Мұрағат: Май, 2016


Жаңа тағайындаулар

Күні: , 290 рет оқылды


Мамыр айының 28-інде ҚР Президенті әкімшілігінің және аудандық мәслихат депутаттарының келісімімен Батыс Қазақстан облысының әкімі Алтай Көлгінов Алдияр Халеловті ротациялық тәртіп негізінде Бөрлі ауданының әкімі қызметіне тағайындады. Осыған орай облыс әкімі Алтай Көлгінов арнайы жиналған аудан активіне ауданның жаңа басшысын таныстырды.


Аудан активімен өткен кездесу барысында облыс басшысы жиналғандарға жаңа әкімді таныстыра отырып, алда тұрған келелі міндеттерге тоқталды. Олардың қатарында Елбасының «100 нақты қадам»  Ұлт жоспары аясындағы іс-шаралар, мемлекеттік бағдарламалардың жүзеге асуы, шағын және орта бизнесті қолдау, жаңа жұмыс орындарын ашу, жол жөндеу, Ақсай қаласы мен аудандағы ауылдық округтерді абаттандыру сынды жұмыстар бар. Өңір басшысы жаңадан тағайындалған Алдияр Халеловке және аудан әкімдігіне табыс пен жемісті еңбек тіледі. Басқа қызметке ауысуына байланысты өз еркімен қызметінен босаған ауданның бұрынғы әкімі Марат Түсіпқалиев осы кезге дейін жұмыстас болған әріптестеріне алғысын айтып, Бөрлі ауданының келешегіне үлкен сеніммен қарайтынын жеткізді. Ал  ауданның тізгінін енді қолға алған А. Халелов облыс әкіміне, аудандық мәслихаттың депутаттарына көрсеткен сенімдеріне рақмет айтып, Елбасы Н. Назарбаевтың алға қойған міндеттері мен тапсырмаларын орындайтындығына  жиналғандарды  сендірді.

Алдияр Халелов-2015Алдияр Сансызбайұлы ХАЛЕЛОВ 1958 жылы 11 қыркүйекте Орал облысының Жәнібек ауданы «Қайрат» кеңшарында дүниеге келді. Ол 1981 жылы Жамбыл гидромелиорация-құрылыс институтын гидромелиорация, инженер-гидротехник мамандығы бойынша тәмамдайды. 1981-1988 жылдар аралығында Желаевтағы аудандық ауыл шаруашылығы бірлестігінде аға инженер-гидротехник, кәсіподақ төрағасы қызметтерін атқарды. 1988-1990 жылдарда М. Мәметова атындағы ұжымшарда партком хатшысы, 1990-1996 жылдар аралығында Трекин ауылдық округінде

Трекин ауылдық әкімшілігінің басшысы, 1996-1997 жылдарда Приурал ауданы әкімінің орынбасары, 1997-2002 жылдары Зеленов ауданы әкімінің орынбасары, 2002-2011 жылдар аралығында Зеленов ауданы әкімінің орынбасары, ал 2011 жылдан осы  кезге  дейін  Шыңғырлау  ауданының әкімі  қызметінде  болды.

* * *

Теректі аудандық мәслихатының кезектен тыс сессиясында  облыс әкімі Алтай Көлгінов Президент әкімшілігінің және аудандық мәслихат депутаттарының келісімі бойынша Мұрат Рахметұлы Мұқаевты ротациялық тәртіп негізінде Теректі ауданының  әкімі  лауазымына тағайындады.

Өңір басшысы ауданның бұрынғы әкімі қызметінен өз еркімен босатылғанын айтып, жаңа әкімді таныстырды.

Активте облыс басшысы М. Мұқаевтың «100 нақты қадам» Ұлт жоспары, «Нұрлы жол»,  «Бизнестің жол картасы – 2020», «Агробизнес – 2020» мемлекеттік бағдарламалары аясында шағын және орта кәсіпкерлікті дамыту, ауыл тұрғындарын жұмыспен қамту сынды міндеттемелерді абыроймен  атқаратынына  үміт  артты.

Жаңа әкім өзіне жүктелген міндеттердің барлығын абыройлы орындауға бар  күш-жігерін  салатынын  айтты.

SONY DSC

SONY DSC

Мұрат Рахметұлы МҰҚАЕВ 1969 жылы туған, білімі жоғары. 1992 жылы Батыс Қазақстан ауыл шаруашылығы институтын және 2005 жылы Алматы қаласындағы Каспий қоғамдық университетін бухгалтерлік есеп, экономист, заңгер мамандығы бойынша бітірген.

Еңбек жолын 1992 жылы Фурманов ауданы салық инспекциясының есепке алу жөніндегі инспекторы болып бастады. 1994-1996 жылдары «Игілік-банк» Орал филиалының жетекші  маманы, 1996-1997 жылдары Қазақстанның Халық жинақ банкі Батыс Қазақстан облыстық филиалының бухгалтері, менеджері қызметін атқарды. 1997-2011 жылдары БҚО және ШҚО-да кеден қызметі саласында еңбек жолын жалғастырды. 2011-2013 жылдары Орал қаласы кәсіпкерлік бөлімінің басшысы, 2013 жылдың  28  маусымынан  Жәнібек  ауданының  әкімі  лауазымында  қызмет  атқарды.

* * *

Кеше облыс әкімі Алтай Көлгінов Жәнібек  аудандық мәслихатының кезектен тыс сессиясына қатысып, аудан әкімі қызметіне Наурызбай Қадырбайұлы Қарағойшиннің кандидатурасын ұсынды. Облыс әкімінің ұсынысын халық қалаулылары бірауыздан қолдап, Наурызбай Қарағойшин аудан әкімі болып тағайындалды.

Алтай Сейдірұлы жаңа басшыны аудан активіне таныстырып, Наурызбай Қадырбайұлының басқарушылық қызметте тәжірибесі мол, іскер азамат екенін айтып, жәнібектіктермен алдағы уақытта бірлесіп қызмет атқаратынына сенім білдірді. Содан кейін аудан басшылығының алдына «100 нақты қадам» Ұлт жоспары, «Агробизнес-2020», «Жұмыспен қамту-2020» сынды мемлекеттік бағдарламалары шеңберінде аудан тұрғындарының әл-ауқатын жақсарту  бағытында  тапсырма  берді.

Жиында сөз алған ауданның бұрынғы  әкімі Мұрат Мұқаев үш жылға жуық уақыт қоян-қолтық жұмыс істеп, ауданның әлеуметтік-экономикалық дамуына зор үлес қосқан аудан активіне ризашылығын білдіріп, Наурызбай Қадырбайұлының қызметіне жемісті еңбек тіледі. Өз кезегінде Наурызбай Қарағойшин көрсеткен зор сенімі үшін облыс әкіміне алғысын білдіріп, жүктелген үлкен сенімді ақтау жолында бар білімін, күш-жігері мен қажыр-қайратын аямай жұмсап, аудан халқымен бірге қызмет  атқаратынын  жеткізді.

карагойшинНаурызбай Қадырбайұлы ҚАРАҒОЙШИН 1960 жылы Жаңақала ауданында дүниеге келген. Білімі жоғары, мамандығы –  зооинженер.

Еңбек жолын 1978 жылы Жаңақала ауданы «Айдархан» совхозының «Арай» комсомол-жастар бригадасының көмекші шопаны  болып  бастаған.

Кеңес әскері қатарында қызмет атқарып, жоғары оқу орнында білім алғаннан кейін, 1986-1987 ж. ж. – Жаңақала ауданы «Айдархан» совхозының аға зоотехнигі, 1987-1990 ж. ж. – Жаңақала аудандық комитетінің бөлім меңгерушісі, нұсқаушысы, 1990-2003 ж. ж. – Жаңақала ауданының ауыл шаруашылығы кәсіпорындарында басқарма төрағасы, бас зоотехник, директор, 2003-2010 ж. ж. – Жаңақала ауданы әкімінің орынбасары, 2010-2013 ж. ж. – Қаратөбе ауданының әкімі, 2013-2016 Батыс Қазақстан облысы ауыл шаруашылығы басқармасы басшысының орынбасары лауазымдарын атқарып, 2016 жылғы 30  мамырда  Жәнібек  ауданының  әкімі  болып  тағайындалды.

* * *

Облыс әкімі  Алтай Көлгінов Шыңғырлау аудандық мәслихатының IV кезектен тыс сессиясына қатысты. Сессияда Алтай Сейдірұлы аудан әкімі Алдияр Халеловтің өзге қызметке ауысуына байланысты аудан басшылығына осы аудан әкімінің орынбасары қызметін атқарып келген Альберт Есалиевты ұсынды. Сессияға қатысқан 10 депутат бұл ұсынысқа келісімін беріп, Альберт Есалиев аудан әкімі қызметіне тағайындалды.

Жаңа басшыны аудан әкіміне таныстыру сәтінде Алтай Көлгінов бұған дейінгі осы лауазымды абыроймен атқарған Алдияр Халеловке жемісті қызметі үшін алғыс білдірді. Бұл лебізді қуаттаған аудандық ардагерлер кеңесінің төрағасы С. Сәмиев, ҰОС-ның ардагері С. Ығылманов, ауданның құрметті азаматы Б. Сапаров сынды қариялар алғыс білдірісті. Бұдан соң жаңа тағайындалған әкім таныстырылып, алдағы еңбек жолына сәт сапар айтылды. Өңір басшысы ауданның әлеуметтік-экономикалық ахуалын дамыту бағытында «100 нақты қадам» Ұлт жоспарын, мемлекеттік бағдарламаларды жүзеге асыру, шағын және орта бизнесті қолдау, жаңа жұмыс орындарын ашуға жете мән беру керектігіне тоқталды. Аудандық мәслихат хатшысы Г. Волкогон, ауданның әлеуетін арттырудағы жұмыстарға жан-жақты қолдау танытатындықтарын  білдірді.

есалиевАльберт Темірболатұлы ЕСАЛИЕВ 1980 жылдың 1 қаңтарында Батыс Қазақстан облысы Қазталов ауданының Қазталов ауылында дүниеге келген. Білімі жоғары. 2001 жылы Батыс Қазақстан гуманитарлық университетін жоғары кәсіби білімді тарих пәнінің мұғалімі мамандығы бойынша тәмамдаған, 2009 жылы «Еуразия» Батыс Қазақстан тілдер және менеджмент институтын  экономика  мамандығы  бойынша  аяқтаған.

2001 жылдың тамызы мен 2002 жылдың қыркүйек айына дейін – Переметный  ЖОББМ  мұғалімі.

2002 жылдың қыркүйек айынан 2005 жылдың ақпанына дейін – Переметный ЖОББМ директордың оқу-тәрбие жұмыстары  жөніндегі  орынбасары.

2005 жылдың ақпанын 2007 жылдың желтоқсаны аралығында – Зеленов ауданы әкімі аппаратының ұйымдастыру-бақылау  жұмысы  бөлімінің  бас  маманы.

2007 жылдың желтоқсанынан 2010 жылдың қарашасы аралығында – Зеленов ауданы әкімі аппаратының мемлекеттік қызметтер мониторингі және бақылау  бөлімінің  меңгерушісі.

2010 жылдың қараша-желтоқсан айларында – Зеленов ауданы әкімі аппаратының ұйымдастыру,  кадрлық  жұмыс,  мемлекеттік қызметтер мониторингі  және бақылау  бөлімінің  бас  маманы.

2010 жылдың желтоқсанынан 2011 жылдың желтоқсан аралығында – Зеленов ауданы әкімі аппаратының ұйымдастыру, кадрлық жұмыс, мемлекеттік қызметтер мониторингі  және  бақылау  бөлімінің  меңгерушісі.

2011 жылдың 20 желтоқсанынан Шыңғырлау ауданы әкімінің өкімімен Шыңғырлау ауданы  әкімінің  орынбасары  болып  тағайындалды.


Рада ХАЙРУШЕВА, «Аялаған алақан» қоғамдық қорының жетекшісі: «Күн сайын бір баланы қуанта алсам…»

Күні: , 594 рет оқылды

DSC_0203


Адамға қуаныш сыйлау  оның күнделікті ісіне айналған.  Ол адамды қуанту үшін бай-манап болудың, жоғары лауазымды қызметтің иесі немесе кәсіпкер болудың қажеті жоқ, жай ғана ынта-ықылас қажет деп есептейді.


Әр күн сайын мүмкіндігі шектеулі, жаны жабырқаған балаларға қуаныш сыйлап, сүрінгенге сүйеу болып, жылағанды жұбатып жүрген біздің кейіпкеріміз Рада Хайрушеваға бұл идея перинаталды орталықта жатқанда келіпті. Егіз ұлын дүниеге әкеліп, перзентханада болған кезде әке-шешесі бас тартқан, «отказной» керуетте жалғыздан-жалғыз жатқан жетім балаларды көреді. Өзге балаларды анасы аймалап, бауырына басып жүргенде, әлгі балалардың қараусыз, тек медбикелерді күтіп, шырылдап жылап жатқаны жүрегін ауыртады. Тіпті алыс аудандардан келген жас аналардың қарапайым жеке бас тазалығына арналған заттарының болмауы да көңіліне кірбің ұялатады. Қолындағы барымен бөлісе жүріп, жоқшылық, жетімдік азабын тартқан жандардың мұңын сезінген ол қос бөбегін құшақтап, перинаталды орталықтан шыққан соң, мұқтаж жандарға көмек қолын созғысы келетінін түсінеді. Арада біраз уақыт өткен соң, ана мен балаға қажетті заттарды алып, перинаталды орталыққа келеді. Сөйтіп, Раданың ең алғашқы қайырымдылық көмегі басталады. Ол сол сәттен бастап, адамдарға жай ғана қуаныш сыйлаудың құндылығын ұғынады. Оның қатарына қайырымды жандар да көптеп жинала бастайды. Ол еріктілерден құралған өзінің тобын «Көмек қолы» деп атап, көптеген адамға көмек қолын созады.

Егіз ұлдың анасы, талдырмаш қана келіншек өз уақытын тиімді пайдаланғанды жөн көреді. Ол мүмкіндігінше «Уақытым жоқ, қолым бос емес» деген сөздерді мүлдем қолданбауға тырысады.

— Уақыт тапқысы келген адам қандай қысылтаяң кезде де табады. Ал сылтауды жақсы көретіндер уақыты болған күннің өзінде де жүз сылтау ойлап табады. Жалпы, бар болғаны бес-алты жылдың ішінде байқағаным, қаламызда мейірімді жандар өте көп. Біз «Балалар үйі», «Балалар ауылы», «Мүмкіндігі шектеулі балаларға арналған арнайы интернаттарға» жиі барамыз. Тобымдағы қайырымды жандардың бәрі де қызмет атқарады. Мен де қаламыздағы қаржы компанияларының бірінде заңгер болып қызмет жасаймын. Бірақ қайырымдылық шараларын өткізу үшін қызметімнен сұранбаймын.

Сондықтан мұндай шараларды түскі ас уақытында немесе кешкі мезгілде өткіземіз. Тобымдағылардың бәрі қызметте болғанымен, олар қай кезде де мені қолдауға әзір. Мәселен, белгілі шоумен Сергей Жужа кей кездері күніне екі рет шарамызды өткізіп беріп жүрді. Осындай жүрегі ізгілікке толы, уақыттарының аздығына қарамастан, өзгелерді қуантқысы келетін қайырымды адам көп, — дейді мейірімді жан.

Әр сағатын жоспарлап, тек мейірімділікке арнайтын біздің кейіпкеріміз күн сайын таңғы алтыда тұрады. Ертеңгілік тамағын беріп, сәбилерін балабақшаға, жұбайын жұмысқа шығарып салады. Одан әрі түскі бірге дейін өзі де қызметте. Түскі ас уақытын ол өте тиімді пайдаланады. Қайырымдылық шаралары, мұқтаж жандарға көмек (тамақ, киім, жеке гигиена тазалығына қажетті заттар апару) сықылды жұмыстарды тобындағы жандармен бірлесе жүріп атқарады. Түстен кейін сағат екіде қызмет орнына қайта келетін ол бесін ауа беске дейін өз қызметін мүлтіксіз атқарады. Сағат бесте балабақшадан егіздерін алып, оларды сағат 18.00-ден 19.00-ге дейін болатын би үйірмесіне алып келеді. Содан кейін үйге келіп, кешкілік уақытын отбасына арнайды. Кейде бұл уақыттарда қайырымдылық шаралары жоспарланады. Әрі қарай ертеңгі күннің жоспары талқыланып, әр күн осылай жалғаса береді. Қарбаласқа толы күннің бәрінде де ол өмір белесінде жаны жабырқаған жандардың шынайы алғысына бөленумен келеді.

— Жарық дүние есігін ашқан сәби туғаннан тағдыр тәлкегіне ұшырап, тастанды атанғаны үшін немесе мүмкіндігі шектеулі болып, дүниеге келгені үшін кінәлі емес. Әр сәбидің маңдайына жазылған өз тағдыры бар. Олар біздің аяушылығымызға тіптен зәру емес. Баланың аты – бала. Тағдыры қиын болғанымен, балалық бақыттың дәмін сезініп өсуге әр сәби лайықты. Тастанды, ата-ананың қарауынсыз қалған балаларға мемлекет тарапынан қажет жағдайлар жасалуда. Әйтсе де оларға мейірім, жай ғана жан жылулығы жетіспейді. Біз оларға мүсіркеп, аяп қарамай, мейірім төге білуіміз керек. Сондықтан да қамкөңіл балғындардың көңілін көтеретін концерттер, мамандардың шеберлік сыныптарын, спорттық бағыттағы шараларды жиі өткіземіз, — дейді ол.

Рада Хайрушева әлеуметтік желіде көпшілікке жақсы таныс. Ол ылғи жақсылыққа толы күндерінен фотосуреттер салып, достарымен бөлісіп отырады. Сонымен қатар оны қамкөңіл балғындар мен аз қамтылған, көп балалы отбасылар жақсы біледі. Онымен бірге жаны жабырқау жандарға жылулық сыйлауға асыққандар да қарапайым адамдар. «Көп түкірсе – көл» демекші, бәрі жиналып, қажет көмекті жеткізгенше асығады. Тек балалар ғана емес, қамкөңіл қариялар мен өмір көшінде қиындыққа тап болғандар да Рада мен оның тобын жақсы біледі.

— Өмір болған соң адам өмірінде қиын сәттер кездесіп жатады.

Кейбір жандарды уақытша қиындықта жай ғана демеп, қолдап жіберсек, әрі қарай өзі аяғынан тік тұрып кетеді. Мәселен, менің бір құрбым кішкентай кезінде көп балалы отбасында өскен. Жағдайлары нашар болғандықтан, оларға мемлекет, мектеп, мейірімді адамдар көп қолдау көрсетіпті. Қазіргі күнде бір-бір үй болып, жоғары білім алып, биік табысқа жетіп жүрген олар көмекке зәру жандарға қолұшын созып, қолдау көрсетіп келеді. Дүние кезек деген – осы. Біз көмектескен жандар ертең өздері сезінген шуақ-жылуды өзгелерге сыйлайтынына сенеміз, — дейді біздің кейіпкеріміз.

Оның алға қойған мақсат-жоспары өте көп. Ол алдағы күндері аз қамтылған отбасы мен көп балалы отбасының жоғарғы сынып оқушыларына мұғалімдермен келісе отырып, тегін қосымша білім беруді ұйымдастырғысы келеді.

— Көп адам мұқтаж жандарға көмектесу үшін ақша мол болу керек деп ойлайды. Алайда қайырымдылық жасау үшін ақшаның қажеті жоқ. Мәселен, соңғы курс студенттері немесе мұғалімдер көп балалы, жағдайы төмен отбасының баласына аптасына екі-үш рет қосымша сабақ берсе, ол бала ҰБТ-дан жақсы ұпай жинап, оқу орындарының біріне түссе, бұл – үлкен көмек. Жалпы адамдарға балықты аулап бермей, қармақ беріп, балық аулауды үйрету керек. Осы бағытта үйде бос, жұмыссыз отырған жандарға кәсіби мамандармен бірлескен шеберлік сыныптарын өткізгім келеді. Мәселен, шаштаразбен келісіп, ол өз кәсібін өзгелерге тегін үйретсе…

Біз дәл осылай теңізге тамған тамшыдай болса, қоғамдағы қордаланған мәселелерді біртіндеп болса да, шешуге атсалысқымыз келеді, — дейді өз ойын ірікпей жеткізетін ақжарқын жан.

Ол ерікті түрде айналасына егіп жүрген мейірім дәні үшін өзгелерден жауап күтпейді. Алайда басшылардың өз еңбегін ескеріп, бағалап жатқанына қуанып қалатынын да жасырмайды. Мәселен, ол ағымдағы жылдың басында Елбасымыз Н. Ә. Назарбаевтың Алғысхатына ие болды. Сонымен қатар 7-арна өткізген «Қайырымдылық жаса» республикалық байқауында бірінші орын алып, «Мейірімді жүрек» аталымына ие болды. «Мейірімді жүректің» иесі – Қазақстан халқы Ассамблеясы жанынан құрылған облыстық аналар кеңесінің мүшесі.

17 жасынан бастап еңбекке араласқан біздің кейіпкеріміз өз өмір жолында жақсы адамдардың көптеп кездескенін айтады. Ол сол кезден бастап әр сағатын жоспарлауды үйренді. Түске дейін сабақта, түстен кейін жұмыс, кешкі сағат алтыдан онға дейін қосымша білім беру курстарында оқып жүрді. Жүрген жерін қуанышқа бөлеп жүретін ол көңілі жарты балғындар мен жаны жабырқау жандардың өміріне өзгеріс енгізді. Сүрінген адамның қайта тұрғанын, мұңайған жанның қуанғанын көрді. Рада мен оның мүдделес достарының негізгі мақсаты да осы еді.

— Бір балаға көмектесіп, бүкіл әлемді өзгерте алмаймыз. Алайда күн сайын тым құрыса бір баланың басынан сипап, қуаныш сыйлай алсақ, ол баланың көзқарасы мен өмірі өзгереді. Біз үшін ең маңыздысы – осы, — дейді ол.

Гүлжамал ЖОЛДЫҒАЛИ,

“Орал өңірі”


Ұлттық спортты ұлықтаған түлектер

Күні: , 215 рет оқылды

IMG_9398[1]


Жақында Жаңақазан ауылының жұртшылығы үшін ерекше, есте қаларлықтай күн болды. М. Жүнісов атындағы жалпы орта білім беретін мектепті 1996 жылы бітірген жаңақазандықтардың ұйымдастыруымен дала қызықтары өтті.


Солардың ішінде «Достар» шаруа қожалығының жетекшісі Думан Қарағойшин, «Шайқыбай» ШҚ-ның жетекшісі Дәріжан Қарағойшин және «Кенжеғалиева Бақыт» ШҚ-ның жетекшісі Мырзахмет Бияшовтардың ұйытқы болуымен екі қашықтықтағы ат бәйгесінің жүлдесіне 30 қой тігілді. Бәйге десе, делебесі қозып, қиқу салып,  «Ер қанаты – ат» деп желпінетін халықтың қарасы көп болды.

Жаңақазандық шабандоздар ғана қатысқан 18 шақырымдық аламан бәйге алты айналымнан тұрды. Соңғы айналымдарда  алдына қара салмай, мәреге дара келген Жетпіс Айтқалиевтың күрең жылқысы I орынды (10 қой) қанжығасына байлады. Ал Дархан Мергеновтің қылқұйрығы II орын (жеті қой), Арманай Ибатовтың тұлпары III орын (үш қой) алып, олжалы болды.  Сондай-ақ «Алуан-алуан жүйрік бар, әліне қарай шабады» демекші, 12 шақырымдық сында  I орынды (бес қой) «Достар» шаруа қожалығының сәйгүлігі (атбегі Асхат Ерешев), II орынды (үш қой) «Дәурен» шаруа қожалығының жиренқасқасы (атбегі Алексей Кереев), III орынды (екі қой) «Болат» шаруа қожалығының торы аты (атбегі Аман Болатов) еншіледі. Мұнан кейін өткен арқан тартыс сайысында жуалыойлық жігіттер ешкімге дес бермей, жеңімпаз атанып, 10 000 теңге ақшалай сыйлыққа ие болды. Сонымен қатар бұл күні екі салмақ дәрежесінде балуандар күресіп, бақтарын сынады.

Ұлттық спортты ұлықтау мақсатымен өрбіген шара көптің көңілінен шықты. Күйбең тірліктен қажыған ауыл халқының бір сәт болса да көңіл күйлері көтеріліп, шат-шадыман болысты. Ауылдастарына азаматтық, жомарттық жасап, елім, жерім деген ауыл түлектеріне жаңақазандықтар дән риза.

Алтынбек ЕРМЕКҚАЛИЕВ,

Жаңақала ауданы


Баба құрметіне – «Күй күмбірі»

Күні: , 218 рет оқылды

DSC_1203


Домбыраның шанағынан төгілген күй құдіреті өн-бойыңды рақат сезімге бөлеп, рухыңды асқақтататыны сөзсіз. Сүйгүліктің шабысындай көрінетін домбыраның қағысы алты алаштың айбарлы намысы болғалы қашан?!


Күні кеше Қаратөбе ауданында өткен ұлы даланың сырлы сазын күміс күймен жеткізген дарынды күйші, төкпе күйдің шебері Ұзақ Мырзабайұлы атындағы «Күй күмбірі» атты республикалық домбырашылар байқауы –  соның нақ дәлелі.

Айта кету керек, өткен жылы Қаратөбе ауданының әкімі Асхат Шахаровтың бастамасымен аймақтық «Ұзақ күйші» қоғамдық қоры құрылып, көп кешікпей ауданның Аққозы ауылдық округіне қарасты Ақтұлым жерінде Ұзақ бабамызға келбетті кесене орнатылды.

Қазақстан Республикасы Тәуелсіздігінің 25 жылдығы аясында Қаратөбе өлкесінде алғаш оздырылып отырған дүбірлі доданы игілікті істің жалғасы деп айтуға толық негіз бар. Басты мақсат – Ұзақ бабамыздың есімін ұлықтау, ұлттық өнерді дамыту, өнер әлемінде жас домбырашылардың есімдерін анықтау.

Қасиетті Қаратөбе мекеніне еліміздің барлық аймағынан табан тіреген күйшілер аудандық мәдениет үйінде алдымен жеребе суыру рәсіміне қатысып, байқауға қатысушы күйшілердің сахнаға шығу ретін анықтады.

Жеребе бойынша алғаш болып батысқазақстандық Ақылбек Бектасов өнер көрсетті.

Күйшілер байқауының ашылу салтанатында сөз сөйлеген аудан басшысы А. Шахаров, ҚР еңбек сіңірген әртісі, белгілі күйші Т. Әліпбаев, ҚР Мәдениет және спорт министрлігінің бас сарапшысы Қ. Мұқанғалиев байқаудың жоғары дәрежеде өтуіне игі тілектерін арнады.

Үш кезеңді қамтыған аталмыш байқауға 30-ға тарта күйші қатысып, бақтарын сынады.

Бірінші, екінші кезеңдерде Қазанғап, Боғда, Құрманғазы, Махамбет, Дина, Сейтек, Дәулеткерей, Қаратау мен Арқа мектептерінің күйлерін шебер орындаған өнерпаздар ғана үшінші кезеңге жолдама алды.

Байқаудың екінші күні меймандар мен қатысушылар Ақтұлым жеріне ат басын бұрып, Ұзақ баба кесенесіне тәу етіп, оның аруағына Құран бағыштады.

Бағдарлама шеңберінде аудандық тарихи-өлкетану музейіне мәдени саяхат жасалынып, жезтаңдай әнші Ғарифолла Құрманғалиевтің ескерткішіне гүл шоқтары қойылды.

Шешуші кезеңге қатысушы 15 домбырашы Дәулеткерей атындағы оркестрдің сүйемелдеуімен қалауы бойынша бір күй орындады.

Байқаудың бас жүлдесін Еркебұлан Соңғыбаев (Маңғыстау облысы) жеңіп алды. Жеңімпазды Қаратөбе ауданының әкімі Асхат Шахаров марапаттап, 300 мың теңгелік сертификатты табыс етті.

— Қазақтың қанына біткен күйшілік өнері – біздің ұлттық бай мұрамыз, құндылығымыз. Қолынан домбырасы түспеген қазақ барда Ұзақ бабамыздың есімі де мәңгі жасайды. Әрине, баба рухына тағзым ету – сіз бен біздің  басты борышымыз. Бабамыздың есімін ұлықтауға қосқан үлестеріңіз үшін баршаңызға алғыс айтамын. Әрдайым да басымыз осындай мерекелі күндерде қосыла берсін! — деді аудан басшысы Асхат Берлешұлы байқаудың марапаттау салтанатында.

Жеңімпаз-жүлдегерлермен қатар, қатысушыларға да ақшалай және заттай сыйлықтар табыс етілді.

Қазылар алқасының төрағасы, Қазақстан Республикасының еңбек сіңірген әртісі, Қазақ ұлттық өнер университетінің профессоры, күйші Тұрар Әліпбаев дүбірлі доданы жоғары деңгейде ұйымдастырған аудан басшылығына ризашылығын білдірді.

Екі күнге созылған домбырашылар додасы мерекелік концертке ұласты.

Ертай БИМҰХАНОВ,

Серікбай ХАСАНОВ,

Қаратөбе ауданы

Тұрар ӘЛІПБАЕВ,

Қазақстан Республикасының еңбек сіңірген әртісі, Қазақ ұлттық өнер университетінің профессоры, күйші:

— Бұл байқау – Ұзақ бабамыздың атымен бірінші рет тойланып жатқан республикалық конкурс. Ұлы Құрманғазының ұстазы тегін адам емес, әрине. Былтырғы жылы осы өлкеде баба есімін ұлықтау мақсатында керемет кесене тұрғызылды.

Қаратөбе ауданының әкімі Асхат Шахаровпен, тарихшы адамдармен ақылдаса, кеңесе отырып, Батыс аймақта республикалық байқау өткізу жөнінде ұсыныс жасаған болатынмын. Батыс аймақ – Құрманғазы, Дина шешеміз, Мәмен атамыз, Боғда атамыз, талай-талай күйшілер шыққан жер. Бүгінгі күнді ойымыздың іске асып, арман-тілегіміздің орындалған күні деп айтуға болады.

Байқау өте жоғары дәрежеде өтті. Ұйымдастырушы тарапқа мың да бір алғыс айтамын.

Еркебұлан СОҢҒЫБАЕВ,

бас жүлде иегері (Маңғыстау облысы):

— Ақ Жайық өңірінде, соның ішінде Қаратөбе елінде ұйымдастырылған Ұзақ бабамыздың конкурсына Маңғыстау облысының атынан қатысып отырмын.

Бүгінде қызмет бабымен Астана қаласындамын. Байқаудың бас жүлдесін жеңіп алғаныма қуаныштымын. Әрине, әзірлігім де жақсы болды. Оның үстіне ұстазымның берген тәлімі де жоғары. Ұйымдастырушылардың барлығына ризашылығымды білдіремін. Бұл байқау басқа байқауларға қарағанда өте ерекше өтті. Ұзақ бабамыздың атындағы байқау әрі қарай да жалғасын тапсын деген тілектемін.


«Музей апаймен» кездесу

Күні: , 187 рет оқылды

image-27-05-16-05-16-1


Қадыр Мырза Әлі атындағы мәдениет және өнер орталығында мәдениет қайраткері, өлкетанушы Сара Танабаевамен кездесу кеші өтті.


«Оралдың «музей апайы» атты шараға келушілер арнайы ұйымдастырылған көрме арқылы  Сара Есқайырқызының қызметімен танысты. Кеш жүргізушісі оның өмірбаяны туралы ақпарат берді. Кездесу барысында «Үздік кітапханашы» белгісінің иегері Гүлжан Жұмақаева, ақын,  ҚР білім беру ісінің үздік қызметкері, «Ерен еңбегі үшін» медалі және Ы. Алтынсарин белгісінің иегері Дариға Мұштанова, облыстық ақсақалдар кеңесінің мүшесі Феликс Баюканский кеш иесін құттықтап, жылы лебіздерін білдірді.

Көрермендерге Сара Есқайырқызының қызмет барысында қандай қиындықтарға тап келгендігі, оларды қалай жеңе білгендігі туралы бейнебаян көрсетілді. Жастар шығармашылық орталығының өнерпаздары кешті әсем әнмен көмкерді. Шара соңында Сара Есқайырқызына облыстық мәдениет, мұрағаттар және құжаттама басқармасы басшысының атынан алғысхат табыс етілді.

Айымгүл ТӨЛЕУҒАЛИ,

«Орал өңірі»


«Халық жауы» атанған Ибраш Букин

Күні: , 213 рет оқылды

20160528_161346


1937-1938 жылдары қазақтың ел басқарған, оқыған азаматтары «Халық жауы» деген жаланың құрбаны болып, нақақ атылып кеткені еліміздің, ұлтымыздың дамуына кері әсер еткені белгілі. Ақ Жайықтың біршама арыстары да 1937 жылы істі болып, БҚО партия комитетінің жауапты хатшысы Ізмұқан Құрамысовпен бірге жалаға ұшырап, «Үштіктің» үкімімен жасырын атылып кетті. Өткен ғасырдың тоқсаныншы жылдарының соңында Ұлттық қауіпсіздік комитетінің БҚО мұрағатында айлап отырып, Сталин геноцитінің құрбаны болған қазақтың біршама азаматтарының ісімен танысып едім. Солардың ішінде Букин Ибраш Сарбөпеұлына қатысты іс те болды.


Букин Ибраш Сарбөпеұлы 1884 жылы Жымпиты ауданының Қособа ауылында туған. Жымпиты ауылының Совет көшесіндегі №71 үйде тұрған. Орынбор мұғалімдер мектебін бітірген. Жымпиты орта мектебінде математикадан сабақ берген. Алашорда ұйымының жергілікті уездік сотының мүшесі, Алашорданың батыс бөлімі далалық сотының хатшысы болған. Букин Ибрашқа ұлтшыл кадрлар ұйымының мүшесі болған, облыста ұлтшыл кадрларды дайындауға әрекет еткен деген айып тағылған. 1937 жылдың 13 қазаны күні Батыс Қазақстан облыстық НКВД-ның шешімімен тұтқындалған. Екі айдан соң, яғни 1937 жылдың 1 желтоқсаны күні «Үштіктің» үкімімен РСФСР Қылмыстық кодексінің 58-2, 58-11-бабы бойынша қылмысты деп танылған. 1937 жылғы 1 қыркүйектегі НКВД-ның анықтамасында былай деп жазылған:

«Екпінді құрылыс» газетінде жарияланған материалда «Ауданның кейбір оқытушылары Кеңес үкіметіне қарсы үгіт-насихат жүргізген. Олардың кейбірі партия жиналысында, ал Жұмабаев сияқтылар мұғалімдер семинарында сыналып, жұмыстан қуылған. Солардың ішінде өте белсенді әрекет еткен – Букин Ибраш. Ол оқушылар арасында ұлттық көзқарасты насихаттаған, Лениннің ескерткішін мазақтаған» делінеді. Осы құжатта И. Букинмен бірге бұрынғы молда, жалған құжатпен мұғалім болып жүрген Жұмабаев Ғазиз, өз мешіті бар ірі молда Әбілов Ғазиз және Дүбәров Қасан деген азаматтардың да есімі бар. Онда: «Қ. Дүбәров 1928-1929 жылдары ұлтшылдар тобын басқарған, бүгінде мұғалім болып қызмет істейді. Арақ ішумен айналысады, ел ішінде ұлтшылдық бағытта үгіт-насихат жүргізеді. Жоғарыда аты аталған адамдардың бәрі – бұрынғы алашордашылар мен ұлтшылдар» деп жазылыпты.

НКВД бастығының атына жазылған түсініктемеде: «1937 жылы ақпан айының аяғында БҚО партия комитетінің жауапты хатшысы Ізмұқан Құрамысовтың ықпалымен контрреволюциялық ұлтшылдар ұйымына тартылдым. Ұйымның құрамында Иманқұлов, «Екпінді құрылыс» газетінің редакторы Ақботин Қаби т.б. болды. Ұйымның мақсаты Кеңес Одағының құрамынан Қазақстанды бөліп алып, буржуазиялық-демократиялық мемлекет құру болды» делінген. Соңына И. Букиннің қолы қойылған.

И. Букиннің іс-құжатында бұл ұйымға кімдердің мүше болғандығы жазылған. Олар бұрынғы меңдешовшілер және алашордашылар құрамында болған Қабиболла Ищанов, Қаратөбе орта мектебінің мұғалімі Мизамғали Жақанов, бұрынғы алашордашы, Орал қаласында тұратын мұғалім Қалдыбай Асанов, Қаратөбе ауылы орта мектебінің директоры Мұқамедқали Бармақбаев, әдебиет пәнінің мұғалімі, молданың баласы Мәкәрім Жазықбаев, бұрынғы алашордашы, мұғалім Ғабдолла Маңкеев.

1937 жылдың 16 қарашасы күні берген жауабында И. Букин: «Иә, мен тұтқынға алынған сәтте, шынында да, контрреволюциялық, ұлтшылдар ұйымының мүшесі болдым. Батыс Қазақстан облыстық партия комитетінің ұйымдастыру бөлімінің меңгерушісі Балғаниязов Алпысбаймен бірге болдым. А. Балғаниязов: «Кеңес үкіметі Қазақстанның экономикалық-мәдени өсуіне көңіл бөлмейді, Қазақстан Кеңес Одағының құрамында болған жылдары өсіп-өркендемеді. Керісінше, революцияға дейінгі деңгейде қалып қойды. Бұл адам төзгісіз жағдай және бұны біз өзгертуіміз керек» деп айтты» деп жауап берген.

Артынша, 20 қараша күнгі тергеуде: «Мен контрреволюциялық жұмыспен айналысуға үлгергенім жоқ. Себебі ұйымға тартылысымен мені бұрынғы алашордашы ретінде сенімсіздік білдіріп, жұмыстан шығарып тастады» дейді.

Тергеудің айыптау қорытындысында: «РСФСР Қылмыстық кодексінің 58-2, 58-11-баптары бойынша Букин Ибраштың қылмыстық ісі қаралды. Ол Батыс Қазақстан облысында контрреволюциялық, басқыншылық әрекеттегі көтерілісші ұйымның құрамында болған. Жапонияның қарулы күшіне сүйене отырып, Кеңес үкіметінен Қазақстанды бөліп алуды мақсат еткен ұйымның белсенді мүшесінің бірі Букин Ибраш өзінің кінәсін мойындады. И. Букиннің ісі НКВД жанындағы «Үштіктің» қарамағына жіберілді» делінеді.

1937 жылы 1 желтоқсандағы НКВД-ның Батыс Қазақстан облысындағы «Үштігі» отырысының №17 хаттамасында: «Бұрынғы алашордашы, далалық соттың мүшесі, ұлтшыл Букин Ибраш ату жазасына кесілсін, мал-мүлкі тәркіленсін» делініп, соңында «Үштіктің» хатшысы Тройцкий деген қол қойыпты.

Ибраш Букин «Үштіктің» шешімі шыққан үшінші күні, яғни 1937 жылы 3 желтоқсанда Орал қаласында атылды. Артында қалған отбасы 1960 жылдары СССР Министрлер кеңесі жанындағы мемлекеттік комиссия төрағасы В. Семичастновке И. Букиннің жазықсыз атылғанын айтып, оны ақтауды сұрап арыз жазған. Қай жерде жерленгені белгісіз болып келген оның өлгендігі туралы куәлігі ұрпағына 1991 жылы 10 маусым күні ғана беріледі.

Анықтамада былай деп жазылған:

«Букиннің айыптау ісі 1963 жылы 12 шілде күні Орал облысы сотының Президиумында қаралды.

1937 жылдың 1 желтоқсанындағы Букин Ибраштың ісі бойынша Батыс Қазақстан облысы НКВД «Үштігі» отырысының қаулысы өзгертілді. Қылмыстың жоқтығына байланысты И. Букин ақталып, іс тоқтатылды.

Орал облыстық сотының төрағасы Б. Иманғалиев».

Сөйтіп, солақай саясаттың құрбаны болып, 53 жасында атылып кеткен Ибраш Сарбөпеұлының артында әйелі Раушан үш қызымен қалады. Әкеден айырылған 1937 жылы қыздары Роза он бір, Санат сегіз, Рая бес жаста екен.

И. Букиннің артында қалған қолжазба, кітаптар мен құжаттарды Жымпиты ауылындағы Совет көшесі, №71 үйдің ұрасында сақтап келген оның анасы 1943 жылы қайтыс болған. Үш қыздан көзі тірі Зинат атанып кеткен Санат әжеміз бүгінде 87 жаста. Жүзінен зиялылық ескен, әдемі қартайған апамыз «ҚССР ағарту ісінің үздігі» болған мұғалім. Жолдасы Қазақ ССР Жоғары кеңесінің депутаты болған Хамит Ғабдуллин атамыз бүгінде өмірде жоқ. «Кеңес Одағының құрметті мұнайшысы», «Жымпиты ауданының құрметті азаматы» болған Хамит атамыздың жолын бүгінде ұрпақтары жалғастыруда. Төрт қызы мұнайшы-геолог, біреуі дәрігер мамандығын таңдаған. Жалғыз ұлы Мұрат та әкесі сияқты Мәскеуден институт бітірген мұнайшы. Атырау қаласында қызметте.

— 1937 жылы сегіз жаста едім. Әкемді тұтқындап әкеткені есімде. Жымпитыда, Совет көшесі, №71 үйде тұратынбыз. Үйді тінтіген жоқ, екі-үш кісі келді де, ұстап алып кетті. Анам басын ұстап, жылап отырды. Артынан анам тамақ алып, Оралдың түрмесіне барғаны есімде. 1943 жылы анам қайтыс болды, мұрнынан қан тыйылмады… Ол кезде апам Роза 9, мен 7, кішкентайымыз Рая 4-сыныпта оқитынбыз. Тұл жетім қалдық. Әкеміз барда үй толы ағайын-тума бір күнде жоқ болып кетті. Әркім өз басынан қорыққан заман болған екен. Қиындықпен өсіп, адам болдық. Апам мен сіңлім қайтыс болды, — дейді Зинат әже (суретте).

Апамыз үшін әкесі Ибраш ата мәңгі жас болып қалды. Әкесі қолы боста үйде патефон жіберіп, күй тыңдап, кейде домбыра тартады екен. Зинат апаны бірінші сыныпқа әкесі апарыпты. «Сабаққа шанамен сүйреп апаратын еді. Шыршаны алғаш рет әкем көрсетті, сол жаңа жыл әлі күнге есімде», — дейді Зинат апа. «Халық жауы» деп нақақ атылып кеткен, бұл күнде сүйегі Оралдың қай жерінде жатқаны белгісіз Ибраш Букин атамыздың артында қалған жалғыз тұяқ бүгінде өсіп-өніп отыр. Орал қаласында немере-шөберелерінің ортасында, бақуатты ғұмыр кешуде.

Ұлдай САРИЕВА,

«Орал өңірі»


«Жұлдыздар тоғысқанда»

Күні: , 197 рет оқылды

7d48a3dda2849315ace1ecbc032af24f


Сенбі күні «Галактика» кинотеатрында «Елбасы жолы» киноэпопеясының  бесінші туындысы болып табылатын  «Жұлдыздар тоғысқанда» фильмінің тұсаукесері өтті.


Қазақстан Тәуелсіздігінің 25 жылдығына орай түсірілген кинотуындыда Елбасымыз Н. Назарбаевтың көшбасшы ретінде қалыптасу кезеңдері суреттеледі. 1984-1991 жылдар аралығын қамтыған кинотуындыда Кеңес одағының ыдырап, тәуелсіз жаңа мемлекеттердің пайда болуы, осындай өліара шақта Елбасы Н. Назарбаевтың тығырықтан жол тауып шыға білген кездері шынайы көрсетілген. Ел тарихындағы елеулі оқиғаларды тізбектеген үш сағатқа созылған кинотуындыда Елбасы рөлін белгілі актер Берік Айтжанов сомдады. Аталмыш фильмге қазақ, орыс, ағылшын, араб, қытайлық актерлер тартылған.  Бұған дейін Елбасы туралы «Балалық шағымның аспаны», «Теміртау», «Отты өзен», «Тығырықтан жол тапқан» атты кинотуындылары көрермен қауымға жол тартқан болатын.  Фильмді танымал киногер Сергей Снежкин  түсірген.

Гүлжамал  ЖОЛДЫҒАЛИ,

«Орал  өңірі»

Асқар  АҚЫШЕВ,

ҚР  еңбек  сіңірген  қызметкері:

– Үш сағат болған фильмнің қалай өткенін байқамай қалдым.  Кино өте әсерлі түсірілген.  Бүкіл еліміздің, Елбасымыздың тарихы, әрбіріміздің де өткен тарихи кезеңдеріміз шынайы суреттелген. Елбасын біз жақсы білеміз деп жүрсек, білмейтін жақтарымыз да  көп екен. Елбасының басынан өткен қиындықтары, табандылығы, қиын жолдардан шешім тауып шыға білуінің өзі – ой саларлық дүние. Бүгінгі күні  тәуелсіздігіміз өз қолымызда. Сондықтан әрқайсысымыз осы еркіндікті бағалауымыз керек. Жалпы, фильмнен өте жақсы әсер алдым.

Ранида ӘШЕНОВА,

облыстық  жастар мәселелері  жөніндегі басқарманың  бөлім  басшысы:

– Бұл фильмді жастар арасында көбірек насихаттау керек. Себебі жастар ол кезеңдегі оқиғаларды дұрыс білмейді. Кинотуындының тұсаукесерінде көбіне жасы үлкен кісілер болды. Еліміздің тәуелсіздік алған жылдарындағы ішкі-сыртқы қайшылықтарға  қарамастан, Елбасымыздың оң шешім қабылдайтын тұстары жақсы әсер қалдырды. Фильм маған ұнады. Бұл фильмді көруге мектеп оқушыларын, студенттерді көбірек тарту керек  деп  ойлаймын.


Қаратөбедегі «күй күмбірі»

Күні: , 249 рет оқылды

DSC_1203


Ел тәуелсіздігінің 25 жылдығына орай Қаратөбе ауданында Құрманғазының ұстазы Ұзақ күйшіге арналған «Күй күмбірі» атты республикалық домбырашылар байқауы мәреге жетті.


Қазақстанның еңбек сіңірген әртісі, Қазақ ұлттық өнер университетінің профессоры, күйші Тұрар Әліпбаев бастаған қазылар алқасы төрелік еткен өнер додасына республика өңірлерінен барлығы отызға тарта домбырашы қатысып, бақ сынады. Бірінші, екінші кезеңде Қазанғап, Боғда, Құрманғазы, Махамбет, Дина, Сейтек, Дәулеткерей және Қаратау мен Арқа мектептерінің күйлерін шебер орындаған өнерпаздар ғана үшінші айналымға жолдама алды.

Шешуші кезеңге қатысқан 15 домбырашы Ғ. Құрманғалиев атындағы БҚО филармониясы Дәулеткерей атындағы қазақ ұлт аспаптар оркестрінің сүйемелдеуімен қалауы бойынша бір күй орындады.

Байқаудың бас жүлдесі табиғи таланты мен өзіндік орындаушылық шеберлігімен танылған Маңғыстау облысынан келген жас домбырашы Еркебұлан Соңғыбаевқа бұйырды. Жеңімпазды Қаратөбе ауданының әкімі Асхат Шахаров марапаттап, 300 мың теңгелік сертификатты табыс етті. Сондай-ақ жүлдегерлер мен байқауға қатысушылардың бәріне ақшалай және заттай сыйлықтар берілді.

Айта кетейік, 2015 жылы аудан басшысының бастамасымен аймақтық «Ұзақ күйші» қоғамдық қоры құрылып, Аққозы ауылдық округіне қарасты Ақтұлым жерінде күйшіге ақ шаңқан кесене орнатылған болатын.

Серік АРМАН


Тұрғындар көтерген мәселе ескерусіз қалмайды

Күні: , 224 рет оқылды

IMG_1390


Қаламыздағы Достық үйінде облыс әкімінің бірінші орынбасары Арман Өтеғұлов қоғамдық қабылдау өткізді. Жер реформасына орай болған шараға өңіріміздегі мемлекеттік құрылым жетекшілері, облыстық мәслихаттың депутаттары қатысты.


Қабылдауға бірінші болып Орал қаласының тұрғыны Тасболат Шөкеев келді. Ол өзінің саналы ғұмырын ауыл шаруашылығы саласына арнаған. Яғни кеңес заманы тұсында Жәнібек ауданында зоотехник, ферма меңгерушісі болып, артынан кеңшар басқарды. Тасболат ағамыздың ойынша, еліміздің тәуелсіздік алғанына 25 жыл уақыт өтсе де, мал шаруашылығы дами алмай тұр. Әсіресе, төрт түлік саны артпай отырғанына қынжылады. Оның басты себебі жем-шөп қорының аздығы деп біледі. Соған орай ауылдағы тұрғындар үшін мал азығы мәселесін шешуге мемлекет тарапынан бір шара алынғаны дұрыс. Екінші мәселе қой шаруашылығына қатысты, нақтылап айтқанда, жүннің еш кәдеге аспай жатқанына уайымдайды.

— Сіз айтып отырған кеңес үкіметі тарапынан мал шаруашылығын дамыту бағытында қолға алынған іс-шаралардың шет жағасын біз де көре қалдық. Өзіңіз жақсы білесіз, тәуелсіздіктің елең-алаң шағында халқымыз малмен күнелтті. Тамағына, киіміне, өзге де қажеттіліктеріне осы малды пайдаланды. Сөйтіп, төрт түлігіміз азайды. Еліміздің экономикалық жағдайы жақсарғаннан соң, ауыл шаруашылығы саласы да өркендей бастады. Мал саны жыл өткен сайын көбейіп келеді. Мәселен, бүгінгі таңда облысымызда 520 мың ірі қара, 1,2 млн. қой-ешкі, 131 мың жылқы бар. Талдау нәтижелері көрсетіп отырғандай, бұл малдың саны 1993-1994 жылғы өңіріміздегі төрт түліктің санына тең. Қазір осы малдардан 180 мыңдай бұзау, 450 мыңдай қозы, 35 мыңдай құлын алынды. Бұл  90-жылдардағы көрсеткіштен көп.

Облысымыз бойынша жалпы малдың 52,7 пайызы шаруашылықтардың еншісінде, қалғаны жекенің, яғни тұрғындардың қолында. Тұрғындар мал азығымен қамтылу үшін жергілікті атқарушы билік тарапынан тиісті шаралар алынуда. Екінші мәселеге қатысты айтсақ, біз қой мен ірі қараның терісін өңдейтін өндіріс орнын салып жатырмыз. Ал қазір бұрынғыдай таза биязы жүн беретін қой жоқ бізде. Бұрынғы қойларымыздың тұқымдарын етті, етті-жүнді бағыттағы қойлармен будандастыру нәтижесінде қазір сапалы жүн беретін қой қалмады. Сол себепті біздегі жүндер әлемдік нарықтағы талапқа сай емес. Ал сапасыз жүнге сұраныс жоқ. Дегенмен де жыл өткен сайын малдарымыздан алынатын өнім сапасының жақсаруына көңіл бөлініп келеді. Оған мемлекет тарапынан тиісті қолдау шаралары көрсетілуде. Сөзім жалаң болмас үшін сізге «Агробизнес – 2020» бағдарламасы бойынша облысымызда жүзеге асқан және жоспарланып отырған іс-шараларды анықтама ретінде бергізейін, — деді Арман Кәрімұлы.

Одан кейін қоғамдық қабылдауға келген тыл және еңбек ардагері Бақытжан Салахатдинов жер реформасына байланысты құрылған республикалық комиссияның жұмысын оң бағалайтынын айтты. Ардагер бұл жерге екі мәселемен келіпті. Бірі – жер, екіншісі – пәтер. 2004 жылдан бері Орал қаласында жердің кезегінде 765-інші болып тұрса, пәтер кезегіндегі реттік саны – бес мыңның орта тұсында. Қазір Орал қаласындағы қызының қолында көп пәтерлі жайлы үйдің бесінші қабатында тұрып жатыр. Жасы 85-ке келген соң жоғарыдан төменге түсу оңай емес. Кезінде уақытпен санаспай жасаған еңбегі қазір мемлекет тарапынан ескерілсе екен дейді. Облыс әкімінің бірінші орынбасары еңбек ескерусіз қалмайтынын жеткізді.

Орал қаласының тұрғыны Алтай Есенғалиевті де жеке тұрғын үй салу үшін берілетін жер мәселесі мазаласа, еңбек ардагері Ескендір Сұлтанғалиев Қаратөбе ауданы Аққозы ауылындағы Жақсыбай өзеніне көпір салу мәселесін көтерді. Қоғамдық қабылдауға қатысып отырған құзырлы мекеме басшылары алдағы уақытта бұл мәселелерге орай тиісті іс-шаралар алынатынын айтты.

Сәкен ӘБІЛХАЛЫҚОВ


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика