Мұрағат: Июнь, 2018


Астананың жаһандық жаңғырудағы үлесі

Күні: , 76 рет оқылды

Кеше   облыс  әкімдігінің  ұйымдастыруымен  тәуелсіздіктің  тірегі,  еліміздің  жүрегі  Астана  қаласының 20  жылдығына  орай  «Астананың жаһандық   жаңғырудағы  үлесі»  тақырыбында  халық-аралық   ғылыми-тәжірибелік  конференция  өтті.

Шараның  пленарлық бөлімін  облыс  әкімінің кеңесшісі  Ерлік Оразаев ашып,  Астананың  ел дамуындағы  рөлі  мен  өзіндік ерекшеліктеріне  тоқталды.

Конференцияға қатысқан Қазақстан мен Ресейдің танымал тарихшы ғалымдары Астана қаласының ел тарихындағы алатын орны мен мән-мағынасы жайында әңгіме өрбітті. Ғылыми-тәжірибелік конференция барысында баяндама жасағандар Астана қаласының өткен жиырма жыл ішіндегі айтулы жетістіктерін, жылдан-жылға сәніне сән қосып, ажарланып келе жатқан елорданың дамуын және еліміздің саяси, мәдени және ғылыми орталығы болып қалыптасқанын атап өтті.

Тарих ғылымдарының докторы, профессор, академик Тұяқбай Рысбеков Астана қаласының қалыптасу және даму кезеңдеріне шолу жасаса, «Ғылым ордасы» республикалық мемлекеттік кәсіпорны бас директорының ғылыми инновациялар және халықаралық байланыс жөніндегі орынбасары Нұрлан Сейдін «Астана – ғылым мен білімнің эпицентрі» тақырыбында баяндама жасады. ҚР Парламенті Мәжілісі-нің қос шақырылымының депутаты болған техника ғылымдарының докторы, профессор, академик Виктор Киянский Астана тарихы тәуелсіз Қазақстан тарихымен үндес, сабақтас, тамырлас екендігін айта келе, бүкіл әлем көз тігетін елорданың бүгінгі айбынды келбеті, еркіндік пен елдіктің символына айналған қайталанбас сәулеті туралы пікірлерімен бөлісті. Астрахан қаласынан арнайы келген тарих магистрі, «Едіге» ноғай мәдениетінің астрахандық орталығы төрағасының орынбасары Линара Иргалиева болса, қазақ даласындағы ең киелі және көне мекеннің бірі, Ноғай ордасының тарихи астанасы Сарайшық қаласы туралы тың деректерді ұсынды. Сондай-ақ ғалымдар астананы көшіру аспектілері, елорданы дамытудың перспективалары, қазақ даласындағы астаналар және олардың ел дамуындағы рөлі мәселелерін  талқылап, пікір алмасты.

«Өркениет көшіне ілескен тәуелсіз Қазақстанның осы арнаға бет бұрғанына көп уақыт болған жоқ. Осы мезгіл ішінде елордамыз Астана елдігіміздің нышанына, береке-бірлігіміздің ұйытқысына, абыройымыздың айғағына айналды» десті конференцияда  ғалымдар.

Динара   ЖҰМАБЕКҚЫЗЫ,

«Орал   өңірі»


Ардагерлер – алтын тұғыр

Күні: , 69 рет оқылды

Орал  қаласындағы  Достық   үйінде  облыстық  ардагерлер  кеңесінің  ІV  пленумы өтті. «Елбасының  болашаққа  бағдар:  рухани жаңғыру»  бағдарламалық  мақаласын  жүзеге  асыру  жөнінде пікірлер тоғысқан  жиынға  облыстық, қалалық  және  аудандық  ардагерлер  кеңестерінің  мүшелері  қатысты.

Бүгінгі жас буынның жеткен жетістіктері аға буынның еңбегінің арқасы екендігін тілге тиек еткен облыс әкімінің орынбасары Ғабидолла Оспанқұлов қоғамдағы  көпшілікті алаңдатып жүрген  мәселелерге тоқталды.

– Күні кеше ғана ҚР Ұлттық қауіпсіздік қызметінің қызметкерлері  террористік актіге дайындалып жүрген жастарды құрықтады. Бұл – алаңдатарлық мәселе. Кешегі ұсталғандардың ішінде өрімдей жастардың бірі әлі кәмелеттік жасқа да толмаған. Қаруларын дайындап, қай жерде жарылыс жасаймыз деп жүрген жастардың жанымызда жүргені қауіпті. Сондықтан біз осы дерттің алдын алу үшін қоғам болып күресуіміз қажет. Екінші мәселе қазіргі күнде қоғамда дау-дамай, жастардың ажырасуы белең алып барады. Осы жерде медиацияның алар орны зор. Бұрын ата-бабаларымыз дауласқан тараптарды бітімгершілікке шақырып, татуластырып жіберген. Статисткаға сүйенсек, медиация пайда болғалы ажырасудың да саны азайғаны байқалады. Өйткені сот көп жағдайда ажырастырып жіберетін болса, медиация оларды бітімгершілікке шақырып, татуластырып жіберуді негізгі мақсат етеді. Еліміздің бүтіндігі, отбасының бүтіндігінен басталады. Ерлізайыптылар ажырасқан жағдайда қоғамда  толық емес отбасы, әкесіз немесе шешесіз өсетін тірі жетім балалар көбейеді. Ең бақытты бала –  ата-анасының қасында өскен бала. Сондықтан сіздер де медиатор болып, игі іске атсалыссаңыздар, қоғам  үшін зор пайда болар  еді, – деді пленумда сөз алған  Ғабидолла  Абдоллаұлы.

Облыстық ардагерлер кеңесінің төрағасы Мырзағали Мұхамбетовтің айтуынша, облыстық ардагерлер кеңесі ардагерлердің  қоғамдық өміріне белсене қатысып, үкіметтік емес ұйымдармен, БҚО Қазақстан халқы ассамблеясымен, жастар ұйымдарымен бірлесе жұмыс жасап келеді. Аға буын өкілдері ұлттық, отбасылық құндылықтарымызды, өмірден көрген-түйгенін  жастардың санасына сіңіру бағытында бірқатар жұмыстар атқарып жүр. Жастарға үлгі ретінде ардагерлерді мәдени-көпшілік, спорттық шараларға тартып, салауатты өмір салтын қалыптастыру мақсатында түрлі байқаулар, сайыстар ұйымдастырылуда. Мәселен, әжелер ансамблі былтыр «Рухани жаңғыру» бағдарламасы аясында «Қайран, біздің әжелер арды ойлаған» атты аудан, қала, облыс деңгейінде өткен сайысқа қатысып, өнер көрсетті. Нәтижесінде Зеленов аудандық әжелер клубы бас жүлдеге ие болды. «Ата сөзі – бата сөзі» батагөй ақсақалдар байқауы да жоғары деңгейде өтті. Республикалық батагөй қариялар сайысына қатысқан қаратөбелік Ертай Сердалин бас жүлдеге ие болып, 250 мың теңге көлеміндегі қаржылай сыйлықпен  марапатталған.

Жиында бүгінгі қоғамдағы аста-төк ысыраппен жасалатын жастардың үйлену тойлары, сүйек жөнелтудегі келеңсіз көріністер де қариялардың назарынан тыс қалған жоқ.  Қоғамның өзекті мәселелері туралы  жиында сөз алған еңбек ардагері, өлкетанушы Жайсаң Ақбай: «Жастарымыз рухты болып өсу үшін оларға республика, әлем деңгейінде жетістікке жеткен тұлғаларымызды көбірек насихаттаған жөн. Мәселен, олимпиада чемпионы  Данияр Елеусінов, тауы жоқ жерде өсіп, биік шыңдарды бағындырып жүрген Мақсот Жұмаев сынды біздің даңқты жерлестерімізді өсіп келе жатқан жастарға жеткілікті деңгейде дәріптей алмай жүрміз» деген ой айтты.

Кейінгі буынға тұрақтылық  пен тәуелсіздіктің нәтижесінде еліміз қол жеткізген игіліктерді насихаттауда ардагерлер де зор үлесін қосып жүр. Олар тек облыс орталығында емес, аудан-ауылдарда да әр түрлі тақырыптағы семинар, конференциялар, спорттық шараларды жиі өткізеді. Қазіргі күнде олар Астананың 20 жылдық мерейтойына орай ауыл-аудандарда мәдениет бөлімдерімен бірлесіп, «Ел жүрегі – Астана!» атты облыстық фестиваль  өткізуде.

Халқымыздың әдет-ғұрып, салтдәстүрін сан ғасырлар бойы ұрпақтан ұрпаққа жеткізіп келген ақсақалдар мектебі бүгінгі күнге дейін құндылығын жойған емес.

«Жастарға тәлім-тәрбие беру бағытындағы жұмыстарымыз одан әрі жалғаса береді», – дейді  көнекөз  қариялар.

Жиын  барысында  бірқатар  ардагер орталық кеңес тарапынан марапатталды.  Мәселен,  Сәлім Кукашев, Орынғали Ермекқалиев, Уалиолла  Әбешевтер «Еңбек  ардагері»  медаліне  ие болды.

Гүлжамал   ЖОЛДЫҒАЛИ,

«Орал   өңірі»


«Жайық Пресс» – жеңімпаз!

Күні: , 119 рет оқылды

Облыстық ішкі саясат басқармасы БАҚ қызметкерлерінің кәсіби мерекесіне орай «Нива» спорттық-сауықтыру кешенінде облыс журналистеріне арналған мәдени-спорттық шаралар мен пікір алмасу алаңын ұйымдастырды.

Спорттық жарыс шағын футбол, волейбол, үстел теннисі, шахмат, дойбы секілді ойын түрлері бойынша өтті. Додада «Жайық  Пресс» ЖШС, «Aqjaiyq» телеарнасы, «ТДК-42» телеарнасы, мемлекеттік құ-рылымдардың баспасөз хатшылары мен «Пульс», «Жайық үні» газеттерінің қызметкерлері бақ сынады. Бұқаралық ақпаратты ғана емес, бұқаралық спортты да қатар алып жүргендерін анық аңғартқан «жайықпрестіктер» волейболдан, үстел теннисі, шахматтан жеңімпаз атанып, жалпы командалық есепте I орынды иеленді. Ал «Aqjaiyq»  арнасының құрамасы II орынды қанжығаласа, «ТДК-42» телеарнасының қызметкерлері III орынды місе тұтты. Жарыс жеңімпаздары кубок және дипломдармен  марапатталды.

Мерекелік шара түстен кейін журналистер арасында өткен пікір алмасу алаңында жалғасты.

«Бұқаралық ақпарат құралдары мен мемлекеттік құрылымдар арасындағы өзара қарым-қатынас» және «БАҚ-тың контентін әлеуметтік желі арқылы тарату» тақырыптарында болған басқосуда БАҚ басшылары аталған тақырыптар аясындағы тұшымды ой-пікірлерін ортаға салды.

«Batysinfo.kz» сайтының әкімгері Жидегүл Аманғали БАҚ өкілдері мемқұрылым қызметкерлерінен ақпарат алу барысында туындайтын мәселелер және оны шешудің тиімді жолдары жайында әңгіме өрбітсе, мерекелік шараға мейман ретінде қатысқан «Қазақстан» ұлттық телеарнасы ақпараттық-сараптамалық бағдарламалар дирекциясы директорының орынбасары Мейіржан Әлібекұлы әлеуметтік желінің қоғамдағы үлкен күшке айналғанын жеткізіп, бұқаралық ақпарат құралдарының контентін әлеуметтік желі арқылы аратудың маңыздылығына тоқталды.

Ал «Aqjaiyq» телеарнасының директоры Асланбек Ғұбашевтің айтуынша, болашақта облыстық телеарнада интернет редакция бөлімі ашылып, веб редактор мамандары қызмет атқармақ.

– Google аналитиктің мәліметіне сүйенсек, біздің арнаны 2018 жылдың бірінші қаңтарынан бастап бүгінге дейін 830 мың адам қараған. Олардың арасында еліміздің тұрғындарынан бөлек Египет, Түркия, Алманиядан тіркелгендері де бар. Бұл біз үшін үлкен мәртебе. Болашақта заман ағымына халықтың сұранысына, әлеуметтік желі талабына сай ақпарат таратпақпыз, – деді Асланбек Зиннатұлы.

Мерекелік шара концерттік бағдарламаға ұласты.

Гүлсезім  БИЯШЕВА,

«Орал  өңірі»


Дариянда 300 орындық мектеп пайдалануға берілмек

Күні: , 105 рет оқылды

Кеше  облыс  әкімі  Алтай  Көлгінов  іссапармен  Зеленов ауданының  Дариян  ауылында  болып,  жаңадан  бой  көтерген  мектеп  құрылысымен  танысты.

Дариян жалпы орта білім беретін қазақ мектебінің құрылысы өткен жылдың жаз мезгілінде басталған болатын. 300 орындық жаңа мектептің жанында 100 оқушыға арналған интернат қоса салынған. Аталмыш мектептің директоры Шолпан Өмірзақованың мәлімдеуінше, оқушылар осыған дейін мектепке ыңғайластырылған әкімшілік ғимаратта оқып келген.

– Ескі ғимаратта сапалы білім алуға қолайлы жағдай болмады.

