Туған жылы: 1987 жылғы наурыздың тоғызында жарық дүниеге көрінген

Туған жері: Шыңғырлау ауданының Қарағаш ауылы

Руы – Шеркеш

Нағашы жұрты – Ысық

Қайын жұрты – Масқар

Ата-анасы: Тұрғанбек – Гүлнәр

Бауырлары: қарындасы Ақперне, інісі Әділхан

Келіншегі – Эльвира, ұлы – Санжар, қызы – Сабина

Әнші Дархан Құлбабаев – соңғы жылдары сахналардан өзі шырқаған әуезді әндермен ел-жұрттың қошеметіне бөленіп жүрген жас дарындардың бірі. Сол себепті біз жақында ғана Астанадағы «Конгресс холда» өткен композитор Кентау Назарбектің концертіне қатысып, Елорданың үлкен сахнасында ән әуелетіп оралған Дарханды «Жұлдыздар» бетіне қонаққа шақырып,  сыр-сұхбатқа тартқанды қош көрдік.

– Дархан аға, қазақ арасында «Өнер жолы – бұралаң-бұлтарысы мол қиын жол» деген түсінік бар. Сізді үлкен сахналарға жетелеген соқпақ қалай басталды? Өнер жолын таңдауыңызға кімнің ықпалы күштірек болды?

– Мен қаршадайымнан өнерге бейім болдым, сірә, бұл әкемнің әсері болса керек. Әкем – заманында біздің ауыл-аймақтағы жиын-тойлардың көркі болған азамат. Бала кезімнен атам мен әкемнің жиын-тойларда ән айтқанын көріп өстім. Ал анам да «Ұлым Тоқтар Серіковтей керемет әнші болады» деп мені үнемі демеп-қолдап, шабыттандырып отыратын. Өнер жолын таңдауыма алдымен ата-анам, содан соң мектептегі ұстазым Айжарықов Қайрат ағай ықпал етті.

— Студенттік дәурен, «махаббат, қызық мол жылдарға» аз-кем ойша саяхаттап қайтсаңыз…

– Мен Махамбет Өтемісов атындағы Батыс Қазақстан мемлекеттік университеті музыка факультетінің 2009 жылғы түлегімін. Студент кезімізде бір топта оқитын Берік деген досым екеуміз қосылып, дуэт құрып, ылғи «Нұр-Мұқасан» тобының әндерін орындап, білім ордасында, студенттік ортада таныла бастадық. Жастық шақтың ең керемет кезеңі – студенттік жылдарда әскерге шығарып салу, әскерден қарсылап алу кештері, сонымен қатар туған күн мен той дегендеріңіз жиі болады ғой. Құрбы-құрдастардың қолқалауымен өнеріміздің арқасында біз де думанды ортадан жиі табылатынбыз. Сондай керемет дәуреннің екі айналып келмейтіні өкінішті…

— Эльвира жеңешемізбен студент кезіңізде таныстыңыз ба? Ол сізді қандай қадір-қасиетімен баурады?

— Мен Эльвирамен 9-сынып оқып жүргенімде таныстым. Ол бізге көрші ауылдан, Сырым ауданының Жосалы ауылынан. Эльвира біздің университеттің филология факультетінде оқыды. Оқушылық кездегі таныс-білістігіміз студенттік дәуренде махаббатқа ұласты. Эльвира мені әдемілігіне қоса, әдептілігімен, табиғи ибалылығымен, сабырлы мінезімен баурады.

— Айтпақшы, сізді студент кезде отау құрды деп естідік…

— Иә, үшінші курсты бітірген жылы үйлендім. Сол кезде ата-анам нар тәуекелге барған екен. Ауылдағы үйдің есігіне үлкен қара құлып салып, Оралға көшіп келді. Алғашында пәтер жалдап тұрдық, анам базарға шығып, тауар сатты. әкем ескі «Жигулиімен» таксист болды. Өзім анда-санда базарда жүк тасушы болып нәпақа таптым. Сол қиналған сәттер бүгіндері түсім сияқты елестейді. Қазір үй салып алдық. Басыбайлы баспанамыз жоқ, үй ішімізбен қатты қиналып жүрген кезімізде «Мына қиындықтан енді шыға алмаймыз-ау» деп ойлайтынмын. Отбасында ынтымақ болса, ырыс келеді екен.

– Дархан аға, талғамның эстетикалық талап-таным екені белгілі. Сіздің талап-талғамыңызға сай қазіргі әншілер кімдер?

– Маған құлақтан кіріп, бойды алар қазақтың қоңыр әуенінен ауытқымай ән салатын Тоқтар Серіков, Саят Медеуов, Досымжан Таңатаров секілді ағаларымның ән шырқау мәнері ұнайды. Өзім облыстық филармонияға қызметке кіріскелі бері еліміздің біраз қаласына барып, тіпті Ресейде де өнер көрсетіп үлгердім. Бұл да бір шыңдалу жолы. Оның үстіне біздің филармонияда Қанатқали Қожақов, Жаскелең Ғайсағалиев, Марат Сарбөпеев, Майра Қайдарова, Еркін Өтегенов, Жаңылсын Хасанова секілді күміс көмей, жезтаңдай әншілер баршылық. Осындай тұлғалармен бір ұжымда қызмет етудің өзі — мен үшін үлкен мектеп.

– Сіздің де репертуарыңызда «Сәулем-ай», «Оралдың ерке самалы», «Сыған серенадасы», «Өкпелемеші», «Құс жолы» секілді лирикалық әндерге қоса, туған жер, Орал туралы әндер де бар-шылық. Әзірге бірен-саран болса да, патриоттық тақырыпта өзіңіз жазған әндер бар екендігінен де хабардармыз…

– Өзім жазған санаулы әндерімнің тыңдаған кісіге әсері мол болғанын қалаймын. Сондықтан оларды әрлеуге (оранжировкасына) көп көңіл бөлемін. Мәселен, жақында ғана белгілі әнші-сазгер әрі әнді де шебер әрлейтін Лұқпан Жолдасовпен келісіп, жерлесіміз Дархан Дәулетияров ағамыздың «Гүл Орал» атты әнін әрледім, яғни оранжировка жасаттым. Өз басым «Кім сойса да, қасапшы сойсын» деген ұстанымды қатты ұстанамын. Ал әннің әуенін әрлеуге келгенде, Лұқпан ағамыз ұста кісі.

— Ақұштап ақынның өлеңіне жазылған Ілия Жақановтың «Оралдың ерке самалы» әнін Жаңылсын Хасанова екеуіңіз қосылып шырқағанда, әдемі әсерге бөленбейтін жан жоқ. Осы әнді дуэт құрып, қосылып шырқау жөніндегі идея кімнен шықты?

— Университетті тәмамдаған жылдың қоңыр күзі еді. Әлі еш жерге жұмысқа тұра қоймаған кезім. Бірақ тойларға шығып тұратындықтан, табыссыз емеспін. Сондай тойлардың бірінің соңына ала бір апай: «Сен қайдан келген баласың? Қайда қызмет істейсің?» деп жөн сұрады. Мен аты-жөніме қоса, БҚМУ-дың музыка факультетін үш-төрт ай бұрын бітіргенімді, әлі жұмысқа тұрудың реті келе қоймағандығын айттым. Жаңағы апай: «Мен облыстық филармонияның режиссері Айман Қуатова деген апаң боламын. Ертең филармонияға кел, тыңдап көреміз» — деді. Ертеңіне алып-ұшып филармонияға бардым. Ол кезде Ғарифолла Құрманғалиев атындағы Батыс Қазақстан облыстық филармониясының директоры Омарғалиев Мақсот ағамыз еді. Мақсот ағай бастаған бес-алты кісі бірнеше ән салдырып, даусымды ұнатқандай сыңай байқатты. Сол сынақ барысында «Оралдың ерке самалын» Мақсот ағайдың ұсынысымен Жаңылсын әпкеммен қосылып, алғаш рет шырқадым. Жаңа өзіңіз айтқандай, бұл бір сәтті шыққан дүние болды.

– Отағасы, әке ретінде сіздің бала тәрбиесіне қатысты көзқарасыңызды білсек деп едік?..

– Санжар және Сабина есімді ұл-қызым бар. Бала тәрбиесіне келгенде қаталдаумын. Балаларым менен именіп тұрады. Оларды өнер саласына бағыттағым келмейді. Санжарды боксқа апарамын деп уәде бердім. Ұлымның өжет, намысқой болып ержеткенін қалаймын. Ал қызым инабатты, ибалы болып бойжетсе екен деймін. Екеуінің де сабақ үлгерімдері өте жақсы. Перзенттері қол жеткізген кішігірім жетістіктің өзі әке-шешеге таудай болып көрінеді екен. Ұл-қызым мектептен күн сайын «5» алып келіп, анасы екеумізге қоса, ата-әжесін де қуанышқа кенелтіп жүр.

– Дархан аға, халық арасында «Өнер адамдары әдетте үй шаруасына орашолақ келеді» деген пікір бар. Үй тірлігіне қалайсыз?

– Біздер менің ата-анаммен, бауырларыммен бірге тұрамыз. Шынымды айтсам, біздің үйдегі ер адамға қатысты шаруа атаулы әкем мен інімнен артылмайды…

– Бос уақытыңызды қалай өткізесіз?

— Бос уақыт бола қалса, мен әуелі жақсылап ұйықтап аламын. Өйткені жұмыс пен тойдың арасында жүргендіктен, күн тәртібім де ерекше. Әрине, отбасыма да уақыт бөлемін.

– Кіндік қаныңыз тамған туған ауылыңызға жиі барып тұрасыз ба?

– Менің туған жерім – Шыңғырлау ауданындағы Қарағаш деген шағын ауыл. Табиғаты көркем, ну орманы, өзен-көлі, тіпті сарқырамасына дейін бар осы елді мекен мені ерекше тартады да тұрады. Ауылыма барынша жиі барып тұрамын. Қарағашқа бара қалсам, саф ауасын жұтып, үлкен-кішісін көріп, құрбы-құрдастарыммен табиғат аясына шығып, демалып, бір жасап қайтамын.

– Болашақ жоспарларыңызбен бөліссеңіз, тыңдармандарыңызды қандай жаңалықпен қуантпақсыз?

– Шынымды айтсам, қазіргі жүрісіме көңілім толмайды. «Уақыт жоқ» деген желеумен шығармашылық ізденісім баяулағандай көрінеді. Сондықтан таяу уақытта репертуарымды жаңа әндермен байытсам ба деймін.

— Әсерлі әңгімеңізге көп рақмет, Дархан аға. Өнер айдынында лайым айыңыз оңынан туа бергей!

— Ақ тілегіңе рақмет, қарындасым. Айтқаның келсін!

Әншімен әңгімелескен Айым ТӨЛЕУҒАЛИ,

«Орал өңірі»

Тәуелсіздіктің 25 жылдығына байланысты «Ел ырысы» базарында «Қазақстанда жасалған» отандық тауар өндірушілердің жәрмеңкесі ұйымдастырылды. Желтоқсанның 15-інде 10-нан астам сауда нүктесінде жергілікті кәсіпорындар мен жеке кәсіпкерлер ұн, сүт, макарон өнімдерін, көкөніс, өсімдік майын, қалбырдағы балық етін, шұжық пен кондитерлік өнімдерді саттыққа шығарды. Жәрмеңкені облыстық ауыл шаруашылығы басқармасы мен Орал қаласы әкімдігінің қолдауымен  «Орал» ӘКК»  АҚ  ұйымдастырды.

Азық-түлік жәрмеңкесінде тауарлар тікелей өндірушілердің қойған бағасымен ұсынылуда. Мәселен, тазартылған күріштің келісі 210 теңгеден сатылса, ал базардағы құны – 230 теңге. Картоп, сәбіз, пияз 20-30 теңгеге төмен бағамен сатылуда. Белгіленген шектегі құнның өзгермеуін жергілікті әкімдік бақылауға алды. Тауар өндірушілерге павильондағы сауда орындары ақысыз берілді, – деді «Ел ырысы» базарының басшысы Нұрлан Наурызбаев жәрмеңкенің алғашқы күнінде.

Желтоқсанның саршұнақ аязы  бойды тітіркентіп, бетті қарығанына қарамастан, жәрмеңкеге келген жұрттың қарасы көбейді. «Бүгін «Жастық» ЖШС сатушысынан сүт өнімдерін алдым. Сапалы әрі дәмді. Мұндай жәрмеңкелер жиі ұйымдастырылса  деймін. Және «Ел ырысы» базарына қоғамдық көліктердің көптеп келуі қамтамасыз етілсе», – деді Орал қаласының тұрғыны Нина Григорьева.

«Қазақстанда жасалған» акциясымен қатар «Ұлы дала өнімдері» жәрмеңкесі де басталды. Оған Ақжайық, Тасқала, Сырым аудандарынан мал өсіретін шаруа қожалықтары мен Орал қаласынан «Куракаев А» ЖК қатысты. Жәрмеңкеде сиыр еті 1000-1100, жылқы еті 1000-1200 теңге аралығында бағаланды.

«Орал» ӘКК» АҚ-ның берген ақпарына сүйенсек, үш күнге созылған жәрмеңкеде жалпы құны   9 млн. 51 мың теңгеден астам тауар түрлері саудаға шығарылды. Кейбірін атап айтсақ, «Белес Агро», «Теректі май комбинаты» ЖШС-лары, «Ақ қайнар» АҚ 3500 келі дәнді және майлы дақылдар өнімін сатқан. «Кублей» ЖШС 500 дана балық және ет қалбырын өткізген. «Омаров» жеке кәсіпкерлігі 143 дана кондитерлік өнімін саттыққа шығарған. «Батаев» шаруа қожалығы ұсынған 50 келі балды тұрғындар арзан бағаға алды.

Желтоқсанның 15-17-сі күндері тұрғындарды әлеуметтік тұрғыда қолдау бағытында ұйымдастырылған жәрмеңке сәтімен аяқталды. Оған отызға жуық жергілікті тауар өндіруші қатысып, тұрғындарға азық-түлікті молынан ұсынды.

Нұртай  ТЕКЕБАЕВ,

«Орал  өңірі»

Ел  тәуелсіздігінің  25  жылдығы  мерекесі  қарсаңында  «БатысМұнайГазЖабдықтары»  ЖШС-ның  директоры, батысқазақстандық  кәсіпкер  Берік Сүлейменов  Қазақстанның  құрметті азаматы  жоғары  қоғамдық  мойындау  орденімен  марапатталды.

Қазақстан Республикасының қоғамдық наградалар мен атақтар жөніндегі комитеті Берік Сүлейменов басшылық жасайтын кәсіпорынның қызметін және басшы ретінде ел экономикасын нығайтуға қосқан жеке үлесін жоғары бағалаған. «БатысМұнайГазЖабдықтары» ЖШС-ның мұнайгаз жабдықтарын шығаратын отандық өндірісші ретінде қалыптасқанына 10 жыл болды. Осы жылдар ішінде компания еліміз бойынша тоқсаннан астам нысанға өздері шығарған автоматты газ таратқыш стансаларды орнатты. Бұл аз шаруа емес. Бүгінде «Қазақстан – Қытай» газ құбыры бойындағы облыстардың аумақтарына, яғни барлық қала, елді мекендері газға қосылуда. Олардың барлығына дерлік оралдық кәсіпорынның конвейерінен шыққан газ таратқыш стансалар орнатылуда. Ал Ақ Жайық өңіріндегі Сырым ауданындағы Жымпитыда, Қаратөбе ауданындағы Қаратөбеде, Ақжайық ауданындағы Алғабас ауылында осы компанияның стансалары қызмет көрсетіп тұр.

Өңірдегі қайырымдылық шараларынан тыс қалмайтын компанияның алдағы өндірістік жұмыс жоспары ауқымды.

Гүлнәр  ШӘҢГЕРЕЙ

Ел  тәуелсіздігінің  25  жылдығына  орай  Орал  қаласындағы Салтанат сарайында дәстүрлі ІІ Гранд балл өтті. Ерекше салтанатпен ұйымдастырылған балға 120 дебютант биші және көздері нашар көретін балаларға арналған облыстық мектеп-интернатының оқушылары қатысып, өнер көрсетті.

Облыстық жастар саясаты мәселелері басқармасының және «Ақиқат» жастар қоғамдық бірлестігінің бастауымен ұйымдастырылған шараның мақсаты көздері нашар көретін мектеп оқушыларына қайырымдылық көрсету, сонымен қатар жастар арасында эстетикалық тәрбие қалыптастыру болатын.

Шараға қатысушыларды ІІ Гранд балдың ашылуымен қала әкімінің орынбасары Алтынбек Қайсағалиев құттықтады.

– Құрметті жерлестер, сіздерге облыс әкімінің сәлемін жеткізіп, Тәуелсіздіктің 25 жылдығымен құттықтауға рұқсат етіңіздер! Биылғы жыл біз үшін мерекелі де берекелі болды. Қаламызда республикалық деңгейдегі түрлі іс-шараларды өткіздік. Жуырда ғана Оқушылар және жастар сарайының ашылғанына куә болдық. Бүгінгі шараны да жастар арасында мәдениетті дамытуға бағытталған игі іс деп білемін. Аталмыш шараны ұйымдастыруға ниет еткен жастарға ризамын, – деді Алтынбек Кеңесұлы.

Кеш барысында 120 дебютант биші полонез, полька, вена вальсі секілді билерді орындады. Сонымен қатар елімізге танымал эстрада жұлдыздары өнер көрсетті. Олардың қатарында Димаш Құдайбергенов, Бейбіт Көшқалиев, «Алау» тобы болды. Көздері нашар көретін балаларға арналған мектеп оқушылары сүйікті әншілерімен бірігіп ән орындады.

– Маған бүгінгі балл ерекше көңіл күй сыйлады. Біз арнаулы қонақ ретінде қатысып отырмыз.

Бізге бұл кеште Димаш Құдайбергенов және Бейбіт Көшқалиевпен бірге ән айту бұйырды, — дейді аталмыш мектептің 12-сынып оқушысы Гүлжанат Тастанбекова.

– Біз аталмыш мектеп оқушыларымен бір ай бұрын кездесіп, олардың тілектерін біліп алған болатынбыз. Шара барысында оқушылардың әрқайсысының арманын орындайтын боламыз. Мәселен, бірқатар оқушы танымал жұлдызбен ән айтса, қалғандарына заттай сыйлық табыс етеміз. Бұл шараны жүзеге асыруға «Оралагрореммаш» АҚ, «Топан» ЖШС, меценат Марат Қанатқалиұлы көмектесіп, қаржылай демеді, — дейді жобаның бас ұйымдастырушысы Алпамыс  Шаримов.

Балды тележүргізуші, актер, «Дарын» жастар сыйлығының иегері Асылхан Төлепов, «Орал аруы – 2015» атанған Вероника Залата және өңірімізге танымал шоумен  Сергей  Жужа  жүргізді.

Балдың бас балетмейстері Қарлығаш Қадырбекованың мәлімдеуінше, еріктілер кеште орындаған барлық билерін небәрі 20 күн ішінде үйренген екен. Олардың қатарында бірде-бір кәсіби биші жоқ көрінеді. Еріктілерге ҚР мәдениет қайраткері, «Астана Опера» мемлекеттік опера және балет театрының балетмейстері, халықаралық конкурстар мен Н. Назарбаев қорының лауреаты Досжан Табылды шеберлік сыныбын өткізген.

Сонымен қатар Ресейдің «ТНТ» телеарнасындағы «Танцы» бағдарламасына қатысқан Владислав Ким де жастарға заманауи бағыттағы билерді үйреткен.

Шара соңында көздері нашар көретін балаларға арналған облыстық мектеп-интернатының директоры Арыстанбек Ғұбаш барлық ұйымдастырушыларға алғыс айтты. Сондай-ақ балдың ханзадасы мен ханшайымы анықталды. Олар М. Өтемісов атындағы БҚАТУ студенттері Адхам Расулов және Айдана Жақсылықова болды.

Айым  ТӨЛЕУҒАЛИ,

«Орал  өңірі»

????????????????????????????????????

Ел тәуелсіздігінің 25 жылдық мерейтойын облыстық сот ұжымы  да салтанатты түрде атап өтті.

Мерейлі мерекеге орайластырып ұйымдастырылған шараны облыстық сот төрағасы Бек Әметов жүргізді.

— Сіздерді ел тәуелсіздігінің 25 жылдық мерейтойымен шын жүректен құттықтаймын! Бұл күн – ел тарихындағы ең үлкен мереке. Біздің еліміз 1991 жылы ата-бабаларымыз сан ғасырлар бойы армандаған тәуелсіздікке қол жеткізді. Содан бері біз егеменді ел атанып, баянды өмір сүріп келеміз. Осы жылдар ішінде қол жеткізген табыстарымыз да аз емес. Елбасымыз Нұрсұлтан Назарбаевтың салиқалы саясатының арқасында ширек ғасырда Қазақстан барша әлемге танылды. Гүлденген, өсіп-өнген, жаңарған Қазақстанның қол жеткізген табыстарында, жеңістерінде осы залда отырған сіздердің әрқайсыңыздың үлесіңіз бар. Сіздерді бүгінгі барлық қазақстандықтарға ортақ мерекемен құттықтай отырып, баршаңызға мықты денсаулық, жемісті еңбек тілеймін, — деген төраға сөз кезегін сот жүйесінің ардагері Нина Никулинаға берді.

— Мен сот жүйесінде 1992 жылдан жұмыс істеп келемін. Тәуелсіздіктің алғашқы жылдары елдің жағдайы қиын болды. Бізге де аса күрделі жағдайда жұмыс істеуге тура келді. Ғимаратымыз салқын, жұмысқа қажетті құрал-жабдықтар да жетіспейтін. Тіпті жазу машинкасы да қат болатын. Тоңып-шашырап жүріп, сот отырыстарын қалдырмайтынбыз. Бүгінде соның бәрі артта қалды. Менің бүгінгі әріптестерім жаңа ғимаратта, жылы да жарық бөлмелерде жұмыс істеуде. Еліміздің өсіп-өнгені, жетістігі осының өзінен-ақ көрініп тұр. Сіздерге жұмыс жасауға барлық жағдай жасалған. Бүгінгі мерекеде әріптестеріме шығарған шешімдеріңіз тек әділ болып, халықтың құрметіне бөлене беріңіздер деп тілек айтамын, — деді еңбек ардагері өзінің құттықтау сөзінде.

Ел тәуелсіздігіне 25 жыл толуына орай сот жүйесінің бір топ үздік қызметкері марапатталды. Олардың қатарында облыстық, қалалық және аудандық соттың судьялары В. Дмитриенкоға, К. Қадырбековке, А. Дүйсенғалиевке, А. Ахметовке, Г. Дәулетқалиеваға және қалалық, облыстық соттың мамандары Е. Ермачкова мен А. Қойбағароваға облыс әкімінің алғысхаты табыс етілді. Судьялар К. Махметов, Н. Сейдахметова, М. Бақтығұлов ҚР Судьялар одағының алғысхатымен марапатталды. Облыстық соттың судьясы Е. Боранбаев ҚР Судьялар одағының Құрмет грамотасына ие болса, облыстық сот судьясы Х. Аманқұлов пен қалалық соттың судьясы Б. Мәмбетов ҚР Судьялар одағының «Үш би» құрмет белгісін кеуделеріне тақты. Сондай-ақ облыстық соттың бас маманы Р. Төлеуғалиева мен Орал қалалық сотының судьясы Г. Қойбағарова ҚР Жоғары сотының ІІ және ІІІ дәрежелі «Сот жүйесінің үздігі» медалімен марапатталды. Сондай-ақ облыстық соттың судьялары Зәуреш Қыясова мен Гүлнар Миниус ҚР Жоғары сотының ІІІ дәрежелі «Мінсіз қызметі үшін» медаліне ие болды. Бір топ үздік судьяға ҚР Президентінің 2016 жылдың 29 қарашасындағы №380 бұйрығына сәйкес «Қазақстан Республикасының Тәуелсіздігіне 25 жыл» медалі табысталды. Жиында сот қызметінің жұмысын кеңінен насихаттаған бірқатар БАҚ өкілдеріне де сый-құрмет көрсетілді.

Айша ӨТЕБӘЛІ,

«Орал өңірі»

Бүгін  облыс  басылымы  тағы  бір  газетпен  толықты. «Аруана-Жайық»  қоғамдық  қоры  жанынан  «Дүрбі»  атты аймақтық  қоғамдық-танымдық  тәуелсіз  газетінің  алғашқы саны  жарыққа  шықты.  Осы  айтулы шараға орай аталмыш қордың  директоры,  «Дүрбі»  газетінің бас  редакторы,  ақын, «Ақпарат  саласының  үздігі»  Ұлдай  Сариеваны  сөзге  тартқан едік.

– Ұлдай Қабошқызы, сіз ашқан «Аруана-Жайық» қоғамдық қоры қандай істермен айналысатын болады?

– Мен соңғы жылдары дін тақырыбына жазып жүрмін ғой. Адасқан талай тағдырға куә болдым. Экстремизм-терроризм баптарымен түрмеде отырған қаракөздермен талай рет кездесіп, әңгіме құрдым. Уақыт өте олармен емен-жарқын, бүкпесіз сыр шертістім… Елімізде шетелден келген басқа да діни бірлестіктер тіркеліп, өз жұмыстарын жүргізуде. Бүгінде қоғамдағы діни ахуал мәз емес. Терроризмнің қаупі басым. Қаракөздер қағынан безіп, Сирия мен Ирактағы соғысқа қатысу үшін Отанын сатып, қашып кетіп жатыр. Бұл – өте күрделі мәселе. Осы тақырыптарға қалам тербеп жүріп, мақала жазудың мен үшін аздық ететінін түсіндім. Себебі мен түрмеде отырған балаларды бұрын танымасам да, тағы да барғым келді, оларға ас-ауқат апарып, шай ішіп отырып сөйлескім келді, оларды тағы да тани түссем  дедім. Адасқанын түсініп, өкінген ол балалар маған ыстық көріне бастады. Оларға туғанымдай қара-дым. Түрмедегі балалардың аналары мені іздеді, жақын тартты. Маған тілші ғана болу аздық етті әрі анау-мынау шығындарға жалақым жетпейтінін білдім. Міне,  осы жағдайлармен қоғамдық қор ашуға бел будым.

– Осы мәселемен ғана шұғылданбайтын  шығарсыз…

– Әрине. Бастысы – экстремизм мен терроризмге қарсы үгітнасихат, деструктивтік діни ағымдардан зардап шеккен адамдарға кеңес, рухани және материалдық көмек көрсету болмақ. Талантты жастарды қолдау, жалпы жастарға, әлеуметтік жағдайы төмен жастар мен студенттерге, кәмелетке толмағандарға  әлеуметтік-психологиялық, құқықтық көмек  көрсету, клубтар, үйірмелер ұйымдастыру, жетімдер мен тұрмысы нашар жесір әйелдерге көмектесу, әр түрлі рухани байқаулар өткізу, қыз-келіншектерге жұмыс көзін ашу. Бүгінгі қоғамдағы ең өзекті мәселе – діни адасушылықтың ар жағында отбасы құндылықтарының әлсіреуі жатыр.

Мектеп, мәдени мекемелер, отбасылармен бірлесе атқарар жұмыстар баршылық. Ұлттық салт-сана мықты болса, жастар өз сенімін өзгертпейді. Түрмеде отырған балалар осы жағынан ақсағандар деп ойлаймын.

– Түрмеде  отырған  кімдерді айта  аласыз?

– Атын атап, түсін түстемеймін. Олар – албырт жастықтың құрбаны болған өзіміздің қаракөздер. Бүгінде олар қапаста отыр және сотпен әділ кесілген жазаларын өтеуде. Мен сөйлескен жігіттердің бәрі бірдей сенімін 100 пайызға өзгертті деп айта алмаймын. Кейбірін темір тордың ықпалы жалған сөйлеуге, «Мен өзгердім, дәстүрлі Ханафи мазхабына оралдым» деп айтуға мәжбүр етіп отыр. Ал кейбірі еш бүкпесіз ақ көңілмен мені апасындай көретінін, тағы да келгенімді қалайтынын сеземін. Біздің қоғамда кеңестік дәуірден қалған жұмыс істеу тәсілі мен психология әлі бар. Мысалы, түрмеден шыққан балалар өздеріне уәде етілген жұмысқа қолдары жетпей, сенделіп жүріп қалады. Сол уақытта олар әрі-сәрі бөтен ойларға баруы әбден мүмкін. Адамның ауырған ағзасы бір рет қана дәрі ішіп, ине салғаннан жазылып кетпейді. Емдеу, одан әрі сауықтыру ұзаққа созылады емес пе? Міне, адасқан адамның өз сенімін өзгертіп, психологиялық тұрғыдан басқа адамға айналуы – өте күрделі процесс. Сондықтан да оларды тастап кетпеуіміз керек. Әсіресе, түрмеден шыққан сәт, бір кезде өзі «харам» деп айыптаған қоғамға қайта оралу, оның үстіне бұрынғы жамағаты алдындағы айып (керісінше, оны адастырғаны үшін бұл бауырлары оның алдында айыпты болу керек) оның психологиясына аса ауыр салмақ түсіреді. Ол өзін айыпты сезінеді, төменшіктейді. Міне, дәл осы сәтте қоғамдық ұйымдар ғана емес, мемлекеттік құзырлы мекемелер де олардың одан әрі шатқаяқтамай, нық басып кетуі үшін жұмыстануы керек. Түрмеден шығып, жұмыс таппай жүрген жігіттер келді маған. Мен не істей аламын? Міне, сол сәтте қор құрып, оның жанынан жұмыс көзін ашу ойыма түсті.

– Тағы қандай жоспарыңыз бар?

– Біздің қоғамда орамал тартқан, намазға жығылған қыз-келіншектерге үрке қарау бар. Оларды сыртынан «адасқан, діни теріс ағымда жүргендер» деп нақақ жазғырып жатады. Әбу Ханифа мазхабында жүрген осындай иманды әйелдерді қолдағым келеді. Яғни мешіттегі әйел жамағатымен бірлесіп жұмыс істейміз. Оның сыртында бала тәрбиесі, ұлттық құндылықтар, салт-дәстүр, әдет-ғұрып, тарих, жалпы ұлттық ділімізді  дәріптеу  бар.

– Ол жұмыстарға кімдерді тартасыз?

– Ұрпақ тәрбиесіне байланысты қандай да шараларға облысқа белгілі, беделді тұлғаларды тарту әдісі әуелден бар. Бұл дұрыс.

Себебі халық оларға сенеді әрі  сыйлайды, әсіресе, жастар үлгі тұтады. Облыста сондай, өз ойым бойынша лайықты адамдар баршылық. Қоғамдық бірлестік басшылары, жекелеген сондай тұлғалармен бірігіп жұмыс істегім келеді. Әйтсе де бұл мәселеге мен басқашалау қараймын. Біздің қоғам жылдар бойы халықтың алдына 2-3 адамды ғана алып шығып, халықты да, ол адамдарды да әб-ден мезі қылды. Ол адамдар аудиторияға кіріп келе жатқанда, жиналған көпшілік ол кісінің қазір не айтатынын, қай жерде тоқтап тыныс алатынын, қай жерде даусын көтеріп, қай жерде сыбырлап сөйлейтінін біліп отырады. Себебі ол әңгіме айта-айта жауыр болған, шаршатқан. Тіпті ол адамдарды түнде ұйықтап жатқанда оятып, «Мына тақырыпқа сөйлеңізші!» десең, көзін де ашпас-тан  сайрап ала жөнелетін шығар… Қандай деңгейде екеніміз осыдан-ақ көрініп тұр. Әлгіндей аудиторияларда  шаршап отырып құлықсыз тыңдаған әңгіме жастардың жүрегіне жетпейді, осыдан келіп немқұрайлылық пайда болады. Тәрбие берудің басқа тетіктерін іске қосу керек. Жастар өз арасындағы идеалға еліктеп, ереді. Ол әр саланың үздіктері болуы мүмкін. Жалпы алып қарағанда, бүгінгі жас ұрпақты кімдер тәрбиелеп жатыр? Уыздай таза қыз балаға ақыл айтып, оны тәрбиелеуге моральдық қақымыз бар ма? Бұл – ойланатын үлкен мәселе. Мен бұл жерде тек қана ұйымдастырушымын. Жастар еліктеуге тұрарлық үлгілі тұлғаларды, ақылман қарияларды, жастарды, соның ішінде қыз-келіншектер мен аналарды  іздеп, жарыққа шығарғым келеді. Яғни мен іздеп тапқан аналар мен әйелдер еріне адал, пәлен бала тәрбиелеген ақылман ана болуы мүмкін. Ол тіпті бір баласы болмаса да, өмір бойы ойы мен бойын таза ұстап келе жатқан, өмірлік тәжірибесі мол, өмір сүрген ортасы үлгі тұтқан, айтары бар қыз-келіншек болуы мүмкін. Мен жоқтан бар жасап, тезектен жұлдыз соқпаймын. Керісінше, бойына сіңген ұлттық құндылықтарды, салт-дәстүрді жастарға беруге лайықты, адал сүтті аналар мен әйелдерді қордың жұмысына  араластырғым  келеді.

– Қордың жанынан клуб ашыпсыз…

– «Демеу» атты клубымыз бар. Жұмысты енді ғана бастап жатырмыз. Діннің атын жамылған жалған ағымдардан зардап шеккен ата-аналар, қыз-келіншектер келуде. Олардың кейбірінің мәселесімен облыстағы құзырлы мекемелер арқылы министрліктерге өтінішпен шықтық. Алдағы уақытта клубтың өз теологы, заңгері, психологы болады деп ойлаймын.

Бәрі қаржыға байланысты. Ал жұмысты енді ғана бастаған бізде ол жоқ.

– «Дүрбі» атты газет шығарып жатырсыз. Атын неге олай қойдыңыз? Бағыты қандай болмақ?  Айына  неше  рет  шығады?

– Иә, таныстар «Неге «Дүрбі» деп  атадыңыз?» деп сұрап жатыр.

Газет – тәуелсіз басылым. Жан-жағымызды дүрбімен шолатын боламыз, бірақ тырнақ астынан кір іздемейміз. Мемлекеттің атқарып отырған жұмысына орай дін мәселесін көтеремін. Газеттің 70-80 пайызы дінге арналған және мешіт пен имамдарға ерекше  көңіл бөлінеді. Бірақ әлеуметтік мәселелер де назардан тыс қалмайды. Сын мақалалар да болады. Облыстағы басқа да басылымдар сияқты тарих, ұлттық құндылық, тіл мен діл, тағдыр, тылсым, жаратылыс, екі дүние мәселесін қаузаймыз. Жастар шығармашылығы тағы бар. Бірақ мен дәлдүріштерді жек көремін. Жаман өлеңін жалпылдатып, анда-мында жүгіріп жүрген ақынсымақтарды оқыған жастардың талғамы төмен болады. Сосын оларға еліктеп өлең жазады және өкінішке орай, сол өзі үлгі тұтқан шала ақындардың қатарын көбейтіп шыға келеді. Адам өзінің қолынан келетін іспен ғана айналыссын. Бұл — менің ұстанымым. Яғни шын талантты адамды ғана қолдаймыз. Газет Батыс Қазақстан, Атырау, Маңғыстау, Ақтөбе облыстарына тарайды. Әр облыста меншікті тілшілеріміз бар. Газет әзірге аптасына бір рет, 8 бет болып шығады.

– Бір сөзіңізде қорда қаржы жоқ дедіңіз. Газетті қалай шығарып жатырсыз?

– Бірінші санын өз ақшама шығардым. Ендігі үлкен мәселе – газетті таратып, сатып, жазылу арқылы баспахана шығындарына және қызметкерлердің жалақысына қаржы жинау. Газетті жалғыз адам шығару еш мүмкін емес. Жанымда жанашыр адамдар бар.

Алдағы жылы мемлекеттік тапсырысқа қатысуға үміттіміз. Өкініштісі, газетке жазылу науқанында  қимылдай алмай қалдық. Сәтін салса, келер жылдан үмітіміз зор.

– Әңгімеңізге рақмет. Барлық бастамаңызға сәттілік тілейміз!

Сұхбатты  жүргізген

Нұрлыбек  РАХМАНОВ

«Аруана-Жайық»  қоғамдық  қоры  мен  «Демеу»  клубының  байланыс  телефондары: 8-775-409-32-97,  8-705-150-48-30

Батыс Қазақстан облыстық телекоммуникациялар дирекциясы ел тәуелсіздігіне 25 жыл толу мерекесіне орай салтанатты шара өткізді. Достық үйінде өткен мерекелік шараға облыс әкімінің орынбасары Игорь Стексов, мекеме-кәсіпорын басшылары мен аудандық құрылым бөлімшелерінің өкілдері қатысты.

Аталмыш шарада облыстық те­ле­ком­му­никация мекемесінің ди­рек­торы Болатбек Қанафин құттық­тау сөз сөйлеп, ұжымның еге­мендік ал­ған жылдары жеткен жетістіктерімен бөлісті.

— Еліміз егемендік алған 25 жыл­дың ішінде барлық сала бо­йынша көптеген жетіс­тіктерге жет­ке­нінің куәсіміз. Елді сапалы байланыспен қамту мақ­са­тында сіздер қызмет ететін «Қазақтелеком» АҚ-ның қол жеткізген табысы зор деп білемін. Біз­­дің өңірдегі облыстық телекоммуника­циялар дирекциясы бүгінде 900 адамды жұ­мыс­­пен қамтып отыр. Сіздер тұр­­ғындарды заманауи ақпараттық жүйе­мен, са­палы байланыспен қамту мақсатында аян­бай еңбек етіп жүр­­сіз­дер. Соңғы мә­лі­мет­­тер­ге сүй­ен­­сек, облыс көлемінде 134 мың адам байланыспен, 44 мың тұр­ғын ға­­ламтор­мен қамтылып отыр. Бұл — үлкен көр­­сет­кіш. Сонымен қатар өңірімізде соңғы жылда­ры талшықты-оптикалық бай­­ланыс­пен қам­­­ту жұмыстары қар­­қынды жүргізілу­­де. Ке­­лер жы­лы халықтың қауіпсіздігін қам­­та­­ма­­сыз ету мақсатында бейнеба­қы­лау жүйе­­сін кеңейтуге орай бірқатар жұмыс­тар жос­­­парлану­да. Осындай маңызды сала­да қыз­­­мет етіп жүрген сіздерге жемісті ең­бек пен отбасыларыңа амандық тілеймін. Ме­рекеле­ріңіз құтты бол­сын, — деді байла­ныс саласы қыз­­меткерлерін мерекелерімен құт­тық­таған облыс әкімінің орынбасары  Игорь Стексов.

Салтанатты жиында жыл бойына ұйым­­дастырылған байқаулар жеңімпаз­­дары мен осы салаға еңбегі сіңген қызметкерлер ма­­ра­­патталды. Олардың қатарында Бөрлі ау­дан­дық бөлімшесінің маманы Жа­ңыл Оспан­ға­лиева, Сы­рым аудандық бөлім­ше­сінің ин­­­же­­не­рі Дамир Валитов, ұйымдас­ты­ру-ба­қы­лау бөлімінің бас­шы­­сы Мәншүк Тастілеуова сынды сала мамандары бар.

Нұрбек ОРАЗАЕВ,

«Орал өңірі»

Ел тәуелсіздігінің 25 жылдығына орай Достық үйінде облыс әкімінің орынбасары Бағдат Азбаев өңіріміздегі құрылыс және коммуналдық шаруашылық салаларының дамуына үлес қосып жүрген қызметкерлерді облыс әкімінің алғысхатымен  және мерекелік төсбелгімен марапаттады.

– Құрметті әріптестер, бар­ша­­­­ңызды Тә­­уел­сіздіктің 25 жыл­ды­­ғы­мен шын жү­рек­­тен құттық­таймын! 1991 жылы 16 жел­тоқ­санда Қазақ­стан тарихтың жаңа бетін ашқан болатын. Еліміздің қалыптасуы мен нығаюы тұңғыш Елбасымызбен тығыз байланысты. Ширек ғасырда еліміз дамыған елу елдің қатарына кірді. Елімізбен бірге облысымыз да қарқынды дамып келеді. Батысқазақстандықтардың талмай ең­бек­тенуінің арқасында тұрмыстың барлық салалары бо­йынша елеулі жетістіктерге жеттік. Өңірімізде 25 жыл  ішінде 17 балабақша, 59 мектеп,  сумен қамту нысандары, 102 денсаулық сақтау, тоғыз мәдениет және 11 спорт нысандары салынып,  150-ден астам елді мекен газбен қамтылды.

Облысымыз айтулы мерекені көптеген жетістіктермен қарсы алуда. Атап айтсақ, облыс орталығында мыңдаған тұрғын қо­ныстойын тойламақ. 2016 жылы жалпы саны 1500-ден астам пәтер тұрмыстық қол­данысқа берілді. 300 орындық аурухана құрылысы аяқталды. Шыңғырлау ауданында 290 орындық балабақша, Орал қаласында Оқушылар және жастар сарайы ашылды. Жергілікті бюджет есебінен Орал қалалық №2 сотының ғимараты қолданысқа тапсырылды. Тәуелсіздік алған жылдардан бері қарай өңірімізде электр  қуа­­тын импорттау көрсеткішін азай­ту мақсатында бірқатар жұ­мыс­тар жасалды. Мәселен, 90-жыл­дары өңіріміздегі электр  қуа­ты­ның өндірісі сегіз-ақ пайызды құрап, қуаттылығы небәрі 30 МВт (МегаВатт)-қа жететін. Бүгінде импорттау арқылы келетін өнім үш пайызды ғана көрсетіп тұр. Соңғы жылдары іске қосыл­ған «Қарашығанақ» газ турбиналық стансасы (ГТС) 160 МВт, Орал жылу-қуат ор­талығындағы «Hitachi» ГТС-і 28 МВт, Зеленов ауданының  Белес ауылы маңындағы «Орал» ГТС 100 МВт қуаттылығына ие. Атал­мыш стансалар іске қосылып, еліміздің өзге аймақтарына арзан әрі экологиялық таза электр қуатын шығаруға мүм­кін­дік беріп отыр. Біздің мақсатымыз тұрғын­дардың тұрмыстық әл-ауқатын нығай­туға бағытталған. Құрылысшылардың жұмыс­та­рына сәттілік тілей отырып, еліміздің даму жолында қосқан үлестері үшін алғысымды айтамын! — деді Бағдат Оразалдыұлы.

Айым ТӨЛЕУҒАЛИ,

«Орал өңірі»

Жақында облыстық дін істері басқармасына қарасты дін мәселелерін зерттеу орталығы ұйымдастырған «Әлемді бірге көркейтейік» әлеуметтік жарнама байқауының жүлдегерлері марапатталды.

Шарада сөз алған облыстық дін істері басқармасының басшысы Талғат Нығметов байқауға қатысқандардың дені жастар екенін және шығармашылық тұрғыда оларды қолдаудың маңыздылығын атап өтті. Оның айтуынша, облыста деструктивті ағымдарға ілескендердің 30 пайызын жастар құрайды. Сондықтан діни ахуалды реттеуде белсенді жастардың тың идеяларына назар аудару қажет. Байқауға жиырмаға тарта туынды жолданған. «Жастар жарқын бояумен әлемде бейбітшілік қана салтанат құруы тиіс екенін, терроризм мен экстермизм атаулыны айыптайтындарын, бірақ лаңкестік туралы хабарлардың тым жиі жариялануы да үрей әкеліп, дақпырт тарататындарын, яғни теріс ықпалы мол екенін астармен жеткізген. Олардың еңбектерінен бейбіт өмірдің тынысы аңғарылады», – деді дін мәселелерін зерттеу орталығының басшысы Жарас Аханов.

Одан әрмен байқаудың жүлдегерлері марапатталды. «Үздік әлеуметтік баспа және сыртқы жарнама» аталымы бойынша Орал қалалық №13 мектептің оқушылары Дарья Конькова мен Лилия Слободяник үшінші орын, Жәңгір хан атындағы БҚАТУ-дың студенті Ақжарқын Орынбасарова мен Орал қаласындағы №13 мектептің оқушысы Дәурен Ахмади екінші орын алды. Ал аталған университеттің студенттері Бибол Серікқалиев пен Жанар Боспанова озық шықты. «Үздік әлеуметтік ролик» аталымында Ж. Досмұхамедов атындағы педколледждің студенті Айкөркем Кереева мен «БҚО Жаңа толқыны» жастар қоғамдық бірлестігінің төрағасы Әлішер Ғұмаров жүлделі үшінші орынды иеленсе, БҚАТУ-дың студенті Серікболсын Жексенбайдың туындысы үздік деп танылды.

Өз тілшіміз

Таяуда облыс әкімдігі жанындағы діни бірлестіктермен байланыстар жөніндегі кеңестің кезекті отырысы өтті. Облыс әкімінің орынбасары Марат Тоқжановтың төрағалығымен болған жиынға мемлекеттік құрылымдар мен құқық қорғау органдарының, қоғамдық және діни бірлестіктердің өкілдері қатысты.

Аудандармен онлайн режимінде өткен жиынды ашқан Марат Тоқжанов бүгінгі таңда Ақтөбе және Алматы қалаларында болған оқиғалардан кейін елімізде діни экстремизм мен терроризмге қарсы іс-қимыл жұмыстары күшейтілгендігін айтты. Ағымдағы жылдың 6 маусымынан бастап біздің облыста террористік қауіптіліктің бірқалыпты сары деңгейі белгіленіп, ол 2017 жылдың 17 қаңтарына дейін ұзартылды. Қазіргі уақытта республикамызда дәстүрлі діни құндылықтарды сақтау және діни экстремизм мен терроризм идеяларына қарсы іс-қимылды күшейту мақсатында мемлекеттік құрылымдар мен қоғамдық ұйымдар арасында кешенді шаралар қолға алынуда. Бұл бағытта биыл өңірімізде де біраз жұмыстар атқарылды, олар келер жылы да жалғасын табады.

Кеңесте негізгі баяндаманы облыстық дін істері басқармасының басшысы Талғат Нығметов жасады. Оның айтуынша, қазір облыста діни ахуал тұрақты. Діни экстремизм мен терроризм идеяларына қарсы пәрменді күрес шарасының бірі ақпараттық түсіндіру жұмыстары болып табылады. Бүгінгі таңда аталмыш іс-шараның жаңа бағыттары жасақталды. Олардың арасында «Қазақстан-Орал» телеарнасында «Ғибрат» рухани-танымдық бағдарламасының эфирге шығуы, аудандарда дінмен айналысатын арнайы мамандардың жұмыс істеуі, баспа өнімдерін тарату, әйел жамағатымен жұмыс секілді бағыттар бар. «Әйел жамағаты бағыты бойынша дін мәселелерін зерттеу орталығына дінтанушы маман жұмысқа алынды, — деді Талғат Рахымұлы. — Ол маман 2015-2016 жылдар аралығында теріс көзқарастағы 34 әйел азаматшаға араб тілінен және дәстүрлі бағыт бойынша сабақтар берді. Соның нәтижесінде бұл азаматшалар Орал қаласындағы орталық мешіттің дәстүрлі бағыттағы 50-ге жуық әйел жамағатына қосылды. Сырым ауданында  12 азаматшадан тұратын діни көзқарасы тұрақсыз әйел жамағаты қалыптасқан. Олар толықтай күйеулерінің ықпалында. Бұл әйел жамағатына Әсел Әбдубали есімді теолог маман дәстүрлі діни бағытта дәрістер беруде».

Баяндамашының сөзіне қарағанда, басқарма құқық қорғау құрылымдарымен бірлесіп құқықбұзушылықтардың алдын алу бағытында да жүйелі жұмыс жүргізіп келеді. Биылғы жылдың 11 айы бойынша діни қарым-қатынастар саласында облыс бойынша бір заңбұзушылық дерегі тіркелді. Бұл көрсеткіш өткен жылдарға қарағанда едеуір төмен. Мәселен, 2014 жылы 21 заңбұзушылық орын алса, өткен жылы үш дерек тіркеліпті. Қазіргі таңда жастардың жаппай радикалдану үрдісі тоқталды және көшеде заңсыз діни әдебиеттер тарату дерегі азайды. Бүгінде бір облыстық мобильді ақпараттық-түсіндіру тобы (АТТ), 12 аудандық, бір қалалық деңгейдегі, барлығы 14 АТТ қызмет етеді. Есептік кезеңде облыста ақпараттық-түсіндіру топтары арқылы түрлі сипатта 162640 адамды қамтыған 1353 шара өткізілді.

Жастар арасында ұлттық-мәдени құндылықтарды, салт-дәстүрді насихаттау бағытында өңіріміздегі кітапхана, мәдениет үйі, музей, театрлар қызметкерлері көптеген жұмыс атқарып жатқанын облыстық мәдениет, мұрағаттар және құжаттама басқармасының басшысы Дәулеткерей Құсайынов атап өтті.

— Бүгінгі таңда дін ұстанып, оның шариғи үкімдерін орындаушылардың басым бөлігі жастар екенін ескеріп, олардың діни сауатына мән беру, діни тәрбие мен білім алу қажеттілігін қанағаттандыру мақсатында облысымыздағы кітапханалар діни мекемелермен, мешіттермен тұрақты байланыста жұмыс жасап келеді. Сонымен қатар Орал қаласындағы түзету мекемелеріндегі экстремизм мен терроризм қылмыстары бойынша жазасын өтеушілерге оң ықпал ету мақсатында Ж. Молдағалиев атындағы облыстық ғылыми-әмбебап кітапханасы РУ-170/3 түзету мекемесіне биыл 215 көркем әдебиетті қайтарымсыз берді. Келер жылдан бастап Орал қалалық орталықтандырылған кітапханалар жүйесі арқылы қаламыздағы түзету мекемелеріне жылжымалы кітапханалық қызмет көрсету жоспарланып отыр. Баланы жастайынан ізгілікке, мейірімділікке, имандылыққа тәрбиелеу мақсатында театрларда түрлі тақырыптарда спектакльдер қойылып келеді. Мәселен, «Жәннат» қойылымы биылдың өзінде 20 рет сахналанып, 5471 көрерменнің назарына ұсынылды. Ал Сырым аудандық халықтық театры «Шырмауық» әлеуметтік драмасын қойды. Ақжайық, Жәнібек аудандық халықтық театрлары Мәуліт мерекесіне орай театрландырған көріністерді көпшілік назарына ұсынды. Еліміздің жарқын болашағы үшін діннің маңызы, дінаралық сыйластық турасындағы іс-шаралар барлық балалар аула клубында да өтті, — деді Дәулеткерей Атауұлы.

Жастарды жұмыспен қамту туралы баяндама жасаған облыстық жұмыспен қамтуды үйлестіру және әлеуметтік бағдарламалар басқармасының басшысы Жанат Асантаевтың айтуынша, жастар арасындағы жұмыссыздықпен күрес – бүгінгі күннің басты мәселелерінің бірі. Қазіргі таңда облыс бойынша жұмыссыздардың саны 16329 адамды құраса, соның 3609-ы – жастар. Жыл басынан бері жұмысқа орналасу мақсатында жолыққан 8240 жастың 82 пайыздайы жұмыспен қамтудың белсенді шараларына тартылды. Яғни 4812 жан жұмысқа орналастырылып, 1378 жас қоғамдық жұмысқа тартылса, 558-і кәсіби оқуға жолданды. «Жұмыспен қамту — 2020 жол картасы» бағдарламасы аясында 63 жас 144,9 млн. теңге көлемінде шағын несие алды. Атқарылған жұмыстар нәтижесінде жастар арасындағы жұмыссыздық деңгейі биылғы үшінші тоқсанда 4,0%-ды құрады, өткен жылдың сәйкес кезеңімен салыстырғанда ол 0,2%-ға төмендеді.

Кеңес соңында ақпараттық-түсіндіру топтарының іс-шараларына белсенді қатысқан қоғамдық ұйымдар мен діни бірлестік өкілдері алғысхаттармен марапатталды. Сондай-ақ еліміздегі дінаралық келісімді нығайтуға қосқан үлесі үшін облыстық дін істері басқармасының басшысы Талғат Нығметовке Астана және Қазақстан митрополиті Александрдың алғысхаты мен арнайы орден табысталды.

Сәкен ӘБІЛХАЛЫҚОВ,

«Орал өңірі»