14 маусым — Дүниежүзілік донор күні

Бір тамшы қан… Адамның жаны қысылған сәтте бір тамшы қанның өзі де шыбын жанға демеу болып, кез келгенді ажалдан алып қалуы мүмкін. Сондықтан қан құю, оны қабылдау қызметінің өмірден алар орны ерекше.

Облыстық қан орталығының шежіресі сонау өткен ғасырдың 1937 жылғы қыркүйегінен басталған. Қолда бар дерекке қарағанда, сол жылы 3 маусымда ең алғаш рет облыстық аурухананың жанынан қан құю стансасы ашылған. Кейін қан құю стансасына меңгерушілікке Н. Киселев тағайындалыпты. Оның қарамағында бір медбике, кассир-есепші және кіші медициналық қызметкер болған екен. Міне, содан бері 80 жыл уақыт өтіпті. Демек, күзде өңірдегі қан құю қызметінің 80 жылдығы ұлықталмақ.

Қазір бұл мекемеде 151 қызметкер бар. Мұнда жоғары санатты мамандар, өз ісінің майталмандары еңбек етеді. Бәрі де ұжымның ортақ ісіне лайықты үлесін қосып жүр. Осыған орай алдыңғы жылдарды есептемегенде, тек былтырдың өзінде кәсіпорынға донор болуға тілек білдірген 12370 азамат келді. Соның 10097-сі қан тапсырып, қалғаны медициналық талапқа сай келмеген. Міне, адамдардың ізгі ниеті мен құлшынысына орай облыстық қан орталығы Орал қаласы мен өңірдегі медициналық мекемелерді түрлі құрамды қанмен толық қамтамасыз етуде. Соңғы он жылда облыста донорлық ерікті түрде және еш өтемсіз атқарылып жүр. Аталмыш көрсеткіш бойынша мекеме елімізде алдыңғы орындарға ие. Алайда ұжым қолда барда қанағат тұтып, қимылсыз отырудан аулақ. Білікті мамандар халық арасында донорлыққа үгіттеу жұмысын жүйелі жүргізіп, олардың қатарын үнемі жасақтап, толықтырады. Бұдан басқа ақ желеңді абзал жандар өзге медициналық ұйымдардағы әріптестеріне қан қызметі бойынша кәсіби деңгейін арттыруы үшін әдістемелік көмек көрсетеді және клиникалық трансфузиология медициналық қызметінің сапасына сараптама жүргізіп келеді. Әрі өңірдегі медициналық ұйымдардағы трансфузиология мамандары мен зертханашылары үшін әдістемелік нұсқаулар дайындайды.

Жалпы, облыс бойынша 1997 жылдан бастап енгізілген электрондық есепке сай донордың жалпы саны — 153 мың. Соңғы бес жылда медициналық ұйымдардың донор қаны мен оның құрамдас бөлімдеріне сұранысын өтеу үшін орта есеппен 15000-20000 адам қан тапсырды. Бір қуантатыны — соңғы жылдары жастардың донорлық қозғалысына ынтасы жоғары. Жыл сайын орташа есеппен 2300-2500 жігіт пен қыз қан тапсырып, ізгілікті іске лайықты үлесін қосуда. Әрине, мұндай еріктілік қашанда қолдауға, марапатқа лайық. Ұжым шежіресінен білгеніміз, 1974 жылы 97 жерлесіміз «КСРО-ның құрметті доноры» атағына ұсынылған. 1978 жылы қаңтар мен наурыз аралығында 444 донор «КСРО құрметті доноры» төсбелгісімен марапатталса, 1979 жылы 349 донор жоғарыда аталған атаққа ие болды. Содан кейінгі жылдары да марапатталған жандардың саны қомақты. Тәуелсіздік жылдарында оларды марапаттау 2007 жылдан бастау алады. ҚР 2005 жылдың 28 маусымындағы «Қан және оның компоненттерінің донорлығы туралы» заңына сәйкес, ҚР ДСМ-ның 2005 жылдың 22 қыркүйегіндегі «Донорларды марапаттау ережесін бекіту туралы» бұйрығы негізінде өңір бойынша ұсынылған 200 донордың 54-і «Құрметті донор» төсбелгісімен марапатталған. Сонымен бірге 2015 жылдың 6 сәуіріндегі №299 ҚР «Халық денсаулығы және денсаулық сақтау жүйесі туралы» кодексі 167-бабының 1-тармағына өзгеріс енгізілуіне байланысты өтемсіз қан тапсырған донорға ақылы екі күн демалыс беріледі. Әрі «Донорлық функцияны өтеусіз және ақылы негізде жүзеге асырғаны үшін донорларға ақы төлеу мөлшерін және донорлық функцияны ақылы негізде жүзеге асыратын донорларға ақы төлеуді жүзеге асыру қағидаларын бекіту туралы» ҚР Денсаулық сақтау және әлеуметтік даму министрінің 2015 жылғы 22 мамырдағы №374 бұйрығына сәйкес, енді қан тапсырғаннан кейін адамның қуат шығынын толтыру үшін айлық есептік көрсеткіштің 0,25 пайызы мөлшерінде донорға ақшалай баламасы немесе тамақ күйінде төленеді.

Біздің өңір ежелден ерікті және өтемсіз қан тапсыратын донорға кенде емес. Солардың ішінен қан орталығының ұжымы Юрий Чахалиди, Александр Подлипалин, Болат Дәулетқалиев, Марат Мұхамбетов, Әділжан Алманов, Мәншук Тілеуғалиева және басқасының есімдерін құрметпен атайды. Бұл тізімді әрі қарай жалғай беруге болады. Өйткені жоғарыда аталғандар жастарға үлгі етерлік бүгінгі бейбіт заманның батырлары іспеттес. Себебі кез келген адам донор бола алмайды ғой. Қан орталығында еңбектері елеулі медицина қызметкерлері де жеткілікті. Атап айтқанда, дәрігерлер С. Исқақова, Г. Дәуенова, медбикелер Л. Ситникова, Л. Нүркенова, Н. Мырзағалиева, Г. Бекболатовалар ұжымда 30 жылдан астам уақыт бойы еңбек етіп жүр.

Серік ИХСАНҒАЛИ

Жұмыста отыр едім телефон шыр ете қалды. Кардиолог Марат Ақашаев ағамыз… Екеуміз рудан қуып, балдыз-жезде деп арасында әзілдесіп, ара-тұра сөйлесіп тұрамыз. Қашан сөйлессек те, жас жігіттің лекіте күлетін күлкісіне салып, даусы саңқылдап, әзілдеседі де жатады. Бұл жолы да солай болды. Трубканың арғы жағынан күлкі деген ақтарылып жатыр. «Шыдай алмай, жезде, осы сіздің жасыңыз нешеде?» — дедім. «80-ге толамын ғой» — дейді одан әрмен мәз болып. Ал керек болса! «Жұмысқа кетіп бара жатырмын» — дейді тағы, онысымен қоймай. Есіме сонау 80-жылдардың аяғы оралды.

