Санаулы күндерден соң Оңтүстік кәріс елінің  Пхенчхан қаласында XXIII қысқы олимпиада ойындары  басталады. Төрт жылдықтың басты бәсекесіне әлемнің 80 мемлекетінен 5000-ға жуық спортшы мен ресми тұлға  қатысады деп күтілуде. Сол байрақты доданың ашылу салтанатында шорт-тректен еліміздің намысын қорғайтын  батысқазақстандық Абзал Әжіғалиев  көк туымызды көтеріп шығады.  Үлкен  сынға  аттанар  алдында Мемлекет  басшысының  өзі  еліміздің  олимпиадалық  құрамасының  серкесі (команда  капитаны) ретінде Отанымыздың  туын  қолына ұстататын Абайдың Абзалы кім? Шорт-трекші жерлесіміз туралы білеміз бе? Кейіпкерімізді оқырмандарға  таныстыру мақсатымен оның  отбасында  болған  едік.

Абзал Әжіғалиев 1992 жылы Сырым ауданының Жосалы ауылдық округіне қарасты Қоңыр ауылында өмірге келген. Марқұм әкесі Абай өмірден ерте өткендіктен, төрт жасқа дейін ол Қоңыр ауылындағы аға-жеңгесінің қолында тәрбиеленген. Сол ауылда балабақшаға барған. Жеңгесі Гүлниса Әжіғалиеваның айтуынша, ол балабақшада бір орында байыз тауып отырмайтын, таңсық дүниелерді қозғап көруге әуес бала болған. Арасында жол түсіп әкесімен қалаға қыдырып келгенде, өзге балалар балмұздақ сұраса, ол ең бірінші бәліш сұрайды екен. Өйткені дүкендегі бәлішті анасының пісіргені деп ойласа керек. Содан Оралға көшіп келіп, қалалық №36 мектептің табалдырығын аттайды. Мектепте білім алумен қатар қаладағы бокс, каратэ үйірмелеріне қатысып жүреді.

2001 жылы Оралда жабық мұзайдынды спорт сарайы ашылған соң шорт-тректен Қазақстанның еңбек сіңірген жаттықтырушысы және ҚР ұлттық құрамасының бас бапкері Мәдіғали Қарсыбековтің жетекшілігімен шорт-трекпен шұғылдана бастайды. Оралдық Жасұлан Тұрарбекұлы есімді ұстазынан коньки тебуден өзге өзін жан-жақты дамыту жолдарын үйренеді. Абзал – бүгінде Алматы қаласындағы Қазақ спорт және туризм академиясының студенті.

Анасы Шолпан ұлының қысқы олимпиадада көк байрағымызды алып шығатынын естігенде, көз жасына ерік бергенін жасырмады.

– Абзал алдына қойған мақсатына қалайда жетуге тырысады. Оның шорт-трек үйірмесіне қатысуына басында қарсы болғаным рас. Тіпті «Конькиден саған пайда жоқ, одан да сабағыңды оқы» деп үйірмеге жібермеу үшін үйден шығармаған кездерім де болды. Өйткені сабағына, әрі екі мезгіл жаттығуға бару үшін жолақы қалтаға едәуір салмақ салатын. Екіншіден, мен мұндай жетістікке жетеді деп ойлаған жоқпын. Жай ғана ермегі шығар дедім. Бірақ ол дегенінен қайтпады. Мен жұмыста болған кезде жасырынып, мұзайдынына кетіп қалатын. Спорттық үйірмеге бару үшін ұлым үйден қашып кетіп, ағайындарға түнеген, ал мен оны полициямен іздеген кездер де болды. Жоғары сынып оқыған кезде шорт-трекпен айналысуына ризашылығымды бердім. Содан бастап күннің суығына, ұйытқыған боранға қарамастан, таңғы жетіде конькиін құшақтап, мұзайдынына кететін,- дейді анасы Шолпан Қайлонова.

Абайдың Абзалы шорт-тректен біраз жетістікке қол жеткізіп үлгерді. Ол Сочи олимпиадасында негізін батысқазақстандық шорттрекшілер құраған ҚР ұлттық құрамасы сапында 5 мың метрлік эстафетада бесінші орынға табан тіресе, 2016 жылы қарашада АҚШ-тың Солт-Лейк-Сити қаласында шорт-тректен әлем кубогы кезеңінде 500 метр қашықтықта алдына жан салмай жеңімпаз атанды. Біздің жерлесіміз шорттрек бойынша мұндай табысқа қазақстандықтар арасынан тұңғыш рет қол жеткізді. Одан кейін Алматы қаласында өткен ХХVІІІ дүниежүзілік қысқы универсиадада және Минскіде әлем кубогы кезеңінде дәл сол қашықтықта күміс жүлдеге ие болғаны және бар. Ал қазір XXIII қысқы олимпиадаға дайындықты ширата түсу үшін командаластарымен бірге Жапонияда жаттығуда.

Абзал ғаламтор арқылы тіл үйренгенді жақсы көреді екен. Бүгінде ол қазақ, орыс тілдерін айтпағанда, ағылшын, түрік, кәріс, қытай тілдерін меңгерген. Әлеуметтік желідегі достары да әр ұлттан болғандықтан, өзге тілді меңгеру үшін солардың тілінде сөйлескенді құп көреді. Өзге елдегі жарыс-жаттығуларға барғанда да тілді меңгеруге мол мүмкіндік туатынын жиі айтады екен.

Абзал бала кезінен анасының қатал тәрбиесін көргендіктен, ішкі сырын анасынан гөрі жеңгесімен бөліседі.

– Абзал – қайын ағамның ұлы. Ұлдарым Дарын, Дарханмен тетелес өсті. Ол — өте бауырмал. Мінезі ақжарқын, ешкімге жамандық ойламайды. Мақтанғанды ұнатпайды. Көңіл күйін сыртқа сездіре білмейді. Әлем кубогында жүлделі орын алғанын естіп, хабарлассақ, «Иә, солай бұйырды, тәпә» дейді. Кішкентай кезінде «Тәтәй апа» дегенге тілі келмей, «тәпә» деп атап кеткен еді. Ол шыққан доданы жосалылықтар теледидардан үзбей тамашалайды. Ауыл тұрғындары Абзалжанды «Жосалының баласы» деп мақтан тұтады. Оның достары, сыныптастары көп. Бірақ қалыңдығым бар дегенін естімеппін. Бірде сыныптас қызының тойынан келгенде, «Туу, тәпә, менің сыныптас қыздарым шетінен әдемі екен ғой. Осы кезге дейін қалай байқамағанмын?! Сол кезде аңғарсам, мүмкін қазір біреуін жар етіп, бөпемнің маңдайынан сүйіп отырар едім» дегені бар. Арғы аталарымыз түбінде Әжіғали атағын бір ұрпағым әлемге танытады деп кеткен екен. Лайым, солай болғай, — дейді жеңгесі Гүлниса Әжіғалиева.

Абзал шорт-тректен алғашқы жүлдесін Мәскеу қаласында өткен жарыстан алған. Жарыстан жүлдемен оралса, кейіпкеріміз ең алдымен анасына сыйлық алып қуантады екен. Анасына берген алғашқы сыйлығы – ұялы телефон болған. Одан кейін алтын сырға, әтірлер, әшекей бұйымдар, қыз-келіншектердің бет-қол күтіміне арналған кремдер сыйлаған. Анасы үшін ұлының әр сыйлығы құнды болғандықтан, оны көзінің қарашығындай сақтап, сөреге жинап қоюда.

Анасының айтуынша, Абзал ес білгелі өмірінде бір оқиғаға қатты қамыққан. Ол оқиға осыдан бірнеше жыл бұрын болған. Бірде ол кезекті жарыстан жүлделі келе жатқанда пойызға конькиін ұмытып кеткен. Анасына қуанышын жеткізуге асыққанда, киім-кешегін салған сөмкесін алып, вагонның ең жоғарғы сөресіне қойған конькиін ұмытып кеткен еді. Оралдан соң жүрдек пойыз Мәскеуге асып кеткен. Қайтар жолында пойызды тексергенмен, коньки орнында болмаған. Сол оқиғадан кейін кейіпкеріміз көпке дейін сатып алған конькилеріне үйлесе алмаған. Алайда спорттың бұл түріне деген ынта-ықылас оның талабын жасыта алмады. Абзал Әжіғалиев 2011 жылы халықаралық дәрежедегі спорт шебері атанды.

Ал оның Дарын есімді інісі көкесінің бауырмал және жанашыр екенін айтады.

