Ұлыстың ұлы күні Наурыз мейрамы  шаһарымыздағы  Тәуелсіздік алаңында театрландырылған концерттік бағдарламамен басталды.

Алаңда келін түсіру, беташар секілді салт-дәстүрден қойылым көрсетіліп, өңірімізге танымал өнер жұлдыздары әсем ән әуелетіп, күмбірлеген күй шертті. Қыдыр ата бата беріп, Ұмай ана күллі жамандықтан аластады. Қаз-қатар тігілген киіз үйлер, көңілді әуен, үлестірілген табақ-табақ бауырсақ пен наурыз көже, «Sayat» этнотуризм орталығының арғымақтары мен қыран бүркіті мерекенің шырайын аша түсті.

Айта кетсек, Ұлыстың ұлы күні қарсаңында Орал қаласындағы әлеуметтік жағдайы төмен 400 отбасына азық-түлік таратылып, «Арба» қоғамдық бірлестігіне жаңа арбалар тарту етілген болатын. Сондай-ақ азық-түлік жәрмеңкесі өтіп, шаһардың көркі үшін 100 қарағай, 200 қайың көшеті отырғызылған еді.

Мейрамда облыс әкімі Алтай Көлгінов жиналған жұртшылықты құттықтап, ізгі лебізін жеткізді.

— Шығыс күнтізбесі бойынша жыл басы болып есептелетін 22 наурызда күн мен түн теңеледі. Наурыз – барша халқымыз үшін ең ұлық мереке. Бұл – береке-бірліктің, ырыс-ынтымақтың, кешірімнің мерекесі. Жуырда ғана өңіріміз Көрісу айт мерекесін атап өтті. Бұл мерекеде ағайын-туғандар бір-біріне деген өкпе-ренішін ұмытып, төс қағыстырады. Бір-біріне қонаққа барып, өкпесі болса, кешіреді. Мерекелік дастарқан жайылып, ақсақалдар төрге озып, батасын береді. Елбасымыз Нұрсұлтан Әбішұлы Назарбаевтың салиқалы саясатының арқасында жыл сайын қазақ елінде барша ұлт өкілдері Наурыз мейрамын қуаныш пен шаттықта тойлап келеді. Ұлттық құндылықтарды, озық салт-дәстүрлерімізді сақтай отырып, рухымыз биік, тәуелсіздігіміз мәңгілік болсын. Отбасыларыңызға амандық, бірлігіміз нығайған ынтымақты ел болайық, — деді өңір басшысы Алтай Сейдірұлы.

Күн райының ызғырық желі мен суықтығына қарамастан, оралдықтар мерекеге көп жиналды. Ақын Ақұштап Бақтыгереева, Орал қаласының әкімі Нариман Төреғалиев, облыстық мәдениет, архивтер және құжаттама басқармасының басшысы Дәулеткерей Құсайынов секілді танымал тұлғалар мерекеге ұлттық киіммен келді.

Салтанатты шара барысындағы түрлі-түсті отшашу мерекенің көркін қыздыра түсті.

Гүлсезім БИЯШЕВА,

«Орал өңірі»

Наурыз мерекесіне орай Орал қаласына қарасты Зашаған кентіндегі облыстық көпбейінді балалар ауруханасының алдына шырша мен қайың ағаштары отырғызылып, оған облыс әкімі Алтай Көлгінов қатысты.

Бұдан бірер жыл бұрын Оралдан Саратовқа қарай шығар жол қайтадан салынып, қара ағаштар сырылып тасталып, аурухана жағы жалаңаштанып қалған болатын. Міне, осы аумаққа ағаш отырғызу ісіне кент ардагерлері мен тұрғындар, Жәңгір хан атындағы Батыс Қазақстан аграрлық-техникалық университетінің ұстаздары мен студенттері атсалысты.

«Наурыз мерекесі келіп, тіршілік біткен оянып, жаңа жылымыз басталып жатыр. «Атаңнан мал қалғанша, тал қалсын» деген ұлағатты сөз бар. Осы игі дәстүрді биыл да жалғастырып, Орал қаласының бірнеше жерінде ағаш отырғызудамыз. Мұндай жұмыстар облыс аудандарында да ұйымдастырылады. Әрине, ағаш отырғызу өз алдына, оны күтіп-баптау керек. Сондықтан бұл жұмысты алдымен сол маңдағы мекеме-ұйымға тапсырамыз. Мысалы, бүгінгі шырша мен қайыңға облыстық көпбейінді балалар ауруханасы көз болуы тиіс. Уақтылы суарылмаса, қаралмаса, ағаш қурап қалады. Тұрғындар да бұдан шет қалмай, қамқор болса, жеріміз жасыл желекпен көмкерілері анық. Қалада жаңа шағын аудандар пайда болып, тез өсуде. Соның бәрінде де тал-терек отырғызу жоспарда бар. Ең бастысы, Ұлыс оң болсын, ақ мол болсын!» – деді Алтай Көлгінов.

«Облыстық көп бейінді балалар ауруханасының алдына тал-теректің отырғызылуы балалар үшін, өңіріміздің болашағы үшін атқарылып жатқан игі іс деп білеміз. Бұған ардагерлерден бастап облыс, қала әкімдерінің келіп қатысуы билік пен халықтың арасындағы бірлікті білдіреді. Жас шыбықтардың терек болып өсіп кетуі үшін үлкен күтім, қамқорлық керек. Жәңгір хан атындағы БҚАТУ бар, балалар ауруханасы бар және «Жайық таза қала» ЖШС мұны қараусыз қалдырмайды деп сенеміз», – деді тарихшы-ұстаз Сайлау Сүлейменов. Орал қаласы әкімдігінен түскен мәліметке қарағанда, шаһарда сол күні 300 түп тал-терек отырғызылды. Ағаш көшеттерін алуға 2 млн. 890 мың теңге жұмсалды.

Ғайса БӘЙМЕН

Наурыздың 20-сы күні облыс әкімі Алтай Көлгінов «Звезда» мейрамханасында болған қайырымдылық шарасына қатысты. Мейрамхана алдында көмекке мұқтаж жандардың үйлеріне баратын автокеруен жол тартты.

— Ұлыстың ұлы күні қарсаңында «Мейірімді көктем» жобасы аясында қайырымдылық шаралары басталуда. Бүгін Орал қаласындағы әлеуметтік жағдайы төмен 400 отбасына азық-түлік таратылады. Сонымен қатар «Арба» қоғамдық бірлестігіне жаңа арбаларды тарту етеміз. Басты мақсат – мұқтаж жандарға көпшілік болып көмектесу, қайырымдылық жасау. Көктем бойына осындай игі шаралар жалғасын табады, – деді облыс басшысы Алтай Көлгінов.

Керуен қозғалғаннан кейін «Звезда» мейрамханасында қайырымдылық балы ұйымдастырылды. Қайырымдылық кешіне құны 20 мың теңгеге бағаланған билетті салып алған кәсіпкерлер, жергілікті мәслихаттың депутаттары мен мемлекеттік қызметкерлер және шаһар тұрғындары қатысты.

«Негізінен, Наурыз мейрамын кеңінен насихаттамақпыз. Салт-дәстүрімізді жаңғыртуға баса көңіл бөлінетін қайырымдылық балына 200-ден астам адам қатысуда. 400 отбасына еріктілер тобы тарататын азық-түлік себетінде шай, өсімдік майы, қант, қарақұмық, күріш бар. Ал «Арба» қоғамдық бірлестігіне алты арба берілді. Алдағы уақытта мүмкіндігі шектеулі жандар үшін Алматы қаласынан тапсырыспен тағы да он арбаны алдырмақпыз. Жаңа сипаттағы қайырымдылық кешін БҚО Қазақстан халқы ассамблеясымен бірге  ұйымдастырудамыз», – деді БҚО Азаматтық альянсының жетекшісі Айгүл Түркина.

Нұртай ТЕКЕБАЕВ,

«Орал өңірі»

Гүлмира БАТПАҚҰЛОВА,

«Арба» қоғамдық бірлестігінің төрайымы:

– Биыл облыс әкімі Алтай Көлгінов ұсыныстарымызды құп алып, «Мейірімді көктем» акциясын іске қосты. Осы жоба аясында үш ай бойына қайырымдылық шаралары ұйымдастырылады. Біздің бірлестік мүшелері ұсынған жобалар облыс әкімдігінің қолдауымен оңынан жүзеге асуда. Өңіріміздің қайырымды азаматтары мүмкіндігі шектеулі жандарға қолұшын созып жатқанына ризашылығымды білдіргім келеді.

Әділбек ИБРАЕВ,

Жәңгір хан атындағы БҚАТУ-дың студенті:

– «Мейірімді көктем» жобасы аясында қайырымдылық шарасына атсалысып жатқаныма қуаныштымын. Билет құнынан түскен ақшаға сатылып алынған азық-түлік себетін кірісі аз жанұяларға тарту ету үшін белгіленген мекенжайларға көліктермен барамыз. Орал қаласының көшелерімен жүретін қайырымдылық керуеніне көмектесуге өз еркімізбен қатысудамыз.

Қала әкімдігінің биылғы  17 наурыздағы №828 қаулысына сәйкес,  ағымдағы  жылдың  25 наурыз, 1, 8, 15, 29 сәуір күндері қаланы абаттандыру және санитарлық тазалықты сақтау бойынша сенбілік күндері деп белгіленіп, алдағы тазалық айлығында атқарылатын жұмыс жоспарлары жасақталған. Бұл туралы кеше Қазақстанның Орталық коммуникациялар қызметі облыстық филиалының алаңында баспасөз брифингі өтіп, Орал қаласының абаттандырылуы, көктемгі санитарлық тазалық жұмыстары туралы айтылды.

Брифингке  Орал қалалық тұрғын-үй коммуналдық шаруашылық және тұрғын үй инспекциясы бөлімі абаттандыру секторының меңгерушісі Мирас Мүлкәй, Орал қалалық жергілікті полиция қызметі бөлімінің басшысы Данияр Рақышев,  Орал қаласының бас архитекторы Темірболат Шәкіржанов қатысып, алдағы атқарылатын жұмыстар турасында жоспарларымен бөлісті.

– Орал қаласының әкімдігі жыл сайын қала аумағының тазалығы мен абаттандырылуы  үшін тазалық айлықтарын жариялап, сенбіліктер өткізеді. Осындай мақсатта өткен жылы сәуір, мамыр, тамыз, қыркүйек және қазан айларында сегіз  рет сенбілік жұмыстары ұйымдастырылды. Тазалық жұмыстарына және қаланы көгалдандыруға 30 696 қала тұрғыны атсалысып, 618 мекеме жұмылдырылған болатын. Сондай-ақ  Оңтүстік, Алмазов, Некрасов, Мөңкеұлы көшелері мен Зашаған ауылында, Еуразия даңғылында 6746 түп,  ал Еуразия көшесі мен Тәуелсіздік көшесінен Жұлдыз шағынауданына дейін 500 түп түрлі  көшеттер отырғызылды.  Сенбілік уақыттарында 6022 ағаш әктелді.  Биыл да осы дәстүр жалғасын тауып, қаланы көгалдандыру жұмыстары атқарылатын болады. Тазалық айлығы кезінде қалалық және аулаішілік аумақтарда көшеттер отырғызу, балалар аулалары мен спорттық алаңдарды жөндеу, шағын архитектуралық мүсіндерді сырлау секілді бірнеше жұмыстар жоспарлануда. Оның ішінде  биылғы жылы 17 ауланы абаттандыруға 500 млн. теңге, екі тынымбақты жөндеуге және абаттандыруға 160 млн. теңге қаражат бөлініп отыр. Барлық қала тұрғынын сенбілік жұмыстарына белсене араласып, қала тазалығын сақтауға шақырамыз, – деді Мирас Мүлкәй.

Ал өз кезегінде Орал қалалық жергілікті полиция қызметі бөлімінің басшысы Данияр Рақышев қала немесе елді мекен аумағында тазалық ережесін бұзғандар, инфрақұрылым нысандарына, ағаш көшеттеріне зиян келтіргендер әкімшілік жауапқа тартылатындығын атап өтті. Заңбұзушылық жасаған жағдайда ҚР Әкімшілік кодексінің 505-бабына сәйкес  жеке тұлғалар 20 АЕК (45380 тг), шағын кәсіпкерлік субъектісі немесе коммерциялық емес ұйымдар 30 АЕК (68070 тг), орта кәсіпкерлік субъектісі 40 АЕК (90760 тг), ал ірі кәсіпкерлік субъектісі  100 АЕК (226 900 тг) көлемінде айыппұл төлейді. Айталық, өткен жылдың 12 айында Орал қалалық ЖПҚ қызметкерлерінің ықпалымен 1 114 құқықбұзушылық анықталды. Оның ішінде  1075 адамға ескерту жасалған.  Осы уақытқа дейін 1 млн. 338 мың 351 теңге көлемінде әкімшілік айыппұлдың  596001 теңгесі өндірілген.

Бұдан кейін   Орал қаласының бас архитекторы Темірболат Шәкіржанов қала аумағындағы және автокөлік  жолдары бойындағы сыртқы жарнамалар, сондай-ақ заңсыз орнатылған жарнамалар турасында ақпараттармен бөлісіп, қала аумағын көркейту және ғимараттардың сыртқы пішіндерінің үлгілік жұмыстары тұрғын-үй коммуналдық шаруашылық, жолаушылар тасымалы және автомобиль жолдары бөлімімен бірлесіп атқарылатынын жеткізді.

Жиын соңында спикерлер журналистердің сұрақтарына жауап берді.

Ләззат  ШАҒАТАЙ,

«Орал  өңірі»

Суретті  түсірген Темірболат  ТОҚМАМБЕТОВ

Конкурстық  негізде  және  Қазақстан  Республикасы  Денсаулық сақтау  министрлігінің  келісімімен  Қанат  Дүйсенбайұлы  Төсекбаев  Батыс  Қазақстан  облысы  денсаулық  сақтау   басқармасының  басшысы  болып  тағайындалды.

Қанат ТӨСЕКБАЕВ – 35 жаста, білімі жоғары. Қазақ мемлекеттік медициналық университетін 2005 ж., Ганновер жоғары медицина мектебін  2008 ж. бітірген. АҚШ-та қоғамдық денсаулық сақтау мамандығы бойынша іс-тәжірибеден өткен. Қоғамдық денсаулық сақтау магистрі.

Еңбек  жолын  «Жедел жәрдем»  қызметінде  фельдшер  болып  бастаған.

2008-2009 жылдары «Ұлттық медициналық холдинг» АҚ басқарма басшысының кеңесшісі;

2009-2010 жылдары «Астана медициналық университеті» АҚ бас маманы;

2010-2013 жылдары Астана қалалық «Жедел жәрдем» стансасында бас дәрігер;

2013-2015  жылдары  «Санаторий  Алматы» АҚ  басшысы.

2015 жылдан бері Алматы қалалық балалар инфекциялық ауруханасының бас дәрігері болып қызмет істеді.

Қанат Дүйсенбайұлының емдеу ісінде, денсаулық сақтау саласында, басқарушылық  жұмыста  іс-тәжірибесі,  ұйымдастырушылық  қабілеті  бар.

Орал  қаласындағы  М. Ықсанов  көшесінің  бойында  Наурыз  мерекесіне орай ауыл шаруашылығы  және  азық-түлік  өнімдерінің  жәрмеңкесі  өтті.  Жәрмеңкеге қала және  облыс  аудандарының   тауар  өндірушілері  қатысты.

–  Бүгінгі азық-түлік жәрмеңкесіне 51 сатушы өз тауарларын шығаруға ниет білдірген еді. Алайда қазір 80-нің үстінде сатушы келді. Жәрмеңкеге сегіз аудан қатысуда. Қазталов, Ақжайық аудандары ет, Зеленов ауданы бал, май өнімдерін әкелді. Теректі ауданынан өсімдік майы келді. Тауарлар базар бағасымен салыстырғанда 10 пайыздай арзан. Соғым біте келгесін болар, негізінен ет өнімдеріне сұраныс жоғары екені байқалып тұр. Балық тоғандардан тікелей әкелінуде. Сиыр етінің келісі 1200, қой еті 1100 теңгеден сатылуда, – деді қалалық кәсіпкерлік бөлімінің сектор  меңгерушісі  Қайрат  Төлеуішов.

– Мұндай жәрмеңкелердің жиі ұйымдастырылғаны тұрғындар үшін тиімді. Азықтүлік бағалары көңілден шығады. Базардағымен салыстырғанда әлдеқайда арзан. Жылқының таза етінің келісін 1500 теңгеден сатып алдым, – дейді қала тұрғыны  Владимир Яковлевич.

Нұртас  НАБИОЛЛАҰЛЫ,

«Орал  өңірі»

«Нұр Отан» партиясы облыстық  филиалының  ғимаратында  «Тәжікстан-Ауғанстан шекарасындағы әскери қақтығыстарға  қатысушылардың  ардагерлер  одағы»  қоғамдық  бірлестігінің ұйымдастыруымен ауқымды  шара  өтті.

Қазақстан Республикасы Қарулы күштерінің 25 жылдық мерейтойы аясында жастарға патриоттық тәрбие беруді мақсат еткен шараға жауынгер-интернационалистер, қоғамдық ұйым мүшелері мен студент жастар қатысты.

Басқосуда республикалық қоғамдық бірлестіктің төрағасы Мұрат Мұхамеджанов еліміздегі Тәжікстан-Ауғанстан шекарасындағы әскери қақтығыстарға қатысушылар, оларға мемлекет тарапынан жасалып жатқан жағдайлар  туралы  баяндап  берді.

Шара барысында Мұрат Нұрахметұлы біздің облыс бойынша бірлестік филиалының төрағасы болып сайланған Дамир Желмұхановты көпшілікке таныстырды. Сонымен қатар Тәжікстан-Ауғанстан шекарасындағы әскери әрекеттерге қатысушы жерлесіміз Юрий Полунинге «Ерекше қызметі үшін» төсбелгісін табыс етті.

– Қазақстан Республикасының 1995 жылдың 27 ақпанында шыққан «Ұлы Отан соғысына қатысушылар мен мүгедектерді қорғау және жеңілдіктер туралы» заңы бар. Ауған соғысына қатысушылар мен Чернобыль апатының салдарын жоюға қатысқандар Ұлы Отан соғысына қатысушылармен теңестірілгендіктен, мемлекеттік жеңілдік алып отыр. Олар өз кезегінде баспана салу үшін жер алып, сапалы медициналық қызметті пайдалануда. Ал еліміз тәуелсіздікке қол жеткізген тұста Тәжікстан-Ауғанстан шекарасында әскери борышын өтегендер мұндай мүмкіндіктерден әлі күнге дейін тыс қалып келді. Дегенмен бұл олқылықтар да біртіндеп өз шешімін табуда, – деді республикалық бірлестік  төрағасы  Мұрат  Мұхамеджанов.

Еске сала кетейік, ТМД елдерінің 1992 жылдың 15 мамырында қабылданған «Ұжымдық қауіпсіздік туралы» халықаралық келісімшартына сәйкес, қазақ елінің бітімгерлік батальоны 1992-2001 жылдар аралығында Тәжікстан-Ауғанстан шекарасында қауіпті топтарға батыл тосқауыл қоюға жұмылдырылды. Қазақ батальонының жауынгерлері өз азаматтық борыштарын абыроймен  атқарған  болатын.

Нұрбек  ОРАЗАЕВ,

«Орал  өңірі»

Қадыр Мырза Әли орталығында домбыра жасаушы шеберлердің республикалық «Үкілі домбыра» атты байқау-бәйгесінің екі дүркін лауреаты, дүлдүл домбырашы Едіге Нәбиевтің шығармашылық кеші өтті.

Кеш күйшінің жалындаған жастық шағынан, әсіресе, спорт саласында атқарған қызметтерінен сыр шертетін бейнебаянды тамашалаудан басталды. Сан қырлы өнер иесінің он жылдық мектепті бітіргеннен кейін А. Пушкин атындағы гуманитарлық институттың дене шынықтыру факультетін тәмамдап, спорт саласында 20 жылдай еңбек еткенін, жеңіл атлетикадан облыстың бірнеше дүркін чемпионы атанғанын, Саратов, Астрахан, Алматы қалаларында олимпиада резервтерін дайындайтын жаттықтырушы болғанын бүгінде біреу білсе, біреу білмейді.

Ресейдің Астрахан облысына қарасты Қарабайлы ауданының Басты ауылында дүниеге келген Едіге Нәбиев қазақ күйлерін тал бесіктен құлағына сіңіріп өскен. Әкесі Қуанғали Нәбиұлы ауылда мал дәрігері болып қызмет жасаса, анасы Қаным Өтешқызы үй шаруасымен айналысқан. Қуанғали ақсақал ел сыйлайтын, он саусағынан өнері тамған шеберлігімен де аты шыққан жан екен. Ол ер-тұрман, ат әбзелдерін жасаумен қатар қолы босаған кезде бала-шағасының алдында атақты күйшілердің танымал күйлерін нақышына келтіре орындағанды, Махамбет, Шернияз жырларын жырлағанды ұнатқан.

Едіге Қуанғалиұлы өзінің өнер жолына байланысты кештің жүргізушісі, домбырашы-ұстаз Асқар Кенжеғалиевтің қойған сауалдарына жауап бере отырып, Әлікейдің күйі «Қоңырала», халық күйі «Ақсақ құла», Қауеннің күйі «Сәнау», сондай-ақ Қазанғап, Дәулеткерейдің күйлерін тарихын әңгімелей отырып, орындап берді. Кеш барысында Едіге Нәбиев жасаған домбырамен өнер көрсетіп, республикалық байқаулардан бас жүлде алып, шетелдерде өткен халықаралық өнер сайыстарына қатысқан жас домбырашылар сахна төріне көтеріліп, күмбірлете күй төкті. Кеш иесінің жастық шағының куәсі, замандасы Төлеген Сафуллин, ақын Айтқали Нәріков, Құрманғазы атындағы саз колледжінің директоры Нұржан Сертеков және апасы Мәстура Қуанғалиқызы өнер иесіне деген ыстық лебіздерін білдірді.

— Қайнатып жатқан сабын, құрттарын сұқ көзден қызғыштай қорғайтын апайлар сияқты Едіге де күй әлеміне оңаша, құпия шомылып, бүкіл сана-болмысы қаныққаннан кейін көріне бастады. Бақсақ, солақай екен. Қақпақты мысықша тырнамай, барабанша соқпай, аталарымыздан қалған машық қағыстарды барынша сақтаған, дәстүрге адал өнерпаз болып қалыптасқан екен. Қазақ елінің қай түкпірінің күйін орындаса да, сол қалыптасқан жүйені қатаң сақтайды. «Жамандар жақсымын деп айқайлайды, жақсылар жақсымын деп айта алмайды» дегендей, Едігенің болмыс-табиғатында өзін дәріптеу мүлде жоқ. Сондықтан ұлттық мұраның алтын көзі, бұлағы қолымызда тұрғанда барын алып қалу – парызымыз, — деді Төлеген Сафоллаұлы.

Едіге Қуанғалиұлының өнердегі үзеңгілес інісі Нұржан Орынғалиұлы Құрманғазының «Ілмесін» орындап берді. Кеш иесіне облыстық мәдениет, архивтер және құжаттама басқармасының басшысы Дәулеткерей Құсайыновтың алғысхаты табысталды.

Нұртас  НАБИОЛЛАҰЛЫ,

«Орал  өңірі»