«Орал өңірі» газеті бастауыш кәсіподақ ұйымы «Ақжайық» шипажайына, бақандай 24 күнге, қояр да қоймай тегін жолдама берген. Ол кезде жастаумыз, курорт, санаторий дегенге пысқырып қарамаймыз, оған денсаулығы сыр берген шал-шауқан, кемпір-сампыр барады деп ойлаймыз. Ақыры бардым. Екі кісілік бөлмеге келсем, шалқасынан түсіп, өзім құралпы бір жігіт жатыр. Жалпақталдың Қарасуынан екен, «КамАЗ» айдайды. Танысып, бойымызды үйреткендей болғасын, өзімізше күн тәртібін түздік. Таңертең тамаққа дейін ерте тұрамыз, жүгіреміз, гимнастика. Кітапханаға барамыз, төрт мезгіл тамақты, «тихий часті» қаза жібермейміз. Осылардың бәрін сағатын көрсетіп, қағазға толтырып, қабырғаға ілдік. Сөйтіп, ешқайда алаңдамастан, екі күн шипажайдың нағыз белсенді демалушылары ретінде өзіміз түзген күн тәртібін қатаң сақтадық. Үшінші күні түс қайта, көз ұйқыда, көңіл ояу, әрлім-берлім жатқанымызда, есік тық-тық қағылды. Сықырлаған ақ халаты көз қарықтырғандай, шашы да аппақ, бір ағай келіп тұр.

— Келгендеріңе үшінші күн. Бұл не жатыс?.. Дәрігерлерге көрініп, процедура назначать етпейсіздер ме? — дейді онысымен қоймай. Біз екі жақтан шыр ете түстік.

– Еш жеріміз ауырмайды.

– Оны көрерміз… Тұрыңдар! Дәрігерлердің қабылдауына келесіңдер, — деп тықсырып барады.

– Сіз кімсіз? Бұл сұрақ екеуміздің аузымыздан бірдей шықты.

– Мен осы санаторийдің бас дәрігерімін. Аты-жөнім Марат Сәрсенғалиұлы Ақашаев. Бір сағат уақыт беремін. Төменде күтемін, — деп нығырлай сөйлеп, шығып кетті. Бас дәрігердің өзі келіп тұрса, қалай бармайсың. Сонымен «Еш жеріміз ауырмайды» — десек те, менен балшыққа, балауызға түсетін сырқат табылды, шопыр жігіттің қолқасында, жүрегінде кәдімгідей кінәрат бар болып шықты. Бас дәрігер екеумізге толып жатқан ем-шаралар белгілеп берді. «Санаторийге кел-генде дұрыстап, оның барлық мүмкіндігін пайдаланып, демалу керек қой…» — деп және ұялтты. Қалай ұялмайсың, ағамыздың айтып тұрғанының бәрі дұп-дұрыс болса. Марат Сәрсенғалиұлымен осылайша танысып едім. Мәкеңнің әкесі Сәрсенғали Атыраудың Қанішкен ауылының тумасы екен. Алматының рабфагін тауысқан. Содан көп ұзамай, фин соғысына қатысыпты. Одан осы өзіміздің Оралдың ауыл шаруашылығын механикаландыру мектебінде директордың орынбасары болады. Осы жерден Ұлы Отан соғысына аттанып, одан да аман-есен Же-ңіспен оралыпты. Чапаев ауаткомында төрағаның орынбасары, кейін шаруашылықтарда партия ұйымының хатшысы сияқты лауазымды қызметтерді абыроймен атқарыпты. «Анам Гүлшара үй шаруасымен айналысты» — дейді Марат ағай.

*      *      *

Аузы дуалы, тауып айтқанда, алып та жығатын, шалып та жығатын Мұрат Нәсимуллин деген ағамыз болған. Сол азамат Маратты өз мамандығының білгірі ретінде қатты қадірлеген. «Маған Мараттан өзге дәрігердің қажеті жоқ» дейді екен. Бірде сол азамат Мәскеуге, атан жіліктей академикке барып қаралып, емделіпті. Акдемик өзінше диагноз қойып, оны Марат Сәрсенғалиұлының қойған диагнозымен, емдеу шараларымен салыстырып, олай қарап, бұлай қарап: «Вот молодец, настоящий кардиолог!» — деп басын шайқап, таңдайын тақылдатыпты. Мәкеңнің қойған диагнозы, соған орай қабылдаған емдеу тактикасы академиктің қо-рытындысымен айнақатесіз бірдей болып шыққан ғой. Сосын да ғой таңдайын тақылдатып, таңғалып отырғаны.

Сеңгірлі 80-ге толып отырған сол «настоящий кардиолог!» сол сексеннің 60 жылын медицинаға арнапты. Әлі де арнап келеді. Күлкісі баяғы, жүріс-тұрысы, қимыл-қозғалысы ол да баяғы. Жігіттерді жолда қалдырғандай. Әуелі, Оралдың медицина училищесін бітіріп, еңбек жолын 1957 жылы Чапаевтағы Дөңгелек медпунктінде бастайды. Арасында азаматтық борышын қаза қылмай, үш жыл әскерге барып, онда да санинструктор болған. Жеті жыл бойы Ақтөбенің мемлекеттік дәрігерлік институтында және оқиды. Содан кейін Чапаев ауданында, ауылдарында, «Ақжайық» шипажайында ылғи бас дәрігер қызметінде болып, балтыры сыздап, басы ғана емес, жүрегі ауырған жандардың да талайын емдейді, талайының өмірін ұзартуға себепші болады. Зейнетке шыққан 1997 жылдан бермен қарай «Ақжайық» шипажайы директорының орынбасары, дәрігер-терапевт болып істеп келеді. «ҚР Денсаулық сақтау саласының үздігі», оған Мәкең ие болған медальдарды, алғысхаттар мен Құрмет грамоталарын, дүркін-дүркін сайланған аудандық кеңестің депутаттықтарын қоссаңыз, «настоящий дәрігердің» өзі болады да шығады.

Жарты ғасырдан астам жансерігі Сара апамыз екеуінің ұлдары мен қыздарынан өрген бес немере, алты шөбере бар, бәрі — бір қауым ел. Бақыт деген осы шығар. «Жезде, күлкіңіз анау, қалыңдығына ұрын барғалы жүрген жігіттей қияпатыңыз мынау…

Ол, сірә, 60 жыл бойы айналаңызда үзілмей келе жатқан мейірбикелердің шуағы шығар…» — дейміз әдейі. «Жоқ, жоқ! Апаңның арқасы ғой, Сара ғой, мәпелеп келе жатқан» — дейді. Ол да рас шығар. Ендеше, Сара апай екеуіңіз жасай беріңіз, қызыққа кенеле беріңіз!..

Есенжол ҚЫСТАУБАЕВ

Сенбіде  Орал  қаласындағы «Евразия»  туристік-сауықтыру кешенінде  Кәсіподақтар  күніне арналған  салтанатты  шара  өтті.

Басқосуға қатысушыларды, яғни өңірдегі кәсіподақ ұйымдарының жетекшілері мен белсенділерін, ардагерлерін, мемлекеттік органдардың және БАҚ-тың өкілдерін  Кәсіподақтар күні мерекесімен облыс әкімі атынан облыс әкімінің орынбасары Игорь Стексов құттықтады.

– Қазіргі нарықтық қатынастар жағдайында кәсіподақтардың рөлі маңызды. Сараптамашылардың айтуынша, еліміздегі кәсіподақтардың  белсенділігі аса жоғары болмағанымен, «Кәсіподақтар туралы»  жаңа заңның қабылдануына, Еңбек кодексіне түзетулердің енгізілуіне орай кәсіподақтардың рөлі мен әлеуметтік саладағы жауапкершілігі күшейді, олардың қоғамдық бақылау қызметі нығая түсті. Барлығымыздың міндетіміз – кәсіподақтарды қолдап, олардың рөлін күшейту және одан әрі дамыту. Жарқын мерекемен барлығыңызды құттықтай отырып, сіздерге мықты денсаулық, отбасылық бақыт тілеймін, – деді Игорь Стексов. Сонымен қатар облыс әкімінің орынбасары бір топ кәсіподақ белсенділерін облыс әкімінің алғысхатымен марапаттады. Олардың ішінде Жәңгір хан атындағы БҚАТУ-дың есеп және қаржы кафедрасының аға оқытушысы Толқын Абдулова, «Жайық Таза қала» ЖШС-ның бас инженері Серік Ғұбашев, «Батыс су арнасы» ЖШС-ның машинисі Силбай Әлібеков, «Жайықжылуқуат» ЖШС-ның жетекші инженері Диляра Қуанышқалиева, «Гидроприбор» ғылыми-зерттеу институты» АҚ-ның техника қауіпсіздігі жөніндегі инженері Мирғали Қадырбаев, «ҚПО б.в.» компаниясының кәсіподақ ұйымының төрағасы Марс Хайруллин және өзгелері бар.

Жиында мәдениет, спорт және ақпарат қызметкерлерінің, ауыл шаруашылығы қызметкерлерінің, денсаулық сақтау қызметкерлері кәсіптік одақтарының облыстық ұйымдары қоғамдық бірлестіктерінің төрағалары Айдар Батырханов, Әділғазы Нұрғалиев, Салауат Ақдауытов жиналған қауымды мерекемен құттықтап, өздеріне қатысты салалардағы мекеме-ұжымдардың қызметкерлеріне, кәсіподақ белсенділеріне Қазақстан Республикасының Кәсіподақтары федерациясының, облыстық  кәсіподақтар орталығының алғысхаттарын табыс етті. Ал «Қазақстандық салалық білім және ғылым қызметкерлері кәсіптік одағының БҚО ұйымы» қоғамдық бірлестігінің төрағасы Марат Даупаевқа, облыстық аймақтық инспекциясының кәсіподақ ұйымының төрағасы Парух Мұқановқа Кәсіподақтар федерациясының «Кәсіподақтарға сіңірген еңбегі үшін» төсбелгісі мен оның куәлігі салтанатты түрде табысталды.

Кәсіподақ ардагерлері атынан сөз алған Роза Көжекова кәсіподақ жұмысының қоғамдық негізде атқарылатынын, Елбасының еңбек өнімділігін екі есеге өсіру жөніндегі тапсырмасына орай бұл ұйымның жастарды еңбек етуге, өмір сүруге, өндірісті дамытуға тәрбиелеп отырғандығын айтып, кәсіподақ қызметінің дами беруіне  тілектестігін  білдірді.

– Кәсіподақ ұйымдары облыста жоспарлы шаралардың өтуіне ұйытқы болуда. 2014 жылы «Кәсіподақтар туралы» заңына байланысты кәсіподақтардың міндетмиссиясы нақтыланды. Кәсіподақтар – қоғамдағы  үлкен күшке ие, азаматтық қоғамның бір бөлшегі. Облыс бойынша 9700-ге жуық кәсіподақ ұйымы белсенді жұмыс істеп, 62 мыңнан астам адамды ұйымдарға біріктіріп отыр. Кәсіподақ мүшелері өңірдегі түрлі комиссиялардың құрамында жұмыс істейді, соның ішінде облыс әкімдігі жанындағы үш жақты  комиссияның мүшелері болып табылады, – деді көпшілікті аталмыш орталықтың төрағасы Ербол Салықовтың атынан мерекемен құттықтаған облыстық кәсіподақтар орталығы төрағасының орынбасары Қайырғали Серікқалиев. Сондай-ақ ол шара қонақтары, кәсіподақ ардагерлері Мұхтар Әжіғұловқа, Хатеп Ишанбековқа, Роза Көжековаға мерекелік сыйлықтар табыс етті.

Табиғат аясында өткен Кәсіподақтар күні мерекесіне арналған шара концерттік бағдарламамен өріліп отырды. Одан кейін мерекеге орай шағын футбол мен волейболдан ұйым-ұжымдардан келген командалар өзара күш сынады.

Ерлер арасында шағын футболдан  өткізілген жарысқа кәсіподақ ұйымдарынан 10, әйелдер арасында волейболдан өткізілген жарысқа сегіз команда қатысты. Шағын футболдан жүлделі 1-орынды облыстық білім саласы, 2-орынды облыстық денсаулық сақтау саласы, 3-орынды «ҚПО б. в.»  компаниясы қызметкерлері кәсіподақ ұйымының командалары иеленді. Ал волейболдан өткізілген жарыста І орынды «ҚПО б.в.» компаниясы, ІІ орынды облыстық білім саласы, ІІІ орынды «Батыс су арнасы» ЖШС-ның қызметкерлері кәсіподақ ұйымдарының командалары иеленді. Команда ойыншылары «Үздік ойыншы», «Үздік қорғаушы», «Үздік шабуылшы», «Үздік қақпашы» аталымдары бойынша  да  марапатталды.

Гүлбаршын  ӘЖІГЕРЕЕВА,

«Орал  өңірі»

Жуырда  ҚР  Президенті  жанындағы мемлекеттік  басқару  академиясында  рухани  жаңғыру бағдарламасын  жобалық басқару  негізінде  жүзеге асыру  бойынша  арнайы оқулар  ұйымдастырылды. Елордада  өткен  аталмыш шараға  облыс  әкімінің  бірінші орынбасары  Арман  Өтеғұлов бастаған  өңір  делегациясы қатысып  қайтты.

Кеше осыған орай облыс әкімдігінің М. Ықсанов атындағы залында өңір басшысы Алтай Көлгінов төрағалық еткен жиын өтті.

– 5-9 маусым аралығында рухани жаңғыруды жүзеге асыру бойынша өткен оқуларға облысымыздың бірқатар басқарма басшылары мен сарапшылардан құралған алты адам қатысып келдік. Семинар жоғары деңгейде ұйымдастырылды. Президент әкімшілігі басшысының орынбасары Оңдасын Оразалин, мемлекеттік бақылау және аумақтық ұйымдастыру жұмысы бөлімінің, ішкі саясат бөлімі меңгерушілері, мемлекеттік инспекторлар мен вице-министрлер қатысқан оқуда жобалық менеджменттің теориясы және оны рухани жаңғыру бағдарламасында қалай пайдалануға болатыны жөнінде тәжірибелер көрсетіліп, тренингтер өткізілді. Облысымыздан барған әріптестер алты топқа бөлініп, әр түрлі бағытта жұмыс жасадық. Енді Мемлекеттік басқару академиясының тренерлерін облысымызға шақырып, алдағы маусым-шілде айларында жобалық менеджмент бойынша оқыту семинарларын өткізсек деген ұсынысымыз бар. Тренерлер мұндай ұсынысқа оң көзқарас танытты, – дейді облыс әкімінің бірінші орынбасары Арман Өтеғұлов.

Делегация құрамында болған облыстық ішкі саясат басқармасының басшысы Бақытжан Нарымбетов, облыстық мәдениет, архивтер және құжаттама басқармасының басшысы Дәулеткерей Атауов, рухани жаңғыру бағдарламасы бойынша облыстық деңгейде құрылған жобалық кеңсе жетекшісі Салтанат Тұманбаева оқыту семинары қамтыған тақырыптарға жан-жақты тоқталып өтті.

– Рухани жаңғырудың негізгі мән-мазмұны – үнемі  ізденіс және білім алу. Бұл бағыттағы жұмыстарды аудан-ауылдарда жүйелі жүзеге асыру үшін облыс орталығында арнайы оқыту семинарын ұйымдастырамыз. Осы орайда жергілікті ақпарат құралдарының атқарылар істермен халықты уақтылы хабардар етіп отыруы аса маңызды. Осыны қолға алыңыздар. Елбасының рухани жаңғыру бағдарламасы ауылдық жерлерде нақты көрініс табуы керек, — деді облыс басшысы.

Мұнан кейін өңір тұрғындары үшін «ЭКСПО – 2017» халықаралық көрмесіне баруды ұйымдастыру мәселелері сөз болды.

– Елордамыздағы «ЭКСПО» көрмесінің ашылуымен баршаңызды құттықтаймын. Көрмені тамашалауға өңірімізден облыс әкімінің бірінші орынбасары бастаған бірқатар басқарма басшылары мен аудан әкімдерін арнайы жібердік. Ондағы мақсат – іс басындағы адамдар көрменің пайдасын, ұйымдастырылу деңгейін, бағыттарын өз көздерімен көрсін деген ой болды. Ендігі кезекте олар тиісінше  насихат жұмыстарын және көрмеге барғысы келгендердің жолсапарын ұйымдастару мәселелерін жүйелі түрде жүзеге асырулары керек, – деді Алтай Сейдірұлы.

Облыс әкімінің орынбасары Игорь Стексов аталмыш бағыттағы жұмыстар Қаратөбе, Шыңғыр-лау, Тасқала аудандарында жақсы  жолға қойылса, Орал қаласы бойынша, сондай-ақ Жәнібек, Теректі аудандарында баяу жүріп жатқанын мәлімдеді. Игорь Стексов «ЭКСПО» көрмесіне сапар кезінде, әсіресе, жас балалардың қауіпсіздігіне аса жоғары мән берілу керектігін баса айтты.

– «ЭКСПО – 2017» көрмесін аяқтай барып, көзбен көргенде ғана аталмыш көрмені ұйымдастырудағы негізгі мақсатты терең ұғынуға болады деп ойлаймын. Ең алғаш 1851 жылы Лондонда ұйымдастырылып, кейін Париж, қайтадан Лондон, содан кейін Вена, әлемнің тағы басқа  атақты қалаларында жалғасын тауып келген «ЭКСПО» Орталық Азияда алғаш рет ұйымдастырылып отыр. Астана төрінде өтіп жатқан, 100-ден аса мемлекет қатысып отырған аталмыш көрмені бір күнде түгел аралап шығу оңай емес. Көрмедегі оқушылар мен студенттердің танымын арттыру бағытында ұйымдастырылған шаралар, шын мәнінде, аса қажетті дүниелер. Мысалы, Германия павильонын қараған кезде қабырғаға орнатылған экран арқылы ақылды қала, ақылды үй жобаларының таңғажайып жетістіктерімен таныс болдық. Ғылымның осындай озық жетістіктерін көрген балалар әлемдегі дамыған елдердің қаншалықты ілгері кеткенін бағамдап, туған елінің аталмыш бағыттағы игіліктерді игеру бағытында туғызып отырған жағдайын айқын сезінеріне күмән жоқ, – деді көрмені тамашалап келген облыстық энергетика және тұрғын үй-коммуналдық шаруашылығы басқармасының  басшысы  Ғалым  Орынғалиев.

Облыс әкімі басқарма басшыларына «ЭКСПО»-ны тамашалағысы келген өңір тұрғындарына қолайлы жағдай туғызуды жүйелі ұйымдастыру, әсіресе, әлеуметтік қолдауға мұқтаж жандарға нақты көмек көрсету  керектігін  тапсырды.

Нұртас  НАБИОЛЛАҰЛЫ,

«Орал  өңірі»

Сырым  ауданының  әкімі  Абат  Шыныбеков  көршілес Қаратөбе,  одан  әрі  Атырау  облысына  қарасты  Қызылқоға ауданына  жұмыс  сапарымен  барды. Сапардың  негізгі  реті ақын, қоғам  қайраткері,  халықаралық  «Алаш»  әдеби  сыйлығының  лауреаты  Ақұштап  Бақтыгерееваның  аталған аудандарда  кездесу өткізуіне  байланысты  шығып  отыр.

Уағда бойынша біздің ауданның әкімі ақын анамызды Орал қаласынан Жымпитының басына алдырып, кейін Қаратөбеге бірге жүретін болды. Күтіп алып, бірге жүрді де. Жаздың жақсы күндерінде ақынмен әкімге сапарлас болу біздің де  маңдайымызға  бұйырды.

«Адамды  алақандай туған  жерге  тамған  маңдай  тері  асырайды!»

Кешкілік Қаратөбе ауданындағы мәдениет үйінде ақын Ақұштап Бақтыгерееваның халықпен кездесу кеші өтті. Кешті ҚР Журналистер одағының мүшесі, ақын Ертай Бимұханов жүргізді.  Ақын Ақұштаптың негізгі сөзі рухани жаңғыру жайлы болды.

– Елбасы рухани жаңғыру жайлы текке айтып жүрген жоқ. Рухани жаңғыру – туған елді сүю, ата-бабаңның кіндік қаны тамған жерді сүю. Ғажап өмір болар Америкада. Еркін. Кім боламын десең, сол боласың ол жақта. Бірақ атамекен деген құдірет бар ғой. Сол құдіретке басқа бірдеңе жетеді ме? Менің Фариза деген замандасымның өлеңі бар: «Сені қалай сүюдің керектігін, Мен ешқандай кітаптан оқымадым!» деп келетін. Туған жерді сүюді кітаптан оқып керегі жоқ. Туған жерді сүйіңдер, адамдар! Иә, өзгеден қалмау үшін алғы күнге ұмтылу керек. Бірақ кім екеніңді де білу керек. Аяғыңның астында жатқан мына топырақ несімен қасиетті? Соны ойлансын бүгінгі заманның адамы. Жаңғыру үшін керек дүниенің бірі – еңбек. Бүгінгі күні кімдер көбейді? Дипломы бар, жұмысы жоқ жастар көбейді. Жұмыс неге жоқ? Жұмыс бар. Жұмыс табаныңның астында. Жеріңе бақша сал, мал өсір, егін ек. Елге еңбек ету деген – осы.  Адамды алақандай туған жерге тамған маңдай тері асырайды! – деді Ақұштап  Бақтыгереева.

Қаратөбе ауданының әкімі Асхат Шахаров пен Сырым ауданының әкімі Абат Шыныбеков қатысқан «Ақжайықты жырлайды ақын жүрек!» атты бұл кеште жергілікті өнерпаздар мен ақын оқырмандары да лебіздерін сахнаға шығып жеткізіп жатты.

Миялы  сапары

Келесі күні ауылдың шетіндегі Қалдығайты өзенін кесіп өтіп, Аққозы ауылының үстімен Миялы ауылына қарай жолға шықтық. Кешегідей емес, бүгін құрамы-мыз толықты. Ақын анамыз бар, екі ауданның әкімі бар, олардың жауапты қызметкерлері бар, шағын баспасөз қосыны бар, әнші-термешілер бар, әйтеуір, біраз болдық.

Миялы ауылы – Атырау облысындағы Қызылқоға ауданының орталығы. Бұл аудан біздің Қаратөбемен қоңсы қонған елді мекен.

Негізгі кәсібі мал шаруашылығы болып есептелетін Қызылқоға ауданы бүгінгі күні өз өңірінде экономикалық әлеуеті артқан, мәдени мәртебесі де биік аудан ретінде  орныққан.

Қызылқоғалықтар да ақын бастаған керуенді құрметпен күтіп алды. Түске дейін бізге ауданмен танысуға жақсы мүмкіндік туды. Әуелі Қызылқоға ауданының тарихи-өлкетану музейінде болдық. Қос ауанның әкімдері болса, мемлекеттік бағдарлама арқылы кәсібін ширатып отырған кәсіпкерлік нысанын аралап көрді.

Қызылқоға ауданының орталығында төрт бірдей мемлекеттік балабақша бар. Ақын Ақұштап Бақтыгереева түс әлетінде «Нұр-Шуақ» бөбекжай балабақшасындағы балғындармен кездесті. «Нұр-Шуақ»  200 орындық ірі балабақша екен. Тәрбиеленушілері республикалық байқаулардың жүлдегері екенін де айта кетейік. Аудан меймандары үшін балалар керемет концерт қойды.

Осы күні Қызылқоға ауданының әкімі Мақсот Мұқанов, Қаратөбе ауданының әкімі Асхат Шахаров және Сырым ауданының әкімі Абат Шыныбеков ауданаралық ынтымақтастық туралы меморандумға қол қойды. Ынтымақтастық біраз тарапты қамтиды.

Түстен кейін «Арман» мәдениет үйінде ақын, қоғам қайраткері, халықаралық «Алаш» әдеби сыйлығының лауреаты Ақұштап Бақтыгерееваның  кеші  өтті.

Бауыржан ШИРМЕДИНҰЛЫ,

Жымпиты – Қаратөбе – Миялы – Жымпиты

Облыс  әкімі  Алтай  Көлгінов  сенбі  күні  Зеленов  ауданына барып,  аталған  аумақтағы  әлеуметтік  нысандар  мен  жолдарға жүргізіліп  жатқан  жөндеу  жұмыстарын  тағы  бір  мәрте қадағалап қайтты.

Ол сондай-ақ  осы сапарында ауылдық өндірістік кооперативтердің тыныс-тіршілігімен  де  танысты.

Өңір басшысы ең алдымен Володар ауылындағы су құбырларын қайта жаңғырту жұмысымен танысты.

– Қазіргі таңда Володар ауылында 2-ші көтермелі сорғы стансасы құрылысының жұмыстары жүргізілуде. Сорғы стансасында сыйымдылығы 50 текше метр су мұнарасы және әрқайсысының сыйымдылығы 200 текше метр екі резервуар бар. Нысанның сметалық құны – 192,935 млн. теңге. Құрылыс ұзақтығы – 8 ай, іске асыру кезеңі  2017 және 2018 жылдар.

Биыл осы қаражаттың 97 млн. теңгесін игеруіміз керек. Мұнда 23 адам жұмыс істейді, солардың төртеуі – жергілікті тұрғындар. Жоба бойынша осы жұмыс аяқталған соң сапалы ауыз су әр үйдің ауласына дейін жеткізілетін болады. Су құбырының жалпы ұзындығы – 19,070 метр (19 км).

Володарка ауылында қазіргі таңда 338 аула, 1200 адам бар.  Су сорғыш стансасының құрылысы аяқталған соң осыншама адам сапалы ауыз сумен қамтамасыз етілмек. Жұмыс 13 сәуірде басталды, бұйырса  қарашада аяқтаймыз деп отырмыз, – деді жұмыс барысын баяндаған «Алатау Альдан Агро» ЖШС-ның учаске бастығы Қуат Сералиев. Мұндағы құрылыс жұмысымен мұқият танысқан өңір басшысы мердігерлерге жұмысқа қажетті өнімдерді таңдау барысында қашан да жергілікті өнімдерге басымдық беруді тапсырды. Алтай Сейдірұлының айтуынша, құрылыс компаниялары отандық өнімдерді пайдалану арқылы   жергілікті кәсіпорындар жұмысына қолдау жасайды. Сөйтіп, жергілікті бюджеттің толығуына септігін тигізеді.

Бұдан соң өңір басшысы Дариян ауылында салынып жатқан 100 орындық интернаты бар 300 оқушыға арналған мектеп құрылысымен танысты. Аталған құрылыс нысанын «СКФ Отделстрой» ЖШС (директоры Валентина Михно) жүргізбек. Қазіргі уақытта келісім жасалып, құрылысқа дайындық жұмысы жүргізілуде. Жоба бойынша мектеп ғимаратының көлемі 6766,4 м2, ал интернат ғимаратының көлемі 1991,92 м2. Жобаны жүзеге асыру кезеңі 2017-2018 жылдар.

– Нысанның сметалық құны 1105,515 млн. теңге. Биылға 401,403 млн. теңге бөлінді. Бұл қаражат биылғы жұмысымызға жетіңкіремейді. Сондықтан бізге қосымша тағы 200 миллион теңге қаражат керек. Соған көмектессеңіз екен, – деген Валентина Павловнаға өңір басшысы алдымен жұмысты бастап, қарқынын көрсету керек екенін айтты. «Қажет болып жатса, қаражат жағынан көмек болады» деген әкім мердігер компанияның басшысына балалар мекенін жылы да жарық етіп, сапалы салуды және жергілікті жұмыссыз жүрген адамдарды жұмысқа тартуды тапсырды. Бұған жауап ретінде В. Михно құрылыс жұмысына тек қана жергілікті компания өнімдерін пайдаланатындарын және жұмысқа тартылатын 102 адамнан қазірдің өзінде 14 дарияндық азаматтың жұмыс  істеп  жүргенін  жеткізді.

Бұдан соң әкім бастаған топ Дариян ауылындағы мәдениет үйіне соғып, ондағы күрделі жөндеу жұмысымен танысты. Кездесу барысында мәдениет үйі қызметкерлері 40 жылдан бері жөндеу көрмеген нысанға қаржы бөліп, оның жаңғыруына мүмкіндік берген облыс басшылығына алғыс айтты. Мәдениет үйінде бүгінгі таңда 12 үйірме жұмыс істейді. Және осы үйірмелерге 200-ден  астам  адам  қатысуда.

Әкім жолай Дариян ауылындағы орталық стадионға соғып, ауыл тұрғындарының бос уақытын тиімді өткізуге таптырмайтын орынның азып-тозып тұрғанын көрді. Бұған қынжылыс білдірген басшы керемет жерде орналасқан стадионды жаңғырту жағдайын қарастыратынын  жеткізді.

Бұдан соң Алтай Сейдірұлы «Махорин» шаруа қожалығында, «Каверин» сүт өнімдерін өндіру және қайта өңдеу орындарында болып, ұжым мүшелерімен кездесті. Табиғи азық-түлік өндіруді мақсат тұтқан қос нысанның басшылары оны өндіріп қана қоймай, оларды өңдеп, халыққа түрлендіріп, дәмді етіп жеткізуді мақсат  тұтыпты.

2004 жылы құрылған «Махорин Г. В.» ШҚ бүгінде аудан халқын ет және ет өнімдерімен  толық қамтып отыр. Кәсіпкер әр ауысымда екі тонна шұжық өнімдерін, 1000 дана ет құбырын және бір тонна жартылай фабрикат өнімдерін шығарып, саттыққа шығарады. Қорасын ірі қараға толтырған  Г. Махорин мал азығын өзі дайындайтындықтан, өндірген өнімдерін тұрғындарға нарықтағыдан едәуір төмен бағамен беруде.

Ал сүт өнімдерін өндіретін «Каверин» ЖК (жетекшісі Сергей Каверин) әр ауысымда 40 тонна сары май мен Чечил ірімшігін даярлайды. 2014 жылы 185 литр ғана сүт өндірген кәсіпкер бүгінде өндіріс көлемін 2 500 000 литрге дейін көбейткен. Келесі жылы сүт мөлшерін 3000 000 литрге жеткізуді жоспарлауда. Жергілікті 42 адамды жұмыспен қамтып отыр. Кәсіпкердің өнімдері Орал қаласынан басқа Шымкент, Ақтау, Атырау, Ақтөбе, Петропавл, Астана қалаларына тарайды. Кәсіпкерлік жеке тұрғындардан өздері аяқтай жүріп, сүт жинайды, оны сақтайтын арнайы орындары бар. Әкім отандық өнімдерді даярлап, жергілікті тұрғындарды тұрақты жұмыспен қамтамасыз етіп жүрген кәсіпкерлердің жұмысына  ризашылығын  білдірді.

Одан әрі өңір басшысы «Рубцов» ауылдық өндірістік кооперативінде болып, олардың жұмыстарымен танысты. Кәсіптерін қарапайым әйнек кесуден бастаған әкелі-балалы бизнесмендер енді ауыл шаруашылығын дамытуға біржолата бет бұрыпты. 2015 жылы құрылған өндірістік кооперативтің бүгінде 400 гектар егіс алаңы бар. Биыл 156 гектар жерге картоп және 35 гектар жерге көкөніс еккен. 17 адамды тұрақты жұмыспен және 10 адамды маусымдық жұмыспен  қамтып отыр. Жаңа техникалар сатып алғанын айтқан кооператив жетекшісі Анатолий Рубцов бұған субсидия алғанын айтып, мемлекеттік қолдауға риза екенін жеткізді. Оның сөзінше, қазіргі уақытта сыйымдылығы 2000 тоннаны құрайтын көкөніс қоймасы бар. Осы қойманың көлемін 4000 тоннаға дейін ұлғайтуды мақсат еткен кәсіпкер қазіргі уақытта қажетті құрал-жабдықтарға тапсырыс беріп, күтіп отыр. Бұйырса, күзге дейін қойманы жабдықтау жұмысын аяқтап, биылғы жаңа өнімді осы жерде сақтауды жоспарлауда. Кәсіпкерлердің егіс даласындағы шаруасымен және болашақ жоспарларымен танысқан Алтай Сейдірұлы олардың жұмысына сәттілік тіледі.

Осыдан кейін өңір басшысы «Орал-Кирсанов» аутожолының жөндеу  жұмыстарымен  танысты.

– Жөнделетін жолдың жалпы ұзындығы – 47 шақырым. Орташа жөндеуге бөлінген жалпы қаражат көлемі 2286,07 млн. тең-ге. Жұмыс 2015 жылы мамырда басталды. Былтыр 33 шақырымын жасадық, биыл 10 шақырымнан астамы істелді. Дәл қазір біз жолдың 33-48 шақырымдағы аралығын жөндеп жатырмыз. Биылға 900 млн. теңге бөлінді.  Жұмыс кестедегі көрсетілген уақыттан ертерек бітуде, соған қарап биылғы жұмысты жоспардағы көрсетілгендей қарашада емес, тамыз айында тапсырамыз деген ойдамыз, — дейді жұмыс барысын баяндаған жоба жетекшісі, «Бірлік» ЖШС өкілі Төрехан Қоспанов. Оның сөзінше, жөндеу жұмысын 22 арнайы техника жүргізуде. Жұмыс күші,  қаражат  жеткілікті.

Осы жерде сәл-пәл үзіліс жасаған өңір басшысы бүгінгі іссапарда көрген-білгендерін ортаға салып, қорытынды сөзін айтты.

– Жалпы, өңіріміз бойынша биыл 470 шақырымнан астам жол жөнделмек. Осының 200 шақырымнан астамы республикалық маңызы бар жол, қалғаны – облыстық және аудандық жолдар. Осы жолдарды жөндеуге биыл мемлекеттік бюджеттен 36 млрд. теңгенің үстінде қаражат бөлінді.

Биыл Ресей елінің Саратов қаласына апаратын шекаралық жолдың 86 шақырымын бітіретін боламыз. Қалған 18 шақырымы келесі жылы жөнделіп бітеді. Келесі жылы Орынборға баратын жолды жасау жоспарда тұр, мұны тиісті министрлік қарастырып жатыр. Осы жұмыстардың барлығы Елбасының тапсырмасы бойынша мемлекеттік «Нұрлы жол» бағдарламасының арқасында жүзеге асырылуда. Бұрын «Орал-Кирсанов» аутожолының сапасы нашар болды. Себебі, бұл жерден ауыр жүк көліктері жиі өтеді. Жолдың нашарлығынан осы жолмен өтетін жолаушылар және шаруа қожалықтарының көліктері зардап шегуде. Сондықтан халыққа ыңғайлы болсын деп осы жолды жөндеуді қолға алдық. Биыл, бұйырса, бұл жолдың 17 шақырымға жуығы жөнделіп бітеді. Алдағы уақытта жолдардың жөнделуін қатаң бақылауда ұстап отырмақпыз.

Сондай-ақ аудандарда және елді мекендерде де жолдар жөнделуде. Солардың бірі – Дариян ауылы. Осы ауылда биыл сегіз көше және аудан орталығында 10 көше, аудан бойынша барлығы 18 көше жөнделмек. Облыста Қазталов, Жәнібек және Бөкей ордасы аудандарының жолдары сын көтермейді. Алыс аудандардың тұрғындары жолдың нашарлығынан қиналып жүр. Қазіргі уақытта бұл мәселелер министрлікте қарастырылуда. Бұйырса,  алдағы уақытта  шешіліп қалар.

Ал енді әлеуметтік нысандарға келсек, биыл ауданда 100 адамдық интернат  бар,  300 орындық  мектеп салынбақ. Переметныйда спорт кешені салынуда. Дарияндағы мәдениет үйі күрделі жөндеуден өтіп жатыр және бес елді мекенді орталықтандырылған сапалы ауыз сумен қамтамасыз етпекпіз. Осы ауданға биыл бөлінген үш жарым  миллиард теңге жоғарыда аталған жұмыстарға жұмсалуда. Бұл — мемлекеттің үлкен қолдауы.

Бүгінгі кездесу барысында Дариян ауылының тұрғындары стадионды жөндетуді сұрады. М. Шолохов атындағы музейге реставрация жасаудың қажеттігін айту-да. Аудан халқының бұл өтінішін қаперде ұстап, мұны жоспарға енгізбекпіз.

Жаңа өздеріңіз көрдіңіздер, атқарылып жатқан жұмыстардың барлығында  жергілікті кәсіпорындардың өнімдері пайдаланылуда. Бұл – жергілікті кәсіпорындар үшін үлкен көмек және жергілікті салық көлемінің ұлғаюына септігін тигізеді. Сондай-ақ жер-жерде жүргізіліп жатқан осындай игілікті істер жұмыссыздар санын азайтып, халықтың әлеуметтік жағдайының жақсаруына да ықпал етуде, – деді Алтай Сейдірұлы ауданға жасаған  іссапарын  қорытындылап.

Іссапар соңында облыс басшысы Зеленов ауданы аумағында орналасқан «Жайықмұнай» ЖШС-да  болып, ірі кен орнының жұмыс барысымен  танысты.

Айша  ӨТЕБӘЛІ,

Зеленов  ауданы,

«Орал  өңірі»

Суреттерді  түсірген  Айбатыр  НҰРАШ

ҚР  Ішкі  істері  құрылымдарының   құрылғанына  25 жыл  толуына орай Орал  қаласында  2000  метрлік  көпшілік   жүгіру  ұйымдастырылды. Орал қалалық  ІІБ  мен  «Динамо»  облыстық   дене   шынықтыру және спорт қоғамының  қолдауымен  өткен  шараға  200-ден астам қызметтік формасын  киген  полицейлер  қатысты.

– Еліміз егемендік алғаннан кейін 1992 жылдың 23 маусымында Президентіміздің Жарлығымен ҚР Ішкі істер органдары құрылды. Биыл оған 25 жыл толып отыр. Айтулы датаға орай әр түрлі спорттық және мәдени шаралар өткізудеміз. Солардың бірі – бүгінгі полицейлер арасындағы көпшілік жүгіру. Ішкі істер қызметкерлері арасында салауатты өмір салтын насихаттау шарамыздың басты мақсаты болып табылады. Соның ішінде полицейлер әр уақытта  өздерін үнемі бабында ұстауы қажет, – дейді Орал қалалық ішкі істер басқармасы басшысының  кадрлармен жұмыс жөніндегі орынбасары, полиция полковнигі Наурызбай Ғұмаров.

Аталмыш шараға қатысқан полицейлер Жамбыл көшесінен бастап, қалалық ішкі істер басқармасына дейінгі аралықты жүгіріп өтті. Мәре сызығына бірінші болып жеткен Темірлан Тоқсымбаев І орын алса, ІІ және ІІІ орындарды Жәнібек Серіков пен Сәбит Төлеуов өзара бөлісіп, диплом, медаль және бағалы сыйлықтармен марапатталды.

Темірболат  ТОҚМАМБЕТОВ

Облыстық  «Орал өңірі»,  «Приуралье»  газеттерінің тілшілері  Орал  қалалық  ІІБ  жергілікті  полиция  қызметкерлерімен  бірігіп, бөтеннің  көлігін  айдап  кету  және  тонау  қылмысының  алдын  алу  мақсатында  арнайы  рейдке  шықты.

Сақтық шаралары  Д. Қонаев  шағынауданындағы  көп қабатты үйлердің ауласындағы және  аутотұрақта тұрған көліктер иелеріне түсіндіру жұмыстарынан  басталды.

– Облыс бойынша соңғы бес айда  72 аутокөлікті тонау, 31 темір тұлпарды айдап  кету және жеті көлікті ұрлау деректері тіркелді. Аталмыш қылмыстардың ашылуы 75-80,5%-ды  құрайды. Тіркелген деректерге сүйенсек, көлікті ұрлау және тонау қылмысы  Д. Қонаев шағынауданында  жиі орын алады. Көлік тонау оқиғасына қатысты деректердің ашылмай қалуының басты себептерінің бірі – азаматтардың құқық қорғау органдарына кеш хабарласуы. Ал кейде көлік тонау оқиғасы  жүргізушілердің аңғалдығынан да орын алып жатады. Қанша жерден қауіпсіздігі сақталғанмен, қымбат көліктерге де абай болған жөн. Өйткені жүргізушілер көліктің дабыл қаққышы мен есік құлыптарына сеніп, ішіне қалта телефондарын, қол сөмкелерін тастап кете береді. Мұндай салғырт әрекеттердің арты көлік тонау оқиғасына әкеліп соқтырады,  – деді рейд барысында Орал қалалық ІІБ ЖПҚ-ның аға инспекторы Динара Әбділқалықова.

Рейд барысында осы шағынаудандағы №3, 4, 5, 6 көп қабатты үйлердің тұрғындарымен кездестік. Олар  аулада тұрған көліктердің тым көптігін  айтып шағымданды.

– Алтыншы үйде тұрамын. Зейнеткермін.  Үйдің алды толған машина. Кешқұрым ауырып қалып «Жедел жәрдем» көлігін шақырсақ, олар уақытында келгенімен, тоқтайтын орын таба алмай әуреге түседі. Күндіз қоя берсін, бірақ түнде автотұраққа орналастыруға болады ғой. Қанша ескертсек те, жүргізушілер құлақ аспайды.

Қала берді, есіктің алдына тақалғанша жылдамдығын азайтпайды. Жуырда аулада ойнап жүрген кішкентай қыз баланы басып кете жаздады, — дейді Амангелді Есмұқанов  есімді қала тұрғыны.

Ізінше  бұл  үйлерден 100 метр қашықтықта орналасқан аутотұраққа  барып, күзетшісіне жолықтық. Сыйымдылығы 60-70 көлік тұратын тұрақта 10 шақты көлік тұр екен.  Есімін атағысы келмеген аутотұрақ күзетшісі көлікті  бір түнге қалдыру 200 теңге тұратынын және көлік иелерінің  көбісі қауіпті болса да, темір тұлпарларын өз аулаларына қоятынын  жасырмады. Сонда   көліктің  тоналуына  немесе  оны «барымталап»  кетуге  «шығасыға  иесі  басшы»  болып  шықпай  ма?

Гүлсезім  БИЯШЕВА.

«Орал  өңірі»

Өткен сенбіде «БҚМУ Ақиқат пікірталас орталығы» жастар бірлестігі облыстық жастар саясаты мәселелері басқармасының қолдауымен «City center» ойын-сауық орталығында «ЭКСПО-ға бірге барайық!» атты акция ұйымдастырды.

Шараның мақсаты – батысқазақстандықтарды Елордамыз Астана қаласында өтіп жатқан «ЭКСПО – 2017» халықаралық көрмесін тамашалауға шақыру. Акция барысында 70 ерікті жас тақырыптық киімдер киіп, флешмоб биін ұйымдастырды, өңіріміздің жас өнерпаздары әннен шашу шашты.

– Кеше ғана теледидардан ауқымды көрменің ашылу салтанатын тамашаладық. Ал бүгін қала тұрғындары мен қонақтарына үш айға дейін жалғасын табатын көрме туралы ақпарат беруді жөн көрдік. Осылайша облысымыздың барша тұрғынын мемлекетіміздегі маңызды бастаманы қолдауға шақырамыз, — дейді жастар саясаты мәселелері басқармасының бас маманы Арайлым Бақытжанова.

Кеште ойын-сауық орталығы қонақтарының назарына концерттік нөмірлермен қатар танымдық бағдарламалар ұсынылды. Шара жүргізушілерінің мәлімдеуінше, 17 маусымда «Астана Арена» алаңында американдық әртіс Крис Браунның, ал 2 маусымда американдық поп әнші Бритни Спирстің ән кеші өтеді. Шілденің алғашқы күнінде Ресей эстрадасының «Би-2» және «Муммитроль» рок топтары, ал 8 шілдеде ресейлік әнші әрі продюсер Тимати және оның «Black Star» тобының мүшелері өнер көрсетеді. 27 маусымда «Славян базары – 2015» байқауының бас жүлде иегері, «I am singer – 2017» Қытай байқауының 2-орын жүлдегері Димаш Құдайбергенов жеке концертін бермекші.

Шараға арнайы қатысқан «Otyrar travel», «Мир путешествий», «Азия тур», «ОралИнТур», «Гермес-Тур» секілді туристік компаниялар мен агенттіктердің өкілдері Астанаға баруға ниет білдірген жандар үшін белгілі қызмет түрін көрсетуге дайын екендігін айтты.

– «ЭКСПО – 2017» халықаралық көрме аясында тұрғындарға танымдық бағдарлама ұсынудамыз. Бағдарлама қызметіне жол жүру, орналасу, үш мезгіл тамақтану ақысы кіреді. Сонымен қатар туристеріміз Елорданың көрікті жерлерін және «ЭКСПО – 2017» көрмесін гид-экскурсоводпен бірге аралай алады. Туристерді үш жұлдызды «Данияр» қонақүйіне орналастырамыз. Жеті күнге есептелген қызметтің құны ересектерге пойыздың плацкарт вагоны арқылы 48 780 теңге, балаларға 44 800 теңге, ал купе вагондары арқылы жетемін деуші ересектерге 55 570 теңге, балаларға 48 950 теңге, — дейді «Free city» туристік компаниясының кеңесшісі Рәмзия Безекенова.

Айым ТӨЛЕУҒАЛИЕВА,

«Орал өңірі»