Ұлы далада азаттықтың ақ таңы атқалы бері Зеленов ауданының барлық 22 округі көгілдір отынмен қамтылды. Биыл Горбунов, Кирсанов, Мирное, Павлов, Владимировка, Кіші Шаған, Кожевников және Факел ауылдарын газдандыруға аудандық бюджеттен қаражат бөлу жоспарда тұр.

Ал  ауыз су жүргізу 26 елді мекенді қамтыған. 2017 жылға республикалық бюджет қаражатынан Володар, Көшім, Щапов, Павлов, Дариян, Ақжол елді мекендеріне су құбырларын өткізу көзделуде. Сондай-ақ «Нұрлы жол» бағдарламасы барысында Ұлттық қордан бөлінген 258 миллионнан астам қаражатқа Володар және Переметный ауылынан жер кезегінде тұрған тұрғындарға жеке үй салу жоспарланған еді. Міне, сол жоспардың алды бүгінгі таңда қолға алынды. Мысалға, Володар ауылындағы 362 жер теліміне 100 млн. 241 мың теңгеге электр желісін тарту жұмыстары басталды. Ал Переметный ауылындағы 200 жер теліміне 60 млн. 209 мың теңге қаржыға су құбыры, 98 млн. 563 мың теңгеге электр желісін тарту жұмыстары  қолға  алынды.

Денсаулық саласына келер болсақ, аудандық орталық аурухана, аудандық аурухана, 10 дәрігерлік амбулатория, алты фельдшерлік-акушерлік және 37 медициналық пункт бар. Пилоттық жоба негізінде аурухана аумағында «Қаз.Мед.Информ» электронды құжаттама  бағдарламасы енгізілген. «Жедел медициналық жәрдем» аутокөлігінде олардың жүру мониторингін бағыттауға арналған GPS жүйесі орнатылып, шақыруларға уақтылы қызмет көрсету мақсатында «Жедел медициналық жәрдем» қызметі рациямен жабдықталған. Қазіргі күні аудандық орталық аурухана аумағында хирургиялық, гинекологиялық, отоларингологиялық, лапроскопиялық оталар жасалып, асқазан-ішек ауруларына эндоскопиялық, ультрадыбыстық зерттеулер жүргізілуде. Аудан орталығында жаңа аурухана тұрғызылып,  Зеленый, Мичурин, Үлкен Шаған, Трекин сияқты ауылдарда амбулаториялар халыққа есігін айқара ашты. Осының бәрі – тәуелсіздіктің жемісі.

Бұдан басқа Переметный ауылындағы мәдениет үйі, Белес, Үлкен Шаған және Зеленый, Железнов округіндегі клуб секілді бірқатар мәдениет ошақтарына күрделі жөндеу жұмыстары жүргізілді. Биыл да бірнеше нысан күрделі жөндеуден өтті. Олардың алғашқысы – Рубежин ауылдық клубы. Біраз жылдан бері жөндеу көрмеген ғимарат биыл жаңа кейіпке енді. Осы күні жөндеу жұмыстарының біраз бөлігі аяқталды. Бұл мақсатқа республикалық бюджеттен 64 миллион 375 мың, жергілікті бюджеттен 21 миллион 45 мың теңге қаражат бөлінді. Сондай-ақ өткен ғасырдың алпысыншы жылдары салынған Переметный мектебі де ағымдағы жылы күрделі жөндеуден өтті. Әбден тозығы жеткен білім ордасын жаңа кейіпке келтіру жұмыстарына барлығы 137 миллион теңгенің үстінде қаржы  жұмсалған. Озерный ауылындағы 47 орынға арналған білім ошағының құрылысы да қарқынды жүруде. Бұған дейінгі жылдары Асан, Трекин ауылдарында да жаңа мектептердің бой көтергендігін айта кеткен  жөн.

Аталған жұмыстардың игілігін тек мәдениет қызметкерлері мен мектеп оқушылары ғана емес, ауыл азаматтары да көрді. Мемлекеттік «Жұмыспен қамту – 2020 жол картасы» бағдарламасы аясында жүзеге асырылған Рубежка клубының жөндеу жұмысына 14 адам жұмылдырылса, Переметный мектебінде 37 адам ырыздық тапты. Мерейлі жыл қарсаңында аудан орталығындағы орталық стадион мен орталық алаң абаттандырылды. Стадионның сәнін кіргізуге жергілікті бюджеттен 35 миллион 153 608 теңге бөлініп, бұл қаражат баскетбол алаңын жөндеп, газон төсеуге, жаңа орындықтар мен жүгіру жолағын және айналасын қоршауға жұмсалған.  Тозығы жеткен орталық алаңды абаттандыру ісіне бөлінген 52 миллион қаражат та жергілікті бюджеттен қарастырылды.

Абаттандыру жұмыстары тек аудан орталығында ғана емес, ауылдық округтерде де қарқынды жүруде. Мысалы, Трекин ауылында «Өңірлерді дамыту» бағдарламасымен балалар ойын алаңы пайдаланылуға берілсе, Мичурин округі орталығындағы Қазақстан, Комсомол, Ленин көшелеріне асфальт төсеу ісі қолға алынды. Алғашқысына 2 миллион теңге жұмсалса, ауыл көшелерін түзеу жұмыстарына 182 миллион 963 мың теңге қажет болып отыр. Бұл қаражаттың 122 миллион 919 мың теңгесі ел бюджетінен қарастырылған.  Алдағы уақытта ауылішілік жолдарды жөндеуге  қажет қаржының қалған бөлігін облыстық бюджеттен бөлу көзделіп отыр.

Дәл бүгінгі уақытта Мичурин, Макаров ауылдық округтеріне қарасты Зеленый және Садовое ауылдары тұрғындарын Орал қаласымен байланыстыратын аспалы көпір құрылысы басталды.

Сондай-ақ Елбасының тікелей қадағалауымен іске асырылып жатқан «Нұрлы жол» бағдарламасы аясында аудан орталығын облыспен байланыстыратын күре жол қайта салынуда.  Ауданымыздың бірқатар ауылдарында айналма жолдар мен ауылішілік жолдардың жөнделіп, жақсарғандығына тұрғындар дән риза.

Аудан аумағында кәсібін дөңгелетіп отырған ірілі-ұсақты кәсіпорындар мен шаруа қожалықтарының иелері ауданда оздырылатын шараларға қаржылай көмек көрсетуді де еш ұмытпайды. Олардың қатарында Железнов ауылы мектебінің ауласын қоршап, ішін сәндеуге қомақты қаражат бөлген Қайыржан Киргенев, Краснов ауылы тұрғындарының алғысын алған Бейбіт Асанов, Янайкин ауылында өтетін барлық шараларды қаржыландыратын, өнер мен тіл жанашыры атанған Тілек Залмұқанов, биыл үздік меценат атағын иеленген Нұрлыбек Хайруллин сияқты кәсіпкерлер бар.

Аудан аумағында кәсібін дөңгелетіп отырған 2627 шағын және орта бизнес субъектілері тіркелген. Ол жерлерде 4566 адам жұмыс жасап отыр. Ауыл шаруашылығы өнімін өндіретін аудан аумағындағы 46 шағын цехта 320 адам нәпақасын тауып жүр. Сол цехтар биыл 275,3 миллион теңге көлемінде өнім шығарған. Кәсіпкерлік саласы жыл санап дами түсуде. Биылдың өзінде аудан аумағында «Дубрава» демалыс кешені, «BKKS LPG» ЖШС көмірсутек газ толтыратын стансасы, екі кафе, бір дүкен, бір банкет залы және бір интернет клубы сияқты алты жаңа кәсіпкерлік нысаны пайдалануға берілген. Сондай-ақ 1 миллион теңге көлеміндегі грантты жергілікті кәсіпкерлер ұтып алды. Оның алғашқысы Жанар Хабибуллаева «Прогресс» оқыту орталығын ұйымдастырса, екіншісі Әсем Темірбекова аудан орталығынан «Әсем-ай» фитнес орталығын ашты. Қазіргі таңда бұл нысандар жұмыс жасап тұр.

Кәсіпкерлік саласы ел экономикасының қозғаушы күшінің бірі екенін ескерсек, бұл салада атқарылып жатқан жұмыстар көп. Қазірдің өзінде «Даму» кәсіпкерлікті дамыту қоры» АҚ Батыс Қазақстан филиалы арқылы экономикалық шикізат емес секторында кәсіпкерлікті теңдестіру, өсіру және қаржыландыруын қамтамасыз ету үшін 1 миллиард теңге бөлінген. Аудан аумағында кәсіпкерлікті дамытуға жұмсалатын бұл қаражат осы күні екінші деңгейдегі банктерге аударылған.  Алдағы уақытта жоғарыда аталған қаржыны алмаққа өтінім берген «Авангард» ЖШС ауыл шаруашылығын, «Автотрансзапад» ЖШС жүк тасымалдау ісін және ««Саят» этнотуристік орталығы» ЖШС туризм саласын дамытуды қолға алмақ. Бұл – жаңа  жұмыс орындары ашылады деген сөз. Сондай-ақ ағымдағы жылы тағы бірнеше индустрияландыру жобалары қолға алынатын болады. Олардың ішінде қуаттылығы жылына 30 және 15 миллион дана кірпіш шығаратын қос зауыт пен жылына 6 мың тонна құс етін өндіретін құс фабрикасы бар. Осы нысандар іске қосылған жағдайда ауданда тағы 200 адам жұмыспен қамтылатын болады.