— Көке қалада өскендіктен бе, әйтеуір, өте пысық. Оралға келгенде, бізді күн сайын қыдыртады. Әсіресе, қалалық саябаққа жиі барамыз. Үлкен мама жұмысқа кетерде есікті кілттеп кетсе, біз бірінші қабаттан секіріп түсіп, сыртқа шығып кететін едік. Тетелес өссек те, оның ағалық қамқорлығы ерекше. Күн салқын болса, бірінші бізді қалың киіндіріп алып, сосын өзі киінетін. Көке ұлттық құрама сапындағы шорттірекшілер қатарында Алматыда дайындықта жүргенде де, біз Алатаудың баурайындағы әсем қалаға қыдырып бардық. Сол кезде көкенің жалақысы кешігіп түсетіндіктен, ұялы телефонын сатып, сол ақшаға бізді қыдыртқаны есімде. Абзалдай ағамның барына мақтанамын, — дейді Дарын Сейфолла.

Олимпиада – өзге спорттық жарыстардан бәсі жоғары тұратын үлкен сынақ. Төрт жылда бір-ақ рет өтетін мұндай дүниежүзілік додада осал қарсыластың болмайтындығы бесенеден белгілі. Сайдың тасындай іріктелген сайыпқыран спортшылар өз елінің абыройы үшін жарыс жолында барын да, жанын да салары анық. «Жүйріктен жүйрік озар жарысқанда» демекші,  байрақты бәсеке алдында ел намысын қорғайтын жерлесімізге жеңіс тілейміз!

Гүлсезім  БИЯШЕВА,

«Орал  өңірі»

Сырым ауданына қарасты Қособа ауылы өңірімізге кеңінен танымал. Себебі бұл ауылдан шыққан белгілі тұлғалар да аз емес. Олардың қатарында әлемді мойындатқан спортшы, айтыскер ақын мен әншілер де бар. Міне, солардың ізбасарлары кейінгі жастардың арасынан әлі де шығатынына ауылдағы ағайынның сенімі мол. Десек те, оларды тәрбиелеп, биікке қанат қақтыратын мәдениет үйі сияқты рухани орда қажет. Сөздің шыны керек, қазір кейбір ауылда жастар жағы дәстүрлі емес дін ұстанып, ата-анасының көңіліне кірбің ұялатса, енді бірі таңды таңға ұрып, карта сықылды құмар ойынның шырмауынан шыға алмай жүр. Қылмыстың өршуіне де ауылдағы мәдениет үйінің жоқтығы ықпал етуде.

Айта кетсек, «Ақ Жайық» әнінің авторы Донеділ Қажымов, айтыскер ақын Бауыржан Халиолла, белгілі әнші Дастан Есентеміров сияқты өнер тарландары түлеп ұшқан Қособада бұрын сән-салтанаты келіскен мәдениет үйі болған. Бірақ сонау тоқырау жылдары оның есігі жабылған еді. 2002 жылы ауылда қаңырап бос тұрған үйді клуб ретінде пайдалануға берген болатын. Көп ұзамай ол үй апатты деп танылып, оның да есігіне қара құлып салынды.

– Жақында Астанадан Парламент депутаттары келіп, аудан орталығында кездесу болған. Сол кезде ауылдағы ақсақалдар кеңесінің төрағасы ретінде ауылымызға мәдениет үйі керектігін айттым. Мәдениет үйінің сызбасы дайын, орны белгілені, мәселе қаражатқа тіреліп тұрғандығын да жеткіздім. Ауыл жанашыры ретінде жастардың бір жерге шоғырланып, өнерін ортаға салатын орын болса дейміз  ғой. Ауылдық ақсақалдар кеңесінің төрағасы болғаныма жиырма жылға жуықтады. Сол жылдардан бері ауылымызда мәдениет үйінің жоқтығы арқама аяздай батып жүр. Біз сияқты қарттардың қолынан келетіні кейінгі ұрпаққа ақылымызды айтып, дұрыс жол көрсету, – дейді ауылдық ақсақалдар кеңесінің  төрағасы  Төлеу  Шарифуллин.

Аталмыш ауылда тұратын тағы бір көпті көрген қария Ерген Тайғожиевтің айтуынша, ауылдың қазіргі жағдайы шүкір. Газ, таза су келіп тұр.

– Бұл күнде ауыл әкімдігі жиі ұйымдастырып отыратын мәдени шараларда замандастарымызбен көп кезігетін болдық. Бұның бәрі қазіргі ауыл әкімінің елге деген еңбегі деп білемін. Кезінде осы ауылға еңбегі сіңіп, терін төккен аға буын өкілдерін ұмыт қалдырмай, келер ұрпақтың алдында ұлықтап, кішігірім концерттік бағдарламасын ұйымдастырып, ауыл халқы атынан марапаттап жатады. Біз сияқты қарияларға одан артық шаттық бар ма?! Әкем 1941 жылы соғысқа аттанған жылы бесікте қалған бала екенмін. Содан күні бүгінге дейін өмірдің қызығын да, шыжығын да ауылдастарыммен қатар көріп келе жатырған жанмын. Кезінде өзіміз құрған ансамбльдің мүшесі ретінде фермаларға барып концерт қою үшін жұмыстан кейін күнде әзірлікке жүгіретінбіз. Шаршау дегенді білмедік. Жастықтың әсері ме, әйтеуір, мәдени шараларға бейім жүретінбіз. Бұрын ауылымызда бәрі болатын. Қазір солардың орны біртіндеп толып жатыр, енді мәдениет үйін салып берсе, нұр үстіне нұр болар еді. Мәдениет болмаған жерде өрлеу болмайды ғой. Кейде ауылда бос жүрген жастарды көріп, уайымдайсың, – дейді ауыл ақсақалы.

Осы елді мекеннің жас тұрғыны Динара Бекшорина қолы күнделікті шаруадан қалт еткенде мәдени шараларға қатысып, қуанышты сәттерді ауылдастарымен бірге бөлісіп жүр. Оның айтуынша, қазіргі кезде ауылдағы көптеген шаралар «Тұмар» мейрамханасы мен мектептің мәжіліс залында өтеді. Мұндай жерлердегі шаралардың бәрі бірдей толыққанды болмайды. Сол себепті бұл тек үш тұрғынның емес, барлық 1343 қособалықтың пікірі осындай. Ауылда жалпы білім беретін орта мектеп, фельдшерлік амбулаториялық пункт, мектеп жанындағы шағын орталық және ауылдық кітапхана  сияқты әлеуметтік нысандар халыққа мүлтіксіз қызмет көрсетуде. Береке-бірлігі артқан ауылда қырықтан астам шаруа қожалығы мен сегіз жеке кәсіпкер шаруаларын дөңгелетуде. Елбасының ауыл тұрғындарының өмір сапасын арттыру жөніндегі тапсырмасына сәйкес атқарып жатқан жұмыстарға орай Қособадан өзге мекенге қоныс аудару сейілді. Керісінше, өзге жақтан ат басын бұрушылар бар, жоғарыда аталған мекемелерге жас мамандар келуде. Осындай ынтымағы нығайып, ырысы молайған ауылдағы ағайынның  ендігі  ортақ арманы – мәдениет үйі.

Темір БОЛАТ,

Сырым ауданы

Жалпақтал  өнер мектебін  өңірімізге ғана емес, елімізге де үлгі  етуге болады. Жас  шеберлер ағаштан  түйін түйіп, тіпті  мал сүйегіне  дейін  кәдеге  жарататынын  өнер  мектебіне  барғанда  білдік. Біз келгенде, оқушылар сүйікті ісімен  шұғылданып  жатыр  екен. Үйлердің  ауласы  мен қора-қопсы  маңында  шашылып  жататын,  иттер ойдан-қырдан  тасып  әкелетін мал  сүйектеріне  көзім түсті. Жасөспірімдердің  сол сүйектерді  өңдеп,  көздің  жауын  алатын  бұйымдарды  жасауда.

Шеберліктің қыр-сырын үйрететін үйірменің ашылғанына үш жылдың жүзі болды. Үйірмеде 16 шәкіртім бар. Малдың тұяғынан және сүйектерінен  музыкалық аспаптар жасаймыз. Сонымен қатар түрлі кәдесый жасаудамыз. Оны дайындау жолдарын айтайын. Мәселен, тұяқты өңдеу үшін бір жетідей уақыт суға салып, жібітіп алып, сонан соң ыстық суға қайнатып немесе ыстық қоламтаға салып балқытып алса, кейін кесіп, жонуға жеңіл болады. Жұмсарып, балбыраған тұяқты июге, қалыпқа қысып кез келген пішінге келтіру оңай. Тұяқты ыстық қоламтаға саларда суға малынған киізбен орап қойса, тұяқ күймей жақсы балқиды. Бабына келген шикізатты пышақпен еркін жонып, түрлі бұйымдар жасауға болады, – дейді өнер мектебінің мұғалімі  Еламан  Мусин.

Ал ағаш шебері Сайран Мадияровтың үйірмесінде сегіз өрен бар. Сайранның осы кәсіппен айналысқанына он жылдай уақыт болыпты. Шәкірттері қайың, емен, үйеңкі ағаштарынан садақ иеді, домбыраның бірнеше түрін және қобыз жасайды. Үйірме жетекшісі қару-жарақтың басқа да түрлерін жасауды жоспарлағандарын айтты.

Шетелдік кәдесыйларға қол жеткізсек, мәз болып, үйіміздегі көрнекті орынға қоямыз. Одан гөрі, санамызға сілкініс жасап, туған жерімізде жасалған төл туындылардың төрден табылуына өзіміз де мүдделі болайық. Жалпақталдық жас шеберлер асыл бұйымдарымен талайға таңдай қақтырары сөзсіз.

Әсем  БОЛАТ,

Қазталов  ауданы

Өткен  аптаның  соңғы жұмыс  күні  Оралдағы «Атриум»  сауда  үйінде «Даламыздың  үнісің  сен, домбыра!»  атты  домбыра-party  өтті. Мәдени шараға дарынды  балаларға  арналған мамандандырылған  С. Сейфуллин атындағы  №11  облыстық  мектеп-интернат кешені  жанындағы  өнер мектебінің  шәкірттері қатысты.

Рухани жаңғыру бағытында мәдени және тарихи мұраларымызды насихаттау мақсатында концерт ұйымдастырдық. Концертте негізінен, мектебіміздің 6-сынып оқушылары өнер көрсетті. Балаларымыз өте талантты. Олар облыстық, республикалық және халықаралық деңгейдегі байқауларда топ жарып жүр. Жақында Ресейдің астанасы Мәскеуде өткен «Рождественские звезды» атты халықаралық фестивальде біздің үлгілі «Атамұра» халық аспаптары ансамблі екінші орын алып, мерейімізді өсірді, – деді дарынды балаларға арналған мамандандырылған Сәкен Сейфуллин атындағы №11 облыстық мектеп-интернат кешенінің директоры Алмас  Мұқанов.

Аталмыш білім ошағы жанындағы өнер мектебінің құрылғанына биыл – 25 жыл. Өнер мектебінде халық аспаптары, би және көркемсурет бөлімдері бойынша 250-ге тарта өнерпаз өрен тәлім алуда. «Атриумдағы» мәдени шарада 30-дан астам балғын домбырашы өнер көрсетті. Концертті қала қонақтары мен оралдықтар, балалардың ата-аналары мен туыстары, сондай-ақ арнайы шақырылған мүмкіндігі шектеулі балалар тамашалады. Домбырашылар ансамблі Құрманғазының «Адай», «Балбырауын», Сейтектің «Тойбастар», Дәулеткерейдің «Көрұғлы» мен Әбдімомын Желдібаевтың «Ерке сылқым» күйлерін төгілтті. Өнер мектебінің шәкірттерінен Арман Құдайбергенов Қазанғаптың «Торы жорғаның бөгелек қағуы», Алуа Төрежанова Құрманғазының «Балқаймақ» күйлерін, Қазбек Қасиет Шынболат Ділдебаевтың «Шындық туралы толғауын» жеке орындады.

Нұртай  АЛТАЙҰЛЫ,

«Орал  өңірі»

Алматы  қаласы  әкімдігінің   ұйымдастыруымен  КСРО  және  Қазақстанның  халық әртісі,  КСРО  Мемлекеттік  сыйлығының  лауреаты,  аса  көрнекті  театр  және  кино  актері   Хадиша Бөкейқызы  Бөкеева  тұрған  үйге  ескерткіш  тақта  орнатылды. Алматы  қаласының  Зеньков  көшесіндегі  №96  үйдің  қабырғасына орнатылған  мемориалдық  тақтаны  ашу  рәсіміне  Атырау  және Алматы  қалаларынан Хадиша  Бөкееваның  әріптестері,  зиялы  қауым  өкілдері  мен  туған-туысқандары  қатысты.

1917 жылы 21 ақпанда  Батыс Қазақстан облысы,  Қазталов ауданы, Қазталовка ауылында дүниеге келген Хадиша Бөкеева – кино және театр актрисасы, профессор. КСРО  және  Қазақстанның халық әртісі. КСРО Мемлекеттік сыйлығының лауреаты. Қазақстан Республикасының «Отан» орденімен марапатталған.

Өзінің хас шеберлігінің арқасында табиғаты, болмыс-бітімі жағынан бір-бірінен алшақ Уильям Шекспирдің «Асауға – тұсау» комедиясындағы Катарина, Мұхтар Әуезовтің «Қобыланды» драмалық шығармасындағы Қарлыға, Тахауи Ахтановтың «Сәуле» драмасындағы Сәуле бейнелерін аса жоғары  шеберлікпен  сомдаған.

1952 жылы қойылған «Абай» спектаклінде Бөкеева бастаушының бейнесін атқарды. Сахнадағы өтіп жатқан оқиғаны сырттай бақылап тұрғандай әсер қалдыратын бастаушы – Бөкееваның үні, оқиғаға сай мимикасы, дауысының дірілі Абай заманы мен оның замандастарының қам-қарекетін көз алдыңызға әкелетін. Сондықтан да бұл жұмысы үшін Бөкееваға КСРО Мемлекеттік сыйлығы (1952) берілді.

www. almaty-akshamy.kz

Өткен аптаның соңында облыс әкімінің орынбасары Б. Қоныспаева мен БҚО бойынша жұмыспен қамтуды үйлестіру және ӘББ басшысының орынбасары С. Хангереев іссапармен  Тасқала ауданында болды.

Аудан әкімі С. Әлиев қонақтарды  атқарылып жатқан жұмыстардан хабардар етті. Кездесу барысында  Бибігүл Тишанқызы жиналғандарға биылғы жылдан бастап қолданысқа енгізілген атаулы әлеуметтік көмектің жаңа форматы мен төртінші деңгейлі бюджет туралы әңгімеледі.

Жұмыспен қамту орталығының ғимаратын аралаған облыс әкімінің орынбасары оның келушілерге ыңғайлы болуын тапсырды.

Мамандармен кездескен Бибігүл Тишанқызы  халыққа  берілетін  жаңадан енгізілген әлеуметтік жәрдемақыны қалай рәсімдеу керектігін және осы бағытта  тұрғындармен түсінік жұмыстарын қалай жүргізу керектігін, әсіресе, басқа жаққа көшіп кеткенімен тіркеуден шықпағандар үшін жұмыс істеуге үлкен кедергі екенін айтты. Сондықтан осы мәселе бойынша  барлық округ әкімдерін құлағдар етіп,  бірнеше жыл бұрын көшіп кетсе де, әлі тіркеуден шықпай жүрген  жандарды тез арада анықтап, жұмыстануды тапсырды.

Жаңа жұмыс орындарын ашу үшін шаруа қожалықтары мен жеке кәсіпкерлер арасында тағы да түсінік жұмыстарын жүргізіп, осы мәселе бойынша жұмыстану қажет екендігі жөнінде аудандық жұмыспен қамту орталығы және әлеуметтік бағдарламалар бөлімінің басшысы Р. Мүсәлімова мен жұмыспен қамту орталығының директоры Б. Кентоғаеваға тапсырма берді.

Орталықтағы құжаттарды  тексерген  Бибігүл Тишанқызы оның дұрыс әрі мұқият толтырылуына баса назар аудару керектігін ескертті.

— Жалпы, жұмыстың бастамасы жаман емес. Биылғы жылдың өзінде 41 адамға келісімшарт жасап үлгергенсіздер. Тек шарт жасар алдында барлық ережелерді мұқият сақтауларыңызды сұраймын, — деді облыс әкімінің  орынбасары.

Айта кету керек, бүгінгі таңда аудан бойынша атаулы әлеуметтік көмек алу үшін 57 отбасынан өтініш түскен. Оның 9-ы шартсыз, яғни отбасында еңбекке қабілетсіз жандар, ал  еңбекке қабілетті, яғни  шартты 48 отбасы бар. Ондағы адам саны 261-ді құрайды. Күні бүгінге 41 адаммен келісімшарт жасалған. Соның ішінде 19 адам әлеуметтік жұмыс орнына жіберілсе, 10 адам қоғамдық жұмысқа тартылған. Ал 12 адам тұрақты жұмысқа орналасқан.

Облыс әкімінің орынбасары Бибігүл Тишанқызы Тасқала ауылдық округінің әкімдігінде, аудандық қарттар мен мүгедектерге арналған жалпы үлгідегі әлеуметтік медициналық мекемесінде болып ұжым мүшелерімен кездесті.

Аудан орталығында «Жұмыспен қамту – 2020 жол картасы» бағдарламасы аясында несиеге қол жеткізіп, өз жұмысын бастаған С. Шотановтың аяқкиім цехында болып, оның жұмысына қызығушылық танытқан Бибігүл Тишанқызы екі-үш жылда осы жерден аудан тұрғындарының сұранысын қанағаттандыратын тұрмыстық үйдің бой көтеруіне тілек білдірді.

Назгүл  СЕРІКҚЫЗЫ,

Тасқала  ауданы  

Аманкелді стансасы – аудандағы ірі елді мекендердің бірісі. Сәйкесінше, тұрғындары да көптеу. Теміржол бойына орналасқан халықтың жаңалыққа, жаңаруға құштарлығы да басым.

Жуырда осы мекенде жақсы жаңалық бой көрсетті. Аманкелді ауылының бұрынғы тұрғыны Ілияс Хайрушин есімді азамат ауыл шетінен жылыжай салып, іске қосты. Жаңа құрылысқа соңғы үлгідегі материалдар пайдаланылып, сапалы әрі сәнді шықты. Сыртқы көрінісіне іші де сай. Жарқыраған сымдар, әдейі ультракүлгін сәуле шашатындары, жылу бөлетіндері бар. Көгілдір отын өткізген, едені жылытылатын жылыжай іші ұядай. 300-ге жуық қияр көшеттері жап-жасыл болып, көздің жауын алады. Жылыжайдың жалпы көлемі 35х7 шаршы метр. Жалпы, құрылыс жұмысын азамат өз қаржысына жүргізіп, 25 млн. теңге қаражат жұмсапты.

 «Ауылымда ісімді ашып көрмек болдым. Қазір әркім еліне, жеріне оралуда. Атам Кенжеғали осы ауылда көп жыл бойы еңбек еткен. Астық қабылдау мекемесінде бас бухгалтер болды. Мен атамның тәрбиесінде болдым. Ол бізді еңбек етуге, адалдыққа үйретті. Еліммен бірге жұмыс жасап, ауылымды гүлдендіруге үлес қоспақпын», – дейді Ілияс. Жүзінен жайдары күлкісі мен жылылық төгіліп тұрған жігітке риза болдық. Тағы бір айтарымыз, жылыжаймен бірге жаңа тұрғын үй құрылысын қатар жүргізген екен. Екі пәтерлі тұрғын үй де жаңа үлгіде. Газы, суы ішінде, әдемі дизаинмен әрленген. Ақтөбедегі інісі Рустам Кенжеғалиев те ағасын қолдап, елге келіпті. Оның келіншегі мен кішкентай сәбиі бар екен. Міне, ауылға бетбұрыс осы! Елбасының «Болашаққа бағдар: рухани жаңғыру» мақаласынан туындайтын нақты істің көрінісі.

Екі азамат отбасымен ауылға келді, ісін бастады. Ертең жұмысы жүйеге түссе, қосымша жұмыс орындары ашылады, алдағы уақытта Амангелді мектебіне баратын бір оқушысы да әзірше осы үйде. Нағыз көпке үлгі болатын үрдіс. Тек қолдау ғана қажет. Ауылдың округ әкімі бастап келген аудан азаматтары жылыжай құрылысымен танысып, ақыл-кеңес беріп, ой бөлісті. Аудан әкімі А. Есалиев жас кәсіпкерлерге басқа жердегі осы іспен айналысушылармен тығыз байланыста болуы, топырақтың сапасы, мал ұстау, үйрек-қаз, балық өсіру сияқты жұмыстарды қатар алып жүру жөнінде ақыл-кеңес берді. Аудандық ауыл шаруашылығы бөлімінің басшысы А. Бисембаев жер рәсімдеу, құжаттарды дұрыс толтыру барысында көмек беретінін айтты. Аудан басшысының өзі келіп, жұмысына сәттілік тілегеніне Ілияс қатты риза болды. Мамандығы теміржолшы болса да, іздену, оқу арқылы жылыжай жайын жақсы білетіні көрініп тұр. Аз сөйлеп, көп тындыратын азамат екені де сезіледі. Біз оның бастаған ісінің сәтті боларына сендік.

Адақ  ШОТПАНОВ,

Шыңғырлау  ауданы

Өткен жылдың соңғы айы оралдық көлік жүргізушілер үшін Шаған жағалауы көшесі бойында орнатылған жылдамдық өлшегіш құралы төңірегіндегі даулы мәселемен есте қалған еді. Аталған түйіткілдің шешілуін жергілікті БАҚ өкілдері де басты назарда ұстады. Орын алған жайттың ақ-қарасын анықтауға облыста арнайы комиссия да құрылған-ды. Жақында сол комиссияның тексеріс нәтижесі белгілі болды.

Айта кетейік, өткен жылдың желтоқсан айында Шаған жағалауы көшесінің бойында, нақтырақ айтсақ, «Ескірмес ерлік» ескерткішінің тұсында орнатылған жылдамдық өлшеу құралына «фотоға түскен» жүзден астам оралдық көлік жүргізушілері жол ережесін бұзбағандарын алға тартып, стационарлық құрылғының жұмысына күмән келтірген болатын. Жолдың бұл бөлігінде көлік жылдамдығы сағатына 60 шақырымнан аспауы тиіс. Әйтпесе, жол ережесін бұзғаны үшін 10 АЕК көлемінде, яғни 22 690 теңге айыппұл салынады. Наразы тараптың айтуынша, көлік иелері жылдамдықты асырмаса да, «фотоаппарат» суретке түсіріп, кейін айыппұл төлеу жөнінде ұйғарымдар келген. Тіпті кейбір жүргізушіге бір айдың ішінде бірнеше айыппұл қағазы келген көрінеді. Жергілікті құзыретті құрылымдар болса, мәселенің мән-жайын анықтау дереу қолға алынғанын және арнайы комиссия құрылғанын айтқан болатын.

Оқиғаның басқаша сипат ала бастағанынан сезіктенген жүргізушілер қалалық сотқа шағым түсіреді. Алайда одан да еш нәтиже шықпаған соң облыстық сотқа жүгінуге тура келген. Көлік иелерінің мүддесі орынсыз тапталмайды деген шенділер, мәселенің ақ-қарасын анықтауға аталған құрылғыны орнатқан «Жаңа жобалар» ғылыми-техникалық орталығы ЖШС өкілдерін шақыртыпты.

«Жазықсыз айыппұл салынды» деп шырылдап жүрген қала тұрғынының бірі – Нұрлан Зинекешев (суретте). Әділдік сұрап, екі айдан бері соттың табалдырығын тоздырған аутожүргізушілер сынақты күн жылынғанда ғана өткізу керек екендігін айтады.

– Менің таң қалатыным қазан айы – 792, қараша – 346 заңбұзушылық тіркелсе, ал қаңтар айында ешбір заңбұзушылық тіркелмеген. Бұлай болуы мүмкін емес. Меніңше, құрылғы жұмысында ақау болған сияқты. Көшені күрделі жөндеуден өткізгенен кейін орын алған жағдай бұл, – дейді Нұрлан Зинекешев.

«Жаңа жобалар» ғылыми-техникалық орталығы ЖШС директоры Владислав Польшин (ортаңғы суретте) тексеріс барлық талапқа сай жүргізілгендігін айтады. Ол құрылғының қалыпты режімде жұмыс істеп тұрғандығын және ешқандай ақау анық-талмағанын, осы жайттарды қажет жағдайда тексеріс жүргізген мамандардың толықтай дәлелдеп бере алатындығын мәлімдеді. Арнайы тексеріс жүргізген маман ауа райы тексеріс нәтижесіне еш әсер етпейтіндігін де айтты.

– Аутожүргізушілердің өтініші бойынша тексеріс жұмыстарын жүргіздік. Астанадан құрылғыны орнатқан компанияның директоры келді. Жылдамдық өлшегіш құрылғының жұмысына жүргізілген тексеріске жергілікті полиция басшылығы, сынақ зертханасының жетекшілері мен шағымданушы жүргізушілер қатыстырылды. Жылдамдық өлшеуіш құрылғының қалыпты жұмыс жасап тұрғандығын дәлелдеу үшін комиссияның көзінше шағымданған жүргізушілер сол аумақтан өз аутокөліктерімен түрлі жылдамдықта өтіп көрді. Жүргізілген тәжірибе белгіленген жүру жылдамдығын сақтаған жағдайда құрылғының фотоға түсірмейтіндігін, ал жылдамдықты асырғанда құрылғы тіркеуге алатындығын дәлелдеді. Тексеріс аяқталған соң оған қатысушы көлік жүргізушілері құрылғының қалыпты жұмыс жасап тұрғандығына көздері жетіп, толтырылған актке қолдарын қойды. Осымен түйіткіл түбегейлі шешілді деп толықтай айта аламыз, – дейді БҚО ІІД әкімшілік полиция басқармасының бастығы, полиция подполковнигі Жанболат Жаншин (соңғы суретте).

Нұрбек ОРАЗАЕВ,

«Орал өңірі»