Мұрағат: 27.03.2017


«Кешір, сүйемін…»

Күні: , 34 рет оқылды

IMG_5377


Облыстық қазақ драма театрында Флорид Буляковтың «Қысқа ғұмыр» трагикомедиясының қазақ тіліндегі алғашқы қойылымы  өтті.


Эльмира Мақашева ау­дар­ған қойылымның режиссері — Самал Әбуов, суретшісі Мұрат Мәмбетов.

«Қысқа ғұмыр» трагикомедия­сы – әжей мен атайдың өзара махаббаты мен адалдығы туралы қойылым. Басты кейіпкерлер бір-бірінің қадірін өмірлерінің соңғы сәті таяғанда ғана ұғады. Пьеса алғашында комедиялық көрініс­пен басталады.

Бір аптадан бері төсек тартып жатып қалған Гриша атай түс көреді. Түсінде ажалдың өзімен тілдеседі. Ажал оны бұл өмірге белгілі бір шартпен жіберген екен. «Мұрныңнан қан кеткенше, кеудеңнен жан шыққанша» са­уап­ты іс қыл деп үш сағатқа ғана қайтарған. Егер берілген уақыт­тың ішінде бір сауапты іс қылса, он жылға, екі сауапты іс қылса, жи­ырма жылға босатып, ал үш сауапты іс қылса, мәңгілік өмір сыйлайтынын айтады. Қария ояна са­лысымен, барлығын кемпіріне айтып береді. Сол сәттен бастап екеуі қандай жақсылық жасау­ға бо­латындығын ойлас­ты­ра бастайды.

Сауапты істерді тізе бастағанда екеуінің жастық шақтары естеріне түседі. Алғашқы неке түні…  Жас келіншек жан жарынан махаббат сөздерін күтеді. Бәйбіше ауыр тұрмыстың салдарынан түсік тастайды. Барған сайын жастық шақтағы көріністер ауырлай бастайды. Комедия ретінде басталған қойылым нағыз трагедияға айналады. Шарықтау шегінде өмір бойы сәби сүйе алмайтынын білген жап-жас келіншек Василиса Құдайдың әді­лет­сіздігі­не налып, зар еңіреп жылайды.

IMG_5200Ал Григорийді айыптаудың жөні бар. Себебі ол әйелі­нің құр­са­ғы­н­дағы сәбидің өміріне қа­уіп төніп тұрса да, оны ауруханаға жібер­мейді. Сөйте тұра өзі қыдырып, басы бос әйелдермен көңіл көте­­реді.  Василиса болса, күйеуіне де­­­­ген адалдығынан таймайды, оның бірауыз «сүйем» деген сөзін өмір бойы күтумен өтеді. Григорий бір рет болса да, әйелінің жан дү­ние­сіне үңіліп көрмепті. Алайда ол да әйе­лін өз түсінігінше жақсы көр­ді. Ал «ұсақ-түйекпен» айна­лы­су­ға от­а­ға­сының көбіне уақыты болмады.

Григорий атайдың жолы болды. Өйткені өмірінің соңғы сәттерінде өзінің бәйбішесін қалай қатты сүйе­тіндігін ұғады. Тіпті оның «кемпір» емес, Василиса екені есіне түсіп,  оның бетіндегі  әжімдердің кө­бей­ге­нін  байқайды. Бастысы,  көп­тен күткен «Кешір, сүйемін…» сөз­де­рін жұбайына айтып үлгереді.

Қойылымдағы езу тартқызар кө­ріністер мен көзге жас үйірер сәт­тер көрерменін ойға шомдыра­­ды. Қамшының сабындай қыс­қа ғұ­­­мырда ерлі-зайыптылар бірі-бі­рімен түсінісіп, тіл табысып өмір сүр­ген­нен артық бақыт жоқ шы­ғар…

Айым ТӨЛЕУҒАЛИ,

«Орал өңірі»

Суреттерді түсірген В. ПРЕДЫБАЙЛО


51 жылдан бергі серігім

Күні: , 36 рет оқылды

DSC_0109


Мен сонау 1966 жылы Алматыдағы Қазақтың мемлекеттік университетінің биология факультетін ихтиолог-балық өсіруші мамандығы бойынша тәмамдап, Оралдағы балық комбинатына қызметке орналастым. Міне, бүгінде бір ғасырлық тарихы бар «Орал өңірі» газетімен таныстығым сол жылдан басталып, күні бүгінге дейін жарты ғасырдан астам уақыт бойы облыстың басты басылымынан қол үзген емеспін.


Әрине, ол кездегі газет пен қазіргі басылымды салыстыра алмаспыз. Ол жылдары газет ақ-қара түспен ғана басылып, бір сарынды мақалалар жарияланатын еді. Еліміз тәуелсіздік алған 25 жылдың ішінде «Орал өңірі» газеті заман талабына сай жаңаша күйге еніп, жасарып, жаңғырып келеді.

Облыстық басылымның бүгінгі ұстанып отырған бағыт-бағдары және соңғы кездері газет беттерінде жарық көрген көкейкесті тақырыптардағы мақала-материалдар көптің көңілінен шығуда. Ғасырлық тарихы бар басылымның Елбасы бастамасымен жүзеге асырылып жатқан мемлекеттік бағдарламалардың жай-жапсарын қалың бұқараға жеткізу, жастарды адал еңбекке жұмылдыру, халықтың денсаулығын нығайту, жат діни ағымдардан ел-жұртты сақтандыру туралы мақалаларды жиі жариялауы заман талабы деп білемін. Сонымен қатар редакция алқасы жастарды отансүйгіштікке, ұлтжандылыққа, өзінің туған елінің табиғатын аялауға тәрбиелеу мақсатында да ауқымды істер атқарып келеді. Атап айтсақ, көктемде құстарға ұя жасауды, сенбіліктер өткізіп, тал-терек егуді, қыс мезгілінде өзен-көлдердегі балықтарға оттегін жіберуді газет бетінде жиі насихаттауы және құр насихаттап қоймай, редакцияның басшы-қосшысының әлгіндей игілікті істерге тікелей атсалысуы құптарлық іс екендігі шүбәсіз. Өткен жылы күре жол бойынан құрылыс салу үшін жайқалып тұрған тал-теректерді жайпап жатқандығы туралы өзекті мәселені де осы газеттің тілшілері көтерген болатын. Бір кездері облыстық басылым «Ақ қайың» атты экологиялық таным-тәрбие арнайы бетін ашып, табиғат тамашаларымен қатар экологиялық мәдениетті қалыптастыру мәселесін де жиі көтеретін. Басылым осы үрдісті қайта жалғап, табиғатты қорғаудағы игі бастамалармен, кейбір көлеңкелі тұстарын жариялап отырса, нұр үстіне нұр болар еді.

