…1979 жылы А. Пушкин атындағы Орал педагогика институтын бітіріп, туған жерге – Жаңақалаға оралып, аудандық «Жаңарған өңір» газетіне қызметке орналастым. Газетте редактордан басқа кәсіби журналист атаулы жоқтың қасы екен. Әр түрлі мамандық иелері газет қызметін әлінше атқарып жүр. Тіпті олардың өздері басқа мамандық өкілдері немесе ел ішінен шыққан табиғи қабілет иелері болып келеді.

Бала жастан ақындығымен танылып, газет қызметін туа бітті қабілетімен меңгеріп, тілші болып жүргендердің бірі Закария Сисенғалиев екен. Бірден тіл табысып, достасып кеттік. Әсіресе, бізді жақындатқан ақындығымыз еді. Шалғайда үлкен шығармашылық ортасын аңсап жүрген әріптесіміз облыс орталығында белгілі ақын ағалардың алдын көріп, жоғарғы оқу орнының қабырғасында жүріп-ақ жазуы да тым тәуір төселіп, танымал болып қалған замандасымен бір ұжымда бас қосқанына шын қуанды. Кәдімгі арқа тұтты. Өлең жазудың қыр-сыры, машықтары жөніндегі ақыл-кеңестеріме құлшына құлақ түріп, өзінің шеберлігі де тез шыңдала түсті.

Закарияның ақындығы елге, әсіресе, ән мәтіндерімен жақсы танылды. Сол жылдардың өзінде белгілі сазгер Әсет Бейсеуовпен сәтті шығармашылық қарым-қатынас орнатты. Ауыл баласының сөзіне жазылған әндер бірінен соң бірі дүниеге келіп, байтақ ел кеңістігіне тарап жатты. Сол кездегі өнерге ықыласты ел ағаларының пейілі де себеп болған шығар, Жаңақала өңіріне жиі ат басын тіреген Әсет Бейсеуов ауданға әр келісінде жаңа бір әннің тұсауын кестіретін. Соның ішінде Жаңақалаға арнаған әндердің бәрінің дерлік мәтінін Закария жазды. Осы жылдарда Қазақстан Ленин комсомолы сыйлығының лауреаты болып, атағы шартарапқа жайылған «Сәуле» тракторшы-қыздар бригадасына арнаған осы қос автордың «Аққу қыздар», сондай-ақ «Жаңақала – гүл қала», «Іңкәрім» сынды сәтті әндері халықтың жүрегінен жол тапты.

Ал оралдық әнші-сазгер Донеділ Қажымовпен бірге жазған «Ақ Жайық – ару мекенім» әні қанатын бірден кеңге жайып, өлкенің әнұраны іспетті әуелей, шарықтай жөнелді. Бұдан ілгерірек жылдары Орал қаласында Донеділ әндерін орындаушылардың «Ақ Жайық – ару мекенім» атты республикалық конкурсы өткені есімізде. Сазгердің өз шығармашылығын өлеңнің осы жолдарымен атауы кездейсоқтық емес. Сыршыл әуеннің тұңғиығымен астасып, жыр мен саздың қос пернесін үндестіріп тұрған келісті, өршіл туынды ақынның да, сазгердің де шығармашылығының шоқтығына баланып жүр.

Ән әлі күнге сахна төрінен, ұлы өнердің көгінен түспей зор әсермен орындалады. Донеділ Ташкенттің «Мелодия» фирмасынан «Ақ Жайық – ару мекенім» атты әнтабақ та шығарды. Ән мәтінімен республикалық басылымдарда жарияланды. Ондаған жинақтарға енді. Талай рет Мәскеу сахнасында үш тілде (қазақ, орыс, ағылшын) орындалып, «Ақ Жайық» ансамблімен шет елдерге де шығып кетті. Алматы, Астана сахнасынан да жиі шырқалып жүр.

Бүгінде ақынның ән мәтіндерінің өзі – бір бөлек дүние. Ол Ә. Бейсеуов пен Д. Қажымовтан басқа елімізге белгілі сазгерлер Базарбай Жұманиязов, Тұяқберді Шәмелов, жергілікті сазгер Ерлан Сатыбаевтардың ән әуендеріне қырықтан астам мәтін жазды.

Біздің құнарымыз – Қамыссамар, құмарымыз – Құм Нарын. Қараөзен мен Сарыөзеннің құйылысындағы қатқылдың құммен шектесіп, көлдер көмкерген тамылжыған табиғат аясында заманында орыс-казактар да қоныстанып, қатар бой түзеген екі елді мекен бар. Бірі – казак жасақтары бекінген Казарма, қазақша атауы Мұқыр ауылы да, екіншісі – Фокеев, қазақша Сарыкөл ауылы. Закария сол Казармада, мен Фокейде дүние есігін ашыппыз. Ол менен үш жас кіші. 1957 жылы 23 шілдеде туған.

Казарма мен Фокеев – Қамыссамар қойнауындағы ерекше ауылдар. Он тоғызыншы ғасыр мен жиырмасыншы ғасырдың бас кезіндегі орыс-қазақ қарым-қатынастарының ізі қалған тарихи қоныстар. Кейін мұндай тағдырластығымыз жыр жолдарымен өрнектелді. Закарияға сыр ретінде жазған бір өлеңімде:

«Ғаламатпыз, ғажаппыз,

Әрменіміз азаптың.

Іңгәлаған қазақпыз,

Хуторында казактың.

Мүмкін менен кәмілдің

Аралығы мың сымбат.

Сусылынан шағылдың

Өстік білем сыр тыңдап.

Ұға түстік тұспалды,

Болса-дағы тылсым қат.

Қиқуласа құстардың

Көмейінен күй тыңдап.

Қараөзен мен Мұқырдың

Сар сазанын бұлқынтып,

Құмға аунадық

күтірдің

Бұйра жалын сілкінтіп», — деп келетін жолдар бар.

Осы өлең жолдары Қамыссамар қойнауындағы кезінде орыс-казактар қоныстанып, жергілікті жұртпен мидай араласып кеткен сол қос «хутордың» сыр-сипаты мен сол жердегі балалық шақтың көріністеріне жетелейді.

Закария аудандық газеттің тілшілігінен редакторлығына дейін көтерілді. Арнаулы білімі болмаса да, таудай талабымен және қабілетімен тілші, бөлім меңгерушісі болды. Кейін жауапты хатшы қызметінде жасап жүріп, 1979 жылы С. Киров атындағы университеттің журналистика факультетіне сырттай оқуға түсті. Ертерек жанұя құрып, анасы мен бауырларын қанатының астына алған ол отбасылық және материалдық жағдайына байланысты Орал педагогика институтына ауысып, ойдағыдай бітірді. Одан соң Алматы саясаттану және басқару институтына жолдамаман барып, білімін дамытып, туған жерге қайта оралды. Келген бетте облыстық «Орал өңірі» газетінің Жаңақала ауданындағы меншікті тілшісі, одан соң аудандық «Жаңарған өңір» газетінің редакторы болды.

1993 жылы мемлекеттік қызметке ауысып, аудан әкімі аппараты ішкі саясат, ұйымдастыру және кадрлармен жұмыс бөлімінің меңгерушісі лауазымында істеді. 2001-2012 жылдары Жаңақала ауданы әкімінің орынбасары қызметін атқарып, әлеуметтік салаға жетекшілік етті. Сөйтіп, соңғы жиырма жыл бедерінде Жаңақала ауданының әкімшілігінде түрлі жауапты қызметтер атқарды. Бүгінде Жаңақала аудандық мәслихатының хатшысы.

Ол кейбіреулердей кеңсе тірлігімен қасаңсып, лауазым буында бөртіп те кеткен жоқ. Өлеңнен, өнерден қол үзбеді. Ол оның сөз өнерін өз өнерім деп білуінде еді. Жыр мен сазға, халықтық өнерге құмарын бір сәт те тарқатпай, өмір соқпағына өрлеп келеді.

Закария облыс орталығында екі рет шығармашылық есеп берді. Жаңылыспасам, алғашқысын 50 жасқа, екіншісін өзінің 55 жасқа және шығармашылығына 35 жыл толуымен ұштастыра өткізді-ау деймін.

Өлеңді өміріне серік етіп келе жатқан жергілікті қаламгер үшін бұл аз табыс емес.

2001 жылы Алматының «Жазушы» баспасынан «Әнім сенсің, Жаңақала» атты тұңғыш жыр жинағы жарық көрді. Одан кейінгі жылдары да қаламы бір құрғаған жоқ. Мақалалары мен өлеңдері облыстық, республикалық басылымдарда үзбей жарияланып тұрды. «Ақ Жайық – ару мекенім», «Ақ тілек», «Жылдар, ойлар», «Жырлайды жүрек» «Қарашада қалған мұң», «Шындық шырайы» атты кітаптары шықты. Қазақстан Журналистер одағының және халықаралық Жазушылар одағының мүшесі.

Жемісті қызметі үшін «Қазақстан Республикасының тәуелсіздігіне – 10 жыл», «Қазақстан Республикасының тәуелсіздігіне – 20 жыл» және «Ерен еңбегі үшін» медальдарымен марапатталды. Елбасының Алғысхатына ие болды. Ең бастысы, елден ұзамай, туған жұртының құрметі мен ықыласына бөленіп келе жатыр.

Қасиет пен қабілет тек пен тәрбиеден дариды. Закария – қос ананың арда ұлы. Оны кішкентайынан бауырына басып, өсірген жарықтық Хадиша анамыз тұла бойынан мейірім мен ықылас төгілген ғажап жан еді. Маған осындай аналардан тағылым алған Закарияның арлы азамат, нұрлы перзент болмауы мүмкін еместей көрінеді. Ақынның аналар достығына арнаған «Қос ана» атты жан толқытар өлеңі бар.

«Біреулер дүниелік қара жинап,

Бірісін екі етсем деп жанын қинап.

Жүргенде жарылқады Жаратқаным,

Бір маған екі бірдей ана сыйлап.

Бірің дара, екіншің дана болдың,

Десем-дағы мен ортақ бала болдым.

Жазылмаған бар екен өмір заңы,

Бірің – жеңге, екіншің – ана болдың.

Сөзіне ермей кейбір найсаптардың,

Қараумен көңілдерге жан сақтадым.

Біріңді ана десем, ал екіншің

Өкпелеп қала ма деп тайсақтадым», — деп тебірене жеткізеді.

Бүгінде Закария – Жаңақаладағы желегі жайқалған үлкен әулеттің діңгегі. Құдай қосқан қосағы Маржанмен жарасымды өмір сүріп, үш қыз, бір ұл тәрбиелеп, қанаттандырды. Бүгінде әрқайсысы өз алдарына тұрмыс құрып, елдің азаматтарына айналды. Құда-жекжаттары, тума-туыстары қаумалап, елі құрмет тұтқан Закария әулеті мәуелі бәйтеректей тамырын тереңдетіп, жапырағын жая түсті. Елімен етене жарасқан Жаңақаланың жайсаң азаматы асқаралы биігіне асқақтай өрлеп барады. 

Аманкелді ШАХИН,

ақын,

Қазақстан Жазушылар одағының мүшесі

ҚР  Парламенті  Мәжілісінің  депутаттары  Бақтықожа  Ізмұхамбетов  пен  Абай  Тасболатов,  облыс  әкімі   Алтай  Көлгінов   шаһардағы теннис орталығы  мен  Оқушылар сарайында  болды.

Мәртебелі   меймандарды  теннис орталығының жұмысымен  облыстық дене шынықтыру және спорт басқармасының басшысы Әсия Аманбаева таныстырды. Әсия Рақымқызының мәліметінше,  заманауи  жаттығу алаңымен жабдықталған теннис орталығында  130-ға  жуық   оқушы   жаттығады. Мұндағы жасөспірімдердің дені оқу-жаттығу топтарында, ал кейбіреуі дәрігердің нұсқауы бойынша тек теннис  ойнайды. Теннис орталығына бес-алты жастан бастап қабылданады.  Сондай-ақ облыстық дене шынықтыру және спорт басқармасының басшысы депутаттарға теннис кортын, жаттығу залын таныстыра жүріп, бұл орталық еліміздегі бірден-бір заманауи теннис орталығы екенін және мұндағы  жас теннисшілердің болашағынан зор үміт күттіретінін айтты.

– Кезінде Қазақстанның  үстел теннисі  федерациясының президенті болдым.  Үстел теннисі ойынын өте жақсы көремін. Мұндай заманауи жабдықталған спорт сарайында жаттыққан өрендеріміз болашақта спорт шеберлері болатынына сенемін. Елбасымыз  Нұрсұлтан Әбішұлы да теннис ракеткасын еркін меңгерген. Кортта кез келген кәсіби теннисшіні шаң қаптырады. Спорт саласында да Нұрсұлтан Әбішұлы бізге үлгі болып келеді. Бұл зәулім спорт кешені  халықтың игілігіне қолданылып, өскелең ұрпақ осы жерден тәрбие алып, салауатты өмір салтын ұстанатынына сенемін, — деді Бақтықожа Салахатдинұлы.

Содан кейін өңір басшысы Алтай Көлгінов пен депутаттар осы нысанның маңындағы Оқушылар сарайына барды. Оқушылар сарайында шахмат, дойбы сынды спорттық және техникалық үйірмелер, сондай-ақ бассейн, мұз айдыны, Рио олимпиадасының чемпионы Данияр Елеусінов атындағы бокс залы бар. Аталмыш кешеннің директоры Сандуғаш Алмамбетованың айтуынша, жаз мезгілінде 1540 оқушыны қамтитын 36 үйірме жұмыс жасап тұр.  Бұл жерде спорттық жарыстар жиі ұйымдастырылып тұрады.

Жуырда Д. Елеусінов Оқушылар сарайына келіп, шеберлік сағатын өткізген. Ал содан кейін бокс үйірмесіне келетін жасөспірімдердің  саны  артқан.

Жасөспірімдердің заманауи оқу-жаттығу кешендерін  аралаған   ҚР Парламенті Мәжілісінің депутаттары Орал шаһарында  жастар мен жасөспірімдердің спортпен шұғылданып, қабілет-қарымын  шыңдауы  үшін барлық жағдай жасалғанын  айтты.

*    *    *

Түстен кейін  аталмыш  делегация  Орал трансформатор зауытының жұмысымен танысуға барды.

Орал трансформатор зауыты – индустриалдық-инновациялық дамудың мемлекеттік бағдарламасы аясында 2015 жылы ашылған өндіріс ошағы. Кәсіпорын қуаттылығы жоғары бөліп тарататын майлы және құрғақ трансформаторларды шығарады. Аталмыш мекеменің атқарушы директоры Ақжол Сауранбаевтың мәліметінше, трансформатор зауыты шетел инвесторларымен  электротехникалық құрал өндіру бойынша өзара меморандумға қол қойған.

Осы арқылы жұмыс орындары екі есе көбейіп, экспорт көлемі артқан. Зауыттың өнімдерінің 96%-ы экспортқа шығарылуда. Әсіресе, Ресейге, Армения мен Грузияға көбірек экспортталуда. Орал трансформатор зауыты былтыр  3000 өнім шығарса, биыл 3000 трансформаторды бірінші жартыжылдықта жасаған. Аталмыш кәсіпорын ағымдағы жылы  7000 трансформатор шығаруды көздеп отыр.

Жуырда  алғашқы келісім бойынша Арменияға 200 дана трансформатор жөнелтілмек, кейін 300 дана  жіберілмекші. Зауытта 210 адам жұмыс жасайды. Қазіргі уақытта оралдық кәсіпорын өнім сапасын жоғары деңгейге көтеру, өндірістік шығынды азайту, өнімнің сапалық техникалық сипаттамаларын жақсарту бағытында жұмыстануда. Заманауи еуропалық құрал-жабдықтармен жабдықталған аталмыш мекемені аралаған ҚР Парламенті Мәжілісінің депутаттары кәсіпорынның жұмысына  оң  баға  берді.

Депутаттар шаһардағы «Квант» жиһаз зауытында да болды. «Квант» ЖШС-ның директоры Михаил Пшеничный Парламент депутаттарын жиһаз фабрикасының жұмысымен таныстырды.  Серіктестік директорының айтуынша, кәсіпорын жасайтын корпустық және жұмсақ жиһаздар, паралон матрас және бұл бағытта басқа да қажетті материалдардың сапасы жоғары әрі экологиялық  таза және бағасы арзан болып келеді. Зауытта жатын бөлме, ас үй, балалар жиһаздары өндірілуде. Шикізат Ресейден тасымалдануда. Жұмыс барысымен танысқан ҚР Парламенті Мәжілісінің депутаттары зауыт өнімінің сапасына жақсы баға  беріп, жұмыстарына сәттілік тіледі.

Гүлсезім  БИЯШЕВА,

«Орал  өңірі»

Суреттерді   түсірген  Айбатыр   НҰРАШ

Шілденің  6-сы  күні  Қадыр  Мырза  Әли  атындағы  мәдениет және  өнер  орталығының  амфитеатрында  дәл  осындай  атаумен мерекелік  шара  өтті.

Оралдықтар мен қала қонақтарын Астана күні мерекесімен облыс әкімі Алтай Көлгіновтің атынан және өз атымнан құттықтаймын! Елбасымыздың сарабдал саясатының арқасында бүгінде Елордамыз әлемге әйгілі алып шаһарға айналды. Әлемдік деңгейдегі мәселелерді шешуге қатысты алқалы жиындардың, саяси-экономикалық, мәдени-спорттық шаралардың қазақ елінің бас қаласында өтуі –  оған дәлел. Сонымен қатар Астанамызда «ЭКСПО – 2017» көрмесінің өтуі оның инновация драйверіне айналып келе жатқанын көрсетсе керек. Барша қазақстандықтың мақтанышына айналған Астананың мәртебесі арта берсін, – деген Орал қаласының әкімі Мұрат Мұқаев осынау мерекенің құрметіне өңір басшысының атынан облыстық зағип және көзі нашар көретін азаматтарға арналған кітапханаға «ГАЗель» аутокөлігінің кілті  мен тифлотехниканың құжаттарын салтанатты түрде табыстады.

Одан соң Ғ. Құрманғалиев атындағы облыстық филармонияның әншілері мен бишілері Отанымызға, туған жерге, Астанаға арналған өнер туындыларын көпшілік  назарына  ұсынды.

Мәди   ЫҚЫЛАС

Өткен  сенбі  күні  облыстық  аурухананың  мәжіліс  залында профессор  Хеннинг  Хойманмен (Германия)  баспасөз  мәслихаты өтті.

Профессор Хеннинг Хойман  әлемге танымал дәрігерлердің қатарында. Штутгарттағы (Германия) медициналық университеттің отохирургі – өзінің жоғары дәрежедегі кәсіби маман екендігін әлдеқашан дәлелдеп үлгерген жан. Зейнетке шыққанына жеті жылдай уақыт өтсе де, әлі күнге Ресейдің, Беларуссияның және Қазақстанның дәрігерлерімен бірлесіп жұмыстануда. Оралға келіп, емделушілердің ризашылығына бөленіп жүрген профессор биылғы жұмыс сапарын облыстық аурухананың 150 жылдығына арнап отыр.

– Ауруханада жұмыс жасап жүргенімде, мұндай мүмкіндіктер болмаған еді. Зейнет демалысына шыққаннан кейін әлем бойынша біліктілігімді арттырсам деген дәрігерлерге білгенімді үйретіп келемін. Бір кездері бағыма қарай атақты хирург Х. Вольштейн мен Дитер Плестердің микрохирургия бойынша көрсеткен әдіс-тәсілдерін үйреніп қалдым. Жұмыс сапарымның жетіжылдық қорытындысында сіздің дәрігерлеріңіздің шеберліктері көз алдымда шыңдалып келеді. Келген әр жылымда өзімнен дәріс алып жүрген дәрігерлерге үй тапсырмасын беріп кетемін. Келесі жылы келгенде, аталған тапсырманың орындалу барысын қадағалап отырамын. Кейде өте ұсақ оталар жасауға тура келеді. Сол кезде отаны бет және де басқа  жүйке жүйелеріне зақым келтірмей жасау керек болады. Егер  ота кезінде жақ  жүйкесі зақымдалса, адамның беті  өмір бойына орнына келмеуі мүмкін. Сондықтан мұндай  ота өте сақтық пен ұқыптылықты талап етеді. Мен оралдық дәрігерлердің жауапкершілігіне разымын. Әзірге күш-қуат, уақыт және ниет бар кезде жас мамандарға үйрету басты міндетім деп санаймын. Осы кезге дейінгі жинаған тәжірибемді барлық отолоринголог дәрігерге үйреткім келеді, – деп ниетін білдірді  Х. Хойман.

Осы салада 40 жыл еңбек өтілі бар 72 жастағы Хеннинг Хойманның жұмысқа деген құлшынысы әлі де мықты екендігін және Астана күні мейрамы қарсаңында өңірімізге келіп, 15 емделушінің құлағына ота жасап үлгергенін, сонымен қатар барлық  оталардың тегін жасалғандығын профессормен бірге жүрген ресми өкілі  Винс Дитер айтып өтті.

– Профессордың жетекшілігімен жақ-бет хирургиялық бөлім меңгерушісі Асхат Нәдірғалиев, лор дәрігері Динара Молдағалиева мен Лунара Иралиева сынды білікті мамандар ота жасауда. Олар бұрын орта деңгейдегі оталарды жасайтын болса, қазіргі таңда күрделі оталарды жасай алатын болды. Бұл – біз үшін қуанышты жағдай. Бұған дейін есту қабілеті нашар адамдар үшін оталар еліміздің Алматы және Астана қалаларында жасалатын болса, енді Ақтөбе, Атырау және Ақтаудан келетін емделушілер оралдық отохирургтардың көмегіне жүгінуде, – дейді облыстық аурухананың бас дәрігері Ерлан Тоқсанов.

– Облыстық ауруханадағы құрал-жабдықтар күрделі оталарды жасауға мүмкіндік береді. Бұған дейін аптасына 1-2 рет қана ота жасалатын болса, қазіргі таңда Хойман дәрігердің шеберлік сыныбынан өткен дәрігерлердің біліктілігімен күніне екі  ота жасап үлгереміз. Заманауи емдеу әдістерін қолданудың нәтижесінде облыстық ауруханадағы жақ-бет хирургия бөлімшесі дамудың жаңа сатысына аяқ басқанын сеніммен айта аламын, – дейді бөлім меңгерушісі  Асхат  Нәдірғалиев.

Темірболат ТОҚМАМБЕТОВ

Теректі  ауданында  жұмыс  сапарымен  болған  ҚР  Парламенті  Мәжілісінің  депутаты  Бақтияр  Мәкенді  аудан  әкімі  Кәрім Жақыпов  қарсылап,  оны  аудан  аумағында  жүзеге  асып  жатқан  бірқатар  жұмыстармен  таныстырды.

Халық  қалаулысы  алдымен Подстепный ауылындағы мәдениет үйі құрылысының жай-жапсарына  қанықты. Ауылдың көркіне айналатын  300 орындық  мәдениет үйінің құрылысы жандануда. Жергілікті 20 тұрғын жұмыспен қамтылған. Жоба бойынша музыкалық құрылғыларды алу да қарастырылған. Мердігер компания өкілінің айтуынша,  қазан айында жұмыстар аяқталып, мәдениет үйі  халық игілігіне  берілмек.

– Жүйелі жұмыс жасауға кедергі көріп тұрған жоқпын. Бірақ, ең алдымен, сапаға көңіл бөлу керек. Мердігерлер жұмысына атүсті қарауды тоқтатқан абзал. Бұл – халықтың игілігі. Құрылысқа қажетті заттардың барлығы бар дейсіздер, техникалар да жеткілікті деңгейде. Олай болса, салғырттық танытпай, жақсылап жұмыс жасаған жөн. 10 мыңнан астам халқы бар ауыл үшін бұл мәдениет үйі аса қажет. Қазан айында іші-сырты келіскен өнер ошағында жолығамыз деп ойлаймын, – деді Бақтияр Мәкенұлы өз сөзінде.

Ақсуат ауылына таза ауыз су жүргізу жұмыстары жаңа қарқын алды. Бұл игілікті іске де Мәжіліс депутаты куә болып, оң бағасын берді. Бюджеттен 144 млн. 480 мың теңге бөлінген бұл жобаны «Аяла» ЖШС-ның басшылығы қарашаға дейін жұмыстарды аяқтаймыз деп отыр. Сонымен қатар  былтыр күрделі жөндеуден өткен аудан орталығындағы №1 Федоров мектебін аралап, ұстаздар қауымымен пікірлесті.

Аудан әкімі К. Жақыповтың төрағалығымен өткен актив жиынына қатысқан Мәжіліс депутаты Б. Мәкен облысымыз бойынша түйткілді мәселелерді де тілге тиек етті.

– Мән беретін мәселенің бірі – ғаламтордың жұмыс жасау деңгейі. Республикамыз бойынша, ірі қалаларда бұл өзекті емес шығар, бірақ шағын ауылдар ғаламтор байланысына  мұқтаж. Қарқын төмен, жылдамдығы жай болғасын жұмыс жасауға, құжат айналымына көп кедергі келтіреді. Ауыз су мәселесі барынша  қарқынды шешілуде. Бұйырса, 2020 жылға дейін БҚО бойынша ауыз сумен қамту 100% болады деп күтілуде. Мысалы, бүгінгі таңда Теректі ауданының өзінде бес ауылды ауыз сумен қамту жүзеге асып жатыр. Елбасымыз Нұрсұлтан Әбішұлы Назарбаевтың бастамасымен көптеген мемлекеттік бағдарламалар өз жемісін беруде. Жоғарыда аталған мәселелерді шешу жолдарын Парламент депутаттары назардан тыс қалдырған емес. Егер сұрақтарыңыз болса, менің жеке парақшама хат жолдауларыңызға болады. Мүмкіндігінше  көпке ортақ мәселенің оң шешімін табуына  мүдделілік танытамын, – деді Бақтияр Мәкен.

Әділет  ОРЫНБАСАРОВ,

Теректі   ауданы

*  *  *

ҚР  Парламенті  Мәжілісінің  депутаты  Бақтияр  Мәкен  Шыңғырлау  ауданында  іссапармен  болды.

Астана күні мерекесі қарсаңында келген депутатты аудан әкімінің орынбасары Т. Каюпов қарсы алып, ауданның тыныс-тіршілігімен таныстырды. Бақтияр

Мәкенұлы «Нұр Отан» партиясы аудандық филиалы ғимаратында жастармен кездесті.

Кездесу барысында жастар белсенділері өз ойларын ортаға салып, пікір бөлісті. Мәжіліс депутаты жүздесу барысында «Болашақ» бағдарламасы бойынша шетелде оқитын студент жастарға үкімет тарапынан берілетін қамқорлық, жеңілдіктерге ерекше тоқталып өтті.

«Әрбір жас маман – ертеңгі басшы, ел-жұрт арқа сүйер азамат. Осыны анық сезініп, тиянақты білім, ел үшін жемісті  еңбек ету керек», – деді  ол.

Осыдан соң халық  қалаулысы «Акрам» мейрамханасында кәсіпкерлермен кездесті. Жеке кәсіпкерлер Р. Камзаев, Ә. Талдыбаев берілетін несиелер мен ауыл шаруашылығы мамандарының жетіспейтіндігін тілге тиек етті. Басқа кәсіпкерлер де өздерін толғантып жүрген мәселелер жөнінде сөз қозғады. Екі кездесуде де  Б. Мәкен депутаттық  жұмыстары жөнінде кеңінен әңгімелеп, түсініктер берді.

Сапар соңында «Жаңа жер» шаруа қожалығының егіс даласын аралап көрген Бақтияр Мәкенұлы бітік шыққан егінді көріп, риза  болды.

Адақ  ШОТПАНОВ,

Шыңғырлау  ауданы

Шілде  айының басында  Астана  қаласында  «ЭКСПО – 2017» көрмесі  аясында  ұлттық  робототехника  сайысы  өтті.  Республикалық  сайысқа  еліміздің  әр  өңірінен  100-ден  астам  команда  қатысты.  Олимпиаданың «Open Senior» (ересектер) санаты бойынша  Орал  қаласындағы  физика-математика  бағытындағы Назарбаев  зияткерлік  мектебінің оқушылары жеңіске жетті.

Биыл 11-сыныпты тәмамдаған Асан Бекқалиев, Шымболат Тінәлиев және Дияс Тілекбай автоматтандырылған шағын су электр стансасының үлгісін жасағандығы жөнінде бұрын жазған болатынбыз («Өнертапқыш өрендер Астанаға аттанды» «Оө», №78-79, 29.06.2017). Ғылыми жобаның жетекшісі – физика пәнінің мұғалімі Нұрболат Дағаров пен физик-лаборант Нұрбек Балғали. Жобаға сәйкес, сенсорлық компьютер арқылы басқарылатын станса су ағысымен айналатын магнитті диск арқылы тұрақты  ток  өндіре  алады.

– Робототехника сайысына қатысқан біздің делегация құрамында 30-дан астам адам болды.

Әр аймақтан келген 300-ге тарта оқушының ішінде батысқазақстандық зияткерлердің көбі жүлделі орындарға қол жеткізді. Шағын станса арқылы электр қуатын өндіруге бағытталған ғылыми жобамыз республикалық олимпиадада озық деп бағаланды. Енді Коста-Рика мемлекетінде өтетін әлемдік робототехника сайысына дайындықты күшейту мақсатында жеңімпаздарды оқыту-іріктеу кезеңі ұйымдастырылады. Оған біздің елімізден және көршілес мемлекеттерден білікті мамандар қатысып, жобаны жетілдіру жөнінде оқушыларға ақыл-кеңесін береді. Оған дейін біздің топқа шаһардағы саябақтарда шағын стансаның орналасу нүктелерін анықтау және оны пайдаланушылар үшін экономикалық тиімділігін нақты есептеу тапсырылды. Ғылыми жобамызды іріктеу кезеңінде сәтті қорғайтынымызға, сөйтіп, Коста-Рикаға жолдама алатынымызға сенімдіміз, – деді Шымболат Тінәлиев.

Жобаны қорғаушылардың сөзінше, ұлттық робототехника сайысының ауқымы жылдағыдан ұлғайып, қатысушылары көбейген, соған сәйкес, байқау талаптары да күшейтілген. Ғылыми-зияткерлік сайысқа Өзбекстаннан арнайы шақырылған оқушылар да қатысыпты. Атап өтерлігі, қараша айында өтетін әлемдік робототехника байқауына 50-ден астам елдің өнертапқыштары бармақ.

Ретті жерінде айта кетелік, Солтүстік Америка құрлығындағы Коста-Рика – 1948 жылдан бері әскер ұстаудан бас тартқан, тұрғындарының 90 пайызы баламалы қуат көздерін пайдаланатын шағын мемлекет.

Нұртай  АЛТАЙҰЛЫ,

«Орал  өңірі»

Астана  күніне  орай  А. Островский  атындағы  театр  алаңында Батыс Қазақстан облысы  қолөнер  шеберлерінің  көрмесі  өтті.

Көрмеге «Шаңырақ» әлеуметтік кәсіпорны, «Ұлттық өнер», «Нәзік», «Інжу», «Салықов», «Молдашева» ЖК секілді қолөнермен айналысатын елуге жуық жергілікті шеберлер мекемесі қатысты. Өңірімізде тұңғыш рет ұйымдастырылып отырған бұл көрмені жергілікті тұрғындармен бірге облыс әкімінің бірінші орынбасары Арман Өтеғұлов бастаған жергілікті атқарушы билік өкілдері де тамашалады.

– Бұл шара «Азаматтық альянс» ҮЕҰ аймақтық бөлімшесінің бастамасымен, қала әкімдігінің қолдауымен ұйымдастырылып отыр. Негізгі мақсаты – ұлттық  өнерімізді насихаттап, өңіріміздің алтын қолды адамдарын көпшілікке таныту. Көрмеде негізінен ұлттық нақыштағы туындылар қойылған. Осындай дүниелер арқылы қалалық тұрғындардың үлкен-кішісі ұлттық өнерімізге қатысты таным көкжиегін кеңейтеді. Астана күніне орайластырылған бұл шарада Елбасының «Болашаққа бағдар: рухани жаңғыру» атты Жолдауында айтылға-нындай, ұлттық кодымызды сақтау және рухани құндылықтарымызды жаңғырту басты тақырып ретінде алынған.

Көрмеге шақырылған шеберлердің қолөнер туындыларының көбі ұлттық бағытта дайындалғаны да сондықтан. Дегенмен көрмеге әкелінген туындылардың арасында моншақ, сырға-сақина, тіпті табиғатты бейнелеген неше түрлі картиналармен қатар, қолдан тоқылған заманауи  аяқкиімдер де бар. «Аленеуов» ЖК 1 маусым – Балаларды қорғау күніне байланысты сол күні дүниеге келген бес бірдей сәбиге бесік сыйлады.  Қазіргі таңда адамдардың сана-сезімі ашық, айқын, уақыт өткен сайын халқымыздың  ұлттық құндылықтарының бағасы артып, барған сайын дәріптеле түсуде. Егер осындай салмақты шараларды жиі ұйымдастырып тұрсақ, болашақ ұрпағымыздың бойында еліне, жеріне деген құрмет, сүйіспеншіліктің одан сайын арта түсетіні сөзсіз, — дейді шараны ұйымдастырушылардың бірі,  БҚО Азаматтық альянсының жетекшісі Айгүл Түркина.

Көрмеге келушілер назарына, шынымен де, неше түрлі бұйымдар ұсынылды. Мысалы, Нұрлан  есімді жігіттің  («Аленеуов» ЖК) қолынан шыққан бесіктер 8-10 мың теңгенің айналасында болды. Көрпе-көпшігі жасаулы бесіктер – 15 мың теңге. Ал орталық базарда мұндай бесіктер 20-25 мың теңгеден бір-ақ шығады. Бұлардың қасында отырған көршісі – қалалық Наталья Мартынова мата қалдықтарынан қуыршақ тігудің шебері екен. Ол кәдімгі капрон шұлық пен мата қалдықтарын пайдаға жаратып, қуыршақтар мен жан-жануарлардың әдемі бейнелерін жасапты. Ол қызылды-жасылды боянған күркетауықты 2 мың теңгеге, ал Сайқымазақты (Клоунды)  4000 теңгеге сатамын деп отыр. «Көпжасарова» ЖК-ның иесі Жанар мүмкіндігі шектеулі болса да, қол қусырып үйде қарап отырғысы келмейді. Сондықтан қолынан келетін өнерді пайдаға асыруды жөн көрген ол өзінің жеке кәсібін ашып, балаларға арналған қуыршақтар мен үй жиһаздарын, сондай-ақ той-томалаққа арналған шашу ыдыстарын жасауды қолға алыпты. Оның қолынан шыққан дүниелер сондай әдемі көрінсе де, өте қымбат емес, 2- 4 мың теңге арасында. Оралдық Назгүл Ораз қолдан тоқыған шәркейлерін 2 мың теңгеге және «Тұрман» ЖК иесі Бадиғажамал Мусаева кәдімгі тоқыма жіптен тоқыған жазғы аяқ киімдерін 10 мың теңгеге ұсынды. Ал бөкейлік Артур Ғабдушев (суретте) туған жерін кесе мен тәрелкеге және жейделерге таңбалап басып-ақ, табыс табуға бекінген сыңайлы. Артур тәрелкенің қақ ортасына Хан үйінің суретін, кесесінің сыртына Хан ордасын бейнелепті. Ауылының әппақ құмына дейін суретке түсіріп, магнитті картинаға айналдыруының өзі оның туған жеріне деген ыстық ықыласын, ерекше құрметін көрсетсе керек.

М. Өтемісов атындағы БҚМУ ұжымы да көрмеге үлкен дайындықпен келіпті. Аталмыш оқу орнынан келген Бейбітәлі Досқалиев келушілерге үлкенді-кішілі домбыраларды және асатаяқ, қоржын, торсық, келі, ожау, кесе секілді ұлтымызға тән ыдыс-аяқтар коллекциясын көрсетті. Шебер шілденің аяғына таман барша оралдықпен бірге Астана қаласына барып, туындыларын жан-жақтан ағылып келіп жатқан туристерге көрсететінін айтты. Ал Нұрдәулет Асқарұлы мен Фараби Жанқадамовтың керамикадан жасаған құмыралары да ерекше көз тартады. Қылқалам шеберлері туған жерге деген сүйіспеншілігін қарапайым бояумен шебер бере білген. Облыстық тарихи-өлкетану музейі ұсынған ассамблея құрамындағы түрлі ұлт пен ұлыс киімдері де көпшіліктің қызығушылығын туғызды. Түрлі ұлт киімдерін, әсіресе, балақайлар қызыға тамашалады. «Жылқайдар» ЖК иесі сонау  Сырым ауданы Аралтөбе ауылынан келіп, көпшілікке өз қолынан шыққан ат әбзелін таныстырды. Жеке кәсіппен айналысқанына биыл сегіз жыл болған Нәсіпқали Жылқайдаров жылқы малына арналған құрал-жабдықтардан басқа  аяқкиім және түрлі мамандықтың арнайы киімдерін тігеді екен. Кәсіпкердің айтуынша, Сырымда және қалада орналасқан цехтарына тапсырыс үздіксіз түсіп тұр. Ирина Тетюеваның қолынан шыққан түрлі иіс сабындар, моншақ, алқа білезіктерге  де қызыққандар көп болды.

Бағасы онша қымбат болмағасын шығар, көрмеге келгендер шеберлердің ұсынған бұйымдарын сатып алып жатты, кейбіреулер олардың визиткасын алып, өздеріне қажет бұйымдарға қалаған үлгіде тапсырыс беріп те үлгерді. Көрмеге қатысқан облыстық балалар-жасөспірімдер туризмі және экология орталығы тәрбиеленушілерінің қолынан шыққан дүниелердің жөні тіпті бөлек. Орталық директоры Виктор Фоминнің айтуынша, балалар даярлаған бұл туындылар тұрмыстық қалдықтардан жасалған. Мысалы, «Балықшы туралы ертегі» атты картинада ертегі кейіпкерлерін  бейнелеу үшін негізінен шеге, бекіткіш, батырма, пластмасса шөлмектердің қақпақтары секілді қалдық заттар пайдаланылған. Ал «Менің қиялымдағы қала» атты туындыда балалар әсем қала – Астана бейнесін иіссу, әтірлердің босаған шөлмектерінен жасапты.

«Елбасы прагматизм туралы, яғни ысырапшылдыққа жол бермеу жөнінде айтты. Біз қалдықсыз өнім ережесін қатаң сақтап, қазіргі уақытта қалдықтарды да пайдаға асыруға кірістік», – деді өз сөзінде Виктор Павлович. Аталған орталық ұжымы даярлаған туристік құрылғылар көрмеге ерекше  сән  беріп  тұрды.

Алаңқайдың шет жағын ала орналасқан 4-5 суретші бір-бірінің суреттерін салып, көрушілердің назарын өздеріне аударуға тырысып жатты. Шет жақта отырған кішкентай бойлы қазақ жігіті адам портретін мейлінше жедел салады екен. Суретшінің өнеріне тәнті болғандар балаларының, аналарының портреттерін ақысын  төлеп, салдырып алды. Айтпақшы, көрме жұмысына жергілікті өнерпаздар мықты қолдау жасады. Олар көрме басталғаннан аяғына дейін Отан-ана, туған жер, Астана тақырыбындағы әндердің бірінен соң бірін шырқап, би билеп, шараның шырайын кіргізді.

 Айша  ӨТЕБӘЛІ,

«Орал  өңірі»

Зейнеп  ТАУЛИНА,

Қаратөбе  ауданының  тұрғыны:

– Көрме өте жақсы өтуде. Өңірімізде небір шеберлер бар екен, соларды көріп, қуанып тұрмын. Шеберлер көрмесінің осындай ашық далада өткені дұрыс болды, соның арқасында көптеген өнерлі адамдармен таныстық. Менің сұрайын дегенім, осындай алтын қолды адамдар мен дарынды жастарды бір компанияларға қосып, олармен келісімшарт жасасып, бірге жұмыстануға болмай ма? Әйтпесе нағыз дарынды адамдардың көбі өздігінен шыға алмай қалып жатыр ғой… Оларды қолдауға бір амал жасалса деймін.

Виктор  ФОМИН,

облыстық  балалар-жасөспірімдер  туризмі және  экология  орталығының  директоры:

– Әр қаланың өз Арбаты бар. Міне, сол жерлерде дарынды адамдар өз өнерлерін көрсетеді. Арбаттарда өнер көрсету дегеніміз, бұл – дарынды адамдардың өзін-өзі жарыққа шығаруы, басқаша айтқанда, жарнамалауы. Оларға Арбат арқылы мүмкіндік берілгені дұрыс, мұның танымалдылыққа әсері мол. Олар сондай-ақ өз қолдарынан шыққан туындыларын саудалап, адал еңбегінің ақысын алады. Мен бұл жобаны  қос  қолымды  көтеріп  тұрып  қолдаймын.

Орал  қалалық  мәдениет  және  демалыс  саябағында БҚО Қазақстан  халқы  ассамблеясының  қолдауы  және  «Грамада»  белорусь  этномәдени  бірлестігінің  ұйымдастыруымен «Иван  Купала» күні  аталып  өтті.

Қазіргі уақытта «Иван Купала» бүкілқазақстандық мерекеге айналуда. Бұл мейрамды славян халықтары ежелден тойлайды. Оның мистикалық астарында от пен су, көк пен жер, әйел мен ер сияқты қарама-қайшы әрі бірін-бірінсіз өмір сүре алмайтын ұғым-түсініктердің айрықша мәні ашылады. Жаз кезінде тойланатын махаббат мейрамында ғашықтар қасиетті отпен жан дүниесін тазартып, сезімдерін бекіте түскен. Қазақстандағы әр түрлі этностардың салт-дәстүрін сақтап, діни мерекесін  атап өтуіне толық жағдай  жасалған. Бұл – ел бірлігін, отандастарымыздың ынтымағын нығайтатын факторлардың бірі, – деді облыс әкімінің  орынбасары Марат  Тоқжанов.

«Грамада» белорусь этномәдени бірлестігінің төрағасы М. Беляев «Иван Купала» күні биыл жылдағыдан кеңірек аталып өтіп жатқанын айтты. «Иван Купаланы» шығыс славяндары күннің ұзарып, тоқырауына байланысты бұрын маусым айының 23-інен 24-не қараған түні, қазіргі кезде шілденің 7-сінде тойлайды. Бұл күн Иоанна Предтечи туған күнін атап өтетін христиан мейрамымен сәйкес келеді. Мейрам кешінде от жағып, алау үстінен секіру, шөп жинап, гүлтәж өру, суға шомылу рәсімдері орындалады. Саябақта сол рәсімдер қамтылған театрландырылған көріністер қойылып, су перісі, мыстан секілді мистикалық кейіпкерлер көрермендер алдында өнер көрсетіп, ән шырқалды. Белорусь халқының ұлттық билері  көпшілік  назарына   ұсынылды.

Өз  тілшіміз

Он  сегіз  жыл  бойы  ҚР  Парламенті  Сенатының  депутаты болған Рашит  Ахметов  өңіріміздің  әлеуметтік-экономикалық дамуына  көп  үлес  қосты.  Енді  оның  осы  жолын  жаңадан сайланған  сенатор  Нариман  Төреғалиевтың  жалғастыратынына сенім  мол. Бұл  туралы  кеше  өткен облыс  активінің  жиынында өңір  басшысы  Алтай  Көлгінов  мәлімдеді.

– ҚР Парламенті Сенаты депутаты ретінде өкілеттілік мерзімінің аяқталуына байланысты Рашит Ахметов басқа қызметке ауысты. Рашит Сайранұлы 18 жыл бойы Сенаттың үш шақырылымының депутаты болды. Осы уақыт аралығында ол облысымыздың дамуына өзіндік үлесін қосты. Әсіресе, Сенаттың бюджет комитетін басқарған кезде оның қолдауын сезіндік. Мәселен, соңғы бір жылдың ішіндегі жұмыстарды айтар болсам, Киров – Шежін каналының салынуына Рашит Сайранұлы көп еңбек сіңірді. Елбасы тапсырмасына сәйкес ауыз су, газ, жол мәселелері де депутаттарымыздың көмегімен өз шешімін табуда. Облысымызға жасаған осындай көмегі үшін Рашит Сайранұлына батысқазақстандықтар атынан ризашылығымды білдіремін. Ал таяуда Парламент Сенаты депутаттарының сайлауы өткені белгілі. Сонда әріптесіміз, облыстық басқарма, департамент басшысы, аудан әкімі, облыс әкімінің орынбасары, Орал қаласының әкімі болған Нариман Төреғалиев сенатор болып сайланған еді. Соған орай Нариман Төреғалиұлын жаңа қызметімен құттықтап, табыс тілейміз, — деді Алтай Сейдірұлы.

Өз кезегінде сөз алған Рашит Ахметов 18 жыл бойы облыс басшылығымен, жергілікті мәслихат депутаттарымен бірігіп жұмыс атқарғанын, соның нәтижесінде өңірдегі әлеуметтік-экономикалық мәселелердің біразы оң шешімін тапқанын тілге тиек етті.

– Осы уақыт аралығында Ақ Жайық өңіріне келген сайын тек ресми тұлғалар, кәсіпкерлер, шаруашылық жетекшілерімен емес, зиялы қауым өкілдерімен де жиі кездестім. Олардан өңір жұртшылығының мұң-мұқтажы туралы да естіп білдім. Облысымыздан сайланған Парламенттегі әріптестеріммен, атқарушы билік құрылымдарымен бірге жергілікті жерлерде орын алған түрлі мәселелердің шешілуіне үлесімді қосқаныма шүкіршілік деймін. Таяуда Сенат депутаттарының қолдауымен Есеп комитетінің мүшесі қызметіне кірістім. Енді бұл бағытта да бірлесіп жұмыс атқарамыз деп ойлаймын.

Ал Нариман Төреғалиұлы сынды өмірлік, еңбек тәжірибесі бар, елдің алдындағы жауапкершілікті түсінетін жанның жоғары заң шығарушы құрылымның депутаты болып сайлануымен құттықтап, нәтижелі жұмыс тілеймін,  – деді Рашит Сайранұлы.

Мінберге көтерілген Нариман Төреғалиев өзінің сенатор болып сайланғаны бірінші кезекте батысқазақстандықтардың, облыстағы барлық деңгейдегі мәслихаттар депутаттарының өзіне артқан сенімі екенін айтты. Өзі мұны жақсы түсінеді және сол сенімге қаяу түсірмек емес. Қай салада қызмет атқарса да, Елбасы, Үкімет, облыс басшылығы қойған тапсырма-міндеттерді орындау үшін аянбай еңбек етті. Осы қызметтер барысында бағыт-бағдар берген аға буынға, өзімен бірге белжазбастан қызмет еткен орта буын өкілдеріне және жастарға айтар алғысы зор.

Жиын барысында сөз алған облыстық мәслихаттың депутаты Қатауолла Ашығалиев Рашит Сайранұлымен бірге тығыз жұмыс істегенін, соның нәтижесінде Салық кодексіне өзгерістер енгізілгенін айтты. Ал «су жаңа» сенатор Н. Төреғалиевқа елді мекендердегі бастауыш мектептерді жаптырмай, сақтап қалу бағытында Үкімет тарапынан тиісті іс-шаралар алуға ықпал ету туралы өз ұсыныс-тілегін жеткізді. Рашит Ахметовтың іскерлік, адамгершілік қасиеттері туралы баяндаған Қазыбай Бозымов Жәңгір хан атындағы БҚАТУ-да соңғы кезде жаңадан сегіз нысанның бой көтеруіне Рашит Сайранұлы тікелей ықпал еткенін айтты. М. Өтемісов атындағы БҚМУ-дың жатақханасының салынуына да оның көмегі тиген. Енді осындай игі істер Н. Төреғалиевтың тұсында өз жалғасын табарына үміт артатынын  мәлімдеді.

Сәкен  ӘБІЛХАЛЫҚОВ

Суреттерді   түсірген Темірболат  ТОҚМАМБЕТОВ

Кеше  облыс  әкімі  Алтай  Көлгінов  ҚР  Парламенті  Мәжілісінің  депутаттары  Бақтықожа  Ізмұхамбетов,  Павел  Казанцев,  Қанат  Мусин  және  Абай  Тасболатовпен  кездесті.

Алтыншы шақырылымдағы Парламент Мәжілісінің депутаттары аймақтарға кезекті іссапарға аттанды.

Біздің жолымыз Орал өңіріне түсті. Негізгі мақсатымыз – Елбасының берген тапсырмаларының орындалу деңгейін қадағалап, сәйкесінше батысқазақстандықтарға Парламент Мәжілісінде атқарылып жатқан жұмыстар туралы ақпар беру. Сонымен қатар халықтың мұң-мұқтажын тыңдап, олардың сауалдарына жауап бермекшіміз. Соңында барлық мәселені жинақтап, шешілу жолдарын қарастыруымыз қажет. Әрине, өз басым Батыс Қазақстан облысының тыныс-тіршілігімен өте жақсы таныспын. Себебі төрт жылдан астам уақыт осы өңірге басшылық жасадым. Елбасы қабылдаған бағдарламалардың арқасында жыл сайын халықтың өмір сүру деңгейі жақсарып келеді. Әр жылда іргелі жобалар жүзеге асырылуда. Бұл өңірдегі ең күрделі мәселелердің бірі – жол инфрақұрылымы екені белгілі. Бірнеше жыл бұрын 12 ауданның алтауынан облыс орталығына қатынайтын жөнді жол болмады.

Ал бүгінде бұл жағдай әжептәуір оңалды. Ендігі кезекте биыл атқарылатын жоспарларыңызбен таныссақ  дейміз, — деді Бақтықожа Салахатдинұлы.

– Қысқаша айтсақ, облысымызда «Нұрлы жол» бағдарламасында көрсетілген міндеттер қарқынды жүзеге асуда. Президентіміз Нұрсұлтан Әбішұлы Назарбаевтың қабылдаған бағдарламалары халықтың әлеуметтік-тұрмыстық мәселелерін шешуге бағытталған. Мәселен, жол жөндеуге қомақты қаражат бөлінуде. Жаңа сіз орынды айттыңыз, кезінде 12 аудан орталығының тең жартысымен облыс орталығын байланыстыратын жібі түзу жол болған жоқ.

Қазіргі уақытта ол мәселе оң шешімін тауып отыр. Қазталов, Жәнібек сияқты алыс аудандарға жол салынуда. Биыл барлығы 500 шақырым жол жөнделмек. Оның 200 шақырымы республикалық маңызға ие. Қалғаны – қалалық және аудандық деңгейдегі жолдар. Елбасының тапсырмасымен биыл «Нұрлы жер» бағдарламасына 12 млрд. теңге бөлінді. Осы қаржыға 11 көп қабатты үй (1600 пәтер) салынуда, соның 10-ы Орал қаласында, ал біреуі Ақсай қаласында. Сондай-ақ сегіз ауданда барлығы 191 үй бой көтеруде. Ал әлеуметтік жағына тоқталсақ, сегіз жаңа мектеп және бірқатар қосымша мектептер жөндеуден өтуде. Жиырмадан астам денсаулық сақтау нысандарына күрделі жөндеу жұмыстары жүргізілуде. 12 ауданның 55 елді мекені таза сумен қамты-лмақ. Атқарылып жатқан жұмыстар өңірдегі экономиканың дамуына оң ықпалын тигізуде. Қаламызда үй салу комбинаттары, темір-бетон, кірпіш шығаратын, полиэтилен құбырларын дайындайтын зауыттар жұмыс жасауда. Сәйкесінше жұмыссыздық деңгейі төмендеді. Елордаға іссапармен барғанымызда, Парламент Мәжілісінде біздің өңірдің даму мәселелері күн тәртібіне қойылатындығына куә болып жүрміз. Сондықтан депутаттардың да қолдауын  үнемі сезініп жүрміз, – деді облыс әкімі  Алтай  Сейдірұлы.

Парламент Мәжілісінің депутаттары Қаратөбе, Сырым, Теректі, Бөкей ордасы, Жаңақала, Ақ-жайық аудандарына жол тартып, халықпен жүздесуді көздеп отыр.

– Қасиетті Ақ Жайық өңіріне депутат ретінде келгеніме ризамын. Бір апта көлемінде ауқымды жұмыстар атқарып, осы облыстың дамуына үлес қосуға дайынбыз, — дейді Мәжіліс депутаты Абай Тасболатов.

Айымгүл   ЖОМАРТҚЫЗЫ,

«Орал  өңірі»

Cуретті  түсірген Темірболат ТОҚМАМБЕТОВ