Жақында облыстық мәслихаттағы «Нұр Отан» партиясы фракциясының мүшелері Елбасы Үндеуін талқылау мақсатында бас қосты.

«Нұр Отан» партиясының облыстық филиалы төрағасының бірінші орынбасары Серік Сүлеймен жаңа реформаға орай конституциялық заңдарға енетін түзетулер мен өзгерістердің маңызына тоқталды. Оның айтуынша, 26 ақпанға дейін облыстық мәслихат депутаттары Елбасы Үндеуін тұрғындармен кездесулерде кеңінен талқылап, онда айтылған ұсыныс-пікірлерді жұмыс тобына жеткізулері керек. «Депутаттар белсенді болуы тиіс. Жалпы 40-қа жуық заңға өзгеріс енеді. Заңдардың жаңа баптары жөнінде сайлаушылар толық құлағдар болсын», – деді Серік Сүлеймен.

– Міндетті түрде тұрғындарға реформаның маңызын түсіндіреміз және бірге талқылайтын боламыз. Кейін сайлаушылар тарапынан ұсыныстарды жинаймыз. Билік тармақтары арасындағы кейбір өкілеттіліктің ауысуы ҚР Парламенті мен Үкіметінің жауапкершілігін күшейте түседі. Бұл – Елбасы бастамасымен тәуелсіздік жылдарында сәтті жүргізілген реформалар жемісі, – деді облыстық мәслихат депутаты Льяна Тұрсынова.

Нұртай ТЕКЕБАЕВ

Алматыда өтіп жатқан қысқы универсиада ойындарының төртінші күні, яғни осы аптаның бейсенбісі Қазақстан құрамасы үшін жүлде жауған күн болды. Екінші желтоқсан күні ел қоржынына төрт алтын, үш қола медаль түсті.

Бейсенбіде алғашқы командалық есепте үшінші алтын жүлдені биатлоншы қызымыз Галина Вишневская жеңіп алды. Іле-шала могул сайысынан сынға түскен Юлия Галышева Қазақстан қоржынына универсиаданың төртінші алтынын салды. Шаңғымен спринтерлік жарыстан Иван Люфт те алтыннан алқа тақты. Көп ұзамай фристайлшы Дмитрий Рейхерд Қазақстанға универсиаданың бесінші алтын медалін алып берді.

Сондай-ақ осы сайыста қазақстандық тағы бір спортшымыз Павел Колмаков қола жүлдеге ие болды. Бұған қоса бейсенбіде биатлоншы Роман Еремин Қазақстан қоржынына қола медаль салды. Сондай-ақ қыздар арасында шаңғыдан жеке спринтте классикалық мәнерде сынға түскен Анна Стоян қола жүлдеге қол жеткізді.

*       *        *

Кеше қазақстандық фристайлшы Юлия Галышева Алматы универсиадасындағы екінші алтын медалін мойнына ілді.  Бұл – универсиада ойындары барысында Қазақстан құрамасының қоржынына түскен жетінші алтын жүлде.  Сонымен қатар фристайлшы Дмитрий Рейхерд Қазақстан қоржынына тағы бір алтын медаль салды.

Рейхердтің алтыны Қазақстан құрамасы үшін сегізінші, ал Диманың өзі үшін осы жарыстағы екінші алтыны. Ал бұл жарысқа қатысқан Павел Колмаков та екінші мәрте қола жүлдегер атанды.

Қазақстан құрамасы бес күн ішінде универсиадалар тарихында жеңіп алған жүлделер саны бойынша өз рекордын жаңартты.

Алматыда өтіп жатқан дүниежүзілік додада еліміздің студент спортшылары сегіз алтын, екі күміс және сегіз қола медаль иеленді. Осылайша, Қазақстан құрамасы 18 медальмен жалпы есепте екінші орынға тұрақтады. Бірінші орында 40 медальмен Ресей спортшылары тұрса, ал Жапония құрамасы 16 медальмен әзірше үшінші орында.

Нұрбек ОРАЗАЕВ,

«Орал өңірі»

Осыдан біразырақ күн бұрын Теректі аудандық мәдениет үйінде жаңа кинозал ашылды.

Бұған дейін тұрғындар мерекелік шараларға арналған концерт залына барып, фильмдерді де тамашалайтын еді. Жөндеуден өтіп, көз сүйсінер келбетке ие болған мәдениет үйінде кино көретін бөлек залдың ашылуы теректіліктер үшін айтулы жаңалық болды. Бүгінгі таңда келушілердің саны едәуір көбеюде. Кинозал әзірше 20 адамды қамтиды. Билет құны да әлдеқайда арзан, бар болғаны 100 теңге. Аудандық мәдени-демалыс орталығының директоры Мәулет Жұбатовтың айтуынша, алдағы уақытта кинозалды кеңейтіп, көрермен орындықтарының санын арттыру жоспарланған. Сонымен қатар аудан әкімі Мұрат Мұқаевтың қолдауымен болашақта заман талабына сай киноны 3D форматта көрсету қолға алынбақ. Мәдениет саласындағы игілікті істерге тұрғындар қолдау танытып, жаңа кинозал әрдайым көрерменге толы болады  деген  сенімдеміз.

Әділет  ОРЫНБАСАРҰЛЫ,

Теректі   ауданы

Қазақ жүректі жігіттерін бөріге теңейді. Бөрі ақпанның шытырлаған аязы мен ақ түтек боранында қасқайып қайраттана түседі екен. Бүгінгі кейіпкерімді көрген сайын менің көзіме қуаты толысып, қайратына мінген көк бөрі елестейді. Кейде жапандағы Қаройда жалғыз қыстаған, қанжарын төріне іліп отырған Махамбет пе деп қаламын. Мінезі тік, иілуді білмейтін, жарқ еткізіп алмас қылышын суырып алатындай кейіпте жүреді. Бөрісі азайып, түлкісі көбейген заманда бұл азамат бағзы, мәрт заманның  жәдігері ме дерсің. Бұл кейіпкеріміз – Шыңғырлау ауданы Белогор ауылдық округіне қарасты Сарқырама бұлағының баурайына отауын тіккен, жапандағы жалғыз үйі бар Мұхамеджан Естеміров. Ортадан жоғары бойы бар, шашы иығына түскен, дене бітімінен қайратты жігіт екені көрініп тұрады. Қысты күнгі саф алтындай таза ауада өзінің жылқы шаруашылығын дөңгелетіп ұстап отыр. Жапандағы жалғыз үйге қыста техника қатынай алмайды.

Айнала құрсаулаған қалың қарды, гуілдей соққан боранды елемей, өзінің «Боран» шанасын ойқастатып, зулатып бара жатады.

Ауылдастарының айтуы бойынша, Мұхамеджан қамқорлығы мен қайырымы мол жан екен. Жақында ғана бір жылқыны сойып, ауылдастарына тегін таратып бергенін естіп, білдік. Талай техника жүре алмайтын жерлерге «Боран» шанасына мініп, қолұшын беруге келіп кеткендігі ел аузында жүр. Ұшқан қарға, жортқан аң жүрмейтін көз ұшында қара ноқат көрінетін маңдалада қалған жолаушыға да талай мәрте қолұшын бергенін естіп жүрміз. Жарығы сөнген ауылдардан хабар ала сала, «Боран» шанасымен ойқастатып жетеді екен. Кей кездері мыңғырған малы бола тұра, өзге түгіл, өзіне соқыр тайын қимайтын сараң байлардан гөрі көк бөрідей түн қатып жүрген еліне қайырымы мол азаматтар көбейсе ғой дейсің. Атам айтатын: «Бір қолмен бергеніңді, екінші қолың білмей қалсын» деп. Мұхамеджан алған-бергенін айта бермейтін, мақтанға жоқ жан екен. «Алғаннан гөрі бергеннің сауабы көп болады», – дейді. Жұртыңа керек адам болғаныңды сезіну қандай  бақыт!

Қуаныш   ЕСЕНОВ,

Шыңғырлау   ауданы

«Орал өңірі» газетінің биылғы 19 қаңтардағы №6 санында журналист Есенжол Қыстаубаевтың «Шаруалар сырымдық тәртіп сақшыларына неге өкпелі?» атты мақаласы жарияланды. Оның жазылуына редакцияға аяқтай келген сырымдық шаруалардың арыз-шағымдары түрткі болды. Мақалада Сырым ауданында жыл өткен сайын өршіп бара жатқан мал ұрлығына байланысты мәселе көтерілген еді. Ұрлықтың өршігені өз алдына – құқық  қорғау құрылымдарының тарапынан оның алдын алу, тосқауыл қою былай тұрсын, ұрлықты ашу, ұрыларды құрықтау, сот  арқылы келтірілген материалдық шығынды өтеу жәйі тіпті сын көтермейді деп шағынады шаруалар мен  қарапайым ауыл тұрғындары.  Содан бермен қарай, облысымыздың түкпір-түкпірінен газетке қоңырау шалушылар көбейді. Олардың да күйініп айтатыны, қиналып баяндайтыны – сол ауыл адамдарының арызы ізінде газет көтерген — мал ұрлығы. Міне, бүгін де газетімізге аталмыш мақала жарияланғаннан кейін келіп түскен бір топ арыздың жай-жапсарын олардың өтініші бойынша жариялауға мәжбүр болып отырмыз. Ал есімін мақаламыздың тақырыпшасына алып отырған Бисенғали Сағындықов деген азамат сонау қиырдағы Қаратөбенің Егіндікөлінен  ат терлетіп, газет редакциясына аяқтай, арнайы арыздана келді.

Оқырмандарымыздың қаперіне сала кетейік, аталмыш мақаланы жариялай отырып, оны облыстық прокуратура мен облыстық ішкі істер департаменті басшыларының назарына жолдағанбыз. Көп кешікпей, олардан төмендегі мазмұндағы жауаптар келді. Үтір, нүктесі мен стиліне қол тигізбей, арыз иелері мен оқырмандарымызды қаперлесек, ол жауаптар бүйдейді: — «Орал өңірі» газетінің бас редакторы Б. Ғұбайдуллинге. Сіздің Сырым ауданы бойынша мал ұрлығының өршуі туралы арызыңыз (мақала ғой. Ред.) облыс прокуратурасымен қаралды. Сіздің келтірген уәждеріңізді ескеріп, аталған істерді дұрыс шешуге қажетті және жеткілікті мән-жайларды жан-жақты, толық және обьективті зерттеуге заңда көзделген барлық шаралар қолдануда. Қылмыстық істердің тергеу барысы бақылауға алынды. Осы жауаппен келіспеген жағдайда жоғарғы тұрған прокуратураға немесе сотқа шағымдануға құқығыңыз бар екендігін түсіндіремін. Облыс прокурорының міндетін атқарушы Н. Дүйсенбаев». Осы хатқа іле-шала облыстық ішкі істер департаментіне қарасты жергілікті полиция қызметінен де ресми жауап жетті. «Сіздің 2017 жылғы 20 қаңтардағы шығыс №19 хатыңызды жергілікті полиция қызметінің басшылығы қарады. Аталған деректер бойынша қызметтік тексеру тағайындалып, тиісті шаралар қолданылатынын хабарлаймыз. Жергілікті полиция қызметінің бастығы М. Ғабдуллин». Бұдан басқа бізге келіп жатқан хабарларға қарағанда (сырымдық шаруалардың айтуынша), мақалада көтерілген мәселелерге байланысты тергеп-тексеру жұмыстары басталып, жүріп жатқан сыңайлы. Олардың нәтижесі жайында оқырмандарымызды алдағы күндерде міндетті түрде хабардар етіп отырмақшымыз. Әрине, ол жауаптар құқық қорғау орындарынан тергеп-тексерудің қорытындысы туралы ресми жауаптардың редакцияға келіп түсуіне тікелей байланысты болатындығын естен шығармайық, құрметті оқырман.

Енді аталмыш мақала жарияланғаннан кейін редакцияға «нөсерлетіп» түскен арыз-шағымдарға келейік. Бұлдырты ауылының тұрғыны Мерген Жанбаев былай деп жазады: «2016 жылы маусым айының 5-інде малымды өрістен айдап әкелгеннен кейін үйдің жанындағы қораның іргесіне қалдырдым. Сол жерде жататын. Таңертең өргізейін деп барсам, 2 бас ірі қарам жоқ. Басқа малдармен ертерек өріп кетті-ау деп ойладым. Кешке қарай таба алмадым. Қырдан-ойдан іздеп, шарламаған жерім қалмады. Содан жоқ. Ауылдағы учаскелік полицияға арыз бердім. Бірақ әлі күнге дейін хабар жоқ. Осы өткенде ауылдың малдарын ұрлаған ұрылар ұсталды деп естідім. Менің малыма ұры алыстан келген жоқ, солар болуы да мүмкін. Мұны полиция дұрыстап тергесе деймін». Тағы да сол Бұлдыртының тұрғыны Құбаев Армат деген азамат былай деп арыз жолдапты. «2015 жылы 2 қараша күні менің бір бас қашарым зым-зия жоғалды.Әуелі, өзім іздеп көріп едім, нәтиже болмады. Участковыйға хабар бердім. Бірақ әлі күнге дейін сыбыс жоқ».

– Барымташылар алыстан келіп жүрсе, Бұлдыртыға әбден бауыр басып алған демеске амалың жоқ. Олардың ауылда әбден жырынды болған «құлақтары мен көздері» бар, — дейді арызданушылар. Мал қоң жинаған жаз айларында, «қызыл қуырдақ» қызатын күзге, қысқа қарай сыбайластарына семіз малдарды оп-оңай шығарып беріп немесе өздері де аяқтай жүріп, еш қиындықсыз Орал асырып, етке өткізіп жібереді. Әбден үйреніп алғаны сонша, «штатный» ұрылар полициядан айылдарын жиюды қойып, әйтеуір ауылдың малшыларын бөрі тигендей бөрліктіреді де жатады. Ондағы басқа шыққан барымташылардың қарқынына қарап, «Бассыз үйдің иті о….қ» дегендей, бұл ауданда, оның Бұлдыртысында ұрыларға қарсы қайрат қылатын полиция, жергілікті мемлекеттік басқару орындары бар ма, жоқ па өзі деп таңданбасқа амалың жоқ. Олай дейтініміз, ұрылардың тайраңдағаны сонша, малды кейде асықпай сойып, мүшелеп әкететінді шығарған. Мысал қажет болса, мінекей: «Мен, Сайғожиев Батыр Бұлдыртыда тұрамын. 2016 жылы қазан айының 20-сы күні бір бас сиырым жоғалды. Буаз болса да, жайқалып жүрген семіз мал еді. Екі күн іздегеннен кейін жайрап жатқан мүйізін, сирақтарын, дардай болып қалған бұзауының төшкісін таптым. Байлаған арқандарын да сол жерге лақтырып кетіпті. Полиция келіп, суретке түсіріп, «Тексереміз, қалай да табамыз» — деп кеткен. Содан хабар жоқ». Сонда дейді-ау, газетке арызданушылар халықтың салығынан қарайған қаржы төлеп, айлықтарын айтпағанда, астына мінетін көліктерінен бастап, қажетті құрал-жабдықтарын сайлап, әр ауылда ұстап отыратын учаскелік полицияның қажеті қанша?.. Расында да, ауылда жыл сайын қайталанатын, тіпті өршіп бара жатқан мал ұрлығының алдын алудың шараларын таба алмайтын, орын алған ұрлықты алақандай ауылда аша алмайтын полиция әбден дәрменсіз болып тұр ғой…

2015 жылы күзде үш бас ірі қарасын жоғалтқан тағы да сол Бұлдыртының тұрғыны Исатай Жайымов та полицияның табалдырығын тоздырған. «Сол күні менің малдарыммен бірге ауылдасым Құсекенов Биқанның да семіз құнажын қашары жоғалды» — дейді ол. Бұлардың да малдары із-түзсіз кеткен.

Жуырда Бұлдырты ауылында аудан әкімі Абат Шыныбековтың есебі болып өтті. Мұнда да мал ұрлығы жайлы әңгіме көтерілді. Қалай көтерілмесін, аудандық прокуратураның ақпары бойынша, Сырым ауданында соңғы бес жылда мал ұрлығы 404,5 пайызға өскен… Соған байланысты аудандық ішкі істер бөлімінің бастығы Әлмұхановқа бұлдыртылықтардың қоятын сұрағы шаш-етектен еді, бірақ полиция бастықтың оларға қайтаратын уәжі болмады ма екен, тұрғындар алдындағы есеп беру жиынына келмеді. Осы жиында бұған дейін «Орал өңірі» газетіне арыздана келген бұлдыртылық шаруа Ермек Бекайдаров та сөйлеген ( оның 17 бас ірі қарасы Бұлдыртыдан ұрланып, жолшыбай төрт басы Орал қаласында сатылып, қалған 13 басы Бөкей ордасы ауданының Ұялы ауылынан табылғандығы туралы «Орал өңірі» газетінің 19 қаңтар күнгі санында жарияланды). Ол Бұлдыртының Көкөріс бөлімшесіндегі Бөгет елді мекеніне мал өсірумен айналысатын Серік Дарғожиев пен Мақсот Бисенғалиевтер келгеннен бері ауылдан мал ұрлау күрт көбейгенін тілге тиек еткен. Сондай-ақ ауылдың шаруалары жер ала алмай жүргенде, Жымпитыда тұратын олардың Бөгеттің маңайынан (ол жерде бүкіл мал су ішетін тоған бар) мал ұстайтын жерді оп-оңай алуларына күмән келтіріп, заңдылығын тексеруді талап еткен. Ауылдық полиция бөлімшесіне барса, оның есігі үнемі жабық тұратындығын, ал учаскелік инспектордың орнында болмайтындығын, ылғи да Жымпитыда жүретіндігін жасырмаған. Айтып, айтпай не керек, Сырым еліндегі барымташылардың әлегі бүгінде әбден шырқау шегіне жеткен.

«Газеттегі мақаланы көріп, мен де сіздерге арызымды айта келдім» — деді Қаратөбенің Егіндікөлінен аяқтай келген Бисенғали Сағындықов. — 2016 жылдың 12 қарашасында 13 бас малым (алты бұзаулы сиыр, бір қашар) жоғалды. Аудандық ІІБ-ның тергеушісі Асхат Мусин «Бағымсыз малды іздемейміз, өздеріңізге айыппұл саламыз» — деп айтты. Ұрлық жылда қайталанады. Тіпті күшейіп келеді. Полициядан ешқандай нәтиже шықпағанына қарағанда, полицияның, тергеушілердің ұрымен байланысы бар деп ойлаймын. Байланысы болмаса, халық ұрланған малдарын табар еді.

Мұны тоқтатуға ешқандай шара жоқ па?.. Өзім жұмыссызбын, малмен күнімізді көріп отырғанбыз. Бүгінде қорамыз қаңырап қалды. Қаңыраған қора-қопсыға кіріп шыққан сайын жылағым келеді…

Бұған енді біздің алып-қосарымыз жоқ. Аудан-ауылдардағы полиция қызметкерлерінің абыройына екіталай күн туып тұр. Оны тудырған ұрылар…

Есенжол ҚЫСТАУБАЕВ,

«Орал өңірі»

Жәнібек ауданының әкімі Наурызбай Қарағойшин  жыл ішінде атқарған жұмысы туралы тұрғындар алдындағы есепті кездесуін өткізді.   Жиында аудан әкімі былтыр атқарылған жұмыстар туралы баяндап, алда тұрған міндеттерді жүзеге асыру бойынша қабылданған іс-қимыл жоспарымен таныстырды.

Аудан басшысының баяндамасында айтылғанындай, аудан шаруашылығының негізін мал шаруашылығы құрайды. Төрт түлік бойынша мал басы едәуір өскен. Шаруашылықтардың барлық санаттарында 4730,8 тонна ет, 11702,9 тонна сүт өндірілген. Өткен жылғы есепке сай ауыл шаруашылығы өнімдерінің жалпы көлемі 5265,7 миллион теңге құраған. Аудан көлемінде жұмыс істейтін 309 ауыл шаруашылығы құрылымдарының 176-ы мемлекеттік бағдарламаларға қатысу арқылы шаруашылықтарын дамытуда. Мәселен, өткен жылы «Сыбаға», «Алтын асық», «Құлан» бағдарламаларына қатысқан 15 шаруашылық 176 миллион теңге мөлшеріндегі несиеге мал сатып алған. Сол сияқты 2016 жылы ауданның шаруа қожалықтары 54 бірлік ауыл шаруашылығы техникаларын сатып алса, соның 32-і лизингке алынған техникалар болып саналады. Үкіметтің арнайы резерві есебінен бөлінген қаржы есебінен Борсы, Талов ауылдарындағы ауыз су жүйелері ағымдағы жөндеуден өткізілсе, «Ақбұлақ» бағдарламасы шеңберінде облыстық бюджеттен бөлінген қаржыға Жәнібек ауылындағы ауыз су құбырын қайта жөндеу жұмыстары басталған. Инвестициялық салымдарды субсидиялау бағыты бойынша ауыл шаруашылығы техникаларын сатып алған және құдық қазу жұмыстарының шығындары 50 пайыз өтеліп, 48 шаруа қожалығына 83 млн. 448 мың теңге мөлшерінде субсидия төленген. Ауданда әлеуметтік қорғау, жұмыспен қамту, білім беру, денсаулық сақтау салаларында қол жеткен табыстар баршылық.

Наурызбай Қадырбайұлы атқарылған, атқарылатын басқа да жұмыстарды сөзіне сүйеніш ете келе, ауданның 2017 жылға арналған іс-қимыл жоспарын мәлім етті. Бұл тұрғыда, ол ауыл шаруашылығын, кәсіпкерлікті дамыту, жұмыссыздық деңгейін барынша төмендету, тұрғындарды қажетті инженерлік-коммуникациялық инфрақұрылыммен қамтамасыз ету, елді мекендерді абаттандыру, көгалдандыру жұмыстарын жандандырудың жолдарын баяндады.

Аудан әкімінің есебінен соң жарыссөзге қатысқан Ақоба ауылының тұрғыны Мұхтар Бисенғалиев ауылдың орталықтандырылған ауыз су құбырымен қамтамасыз етілмегендігін, сондай-ақ Жәнібек-Қазталов жолының басым бөлігінде қатты төсеніштің болмауы тұрғындар үшін қолайсыздық тудыратынын айтса, аудандық «Ақбастау» жастар қоғамдық бірлестігінің төрағасы Руслан Нұралиев облыс басшылығынан аудан орталығына заманауи спорт кешенін салу, сондай-ақ жоғары және арнаулы оқу орындарын бітірген жастардың ауданға көптеп келуіне байланысты оларды тұрғын үймен қамтамасыз ету үшін қаржы жағынан көмек көрсетуді сұрады. Кездесуде, сондай-ақ Жақсыбай ауылындағы «Жақсылық» шаруа қожалығының басшысы, зейнеткер Елеусін Тілебалиев мемлекеттік бағдарламалар бойынша берілетін демеуқаржының арқасында ауданда мал тұқымы асылданып, жаңа техника сатып алуға мол мүмкіндік туғанына ризашылығын жеткізсе, Жәнібек ауылының тұрғыны, кәсіпкер Нина Дуюнова аудан бойынша алғаш кәсібін ашқандардың бірі екендігін, татулығы мен ынтымағы жарасқан бірнеше ұлт өкілдері тұратын елді мақтаныш тұтатынын, бұл күнде ауданда кәсіпкерліктің айтарлықтай дамығанын айтып, аудан әкімінің жұмысына оң баға берді.

Жиында сөз алған облыстық соттың төрағасы Бек Әметов сот жүйесіндегі болып жатқан жаңалықтарды, алда тұрған міндеттерді баяндап, Жәнібек ауданында өткен жылы 30 қылмыстық, 300 әкімшілік және 200 азаматтық істердің қаралғанын, мұның өзі халқы шағын аудан үшін олқы тұс болып табылатынын, сондықтан медиация жұмысын жандандыру қажеттігін баса көрсетті.

Аудан әкімінің тұрғындар алдындағы есепті кездесуінде облыс әкімінің бірінші орынбасары Арман Өтеғұлов Үкіметтің кеңейтілген отырысына қатысуына байланысты өңір басшысы есептік жиынға келе алмағанымен, аудан жұртшылығына үлкен сәлем жолдағанын, алдағы уақытта Алтай Сейдірұлының ауданда болатын осындай кездесулерге қатысып, тұрғындардың жай-күйімен танысатынын айтып жеткізді. Арман Кәрімұлы өз сөзінде облыс әкімінің өңір аумағындағы барлық тоғандардың тізімін алып, оларды ретке келтіру, тазалау, жайылымдық жерлерді қайта қалпына келтіру жұмыстарын бақылауына алғанын мәлім етті.

— Осыған сәйкес Жәнібек ауданы бойынша екі каналды жаңарту жұмысы қолға алынады. Сонымен қатар Жәнібекке Волгоград, Саратов губернияларынан жіберілетін суға 1 млрд. 600 миллион теңге қаржы бөлінеді. Мұның өзі үлкен шығын саналатындықтан, алдағы уақытта Жайық өзенінен Үлкен өзенге канал тарту жұмысы жоспарда тұр. Бүгінгі таңда 50-ге жуық елді мекендерге ауыз су құбырын тарту керек. Облыс бойынша ауылдарды көгілдір отынмен қамтамасыз ету 93 пайыз орындалды. Республикалық маңызы бар Жалпақтал – Қазталов — Жәнібек автомобиль жолын салу жұмыстары басталып, бұл іс алдағы жылдары да жалғасын табатын болады. Ал «Дипломмен ауылға» бағдарламасына сәйкес ауылға келген жас мамандарға тұрғын үй салып, пайдалануға беруде жәнібектік кәсіпкерлердің белсенділігін айрықша атап өткім келеді. Сондықтан тұрғын үйді мемлекет салып береді деген пиғылдан сәл арылу керек. «Нұрлы жол» бағдарламасы бойынша қаржылық институттарды пайдаланып, әркім өзі үшін жұмыс істеу қажеттігін еске сала кеткенді жөн деп есептеймін. Сол сияқты аудан орталығына қазіргі заманға сай спорт кешенін салудың жобалық-сметалық құжаты дайын. Осы және Ақоба ауылына ауыз су құбырын тарту мәселесі маңыздылығына қарай рет-ретімен шешілетін болады. Жәнібек ауданы жылдан-жылға дамып, өркендеп, тұрғындардың тұрмыс-тіршілігі қала деңгейіне дейін көтеріліп келеді. Мұның өзі таңдануға тұрарлық жағдай. Алдағы уақытта да аудан халқының осылай тату-тәтті тірлік кешіп, ел экономикасы мен мәдениетін дамытуға үлестерін қоса беретініне сенім мол, — деді ол.

Жиыннан соң аудандық мәдениет үйінің көркемөнерпаздары есепті кездесуге қатысушыларға арнап концерттік бағдарлама ұсынды.

Жұмыс сапары барысында облыс әкімінің бірінші орынбасары Арман Өтеғұлов аудан орталығындағы бірқатар нысандарды аралап, олардың жай-жапсарымен танысты. Ол «Аида» дүкенінде болғанда, «ЖәнібекТрансСервис» ЖШС директоры Айболат Аяпов өзі басқарып отырған серіктестіктің жұмысы жөнінде баяндады. Оның айтуынша, 2010 жылы ашылған «Аида» дүкенінің бір бөлімінде жиһаз цехында шығарылатын бұйымдар сатылады. Тұрғын үйлер мен кеңселерге арналған түрлі жиһаздарды аудандағы тұрғындар мен мекемелер, көршілес Бөкей ордасы, Қазталов аудандары сатып алуда. Облыс әкімінің бірінші орынбасарының «Жиһаз шығару үшін материалдарды қайдан аласыз?» — деген сауалына серіктестік директоры материалдарды Волгоград, Орал қалаларынан алатынын, сонымен қатар серіктестік 2013 жылы «Жұмыспен қамтудың жол картасы — 2020» бағдарламасы бойынша 6 миллион, ал 2014 жылы «Бизнестің жол картасы — 2020» бағдарламасына сәйкес 20 миллион теңге алып, бұл қаржыға екі «КамАЗ» автокөлігін саудалағанын, мекемеде 40 адам жұмысқа тартылғанын айтты. Сондай-ақ мұнда тапсырыс бойынша жиһаз шығару ісі қолға алынған. Дүкен жанындағы наубайханадан нан, кондитерлік өнімдер дайындалып сатылады. Азық-түлік бөлімінде Арман Кәрімұлы нан бағасымен танысып, астықтың қайдан әкелінетінін сұрап білді. Бұдан соң ол «Аграршылар үйінде» болды.

Мұнда аудандық ветеринар, жер қатынастары және ауыл шаруашылығы бөлімдері мен ветеринарлық станса басшылары Абзал Қаратаев, Арман Исқақов, Біржан Ғұбашев өздерінің мекемесін аралатып, жұмыстарымен таныстырды. Әрі қарай аудандық мектептен тыс жұмыстар орталығы мен балалар-жасөспірімдер туризмі және экология орталығына келген оны аталған орталықтың басшылары Нұртілек Мизамбаев пен Тұрдыбек Сәрсенбай қарсылап алды. Мұнда болған кезде Арман Кәрімұлы оқушыларға арналған әйнекке құммен сурет салу, тоғызқұмалақ, шахмат, ментальды арифметика сынды үйірме жұмыстарымен, оқушылардың өз қолдарымен салған сурет, қолөнер бұйымдарымен танысып, олардың өнерін тамашалап, естелік суретке түсті. Ал «Алтын ұя» бөбекжайына келгенде, облыс әкімінің бірінші орынбасары Арман Өтеғұлов бөбекжайдың басшысы Гүлмира Нұрғалиева арқылы мекеменің тыныс-тіршілігіне қанығып, бүлдіршіндердің өнерін тамашалап, оларға зор ризашылығын білдірді.

Нұрымбек  ЖАПАҚОВ,   

Жәнібек  ауданы

Бөкей ордасы ауданының әкімі Нұрлан Рахымжановтың аудан тұрғындары алдындағы есебі екінші ақпан күні аудандық мәдениет үйінде өтті. Оған облыс әкімінің бірінші орынбасары Арман Өтеғұлов, облыстық мәслихаттың хатшысы Мәлік Құлшар, облыстық соттың төрағасы Бек Әметов және облыстық деңгейдегі бірқатар салалардың басшылары қатысты.

Ел тәуелсіздігінің ширекғасырлық кезеңі аталып өтілген жылдың мерекелі де берекелі болғандығымен есте қалғандығын атап көрсеткен Нұрлан Сағынтайұлы Қазақстан Республикасының Президенті Нұрсұлтан Назарбаевтың күні кеше ғана баспасөзде жарияланған «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына Жолдауына, одан туындайтын жаңа міндеттерге де кеңінен тоқталды.

– Бүгінгі меже ертең ел асқан бір белес болып қана қалады, – деді ол. – Елбасы Қазақстан халқы өмірінің анағұрлым дамыған және бәсекеге қабілетті елдердің деңгейіне жеткізуді міндет етіп, елімізді жаңа биікке ұмтылдырып отыр. Бұған біз де қолдау білдіреміз. Халықтың бүгінгі өмірі, тыныс-тіршілігі кешегіден әлдеқайда жақсы. Ертеңіміз бұдан да нұрлы боларына сенімдіміз, жылдан-жылға жақсара түскен жағдайымыз – соның дәлелі.

Осылай деген аудан әкімі өз сөзін нақты мәліметтермен айшықтап, ақпаркестелі слайд арқылы көрсетіп отырды. Алдымен аудан бюджеті тілге тиек болды. Ол 2016 жылы 3 млрд. 32 млн. теңгені құрап, шығыс бөлігі 100 пайызға орындалған. Жоспарланған 256 млн. теңгенің орнына салық түсімі 311 млн. теңгеге жетіпті (121,8%). «Дипломмен ауылға» бағдарламасы бойынша 25 маманға 3 млн. 712 теңге көтерме жәрдемақы, 13 маманға баспана сатып алуға 38 млн. 178 мың теңге бюджеттік несие берілген.

Сырты дала, іші пана, құтты мекен Нарында қазіргі таңда 58 573 ірі қара, 108 334 қой-ешкі, 19 728 жылқы, 1205 түйе (шаруашылықтың барлық санатында) бағылуда. Бұл былтырғы осы кезеңмен салыстырғанда, ірі қара 3,5, қой-ешкі 0,8, жылқы 5,7, түйе 0,1 пайызға артық. Ет өндіру 4,9 (3100 тонна), сүт 0,3 пайызға (12 857 тонна) өскен. Есепті мерзімде экспортқа (Ресейге) 447 тонна ірі қара, 1,7 қой еті шығарылған. «Хан ордасы» ЖШС бактериан түйесін, 12 қожалық қазақтың ақбас сиырын, екі қожалық көшім және жабы жылқыларын өсіріп, мал тұқымын асылдандырумен айналысуда. Т. Масин ауылдық округінде қымыз өңдеу цехы, Саралжында бордақылау алаңы салынуда.

Аудандағы 910 шағын кәсіпкерлік нысанында 1632 адам еңбек етеді. Жыл ішінде олар 5 млрд. 400 мың теңгенің өнімін өндіріп (былтырғыдан 48 пайыз жоғары), бюджетке 15 млн. 547 мың теңге салық түсіріпті (өткен жылғыдан 21 пайыз артық). «Жұмыспен қамту 2020 жол картасы» бағдарламасының екінші бағытымен 60 млн. теңге несие алған 31 кәсіпкердің 19-ы оны мал өсіруге, 12 тұрмыстық қызмет орындарын ашуға жұмсаған. Қайтарылған қаржы есебінен төрт адамға өз кәсіптерін ашу үшін 6 млн. теңге несие беріліпті. Аудандағы экономикалық белсенді 9 394 адамның 478-і жұмыссыз есебінде тіркелсе (жұмыссыздық деңгейі 5%), 462-сі жұмыспен қамтылып, кейінгі 354-і тұрақты жұмысқа орналастырылған. «Жұмыспен қамту 2020 жол картасы» бағдарламасының бірінші бағыты бойынша 14 жоба арқылы 21 адам жұмысқа тартылған. Бағдарламаның үшінші бағыты бойынша 60 адам әлеуметтік жұмыс орындарына, 50 адам «Жастар тәжірибесіне» жолданып, қайта даярлау мен кәсіптік оқуға 27 адам жіберілген.

Аудан басшысы білім беру, денсаулық сақтау, мәдениет және спорт салаларын да назардан тыс қалдырмай, тұрғындарды ауыз сумен қамту, елді мекендерді газдандыру, жол, құрылыс, коммуналдық қызмет, абаттандыру, қоғамдық тәртіп мәселелерін де егжей-тегжейлі сөз етті. Сондай-ақ былтырғы есеп беруден кейін іс-шаралар жоспарына енгізілген 17 мәселенің жетеуі (Мұратсай ауылы көшелері жарықтандырылып, Хан ордасының екі көшесіне инженерлік желілер тартылған, малы бруцеллезге шыққан бисендіктердің алажақтары толық өтелген. Сайқын ауылында үш зират қоршалып, балалардың екі ойын алаңы салынған. Т. Масин атындағы ауылдық округте тозығы жеткен электр желілері және 106 бағана ауыстырылып, жаңадан бір трансформатор орнатылған. Саралжын ауылына да бір жаңа трансформатор қойылған) орындалғанын, екеуі (Т. Масин ауылдық округіне табиғи газ желісі жеткізіліп, Сайқында ауылішілік жолдар жөнделеді) ағымдағы жылы іске асатынын, сегізі (Мұратсай су қоймасындағы үлкен бөгетті жөндеп, су тапшылығын шешу, Бисен ауылы шетіндегі үйлерге табиғи газ құбырын, Хан ордасына сапалы, жылдам ғаламтор желісін тарту, Саралжын, Ұялы ауылдарына да газ жеткізу, Ұялыға ФАП салу, Сайқын – Жаңақала жолының кей тұстарына қиыршық тас төсеу) қаржылық жағдайға байланысты кейінге шегерілгенін мәлімдеді.

Жарыссөзге бірінші болып шыққан аудандық «Нарын шуағы» әйелдер қоғамдық бірлестігінің төрайымы Гүлжан Бисекенова негізінен аудан орталығында атқарылған істерді көрсете келіп, ондағы асфальттің тозығы жеткенін, жалпы барлық көшені асфальттау, екі жүзге таяу баспана кезегіндегі жерлестеріміздің сұранысын қанағаттандыру үшін тұрғын үй құрылысына көбірек қаржы бөлу, сонымен қатар жастар үшін спорттық-сауықтыру кешенін салдырту қажеттігін айтты. Ал мұратсайлық ақсақал Каспи Жахатов баяндамада қамтылған жайларға ризашылық білдіріп, Мұратсай суландыру жүйесін қалпына келтіруді, үлкен бөгет үстімен өтетін көпірді жөндеттіруді сұрады. Аудандық аурухана директорының емдеу ісі жөніндегі орынбасары Анарбек Белисанов елімізде жастардың білім алып, еңбек етуіне толық жағдай жасалғаны үшін Елбасына, облыс, аудан басшыларына алғысын жаудырып, ауданымыздағы ғаламтор желісі байланысын жақсартуды өтінсе, Бисен ауылдық мәдениет үйінің директоры Екатерина Мөкешева округіндегі тұрмыс-жайды мақтанышпен жеткізіп, мәдениет үйіне жаңа ғимарат қажеттігін айтты.

Өз кезегінде мінбеге көтерілген облыстық соттың төрағасы Бек Әметов облыстық сот жұмысының барысын сабақтай отырып, 16 мың халыққа 18 медиатордың аздығын, қазақы қаймағы бұзылмаған өңірдің ауыл тентектерін тия алмай отырғанын (өткен жылы аудандық сотта 35 қылмыстық, 130 азаматтық іс қаралыпты)  жеткізді. Әрі мынау қасиетті өңірде сөзі дуалы аға-апаларымыз жоқ емес қой деген пікірін де білдірді. Тәртіп болмаған жерде табыстың да тайқазаны тола қоймайтындығын, қандастарымыз қит етсе, бір-бірін сотқа сүйреумен абырой-бедел артпайтынын, мұның бәрі елдігімізге сын екендігін әсерлі әңгімеледі.

Жиынды түйіндеген облыс әкімінің бірінші орынбасары Арман Өтеғұловтың сөзіне де жиналысқа қатысушылар риза болды. Алдымен, облысымызда атқарылып жатқан істерді байыппен баяндаған ол ауданымызда елді мекендерді газдандыру, жергілікті жұртты ауыз сумен қамтамасыз ету, абаттандыру сияқты қолға алынған істердің жалғасын табатынын нық сеніммен айтты. Әңгіме арасында жәнібектіктер «Дипломмен ауылға» бағдарламасымен келгендерге бюджеттен бөлінген несиеге жергілікті кәсіпкермен келісіп, жаңа баспана салып беретіндерін үлгі етті. Аудан орталығында ғана емес, әр округте қожалық иелері, кәсіпкерлер өздеріне ғана сыңғырлаған зәулім сарай тұрғызбай, қарапайым тұрғындар үшін қолжетімді баспаналар салып, жалға берсе, тұрғын үй мәселесін шешуге оң ықпалын тигізер еді. Түсінген жанға бұдан өзге де біраз түйткілді жайлардың тінін тарқатуға болатындығын, ол үшін күнілгері нақты жоспарлар белгіленуі керектігін, бүгін сұрағанға бірден қаржы берілмейтіндігін алға тартты. Облыс басшысының орынбасары залдан қойылған сұрақтарға да тұшымды жауап қайтарды.

Каримолла ҒАЙСИН,

Бөкей ордасы ауданы

М. Өтемісов  атындағы Батыс  Қазақстан  мемлекеттік университетінде  ҚР Президентінің  билік  тармақтары арасындағы  өкілеттіктерді   қайта  бөлу  мәселелері жөніндегі Үндеуіне» арналған  дөңгелек  үстел  өтті.

Шара барысында билік тармақтары арасында өкілеттіліктерді қайта бөлудің  тиімділігі мен саяси реформалардан күтілетін нәтижелер төңірегінде мәселелер қозғалды.

– Мемлекет басшысы билік тармақтары арасындағы өкілеттіктерді қайта бөлу туралы Үндеуін жариялағанда, Қазақстан Республикасы Президентінің ерекше құзырына жатқызылған өкілеттіктер санының азаятынына назар аударған болатын. Конституция нормаларына бірінші кезекте Парламенттің өкілеттігін кеңейтуге, сонымен бірге Үкіметтің дербестігі мен жауапкершілігін күшейтуге бағытталған өзгерістер енгізу  туралы ұстанымын да атап өтті.

Осы кезге дейін Елбасымыз Нұрсұлтан Назарбаев  өзекті, тағдыр шешті мәселелердің барлығы дүрыс шешілуіне құзырлы билігімен тікелей ықпал етіп отырды. Мемлекет басшысы еліміздің  ағымдағы және стратегиялық міндеттерін терең түсініп, оны оңтайлы шешіп келеді. Сондықтан әлемнің дамыған елдері қатарында Қазақстанның да абыройы асқақтауда. Елбасы  Нұрсұлтан Әбішұлы Назарбаевтың еліміздің өркендеуі жолында жасалған мұндай Үндеулерін жалпы халық қолдайды деп сенемін, – деді басқосуды ашқан М. Өтемісов атындағы БҚМУ-дың ректоры Асхат  Иманғалиев.

Дөңгелек үстел барысында аталмыш университеттің оқытушылары өз пікірін ортаға салды.

Тұрар  ШАЙХИЕВ,

М. Өтемісов атындағы БҚМУ-дың аға оқытушысы, саясаттанушы:

– Елбасы ұсынып отырған жоғары билік тармақтары арасында өкілеттіктерді қайта бөлуге қатысты өзгерістер – еліміздің саяси жүйесін демократияландыру үрдісінің жаңа белесі. Парламент рөлін күшейту, атқарушы билік органдарының жауапкершілігін арттыру халық алдында есеп беретін мемлекет қалыптастырудың нақты саяси-құрылымдық тетігі болмақ.  Сондықтан өркендеу жолында мұндай билік тармақтары арасында өкілеттілікті қайта бөлуге қатысты Үндеуді  студенттер қауымы мен оқытушылар қолдайды деп ойлаймын.

Жазира  БАЗАРҒАЛИЕВА,

М. Өтемісов атындағы БҚМУ-дың аға оқытушысы, заң ғылымдарының магистрі:

– Мемлекет басшысының құзыреттерді билік тармақтарына ерікті түрде беруі – әлемдік қауымдастықтың саяси өмірінде өте сирек болатын құбылыс. Алайда бұл бастама саяси жүйені демократияландыруда қажеттілік болып отыр. Мемлекеттік органдардың қоғам алдындағы жауапкершілігі арта түседі. Сондай-ақ Үкімет жұмысының нәтижелігінің бағасын Парламент беруі тиіс. Бұл жағдай мемлекетіміздің конституциялық негізіне қайшы келмейді. Сондықтан Ата Заңымызға енгізілген өзгертулер мен толықтыруларды қолдаймын.

Гүлсезім  БИЯШЕВА,

«Орал өңірі»

Құрметті  батысқазақстандықтар!

Біз, барлық әлеуметтік топтардың мүдделерін білдіретін Демократиялық күштердің «Қазақстан – 2050» Батыс Қазақстан облыстық коалициясының мүшелері, еліміздің жетекші саяси партияларының, Қазақстан халқы ассамблеясының, ірі қоғамдық бірлестіктердің, үкіметтік емес ұйымдардың өкілдері:

Еліміздің тұңғыш Президентінің көшбасшылығын және жалпы әлемдегі мықты, табысты және құрметті мемлекет ретінде тәуелсіз Қазақстанды құрудағы президенттік институтының тарихи маңызын жоғары бағалай отырып;

Елбасымыздың мемлекеттілікті нығайтуға, республикамызды одан әрі саяси, экономикалық және әлеуметтік жаңғыртуға арналған Мемлекеттік бағытын толығымен қолдай  отырып;

Мемлекет басшысының келер заманның жаһандық және өңірлік қауіп-қатерлеріне әрекет ету қажеттілігі туралы ұстанымын қолдай отырып;

Қазақстан Республикасы Президенті саяси жүйені одан әрі демократияландыру үшін мемлекеттік билік тараптары арасында өкілеттіктерді қайта бөлу, сондай-ақ «Бес институционалды реформаны жүзеге асыру бойынша 100 нақты қадам» Ұлт жоспарын іске асыру және еліміздің әлемдегі 30 жетекші мемлекеттің қатарына кіру бойынша «Қазақстан – 2050» стратегиясының мақсаттарына қол жеткізу жөнінде ұсынып отырған реформасының ерекше маңызын  ескере  отырып;

заманауи қоғамдық процестердің жылдамдығы мен күрделілігін және Қазақстан азаматтары мен болашақ ұрпақ алдындағы өзіміздің жауапкершілігімізді түсіне отырып;

Қазақстанның барлық азаматтарын Елбасымыздың мемлекеттік билік тараптары арасында өкілеттіктерді қайта бөлу мәселелері бойынша бастамасын талқылауға белсенді қатысып, қолдауға шақырамыз.

Елбасымыздың мемлекеттік басқарудың тиімді және үйлестірілген жүйесін қамтамасыз ету бойынша ұсынып отырған жаңа реформасы Қазақстанды саяси трансформациялаудың эволюциялық кезеңі және қазақстандық мемлекеттілік пен демократияны дамыту жолының логикалық жалғасы болып табылады.

Үкіметтің экономика саласындағы атқарушылық өкілеттіктері мен дербестілігін кеңейту және оның жа-уапкершілігі мен Парламент алдындағы есептілігін күшейту еліміздің бірнеше жылға алға қарай саяси тұрақтылығын  қамтамасыз  етуге  негіз  жасайды.

Парламенттің бақылау функцияларын күшейту Үкіметтен ағымдағы және стратегиялық жұмысының сапалы жаңа деңгейін, айқындылығы мен жоғары заңнамалық органға, яғни Қазақстан халқына есептілігін арттыруды талап етеді.

Парламенттің рөлін күшейту саяси процестің белсенді субъектілері, қоғамдық пікірталас пен дебаттардың негізгі орталықтары, кең әлеуметтік топтардың мүдделерін атқарушы ретінде Қазақстанның барлық саяси партияларының  дамуына  жаңа  мүмкіндік  тудырады.

Күтіліп отырған реформалар – еліміз үшін аса маңызды және оған әр Қазақстан азаматының қатысуын талап етеді.

Біз жаңа Қазақстанның Тәуелсіздік жылдарында жүріп өткен бірегей тарихи жолы, жалпыұлттық бірлік, халқымыздың рухани күші, ұлтымыздың сапасы, оның заман талаптарын қабылдау және тек алға даму қабілеттері біздің мемлекетіміздің жетістігін айқындаушы факторы болғанына және болатынына анық көз жеткіздік.

Демократиялық күштердің «Қазақстан – 2050» Батыс Қазақстан облыстық коалициясының мүшелері батысқазақстандықтардың болашақ ұрпақтары үшін барлық азаматтарды Елбасымыздың бастамаларын  қолдауға  шақырады.

«Нұр Отан» партиясы Батыс Қазақстан облыстық филиалы, «Қазақстанның «Ақ жол» демократиялық партиясы» БҚО филиалы, «Қазақстан Коммунистік халық партиясы» БҚО комитеті, «Бірлік» саяси партиясының БҚО филиалы, «Ауыл» халықтық-демократиялық патриоттық партиясының БҚО филиалы, БҚО қоғамдық кеңесі, «Ардагерлер ұйымы» республикалық қоғамдық бірлестігінің БҚО филиалы, БҚО Қазақстан халқы ассамблеясының аналар кеңесі, БҚО кәсіподақтар орталығы, БҚО кәсіпкерлер палатасы, БҚО мүгедектері ерікті қоғамы, БҚО орыс мәдени орталығы, «Жайық Пресс» ЖШС, «Ажар» ҚБ.

2017  жылғы 31 қаңтар

ҚР  Президенті  Н. Ә. Назарбаевтың  билік  тармақтары  арасындағы өкілеттіліктерді  қайта  бөлу  мәселелері  жөніндегі  Үндеуі  мен  «Қазақстанның үшінші  жаңғыруы:  жаһандық  бәсекеге  қабілеттілік»  атты  Қазақстан  халқына Жолдауын  талқылауға арналған  М. Өтемісов  атындағы  БҚМУ-дың  ғылыми кеңесінің  кеңейтілген  отырысы  өтті.  Оған  аталмыш  жоғары  оқу  орнының ғалымдары  мен  оқытушылары,  студенттер  қатысты.

Алқалы басқосуда БҚМУ-дың ректоры Асхат Иманғалиев Елбасының Үндеуі мен Қазақстан халқына Жолдауы хақында қысқаша сөз сөйледі. Ғалымның пайымдауынша, Жолдаудағы бес басымдық – мемлекет пен ел алдына қойылған нақты мақсаттардың басты бағыттары. Сонымен қатар Н. Ә. Назарбаевтың билік тармақтары арасындағы өкілеттіктерді  қайта бөлу мәселелері жөніндегі Үндеуі Қазақстанды одан әрі демократияландырудың бастауы болмақ. Түпкі мақсат айдан анық – Отанымыздың  әлемнің дамыған және бәсекеге қабілетті 30 елінің қатарына енуі.

Содан соң БҚМУ жанындағы  «Махамбет» гуманитарлық зерттеулер институтының директоры Абат Қыдыршаевтың «Қазақстанның жаңғыруы – жаһандық бәсеке жолындағы жаңа шешім, тың қадам», осы жоғары оқу орнындағы стратегиялық даму және сапа департаментінің директоры, саясаттану ғылымдарының кандидаты Олег Юровтың «Әлеуметтік тұрақтылық және тиімді экономикалық даму – Қазақстанның басты мақсаты», құқықтық пәндер кафедрасының аға оқытушысы, заң ғылымдарының магистрі Айнагүл Нұржанованың «Қазіргі таңдағы Конституцияға енгізілген өзгерістердің тиімділігі», мәдениет және өнер факультетінің 3-курс студенті Оралхан Рақымовтың «Жаңашылдыққа жаңа қадам – жастар көзімен» тақырыптарындағы баяндамалары тыңдалды.

Отырыс соңында А. Иманғалиев жиналғандарды Үндеу мен Жолдауды кеңінен насихаттау жолында белсенді жұмыс істеуге шақырып, БҚМУ ұжымының биік талап деңгейінен көрінеріне сенім білдірді.

Серік  ИХСАНҒАЛИ,

«Орал  өңірі»

Cуретті  түсірген  Т.ТОҚМАМБЕТОВ