Сөз соңында егемен елмен бірге дамып, жаңалықтың жаршысына айналған, осы жылы ғасырлық мерейтойын атап өткелі отырған редакция ұжымына шығармашылық табыс тілей отырып, барша жерлестерімді өңірдің басты басылымынан қол үзбеуге шақырамын.

Садыр МҰДАТҰЛЫ,

М. Өтемісов атындағы БҚМУ-дың доценті,

Орал қаласы


Қазына қаржысы тиімсіз жұмсалған

Күні: , 68 рет оқылды

20170317_104322


Бұл жайында облыстық мәслихатта өткен  БҚО бойынша тексеру комиссиясының отырысында айтылды. Сонымен қатар мемлекеттік аудит нәтижесінде облыстық жолаушылар көлігі және автомобиль жолдары басқармасының 2014-2016 жылдары көлік инфрақұрылымын дамытуға бөлінген бюджеттік қаражатты пайдалануда заңбұзушылықтарға жол бергені мәлім болды. Комиссияның отырысына облыстық жолаушылар көлігі және автомобиль жолдары басқармасының басшысы Миржан Сатқанов пен басшының орынбасары Қазбек Меңеев және тексеру комиссиясының мемлекеттік аудит бөлімдерінің мамандары қатысты.


Тексеру комиссиясының мүшесі Батыржан Хамидуллиннің баяндауынша, облыстық басқарма теңгерімінде 709 млн. теңге дебиторлық қаражат сомасы бар екені анықталған. Соның ішінде 2015 жылы сот шешімімен 367 млн. теңге көлеміндегі дебиторлық алажақ қайтарылғанымен, сома көрсеткіші басқарманың қаржылық есебінен уақтылы алынып тасталмаған. Былтыр сот орындаушылары арқылы басқа мекемеден жергілікті бюджетке өндірілген 4 млн. 858 мың теңге де басқарма есебінен шығарылмаған. Тексеру барысында басқарма теңгерімінде пайдаланылмайтын бес нысан бар екені белгілі болды. Оның екеуі Жәнібек ауданындағы газ құбырлары болса, үшеуі – Шыңғырлаудағы ғимараттар. Газ құбырларының бірі 2003 жылы аудан әкімінің қаулысымен (концессия) жалға берілген. Бірақ бұл мәлімет мемлекеттік тізілімге енгізілмеген. Екіншісі, «ҚазТрансгазАймақ» АҚ теңгерімінде екені көрсетілгенімен, оны айғақтайтын құжат табылмады. Ал Шыңғырлау ауданындағы Лубен ауылында орналасқан ескі ғимаратты шаруа қожалығы заңсыз түрде мал бағымына пайдалануда. Мемлекеттік аудит кезінде аталған нысандардың құжатын қалпына келтіру және басқарма теңгерімінен шығару жұмыстарын жүйелеу ұсынылды.

«2000 жылдардың басында біздің мекемеден тұрғын үй-коммуналдық шаруашылығы бөлінгенде, осы нысандар облыстық жолаушылар көлігі және автомобиль жолдары басқармасының теңгерімінде қалған. Жәнібек ауданындағы газ құбырларын 2013-2014 жылы «Самұрық-Қазына» Ұлттық әл-ауқат қоры» АҚ заңды түрде пайдалануға берген. Барлық құжатты жинап, облыстық қаржы басқармасына ұсындық. Енді мамырдың 1-інде біздің басқарма теңгерімінен шығарамыз. Шыңғырлаудағы ғимараттарға қатысты сот шешімі бұрыннан бар. Енді сол заңнамалық актілерді орындаймыз. Ал Лубенде иесіз қалған ғимаратқа қатысты сот актісін алуға жұмыстанып, содан кейін мал ұстап отырған шаруа қожалығына нысан орналасқан жер телімін заңдастыруды ұсынбақпыз. Жылдың соңына дейін бұл мәселелердің шешімін табуға күш саламыз», – деді облыстық жолаушылар көлігі және автомобиль жолдары басқармасының басшысы Миржан Сатқанов.

Батыржан Хамидуллиннің мәліметінше, облыстағы жеті құрылыс нысаны бойынша сметалық құжатта қосалқы құн салығы бюджеттен аударылатын қаражатпен бірге есепке алынып, қателік салдарынан 7 млн. теңге көлемінде шығын болған. Күні бүгінге сол қаражаттың 2 млн. 800 мың теңгесі бюджетке қайтарылды. Облыс аумағындағы аудандық маңызы бар автожолдарды басқарма өткен жылға дейін теңгерімнен шығармай, оларды күтіп ұстауға қаражат төлеп келген. Сондай-ақ автожолдарды ағымдағы жөндеуге қатысты сметалық құжаттамаларда қателік кетіп, бюджеттен 4 млн. 200 мың теңгеден астам қаражат артық жұмсалған. Оған жауап ретінде Миржан Сатқанов кейбір аудандық маңыздағы автожолдардың құжаты бұрын жасалмауына байланысты кейін қалпына келтіру жұмыстары қайта қолға алынғандықтан, жолдарды аудан әкімдіктеріне беру мерзімінен кешіккенін айтты. «Сондықтан автожоларды күтіп ұстауға қаражат бөлуге тура келді. Айта кетерлігі, алдағы уақытта бұл бағытта жұмыстанатын мердегілерден ендігіде барлық техникасы жеткілікті болуын қатаң талап етпекпіз», – деді ол.

Ақжайық ауданында Жайық өзені үстінен тартылатын автокөпір құрылысына байланысты жүргізілген аудит нәтижесі көңіл көншітпейді. Оған қатысты «Жаңа жол» ЖШС қолға алған жобалау құжаттары мемлекеттік сараптамадан өтпеген. Себебі құрылыстың техникалық-экономикалық негіздемесінің құны 27 млрд. теңге деп көрсетілсе, жобалық-сметалық құжаттама есебі 29 млрд. теңгеге бағаланған. Яғни жобалау құжаттары құнында 2 млрд. теңгеге жуық алшақтық бар. Және орман қорына тиесілі жер телімі құрылыс учаскесіне уақтылы заңдастырылмаған. Қазіргі уақытта құрылыс аумағына қатысты құжаттар түгенделгенімен, мемлекеттік сараптама әлі күнге жоқ. «Қазіргі уақытта техникалық-экономикалық негіздемені қалпына келтіруге байланысты облыстық бюджеттен 6 миллион теңге бөлінді. Содан кейін жобалық-сметалық құжаттама мемлекеттік сараптамадан өтеді», – деді баяндамашы. «Басқарма мемлекеттік сараптамадан өткізбей, жобалаушы компанияға ай сайынғы кестеге сәйкес неге қаражат аударды? Яғни 123 млн. теңге заңсыз төленіп келген. Басқарма компанияны сотқа бергенімен, құзырлы органға дәлелді айғақтарды ұсынбаған. Себебі жобалау құжаттамаларындағы алшақтықты бүркемелеп қалған», – деді баяндамашы деректерін сабақтаған облыстық тексеру комиссиясының төрағасы Амангелді Нұғыманов. «Жобалық-сметалық құжаттамалар 2014 жылы жасалыпты. Заң талаптарына сәйкес үш жыл мерзім ішінде пайдаланылмаған ЖСҚ өз күшін жояды. Егер уақтылы түзету енгізілмесе, бұл жергілікті бюджеттен қосымша шығын болары анық», – деді тексеру комиссиясының мүшесі Мейрамхан Қыдырбаев.

– Көпір құрылысына техникалық-экономикалық негіздеме 2012 жылы жасалды. Ал ЖСҚ-ны жасауға қаражат 2014 жылы аударылды. Бірақ сол уақытта орман алқабына қатысты мәселе шешілмей, құжаттаманы жасау келесі жылға дейін кідірді. Содан теңгенің құнсыздануына байланысты ЖСҚ есебінде алшақтық пайда болды. Біздің басқарма жобалаушы мекемені сотқа бергенімен, сот органы бұл шағымды мақұлдамай тастады. Қазіргі кезде ТЭН-ға түзету жасап, мемлекеттік сараптамадан өткіздік. Серіктестік басшылығымен кездесіп, оларға жобалау жұмысын аяғына дейін жеткізуді тапсырдық. Компания мамандары шығынды өз мойнына алу үшін қайтадан есеп жүргізеді. Олай болмаса, сот органына шағым жасайтынымыз туралы ескерту үшін хат дайындаудамыз, – деді Миржан Сатқанов. «Мердігерлермен тезірек келісімге келуді қарастырып, жыл соңына дейін сметалық құжаттарды реттеуге тиіссіздер. Бұл әлеуметтік жобаның халық үшін маңызы зор Себебі көпір құрылысы республикалық бюджеттен қаржыландырылатыны сіздерге мәлім. ЖСҚ уақтылы түзетілмесе, оған қыруар қаржы жұмсалады. Егер аталған бұзушылықтар белгіленген мерзімде қалпына келтірілмесе, заңға сәйкес жауапкершілікке тартыласыздар», – деп ескертті комиссия төрағасы.

Комиссия отырысында жолаушылар тасымалымен айналысатын компанияларды субсидиялауды есептеу қағидаты бұзылғаны айтылды және қысқы мезгілде аудандық маңыздағы жолдарды уақтылы қардан аршуға қатысты тұрғындар наразылықтарының себебі де талқыланды. Тексеру комиссиясының төрағасы Амангелді Нұғыманов облыстық басқарма өкілдеріне мемлекеттік аудит барысында анықталған бұзушылықтарды жөндеумен жұмыстануға уақыт белгілеп, комиссия бұл бағытта берілген тапсырмалардың орындалуын бақылауға алатынын ескертті. Қаулы нәтижесінде аудит нысандарына ұсынымдар жолданды.

Айта кетейік, мемлекеттік аудит барысында 1 899 821,5 мың теңге көлемінде бюджеттік және басқа да заңнамаларды бұзу дерегі анықталды. Соның ішінде 14 млн. 179,3 мың теңге бюджетке қайтарылуы тиіс. Ал тауарларды жеткізу, қызметті сапалы орындау, құжаттарды реттеуге қатысты 1 115 394,3 мың теңге көлеміндегі қаржылық бұзушылықтар қалпына келтіруді қажет етеді. Сондай-ақ 133 499,9 мың теңге бюджет қаржысы тиімсіз пайдаланылған.

Нұртай АЛТАЙҰЛЫ,

«Орал өңірі»


Қуаныш сыйлаған қос көпір

Күні: , 36 рет оқылды

IMG_4435


Жақында  Зеленов  ауданындағы  Садовый  және  Зеленый ауылдарының  тұрғындары  үшін зор  қуаныш  болды. Қос елді  мекеннің  тұрғындарын  облыс  орталығымен  Шаған өзені  арқылы  байланыстыратын  екі  аспалы  (ванттық)  көпір  пайдалануға  берілді.


Осы уақытқа дейін облыс орталығы Орал қаласына айналма жолмен барып немесе ескі пароммен қатынап, қиындық көрген халық көпірдің жоқтығынан біраз азап шеккендігі рас. Халықты бірнеше жыл әуре-сарсаңға салған бұл өзекті мәселе тек ауыл тұрғындарын ғана емес, сонымен қатар «Нұр  Отан» партиясы, облыс, аудан, ауыл басшыларын да алаңдатқаны мәлім. Естеріңізге сала кетейік, өткен жылы наурыз айында «Нұр Отан» партиясының республикалық сайлауалды штабының делегациясы БҚО облысына арнайы сапармен келіп, Мичурин және Макаров ауылдық округтерінің  тұрғындарымен кездескен болатын. Жүздесу барысында аталмыш штаб өкілдері Шаған өзенінен жаяу адам жүретін көпір салу туралы мәселені білді. Сөйтіп, шаруаның шешілуіне бір кісідей атсалысты.

Қос ауылдағы аспалы көпірдің ашылу салтанатында аудан әкімінің орынбасары Амангелді Тоғызбаев, аудандық мәслихаттың хатшысы Рамазан Ысмағұлов, «Уральскстройинвест» жауапкершілігі шектеулі серіктестігінің директоры, мердігер Алексей Безьяновтар сөз сөйлеп құттықтады. Сондай-ақ аудан әкімінің орынбасары Амангелді  Тоғызбаевпен бірге Макаров ауылы ақсақалдар кеңесінің төрағасы, еңбек ардагері Төлеген Жасыбаев, Зеленый ауылының тұрғыны, еңбек ардагері Есболат Жәленовтар лента қию рәсімін жүргізді.

– Екі көпірдің құрылысын «Уральскстройинвест» жауапкершілігі шектеулі серіктестігінің ұжымы жасады. Құрылыс өткен жылы, яғни 2016 жылдың күз айында басталған еді. Зеленый ауылындағы көпірдің ұзындығы – 114 метр, ені – 1,52 метр. Оның жұмысына 55 млн. 588,415 мың теңге жұмсалды.  Ал Садовый ауылындағы көпірдің ұзындығы – 110 метр, ені – 1,52 метр. Бұған 36  млн. 057,886 мың теңге бөлінді, – дейді Зеленов аудандық құрылыс бөлімінің басшысы Арман Жұмабеков.

IMG_4349Қырық тоннаға дейін салмақ көтере алатын, жобалары бірдей  қос көпірдің сапасы жақсы, металдан жасалынған,  мықты арқандармен тартылған. Сондай-ақ өзеннің екі жағалауына зәкірмен бекітілген.

Айта кеткен жөн, Шаған өзені арқылы өтетін жаяу жүргіншілерге арналған екі аспалы көпірге дейін жаяу жүргіншілер үшін  шағын көпір де  салынған. Зеленый – Мичурин бағытындағы шағын көпірдің ұзындығы – 344 метр. Ал  Садовый – Асан  бағытындағы шағын көпірдің ұзындығы – 52 метр.

Айшабибі  МӘМЕТ,

Зеленов  ауданы


«Надежда» шақырады!

Күні: , 49 рет оқылды

IMG_5124


Аузын айға білеген әлемдік компания-корпорациялардың өздерін тығырыққа тіреген экономикалық дағдарыс Оралдағы «Надежда» тігін-тоқыма фабрикасын сырт айналып өтпеді. Алдағы жылы құрылғанына жарты ғасыр толатын аталмыш кәсіпорын соңғы жылдары тапсырыстардың аздығынан дүрілдеген өндіріс орнынан қарапайым ательеге айнала жаздады.


«Надежда» фабрикасы бұрыннан-ақ көрпе-жамылғы жасап, төсек жаймасын, жұмыс киімдерін тігуге маманданды. Бірақ әлемдік дағдарыстың әсерінен өндіріс ошағындағылар тек азын-аулақ тапсырыстармен ілдебайлап, күнелтісін әрең айыратын жағдайға жетті.

Жұмыс орындары да азайды. Өткен жылы кәсіпорынға 20 жылға жуық басшылық жасаған Владимир Шмидт құрметті еңбек демалысына шықты. Енді фабрикаға жаңа басшылық келіп, өндірісті өрістетуге қам-қарекет жасауда.

— Қазір штатты екі есе көбейтіп, «Диана», «Белошвейка» фабрикаларында бұрын істеген тігіншілерді жұмысқа шақырудамыз. Өндірістің жұмысын қалпына келтіріп, тұрақты еңбек ырғағына түсірсек пе дейміз. Облыс басшылығы да қолдау білдіріп отыр. Еліміздегі кәсіпкерлікті дамыту бағдарламаларының көмек-қолдауымен өндірісті көтеруге ниеттіміз, — деді «Надежда» тігін-тоқыма фабрикасы ЖШС-ның директоры Замир Ғалымжанов.

Жаңа басшылық түрлі салалардағы компания, мекеме-ұйымдармен әріптестік орнатуға ұмтылуда. Атырау, Маңғыстау облыстарына да арнайы іссапармен барып, мұнайгаз компанияларымен келісімшарт жасауда. «Жас келсе, іске» демекші, жаңа басшылықтың ізденістері әзірге нәтижесіз емес. Оралдағы «Топан», «Алаугаз», «Нефтэк» сықылды бірқатар компаниялардан алғашқы тапсырыстар түсуде. Фабрика өңірдегі ұн және макарон өнімдерін шығаратын ірі кәсіпорындардың бірі «Желаев астық өнімдері комбинаты» АҚ-мен, темірбетон құрастырмаларын шығаратын «Гидромаш-Орион-МЖБК» ЖШС-мен бұрыннан қалыптасқан байланысын дамытуда. Жасыратыны жоқ, өңірдегі көптеген компания, өндірісшілер жұмыс киімдерін Ресейдің астанасы Мәскеу қаласынан дайын күйінде сатып алады. Алайда алыстан арбалаған киімнің тігістері не өлшемдері дұрыс болмай, жергілікті өндірісшілердің «есігін» қағуға мәжбүр болады.

— Бәсекелестік жағдайында отандық өндірісті қолдау жағын ойлауымыз керек. Өйткені өзімізде өндірілген өнімдерге бет бұру арқылы ұлттық экономиканы дамытамыз. Өнімдері өтімді кәсіпорын жаңа жұмыс орындарын ұсынады. Сондықтан өзімізде тігуге болатын киімдерді алыстан тасымалдамай-ақ, жергілікті кәсіпорындарға тапсырсақ, осының өзі елдегі жұмыссыздықты азайтуға, тұрғындардың әл-ауқатын арттыруға септігін тигізетіні сөзсіз, — дейді Замир Мыржақұлұлы.

Кәсіпорын басшысының пайымдауынша, батыс өңіріндегі кейбір мұнайшылар жұмыс киімдерін шетелден тасып әкеледі. Жергілікті өндірісшілердің қолынан келетін шаруаны өзге жат елдегілерге беру қисынсыз. 2003 жылы жұмыс киімін тігуге лицензия алып, содан бері киім тігумен айналысып келе жатқан «надеждалықтардың» іс тігуде тәжірибесі жеткілікті. Әдетте сырттан келетін киімнің бір стандартпен тігілетіні белгілі. Олардың кейбірінің аракідік жұмысшылардың дене бітімі ерекшелігіне қарай үйлеспей қалатыны кездеседі. Сондықтан жұмыс киімін жергілікті өндірісшіге тіктіргеннен ешкімнің ұтылмасы анық. Өйткені фабрикадағылар үйлеспеген киімді қайтадан жөндеп беруге әзір. Бүгінде «Надежда» кәсіпорны темір торға қамалғандарға да жұмыс беру жағын ойластыруда. Оралдағы екі түрмеге тігін машиналарын апарып, төсек-орын жабдықтарын тігуге тапсырыс беру жоспарланған. Кәсіпорын басшылығының діттегені – өндірісті көтеру.

— Әзірге Ресейге өнім шығара қойған жоқпыз. Бірақ ресейлік көрмелерге қатысып, өз өнімдерімізді насихаттаудамыз. Өңірге іргелес Саратов, Самара облыстарымен бұрынғы іскерлік байланыстарымызды жаңғыртуымыз керек. Кәсіпорын мамандарға сусап отыр. Өндірілетін өнім көлемін арттыру үшін тігіншілерді жұмысқа шақырамыз. Қазірдің өзінде бізде 30 тігіншіге жұмыс бар. Қалаға таяу Подстепный, Серебряков, Круглоозерный ауылдарынан да жұмысқа қабылдаймыз. Тігіншілердің жалақысы күнелтістеріне жеткілікті. Фабрика жүйелі жұмыс ырғағына көшкеннен кейін табыстары тұрақты болады, — деді Замир Мыржақұлұлы. Оның айтуынша, кәсіптік колледждерде тігінші-мотористке емес, киім пішушіге оқытады. Ондай мамандыққа оқыған қыз балалар өндіріс орнынан гөрі жеке ательелерді жағалайды. Өйткені фабриканың оларға ұсынатын жатақханасы жоқ. Әрі тігін шеберханаларында шалбардың балағын қайырудан басқа күрделі тапсырыстар болмайды, яғни жұмыстары жеңілдеу. Кәсіпорын жанынан тігіншілікке оқытатын орталық жоқ. Бірақ алдағы уақытта бұл мәселені шешу жағы ойластырылуда. Жазға салым шетелден мамандар шақыртып, тігіншілікке оқыту курстарын ұйымдастыру жоспарлануда.

Жалпы жеңіл өнеркәсіп саласы еш уақытта табысты болған емес. Кәсіпорынды техникалық жағынан жаңартпайынша, өндірілетін өнім көлемін ұлғайту мүмкін емес. Сондықтан өндірістегі ескі құрал-жабдықтарды да жаңарту көзделген. Өңірде қой, түйе жүнін өңдейтін «Надеждадан» өзге кәсіпорын әзірге жоқ. Фабрикадағылар меринос қойдың жүнінің келісін 50 теңгеден алуда. Ауыл-аудандардан қой жүнін, Маңғыстау облысы жағынан түйе жүнін тұрақты тапсыратындар бар. Жүн өңдеп, одан көрпе, жамылғы жасайтын кәсіпорын жүн өңдеу цехының жабдықтарын жаңартуды қолға алмақ.

Қазір «Надеждада» 83 адам жұмыс істейді. Көп ұзамай ондағы жұмысшылардың санын да, өндірілетін өнім көлемін де өсіру қағаз жүзінде қалмай, іс жүзінде орындалар. Өйткені фабрика ертеңге үмітін үкілеп отыр.

Гүлбаршын ӘЖІГЕРЕЕВА,

«Орал өңірі»


Артық құжат талап еткен

Күні: , 41 рет оқылды

PRI_0815


Жуырда «Нұр Отан» партиясы облыстық филиалы жанындағы сыбайлас жемқорлыққа қарсы іс-қимыл жөніндегі қоғамдық кеңестің мәжілісі өтті. Аталмыш қоғамдық кеңестің төрағасы Асхат Иманғалиев жүргізген жиында екі түрлі мәселе қаралды.


Алдымен «Нұр Отан» партиясы Қаратөбе аудандық филиалындағы «Сыбайлас жемқорлыққа қарсы іс-қимылдың 2015-2025 жылдарға арналған бағдарламасының» орындалу барысы, мұнан кейін облыстық энергетика және тұрғын үй-коммуналдық шаруашылығы басқармасының 2015-2016 жылдар ішіндегі жемқорлыққа қарсы әрекеті туралы тыңдалды.

«Нұр Отан» партиясы Қаратөбе аудандық филиалының төрағасы Асхат Шахаровтың баяндауынша, ауданда сыбайлас жемқорлықты болдырмау мақсатында бұқаралық сипаттағы дөңгелек үстелдер мен бірнеше акция ұйымдастырылған. Қарастырылып отырған кезеңде аудан бойынша бірде-бір сыбайлас жемқорлық фактісі тіркелмеген. Алдағы уақытта да сыбайлас жемқорлықтың алдын алу бағытындағы бағдарламалық жұмыстар жалғаса бермек.

Ал мемлекеттік қызмет істері және сыбайлас жемқорлыққа қарсы іс-қимыл агенттігі БҚО бойынша департаментінің Орал қаласының тұрғын үй-коммуналдық шаруашылық, жолаушы көлігі және автомобиль жолдары бөлімінің жұмысына жүргізген талдауы бойынша, аталмыш бөлімдегі мемлекеттік қызмет көрсету сапасы ақсап тұр. Атап айтқанда, мемлекеттік қызметті алушылардан стандартта көрсетілмеген құжаттарды талап ету фактілері анықталған. Мұндай мәселе тұрғындардың наразылығымен қатар сыбайлас жемқорлық тәуекелін туғызуы да ықтимал. Жалпы, 2015-2016 жылдары облыстық энергетика және тұрғын үй-коммуналдық шаруашылығы басқармасындағы бірнеше қызметкердің тәртіптік ісі қаралып, олардың бірқатары қызметіне сай емес деп танылған. Жиынға қатысушылар тарапынан аталмыш басқарма қызметкерлерінің жұмысына байланысты өзге де сын-ескертпелер айтылды.

Нұртас НАБИОЛЛАҰЛЫ,

«Орал өңірі»


Алты үміткер қатысты

Күні: , 33 рет оқылды

DSC_0132


Өткен  жексенбіде кейбір  мәслихаттарда  шығып  кеткен депутаттардың  орнына  сайлау  өткізілді. Сайлаудың  өту  барысы  жөнінде  дүйсенбі күні  Қазақстан  Орталық  коммуникациялық  қызметінің БҚО  филиалында  өткен  кезекті  баспасөз мәслихатында облыстық  сайлау  комиссиясы   төрағасының  орынбасары Вячеслав  Иночкин  баяндады.


Вячеслав Иночкиннің мәлімдеуінше, сайлау 14 бөлімшеде, нақтырақ айтсақ, жетеуі Бөрлі ауданында, жетеуі Орал қаласында өтті. Сайлау №12 Пугачев сайлау округі бойынша Бөрлі аудандық мәслихатында және №4 қалалық сайлау округі бойынша Орал қалалық мәслихатында оздырылды.

Аталмыш екі депутаттық  орынға  алты  үміткер қатысып, олардың барлығы да сайлау бюллетеніне енгізілді. Сайлауға барлығы 8099 адам қатысып, тізімге енгізілген сайлаушылардың 70,23 пайызы дауыс берді. Сайлау қорытындысы бойынша Пугачев сайлау округі бойынша «Конденсат» АҚ-ның бас инженері Нұрия Муфтеева сайланды. Оған 88,8 пайыз сайлаушылар дауыс берді. Ал Орал қалалық сайлау округі бойынша «Нұр Отан» партиясы Орал қалалық  филиалы төрағасының бірінші орынбасары Мұхтар Дәулетжанов сайланды. Аталмыш үміткерге сайлаушылардың 77,96 пайызы дауыс берді. Жаңадан сайланған депутаттардың екеуі де – «Нұр Отан» партиясының мүшелері.

Сайлау комиссиясына сайлау заңнамаларының бұзылуы туралы арыз-шағымдар түскен жоқ, бұған дауыс беру кезінде сайлау учаскелерінде болған 14 адам куә.

Олар депутаттыққа үміткерлердің сенімді өкілдері, саяси партиялар  мен  БАҚ  өкілдері.

 Айша  ӨТЕБӘЛІ,

«Орал  өңірі»


Ұлтын ұлықтаған азамат

Күні: , 35 рет оқылды

фото Халелова Рафхата (149)


Облыстық  қазақ  драма  театрында  өңірімізге танымал азамат,  тіл жанашыры,  КСРО  Денсаулық  сақтау  ісінің  үздігі, ҚР  Білім  беру  ісінің  құрметті  қызметкері  Мақсот  Бергеннің  70 жас  мерейтойына  орай  «Ұлтын  ұлықтаған  азамат»  атты  кеш өтті.


Мақсот Қабышұлының есімі  өңірімізге ғана емес, республикамызға да жақсы таныс. Ол – өз ісінің кәсіби маманы. Батыс Қазақстан медицина колледжін отыз жылға жуық басқарып, саналы ғұмырын облысымызда орта медицина мамандарын даярлауға арнады. Осы жылдар аталмыш оқу ордасының қабырғасынан көптеген түлек тәрбиеленіп шыққан болса, олардың кейбірі  Куба, Испания, сондай-ақ ТМД елдерінде еңбек етуде. Ал бүгінде ол білікті басшы ғана емес, отбасының тірегі, барша халықтың жанашыры болып, ел ағасына айналды.

1947 жылы Сырым ауданында дүниеге келген Мақсот Берген 1971 жылы Алматы мемлекеттік медицина институтын бітіргеннен кейін Оралға оралды. Облыстық дәріхана басқармасында фармацевтикалық инспектордан дәріхана жүйесінің басшылығына дейінгі жолдан өтті. Кейін Батыс Қазақстан медицина колледжін басқарды. Ол қалалық мәслихаттың депутаты болып, қоғамдық өмірге белсене араласты. Сондай-ақ  қазақ тілінің жанашыры ретінде де кеңінен танымал болды. «ҚР денсаулық сақтау ісінің үздігі», мемлекеттік «Шапағат» және өзге де көптеген медальдармен, алғысхаттармен марапатталды. Өткен жылы «Мейірім әуендері» атты кітабы жарық көріп, көпшілікке жол тартты.

Аталмыш шараға облыс әкімі Алтай Көлгінов арнайы қатысып, мерейтой  иесін  құттықтады.

– Мақсот Қабышұлымен осы өңірге келгелі таныспын, әлі күнге бірге жұмыс істеп келеміз.

Аз ғана жылдар ішінде оны қалалық мәслихаттың депутаты, қаланың нағыз жанашырларының бірі ретінде таныдым. Әрдайым ел-жұрт үшін түйткілді мәселелердің оң шешімін табуына ықпал жасап жүретін. Жол, көпір мәселесі, көлік қатынасы, абаттандыру жұмыстары, тұрғын үй салу және басқа да жобалардың басы-қасында өзі жүрді. Бұл Мақсот ағамыздың еңбекқорлығын, ел-жұртқа жанашырлығын көрсетеді. Ал денсаулық сақтау саласы – елдегі ең маңызды салалардың бірі. Өзіңіз тәрбиелеп, қанаттандырған медицина саласының мамандары қоғам үшін қашан да ауадай қажет екенін айтқым келеді. Мерейлі жасыңыз құтты болсын! Жеңгемізбен бірге бақытты ғұмыр кешіп, жиған-терген абыройыңыз өзіңізге ұзақ жыл қызмет етсін. Өзіңізді құрметтеп келген барша қауымға тек жақсылықтар тілеймін! – деді Алтай Сейдірұлы.

Бұдан кейін мерейлі жасқа орай дайындалған ел ағасының өмір жолынан сыр шертетін «Ақжарқын жүрек» атты бейнесюжет көпшіліктің назарына ұсынылды. Мерейтой кешінде Мақсот Бергеннің замандастары мен әріптестері сөз алып, кеш көрігін қыздырды. Шара одан әрі әдемі концертпен  жалғасын тапты.

Ләззат   ҒИНИЯТҚЫЗЫ

Суретті  түсірген  Рафхат  ХАЛЕЛОВ


Президенттік полктің мақтанышы

Күні: , 45 рет оқылды

нурхан


Таяуда облыс әкімінің атына ҚР Мемлекеттік күзет қызметіне қарасты нысандарды қорғау қызметінің (республикалық «Ұлан») «Айбын» президенттік полкі №0112 әскери бөлімінің командирі Т. Сәрсекеевтен хат келді. Онда жерлесіміз, яғни Теректі ауданының тумасы Нұрхан Хахармановтың Отан алдындағы борышын абыроймен атқарып жүргені жазылған. Өзіне жүктелген міндеттерді ойдағыдай орындап, түрлі әскери сайыста топжарып жүрген қатардағы жауынгер Н. Хахарманов – көпшілікке үлгі. Осындай сарбазды өсіріп-тәрбиелеп, іріктеп әскерге жібергені үшін әскери бөлім басшылығының Хахармановтың ата-анасына, мұғалімдеріне, қорғаныс істері құрылымдарына, жергілікті атқарушы билікке айтар алғысы зор.


Алдыңғы қатарлы әскери құрылым

Хатта жазылғандай, аталмыш әскери бөлімінің жеке құрамы Елбасының қауіпсіздігін тікелей қорғайтын және Қазақстан Қарулы күштерінің алдыңғы қатарлы әскери құрылымы болып табылады. Әр мемлекет үшін сыртқы қорғаныс пен ішкі қауіпсіздік өте маңызды. Әлемде болып жатқан лаңкестік жағдайлар біздің де еліміздің қауіпсіздігін күшейтуді талап етеді. Соған орай Ел-басының жыл сайын әскер қатарына шақырылатын жастарды өнегелі тәрбиелеп, саналарына Отанға деген перзенттік  парызды біржола сіңіру бағытында нақты тапсырмасы бар. Осы мақсатта ҚР Мемлекеттік күзет қызметі көктемгі және күзгі   шақырылымның үміткерлерін бірінші болып іріктеп, қазақстандықтарға және Мемлекет басшысына адал қызмет ететін ер-жігіттерді «Айбын» президенттік полкіне қарасты №0112 әскери бөлімінің қатарына жасақтайды.

— Мемлекеттік күзет қызметіне екінің бірі өте алмайды. Себебі оған іріктеу қатаң. Біріншіден, денсаулықта ешқандай кінәрат болмауы керек. Яғни осынау әскери қызметке баратын жігіттер өзгелермен бірге жалпы медициналық тексерістен өткеннен соң, тереңдетілген медбақылауға жіберіледі. Ал бойы 180 сантиметрден кем болмауы тиіс, салмағы да тиісті талапқа сәйкес келуі шарт. Одан кейін әскерге шақырылушының ата-ана, тума-туыстарынан бастап, ата-тегіне дейін тексеріс жүргізіледі. Нақтылап айтқанда, олардың атқарған қызметі, қылмыстық, әкімшілік жауапкершіліктерге тартылғандығы немесе тартылмағандығы, осының бәрі ескеріледі. Сондай-ақ әскерге шақырылушылардың зерделілігі, білімі, оқудағы, спорттағы жетістіктері де назарға алынады. Президенттік полк болғасын, ондағы сарбаздар Елбасының қасында жүретіндіктен, кейде шетелдерге шығатындықтан, оларға осындай қатаң талаптар  қойылады. Егер әскери қызметте жақсы жағынан көрінсе, онда келісімшарт (контракт) негізінде қызметін одан әрі қарай жалғастыруына мүмкіндік мол. Өзге әскери құрылымдармен салыстырғанда мұнда жалақы жоғары, түрлі жеңілдіктер бар және қажетті әлеуметтік жағдай жасалады.

Шақырылым сайын облысымыздан орта есеппен 800-дей жас әскерге алынса, соның жиырмаға жуығы мемлекеттік күзет қызметіне кетеді. Құдайға шүкір, біздің жақтың жігіттері жерге қаратып көрген емес. Әскери қызметін мінсіз атқаруына байланысты ондағы әскери бөлімдерден жылына 5-6 алғысхат келеді. Жалпы әскери құрылымдарда өтетін алқалы жиындарға барғанымызда жерлестеріміздің батылдығы, өжеттігі, төзімділігі, шымырлығы, дүниетанымының кеңдігі туралы жылы сөздер естіп, бір жасап қаламыз. Бұл енді бірінші кезекте ата-анасының және мұғалімдерінің тәлім-тәрбиесі екені анық. Содан кейін ұлтымыздың тұтастығын, жеріміздің бүтіндігін мұрат еткен батыр бабаларымыздың қанымен берілген қасиет деп білеміз, — дейді облыстық қорғаныс істері жөніндегі департаменті әскерге шақыру бөлімінің бастығы, подполковник Бауыржан Алтыаяқов.

Орындалған арман

Енді кейіпкерімізге келейік. Нұрхан өткен жылы Теректі ауданының Ақсоғым ауылдық округіндегі Үлкен Еңбек елді мекеніндегі орта мектепті бітіріпті.

Алдағы өмірін әскери саламен байланыстырғысы келіп, Алматыдағы әскери академияға құжат тапсырған. Әкесі Серік Сисенғалидың айтуынша, тек физика пәнінен төмендеу балл жинауына байланысты конкурстан өте алмай қалады. Өзге сынақтың бәрінен жоғары нәтиже көрсетіпті. Сөйтіп, былтыр Нұрханға курсант болу бұйырмаса да, күзгі шақырылымда ол әскер қатарына алынып, қатардағы жауынгер атанды.

Айта кетейік, Серік Хахарманұлы да әскери салаға қатысы бар жан. Он бес жылдай ауыл мектебінде алғашқы әскери дайындық (АӘД) пәнінен сабақ берген. Одан тәлім алған төрт-бес шәкірті бүгінде еліміздің Қарулы күштері қатарында қызмет етуде. Оның бірі – өзінің ұлы, Нұрханның ағасы Мерхан. 2012 жылы Алматыдағы әскери академияны тәмамдаған ол – қазір Мемлекеттік күзет қызметі президенттік полктегі қарауыл ротасы командирінің орынбасары. «Үш ұлым бар, — дейді Серік Хахарманұлы. — Тұңғышым Дархан БҚАТУ-ды эколог мамандығы бойынша бітірді. Қазір өзіммен бірге Атыраудағы Теңіз кен орнында жұмыс істеуде. Мектепте мұғалім болғанымда, Дархан мен Мерханға сабақ бердім. Нұрхан жоғары сыныпқа келгенде, басқа жұмысқа ауысып кеттім. Ізбасарларымның бәрі ер бала болғасын үйдегі бір бөлмеге спорттық құрылғылары бар швед қабырғасын орнаттым. Ауланың ішіне де белтемір және өзге спорттық құрал-жабдықтар жасадым. Содан болса керек, балаларымның бәрі салауатты өмір салтын ұстанатын, шымыр болып өсті. Сабақта да қатарының алды болды. Мәселен, Нұрхан 9-сыныпқа дейін биологиядан олимпиадаларға қатысып, жақсы нәтиже көрсетіп жүрді. Өскесін дәрігер боламын деп армандайтын. Артынан ағасы Мерханға еліктеді ме, әскери қызметке аңсары ауды. 11-сыныпта жүргенінде маған осы ойын айтып, әскери оқу орнына барғысы келетін жеткізді. «Егер шын жүрегіңмен әскери қызметкер болғың келсе, біз қарсы емеспіз. Бірақ медтексерістен өтуге, қажет құжаттарды жинауға өзің жүресің» дедім. Айтқандай, аудан орталығына, Оралға қатынап, барлық құжатын реттеген соң, Алматыдағы әскери академияға өзі барып қайтты. Таяуда хабарласқанда келісімшарт бойынша әскерде қалғысы келетінін айтты. Ортаншы балама қыдырып барған кезде оның үйде болатын уақытының аз екенін көрдім. Күн демей, түн демей, дабыл деп қызметке шауып бара жатады. Апталап, айлап полигонға кетеді. Нұрханға осының бәрін айттым. Ол «Бәріне шыдаймын», — деді. Сөздің шыны керек, қазір жұмыс табу оңай емес қой. Оны ауылға шақырғаныммен, ертең өзіне сай кәсіп табыла ма, жоқ па?! Ал әскери салада барлық жағдай жасалған. Толықтай мемлекет қамқорлығында боласың. Жалпы, өзім кеңес заманы кезінде Мурманск қаласында әуе қорғанысы күшінде Отан алдындағы борышымды өтедім. Сол кезде әскери бөлім басшылығы маған «Қал, осы салада қызмет жаса» деген ұсыныс айтқан еді. Бірақ ата-анам елге қайт дегесін, олардың сөзін жерге тастаған жоқ едім. Менің арманымды балаларымның     орындап жатқанына қуаныштымын».

АӘД кабинеті жоқ мектептен де әскерилер шығады

Жоғарыда айтып өткеніміздей, Үлкен Еңбек елді мекенінен түлеп ұшқан азаматтардың біразы бүгінде әскери-құқық қорғау құрылымдарында жемісті еңбек етіп жүрсе, біразы осы бағыттағы оқу орындарында тәлім алуда. Биыл төрт-бес оқушы әскери оқу орындарына құжат тапсырмақ. Ал әскери борышын абыроймен атқарып жүргендері қаншама. Осыған қарап біз бұл ауылдағы мектептің алғашқы әскери дайындық, дене тәрбиесі пәндері бойынша материалдық әлеуеті керім шығар деп ойлағанбыз. Алайда олай емес екен. Серік Сисенғалидың сөзіне қарағанда, ол 1997 жылы мектепке мұғалім болып келгенде, АӘД пәні сол жылдан бастап оқу бағдарламасына енген. Яғни бұрын бұл білім ұясы негізгі мектеп болуы себепті ешқандай оқулық, құрал-жабдықтар болмаған. Бұрынғы кеңшардан қалған газтұтқыштарды (противогаз) тауып, мектепке алдырды. Аудандық әскери комиссариатқа қайта-қайта барып, сабаққа ең керекті деген құрал-жабдықтарға қол жеткізді. Осылайша жоқтан бар жасап, балаларға алғашқы әскери дайындық пәнін жүргізді.

— Сол кездегі жағдай қазір жақсарып кетті деп айта алмаймын. Арнайы кабинетіміз жоқ. Құрал-жабдықтар жетіспейді. Мәселен, ашық сабақ, сайыстар ұйымдастырылатын болса, автоматтың макетін көрші Ақжайық мектебінен сұрап аламыз. Спорт залымыз өте тар. Мектебіміз ескі әрі бір қабатты болғасын, оның жағдайын бағамдай беріңіз. Дене шынықтыруға қажетті құралдармен қамтылып отырмыз деп те айта алмаймын. Көлік мәселесіне байланысты аудандық түрлі байқау, жарыстарға баруға мүмкіндігіміз бола бермейді. Дегенмен де өз тірлігімізді жасап келеміз. Жыл сайын «Мен әскерге дайынмын!» атты оқушылар арасында мектепішілік сайыс өткіземіз. Онда шәкірттер автоматты бөлшектеп жинаудан, мергендіктен, спорттық дайындықтан сынға түседі. Нұрхан осы сайыстардан бас жүлде алып жүрді. Көктемде, күн жылынғасын үш күн далалық оқу жиынын өткіземіз. Осы шараларда да Нұрхан ептілігімен, шымырлығымен, төзімділігімен көзге түсетін, — дейді аталмыш ауылдағы орта мектептің дене тәрбиесі және АӘД пәндерінің мұғалімі Нұржан Сұлтанов.

«Ұстазы жақсының ұстамы жақсы»

Бұл қанатты сөзді біздің кейіпкерімізге қаратып та айтуға болады. Кеше ауылда, мектебінде топ жарып жүрген Нұрхан – бүгінде президенттік полктің мақтанышы! Ол әскери сайыстарда «Үздік маман» деп танылып, «Үздік атқыш» атанып жүр.

Облыс әкімінің атына келген хатта жазылғандай, Нұрхан Серікұлы әскери бөлімге келген күннен бастап әскери өмірдің қыр-сырын тез меңгеруге үлкен ынта-ықылас танытқан. Отанға деген жоғары патриоттық сезімімен қарулас достарына үлгі-өнеге болуда. Жүктелген міндеттерді уақтылы әрі сапалы атқарады, жауынгерлік дайындық бағдарламасын өте жақсы меңгерген. Әскери жарғыларды жетік біледі, оларды қызметінде дұрыс қолданады. Үлгілі әскери тәртібі және жауынгерлік дайындықта, әскери қызметте қол жеткізген жетістіктері үшін рота және батальон командирлері тарапынан бірнеше рет марапатқа ие болды.

«Нұрханның осындай жетістіктерге қол жеткізуінің себебі, ең алдымен, отбасында алған өнегелі тәлімі, мектептегі мұғалімдерінің берген сапалы білімі мен саналы тәрбиесі және жергілікті қорғаныс істері жөніндегі департамент қызметкерлерінің іріктеу жұмысын ыждағаттылықпен өткізуі деп білеміз.

Алтай Сейдірұлы, сізге және сіз арқылы осындай сарбаздарды өсіріп-тәрбиелеуге, Отан қорғаушылар қатарына жіберуге атсалысқан тиісті құрылым басшыларына, жергілікті атқарушы билік өкілдеріне алғысымызды білдіреміз» деп хатын қорытындылаған «Айбын» президенттік полкі  №0112 әскери бөлімінің командирі Т. Сәрсекеев.

Сәкен МҰРАТҰЛЫ,

«Орал өңірі»


Әскерилер де асық атады

Күні: , 30 рет оқылды

????????????????????????????????????

????????????????????????????????????


Орал шаһарында орналасқан   Қазақстан Республикасы Ұлттық ұланы «Батыс» өңірлік қолбасшылығына қарасты 5517-әскери бөлімінде өткен әз-Наурыз мейрамына шақырулы қонақтар мен жауынгерлер қатысты.


Мерекелік  кеште  сөз алған  5517-әскери бөлімнің командирі, подполковник Асылбек Шайқамалов:

— Бүгін еліміздегі ең үлкен дәстүрлі мейрам Ұлыстың ұлы күні – әз-Наурызды атап өтіп отырмыз. Тарих қойнауынан бастау алған ұлық мерекені табиғаттың бізге берген үлкен сыйы деп білемін. Күн мен түн теңесіп, жарқын болашаққа қадам бастыратын көктемнің алғашқы күні де келіп жетті. Оның маңыздылығын, тарихын,  қадірін ескере отырып, қазіргі таңда ЮНЕСКО әлемдік деңгейдегі мейрамдардың қатарына қосқаны – біз үшін үлкен мәртебе. Бір кісідей жұмылып, кештің өтуіне атсалысып жатқан бөлімнің жеке құрамына алғыс білдіремін. Наурыздан наурызға жете берейік, наурыз мәңгілік болсын! — деп игі тілек тіледі.

DSC_0354Мерекеде әскери бөлімдер арасында қазақ күресінен, білектесу, кір тасын көтеру, тоғызқұмалақ, асық ату, арқан тартысудан жарыстар ұйымдастырылды. Жарыс соңынан  жеңімпаз-жүл-дегерлерге  бағалы сыйлықтар мен грамоталар табыс етілді.

«Батыс» өңірлік қолбасшылығының баспасөз қызметі


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика