап берген сол мақсат орындалып жатқанына куә болып отырмыз. Ауданда алғаш рет қатқыл табанды жол төсеу үшін жергілікті маңызы бар жолдарға қаржы бөлініп, өздеріңіз көріп отырғандай, сол жол құрылысы Жаңажол ауылына да келіп жетті. Ауылға былтыр таза ауыз су келсе, енді, міне, ауыл ішіндегі жолдың да мәселесі шешіліп жатыр. Осындай игілікті істер басқа да ауылдарда жалғасын табу үшін  жергілікті атқарушы  билік құрылымдарымен бірге жұмыстанатын боламыз, – деді  жаңажолдық  тұрғындармен жүздескен  Алтай  Сейдірұлы.

Қазталовтықтардың бүгінгі тыныс-тіршілігін жақсы бағалаған облыс әкімі  игілікті  істер  жалғасын  табатынын  айтып, ортақ  іске  үлестерін  қосып  жүрген  жандарға өз ризашылығын білдіріп, облыс  орталығына  аттанып  кетті.

Қайрат   ЖАҚЫП,

Қазталов   ауданы

Облыстық жедел медициналық жәрдем стансасындағы бастауыш кәсіподақ ұйымы өңіріміздегі денсаулық сақтау мекемелерінің кәсіподақтары арасында белсенді жұмысымен көш бастап келеді.

Аталмыш ұжым өткен жылы жедел жәрдем стансасы қызметкерлерінің аймақтық сайысынан жеңімпаз атанып, байқаудың Астана қаласында өткен республикалық кезеңіне де қатысқан. Республикалық сайыста облысымыздағы жедел жәрдем стансасының жекелеген қызметкерлері үздік шығып, әр түрлі марапаттарға ие болған. Ал кәсіби саладағы қандай да болмасын байқауға қатысу сол саладағы кәсіподақ ұйымының тікелей ұйымдастыру қолдауымен жүзеге асатыны  түсінікті.

Сара Кабдушева – облыстық жедел медициналық жәрдем стансасындағы №3 қосалқы стансаның аға фельдшері, аталмыш мекемедегі бастауыш кәсіподақ ұйымының төрайымы.

– Мекемемізде барлығы 700-ден аса қызметкер еңбек етеді. Осыдан екі жарым жыл бұрын бастауыш кәсіподақ ұйымына жаңадан төрайым болып сайланған кезімде аталмыш ұйым құрамында 240 қызметкер болса, бүгінгі таңда бұл көрсеткіш 603 адамды құрап отыр. Бастауыш кәсіподақ ұйымы мекеменің қоғамдық бағыттағы жұмыстарының бәріне тікелей араласып отырады. Мысалы, бүгінгі таңда ұжымдық жұмысымызда мемлекеттік тілдің аясын кеңейту бағытындағы әрекеттеріміз тиісті нәтижесін беріп келеді. 2017 жылы «Мәңгілік Ел: Қазақстанның кемел болашағы» атты II республикалық байқауда мемлекеттік тілді дамытуға үлес қосқан «Үздік мекеме» аталымын жеңіп алдық. Спорттық сайыстарда ылғи алдыңғы орыннан көрініп келеміз. Футбол командасы қандай сайыстан да бірінші орын әкеліп жүр. Ұжымда әрбір мейрам-мереке атаусыз, сый-сияпатсыз  қалмайды, – дейді ол.

Сара Күлесқызының аталмыш ұжымдағы бастауыш кәсіподақ ұйымының жұмысын жандандыру бағытындағы істері тындырымды, нәтижеге толы болғанымен, өзінің атқарған қызметтерін баяндауға келгенде мейлінше аз сөзді, тұйық жан екендігін аңғардық. Мекемедегі бастауыш кәсіподақ ұйымының тыныс-тіршілігі туралы оның белсенді мүшелері ашыла әңгімелейді.

– Ұжымымыздағы бастауыш кәсіподақ ұйымының жұмыс жүргізу дағдысы жоғары деңгейде қалыптасқан. Былтырғы және биылғы облыстық деңгейде өткізілген салалық бастауыш кәсіподақтар сайысында біздің ұйымның жеңімпаз атануы – осы сөзіміздің айқын дәлелі. Өткен жылы біздің бастауыш кәсіподақ ұйымы «Ең үздік бастауыш кәсіподақ ұйымы» деген аталымға ие болды. Кәсіпорын аясында кәсіби, мәдени, спорттық немесе әдет-ғұрыптық бағытта қандай да бір шара өтуі тиіс болса, ол шаралар мекемедегі бастауыш кәсіподақ ұйымының тікелей қолдауымен үнемі жоғары деңгейде ұйымдастырылып, ұжым қызметкерлерінің көңілінен шығып отырады. Қызметкерлерді, кәсіподақтың белсенді мүшелерін, соның ішінде жас мамандарды ынталандыру бағытында әр тоқсан сайын сый-сияпат жасалады. Бастауыш кәсіподақ ұйымы ұйымдастыратын шараларға мекеме қызметкерлерінің қатысуы өте белсенді. Бізде санитарлық қызмет атқаратын Нұрбек Әбдрешов есімді жас жігіт кәсіподақ ұйымдастырған барлық шараны өзінің жеке бейнекамерасына түсіріп, монтаждайды. Ол түсірілімдер бастауыш кәсіподақ ұйымының мұрағатында мұқият сақталады. Ортақ іске қолұшын созуда белсенділік танытқан мұндай қызметкерлердің еңбегі бастауыш кәсіподақ ұйымының назарынан тыс қалмайды. Мекемеміздегі кәсіподақ ұйымы қаламыздағы, еліміздегі, сондай-ақ шетелдегі мәдени, рухани, курорттық орындарда демалыс ұйымдастыру мәселелерін де үнемі назарда ұстайды, – дейді аталмыш мекемедегі мемлекеттік тілді енгізу, дамыту және редакциялау бойынша маман Роза Дүзеева. Роза Талғатқызы ел тәуелсіздігінің 25 жылдығына орай денсаулық сақтау мекемелері арасында ұйымдастырылған «Мәңгілік Ел: Қазақстанның кемел болашағы» атты I республикалық байқауда «Денсаулық сақтау саласындағы үздік тіл маманы» аталымын иеленге-нін айта кетейік.

Аталмыш бастауыш кәсіподақ ұйымы жанұясында ұзаққа созылған сырқат жандары бар қызметкерлерге материалдық тұрғыда тұрақты түрде көмек көрсетіп келеді. Қызметкерлерге әр түрлі мейрамдарда сауықтыру кешендеріне тегін сертификаттар беріледі. Мұның сыртында бастауыш кәсіподақ ұйымы алдағы уақытта мекеме ауласынан қызметкерлерге арналған спорт алаңын салуды да қолға алмақшы. Сондай-ақ ұжымдағы жұмысшылардың балаларын жазғы лагерлерде демалтуға да қолдау білдіреді. Нақтырақ айтқанда, балалар лагерінде демалу қаражатының жартысын бастауыш кәсіподақ ұйымы төлейді. Бұл орайда бірінші кезекте жанұя жағдайлары, көп балалы отбасынан болуы ескеріледі.

– Өткен жылы қызым «Қазақстандық денсаулық сақтау қызметкерлерінің салалық кәсіптік одағы» қоғамдық бірлестігі БҚО филиалының қолдауымен «Еуразия» балалар лагерінде демалған еді. Бұл демалыстан кішкентай қызымның үлкен әсер алғаны соншалықты, жаз шыққалы «Лагерьге тағы да жолдама бермес пе екен, Сара Күлесқызынан сұраңызшы» деп мені жиі мазалайтын болды, – деп күледі аталмыш мекемедегі шақыртуларды қабылдау жөніндегі диспетчер  Нұргүл  Дүйсенбаева.

Облыстық жедел медициналық жәрдем стансасындағы бастауыш кәсіподақ ұйымы мекеме жұмысшылары үшін былтыр Татарстанның Қазан қаласына саяхат ұйымдастырған. Осы сапардың медицина қызметкерлеріне сыйлаған ұмытылмастай әсері туралы орталық залалсыздандыру бөлімінің фельдшері Лариса Гриценко сағаттап әңгімелеуге  дайын.

– Біз Қазан қаласына тарихи-архитектуралық ескерткіштермен танысу мақсатында барған болатынбыз. Маған Татарстанда мұсылман және христиан діндері өкілдерінің бейбітшілік пен келісімде өмір сүріп жатқаны және аталған екі дінге қатысты тарихи ескерткіштердің бірдей сақталып тұрғаны жағымды әсер қалдырды. Қазан қаласынан 60 шақырымдай қашықтықта орналасқан, айналасын Еділ өзені айнала ағатын Свияжск аралында болдық. Бұл жер өзінің көне тарихымен орыс фольклорындағы «Буян аралын» еске түсіреді. Мұндағы ең ескі архитектуралық ескерткіш Иван Грозныйдың әмірімен тұрғызылған. Осы аралда шегесіз тұрғызылған көне шіркеу бар. Және бұл мекен шіркеулерінің көптігімен ерекшеленеді. Бүгінгі таңда осы аралға тұрғындарды қоныстандырып, таза туристік аймаққа айналдырған. Тұрғындары негізінен балық кәсіпшілігімен айналысады. Сондай-ақ жылқы шаруашылығы, ара шаруашылығы, өзге де табиғатпен үндескен көне кәсіптің түрлері ерте кездегідей табиғи қалпында сақталған. Бір сөзбен айтқанда, ертегі әлеміне тап болғандай күйге енесің. Сауда орнынан бөшкеге салып сатылатын балды көруге болады. Бұрынғыдай арбаға жегілген аттарды көрдік. Мұндағы ішіне балық салып пісірілген бәліштің дәмі тіл үйіреді. Аралдың бай тарихынан алған әсеріміз өте мол. Ондағы ескілікті көріністер мен тұмса табиғаттан айрықша қуат алғандай болдық. Айнала қарағай, шырша өскен. Кемеге міндік. Үш күн бойына аралдың таза ауасымен тыныстадық. Төртінші күні Қазан қаласына бардық. Бұл қалада әйгілі ақын Марина Цветаева жерленген. Осы қалада тарихта алғаш рет жасыл дәрі (зеленка), ацетилсалицил қышқылы, өзге де түрлі дәрі-дәрмектер ойлап табылған. Қазан қаласындағы жаңа заманғы ең ірі ескерткіштердің бірі – Құл-Шәріп мешітімен таныстық. Құл-Шәріп мешітінің әсемдігін сөзбен айтып жеткізу мүмкін емес. Бұл кәсіподақ ұйымының есебінен Астана қаласына алғаш рет барып, сондағы жаңа мешітті көргенде алған әсерімді еске салды. Сол жолы Астана қаласына кәсіподақ саласындағы көшбасшылық, менеджмент тақырыбындағы оқыту семинарына барған болатынмын. Аталмыш сапарда елорданың көрікті жерлерін аралап, айрықша әсерге бөленгеніміз де өз алдына бөлек әңгіме. Осы оқыту семинарының нәтижесі болса керек, ұжымымызда аз уақыттың ішінде бастауыш кәсіподақ ұйымына кірушілердің қатары күрт өсті. Мен бүгінгі таңда 25 жылдық еңбек өтіліммен жоғары санаттағы фельдшер ретінде 64 мың 700 теңге жалақы аламын. Менің айтқым келгені, саяхаттап демалу үшін жоғары жалақыға ие болу шарт емес. Біздің ұжымымыздағы бастауыш кәсіподақ ұйымының белсенді әрекеті нәтижесінде танымдық бағытта, тәнді сауықтыру бағытында көптеген саяхаттарға шығып тұрамыз. Былтыр жазда әріптестеріміз бастауыш кәсіподақ ұйымының белсендісі ретінде маған жолығып, Шалқар көліне барып демалғылары келетіні туралы ұсыныс айтты. Мен бұл ұсынысты кәсіподақ ұйымының төрайымы Сара Күлесқызына жеткізгенімде, ол бірден қолдау танытты. «Егер кісілер жиналса, тегін көлік мәселесін шешіп, жол азығына қаражат бөлеміз» деді ол. Сөйтіп біздің ұжымның қызметкерлері өздерімен бірге балаларын, жұбайларын ілестіріп, табиғат аясына демалысқа шықты. Далада шай қайнатуға шоқ самаурын ала шықтық. Мол етіп қарбыз сатып алдық. Мен бұл жолы Шалқар көліне де алғаш рет барған едім. Теңіздей шалқыған көлді, көл жағалай тігілген киіз үйлерді көріп, таң-тамаша болдым. Ал биылғы қыста Сара Күлесқызы бізге ерекше демалыс ұйымдастырды. Кәсіподақ қаржысынан турбаза жалдап, шаңғы, коньки және қаршанамен сырғанадық. Саяхаттан алған әсерлеріміз естен кетпейді, – дейді Лариса  Александровна.

Нұртас НАБИОЛЛАҰЛЫ,

«Орал өңірі»

Бұл  жайында  Қазақстан  кәсіподақтарының  күнінде Х. Бөкеева  атындағы  облыстық  қазақ  драма  театрында  өткен облыстық  бастауыш  кәсіподақ ұйымдары  форумында  ҚР  Кәсіподақтар  федерациясы  төрағасының  орынбасары  Марат  Тоқжанов  айтты.

Қазақстанда кәсіподақтың құрылу тарихы 1905 жылдан бастау алады. Қазіргі уақытта кәсіподақтар федерациясы құрамына 2 миллиондай мүше тіркелген. 20 салалық, 16 аумақтық кәсіподақ құрылымдары қызмет етеді. Федерацияның алға қойып отырған негізгі мақсаты – жеке адамның құқығын қорғау, еңбек нарығындағы дау-дамайды шешу. Әсіресе, еңбек қауіпсіздігі мәселесі өте өзекті. Жыл сайын елімізде әр түрлі жағдай, мәселен, өндірістік жарақат алу салдарынан түрлі салада еңбек ететін 2 мыңға жуық адам қайтыс болып жатады. Заман талабына сай болуы үшін кәсіподақ ұйымдары жаңғырып, жетіліп, дамып отыру керек. Өздеріңіз білесіздер, кәсіподақ федерациясын жаңғыртудың «Жол картасы» дайындалды. Карта аясында бастауыш кәсіподақ ұйымдарының жай-күйіне баса назар аударылмақ. Әрбір бастауыш ұйымдардың қызметін жандандырып, ұйым көтерген мәселелерді аумақтық және салалық кәсіподақтар бірлесіп шешуі керек. Биыл кәсіподақтар федерациясының шешімімен еңбекті қорғау және қауіпсіздік жылы жарияланды. Сондықтан әрбір филиалда, оның ішінде, өндіріс орындарында еңбек қауіпсіздігіне байланысты орын алған жайттарға байланысты шешім қабылдап отыратын штаб құрылды. Атап өтерлігі, биыл тұңғыш рет ҚР Кәсіподақтар федерациясы мен ҚР Жоғарғы соты арасында меморандумға қол қойылды. Бүгінге дейін еліміздегі сот құрылымдары қаралатын істердің 70 пайызының сотқа дейін шешімін табуға болады. Барлық істі қамтуға судьялардың уақыты тапшы.

Меморандум негізінде біздің федерация әр өңірде арнайы орталықтар құрып, тума-туыс, ерлі-зайыптылар және мектеп ішіндегі дауларды ерте шешуге атсалысады, – деді Марат Тоқжанов.

Форумға қатысушыларды құттықтаған облыс әкімінің бірінші орынбасары Игорь Стексов облыстық кәсіподақтар орталығына 70 мыңнан астам адам мүше екенін және 900 бастауыш ұйым бар екенін айтты. Игорь Стексовтің сөзінше, облыс әкімдігі мен облыстық қызметкерлер бірлестігі және өңірлік жұмыс берушілер бірлестігі арасында 2018-2020 жылдарға арналған келісімге қол қойылған. Үш жақты келісім бойынша еңбек қатынасын реттеу, әлеуметтік мәселені бірлесе шешу және қоғам тұрақтылығын сақтау көзделген. Жиында облыстық кәсіподақ орталығының төрағасы Ербол Салықов жұмыс беруші мен қызметкер арасындағы, өз құқығын білмеуден туындайтынын айтты. Мәселен, облыстағы 6413 кәсіпорынның 1513-і ұжымдық шарт жасасқан. Оның ішінде, ірі кәсіпорын субъектілерінің 95, орта деңгейдегілерінің 98, ал шағын кәсіпорындардың 19 пайызы ұжымдық шартпен қамтылған. Бұл бағытта еңбек ұжымдарымен кездесу, түсіндіру жұмыстары жүргізілуде. Облыста қызмет ететін 684 техникалық инспектор заңбұзушылықты анықтайды. Кәсіподақ құрамының 27 пайызы – жастар, 65 пайызы – нәзік жандылар. Жиында бастауыш ұйым  өкілдері  де  сөйледі.

Форум соңында облыстағы кәсіподақ қозғалысының бірнеше өкілі ҚР КФ «Кәсіподақтарға сіңірген еңбегі үшін» белгісімен марапатталып, түрлі бастауыш ұйымдардың үздік қызметкерлеріне алғысхаттар  мен  құрмет  грамоталары  табысталды.

Нұртай  ТЕКЕБАЕВ,

«Орал  өңірі»

Суретті  түсірген  Рафхат  ХАЛЕЛОВ

Облыс  әкімі  Алтай  Көлгіновтің  Жәнібек  ауданына  жұмыс  сапары  Ақоба  ауылдық  округінің аумағында  орналасқан  Әбділман және  Соркөл  жайылмаларын  реконструкциялау  жұмысымен танысудан  басталды.  Жобалық  құны  393 853  мың  теңге құраған бұл  нысандарды  өткен  жылы  «УральскСтройИнвест»  ЖШС  талапқа  сай  жөндеген  болатын.

Құрылыс  жұмыстарының  барысында  аталмыш  жайылмалардың  жағалаулары  кеңейтіліп, плиталар төселіп,  бөгет  жасалды. Сондай-ақ  арналар  тазартылып,  су  ағызу  құрылғылары  орнатылды.  Қазіргі  уақытта гидроқұрылымдарды  қалпына келтіру жұмыстары өз нәтижесін беріп,  биылғы  түскен  қардың  суы  біршама  жиналған. Жайылмалы  суару  Ақоба ауылдық  округі бойынша 1370, Борсы ауылдық округі  бойынша  500 гектар жерді құрап отыр. Төрт су жіберу құрылғысының біреуі Әбділманда, үшеуі Соркөлде орнатылған.

– Жайылмалы суарудың жалпы көлемі 1870 гектарды құрайды. Биылғы жиналған су көлемі жеткілікті. Алдағы уақытта қар мол түсіп, жауын-шашын болып тұрса, мұнда 2-ден 6 млн. текше метрге дейін су жиналатын болады, – деді құрылысты жүргізген «УральскСтройИнвест» ЖШС-ның директоры Алексей Безьянов. «Әлем» шаруа қожалығының жетекшісі, облыстық мәслихаттың депутаты Ескендір Елемесовтің айтуынша, жайылмалы суару Ақоба, Борсы, көршілес Қазталов ауданының Қошанкөл, Қараоба ауылдарының аумақтарын қамтуға, яғни қуаңшылық жылдарында мал азығын дайындауға, шабындық жерлерді тиімді пайдалануға мүмкіндік береді. Ол осы жобаға қолдау білдірген облыс әкіміне алғысын білдірді. Өз кезегінде Алтай Сейдірұлы бұл жұмысқа бастамашы болған Ескендір Қапарұлы екендігін айтып, оған болашақта осы маңнан бау-бақша салу мүмкіндігін қарастыру жөніндегі ұсынысын жеткізді. «Соркөлдің басына бау-бақша салған жөн. Су келіп тұр. Егер бұл жерде бау-бақша өссе, аудан халқын жергілікті жеміс-көкөніс өнімдерімен қамтуға болады. Жалпы, бұл гидроқұрылымдарды игіліктеріңізге пайдалануларыңызға  тілектеспін», – деді облыс әкімі.

Бұдан кейін облыс әкімі бастаған топ жол-жөнекей «Әлем» шаруа қожалығының Беркәлі қыстағында болып, малды қолдан ұрықтандыру пунктінің жұмысымен танысты. Ол жөнінде қожалық жетекшісі кеңінен түсінік берді. Оның мәлімдеуінше, мұнда жұмыс істеуге барынша қолайлы жағдайлар туғызылған, қажетті құрал-жабдықтар жеткілікті. Астана қаласынан келіп, осында үш жылдан бері ұрықтандырушы-техник болып қызмет атқарып жүрген Нұрлан Шоқанов өз жұмысын іс жүзінде көрсетті. Оның ісіне сәттілік тілеген облыс әкімі бұл жұмысты өзгелерге де үйрету  қажеттігін  ескертіп  өтті.

Ақоба ауылында болған Алтай Сейдірұлы аудан, ауыл ақсақалдарымен кездесті. Ауылдың байырғы тұрғыны Мұрат Мұхамбетқалиев облыс әкімі бастаған қонақтарға ауылға қош келдіңіздер айтып, «бітер істің басына жақсы келер қасына» деп ауылда ауыз су құбырының құрылысы жүріп жатқанын, ұялы байланыс жүйесінің іске қосылғанын, спортзал салынғанын айтып, ауыл халқының әлеуметтік-тұрмыстық жағдайының біртіндеп шешімін тауып жатқанын ризашылықпен атап өтті. Аудандық ардагерлер кеңесінің төрағасы Амангелді Уәлиев Президенттің өңірге келген жұмыс сапары кезінде шалғайдағы аудандарға қатқыл табанды жол салу мәселесінің орынды көтерілгенін, оның Елбасы тарапынан қолдау тапқанын аудан халқы қуана қабылдағанын жеткізді. Сондай-ақ «Рухани жаңғыру» бағдарламасы аясында «100 киелі жер» тізіміне ауданымыздан ғұлама ғалым, ойшыл, журналист Ғұмар Қараштың қорымы енгізілгені, бүгінде оның туған жерінде кесене тұрғызылып  жатқаны  да  айтылды.

– Елбасының берген тапсырмасына орай келер жылдан бастап Қазталов, Жәнібек, Сайқын бағытындағы күре жолға асфальт төсеу жұмыстары басталатын болады. Өздеріңіз білесіздер, жол мәселесіне байланысты министрліктен жұмыс тобы келді. Биыл жолдың жобалық-сметалық құжаттамасы жасалып, сараптамадан өтеді. Келер жылы қатқыл табанды жол құрылысын бастап, оны таяу жылдарда аяқтауымыз керек. Сол кезде көршілес Ресеймен барыс-келіс, алыс-беріс жақсаратын болады. Шағын және орта кәсіпкерлік дамиды. Елбасының бес әлеуметтік бастамасына байланысты ауылға бөлінетін шағын несие екі есе өсіп, биыл 4 млрд. теңгені құрады. Осыған орай өз кәсібін ашамын деген адамға барлық жағдай жасалуда. Сондықтан осы мүмкіндікті пайдаланып, тек ерінбей еңбек ету керек. Мал шаруашылығын одан әрі дамытып, ірі қара санын бір миллион басқа жеткізуіміз қажет.

Атқарылып жатқан жұмыстардың барлығы тәуелсіздігіміздің,  елдегі тыныштықтың арқасы, – деді  Алтай  Сейдірұлы.

Осы жерде аудан әкімі Азамат Сафималиев облыс әкіміне ауданға тартылған инвестиция, ауыл шаруашылығы, мал басын өзі төлі есебінен өсіру, аналық малды тұқымдық түрлендіру көрсеткіші, ет және ет өнімдерінің экспорты, күн батареясы мен желқалақ стансаларын орнату, елді мекендерге табиғи  газ тарту, аудан орталығындағы тоғыз көшеге қатқыл табанды жол төсеу, Жәнібек суару-суландыру жүйесін қалпына келтіру, табиғи өртке дайындық барысы туралы баяндай келіп, аудан орталығына дене шынықтыру-сауықтыру кешенін салу, Жақсыбай ауылдық округіндегі М. Ықсанов атындағы мектеп-балабақша кешенін, Ұзынкөл, Қамысты су арналарын, Талов, Қамысты ауылдық мәдениет үйлерін күрделі жөндеуден өткізу, Тегісшіл елді мекеніне «Өңірлерді дамытудың 2020 жылға дейінгі бағдарламасы» арқылы ауыз су құбырын тарту сынды өзекті мәселелер жөнінде де хабардар етті.

Бұдан соң облыс әкімі Ақобаға ауыз су тарту жұмыстарымен танысып, былтыр салынып, пайдалануға берілген Х. Халиуллин атындағы орта мектебі жанындағы спортзалда, күрделі жөндеу жұмысы жүріп жатқан фельдшерлік-акушерлік пунктте болды.

Үстіміздегі жылы Жәнібек ауданының орталығында 80 тұрғын үй салынып, пайдалануға берілмек. Облыс басшысы Алтай Көлгінов Ақоба ауылынан аудан орталығына келісімен солтүстік-шығыс беткейде құрылысы жүргізіліп жатқан 40 тұрғын үйге бет түзеді. «Қазқұрылыссервис» ЖШС директоры Айдарбек Сейітмұратов құрылысы аяқталуға таяу қалған үйлердің жай-жапсарымен таныстырды. Қызылорда қаласынан келген аталмыш құрылыс мекемесінде 50 шақты құрылысқа арналған техника және 100-ден астам адам жұмыс істейді. Тұрғын үй құрылысына жергілікті жерден 20 адам жұмысқа тартылған.  Құрылыс материалдарының біразы өздерінен шығады. Өткен жылы аталған серіктестік Жәнібек ауылының ішіне ауыз су құбырын жүргізіп, тұрғындарды таза суға  кенелткен.

– Пайдаланымға берілетін тұрғын үйлер 3800 шаршы метрді құрайды. Бір пәтердің ауданы 71 шаршы метр болса, бір үйдің ауданы 190 шаршы метр, құрылыс құны 304 миллион теңге. Тұрғын үйлердің құрылысын Астананың  20 жылдық мерекесінің қарсаңында бітіреміз деп тырысып жатырмыз, – деді серіктестік директоры.

Салынып жатқан тұрғын үйге кіріп, пәтер ішіндегі бөлмелерді аралаған облыс басшысы құрылысшылардың жұмыс қарқынына көңілі толды. Тұрғын үйлерге газ, су келіп тұр. Бөлмелердің іші қазіргі заманға лайық құрылыс материалдарымен жабдықталып, көрген  жанның  көзін  қуантады.

– Үйдің айналасына қоршау орнатып жатқандарыңыз оңды болған. Енді осы үйлерге қоныстанатын тұрғындар тал-терек  отырғызса, жанға жайлы көлеңкелі сая болып, өздеріне қолайлы жағдай жасайды, – деген облыс әкімі құрылысшыларға үйлерді сапалы аяқтауды нықтап тапсырды.

Аудан орталығындағы теміржолдың арғы бетіндегі құрылысы бітуге тәмам 40 үйді Қызылорда қаласындағы «Реалстройинвест» ЖШС  құрылысшылары былтыр тамыз айында бастаған. Тұрғын үйлерді тұрғызуға Жәнібек ауылындағы 20 шақты адам атсалысуда. Бұл  үйлердің құрылысы да биыл шілдеде аяқталып, тұрғындар қоныстойын тойламақ. Жаңадан салынып, пайдалануға берілетін тұрғын үйлерді қарап шыққан облыс басшысы үйлерді сапалы бітіру, айналасын қоршау мен тал егу мәселесін қадап айтып, құрылысшылардың жұмысына  сәттілік  тіледі.

Бұдан кейін Алтай Сейдірұлы көршілес Ресейге өтетін Жәнібектегі шекаралық өткізу пунктіне бағыт түзеді. Мұнда келгесін шекара басшыларымен сөйлесіп, олардан өткізу пунктінен күніне 40-50 түрлі жүк тасымалдаушы, 200-250 жеңіл аутокөліктер өтетінін, ал қатқыл табанды жол төселген жағдайда оның саны бұдан да көбейе түсетінін анықтап білді. Бекеттен, әсіресе, жаз кезінде аутокөліктер көп өтетін көрінеді. Облыс әкімі шекара басшыларына алдағы уақытта Ресейдің Вишневка селосының аумағында орналасқан өткізу пунктіне дейін қатқыл табанды жол салынатынын айтып, сегіз жолақты көлік ағынын реттеуіш құрылғылар орнату үшін шекара пунктінің айналасын кеңейту жайындағы  ұсынысын  білдірді.

Асқар  ҚҰСАЙЫНОВ,

Нұрымбек  ЖАПАҚОВ,

Жәнібек  ауданы

Алаш тарихының ақтаңдақ беттерінде тарыдай шашылған қазақ өмірінің өткені мен болашағы жатыр. Кез  келген тарихи жәдігер өшпес руһани қазынаға айналуы тиіс.  Алаш  қайраткерлерінің тарихы ұлттық құндылықтың негізі болып табылады. Ал олардың көзін көрген қолмен ұстаған құжаттары мен бұйымдары баға жетпес байлық екенін естен шығармайық.

Осыдан тура 100 жыл бұрын Жымпитыда кезектен тыс қазақ сиезі өткенін жақсы білеміз.

Жымпитыда өткен осы  сиездің Иван Федяниннің трактирінде өткенінен де көзі қарақты оқырман хабардар болар. Үш күнге созылған сиездің қалай өткенін есіне сақтай алмаса да, жиналған көп адамдарымен үй иесінің ұлы Николайдың есінде сақталып қалады (суретте отырған әкесі Иван мен ұлы Николай Федяниндер) Кейін қаншама уақыт өтсе де, ұлдары Борис пен Кимге, қызы Надеждаға ешқашан бұл туралы айта алмай кетеді. Иә, бұл отбасын біздің өңіріміздің адамдары жақсы таниды.  Аналары Қаратөбе өңірінен шыққан қазақ қызы болғандықтан шығар, бүгінде көзі тірі Надежда Николайқызы мен Ким Николайұлы таза қазақ тілінде сөйлеп, өздерін қазақпыз деп санайтын, тұтастай ұстаздардың әулетін құраған сыйлы адамдар. Сол сиезде орын алған бір оқиға болыпты. Ол шаруалары біткен соң көңілдері көтерілген ел азаматтарының ойын-сауыққа бет бұрып тұратын шағынан әлі қол үзе қоймаған кез емес пе?! Сонымен не керек жиын аяқталған тұста,  ән мен күйге де кезек жетсе керек. Сол арада Иван атай қонақтарына құйқылжытып тұрып скрипкада ойнап беріпті. Ол уақытта Жымпитыда төрт Иван тұрыпты. Ал кейіпкеріміздің лақап аты «Скрипач Иван» екен. Міне, жиынның соңында ойналған скрипка да, оны тартқан адам да, осы скрипканың үнін тыңдаған, сол жерде болған Жаһанша мен Халел бастаған алаш азаматтары да өмірде болмағандай ұмыт болды. Бірақ сол оқиғаның тікелей куәгеріндей болып, бір нәрсе аман қалыпты. Ол сол сиезде ойналған аспап – скрипка. Әкесінің көзін аманат деп қараған Ким Николайұлы ұзақ жыл  бойы аспапты сақтап келген. Аналары арқылы аталарының үйінде үлкен бір жиын өткенін естіпті, тек бұл туралы ешкім естіп қоймасын деп сыбырлап қана айтылған әңгімелер болатын. Сақтаулы сырды жаюға асықпаған ағамыз араға 80 жыл салып, сандықтағы скрипкасын шығарып аудандық музейге тапсырып, жүрек түбіндегі сырларымен бөлісті. Бүгінде, міне, өзі де 80 жасқа толғалы отырған ағамыз Кимнің отбасына қатысты осы бір құнды жәдігердің  біздің музейімізге тапсырылғанына қуаныштымыз. Алаштың аяулы ұлдарын күйімен тербеткен қоңыр аспап, ұлттық құндылығымыздың баға жетпес қазынасы. Аспаптың нақты қай жылы жасалғанын анықтай алмасақ та, Жымпитыдағы сиез өткен үйде ойналғанына да ғасыр болмақ.

Айнагүл  ОЙШЫБАЕВА,

Сырым  Датұлы  атындағы

тарихи-өлкетану  музейінің  меңгерушісі,

Сырым  ауданы

Жуырда Ақсай қаласында қанды оқиға орын алды БҚО ішкі істер департаментінің баспасөз қызметінен түскен мәліметке қарағанда, 7 маусым күні сағат 07.15-те 5-шағынаудандағы 12-үйдің 1-қабатында орналасқан «Алмас» ақша айырбастау пунктінен көптеген пышақ жарақаттарымен 1966 жылғы А. есімді азаматтың мүрдесі табылды. Марқұм валюта айырбастаумен айналысқан. Қазіргі кезде Бөрлі аудандық ішкі істер бөлімі ҚР ҚК 99-бабы 1-бөлігіне сәйкес (кісі өлтіру) тергеу амалдарын жүргізуде. Осы қылмысқа күдікті ретінде 1990 жылғы тұрғын ұсталып, Бөрлі аудандық сотының санкциялауымен екі ай мерзімге қамауға алынды. Мұндай оқиға Ақсайда бұдан бұрын да болған. 2015 жылы 8 қазанкүні валюта айырбастауменайналысқан ер адамдыөзүйініңкіреберісіндеатыпкеткенеді. Бұлқылмысәліашылғанжоқ.

Арман БОЛАТҰЛЫ