Түгелбай  БИСЕН,

Зеленов  ауданы

Бүгіндері аутокөлік тізгінін ұстаған қыз-келіншектерді көп кездестіреміз. Тіпті олар ер-азаматтарға қарағанда, көлікті таза ұстап, ұқыпты жүргізеді екен.

Тарихқа жүгінер болсақ, ең алғаш көлік айдаған келіншек ХХ ғасырдың басында аутокөлік ойлап тапқан және аутокөлік өндірісінің пионері, әйгілі неміс инженері Карл Бенцтың жары Берта екен. Ол жұбайы ойлап тапқан үш дөңгелекті көлікке отырып, балаларын көрші ауылға алып барған. Тіпті жолда істен шыққан машинаны жөндеп алған көрінеді. Қазір сол Берта ханшайымның ізін басқан қыз-келіншектеріміз көлігінің арқасында табыс тауып та жүр. Сондай жандардың бірі — Зеленов ауданы Переметный ауылында ашылған «Надежда» таксиінде жүргізуші болып жүрген Марина Грецкая. Нәпақасын көлік басқарудан тапқан жан осыдан сегіз жыл бұрын рульге отырған.

— Машина жүргізгеніме біраз жыл болды. Балаларым да өсті. Неге көлігім арқылы табыс таппасқа деп шештім де, жаңадан ашылған «Надежда» таксиіне жұмысқа тұрдым. Босқа үйде отырғанды ұнатпаймын. Такси жүргізушісі болғанда тұрған ештеңе жоқ. Бастысы, тұрақты жұмыс болып, табыс түсіп тұрғаны. Ал жалқаудың ертеңі бітпейді. «Алма піс, аузыма түс» деп жататын заман емес қазір. Қарап жатқан жанға ешкім ештеңе алып бермейтінін ұққанымыз жөн, — дейтін Марина осы күні Переметныйдың барлық көшелерін жаттап алған. Қалаған жеріңе ән сағатта жеткізеді. Тіпті облыс орталығына да апарып келе алады.

Ол жұмысқа алғаш кіріскен кездері көп адам рульде отырған жүргізушінің қыз бала екеніне таңданыспен, күдікпен, сынай қарағанын жасырмайды. Ал осы күні халық үйренген. Тіпті әдейі таксист қызды шақыратын кездер де кездесетін көрінеді. Маринаның жолдасы Геннадий көліктің ақауын өзі жөндейді екен.

– Мен дөңгелек ауыстыру, майын қарап, суын тексеру сияқты жұмыстарды өзім жасай беремін. Ал қатты істен шығып жатса, жұбайым көмектесуге әрқашан да дайын. Ол менің такси жүргізушісі болып жүргенімді қолдайды. Отағасы қиын кезде қолұшын беруге дайын тұрғаны әйел адамға қосымша күш береді ғой. Сондықтан жарымның жаңа жұмысыма түсіністікпен қарағаны үшін ризамын, — дейді Марина.

Таңғы сағат 7-ден түнгі 12-ге дейін көлік тізгінінде отыру кім-кімге болса да оңай емес. Бірақ таксист келіншек барлығына төзеді. Неше түрлі мінез көрсететін жолаушылардың да көңілін таба алады. Арасында балаларына қарап қоюды да ұмытпайды. Әрқашан жайдары мінез танытып, жұмысын ұқыптылықпен орындайтын таксист бикешті мақтаушы жандар көп. Оның көлігіне отырған әр жолаушы Маринаның әңгімешілдігі мен сыпайылығына, жауапкершілігіне риза болады. Барлық таксист осындай болса ғой, шіркін…

Түгелбай  БИСЕН,

Зеленов  ауданы

Жадыраған жаз бен қоңыр күз де өтіп, қылышын сүйреткен  қыс та келіп қалды. Үш ай, кейде одан да ұзайтын жылдың осы бір суық мезгіліне жан-жануар да, тіпті өсімдіктер дүниесі де алдын ала дайындалады. Тіршілікті айтпағанда, күнделікті аяқ артып жүрген темір тұлпарларымыздың өзін қыс мезгіліне тыңғылықты дайындау да — маңызды іс.

Ағымдағы жылдың қазан айының соңғы күндері аяқ астынан жауған қардан көліктер жол үстінде тайғанақтап,  соқтығысып қалғаны белгілі. «Сақтықта қорлық жоқ» дейтін көлік иелері болса, темір тұлпарларын қазірден қысқа қамдап жатыр. Қараша айының екінші онкүндігінде жауған қардан кейін дөңгелек жөндеу нысандарында көліктерінің дөңгелектерін ауыстырушылардың саны күрт көбейгені белгілі. Көлік дөңгелектерін  ауыстыру қызметінің құны дөңгелек резеңкесінің көлеміне байланысты. Отандық, жеңіл аутокөліктердің әр дөңгелектерін ауыстыру құны 1000-1500 теңге болса, көліктің түріне қарай бағасы да жоғарылай береді. Ал дайын дөңгелекке тікенек жапсыру арзанға шығады екен. Бұл мәліметтерді бізге Шолохов көшесі бойындағы шиномонтаждардың бірінде жұмыс жасайтын Бейбіт Ғұмаров есімді жігіт баяндап берді.

— Негізі, көлік дөңгелектерін қысқы мерзімге уақтылы ауыстырған дұрыс. Оларды дер кезінде айырбастау ауа райының қолайсыз, көктайғақ кезінде көлік басқарушының өзін де, айналасындағыларды да апаттан қорғауға көп септігін тигізеді. Тек көлік иелерінің көпшілігі бұл іске аса мән бермейді. Көлік дөңгелектерін айырбастағанда оның сапасына, қысымына да назар аудару қажет. Сонымен қатар көлік қозғалтқышына қысқы май, әйнегін жуар жүйесіне қатпайтын сұйықтық құю, беріліс қорабы мен гидрокүшейткіштердің майын қадағалау, аккумулятордың қуаттылығын тексеру, жанармай сүзгілерін айырбастауды да естен шығармаған жөн. Бір сөзбен айтқанда, адам баласы күн суықта жылы сырт киім, жылы аяқ киім киетіні секілді көліктерге де күтім көрсету қажет. Қысқасы, уақтылы қимылдап, аутоарғымағын сайлап алған жүргізуші қыстан қысылмай шығатыны анық, — дейді аутокөлік маманы.

Айта кетейік, көлік дөңгелектерін уақтылы ауыстыру Кедендік одақтың регламентінде де қарастырылған. 2011 жылғы 9 желтоқсандағы №877 Кедендік одақ комиссиясы шешімінің 5.5-тармағының талаптарына сай қысқы мерзімде, қысқы дөңгелектермен жабдықталмаған көлік құралдарын пайдалануға тыйым салынады. Жазғы дөңгелектерді қысқы мерзімдікке айырбастамағандарға ҚР Әкімшілік құқықбұзушылық кодексінің 590-бабының (Көлік құралдарын пайдалану ережесін бұзу) 5-бөлігі бойынша 5 АЕК мөлшерінде айыппұл төлеу жауапкершілігі қарастырылғандығын да естен шығармаған жөн.

Нұрбек  ОРАЗАЕВ,

«Орал  өңірі»

Бейсенбіде «Галактика» кинотеатрында “28 панфиловшылар” фильмінің тұсаукесері өтті. Патриоттық тәлім-тәрбиеге толы бұл фильмді тамашалауға Орал қаласының басшылығы мен қалалық мәслихаттың депутаттары, ҰОС ардагерлері  мен қоғам қайраткерлері және қаладағы төрт мектептің оқушылары келді.

“28 панфиловшылар” фильмінде 1941 жылдың 16 қарашасында Мәскеуді неміс фашистерінің шабуылынан қорғаған 316-атқыштар дивизиясының кеңестік 28 жауынгері (қолбасшысы генерал Иван Васильевич Панфилов) көрсеткен ерлік істері баяндалады.

Фильмді Қазақстан Республикасының Мәдениет және спорт министрлігі мен Ресей Федерациясының Мәдениет министрлігі бірігіп дайындаған. Қоюшы режиссерлері Ким Дружинин және Андрей Шальопа.

16-армияның құрамында Алматыда жасақталған генерал-майор И. Панфилов басқарған 316-атқыштар дивизиясы (кейіннен 8-гвардиялық панфиловшылар дивизиясы) Мәскеу түбіндегі Волоколам тас жолын қорғады. 1941 жылы 16 қарашада жау Волоколам бағытында ұрысқа шығып, Дубосеково разъезіндегі 1075-атқыштар полкі 4-ротасының 2-взводы тұрған бекініс шебіне шабуыл жасады. Ротаның саяси жетекшісі Василий Клочков басқарған взвод жауынгерлері – барлығы 28 адам винтовкамен, жанармай құйылған шөлмектермен, гранаталармен қаруланып, жаудың 20 танкісімен төрт сағатқа созылған ұрыс жүргізді. Жаудың 14 танкісі қиратылып, панфиловшылардан да біраз адам қаза тапты. Жау ұрысқа тағы 30 танк шығарды. Көп адамынан айырылған қазақстандық жауынгерлер соғыс тарихында өте сирек кездесетін ерлік жасап, бұған да төтеп берді.

Нәтижесінде  28 панфиловшылардың 23-і қазаға ұшырады, бірақ жау танкілері олардың шебінен өте алмады…

«Отан үшін жан пида!» деп өліспей беріспеген батырларын халқы ұмытқан жоқ. Елімізде батырлардың есімімен аталатын мектеп, ауыл, аудан, көшелер мен Алматы қаласында саябақ бар. Алматы қаласындағы 28 панфиловшы-гвардияшылар саябағында, Мәскеу түбіндегі Дубосеково разъезінде және батырлардың туған жерінде ескерткіштер орнатылып, мемориалдық музей  ашылған.

Сұрапыл жылдардағы хроникалық деректерге толы жаңа фильм барша көрерменге қатты әсер етті. Үлкендер жағы «Мұндай қанды қырғынды енді ешкімнің басына бермесін!» десе, жастар жағы «Соғыстың керегі жоқ. Бейбіт күн жасасын!» деп тіледі. Мұны біз аталмыш фильмнен кейін көрермендермен тілдескенде де олардың лебізінен  байқадық.

Фильм  аяқталысымен, сөз алған қала әкімінің орынбасары Марс Сатыбалдиев көрермендерге Ұлы Отан соғысы жылдарындағы Кеңес әскерлерінің, соның ішінде қазақстандық жауынгерлердің ерлігіне бас иетінін айтып, жас жеткіншектерге олардың батырлығын, ерлік істерін үлгі етсе, ҰОС ардагері Иван Гапич сонау зобалаң жылдарды еске алып,  халқымызға енді ондай күндерді көрсетпесін деп тіледі.

Айша  ӨТЕБӘЛІ,

«Орал  өңірі»

Хамза  САФИН,

Ұлы  Отан  соғысының  ардагері, Орал  қаласының  құрметті  азаматы:

– Жаңағы кинода көрсетілген деректердің бәрі рас, шамасы, киноны қоюшылар сол кездегі хроникалық деректерді пайдаланған-ау деймін. Бұлай дейтінім, мен 1942 жылы жаяу әскерлер училищесінің курсанты болдым. 1943 жылдың мамыр айында Оңтүстік-Батыс майданына жолдандым. Сол кездері біз панфиловшылардың ерлігі баяндалған осындай кинохроникаларды жиі көретінбіз. Олардың ерлігі, Отанға деген сүйіспеншілігі майдан даласында жүргендердің бәріне үлгі болатын. Біз екінші дүниежүзілік соғыста Жеңіске ынтымақ-бірліктің нәтижесінде қол жеткіздік. Бүгінгідей дағдарыс дендеген кезде барша халық бірігіп қимылдау керек. Сонда ғана берекелі тірлік болмақ. Соғыс кезінде де, одан кейінгі ауыр жылдарда да небір қиын уақыттарды бастан өткердік.  Біздің  көргенімізді  кейінгі  ұрпақ  көрмесін  деп  тілеймін.

Әлібек  ӘЖМАҒАМБЕТ,

Орал  қалалық  мәслихатының  депутаты:

– Бұл фильмді ұжым боп тамашалауды панфиловшылар ерлігіне 75 жыл толуына байланысты қалалық әкімдік қызметкерлері мен қалалық мәслихаттың депутаттары бірігіп ұйымдастырды. Ондағы мақсатымыз – алдыңғы толқын ағалардың ерлігін, қайсарлығын кейінгі ұрпаққа насихаттау, олардың ерлігін жас ұрпаққа жеткізу арқылы панфиловшылардың есімін тарихта мәңгіге қалдыру. Бұл жерде ешқандай саяси астар жоқ, бар болғаны балалар тарихты білсін дейміз. Жасөспірімдер осы фильм арқылы Мәскеу түбіндегі Волоколам тас жолының қалай қорғалғанын көрді. Аталмыш кино бүгін еліміздің барлық кинотеатрларында  көрсетілуде.  Фильм  маған  қатты  ұнады.

Гүлназым  ҒАРИФУЛЛИНА,

№10  қазақ  орта мектебінің 6-сынып  оқушысы:

– Маған 28 панфиловшылар туралы кино қатты ұнады. Бұл фильмді қарап отырып, нағыз қан майданның қандай болғанын сезінгендей болдық. Отан үшін отқа түскен жауынгерлердің жанкешті тірлігін көріп, қатты аядым. Соғысқа қатысып, елімізді, жерімізді қорғаған ата-бабаларымыз қандай құрметке де лайық. Бейбіт өмірге жететін ешнәрсе  жоқ.  Енді  соғыс  болмасын  деп  тілеймін!

SONY DSC

Қазыбай БОЗЫМОВ,

ауыл шаруашылығы ғылымдарының докторы, профессор:

– Сәрсенбінің сәтті күні Парламент палаталарының бірлескен отырысында қабылданған Тәуелсіздік декларациясы егемен еліміздің 25 жыл ішінде алған ұлан-асыр асуларын кезең-кезеңімен көрсете  білген  қабырғалы  құжат  болды.

Мұнда Елбасының жол, жөн көрсетуімен ширек ғасырлық кезеңде қол жеткізілген табыстар, Қазақстанның халықаралық қоғамдастық арасындағы абыройының өсе түскені нақты дәйектермен көмкерілген. Осы уақыттың аралығында елімізде тиімді демократиялық институттар, президенттік институт, Парламент, сот жүйесі және белсенді азаматтық қоғам қалыптасқаны айтылған.

Әрине, тәуелсіздік жылдарында алған асуларымыз, ең біріншіден, Елбасының сарабдал саясатының арқасында және орнықты да тұрақты даму жолы белгіленіп іске асырылуында десек, қателеспейміз. Осы арада Мемлекет басшысы Нұрсұлтан Назарбаевтың кісілігі мен кішілігіне тағы бір мәрте куә боламыз. Өйткені Нұрсұлтан Әбішұлы мұны мен істедім демейді. Қазақстанның тәуелсіздік жылдарындағы жетістіктері терең түсіністік арқылы қол жеткізілген бәріміздің ортақ табыстарымыз деп бағалайды.

«Мен істедім дегенше, мың істеді десеңші» деген белгілі қағидат бар емес пе? Елбасының осы қағидатты қашанда басты назарда ұстай білетініне тағы бір мәрте куә болып отырмыз. Мысалы, Елбасымыздың: жалғыз адам не өндіреді, не істей алады? Әрине, ештеңе тындыра алмайды. Оны қолдайтын қалың ел болмаса, деп жүрегінің түкпіріндегі кіршіксіз ойын жеткізіп берді кеше Елбасымыз барша қазақстандықтарға.

Ал Қазақстанның даму кезеңдері, тәуелсіздік жылдарындағы жетістіктері туралы Тәуелсіздік декларациясы қабылданған болса, мұның жөні бір бөлек. Бұл өте қажет құжат деп тұжырымдайды Елбасы. Біз де Мемлекет басшысының осы ойлы сөзін қолдаймыз. Бүгінгі күнге дейінгі жеткен табыстарымызды келешек ұрпаққа аманаттау – парыз. Осы орайда  Парламент палаталарының бірлескен отырысында қабылданған Тәуелсіздік декларациясының қабырғалы  құжат  ретіндегі  орны  бөлек  деп  санаймын.

Наджаф  МАМЕДОВ,

«Бірлік»  әзірбайжан мәдени-ағарту қоғамы»  бірлестігінің  төрағасы:

– «Қазақстан Республикасы Тәуелсіздігінің 25 жылдығы декларациясының» қабылдануы – еліміз үшін елеулі оқиға. Егемендікті нығайтуда Елбасының еңбегі зор. Әсіресе, экономика секторын жандандыру бағытында елеулі істер атқарылуда. Мемлекетіміз қиындықты еңсеріп, шешуші кезеңде  стратегиялық бағыт-бағдарын айқындап алып отырады. Тәуелсіздік жылдары шағын және орта бизнестің дамуына барынша жағдай жасалды. «Нұрлы жол» мемлекеттік бағдарламасы аясында республикадағы автожолдардың жөнделіп, сәулетті құрылыстардың бой көтеріп жатқаны, инфрақұрылымдардың күтімге алынғаны, елдің түкпір-түкпірінде әлеуметтік мәселелердің шешімінің табылуына негіз болуы – жаңа экономикалық саясаттың нәтижелі екеніне бірден-бір дәлел.

Ұлт көшбасшысы дербес мемлекет ретінде ұлттық мүддеміздің жаһанға танылуына елеулі ықпал етуде.  Біз – тұрақтылық пен татулықты тұғырға бекіткен бейбіт елміз. Елбасымыздың «Мәңгілік ел» идеясын қолдай отырып, жалпыға ортақ еңбек қоғамын нығайтуға әр азамат үлес  қосқаны  жөн.  Тәуелсіздігіміздің  25  жылдығы  құтты  болсын!

Вячеслав  ИНОЧКИН,

облыстық  мәдениет  және  мұрағат,  құжаттамалар  басқармасы  басшысының  орынбасары:

– ҚР Парламентінің қос Палатасы бірлесе жариялаған «Қазақстан Республикасы Тәуелсіздігінің 25 жылдығы декларациясын» мұқият оқып шықтым. Аса маңызды саяси құжат. Онда ел дамуының белестері жүйелі көрсетіліп, әр сатыда не тындырылғаны туралы кеңінен түсінік берілген. Мұның өзі еліміздің  қоғамдық  өміріне  тың  серпіліс бермек.

Әрине, бұл тарихи құжатты түгел қайталап шығу мүмкін емес. Соның тек жекелеген тұстарына тоқталғанды жөн көрдім. Мәселен, «Қазақстанда тиімді демократиялық институттар – президенттік институт, Парламент, сот жүйесі және белсенді  азаматтық қоғам қалыптасты» сынды сөз тіркестерінде қандай терең мағына жатыр! Өйткені, міне, ширек ғасыр бойы біз соның жемісін тұтынып келеміз. Күнделікті өмірде сол билік және заң үстемдігінің ықпалын сезініп отырамыз. Қазақстанның әлемнің бәсекеге ең қабілетті 50 елінің қатарына  енгендігі  туралы  да  өте  орынды  айтылған.

Сөз жоқ, әр мемлекет үшін ең маңыздысы – оның қауіпсіздігі. Ал аталмыш құжатта «Қазақстан ядролық қауіпсіздік рейтингінде ең қауіпсіз елдердің қатарына кіреді» деп, тайға таңба басылғандай айтылған. Егер кез келген ел, халық өзін соғыстан қауіпсіз сезінсе, қандай ма болсын жарқын мақсаттарды жүзеге асыруға жол ашық. Бұл – тәуелсіз Отанымыз үшін аса қажетті ахуал. Ендігі арманымыз – қашанда еліміз бейбіт жағдайда өмір сүріп, Елбасымыз Н. Назарбаевтың көрегенділік басқаруымен ол белгілеген «100 нақты қадам» Ұлт жоспарын  ойдағыдай  жүзеге  асыруға  жеткізсін!

Қазақстан Республикасыныӊ Парламенті Қазақстан Тәуелсіздігін халқымыздыӊ аса зор құндылығы ретінде бағалай отырып, Тәуелсіз Қазақстанды құру және қалыптастыруда ерен еӊбек сіӊірген Қазақстан Республикасыныӊ Тұӊғыш Президенті — Елбасы Нұрсұлтан Әбішұлы Назарбаевтыӊ стратегиялық бағытына берік ұстанымын таныта отырып, «Қазақстан-2050» Стратегиясыныӊ басты мақсатына жетуді болашақ ұрпақ алдындағы өзініӊ тарихи парызы және жауапкершілігі деп сезіне отырып, «Мәӊгілік Ел» қастерлі мекенінде жарқын келешегімізді жасауға ұмтыла отырып, Қазақстан Республикасы Тәуелсіздігініӊ жиырма бес жылдығы Декларациясын қабылдайды.

 * * *

Тәуелсіздіктіӊ 25 жылдық мерейтойы — өз тарихында тұӊғыш рет заманауи мемлекет құрған Қазақстан халқыныӊ ауқымды тарихи жетістіктерініӊ жарқын көрінісі. Қазақстан үшін Тәуелсіздіктіӊ жиырма бес жылы ілгерілеу мен орнықты дамудыӊ кезеӊі болды. Тәуелсіз Қазақстан өзініӊ жаӊа тарихымен табысты мемлекет және бүкіл Орталық Азия өӊірініӊ көшбасшысы атануға құқығы бар екендігін дәлелдеді.

Өз Тәуелсіздігініӊ 25 жылында Қазақстан экономикасы қарқынды дамыған, табысқа жетудіӊ бірегей тәжірибесі бар саяси тұрақты мемлекет ретінде қалыптасты. Біздіӊ елімізде экономикалық, саяси және әлеуметтік салаларда аса ірі өзгерістер жүзеге асты. Тәуелсіз Қазақстанныӊ барлық жетістіктері мен жеӊістері Қазақстан Республикасыныӊ Тұӊғыш Президенті — Елбасы Нұрсұлтан Әбішұлы Назарбаевтыӊ тегеурінді және дана басшылығымен әрбір қазақстандықтыӊ табанды да тынымсыз еӊбегініӊ арқасында мүмкін болды. Президент Н.Ә. Назарбаевтыӊ саяси ерік-жігері және стратегиялық көрегендігі дамудыӊ қазақстандық үлгісініӊ табысты болуын айқындап, Қазақстанныӊ орнықты өсіп-өркендеу жолына шығуына мүмкіндік тудырды. Еліміз «Қазақстан-2050» Стратегиясын дәйекті түрде жүзеге асыра отырып, әлемніӊ озық 30 елініӊ қатарына қосылуға қарышты қадам басуда. Мемлекет басшысыныӊ байыпты және жемісті халықаралық бастамаларымен еліміз биік халықаралық беделге ие болып, ғаламдық ядролық қарусыздану қозғалысыныӊ танымал көшбасшысына айналды.

* * *

1991 жылы 16 желтоқсанда Парламент «Қазақстан Республикасыныӊ мемлекеттік тәуелсіздігі туралы» Конституциялық заӊды қабылдады.

Тәуелсіз Қазақстанныӊ бұл тұӊғыш құжаты халқымыздыӊ қуатты және пәрменді мемлекет құру арманыныӊ жүзеге асуын айғақтады. Заӊ Қазақстан егемендігініӊ оныӊ ұлан-ғайыр аумағында және әлемніӊ саяси картасында мызғымастығын мәӊгілікке бекітіп берді.

Еліміздіӊ басты құжаты — Қазақстан Республикасы Конституциясын 1995 жылғы 30 тамыздағы референдумда бүкіл Қазақстан халқы бірауыздан қабылдады.

Конституция егемендіктіӊ саяси және құқықтық негіздерін бекітіп, адамныӊ өмірін, құқықтары мен бостандығын, тегіне, әлеуметтік жағдайына, нәсіліне, ұлтына, тіліне, дінге қатыстылығына қарамастан, адам мен азамат құқықтарыныӊ теӊдігін мемлекеттіӊ жоғары құндылықтары деп жариялады. Тәуелсіз Қазақстанныӊ Конституциясы мемлекет пен қоғамныӊ тұрақтылығы мен өркендеуініӊ мызғымас негізіне айналды.

Қазақстанда тиімді демократиялық институттар — президенттік институты, Парламент, сот жүйесі және белсенді азаматтық қоғам қалыптасты.

Елімізде жаһандық сын-қатерлерге төтеп беруге және бүкіл қоғамныӊ мүдделерініӊ жүзеге асуын қамтамасыз етуге қабілетті мемлекеттік құрылымныӊ тиімді жүйесін құруға мүмкіндік берген тарихи маӊызды экономикалық және саяси реформалар жүргізілді. Тәуелсіздіктіӊ алғашқы күндерінен бастап еліміздіӊ саясаты ұзақ мерзімге негізделді, қазақстандықтардыӊ әл-ауқаты, өмірдіӊ жоғары сапасына жүйелі де мақсатты ұмтылысы оныӊ басты ұстанымдары болды және солай болып қала береді.

Қазақстан әлемніӊ бәсекеге еӊ қабілетті 50 елініӊ қатарына енді.

Әлемніӊ еӊ дамыған 30 елініӊ қатарына кіруді мақсат етіп қойған «Қазақстан-2050» Стратегиясы жаӊа сипаттағы стратегиялық құжат болып табылады. Мемлекет басшысыныӊ «100 нақты қадам: баршаға арналған қазіргі заманғы мемлекет» Ұлт жоспары әлемдік қаржы жүйесіндегі аса жағымсыз құбылыстарға қарамастан, елімізде өндіріс пен инновацияны, әлеуметтік саланы дамытуға және жұмыс орындарын ашуға мүмкіндік береді.

Қазақстан ядролық қауіпсіздік рейтингінде еӊ қауіпсіз елдердіӊ қатарына кіреді.

Президент Н.Ә. Назарбаев Қазақстанды еліміздіӊ ұлттық мүдделеріне нұқсан келтірместен ядролық қарусыз мемлекетке айналдыру жөніндегі тарихи маӊызды міндетті шеше білді. 1991 жылғы 29 тамызда Елбасы Семей ядролық полигонын жапты. Қазақстан Президенті өз елініӊ ғана емес, сондай-ақ бүкіл адамзаттыӊ тағдыры үшін өзіне жауапкершілік ала отырып, әлемдік деӊгейдегі саясаткер ретінде танылды.

Семей полигоныныӊ жабылуымен ядролық қаруды таратпаудыӊ және қарусызданудыӊ жаһандық процесініӊ жаӊа кезеӊі басталды. Қазақстанныӊ бастамасы бойынша БҰҰ 29 тамызды Ядролық сынақтарға қарсы іс-қимылдыӊ халықаралық күні деп жариялады. Қазақстан ядролық қаруды таратпау режимін нығайту жөніндегі нақты ұсыныстарын алға тартып, Ядролық қарусыз әлемніӊ жалпыға ортақ декларациясын қабылдауды ұсынды.

Тәуелсіздіктіӊ 25 жылында қазақстандық дипломатия әлем елдерініӊ басым бөлігімен сенімді достық және ынтымақтастық қарым-қатынастар орнатып, халықаралық ұйымдардыӊ қызметіне белсенді түрде араласып келеді.

Біздіӊ еліміз әлемдік қоғамдастықта орнын нық айқындап, лайықты құрмет пен беделге ие болып отыр. Әлемде аумағы жөнінен тоғызыншы орын алатын Қазақстан Республикасыныӊ шекарасын делимитациялау мен демаркациялау Президент Н.Ә. Назарбаевтыӊтарихи жетістіктері болып табылады. Қазақстан өӊірлік және жаһандық процестердіӊ белсенді қатысушысы бола отырып, халықаралық қауіпсіздікті нығайтуға қомақты үлес қосуда.

«Еуропаға жол» мемлекеттік бағдарламасын жүзеге асыру Қазақстанныӊ Еуропаныӊ жетекші мемлекеттерімен әріптестік пен ынтымақтастықтыӊ барынша жоғары деӊгейіне шығуына жол ашты. Қазақстан ынтымақтастықтыӊ еуразиялық көпіріне айналды.

Біздіӊ еліміз ЕАЭО, ШЫҰ, АӨСШК секілді интеграциялық жобалардыӊ бастамашысы және ілгерілетушісі болып табылады.

Қазақстан ЕҚЫҰ, ИЫҰ, ЕАЭО, ШЫҰ, ТМД, ҰҚШҰ, АӨСШК және Түркі кеӊесі сияқты ірі халықаралық ұйымдарда табысты төрағалық етудіӊ тәжірибесіне ие.

Тәуелсіздігініӊ 25 жылдығы қарсаӊында Қазақстан Орталық Азия елдерініӊ арасында алғашқы болып 2017-2018 жылдарға БҰҰ Қауіпсіздік Кеӊесініӊ тұрақты емес мүшесі болып сайланды.

Халықаралық қоғамдастық Қазақстанныӊ халықаралық қатынастарды дамытудағы үлесін лайықты бағалай отырып, біздіӊ елімізге ЭКСПО-2017 халықаралық мамандандырылған көрмесін өткізуді сеніп тапсырды.

Тәуелсіздік жылдарында Қазақстанныӊ Қарулы Күштері еліміздіӊ сенімді қалқанына айналды.

Президент — Жоғарғы Бас қолбасшы Н.Ә. Назарбаев Қазақстан Республикасыныӊ тәуелсіздігін, аумақтық тұтастығын, оныӊ шекарасыныӊ мызғымастығын, халқымыздыӊ бейбіт және тыныш өмірін сенімді қорғауға қабілетті Қарулы Күштердіӊ түбегейлі реформалауды, әскери қуаты мен әлеуетін арттыруды қамтамасыз етті.

Тәуелсіздіктіӊ 25 жылында Қазақстанда жоғары экономикалық көрсеткіштерге қол жеткізілді.

Мемлекет басшысы Н.Ә. Назарбаев Қазақстан халқын дәйекті түрде еӊ жоғары әлемдік көрсеткіштерге жетуге бағыттап келеді. «Қазақстан-2050» Стратегиясы, «Нұрлы жол» жаӊа экономикалық саясаты, «100 нақты қадам» Ұлт жоспары — әлемніӊ еӊ дамыған мемлекеттерініӊ қатарына кіруге қабілетті Қазақстанныӊ қуатын нығайтуға бағытталған жоспарлар.

Біздіӊ бәсекелес болатын бірегей басымдықтарымыз — Қазақстанныӊ мол табиғи байлығы, ауыл шаруашылық, коммуникациялық және транзиттік әлеуеті еліміздіӊ экономикалық жетістіктерініӊ негізіне айналды. Бүгінде Қазақстан — жекеменшік институты орныққан, орта тап белсенді дамитын, ал кәсіпкерлік экономикалық өркендеудіӊ қозғаушы күші болып табылатын тұрақты нарықтық экономикасы бар ел.

Елбасыныӊ стратегиялық көрегендігі арқасында Қазақстанда жаһандық қаржылық-экономикалық дағдарыстарға қарамастан, ел экономикасын жаӊғырту табысты жүзеге асырылып жатыр.

Қазақстан индустриялық қуатын нығайту мен инновацияны дамытуды нық көздеп отыр. Ауқымды құрылымдық реформалар барысында мүлде жаӊа жоғары технологиялы салалар: мұнай-химия, автомобиль өнеркәсібі, теміржол машина жасау, IT-технологиялар, ғарыштық спутниктер өндірісі салалары құрылды. Елбасыныӊ бастамасы бойынша әр азаматтыӊ өмір сүру деӊгейін арттыруға бағытталған «Бизнестіӊ жол картасы-2020», «Агробизнес-2020», «Жұмыспен қамту-2020» бағдарламалары жүзеге асырылып жатыр.

Тәуелсіздіктіӊ мерейлі 25 жылында Қазақстан Әлемдік банктіӊ Doing Business рейтингінде 35 орын алды. Елімізде жаӊа экономикалық ұмтылысты қамтамасыз етуге мүмкіндік беретін «Нұрлы жол» бағдарламасы, «Батыс Еуропа — Батыс Қытай» халықаралық көлік дәлізі, Транскаспий халықаралық көлік маршруты секілді бірқатар стратегиялық маӊызды инфрақұрылымдық жобалар жүзеге асырылып отыр.

Жаӊа елордамыз Астананы құрудағы айрықша рөл еліміздіӊ Тұӊғыш Президенті Н.Ә. Назарбаевқа тиесілі.

Астана Қазақстан Тәуелсіздігініӊ салтанат құруын паш етіп, халқымыздыӊ мақтанышына айналды.

Астана құрылысы жаӊа мемлекеттіӊ, жаӊа қоғамныӊ құрылысы ретінде киелі мәнге ие болды. Астана өткенніӊ барлық құндылықтарын жинақтап, болашақтыӊ жарқын келбетін елестетті. Бүгінде Астана — өз күшіне сенімді, жаӊа Қазақстанныӊ бүкіл әлемге әлеуетін танытқан ірі іскерлік орталық.

Астана саммиттер мен басқа да маӊызды халықаралық кездесулерді өткізетін ірі орталыққа айналды, еліміздіӊ басқа қалалары үшін дамудыӊ үлгісі болды. Астананыӊ өзінде 2017 жылы «Болашақтыӊ энергиясы» инновациялық күн тәртібімен ЭКСПО-2017 халықаралық мамандандырылған көрмесі өтетін болады. Қазақстан конфессияаралық және этносаралық татулық пен келісім үстемдік құрған мемлекет дамуыныӊ бүкіл әлемде танылған жаӊа бірегей моделін құрды.

Мемлекет басшысы Қазақстан халқы бірлігін нығайтудыӊ конституциялық мәртебесі бар айрықша институты — Қазақстан халқы Ассамблеясын құрды.

Әлемдік діндердіӊ, тілдердіӊ, мәдениеттер мен дәстүрлердіӊ тоғысындағы тарихи араласуы Қазақстанда бейбітшілік пен келісім әлеуметтіӊ адамгершілік және әдеп нормасына, ортақ мәдениетіміздіӊ ажырамас бөлігіне айналған қоғамныӊ айрықша үлгісін қалыптастырды. Ол көпэтностық пен көпконфессиялылықты Қазақстанныӊ стратегиялық ресурсына және артықшылығына айналдыра отырып, руханилық пен азаматтықтыӊ құрыштай құймасын мейлінше бекемдей түсті.

Н.Ә. Назарбаевтыӊ бейбітшілік пен қоғамдық келісім моделі қоғамныӊ үйлесімді дамуыныӊ әлемдік эталонына айналды.

«Мәӊгілік Ел» құндылықтары Тәуелсіздік жетістіктерін, Қазақстан халқыныӊ мүдделер ортақтастығы мен тарихи тағдырын көрнекі бейнелеп берді.

«Мәӊгілік Елдіӊ» жеті құндылығы қазақстандықтардыӊ Тәуелсіздікті нығайтуға, еркін де өркендеген елде өмір сүруге ұмтылысын — ортақ мақсатын, ортақ мүдделері мен ортақ болашағын біріктірді.

Қазақстан халқы қабылдаған «Мәӊгілік Ел» Патриоттық актісі қуатты жұмылдырушы бастауға, қоғамдық келісімді нығайтудыӊ өзегіне, бүкіл қоғамныӊ мүдделері мен ұмтылысын біртұтас тұрғыда бекемдеу құралына айналды.

Басты бағдары Жалпыға ортақ еӊбек қоғамы құндылықтары болып табылатын әлеуметтік тұрақтылық қоғамы құрылды.

Қазақстан тәуелсіздігін алған сәттен бастап Президент Н.Ә. Назарбаев халық алдына әлеуметтік бағдарлы нарықтық экономикасы бар қуатты егемен мемлекет құру міндетін қойды.

Әлеуметтік жаӊғырту әлеуметтік прогрестіӊ экономикалық еркіндіктері мен идеалдарын үйлестікпен өрістетіп, қоғам мен әрбір адамныӊ әл-ауқатыныӊ артуы үшін жағдай жасады, қарқынды дамитын еӊбек нарығын құруға мүмкіндік берді. 25 жылда бала туу деӊгейі 60 пайызға өсті.

Қазақстан аналар үшін қолайлы елдер рейтингінде жыл сайын жоғары көтеріліп келеді. Біз қазақстандықтардыӊ өмір сүру жасын ұзартуға қол жеткіздік. Еӊбек адамыныӊ мүдделері — біздіӊ мемлекетіміздіӊ басты назарында.

Мемлекет қазақстандықтардыӊ оқуы мен кәсіби дағдыларын үнемі жетілдіріп отыруы үшін жағдай жасайды, еркін еӊбекке және лайықты еӊбекақы алуға мүдделі әрбір азаматтыӊ конституциялық құқықтарын қамтамасыз ету үшін өндірістер, инфрақұрылымдар және басқа да нысандар құрылысын жүргізеді.

Білім беру саласын кешенді реформалау Қазақстанныӊ әлемдік білім беру кеӊістігінде лайықты орын алуына жағдай жасады.

Отандық білім беру жүйесі мен ғылымды жетілдіру мемлекеттік саясаттыӊ стратегиялық басымдықтарыныӊ бірі және елді әлеуметтік-экономикалық жаӊғыртудыӊ шешуші тетігі болып табылады. Қазақстан ересек адамдардыӊ сауаттылығы деӊгейі бойынша Адам дамуы индексі әлемдік тізімніӊ алғашқы үштен біріне кіреді.

Қазақстан зияткер ұлтты қалыптастыру үшін дәйекті түрде жағдай жасай отырып, адам дамуыныӊ деӊгейі жоғары елдер тобынан нық орын алды.

Президент бастамасыныӊ арқасында елде ерекше сипатты «Болашақ» бағдарламасы ұдайы жүзеге асырылуда, «Назарбаев Университеті», зияткерлік мектептердіӊ кеӊ тараған желісі құрылды. Еліміздіӊ көптеген жоғары оқу орындарында университеттік білім беру деӊгейі көтеріліп келеді. Барлық өӊірлерде мыӊнан астам заманауи мектептер салынды. Ұлт денсаулығы, денсаулық сақтау саласын дамыту және саламатты өмір салтын қалыптастыру экономикалық және әлеуметтік дамудыӊ маӊызды факторларына айналды.

Отандық денсаулық сақтау саласы әлемдік стандарттар деӊгейіне көтерілді: заманауи медицина орталықтары, ауруханалар мен емханалар салынды, еліміздіӊ барлық өӊірлерінде зерттеулер мен жоғары технологиялы операциялардыӊ бүкіл спектрі жүзеге асырылуда. Қазақстан еуразиялық кеӊістікте медициналық туризмніӊ орталығына айналып келеді.

Халық денсаулығы көрсеткіштерінде БҰҰ Дүниежүзілік денсаулық сақтау ұйымы мойындаған айтарлықтай оӊ өзгерістерге қол жеткізілді. Қаржы ресурстарымен және жоғары шығармашылық қайтарыммен нығайтыла түскен мәдениет саласы қуатты даму серпініне ие болды.

Президент Н.Ә. Назарбаевтыӊ бастамасы бойынша іске асырылған «Мәдени мұра» бағдарламасы отандық мәдениетті сақтау мен дамыту жөніндегі кеӊ ауқымды жұмыстардыӊ бастамасы болып табылды. Қожа Ахмет Яссауи кесенесі, «Таӊбалы» археологиялық кешені сияқты бірегей отандық ескерткіштердіӊ, сондай-ақ «Сарыарқа — Солтүстік Қазақстанныӊ далалары мен көлдері» табиғи мұра нысандарыныӊ ЮНЕСКО-ныӊ Бүкіләлемдік мәдени мұралары тізіміне енуі әлемдік маӊызы бар оқиға болып табылады.

Тәуелсіздік жылдарында спорт пен саламатты өмір салты саласында тамаша нәтижелерге қол жеткізілді.

Спортшыларымыздыӊ аса ірі халықаралық жарыстардағы табыстары қуатты және бірлікшіл спортшы ұлт өмір сүретін Қазақстанныӊ жаӊа бейнесін жасады. Бүгінде Қазақстан спорты еӊ жақсы дамыған әлемдегі 30 елдіӊ қатарына кіреді.

* * *

Тәуелсіздіктіӊ Ұлы Жолы мәӊгі болуы тиіс! Елордада «Тәуелсіз Қазақстан» монументін тұрғызу қажет. Ел Конституциясында Тұӊғыш Президент — Елбасы Нұрсұлтан Әбішұлы Назарбаевтыӊ біздіӊ мемлекетімізді құрудағы бірегей үлесін атап өтуді, Елбасыныӊ есімін елорданыӊ атауында және еліміздіӊ басқа да маӊызды нысандарында көрсетуді ұсынамыз. Біздіӊ тұтас мақсатымыз — Елбасы төӊірегіне топтасып, еӊ қымбат қазынамыз -тәуелсіз Қазақстанды көзіміздіӊ қарашығындай сақтап және ұрпақтарымызға аманаттап, «Мәӊгілік Ел» құндылықтарын қастерлеу. Тәуелсіздік біздіӊ еӊ басты ұйыстырушықұндылығымыз болған, қазір де солай және бола да бермек.

www.kt.kz

Жігіттер

Жігіттер, біле білсең анаң – халық,

Келіңіз, ана сүтін адалдалық.

Керегір ертең тағы ішпек-жемек

Бір күнгі қарын тоққа  алданбалық.

Жүргенің хан ұлындай халық арқасы,

Мінезді қадір білмес құлданбалық.

Бір нәрсе келер-келмес қолымыздан,

Әйтеуір қадари хал тырбаңдалық.

Алуға жүгіреміз бәріміз де,

Бой балап қызметке бұлданбалық.

Жігіттер,

қызметтен жасымалық

Балықша басымыздан сасымалық.

Ем қонбас тым төмендеп   кеткеннен соң

Алуға ауру алдын асығалық.

«Әу» десе аямайды халық барын,

Не үшін біз жемейміз халық қамын?!

Оңбаспыз пайдасына шалынбасақ

Халықтың татып тұрып тұз бен дәмін.

Келіңіз, сөйлеселік, би ағалар,

Қайткенде бұ халықтың оңу жағын.

Тәуекел, Бір Өзіңе, иә, Алла,

Аша көр бұ халықтың Сен бір бағын.

Жігіттер, жалғыз-жалғыз аттанбалық,

Балиғы (балиғатқа толу-ред.) болғаннан соң атаң – халық.

Бір күні қарық етер енші беріп,

Атаның қызметінен жалықпалық!

Жігіттер, ойламасақ күн ілгері,

Халыққа айтып келмес келсе тарлық.

Халыққа не етсеңіз де өздерің біл,

Әйтеуір біздің менен байлық-жарлық.

Келіңіз, жегілелік бір арбаға

Күштенбей жалғыз-жалғыз құр далаға.

Бір нәрсе мирас болып қалмас па екен,

Кейінгі қара қазан сар балаға?!

 (Айағы бар).

№1, 16 хамал, 1329 жыл (№1, 16 наурыз 1911 жыл)

2003 жыл

16-22 ҚАҢТАР

Ғ. Құрманғалиев атындағы облыстық филармонияда скрипкашылардың халықаралық байқауының ашылу салтанаты болды. Конкурсқа Қазақстан, Ресей, Ұлыбритания, Франция, Австрия, КНР-дан барлығы 14 жас музыканттар қатысты. Оны белгілі скрипкашы Марат Бисенғалиев ұйымдастырды.

4-6 СӘУІР

Орал қаласында Қазақстан жастары конгресі өтті. Оның шеңберінде көптеген шаралар ұйымдастырылды. Наркомания, алкоголизм және темекі шегуге қарсы күрес, ҰОС ардагерлері, мүгедектер мен жалғызбасты адамдарға арналған мейірімділік акциялары болды.

13-14 МАМЫР

Лондонда Халықаралық көктемгі жәрмеңке өтті. Оның мақсаты – оған қатысушы елдердің мәдени-тарихи мұраларын, салт-дәстүрлерін насихаттау. Еуропалықтардың назарына батысқазақстандық кәсіпкерлер, соның ішінде «Мария салоны», «ЭКСПО», «Орал сусыны» ЖШС-ларының, «Women Art Дизайн» фирмасының өнімдері ұсынылды. Қазақстанның Ұлыбританиядағы елшісі Е. Ыдырысовтың облыс әкімі атына жолдаған алғысхатында айтылғандай, британдықтар біздің жерлестеріміздің ұлттық бұйымдарына қызығушылықтарын танытқан.

30 МАМЫР

ҚР Үкіметінің қаулысымен Батыс Қазақстан мемлекеттік университетіне Махамбет Өтемісовтің, БҚАТУ-ға Жәңгір ханның есімдері ал Ғ. Құрманғалиев атындағы облыстық филармонияның қазақ ұлттық аспаптар оркестріне күйші Дәулеткерейдің есімі берілді.

31 МАМЫР

Орал қаласының тағы бір орталық алаңына халық батыры Сырым Датұлының ескерткіші орнатылды. Ескерткіштің салтанатты ашылуына ҚР Парламенті Сенатының төрағасы Оралбай Әбдікәрімов, ақын Қадыр Мырза Әлі, қазақ батырының ұрпағы Раш Зейнуллин қатысты.

26 ТАМЫЗ

Қазақстандық және ресейлік археологтар Батыс Қазақстан облыс аумағында қазба жұмыстары кезінде Қырықоба қорғанынан сонау темір ғасырына жататын сарматтар кезеңінің көптеген ескерткіштерін тапты. Шыңғырлау ауданының Лебедевка ауылындағы қабірден осы кезге дейін жақсы сақталған алтын әшекейлері бар жерленген әйелдің сүйегі табылды.

25 ҚЫРКҮЙЕК — 2 ҚАЗАН

Орал қаласында қазақтың ұлы ақыны Махамбет Өтемісұлының 200 жылдығына арналған кәсіпқой театрлардың республикалық фестивалі өтті. Фестивальдің Гран-при жүлдесін Ақтөбе және Ғ. Мүсірепов атындағы жасөспірімдер мен балалар театры жеңіп алды. 1-орын Батыс Қазақстан облыстық драма театрына берілді.

11 ҚАЗАН

БҚАТУ қалашығында ауыл шаруашылығы институтының құрылғанына 40 жыл толуына арналған шара өтті. Шарада қазақтың мемлекет қайраткері, саяси-реформатор Жәңгір ханның ескерткішін ашу салтанаты болды.

27 ҚАЗАН

Халықаралық Орал әуежайына «Эйр Астана» авиакомпаниясының Астана – Орал рейсі бойынша «Боинг — 757» үлкен ұшағы қонды. Жаңа авиа рейсінің ашылу салтанатына ҚР Көлік және коммуникация министрлігінің Азаматтық авиация комитетінің төрағасы А. Мәмбетов қатысты.

5 ҚАРАША

Орал қаласына Ұлыбритания Парламентінің депутаты Джон Манн бастаған делегация келді. Қонақтар Қарашығанақ кен орнында болып, Орал қаласында әріптестері – облыстық және қалалық мәслихат депутаттарымен кездесті. Қонақтар Орал қаласының тарихи орындарын аралап, үлкен әсер алды.

17 ҚАРАША

Облыстық «Орал өңірі» және «Приуралье» газеттерінің 85 жылдығы аталып өтті. Облыс басшылары мен қаланың қоғамдық ұйымдары мерейтой иелерін құттықтады.

18 ҚАРАША

ҚР Президентінің Жарлығымен Батыс Қазақстан облысының әкімі болып Нұрғали Әшімов тағайындалды. Қырымбек Көшербаев ҚР-ның РФ-дағы Төтенше және өкілетті елшісі болды.

2004 жыл

12 ҚАҢТАР

Мұхит Мерәліұлы атындағы қоғамдық қор құрылды. Облыстық мәслихат депутаты Ш. Қыдырниязова мен ҚР-ның еңбек сіңірген мәдениет қайраткері С. Рахметжанов қордың құрылтайшылары болып табылады. Қордың негізгі мақсаты – халық композиторының мұрасын одан әрі дамытып, насихаттау.

10 АҚПАН

Орал педагогикалық колледжі ғимаратының алдында Жаһанша Досмұхамедовтің ескерткіші ашылды. 1896 жылы осы ғимаратта реалді училище орналасқан болатын. 10 жасар Жаһанша Досмұхамедов осында оқуға келді. Осы училищені үздік бітіріп, ол Мәскеу университетінің заң факультетіне оқуға түседі. Ол одан кейін белгілі мемлекеттік және саяси қайраткер ретінде танылып, тарихта өшпес із қалдырды.

11 АҚПАН

Облыс әкімі Н. Әшімов бастаған Батыс Қазақстан облысының делегациясы Самара облысында болды. Екіжақты кездесулер мен келіссөздерде шекаралас облыстардың экономикалық байланысын одан әрі дамыту мәселелері талқыланған соң Самара облысының губернаторы Константин Титовқа Қазақстан Республикасының мелекеттік наградасы – I дә-режелі «Достық» ордені табыс етілді.

1 СӘУІР

«Зенит» зауытының мәдениет сарайында қазақ тілінде алғаш рет көңілді тапқырлар клубының (КТК) ойыны болып өтті. Оған облыстың аудандарынан алты жастар командасы қатысты. Олардың ішінен Сырым, Ақжайық және Қазталов аудандарының командалары жеңімпаз атанды.

10 СӘУІР

Орталық және Орта Азия елдерінің тарихы, экономикалық-әлеуметтік және саяси дамуын зерттеп келе жатқан Лондон университетінің профессоры Ширин Акмнэр БҚМУ-дың оқытушылары және студенттерімен кездесті.

11 ШІЛДЕ

Орал қаласына «Орал ЖЭО-ға энергия үнемдеу технологиясын енгізудің модельдік жобасын» жүзеге асыру үшін Жапонияның «Тохоку Электрик Пауэр» компаниясының жабдықтары жеткізілді. «Жайықжылуқуат» АҚ-ның өкілдері жапондық мамандармен бірлесіп, жаңа стансаның іргетасын қалау жұмыстарына кірісті. Бұл жобаны жүзеге асыру облыстың энергетикалық тәуелділігін азайтуға мүмкіндік береді және электр энергиясының тарифін төмендетеді.

7 ТАМЫЗ

Орал қаласында Маңғыстау, Ақтөбе, Атырау және Батыс Қазақстан облыстары мұражай мекемелерінің фестивалі өтті. Бұл мәдени шараға Астана, Павлодар, Петропавл, Шымкент қалаларынан қонақтар қатысты. Батыс Қазақстан өңірінің тарихы мен мәдени мұралары бүкіл қазақстандықтарды қызықтырады.

10 ТАМЫЗ

Академик А. Тайманов атындағы техникалық олимпиаданың жеңімпаздары мен «ҚазМұнайГаз» компаниясы арасында келісімшарт жасау рәсімі өтті. Енді облыстың 10 түлегі Қазақстан-Британ техникалық университетінде білім алатын болды.

8 ҚЫРКҮЙЕК

«Металлист» зауыты базасында Батыс Қазақстан машина жасау компаниясы құрылды. Бұл компания ҚР индустриалдық-инновациялық стратегиясын жүзеге асырудағы алғашқы қадам болды. Оның тұсаукесеріне ҚР Премьер-министрінің орынбасары С. Мыңбаев және облыс әкімі Н. Әшімов қатысты.

17 ҚАЗАН

Орал қаласында су спорты бойынша БЖСМ ашылды. Бұл Орал қаласында су спорты бойынша жарыстар өткізуге мүмкіндік береді. Бұл спорт кешені «ҚПО б.в.» компаниясының қаржысына салынды.

30 ҚАЗАН

Қазақ драма театрында белгілі ақын Ақұштап Бақтыгерееваның авторлық кеші өтті. Оған ақынның тума-туыстары, достары және Астана, Алматы, Атырау және Мәскеу қалаларынан келген қонақтар қатысты. Ақ Жайықтың ақ шағаласы атанған ақынды облыс әкімі Нұрғали Әшімов, Қазақстанның халық жазушысы Әбіш Кекілбаев, «Қазақ әдебиеті» газетінің бас редакторы, ақын Ұлықбек Есдәулетов, өнертанушы, композитор Илья Жақанов, Ресей ақыны Татьяна Кузовлева құттықтады.

30 ЖЕЛТОҚСАН

Облыс әкімі Нұрғали Әшімов өз резиденциясында Ресей Федерациясының Орал қаласындағы консулы Дмитрий Романовты қабылдап, оған Ресейдің Қазақстандағы жылы шеңберінде Батыс Қазақстан облысында өткізілген шараларға белсене қатысқаны үшін алғысын білдірді.

Қауіп еткеннен айтамыз…

Көзіқарақты оқырмандарымыздың есінде шығар, өткен жылы Алматыда бензин тасымалдайтын көліктің тежегіші істен шығып, жолдағы ағашқа соғылып, жойқын жарылыс болғаны. Соның салдарынан жүргізуші қайтыс болды және оқиға болған жердегі көп қабатты тұрғын үй өртенді. Төтенше жағдайлардың алдын алу ережесінде ондай көліктердің көпшілік шоғырланған орындармен жүруіне тыйым салынғанымен, іс жүзінде бұл талаптың сақталмайтынын күнделікті тірліктен көріп жүрміз. Ондай көліктерге «әй дейтін әже, қой дейтін қожа» табылмай-ақ қойды. Сондай-ақ май құю бекеттеріне кіретін бір бағыттағы жол кептелістен қашқан көліктерге айналма жолға айналғанын да көріп жүрміз. Сондықтан қауіптің қайдан деріңіз бар ма… Одан қалса биылғы тамыз айында Бөрлі ауданындағы Ақсай қаласында аутокөлікке жанар-жағармай құю бекетінде газ жарылысы болып, екі адамның зардап шегіп, содан ақыры көз жұмғаны мәлім.

Соңғы кезде Орал қаласында көлік санының артуымен бірге жанармай құю бекеттерінің көбейе түскені байқалады. Орал қалалық жер қатынастары бөлімінің басшысының орынбасары Максим Тілегеновтің айтуынша, 2015-2016 жылдары жанар-жағармай бекетіне 17, сауда дүңгіршектеріне бес жер телімі берілген.

Мұндай бекеттер қала орталығында қадам бассаңыз, алдыңыздан «менмұндалап» шыға келеді. Мысалға, Еуразия, Гагарин көшелерінің бойында бір-біріне іргелес қонғаны немесе қарама-қарсы орналасқандары да бар. Тіпті біреуі №2 база аялдамасының дәл артына орын тепкен. Ал облыстық Қадыр Мырза Әлі атындағы мәдениет және өнер орталығына таяу жерде «Гелиос» компаниясының жанар-жағармай бекеті бұрыннан жұмыс істейді. Үлкен сауда үйі мен өнер орталығы арасында «менмұндалап» тұрған бекетті өзге жерге «қоныс аударту» мәселесі әлі күнге шешімін таппай келеді.

Санэпидемиологтар Оралдағы қаптаған жанармай құю бекеттерінің адам денсаулығына, қоршаған ортаға ешбір зияны жоқ, мониторинг жүргізудеміз деп жұбатады. Бірақ жанар-жағармайдан бөлінетін улы газдардың денсаулыққа тигізетін зияны барын білетін тұрғындардың бекеттерден зәресі ұшады. Мысалға, Еуразия даңғылындағы «№8 мектеп» аялдамасы маңындағы «Гелиостың» бекетінен ескен бензиннің «хош» иісі қоңсы қонған көп қабатты үйдің тұрғындарын мезі қылды. Әсіресе, жаз айларында желді күндері және сыйымдылықтарға жанармай құйғанда, тұрғындар таза ауа емес, бензинмен немесе газбен тыныстап, тұншыға жаздайды. Айтқандай, бұдан 5-6 жыл бұрын осы бекеттен өрт шығып, сол жердің тұрғындарының зәре-құтын қашырғаны есімізде.

Орал қалалық тұтынушылардың құқықтарын қорғау басқармасының басшысы Мәдениет Танауовтың айтуынша, жанармай құю нысандары 4-сынып қауіптілігіне жатады. Олар қоғамдық орындардан, әлеуметтік нысандардан, мектеп-балабақшадан, тұрғын үйлерден 100 метрден кем емес қашықтықта салынуы тиіс. Алайда тұрғын үй іргесінен, қоғамдық орындарға таяу салынғандары болса да, кәсіпкерге «Мұныңыз не?» деп алған бетінен айныта алмайсыз. Өйткені кезінде жер телімін заңдастырып алғаны жөнінде құжаттары бар. Сондықтан шаһардағы жүйткіген көлік біткенді отынмен қамтып, ақшасын сытырлатып санап отырған кәсіпкерлердің табысты бизнесінен гөрі тұрғындардың денсаулығы, қауіпсіздігі қызықтырады деу күлкілі.

Қазір кәсіпкерлікке мемлекет тарапынан қолдау күшті. Бірақ мұндай бекеттердің қожайынымен тілдеспек түгілі, аты-жөнін білудің өзі қиямет. Осындай сәулет-құрылыс және санитарлық талаптарға, төтенше жағдайлардың алдын алу талаптарына толықтай сәйкес келмейтін жанармай бекеттерінің де құрылысы жеткілікті. Биыл жазда Теректі ауданындағы Подстепный ауылында екі бірдей жанармай құю бекетінің құрылысы басталып, ауыл тұрғындарының наразылығын тудырды. Ешкім де кәсіпкерлік нысандары салынбасын демейді, бірақ тұрғын үйлерден, қоғамдық орындардан аулағырақ орын берілуі тиіс. Мәселенің осы жағын қадағалауға келгенде кежегеміз кері тартатыны несі? Өйткені облыста нақ осы сәулет мәселесін егжей-тегжейлі қадағалап отыратын бұрынғы облыстық сәулет және қала құрылысы басқармасының таратылып, бөлім болып қалуының да әсері айтарлықтай.

Талап күшейтілсе дейміз…

Бұрын қаладағы жеті мұнай сақтау қоймасы мен 88 жанармай бекетінің қызметін ҚР Инвестициялар және даму министрлігінің Индустриялық даму және өнеркәсіптік қауіпсіздік комитетінің БҚО бойынша департаменті қадағалап отыратын. Өткен жылдың аяғынан бастап аталмыш департамент көлемі 200 тоннаға дейінгі жанар-жағармай бекеттері тәуелділігі жағынан жоғары дәрежеге жатпайды деген жаңа бұйрыққа сәйкес бекеттердің қызметін, құрал-жабдықтарының сапасын тексермейтін болды. Өйткені биылдан бастап күшіне енген Кәсіпкерлік кодексі бойынша әлгіндей шағын көлемдегі бекеттердің қожайындары қажет болған жағдайда аталмыш департаментке өздері өтініш жасап, нысанға тексеру жұмыстарын өз есебінен жүргізе алады. Әрине, кәсіпкерлерді қолдаудың қажеттілігі, оларға жөнсіз тексерістердің азайғаны дұрыс, бірақ та мұндай қауіпті нысандардың құзырлы орындардың тұрақты бақылауынан алынбағаны жөн-ау. Өйткені кейбір ақшаға құныққан қожайындардың бекеттердегі ескі жабдықтарды жаңалауды «ұмытып кетулері» ғажап емес.

Қорыта айтар болсақ, жер телімдерін бөлуді қатаң бекітілген жоспар бойынша бөліп, жұмыс жобасын мұқият дайындауға мәнмаңыз беретін уақыт жеткен сияқты. Сонымен қатар көне мен жаңа сәулеттің жарасым табатын жаңа заманның Оралын дамыту жөнінде арнайы бағдарлама қабылдау, шаһарды қауіпсіз қалаға айналдыру үшін қала ішіндегі самсаған бекеттерді қала сыртына шығару жөнінде шешім керектігі сөзсіз. Сонда ғана Оралдың тұрғындары мен меймандары өздерін қауіпсіз әрі жайлы сезінері хақ.

Гүлбаршын ӘЖІГЕРЕЕВА,

«Орал өңірі»

М. Өтемісұлы атындағы БҚМУ-да «Қазіргі әдебиеттану, тілтану мәселелері және жазушы-драматург Рахымжан Отарбаевтың шығармашылығы» атты республикалық ғылыми-тәжірибелік конференция өтті. Зиялы қауым өкілдері мен студент-жастар қатысқан ғылыми шара қаламгердің 60 жылдық мерейтойына арналды.

Шараға қатысушылар алдымен Р. Отарбаевтың өмір жолы мен шығармашылығына арналған кітап көрмесін тамашалап, жазушы туралы шағын бейнетаспаны көрді. Конференцияны «Махамбет» гуманитарлық зерттеулер институтының директоры, профессор А. Қыдыршаев жүргізді. Ақ Жайықтың ақ шағаласы, ақын, «Құрмет» орденінің иегері Ақұштап Бақтыгереева алғашқы сөз кезегін алды.

— Бүгін бізде мереке. Той-тойға ұлассын! Ортамыздағы қазақ әдебиетінің үлкен қаламгері, ұлттың жоқтаушысы Р. Отарбаевтың келуі — біз үшін үлкен құрмет. Мерейжасың құтты болсын, Рахымжан! Қазақта «Бала болып кетіп, дана болып оралды» деген қанатты сөз бар. Сол сөз саған үйлесіп тұр. Жазушылық және журналистік қырыңды былай қойғанда, сенің «Бейбарыс сұлтан», «Мұстафа Шоқай», «Жәңгір хан» сынды пьесаларыңның өзі қомақты дүние. Сөйтіп, руханият саласында толымды еңбек етуің сенің ұлт мүддесіне адалдығыңды көрсетеді. Мерейтойың бүгінде қырғыз және түрік елінде де атап өтілуде. Жалпы, түркі дүниесіне танымалдығың ұлттың мерейін өсіре түседі, — деп жүрекжарды пікірін білдірген ақын апамыз жастарды Р. Отарбаевтың кітаптарын оқып, пьесаларын көруге шақырды. Орал қаласының әкімі Нариман Төреғалиев осы ғылыми-тәжірибелік конференцияның рухани маңызын айрықша бағалап, мерейтойлық шараны ұйымдастырған БҚМУ-дың ұжымына алғыс айтты. Р. Отарбаевтың ұлттың рухын көтерудегі жемісті еңбегін жоғары бағалап, шығармашылық табыс тіледі. Ол жазушыға қала әкімдігі атынан алғысхат тапсырып, кәдесый тарту етті. БҚМУ-дың байырғы оқытушысы Меруерт Жолдықайырова кезінде осы оқу орнын бітірген Рахымжанның кураторы болғанын айта келіп, жазушы-драматургтың студенттік жылдардағы білімпаздығы және ақындық сезімталдығы хақында әсерлі әңгімелеп берді. Қаламгердің курстастары М. Фазылғалиев, К. Төкестай, Ш. Елемесов сахнаға көтеріліп, шын жүректен құттықтады.

— Рахымжанның «Із» атты тамаша әңгімесі бар. Онда қарт әкенің жалғыз ұлын қан майданға аттандырмас бұрын тұзды сорға апарып, табанының ізін алып қалғаны егжей-тегжейлі баяндалады. Ондағы мақсат — егер ұлы шейіт болып кетсе, ең құрығанда ізін көріп, жанына демеу ету. Жұрттың бәрі қызығып оқып, жазушыдан кім екенін қоймай сұраса керек. Бірақ ол мандытып ештеңе айтпаған. Кейін білсек, Рахымжанның әңгімесі өзінің жерлесі, қазақтың аяулы ақыны, мемлекеттік Әнұран авторының бірі – Жұмекен Нәжімеденовке арналған екен. Ал Жұмекеннің ел таныған үш роман мен талай тамаша өлеңнің авторы екені белгілі. Рахымжан тек жазушы ғана емес, қаламы жүйрік журналист те. Сонау жылдары Шерхан ағаның тапсырмасымен Қызылорда өңіріне барып, «Арал тағдыры — адам тағдыры» атты мақалалар шоғырын жазды. Ол «Қазақ әдебиеті» газетіне басылып шықты. Кейін сол мақаланың бірінде жергілікті әкімді ащы тілмен сынағаны үшін сол лауазым иесі үстінен арыз жазып, шырғалаңға түсті. «Аққа Құдай жақ», одан аман құтылды. Міне, жақсы журналистен талантты жазушы шығатындығының бір дәлелі осы. Көсемсөз жанрында да Рахаңның шоқтығы биік, — деді белгілі жазушы және қоғам қайраткері Мереке Құлкенов әріптесі туралы. БҚМУ-дың ректоры, академик А. Иманғалиев Р. Отарбаевтың ел рухын көтерудегі еңбегін жоғары бағалады. Содан соң Асхат Сәлімұлы Р. Отарбаевқа «М. Өте-місов атындағы БҚМУ-дың құрметті профессоры» атағы берілгенін жариялап, оған салтанатты түрде арнайы куәлік тапсырды. Ақын және жазушы, облыстық соттың қызметкері А. Шахин мерейтой иесін құттықтап, арнау өлеңін оқыды.

Мәжіліс соңында студенттер мен оқушылар жазушы шығармаларынан үзінді оқыса, БҚМУ-дың тәжірибелі ғалымдары, мектеп мұғалімдері жазушы шығармашылығының сан қыры хақында баяндамалар жасады. Алқалы басқосудың соңында мерейтой иесі сөз алып, өмір жолы мен шығармашылығы жайында әңгімеледі.

– Жуырда «Бас» атты туындым Түркияда жарық көрді. Жиырма жыл бойы жазған «Ақырзаман» атты романымның аяқталуы жақын. Қазір «Алтын адамның оянуы» романын да жазып жатырмын. Ең бастысы, жазғанымның оқырманға жетуі, — деді танымал жазушы. Сөз соңында ол М. Өтемісұлы атындағы БҚМУ-дың ұжымына айрықша ризалығын білдірді. Конференцияның жұмысы түстен кейін секциялық отырысқа ұласты. Сонымен қатар қаламгер мерейтойына орай облыстық қазақ драма театрында Р. Отарбаевтың «Жәңгір хан» драмасы қойылды.

Серік ИХСАНҒАЛИ,

«Орал өңірі»