Бүгінде мәселеміз түбегейлі шешілді.  Тіпті жаңа интернатымыз да бар. Енді шалғай ауылдардағы негізгі мектептерді бітірген оқушылардың 10-11-сыныпты осында келіп жалғастыруларына мүмкіндік туды, – дейді Шолпан Өмірзақова.

Жаңа мектеп құрылысына бюджеттен 1 млрд. 100 миллион теңге бөлініп, «Отдел строй» серіктестігінің құрылысшылары оны бір жыл ішінде салып бітірген. Аталған құрылыс компаниясының басшысы Валентина Михноның  айтуынша, білім ғимаратының жалпы ауданы 6766,4, ал интернат ауданы 1991,92 шаршы метрді құрайды. Мектеп ұстаздарымен және ата-аналармен тілдескен облыс әкімі жаңа білім ошағының құрылысына оң баға берді.

– Бұл мектеп тұрғындардың сұранысы бойынша салынды. Себебі бұрын мұнда арнайы салынған білім ошағы болған жоқ. Елбасымыз Нұрсұлтан Әбішұлы  Назарбаев өңірімізге іссапармен келгенде оқушы саны аз мектептердің шығынын азайту мақсатында интернаттар салу туралы тапсырма берген болатын. Міне, су жаңа 300 орындық мектептің жанында 100 балаға арналған интернат бой көтерді. Елбасының «Болашаққа бағдар: рухани жаңғыру» атты бағдарламалық мақаласындағы алты бағыттың бірі – білімнің салтанат құруы. Осыған орай «Нұр Отан» партиясының «1000 ІТ сынып» жобасы аясында биыл облыс бойынша 15 ІТ сынып ашуды жоспарға алдық. Міне, соның алғашқысы Дариян ауылында ашылады. Енді оқушылар ақпараттық технология негіздерін еркін меңгеретін болады. Білім ошағының барлық сыныбы заманауи жабдықтармен жасақталған, ыңғайлы асханасы, қажетті кітаптармен қамтылған кітапханасы және спорт алаңдары бар. Оның үстіне ұстаздардың жалақысы көтерілуде. Сондықтан мектеп оқушылары тек сапалы білім алуға тиіс, – деді облыс әкімі Алтай Сейдірұлы нысанды аралап көргеннен кейін журналистерге берген сұхбатында.

Жаңа оқу жылы қарсаңында есігін айқара ашатын аталған мектепте барлығы 39 мұғалім қызмет етпекші, олардың 8-і жоғары, 13-і бірінші санатты мұғалімдер. Мектеп директорының айтуынша, интернаттың ашылуына орай алдағы уақытта педагогикалық құрамды толықтыру көзделуде.

Іс-сапар барысында Зеленов ауданының әкімі Асхат Шахаров облыс басшысына ауданның әлеуметтік-экономикалық ахуалын баяндады.

Айым  ТӨЛЕУҒАЛИ,

«Орал  өңірі»


Асық ойыны – ұлтымыздың құнды мұрасы

Күні: , 65 рет оқылды

Соңғы  кездері  Бөрлі  ауданында  ұлттық спорт  түрлері  жақсы  дамуда. Соның  ішінде асықты  ересектер  де,  жастар  да  жиі ойнап  жүр. Ақсайлықтардың  бұл  ойынды  жете  меңгергендігінің  бір  дәлелі  сол,  олар республикалық  сайыстарда  облысымыздың  намысын  абыроймен  қорғауда.  Асығы  алшысынан  түсіп  жүргендердің  арасында  өзге  ұлт  өкілдері  де бар.

Баскетболшылар  да  асыққа  әуес

Ақсай қалалық №4 мектептің мұғалімі Наталья Зотова үшін асық күнделікті қолданатын зат іспеттес.  Сол себепті сөмкесінде міндетті түрде асық жүреді.

– Өткен жылы ауданымызда асықтан өткен сайысты қарап отырғанда бұл ойын маған таныс секілді көрінді. Асықты қолыма алып, ойнап көргенімде икемділігімді байқаған әріптестерім мұны қайдан үйренгенімді сұрап жатты. Осы кезде балалық шағымда асық ойнағаным есіме сап ете түсті. Өзім Ақтөбе облысының тумасы болып табыламын. Балалық шағым қазақтардың арасында өтті. Біз көбіне асық ойнайтын едік. Осылайша жарты ғасырдан астам уақыттан кейін асықты  қайта  қолға  алдым.

Жалпы, бұл ойын баланың ойлау қабілетін, ептілігін, қолдың маторикасын, қозғалыс кординациясын дамытады. Соған байланысты сабақта, қоңырау кездерінде оқушыларға асықты жиі ойнатамыз. Олардың ішінде түрлі ұлт өкілдері бар. Мен – дене тәрбиесі пәнінің мұғалімімін. Физикалық ауыртпалық түсіруге  болмайтын оқушыларға көбіне асық үйретемін. Негізгі қызметімнен бөлек баскетбол ойынынан ауданда қыздар құрамасын да жаттықтырамын. Облыстық, республикалық сайыстарға барғанда поезда, қонақүйде болған кезде қыздармен көбіне асық ойнаймыз. Шәкірттерім бұрынғыдай  картаны емес, асық ұстайтындарына қарап қуанамын, – дейді  Наталья  Зотова.

Асық  ойнаған  озады

Аталмыш ауданда ұлттық спорттың дамуына үлесін қосып жүрген жанның бірі – Рима Бекмұқамбетова. Ақсайдағы №6 мектептің мұғалімі болып табылатын ол асықтан өтетін республикалық жарыстарға жиі барады. Мәселен, биыл сәуір айында Қызылжар өңірінде болған ел чемпионатына қатысып, «Үздік ойыншы» деген аталымды иеленіп келді.

– Астана қаласы, Қызылорда, Қостанай облыстарынан келген командалар осы сайыста мықты екендерін тағы бір мәрте дәлелдеді. Мен өзім төрт жылдан бері республикалық сайыстарға қатысып келе жатырмын. Жыл сайын негізінен осы командалар топ жарып жүр. Олар қонақта, өзге де шараларда болсын, кез келген жерде отыра қалып асық ойнайды екен. Мәселен, астаналық спортшылар бір мектепке жиналып, күнде дайындалатын көрінеді. Ал біздің облысымыздың құрамасының сапына кіретін ойыншылар әр ауданнан болғаннан кейін бір-бірімізбен жарысқа бара жатқанда поезда танысамыз. Сайыста жекелей емес, командалық есеп бойынша сынға түсетін болғаннан соң, бірігіп дайындалмағанымыздың зардабын тартатын кездер де болады. Жалпы, асық ойыны соңғы кездері қарқынды дамуда. Ережелері жиі өзгереді. Көбіне біз мұндай өзгерістерді жарыс басталған кезде ғана біліп жатамыз. Кезегіміз келгенге дейін үлгергенімізше дайындаламыз. Сол себепті жоғары көрсеткіш туралы әңгіме айту бізге ертелеу сияқты. Алдағы уақытта осындай жайттарды құзырлы құрылымдар ескерсе екен дейміз. Енді Астананың 20 жылдығына орай елордада сайыс ұйымдастырылмақшы. Қазіргі уақытта соған дайындалудамыз, – дейді Рима Сайлаубайқызы.

Жәнібек ауданында дүниеге келген ол бала кезден асықты жанына серік етіп келеді. Міне, сол асық оның мәртебесін көтеріп, көпшілікке танытты. Яғни асық ойнаған жанның озатынын өмірдің өзі дәлелдеп берді.

Бүгінде біздің кейіпкеріміз «Рухани жаңғыру» бағдарламасы аясында оқушыларын асық ойынына дендеп үйретуде. Күні кешеге дейін мектепте волейболдан секция жүргізсе, өткен оқу жылынан бастап асық үйірмесін ашты. Оған 6-10-сыныптардан қырыққа жуық оқушы қатысады. Мұндай үйірмелер ауыл мектептерінде де жұмыс істеуде.

Көктемде мұғалімдердің шығармашылығына қатысты өткен республикалық сырттай байқауға Рима Сайлаубайқызы мектепте асық ойыны үйірмесін ұйымдастыру бойынша материалдарын жіберген екен. Оның бейнесабағы өзгелерден оқ бойы озық деп танылып, нәтижесінде байқаудың бас жүлдегері атанды. «Тек өзім емес, әріптестерім де, шәкірттерім де жетістікке жетіп жатқандығына қуанамын, – дейді Рима Сайлаубайқызы. – Мәселен, мектебіміздің педагог-психологы Нұрлы Жақсығалиева бес асықтан өткен облыстық сайыста топ жарса, информатика пәнінің мұғалімі Жайнагүл Құжатова аудан бойынша үздік болды. Оқушыларымның арасынан таяуда болған облыстық жарыста 8-сынып оқушысы Жанна Әмірова бас жүлдені иемденсе, 6-сыныптағы Дамира Бауыржанова күміс жүлдегер атанды. Ақсайдағы спорт мектептерінде, жеке спорт кешендерінде асықтан түрлі жарыстар ұйымдастырамыз. Жалпы, бұл спорт түріне де жеңіл-желпі қарауға болмайды. Біраз демалып, босаңсып кетсең, көш соңында қалып қоюың ғажап емес. Ал бізге көш соңында қалуға болмайды. Елбасымыз айтқандай, жаңарудың, өміршеңдіктің негізі жастарда. Сол себепті жастарымыз білімге, тәлім-тәрбиеге, ұлттық құндылықтарға баса мән берулері қажет. Сонда ғана еліміз экономикалық, рухани жағынан дамып, өркендеп, бәсекеге қабілетті болады».

Нұрлы  ЖАҚСЫҒАЛИЕВА,

педагог-психолог (Бөрлі  ауданы):

– Асықтың баланың тұлға ретінде дамып, қалыптасуында атқарар рөлі зор. Асық ойнайтын оқушының ойы жүйрік әрі жинақы болады. Көптеген пәнге, соның ішінде математикаға деген ынтасы артады. Компьютер, смартфондар көзге зиян болса, асық керісінше, көзді жаттықтырып, көру  қабілетін  жақсартады.

Өзім де асықты жиі ойнаймын. Облыстық, республикалық сайыстарға қатысып жүрмін. Асық ойнау маған серпіліс, тың күш, қуаныш  сыйлайды.

Галина БРАТКОВСКАЯ,

Ақсай  қалалық  №6  мектептің 9-сынып  оқушысы:

– Екі жылдан бері асық үйірмесіне қатысып келемін. Оны үйрену еш қиындық туғызған жоқ. Асық ойыны адамның бойында сабырлылық, табандылық, мақсатқа жетуге деген талпынысты қа-лыптастырады екен. Бұл спорт түрімен айналысып жүргеніме еш өкінбеймін. Ата-анам да барынша қолдау білдіруде. Соның нәтижесінде аудандағы жарыста 3-орын алдым. Қазіргі уақытта құрбыларыма, туыстарыма бес асық деген  ойын  түрін  үйретіп  жүрмін.

Сәкен  МҰРАТҰЛЫ,

Бөрлі  ауданы


Жиһаз жасаушы Жанар

Күні: , 568 рет оқылды

Қыз-келіншектерді табиғатынан ине-жіп сабақтап, кесте төгуге, дастарқан қамдап, үй-жайды мұнтаздай ғып ұстауға бейім деп қабылдаймыз. Ал Бөкей ордасы ауданының Сайқын ауылында тұратын Жанар Садарова – жиһаз цехының қожайыны. Ол қарауындағы қолы іске епті ауылдастарын жиһаз жасауға  жұмылдырып қана қоймайды, екі білегін сыбанып, өзі ағаштан түйін түйеді. Бала күнінен қолөнерге бейім Жанар есейе келе, іскерлік қарым-қабілетін де жетілдірді. «Багира» кафесін ашып, кәсіпке бет бұрды. Бірақ ең басты қуанышы – былтыр 1454 мың теңге мемлекеттік грант қаржысына ие болғаны.

Осы қаржыға кафе ғимаратын жиһаз цехына лайықтап, сүйікті ісімен айналысуға мүмкіндік туды. Жаңа жабдықтармен қатар, тақтай бедеріне ою-өрнекті компьютерлік сызбамен түсіретін фрезерлік станок сатып алды.

– Қажетті шикізатты Оралдан және біздің ауданмен шекаралас Ресейдің көршілес облыстарынан алдыртамын. Тұрғындардан жиһаз жасауға тапсырыс көп түседі. Біздің тауарымыздың құны қаладағыдан арзан. Тапсырыс берушілер интернеттен қарап, үлгісін ұсынады. Соған байланысты ас үй жабдықтарын, тұрмыстық бұйымдар қоюға арналған сөре мен шкаф, орындық, үстел, кереует жасаймыз. Үйлеріне барып, құрастырылатын және қабырғаға ілінетін жиһаздарды да жинап-орнатып береміз, – дейді Жанар Бисенбайқызы.

Садаровтар отбасы қол еңбегімен ауданға кеңінен танымал. Бірі ағаш шебері, бірі темір ұстасы болып еңбек ететін ағалары қарындасына жан-жақты қолдау көрсетіп, жобаның қанат қағуына демеу болған. Жиһаз жасауға әбден төселген Жанардың қимылы ширақ, өзіне сенімді. Үш адамды жұмыспен қамтып отырған іскер келіншек алдағы уақытта цехын кеңейтуді  көздеп  жүр.

Нұртай  АЛТАЙҰЛЫ,

Бөкей  ордасы  ауданы


Айтыстың арқауы – 60 жылдық

Күні: , 258 рет оқылды

Хадиша Бөкеева атындағы облыстық қазақ драма театрында Ақ Жайық айтысының 60 жылдығына арналған «Жалындаған Жайық-жыр» атты республикалық ақындар айтысы өтті.

Оған Астана қаласы мен Ақтөбе, Атырау, Маңғыстау, Батыс Қазақстан және Қызылорда облыстарынан 20 ақын қатысты. Сөз додасына Қазақстанның еңбек сіңірген қайраткері Ғарифолла Көшенов, ҚР еңбек сіңірген мәдениет қызметкері, ақын Шолпан Қыдырниязова, ҚР Білім беру саласының құрметті қызметкері, ақын Дариға Мұштанова, ҚР Білім беру ісінің үздігі, ақын Үзілдік Елеубаева, айтыскер ақындар Талант Арғынғали мен Жібек Болтанова және халықаралық ақын-жыршылар одағының мүшесі Бауыржан Халиолла қазылық етті.

Айтысты бөрлілік қу тілді Жарқынбек Шынтаев қарсыласы ақжайықтық Естеміс Мұхамбетовті қағытумен бастап, құрдастық қалжыңмен «ауыздан авария болмауды» ескертті. Оған саспаған  Естеміс ер:

Авария сіздің жақта көп болады,

Көрдік қой жолдарыңның жамауларын.

Әйтпесе, асыққан ауылыңа,

Шарасыз кетіп жатыр «шарандарың», – деп көлік жүр-гізушілерінің сақтық шараларын ескермеуінен жол апаты көбірек орын алып жатқанын мысқылдап жеткізді. Екеуі де той тізгінін ұстаушыларға қарата сын айтып, елеусіз қалып жүрген тақырыпқа түрен салды. «Асабаң айқайлатып той бастаса,  кем емес ел шетіне жау келгеннен. Халықты жынды қылып жібереді, Сыланып өзі тойға сау келгенмен», – деген Естеміс есті сөз айтып үлгерді.

Сахнаға Бөкей ордасынан ат арытып келген Жоламан Сисенғалиевке қарсы Ақжайық ауданының адуынды ақыны Мейірман Шәкенов сөз сойылын көтере келіпті. Тілі тақылдаған Мейірман ұтымды ұйқас, оралымды ой, ұтқыр уәж айтып, жекпе-жекте басым шықты. Ал Оралдың жас серісі Орынбек Меңдіқұлов пен оның айтуынша «Төлегенін іздеп келген» Қызылорданың аруы Жібек Шахмарданқызының сөз шарпысуы қыз бен жігіт айтысының озық үлгісіндей көркем шықты.

Жігіттің қызға дұрыс қырындауы,

Жыбырлап бара жатыр мұрын жағы.

Бұл қызға сөз салмасам айып болмас,

Салтымен серілердің бұрындағы,  – деген Орынбектің екпінін:

Бойында Жайық деген ізгі өткелдің,

Дүбіріне үн қосып біз жеткен күн.

Сені ешкім сұраған жоқ, айналайын,

Керісінше, талайды іздеткенмін, – деген Жібек бойдағы күшті елдік мәселелерді шешуге арнау керек екенін айтып, жігіттің арынын басты.

Оралдық жерлесіміз Талғат Мықи Маңғыстау облысы Жаңа-өзен қаласынан келген Арғынбек Қалбаевпен айтысында өзекті мәселелерді көтерді.

Қысық көзді қытайлар толып жатыр,

Қар астына жасырып қақпан бүгін.

Көрдік қой сол жақтағы қандастардың,

Қабағына қар болып қатқан мұңын.

Көшеден  ұстап  алып  көрінгенді

Жазықсыз темір торға жапқандығын.

Атажұртқа өтуге рұқсат бермей,

Әр басқан қадамын баққандығын, – деп қазіргі уақытта қоғамда өзекті тақырып болып тұрған шетелдегі қандастар мұңын толғады.

Бірқатар айтыскер ҚР Байланыс және ақпарат қызметкерлері күніне орай журналистер қауымына өкпе-назын айтып үлгерді. Жәңгір хан атындағы БҚАТУ-дың студенті Алшынбек Мұқанғалиев қуақы тілмен Ақжайық аудандық газетінің тілшісі Бекболат Қаленовке «түймедейден түйедей дау қылатын, төбедей мағлұматты тау қылатын» журналистердің қаптап кеткенін айтып «тиісті». Қоңыр  үнді, қараторы, асықпай толғап,  Айбек Қалиевше өткір тілетін Бекболат қарсыластың «жұлқымасына» саса қоймады.

Жамандап журналистің барлығын да,

Сүйреңдеп бара жатыр тілі мүлдем.

Жартысы қазылардың журналист қой,

Жақсы балл алмайсың-ау бүгін мүлдем,

Журналист – қоғамның тамыршысы,

Түйткілді көп жайттың тілін білген, – деп әріптестер намысын қорғай отырып, «Мал қораны көрмеген магистрант, айыр мен күректі айыра ала ма?» деп мысқылдап қойды. Мэлстің шәкіртімін деп келген маңғыстаулық Абай Жалмағамбетовтың Алшынбектің ойымен сарындас сыни сұрағына «Сырым елі» газетінің тілшісі, жас дауылпаз Бауыржан Шимердинұлы «өсек-өтірікті сөз қылудан аулақ» аудан тілшілерінің мұң-мұқтажы бар екенін тілге тиек етті.

«Дипломмен ауылға»

Бара  алмайтын тілшілер,

Қызметтік пәтерді

Ала алмайтын тілшілер, – деп журналистердің баспанасыз жүргенін Бауыржан баса айтты. Аламанда оралдық Жансая Мусина мен атыраулық Шалқарбай Ізбасаровтың сөз қағысуы әзіл-қалжың аралас өрбігенімен, екі дүлдүл әлеуметтік мәселелерді  аса қаузай қоймады. Ал Қаратөбе ауданынан келген 11-сынып оқушысы Райымбек Өтепов бозбала болса да, шикі өкпе емес екенін аңғартып, азулы ақын Мұрадым Мирлановты «ағалай» отырып, «жағаласып та алуға» әзір екенін аңғартты. Сахнада жалын тіктеп, еркін атой салған жас саңлақтың жігерін жасытпай, қалжыңмен демей отырып айтысып, аға мен іні арасындағы әдеп шегі мен әдемі қайырымнан аспаған Мұрадым соңғы сайыста да жаңаөзендік Қалбаевтан сан алуан мақам, сал-мақты ой, ұтымды уәжімен жүйрік шықты. Жаңаөзен оқиғасын толғамай жайбарақат жүргенін «бетіне басқан» ақынға Арғынбек іні ретінде жол берді.

Ақ Жайық айтысының 60 жылдығына арналған өнер аламанында ақындар алдыңғы буын айтыскерлердің есімдерін тілге тиек етті. Облыстың шалғай аудандарына жол тартылғалы жатырғанын қуанышпен жырға қосты. Айта кетерлігі, республикалық айтысқа соңғы кезде сөз майданында көрінбей жүрген  жас перілердің көбірек қатысуына мүмкіндік жасалыпты. Мысалы, өткір тілімен көзге түскен дауылпаз Мейірман Шәкенов қазылар мықтыларды іріктеген екінші кезеңде қызылордалық Жібекпен де әдем айтыс жасады. Қазылар алқасына төрағалық еткен Ғарифолла Көшенов бүгінгі буынның қарымы кеңестік кезеңде айтысты жандандырған ақындар арынынан көш ілгері екенін айтып, жастардың ата дәстүрін дәріптеп, даңқын көтеріп жүргеніне ризашылық білдіруін өнер өрісіне берілген зор баға деп білеміз. Алайда Ақ Жайық атынан қатысқан жас ақындарға бірсарындылыққа ұрынбай, әр сәтін ізденіспен өткізуге, әлеуметтік мәселелерді тереңірек толғауға, өлең мәні мен ұйқасын мығымдап шегендеуге көңіл бөлу керек екені аңғарылып тұрды. Сахнада кейбірінің сөз саулатып отыруы алдын ала дайындық шеңберінен шықпай жүргенін айғақтайды.

Сонымен, «Жалындаған Жайық-жыр» республикалық айтысында бас жүлдені жеңіп алған жәнібектік Мұрадым Мирланов 500 мың теңге қаржылай сыйлыққа ие болды. Бірінші орынға (350 мың) бөкейордалық Жансая Мусина лайық деп танылды. Екінші тұғырдан (200 мың) ақжайықтық Мейірман Шәкенов пен қызылордалық Жібек Шахмарданқызы көрінді. Үшінші орынды оралдық Орынбек Меңдіқұлов пен маңғыстаулық Арғынбек Қалбаев алды.

Нұртай  ТЕКЕБАЕВ,

«Орал  өңірі»

Суреттерді  түсірген Рафхат ХАЛЕЛОВ,

Темірболат ТОҚМАМБЕТОВ


Қос балабақша ашқан кәсіпкер

Күні: , 117 рет оқылды

Мақтан мен атақты, даңқ пен дабыраны жаны сүйе қоймайтын адамдар болады. Бірақ, олардың істеген ісі ілкімді, шаруасы мұқият. Тіршілігіне кісі қызығар, пайым-парасатына жан сүйсінер. Нәзік иығына ауыр жүкті арқалап, табыстың кілтін кәсіпкерліктен тапқан оралдық Светлана Амангелдина  (суретте) өзі туралы айтқанды аса көп ұната бермейтін өте қарапайым жан. «Елден ерек ештеңе жасап жатқаным жоқ» деп санайтын кәсіпкерді сұхбатқа келістірудің өзі оңайға соқпады.

Адамды кейде баршылық сынайды, кейде таршылық сынайды. Мектепке дейінгі білім беру саласында ұзақ жыл жемісті қызмет атқарған Светлана Шайдоллақызы  Ақтөбеден Оралға қоныс аударатын кезде «немен айналысамын» деген үлкен таңдаудың алдында тұрады. Әрі ойланып, бері ойланып, өзі бес саусағындай білетін саладан алыстап кете алмайтынын түсінеді. Сол тұста «Неге жеке балабақша ашпасқа?» деген ой келеді. Оның бұл шешімін отағасы да құптап, жан-жақты қолдау көрсетеді. Қолдағы бар қаражаттың басын құрап, қаланың орталығынан қос қабатты коттеджді жалға алып, жанына білікті мамандарды топтастыра бастайды.

– Балабақша ашпас бұрын,  жағдайды толық зерттедім. «Кәсібім сұранысқа ие бола ма? Кезекте қанша бала тұр? Тәрбиеленушілерге қандай мүмкіндік бере аламын?» деген сан сұраққа жауап іздедім. Мемлекеттік қолдау тетіктерін қарастырдым. Сөйтіп, нар тәуекелге бел буып, 2016 жылдың шілде айында 120 орындық алғашқы жеке бөбекжайымды аштым, – дейді кәсіпкер.

Сол жылдары облыс орталығында 3-6 жас аралығындағы бүлдіршіндерді мектепке дейінгі тәрбиемен қамту мәселесі әлі өзектілігін жоймай тұрған еді. Келушілер саны күннен-күнге артып, сұраныс көбейеді. Кәсіптің тамырын дөп басқанын түсінген нәзік жан енді оны кеңейтуге мықтап кіріседі. Қаланың өзге ауданынан бұрынғы ескі балабақша ғимаратын жалға алып, оны 150 балаға арналған заманауи бөбекжайға  айналдырады.

Бүгінде «Нұр» және «Дельфин» жеке бөбекжайларында барлығы 270 балдырған мектепке дейінгі тәрбиемен сусындап, біліммен қарулануда. Тұрақты жұмыспен қамтылған 31 адамның тең жартысы жергілікті оқу орындарын бітірген жас мамандар. Қазақ және орыс тіліндегі топтарда белгіленген мемлекеттік стандартқа сай мектепке дейінгі білім беру жүзеге  асады. Балаларды өнерге баулып, талантын ұштайтын түрлі үйірмелер қызмет көрсетсе, тіл мүкістігі бар өрендермен арнайы логопед  маман  жұмыстанады.

– Бөбекжай ақысы айына 12-13 мың теңге. Ата-ана тек баласының тамақтануы үшін ғана төлейді. Ал қалған шығынды Үкіметтен бөлінген субсидия есебінен жабамыз. Ай сайын әр балаға 19 мың теңге бөлінеді. Бұл қаражат, ең алдымен, қызметкерлердің жалақысына және балабақша ғимаратын жалдау ақысына, салықтар мен коммуналдық төлемдер-ге бағытталады, – дейді «Asemdik» ЖШС директоры Светлана Амангелдина.

Мектепке дейінгі білім беру саласында 37 жылдан астам еңбек өтілі бар тәжірибелі педагог-психолог қарамағындағы қызметкерлердің алаңсыз еңбек етуі үшін барлық жағдайды туғызған. Өз перзентін өзгеге баққызған ананың көңілі үйіндегі баласында болатынын түсінікті. Сол себепті мұнда қызметкерлердің балалары үшін жүз пайыз жеңілдік қарастырылған. Оған қоса жетімдер үйінде тәрбиеленген жас отбасылардың бөбектері де балабақшаға тегін қабылданады.

– Қызым Аймира Бейбітова «Дельфин» бөбекжайына наурыз айында қабылданды. Санаулы уақыттың ішінде көп нәрсені үйреніп, жаңа достар тапты. Жеке болса да, төлемақысы мемлекеттік балабақшамен бірдей. Ата-аналардың барлық талап-тілегін ескеріп, жұмысын әрдайым жандандырып отыратын бөбекжай ұжымына ризамын, – дейді қала тұрғыны  Әсел  Дүйсеғалиева.

Бар саналы ғұмырымды бала тәрбиесіне арнап келе жатқан Светлана Шайдоллақызы өзін өзге салада мүлдем елестете алмайтынын айтады. «Балалармен жұмыс істегеннен жаным рақаттанып, ерекше күш-қуат аламын. Бұл кәсіпке пайда табу үшін емес, тәрбиелі де салиқалы ұрпақ тәрбиелеуге үлес қосу, халықтың керегіне жарап, қызмет қылу мақсатында келдім. Үкімет те қазір кәсіпкерлікпен айналысам деген жанның бетін қағып жатқан жоқ, керісінше жан-жақты қолдау көрсетіп, түрлі жеңілдіктер ұсынуда. Мәселен, биыл балабақшадағы әр балаға берілетін субсидия көлемі ұлғаймақ. Мемлекеттің шынайы қолдауын  сезіну кәсібімді ілгерілетуге жігерлендіріп, жаңа белестерді бағындыруға қанаттандырады. Табысқа қол жеткізгісі келген кәсіпкер табандылық танытса, міндетті түрде дегеніне жетеді, – дейді болашаққа сенім артқан кәсіпкер.

Динара  ЖҰМАБЕКҚЫЗЫ,

«Орал  өңірі»


Инженерия – бәсекеге қабілеттіліктің темірқазығы

Күні: , 55 рет оқылды

Бұрындары инженерия туралы сөз бола қалса, біздің санамызда көбіне-көп өндіріс саласы, әсіресе, ауыр өнеркәсіп секторы бейнеленетін. Экономиканың бұл күретамыр бағытынан инженерияның шеттетілуі, қағыс қалуы, әрине, еш мүмкін емес. Сөйте тұра, қазіргі кезеңде уақыт өткен сайын көкжиегі кеңейіп, қолданыс аясы ұлғайып келе жатқан гендік инженерияны ескерсек, жалпы инженерияның биозоологиялық және ботаникалық сипаты пайда болғандығына  көз  жеткіземіз.

Жалпы, қазіргі заманғы мемлекет атаулының бәсекеге қабілеттілігі оның экономикалық шама-шарқымен тығыз байланысты. Ал экономиканы сипаттар негізгі категориялардың бірі – бұл өндірілген тауарлардың сапасы. Өз кезегінде тауар сапасы мемлекет экономикасының немесе белгілі бір өндіріс ошағының жаңа техника, озық технология атаулыға қаншалықты иек артқандығына тікелей тәуелді. Міне, мәселеге осы тұрғыдан келгенде, инженерия тағы да жетекші мәнге ие болады. Біз сонау егемендіктің елең-алаң жылдарынан, тәуелсіздіктің таңсәрі кезеңінен жастардың, соның ішінде қазақ жастарының озық технологияға негізделген техникалық сипаттағы мамандықтарды меңгеруіне жол ашатын оқу орнын қалыптастыруды қолға алғанда біз әлгіндей өте-мөте маңызды факторларды ескерген едік. Бүгінгі күн биігінен қарағанда бәсекеге  лайық үш  деңгейлі  білім беруге қабілетті «Қазақстан инновациялық телекомуникациялар жүйелер университеті»  ғылыми-білім  кешенін  құрып, қалыптастыруға осындай ой-ниет негіз болған-ды. Бұл бағыттағы жұмыстар ЭЕМ  операторларына  арналған  курстардан  бастау алды.  Нақтырақ айтқанда, біз қазақстандық және германиялық мамандардың мүдде тоғыстыруының арқасында «Андас» атты біріккен кәсіпорын құрып, 1993 жылы жұмысты бастадық. Осы алғашқы қадамның өзі жергілікті мекеме-кәсіпорындарды компьютерлік техниканың құлағында ойнайтын мамандармен қамтамасыз етуге мүмкіндік берді. Бертін келе, мамандарды  даярлау  үдерісіне  инновациялық  технологияларды батыл  енгізе отырып,  кадрларды  дайындаудың  деңгейін  көтеру үшін  көрші Ресейдің және алысты-жақынды өзге  шетелдердің  іргелі университеттерімен  халықаралық байланыстарды  нығайтып, білім беру деңгейін арттыруға мүмкіндік туды. Біз осылайша IT технологияны меңгеруге нақты қадамдар жасай бастадық.

Әуелкіде үш адаммен жұмысын бастаған алақандай оқу орталығы «Андас» бүгіндері еліміздегі IT  технологиясын тереңдетіп оқытатын Қазақстан инновациялық және телекоммуникациялық жүйелер университетіне (ҚАЗИИТУ) айналды. Бұл, әрине, отандық және бізге сенімді әріптес бола білген біраз шетелдік ғалымдардың жылдар бойғы қажырлы еңбегінің жемісі.

Былтыр еліміздің бас қаласы Астанада «ЭКСПО — 2017» халықаралық көрмесі табиғи қуат көздері арқылы экологиялық қауіпсіздікті қамтамасыз ету мақсатымен өткені мәлім. Осы мәртебелі шарада «Жасыл энергетика» саласындағы «Батыс Қазақстан облысындағы жел қуатын пайдалану барысындағы мәселелер мен жаңғыртылатын қуат көздері» атты  «ҚАЗИИТУ» білім-ғылым кешенінде жасақталған ғылыми жобамыз «ЭКСПО – 2017» халықаралық көрмесіне қатысушы тараптардың ықыласына бөленген идеялардың бірі болды. Ретті жерінде ел-жұрттың жадында жаңғырта кетелік, «ЕХРО — 2017» аясында өткен WSEC-2017 инженерлер мен ға-лымдардың конгресіне 20-дан астам Нобель сыйлығының және «Жаһандық энергия» халықаралық сыйлығының лауреаттары қатыс-қан болатын.

ҚР Президенті Нұрсұлтан Назарбаевтың «Төртінші өнеркәсіптік революция жағдайындағы дамудың жаңа мүмкіндіктері» атты биылғы Жолдауында «Цифрлық Қазақстан» кешенді бағдарламасы қабылданғаны, «2018 жылы «цифрлық дәуір» өнеркәсібін қалыптастыруға арналған индустрияландырудың үшінші бесжылдығын әзірлеуге кірісудің» қажеттігі айтылғаны аян. Цифрлық технология қарыштап дамудың алғышарттарының бірі болғандықтан, Оралдағы Қазақстан инновациялық және телекоммуника-циялық жүйелер университеті  осы стратегиялық мән-маңызы  зор жоба-жоспардың тез әрі сапалы жүзеге асуына әрдайым мүдделі. Осыған орай біздің университеттің ғылыми жұмысқа бейім студенттері және ғалымдары өңірдегі қуат үнемдегіш ресурстар, қуаттың баламалы көздері, «Жасыл экономика», 3Д технологиясын цифрландыру, нейроинтерфейс технологиялары бойынша ізденістерін жалғастыруда. Қуат үнемдегіш  бағыттар бойынша «Ақылды үй», «Ақылды қала», «Ақылды ТКШ» технологияларына тиесілі зерттеу жұмыстарымыз жылдар бойы жүйелі жалғасып келеді. «ҚАЗИИТУ» білім-ғылым кешеніндегі конструкторлық бюро мен ғылыми жобаларды цифрландыру, коммерцияландыру орталығы университет студенттері мен оқытушы-ғалымдарымыздың ғылыми-технологиялық ізденістерін жетілдіре түсуге ықпал етері шүбәсіз.

Астананың 20 жылдығына орай алдағы шілде айының алғашқы күндері ҚР Ұлттық инженерлік академиясы, Астана қаласының әкімдігі және G-Global ұйытқы  болуымен Global Silk Road 2018 (GSR) қала әкімдерінің халықаралық форумы өтеді. Бұл алқалы жиынға «Бір белдеу – бір жол» бастамасына орай Ұлы Жібек жолының бойында орналасқан мемлекеттердің жиырмаға жуық қалаларының басшыларына қоса, көптеген саясаткерлер мен ғалымдар қатысады. Осы халықаралық форумның панельдік сессиясында Ұлы Жібек жолының бойындағы көптеген қалалардың экономикасы мен индустриалдық-инновациялық дамуына тікелей қатысты көкейкесті мәселелер талқыланбақ. Ендеше,  инженерия саласына және жалпы индустриалдық-инновациялық дамуға бей-жай қарамайтын қазақ жастары Global Silk Road форумының жұмысына жіті назар аударып, мұқият зер салып, өздеріне интеллектуалдық-технологиялық  тұрғыдан біраз құнды дерек-дәйек алады  деген  сенімдемін.

Ақсерік     ӘЙТІМОВ,

Қазақстан   инновациялық  және  телекоммуникациялық  жүйелер  университетінің  құрылтайшысы, ҚР Ұлттық  инженерлік академиясы Батыс Қазақстан  филиалының төрағасы, техника  ғылымдарының кандидаты, профессор, академик, «Жаңару» сыбайлас жемқорлыққа  қарсы  жалпыұлттық  қозғалысы  Батыс  Қазақстан облыстық  филиалының  төрағасы,  облыстық  қоғамдық кеңестің  хатшысы. 


Плей-оффқа шыққан 16 команда анықталды

Күні: , 769 рет оқылды

Көзді ашып-жұмғанша аяқдоптан әлем чемпионатының топтық кезеңі де өз мәресіне келіп жетті. Соңғы 8 ойында жолы болған құрамалар 1/8 финал жолдамасын қоржындарына салды.

Ешкім күтпеген сенсациялық нәтиже «F» тобындағы Оңтүстік Корея мен Германия арасындағы матчта тіркелді. Төрт жыл бұрын чемпиондық тәжді Аргентинадан жұлып әкеткен «неміс машинасы» содан кейін буын алмастыру үрдісін сәтті өткізген еді. «Қарттардың» орнын жастар басып, бірнеше турнирде қарсыластарын бет қаратпай ұтқан команда бұл жолы оңбай жығылды. Йоахим Лев бапкер неге екені белгісіз, дүниежүзілік додаға баяғы Нойер, Мюллер бастаған «сақалды» ойыншыларды қайта қосты. Есесіне, керемет шеберлігімен көзге түскен көптеген жас футболшылар тізімнен тыс қалды. Әлемдік аламан алдындағы мұндай ауыс-түйіс ұжымдағы ауызбірлікке нұқсан келтіретіндігі белгілі. Оны топтық кезең ойындары анық байқатты.

Алғашқы матчта Мексикадан ұтылғаннан кейін Германия Швецияны әупірімдеп ұтты. Кәрістерге келгенде әбден масқара болды. 90 минут шабуылдан түк шықпады. Қанша тепсе де доптары қиыс кетіп, қақпаға дарымай қойды. Ызаға булыққан немістердің жиі жіберген қателіктерін кәрістер тамаша пайдаланды. Кездесу аяқталар тұста Ким Юнь Квон мен Сон Хын Мин қос доп соғып, «неміс машинасын» толық істен шығарды. Биікке көтерілу қандай қиын болса, одан құлау да соншалықты ауыр. Германияның бұл жеңілісін жанкүйерлері «өліммен тең масқара!» деп бағалап, бас бапкердің тез арада жұмыстан кетуін талап етуде.

Осы топта Швеция Мескикадан 3 : 0 есебімен басым түссе, «Е» тобында Сербия Бразилияға 2 : 0 есебімен есе жіберді. Швейцария Коста-Рикамен тең түсті (2 : 2). «Н» тобында Польша Жапонияны, Колумбия Сенегалды ұтты (екеуінде де есеп 1 : 0). «G» тобында Бельгия Англияны, Тунис Панаманы тізе бүктірді (1 : 0 және 2 : 1).

Сонымен, плей-оффқа жолдама алған 16 команда анықталды. Бұлардың арасынан жеңімпаздыққа басты үміткерді дөп басып айту оңай емес. Себебі, бұл чемпионатта фаворит саналған ұжымдардың ойындары көңілге сенім ұялатпай тұр. Бразилия Неймарға тым тәуелді. Португалия негізінен Роналдуға сыйынады. Аргентина Мессиге қарайды. Франция мен Бельгияда тамаша жас ойыншылар жинақталғанымен, нақты бір көшбасшы жоқтың қасы. Испанияда да осындай жағдай. Жапондар мен орыстар жұмбақ құрамалар. Енді, бұл орайда ойыншыларының деңгейі біркелкі жоғары Уругвай мен Колумбияға, сондай-ақ Хорватияға жап-жақсы мүмкіндік бар.

30 маусымда Франция – Аргентина, Уругвай – Португалия матчтары өтеді. 1 шілдеде Испания – Ресей, Хорватия – Дания, 2 шілдеде Бразилия – Мексика, Бельгия – Жапония, 3 шілдеде Швеция – Швейцария, Колумбия – Англия бір-бірімен кездеседі.

Жамал  Ғали


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика