Сенбіде  облыс  басшысы  Алтай Көлгіновтің  төрағалығымен  және  өңірімізге  іссапармен  келген  «KAZAKH INVEST»  ұлттық  компаниясы»  АҚ  басқарма төрағасының  орынбасары Біржан Қанешевтің  қатысуымен  басқосу  өтті.

Жиынды ашқан облыс әкімі Алтай Көлгінов биылғы наурыз айында Елбасының шешімімен «Қазақ инвест» компаниясының құрылғанына, аталмыш мекеме-компанияның елімізде инвестицияға қолайлы жағдай жасау, шетелден инвестицияларды тарту және әріптестік байланыстарды нығайту бағытында жұмыстанатынына тоқталды.

– Алдымызда Елбасының тапсырмасына орай инвестиция тарту, өңірлердің экономикасын одан әрі дамыту үшін орта және шағын бизнесті қолдай отырып, әсіресе, шетелдік инвесторларға қолайлы жағдай жасау, әкімшілік кедергілерді жою, бірлескен кәсіпорындар құру міндеттері тұр.

Бұл – барлық  деңгейдегі әкімдердің, барлық мемлекеттік құрылым басшыларының жұмысындағы басым бағыттар, – деді Алтай Көлгінов. Оның айтуынша, Елбасының тапсырмасымен таяу және алыс шетелдерге өңір кәсіпкерлерімен бірге шыққан іссапарлар өз нәтижесін бере бастады. Мысалға, Оралда мұнай химиясы саласында Иранмен бірлескен кәсіпорын құрылып, жұмысын бастады және зауыт құрылысы жүруде. Бұл өзі – білімді, білікті мамандарды тартуды қажет ететін, ғылымға негізделген заманауи өндіріс. Фин компаниясымен де бірлескен кәсіпорын құрылды. «ЭКСПО – 2017» көрмесі алаңында облыс басшылығы Финляндияның президентімен, финдік кәсіпкерлік қауымдастығымен де кездесті. Енді екі жоба «жандануға» дайындалуда. Сингапурлықтармен де жұмыстар жүруде. Ауыл шаруашылығы саласын экономиканың драйверіне айналдыруға өңірімізде барлық қолайлы жағдай бар. Зеленов ауданындағы құс фабрикасы жобасына ауыл шаруашылығы өнімдерін өңдеуде тәжірибесі мол польшалық инвесторлар қатысуда. Облысқа жыл сайын сырттан 10 мың тонна құс еті импортталады. Ал мына Щапов ауылы маңындағы құс фабрикасы жобасының 1-кезеңінде 6 мың тонна ет өндіріледі. Польшалық әріптестер Беларусь елінде мұн-дай 10 құс фабрикасын салған. Сондықтан алдағы уақытта кәсіпкерлермен бірге Польшаға, Беларусьқа іссапармен барып, олардың жұмыстарымен танысу, сөйтіп, жұмысты одан әрі жалғастыру көзделіп отыр.

Басқосуда Біржан Қанешев аталмыш ұлттық компанияның қызметін таныстырып, оның мақсат-міндеттері және жоспарлары туралы әңгімеледі.

– Экономиканы әртараптандыру және оның дамуы үшін шетелдерден инвестицияларды тартуымыз керек. Алайда Елбасының басты талабы бойынша елге келген инвесторларды жобаларды жүзеге асырғаннан кейін де ұстап қалу маңызға ие. Қазір жер шарында 2 триллион доллар шамасында қаржы айналымы бар. Соны елімізге тарту үшін де инвесторларға қолайлы жағдай жасағанымыз жөн, – деді Біржан Қанешев. Басқарма төрағасының орынбасарының сөзіне қарағанда, жаңа инвесторды тарту бұрыннан жұмыс істеп жатқан инвесторды ұстап қалудан үш есе қымбатқа шығады.

– Сондықтан біз – шетелдік  инвесторларға және олардың жаңа жобаларды бастауы үшін қолайлы жағдай жасау үшін құрылған компаниямыз. Бұрын қолға алынған, жұмыс істеп жатқан және жаңа жобаларға жағдай жасау үшін жұмыс істейміз. Бұрыннан жобалары бар шетелдік инвесторлардың елімізде қалып, одан әрі жобаларын кеңейтуіне және инвестиция құйып, жаңа жұмыс орындарын ашуына мүдделіміз, — деді Б. Қанешев. Оның айтуынша, бірыңғай сөйлесуші ретінде компания «бір терезе» қағидаты бойынша инвестициялық жобаларды идея түрінен іске асыруға дейінгі аралықта толық сүйемелдеуді қамтамасыз етеді.

Әр өңірде компанияның өкілдіктері жұмыс істейді. Олар жобаларға алғашқы баға береді, инвесторлармен жұмысты күшейтеді және жергілікті деңгейде инвесторлардың барлық түйткілді мәселелерін шешуге, жергілікті құрылымдармен үйлестіруге қам-қарекет жасайды. Жиын барысында Б. Қанешев БҚО бойынша аталмыш ұлттық компанияның өңірлік директоры Азамат Бисеновті және оның орынбасары Әзербай Үмбеталиевті таныстырды.

Басқосуды қорытындылаған өңір басшысы аталмыш компанияның өңірлік директоры Азамат Бисеновтің облыс әкімінің инвестиция тарту бойынша кеңесшісі болатынын мәлімдеді.

– Біз кәсіпкерлерге қызмет көрсетудің бір орталығын құрамыз. Ыңғайлы ғимарат іздестірудеміз. Онда кәсіпкерлік басқармасы, әлеуметтік-кәсіпкерлік корпорациясы, «Даму» қоры және «Атамекен» кәсіпкерлер палатасы филиалдарының, «KAZAKH INVEST» өкілдігі, яғни кәсіпкерлікпен, оны реттеумен, әкімшіліктендірумен, инвестиция тартумен байланысты қызметтердің барлығы бір жерге шоғырланады. Мұның өзі бизнесті дамытуға жағдай туғызады. Кәсіпкер алтын уақытын бюрократияға шығындамауы керек. Оны «ашық» есіктер қарсылауы тиіс, – деген облыс басшысы өңірде инвесторларға қолайлы жағдай туғызу бағытындағы атқарылған жұмыстарға тоқталды. Мысалға, Орал – Франкфурт, Орал – Мәскеу бағытындағы халықаралық және өңіраралық Ақтау, Атырау бағытындағы әуе желілері ашылды, алдағы уақытта көлік-логистикалық орталықтардың жобалары іске асырылады.

Ендігі жерде «KAZAKH INVEST» ұлттық компаниясы» АҚ облыс әкімдігімен инвестициялардың қарқынды дамуы үшін және қолайлы инвестициялық климатты құру мақсатындағы жұмыстарын жалғастырады.

Гүлбаршын  ӘЖІГЕРЕЕВА,

«Орал  өңірі»

Сенбі  күні  облыс  әкімі  Алтай Көлгінов  Орал  қаласының  активіне  жаңа  әкімді  таныстырды. Бұған  дейін  Теректі  ауданын басқарып  келген  Мұрат  Мұқаев  ҚР  Президенті  әкімшілігінің және  Орал  қалалық  мәслихаты  депутаттарының  келісімімен  қала  әкімі болып  тағайындалды.

– Мұрат Рахметұлы, сізге Орал қалалық мәслихат депутаттарымен, мемлекеттік құрылым, қоғамдық ұйым өкілдерімен, ардагерлермен бірлесе Мемлекет басшысының алдымызға қойған тапсырмалары мен міндеттерін орындауда, сонымен қатар оралдықтардың әл-ауқатын арттыру жолында табысты жұмыс тілеймін. Сіздер Елбасының «Қазақстанның үшінші жаңғыруы: жаһандық бәсекеге қабілеттілік» Жолдауынан туындайтын іс-шараларды жергілікті жерде жүзеге асыруларыңыз керек. «Нұрлы жол», «Нұрлы жер» және салалық бағдарламалар бойынша қойылған міндеттерді сапалы орындау қажет. Сондай-ақ Елбасының «Рухани жаңғыру» бағдарламасының жүзеге асуын қадағалау міндеті де тұр.  Сіздің біліміңіз бен біліктілігіңіз қойылған мақсат-міндеттерді талапқа сай жүзеге асыруға септігін тигізеріне сенім мол, — деді облыс  әкімі.

Мұрат Рахметұлы Мұқаев 1969 жылы Батыс Қазақстан облысында туған. Екі жоғары білімі бар (бухгалтерлік есеп, экономист және заңгер).

Еңбек жолын 1992 жылы аудандық деңгейде салық инспекциясының есепке алу жөніндегі инспекторы болып бастады.  1994-1997 жылдары банк саласында,  1997-2011 жылдары Батыс Қазақстан және Шығыс Қазақстан  облыстары бойынша кеден саласында қызмет атқарды.

2011-2013 жылдары Орал қаласы кәсіпкерлік бөлімінің басшысы, 2013-2016 жылдары Жәнібек ауданының әкімі, 2016  жылдың  мамырынан  бастап Теректі  ауданының  әкімі  болды.

*  *  *

Облыс  әкімі  Алтай  Көлгінов  Теректі  ауданының  активіне ауданның  жаңа  әкімін  таныстырды. Бұған  дейін  Зеленов  ауданын  басқарып  келген Кәрім  Жақыпов  Теректі  ауданының  әкімі болып  тағайындалды.

Аудандық актив жиынында сөз алған өңір басшысы бұл тағайындау 2015 жылдың 23 қарашасындағы «Мемлекеттік қызмет» туралы заңына және ҚР Президентінің 2015 жылғы 29 желтоқсанындағы «Мемлекеттік әкімшілік қызметкерді ротациялау туралы» Жарлығына сәйкес, Президент әкімшілігінің және Теректі ауданының мәслихат депутаттарының келісімі негізінде жүзеге асқанын айтты.

– Кәрім Кәримоллаұлы, сізді жаңа қызметіңізбен құттықтаймын! Біздің алдымызда тұрған мақсат-міндет көп. Мемлекет басшысы қойған тапсырмаларды орындау мен аудан тұрғындарының әл-ауқатын арттыру жолында сіз аудандық мәслихат депутаттарымен, аудан ардагерлерімен бірлесіп, табысты жұмыс істейтіндеріңізге сенім білдіремін,  — деген Алтай Сейдірұлы Елбасының биылғы Жолдауынан туындайтын іс-шараларды, мемлекеттік және салалық бағдарламаларды, «Рухани жаңғыру» бағдарламасын жергілікті жерде жүзеге асыруға жете мән беру керектігін де атап өтті.

Жиын барысында сөз алған Кәрім Жақыпов өзіне сенім артқаны үшін облыс әкіміне ризашылығын жеткізіп, теректіліктермен бір жағадан бас, бір жеңнен қол шығарып жұмыс істеп, алға қойылған міндеттерді ойдағыдай орындау үшін еңбек ететінін  айтты.

Кәрім Кәримоллаұлы Жақыпов 1976 жылы дүниеге келген. Агроном және заңгер мамандықтары бойынша жоғары білімі бар.

Еңбек жолын 1998 жылы Желаев астық өнімдері комбинатында бастаған. 1999-2009 жылдары Орал және Ақсай қалаларындағы компанияларда басшылық қызметтер атқарды.

2009-2011 жылдары Теректі ауданы әкімінің орынбасары болды.

2011-2013 жылдары  БҚО  азаматтық  қорғаныс,  төтенше  жағдайлардың алдын алу  басқармасына  басшылық  жасады.

2013 жылдан  бері Зеленов ауданының  әкімі  қызметін  атқарып  келді.

*  *  *

Зеленов  ауданына  барған  сапарында  облыс  әкімі  Алтай  Көлгінов  ауданның  жаңа  әкімін  таныстырды.  ҚР  Президенті  әкімшілігінің  және    аудандық  мәслихат  депутаттарының  келісімімен  ротациялау  тәртібі бойынша аудан  әкімі  болып  Асхат  Шахаров  тағайындалды. 

– Осы кезге дейін ауданды басқарып келген Кәрім Жақыповтың төрт жылдық келісімшарт мерзімі аяқталды. «Мемлекеттік қызмет» туралы ҚР заңына және ҚР Президентінің «Мемлекеттік әкімшілік қызметкерді ротациялау туралы» Жарлығына сәйкес және Теректі ауданы мәслихат депутаттарының келісімімен ол Теректінің әкімі болды. Оның басшылығымен Зеленов ауданының әлеуметтік-экономикалық дамуы жағынан біраз жұмыстар атқарылды. Ал алда тұрған мақсат-міндет бұрынғыдан да маңызды болмаса, кем емес. Ауданның жаңа әкімі Асхат Берлешұлы ол міндеттерді ойдағыдай орындайды деп ойлаймын. Зеленов – үлкен аудан, мұнда мәселе де көп, атқаратын іс те жетерлік. Мемлекеттік бағдарламаларға, ауыл шаруашылығы саласына жете мән беру керек. Бұған дейін Қаратөбе ауданын басқарған Асхат Берлешұлының білімі мен біліктілігі алда тұрған міндеттерді, берілген тапсырмаларды сапалы орындауға мүмкіндік береріне сенімдімін, – деді жиын барысында өңір басшысы.

Асхат Берлешұлы Шахаров 1978 жылы дүниеге келген. Білімі – жоғары. Қазақ  мемлекеттік туризм және спорт академиясын, Т. Рысқұлов атындағы Қазақ экономикалық университетін бітірген. РФ Президенті жанындағы Ресей мемлекеттік қызмет және халық шаруашылығы академиясын тәмамдаған, экономика ғылымдарының кандидаты.

Еңбек жолын 2000 жылы К. Жұбанов атындағы Ақтөбе мемлекеттік университетінде аға оқытушысы болып бастаған. 2007 жылы Ақтөбе облыстық олимпиадашылар  резервін  дайындау  орталығының  директоры  болды.

2013  жылдан  бері  Қаратөбе  ауданының  әкімі  қызметін  атқарды.

*  *  *

Кеше  облыс  әкімі  Алтай  Көлгінов  Жаңақалада  болып, ауданның  жаңа  әкімін  таныстырды. Бұған  дейін  Жәнібек  ауданын  басқарып  келген  Наурызбай  Қарағойшин  енді  Жаңақаланың  әкімі  болып  тағайындалды.

Аудандық актив жиынын ашқан өңір басшысы ҚР Президенті әкімшілігінің және Жаңақала ауданы мәслихат депутаттарының келісімімен ротациялау тәртібі бойынша әкім болған Наурызбай Қадырбайұлын жаңа қызметімен құттықтап, табыс тілеп, алда тұрған мақсат-міндеттерге тоқталды.

– Ауданның бұрынғы әкімі Лавр Рашидұлы бұл қызметті абыроймен атқарды.  Жаңақаланың әлеуметтік-экономикалық жағынан дамуына айтарлықтай үлес қосты. Қызмет мерзімінің аяқталуына және өз өтінішіне байланысты оны басқа қызметке ауыстырамыз. Жалпы ол ел үшін көп еңбек етті. Сол үшін оған өз ризашылығымды білдіремін, — деді Алтай Сейдірұлы.

Өз  кезегінде сөз алған Наурызбай Қарағойшин Елбасының Жолдауынан, «Рухани жаңғыру» бағдарламалық мақаласынан туындайтын іс-шараларды, мемлекеттік және салалық бағдарламаларды жергілікті жерде жүзеге асыруға жаңақалалықтармен бірлесіп, бар күш-жігерін салатынын айтты.

Наурызбай Қадырбайұлы Қарағойшин 1960 жылы дүниеге келген. Білімі – жоғары. 1981-86 жылдары Батыс Қазақстан ауыл шаруашылығы институтында  білім алған. 1986-87 жылдары Жаңақала ауданы «Айдархан» совхозының аға зоотехнигі болды. 1987-90 жылдары Жаңақала аудандық партия комитетінің нұсқаушысы, бөлім меңгерушісі, 1990-2003 жылдары Жаңақала ауданының ауыл шаруашылығы кәсіпорындарында басқарма төрағасы, бас зоотехник, директор қызметін атқарды.

2003-2010 жылдары Жаңақала ауданы әкімінің орынбасары, 2010-2013 жылдары Қаратөбе ауданының әкімі, 2013-2016 жылдары облыстық ауыл шаруашылығы басқармасы басшысының орынбасары, 2016 жылдан бері  Жәнібек  ауданының  әкімі  лауазымдарында  еңбек  етті.

*  *  *

Кеше  өңір  басшысы  Алтай  Көлгінов  Жәнібек  ауданының  активіне  бұған  дейін  Тасқала  ауданы  әкімінің  орынбасары  болған Азамат  Сафималиевті  аудан  әкімі  ретінде  таныстырды.

Алқалы жиынды ашқан облыс әкімі осыған дейін ауданды басқарған Наурызбай Қарағойшиннің еңбегін жоғары бағалады. ҚР Президенті әкімшілігінің және Жәнібек ауданы мәслихат депутаттарының келісімімен ротациялау тәртібі бойынша аудан әкімі болып жатқан Азамат Сафималиұлының жаңа қызметіне табыс тілеп, мемлекеттік, салалық бағдарламаларды жүзеге асыру турасында  тапсырмалар  берді.

Азамат Сафималиев 1979 жылы Атырау облысында дүниеге келген. Білімі – жоғары. Атырау мұнай-газ институтын, ҚР Президенті жанындағы мемлекеттік  басқару  академиясын тәмамдаған.  Ғылым  магистрі  атағы  бар.

2003-2008 жылдары мемлекеттік қызметте бас маман, бөлім басшысы болып еңбек етті. 2008-2009 жылдары ҚР Парламент Сенаты депутатының көмекшісі, 20092010 жылдары Орал қаласы әкімінің кеңесшісі болды. 2010-2012 жылдары Орал қаласы әкімінің орынбасары, 2012 жылы облыстық ішкі саясат басқармасы басшысының орынбасары, 2012-2016 жылдары Бөрлі ауданы әкімінің орынбасары,  2016  жылдан  бері  Тасқала  ауданы  әкімінің  орынбасары  қызметтерін  атқарды.

Бет  материалдарын  дайындаған  Сәкен  МҰРАТҰЛЫ

Мұхит Айтқалиевтің 90 жылдығына орай алдағы күзде оның туған жері Бөкей ордасы ауданында «Домбыра – достық үні» атты облыстық домбырашылар байқауы өтпек. Аса дарынды музыкант туралы ізденгеніме көп жыл болды. Оның талайлы тағдыры, қазақ музыкасына сіңірген ұшан-теңіз еңбегі жайында бұған дейін де «Орал өңірі» газетінде мақалалар жарияланғанын көзіқарақты оқырман біледі. Сонау өзі оқыған Алматыда, қызмет атқарған Шымкентте болып, ондағы әріптестерімен жүздесіп, ол кісі туралы көп мәліметтер алғанмын. Ағамыздың алғашқы еңбек жолын бастаған Қарағанды қаласында болып, Мұхиттың әйелі Злиха және ұл-қыздарымен жүздесудің сәті түсіп еді.

Злиха апамыз өз басынан кешкен тағдырын, сондай-ақ Мұхит Айтқалиев жайлы естеліктерін іркілмей баяндады.

— 1925 жылы Калмыков (қазіргі Тайпақ) ауылында дүниеге келіппін. Мен дүниеге келгеннен кейін он күн өткен соң әкем Мүсірәлі дүние салады. Ол кісінің руын білмеймін. Әкемнің есімімен фамилиям Мүсірәлиева болып аталады. Анамның да жүзі есімде анық сақталмапты. Үш-төрт жас шамасында болсам керек, анамыз ауырып, қалаға ауруханаға келген. Оған ілісе келген ағам екеуміз қала үйлерінің ауласында түнедік. Таңертең тұрып, анамыз жатқан аурухананың терезесіне жақындаймыз. Анамыз жинап-теріп нан береді. Ішетін тамағымыз тек су мен нан болды. Келесі күні тұрып, тағы барамыз. Мұндай күндеріміз көпке созылған жоқ. Бір күні терезеден бөтен әйел: «Енді келмеңдер, аналарынды алып кетті, енді келмейді», — деді. Сөйтіп, кеште аурухананың қақпасы жабылған кезде біз сыртында қалдық. Көшеде өткен-кеткен адамдар керек емес киім-кешектерін береді, соны жамылып отырамыз. Берген тамағын жейміз. Өмірдің сондай сынынан өттік.

Бізді балалар үйіне орналастырды. Ағам менен шамамен екі жасқа үлкендеу. Ауылда өскен екеуміз де орысша білмейміз. Балалар үйіне бір орыстар келіп, пианино ойнап көрсетті. Қолдарымызды шапалақтатқызып, ырғақты қайталатты. Сөйтіп, біз музыка мектеп-интернатына оқуға түстік. Директоры Воробьев деген хор дирижері болды. Шамамен 1934-35 жылдар сияқты, әлі жалпы білім алатын мектепке алынғаным жоқ. Интернат Шаған өзеніне жақын жерде, қазіргі облыстық білім басқармасы орналасқан ғимаратта болды. Ауласы үлкен еді. Оқитын музыка мектебіміз сол аулада. Түнде далаға екі-үшеуден шығатынбыз. Себебі әжетханаға барар жолда арабша жазулары бар құлпытастар болатын. Қорқатын едік. Интернатта жатып оқығандардың көбі – қазақ балалары. Арамызда Надя Назарова деген флейташы, үйден келіп оқитын кларнистші Никитин деген бір-екі орыс болды. Аштық кезі ғой. Әйткенмен таңда ботқа, түсте сорпа, кеште тағы басқасын беретін еді. Көбіне орысша сөйлегеннен біраз уақыт өткенде қазақша сөйлей алмайтын күйге түстім. Ағам Қазыбай көбіне аулада асық ойнап, музыка сабағын оқымайтын. Оны басқа мектепке алып кетті. Кейін басқа ауданға алып кеткенін естідім. Кішкене кезінен аяғын ақсап басатын. Сол себептен соғысқа бармаған болар деп ойлаймын. Қазыбай (мүмкін Мүсірәлиев) ағамның ұрпақтары немесе ол жайлы білетіндер болса, хабарласуларын сұраймын. Мектептен соң 1944 жылы музыка училищесіне пианист Клавдиенконың класына оқуға түстім. Скрипкашы мұғалім Болотин, ұлты еврей пианистшы Фурманова дегендер болды. Бірге оқыған Анна Муравьева, Кускова, Женя Носова деген сопрано дауысты әнші қыздар есімде. Оралдың музыка училищесін 1948 жылы бітіріп, Алматы қаласына оқуға келдім. Пойызбен бір апта жүріп бардым. Алматының мемлекеттік консерваториясына фортепиано аспабы бойынша Е. Гировскийдің класына оқуға түстім. Консерваторияны 1953 жылы бітіріп, қазақтың тұңғыш пианист қызы атандым. Консерваторияны бітірісімен, жолдамамен Қарағандыға келдім. Мұнда музыкалық училищеге жұмысқа орналастым. Мұхит қызметке менен екі жыл бұрын осында келген болатын. Жаңадан ашылған музыка мектебінде және музыка училищесінде домбырадан сабақ беріп жүрді. Ол кезде бір-бірімізді танимыз. Консерваторияда оқып жүріп танысқан едік. Қарағанды қаласында үйлендік. Өзі өте ақкөңіл еді. Жанында жүрген жолдастарына үстіндегі киімін шешіп беруге дайын болатын. Мұхит өте сирек кездесетін музыка маманы болды. Сол себептен оған жанында жүрген жолдастары нотаға түсіру, партитура жазу, тағы басқа көптеген жұмыстарымен үнемі келіп тұратын. Жоғарыда айтылған ақкөңілділігімен бәріне көмек-теседі. Жолдастары болса, қолдарына бөтелке ұстап келетін. Ол кезде жақсы музыкант, ақын-жазушылардың төмен кетуі көп жағдайда арақтың кесірінен болды ғой. Мұхиттың достары көп болатын. Олардың ішінде Мұхит Құбышев, Нұрғиса Тілендиев, Шамғон Қажығалиевтерді ел біледі. Нұрғиса домбырашы, Шамғон скрипкашы болды. Мұхиттың Нұрғисаға оркестрге арналған партитуралар жазып беріп жүрген кездері есімде. Сол кезде олар сондай достар еді. 1954 жылы қызымыз Тәнзила, 1957 жылы ұлымыз Тайман дүниеге келді. Екеуміз де жаспыз, түсініспеушіліктен ажырасып тындық. Бұл 1959 жылдар болатын. Ол содан Алматыға кетті. Шымкентте болды, Оралда жүр деп естідім. Кейін дүниеден өткенін де естіп-білдім. Тәнзила қызымыз 1974 жылы Қарағанды музыкалық училищесін, 1982 жылы Алматы мемлекеттік консерваториясының фортепиано класын бітіріп шықты. 1999 жылдан бастап Канада елінің азаматшалығын алған. Екі ұлымен, немерелерімен Торонто каласында тұрады. Ұлымыз Тайман Қарағанды музыкалық училищесін теория бөлімі бойынша 1977 жылы, мемлекеттік консерваторияның музыкатанушы мамандығын 1982 жылы бітірді. 1998-2000 жылдар аралығында Қарағанды музыка училищесінің директоры қызметін атқарды. Қазір сол училищенің теория бөлімінде аға оқытушы. Қабілеті әкесіне тартып, музыка теориясы мамандығы бойынша еліміздің беделді оқытушысы, көптеген шәкірт тәрбиеледі. Өзім көп жыл бойы училищеде фортепиано бөлімінің меңгерушісі болып қызмет жасадым. 1980 жылы зейнеткерлікке шықтым. Күні кешеге дейін Канадаға барып жүрдім. Қазір тоқсанның екеуіндемін. Жуырда қызым мен немере-шөберелерім келмек. Оларды сағындым. Балаларым келгенше амандықта болсам деймін, — дейді Злиха апамыз.

Тайман Мұхитұлы бүгінде оқытушылықпен айналыса жүріп, джаз стилінде концерт қоятын оркестрге жетекшілік етеді. Оркестр орындауындағы шығармалардың нотасын өзі жазады. Әлемдік сахналарды бағындырып жүр. Ол жетекшілік ететін оркестр Лос-Анджелес қаласында 2001 жылы өткен байқауда 2-орын иеленсе, 2015 жылы Нью-Йоркте өткен концертке шақырылыпты.

— Шәкірттерім 2013 жылы Алматыдағы Құрманғазы консерваториясында өткен республикалық байқауда 1-орын иемденсе, 2014 жылы 3-орын алды. Тәрбиелеген оқушыларым Мәскеудегі Гнесиндер институтына, Вена консерваториясына оқуға түсті. Шәкірт тәрбиелеу, жалпы ұстаздық жұмыс өзіме ұнайды, өмірлік мақсатым да осы, — дейді Тайман.

Асқар КЕНЖЕҒАЛИЕВ,

Дина Нұрпейісова атындағы №1 балалар саз мектебінің домбыра аспабының оқытушысы

Футболдан премьер-лига командалары арасында Қазақстан чемпионатының 18-інші турында Оралдың «Ақжайығы» Қызылордада жергілікті «Қайсармен» күш сынасты.

Бірінші таймда алаң иелері басымдылық танытып, бірнеше мүмкіндікті пайдалана алмады. Ойынның екінші кезеңінде Вахид Масудовтың шәкірттері қорғанысты бекем ұстап, ыңғайы келгенде, шабуылдап та бақты. Сондай сәттің бірінде нигериялық легионер Изу Азука қақпашымен бетпе-бет шығып, оның тепкен добы жақтауға тиіп, алаң сыртына кетті. Аһ ұрып Азука қалды. Ақыры ойын 0:0 есебімен тең аяқталды. Бұл жолы Қостанайдың «Тобылынан» ауысып келген хорватиялық Денис Главина «Ақжайықтың» құрамындағы алғашқы ойынын  өткізді. Есесіне Орал футболының тағы бір түлегі Руслан Валиуллин Ақтөбеге кетті. Осылайша, басқаларын айтпағанда, қазір Эльдар Абдрахманов Атыраудың намысын қорғап жүрсе, Бауыржан Омаров Қызылорданың «Қайсарына» ауысты. Сөйтіп, өз түлектеріміздің В. Масудовтың командасынан орын таба алмауы алаңдатады.

Қазіргі таңда «Ақжайық» 15 ұпаймен он бірінші орында келеді. Яғни жағдай түзелмесе, премьер-лигамен қош айтысады деген сөз. Оның үстіне келесі кездесуін батысқазақстандықтар 9 шілде күні П. Атоян атындағы стадионда «Астанамен» чемпиондыққа таласып жүрген Алматының «Қайратымен» өткізеді. Өткен жылы атақты ресейлік ойыншы Андрей Аршавиннің Оралға келуі жанкүйерлердің ерекше қызығушылығын туғызып, «Ақжайық» футбол стадионына халық сыймай қалғаны белгілі. Бұл жолы да Аршавинді көремін деушілер аз болмасы анық.

Елжан ЕРАЛЫ

Жуырда БҚО ІІД ұйымдасқан қылмысқа қарсы күрес басқармасының жыл сайынғы  азаматтарды заңсыз жұмысқа салған тұлғаларды анықтау және олардың жолын кесу мақсатындағы жедел алдын алу іс-шарасы ұйымдастырылды.

Шара облыс аумағында азаматтарды еңбекке пайдалану үшін заңсыз бас бостандығынан айырумен байланысты қылмыстардың алдын алу және қарапайым тұрғындарды аталмыш қылмыс түрінен хабардар ету үшін қолға алынған болатын. Осы мақсаттағы «STOP трафик» жедел алдын алу іс-шарасы барысында қаладағы қонақүйлердің бірінде жеңгетайлық фактісі анықталды. Сол қонақүйде швейцар-күзетші ретінде қызмет атқаратын 1992 жылғы  М. есімді азамат 4 мың теңге көлемінде ақшаға Жандос есімді жігітке ақылы жыныстық қызмет көрсету үшін екі қызды ұсынған. Ал Ақсай қаласының 1962 жылғы К. есімді азаматы сол қаланың 1958 жылғы тұрғынын бір жауапкершілігі шектеулі серіктестікке заңсыз жұмысқа салған. Аталған факті бойынша Бөрлі АІІб-да ҚР ҚК-ның 128-бабы 1-бөліміне сәйкес қылмыстық іс қозғалды. Сондай-ақ жедел шара барысында  ҚР ӘҚтК-ның 449-бабына сәйкес алты әкімшілік құқықбұзушылық анықталды.

Сонымен қатар 2017 жылғы 27 маусым күні БҚО ІІД ұйымдасқан қылмысқа қарсы күрес басқармасына (ҰҚҚКБ) Бөкей ордасы ауданындағы қыстақтардың бірінде екі азаматты заңсыз еңбек күші ретінде қолданып жүргені туралы хабар келіп түсті.  Жедел іздестіру негізінде БҚО ІІД ҰҚҚКБ қызметкерлері Теректі және Қазталов ауданының екі азаматын заңсыз жұмсаған және оларға күш көрсеткен 1944 жылғы  Р. есімді азаматты құрықтады. Аталмыш дерек бойынша Бөкей ордасы аудандық ішкі істер бөлімінің тергеу бөлімшесінде Қазақстан Республикасы ҚК-ның 126-бабы 3-бөлімі бойынша қылмыстық іс қозғалды.

БҚО ІІД баспасөз қызметі

Таяуда №1 Орал қалалық сотында екі тәртіп сақшысының теріс қылықтарына қатысты сот үкімі шықты.

Орал қалалық жол-патрульдік полиция батальонының бұрынғы қызметкерлері Айбек Бекетов пен Әділ Серіков құқық қорғау саласының өкілдері бола тұра, Орал қаласының аумағында сыбайлас жемқорлық фактілеріне жол берген. 2017 жылдың 6 мамыры күні екеуі «Орталық базар» аумағында болып, қоғамдық тәртіпті қамтамасыз етіп, жол ережелерінің бұзылмауын қадағалауы тиіс еді.

Дәл осы күні олар шамамен сағат 12.00-де Әбубәкір Кердері мен Досмұхамедов көшелері қиылысында ҚР Әкімшілік құқықбұзушылық туралы заңының бұзылуына жол берген.

Тәртіп сақшылары дәл осы күні «Ниссан» ныспылы көлік иесінің әкімшілік құқық бұзғанын анықтайды. Сақшылар осы көлік иесінің ереже бұзғанын біле тұра, алдын ала келісім жүргізіп, хаттама толтырмай, ақша алғысы келеді. «Ниссанды» тізгіндеген көлік иесіне келіспеген жағдайда 22 мың теңге көлемінде айыппұл төлейтінін түсіндіріп, көлік иесі ұсынған 2 мың теңгені қалтаға басады. Сағат 13.30-да тәртіп сақшылары екінші көліктің әкімшілік құқық бұзғанын анықтап, тағы да сыбайлас жемқорлыққа жол береді. Көлік иесімен келіссөздер жүргізіп, түскі астарына аз-мұз ақша тастауын өтінеді. Бұл көлік иесі де келісім беріп, 1000 теңге қалдырады. Әрі қарай дәл осы күні сағат 17.30-да «Лада Гранта» маркалы автокөлік иесінің жол ережесін бұзғанын анықтаған. Алайда тәртіп сақшылары көлік иесіне әкімшілік хаттама толтырса, 20 АЕК көлемінде айыппұл төлейтінін, оны төлегісі келмесе, ауқаттануға ақша тастауын сұрайды. Көлік иесі амалсыздан келісіп, ол да 1000 теңге берген.

Осындай дәлелді айыптармен сот алдына барған А. Бекетов пен Ә. Серіков тергеу барысында істеген әрекеттеріне өкінетінін айтып, сот барысында өз кінәларын мойындады. Сот тәртіп сақшыларының жастығын және еңбек өтілінің аздығын ескеріп, жазаны жеңілдетуді қарастырды. Айбек Бекетов ішкі істер құрылымында сегіз ай, Әділ Серіков бес ай қызмет атқарған. №1 қалалық сотының шешімімен бұрынғы тәртіп сақшылары ҚР ҚК 49-баптың 1-бөліміне сай полиция кіші сержанты шенінен айырылды. Айбек Бекетовке ҚР ҚК 366-баптың 3-бөлімі, 2, 4-тармақтарына сай 224 мың теңге, ал Әділ Серіковке ҚР ҚК 366-баптың 3-бөлімі, 2, 4-тармақтарына сай 154 мың теңге айыппұл салынды.

Гүламан ИСМАҒҰЛОВА,

Орал қалалық ІІБ баспасөз қызметкері

Қадыр Мырза Әли атындағы мәдениет және өнер орталығында Қаратөбе ауданындағы  Егіндікөл ауылдық округі көркемөнерпаздарының «Ауылым – айтылар ән-жырым» атты концерті өтті.

Рухани кеш аталмыш ауылдың перзенті, «Жайық Пресс» ЖШС-ның бас директоры Жантас Сафуллиннің жетекшілігімен жасалған Егіндікөл тарихы туралы бейнебаянды тамашалаудан басталды.

Рухани жаңғыру бағдарламасы аясында қолға алынған дәстүрлі шарада егіндікөлдік өнерпаздар шарықтата ән шырқап, мың бұрала би билеп, көрерменнің ыстық ықыласына бөленді. Әсіресе, Қайнар Ешматұлының домбырада орындауындағы халық әні «Ақкербез», Мұқағали Мақатаевтың сөзіне жазылған «Фариза қыз», Нысанбаевтар әулетінің орындауындағы әке туралы ән, Ербол Ғазиев орындаған Гүлзира Серғазының «Егіндікөл» әні, сондай-ақ жас бүлдіршіндер шырқаған әндер көрермен қауымға ерекше көңіл күй сыйлады. Қаратөбе ауданынан облыс орталығына көшіп келген егде жастағы тұрғындар өнерпаздарға ақ батасын жаудырып, ұйымдастырушыларға деген шынайы ризашылық сезімдерін білдірді. Бір кездері мәдениет саласында қызмет етіп, ақындар айтысына қатысып, өз өнерін аудандық, облыстық деңгейде талай мәрте паш еткен, бүгінгі таңда зейнет жасына жетіп, Бөрлі ауданында тұрып жатқан егіндікөлдік Қайырбай Нұрханов сахна төріне көтеріліп, кештен алған әсерін өлең жолдарымен жеткізді.

«Бай өлке Егіндікөл атырабы,

Бұлағы жер астынан атылады.

Тамаша табиғаты, жері нулы,

Аққұмың – бір шежіре, жатыр әні.

Деген бар нені ексең, соны орасың,

Өнерің – бір сыбаға, қонақасың.

Өнерің болмаса егер елім менің,

Көңілің ел көшкендей тоналасың.

Болмаса Шыңғыс айтқан мәңгүрт болып,

Судай боп құмға сіңген жоғаласың.

Өнерлі жас ұрпақтар өсе берсін,

Сыпырған қыран құстай томағасын!» – деп тебіренді Қайырбай ақын.

Кеш соңында орталық директорының орынбасары Рысханым Мұқасқызы Егіндікөл ауылдық округінің әкіміне алғысхат табыс етті.

Нұртас НАБИОЛЛАҰЛЫ,

«Орал өңірі»

Жуырда Теректі ауданы аумағындағы Шалқар көлінің маңындағы оқу-жаттығу полигонында электр желілерін жөндеушілер арасында жылдағыдай жарыс ұйымдастырылды. Биыл 25-рет өткізіліп отырған шараға сегіз команда қатысып, өз бақтарын сынады.

Аталмыш шараның ашылу салтанатында «Батыс Қазақстан электр желілерін тарату компаниясы» АҚ төрағасы Қуат Мусин бастап, жарысқа қонақ ретінде шақырылған сала ардагерлері мен шараға қатысушы командалар қызмет барысында пайдаланатын құрал-жабдықтармен танысып шықты.

— Қазіргі заман мамандардан қабілетпен қатар іскерлікті, жаңашылдықты талап етеді. Соған байланысты жыл сайын мұндай шараларды міндетті түрде ұйымдастырып келеміз. Бізде ұзын-саны 16 команда бар. Биыл сегіз команда сайысқа түссе, қалғандары келесі жылы бақтарын сынайтын болады. Бір шебер, екі электр желілерін жөндеуші және бір жүргізушіден құралған команда өзара бақтарын сынайды. Мұндай шаралар  жыл сайын өтіп келеді, соның арқасында сала мамандарына еш қиындық туғызбайды деп сенеміз. Егер шұғыл үзілген желілерді іске қосу керек болған жағдайда, мұндай байқауларды көз-бен көріп, тәжірибе алмасып жүрген мамандар өз жұмысын толық сеніммен атқара алады. Жарыс талабы бойынша электр желілерін жөндеу кезінде қасындағы әріптесі токқа түсіп қалған кезде, барлық кәсіби ереже заңдылықтарды сақтай отырып, оны тез арада құтқаруы керек. Оған төрт минут қана уақыт беріледі. Электр желілерін  тәжірибе жүзінде білмесе, онда жазатайым оқиғалар болған кезде абдырап, өзіне қиындық туғызатыны сөзсіз. Сол себепті жарыс өткізген сайын кем дегенде бір жас маманды әкеліп, байқаудан өткізуге талап қоямыз, — дейді сенімділік және қауіпсіздік техникасы қызметінің басшысы Сырым Тәжіғалиев.

ірнеше күнге созылған жарыс қорытындысында Приурал АЭТ жоғары шеберліктерін көрсетіп, бірінші орынды жеңіп алды. Теректі аудандық электр торабының командасы екінші орынды иеленсе, ал Қаратөбе аудандық электр торабының  ко-мандасы үшінші орынды қанжығасына байлады. Сондай-ақ Арсен Қоңыров (Жәнібек аудандық электр торабы) пен Жаңабер-ген Аханов (Ақжайық АЭТ) үздік шебер аталымы бойынша марапатталды. Ал осы сайыста кәсіби шеберлігімен көзге түскен Серік Есқазиев (Тайпақ АЭТ) пен Нұржан Ахметовті (Теректі аудандық электр торабы) қазылар алқасы үздік электр дәнекерлеуші аталымына лайықты деп тапты.

Темірболат ТОҚМАМБЕТОВ,

Теректі ауданы

«Қазақстанның  үшінші  жаңғыруы:  жаһандық  бәсекеге қабілеттілік»  атты  халыққа  Жолдауында  Мемлекет  басшысы  2017-2018  жылдары  азаматтардың  әлеуметтік қамтамасыз  ету  деңгейін  кезең-кезеңмен  көтеру  міндеттерін  қойды.

Бірінші кезеңде, «2017-2019 жылдарға арналған республикалық бюджет туралы» 2016 жылғы 29 қарашадағы Қазақстан Республикасының заңына енгізілген өзгертулер мен толықтыруларға сәйкес 2017 жылдың 1 шілдесінен бастап, ынтымақты зейнетақы мөлшері 11%-ға; базалық зейнетақы мөлшері  13%-ға арттырылды. Нәтижесінде 2016 жылмен салыстырғанда зейнетақы мөлшерін 2017 жылғы 1 шілдеден бастап 20%-ға дейін арттыру қамтамасыз етілді. 2017 жылғы 1 шілдеден бастап зейнетақының ең төменгi мөлшерi базалық зейнетақы төлемін қоса алғанда 45 711 теңгені, ал ең жоғарғы мөлшері базалық зейнетақы төлемін қоса алғанда 92 747 теңгені құрайды. Ал зейнетақының орташа мөлшері (базалық зейнетақыны есептегенде) 66 721 теңгеге дейін ұлғайды. 2017 жылғы 1 шілдеден бастап қолданысқа енгізілген «Қазақстан Республикасының кейбір заңнамалық актілеріне әлеуметтік қамсыздандыру мәселелері бойынша өзгерістер мен толықтырулар енгізу туралы» 2017 жылғы 20 маусымдағы ҚР заңына сай «Қазақстан Республикасында зейнетақымен қамсыздандыру туралы» ҚР заңына түзетулер енгізіліп, зейнетақы төлемдерін есептеу үшін алынатын табыс айлық есептік көрсеткіштің (АЕК) 41 еселенген мөлшерінен 46 еселенген мөлшеріне дейін көтерілді. Бүгінгі таңда АЕК  2269 теңгені құрайды.

Сонымен қатар жоғарыда аталған құжатқа сәйкес «Балалы отбасыларға берілетін мемлекеттік жәрдемақылар туралы» 2005 жылғы 28 маусымдағы Қазақстан Республикасының заңына түзетулер енгізіліп, 2017 жылғы 1 шілдеден бастап бала туғанда берілетін жәрдемақы: бірінші, екінші, үшінші балаға – 38,0 айлық есептік көрсеткіш (86 222 теңге); төртінші және одан кейінгі балаларға – 63,0 айлық есептік көрсеткіш (142 947 теңге) мөлшерінде белгіленді. Нәтижесінде бала тууына байланысты берiлетiн бiржолғы мемлекеттік жәрдемақы мөлшері 2017 жылғы 1 шілдеден 20%-ға арттырылды.

Екінші кезеңде жаңа әдістеме бойынша есептелетін ең төменгі күнкөріс деңгейінің өзгеруіне байланысты 2018 жылғы 1 қаңтардан бастап мүгедектік, асыраушысынан айырылу жағдайы бойынша жәрдемақы және базалық зейнетақы мөлшері 16%-ға дейін артпақ.

Өсімнің үшінші кезеңі тек базалық зейнетақыға қатысты және 2018 жылғы 1 шілдеден жүзеге асады. Бұл базалық зейнетақыны тағайындау әдістемесінің өзгеруімен байланысты. Жаңа тәсілге сәйкес, ол 1998 жылға дейін еңбек өтілі мен 1998 жылдан кейін жинақтаушы зейнетақы жүйесіне зейнетақы аударымдарының келіп түсу кезеңдері кіретін зейнетақы жүйесіне қатысу өтіліне қарай тағайындалады. Егер азамат тек 10 жыл жұмыс жасап, Бірыңғай жинақтаушы зейнетақы қорына қаражат аударса немесе мүлдем жұмыс жасамаса, оның базалық зейнетақысы ең төменгі күнкөріс мөлшерінің 54%-ын құрайды, яғни бүгінгі базалық зейнетақы мөлшеріне балама болады. 10 жылдан артық жұмыс жасаса, әр жыл үшін базалық зейнетақы  2%-ға артады. Мысалы, еңбек өтілі  20 жыл болса, базалық зейнетақысы ең төменгі күнкөріс мөлшерінің 74%-ын құрайды, 30 жыл жұмыс жасаса, базалық зейнетақысы ең төменгі күнкөріс мөлшерінен 94%-ын құрайды, егер еңбек өтілі 33 немесе одан да көп болса, ең төменгі күнкөріс мөлшерінен 100%-ын құрайды. Қайта есептеу нәтижесінде ең төменгі күнкөріс мөлшерінің 100%-ын құрайтын базалық зейнетақы алушының саны 45,2%-ға, 74-тен 100%-ға дейін – 44,7%-ға жетеді. Базалық зейнетақының орта мөлшері 1,8 есе өседі (ең төменгі күнкөріс мөлшерінен 87%).

«Республикалық бюджет туралы» заңға сай 2017 жылғы 1 шілдеден бастап:

1) мемлекеттiк базалық зейнетақы төлемiнiң мөлшері – 14 466 теңге;

2) зейнетақының ең төменгі мөлшері – 31 245 теңге болып белгіленді.

Сатқан  ТӨЛЕГЕНОВ,

ҚР  Еңбек,  әлеуметтік қорғау  және  көші-қон  комитетінің   БҚО  бойынша департаментінің  басшысы

– Астана қазіргі кезде еліміздің мәртебесін асқақтатуда. Елорданың мерейлі күні мен «ЭКСПО» көрмесі құрметіне өткен велошеруге 500-ге тарта тұрғын қатысты. Қаламызда спорттық шаралар жиі ұйымдастырылады. Елбасымыздың тапсырмасы бойынша бұқаралық спортты дамытуға баса көңіл бөлінуде, – деді Орал қаласының әкімі Мұрат Мұқаев шеру мәресі белгіленген П. Атоян атындағы стадионда.

Шарада велошеруге қатысушылар арасында ұтыс ойыны ұйымдастырылды. Бес адамның әрқайсысына «ЭКСПО» көрмесіне екі билет, спорттық киімдер және «Жайық самалы» жүзу  бассейніне  тегін  жолдама  берілді.

– Орал қаласындағы №1 балалар-жасөспірімдер спорт мектебінде жеңіл атлетикамен айналысамын. Велосипедпен жүру бойыңды  ширатып, қан айналымына жақсы әсер етеді. Көпшілік велошеру көңілді өтті, – деді спорттық  шараға  қатысқан  Дәурен  Салықов.

Өз  тілшіміз