ҚР Бас мемлекеттік санитарының  «Балалар ойындары мен ойыншықтарын әкелуге және өткізуге тыйым салу туралы» қаулысы қабылданды. Ел аумағына  әкелуге және өткізуге тыйым салынған, яғни қауіпті балалар ойындары мен ойыншықтарының атауы төмендегідей.

Ресей  Федерациясынан

1. «Стена» құрылыс жинағы, «Цветок» пирамида ойыншығы, өндіруші «Строим вместе счастливое детство» ЖШҚ, 60111446;
2. «Медвеженок» тербелме пирамида, өндіруші «Росигрушки» ААҚ 216500;
3. «Забава» полимер сылдырмағы, өндіруші «Пластмассы» ЖШҚ;
4. «Волчок» сылдырмағы, «Аэлита» ААҚ;
5. «Мякиши» текше ойыншықтар, «Фокс» ЖШҚ;
6. Резеңке іші қуыс балалар добы, «Чебокарское произведенное объединенние им. В. Чапаева»;
7. «Чье лакомство» жұмсақ текшелер, «Фокус» ЖШҚ;
8. «Мякиши» ойыншықтар фабрикасы.

Қытай  Халық  Республикасынан

9. «Lovely Baby» ойыншықтар жинағы;
10. «Бубен» полимер ойыншық, Disney PIXAR Carz;
11. «Бусинка» сылдырмағы, JINHUAFENG PLASTISOL TOY FACTORY;
12. «Музыкальная пауза» ойыншықтар жинағы, JINHUAFENG PLASTISOL TOY FACTORY;
13. Жапсырылатын сегіз аяқ (музыкалық, механизмді ойыншық), KIDDIELAND TOY LIMITED 14/F, Bank of America Tower, 12 Harcourt Road. Central. Hong Kong.

Беларусь  Республикасынан

4. «Занимательная черепаха» ойыншығы.

Жансая ХАМЗИНА,

Орал қалалық тұтынушылардың құқығын қорғау басқармасының бас маманы

Елбасының «100 нақты қадам» бағдарламасымен толықтай танысып шықтық. Бұл бағдарламаның ең басты алғашқы шарты  кәсіби мемлекеттік аппарат құру болып табылады.

Мемлекеттік аппараттың құрамдас бөлігі болып табылатын мемлекеттік қызметшінің мемлекеттің дамуы кезеңінде атқаратын ролі ерекше болу қажет. Біз мемлекеттік қызметшілер Елбасының мемлекеттің болашағы үшін жасап отырған бағдарламаларын қолдай отырып, бұқара арасында кең түрде насихаттауымыз қажет деп түсінемін.

Осы бағдарламаны оқи отырып, ел Президентінің сындарлы саясаты, соның ішінде ауылды көтеру осы жолда ауылдағы шағын кәсіпкерлікпен айналысып отырған шаруашылықтарды қолдау барысындағы айтқан сөздері көкейге қонымды.

Бағдарлама еліміздің өткен тарихын  түгендеп, еленбей қалған жоғымызды жаңартудың басты ісіне айналуы тиіс деп түсінемін. Өйткені мәдениет пен білім саласындағы соңғы жаңалықтар еліміздің рухани дамуына жол ашып отыр. Биылғы жылдың «Қазақстан халқы Ассамблеясының 20 жылдығы», «Ата Заңымыздың 20 жылдығы», «Қазақ хандығының 550 жыл-дықтарының» мерекеленуі – еліміздің  мәдениет саласының дамуына өз үлестерін қосып отырғандығының айғағы.

Еліміздің болашағына айқын жол сілтейтін бұл бағдарламаны жүзеге асырудағы игі істерге қолдау білдіре отырып, ел Президенті Н. Ә. Назарбаевтың дамыған 30 мемлекеттің қатарына кіру үшін ел бірлігін нығайта отырып, бір кісідей жұмылып, ауылымызды дамытуға атсалысуымыз қажет деп есептеймін.

З. МЫРЗАҒАЛИЕВ,

Александров ауылдық округінің әкімі,

Бөрлі ауданы

Орал локомотив жөндеу депосы үш айдан кейін өз жұмысын толық тоқтатуы мүмкін. Тапсырыс көлемінің күрт төмендеуі салдарынан кәсіпорын қиын жағдайға тап болып отыр.

Биылғы сегіз айдың қорытындысы бойынша кәсіпорын 98 млн. теңге шығынға батқан. Сол себепті арнайы құрылған жұмыс тобы кәсіпорын қызметкерлерімен кездесіп, мән-жайды айтып, мекемені мұндай жағдайда ұстау мүмкін еместігін жеткізген. Бұл жөнінде өткен аптаның соңында облыс әкімдігінде болған баспасөз мәслихаты кезінде аталмыш кәсіпорынның  басшылары  мәлімдеді.

– Бұрын Орал локомотив жөндеу депосы ескі тепловоздарды жөндеумен айналысты. Ай сайын орта есеппен 30-40 бірлік локомотивке түрлі техникалық қызметтер көрсетілетін. Яғни күніне бір-екі техникаға жөндеулер жүргізілді. Қазір заманға сай жаңа тепловоздар шықты. Олар көп техникалық қызметті, жөндеуді қажет етпейді. Мәселен, бүгінгі таңда депода бір ғана локомотив тұр. Кәсіпорын осындай жағдайға тап болғасын қызметін уақытша тоқтатуға мәжбүр болып отыр. Әзірге жұмыс үш айға уақытша тоқтатылды. Осы мерзім ішінде ондағы 268 қызметкердің еңбекақысы елу пайыз көлемінде төленеді және басқа да әлеуметтік пакет сақталады. Үш ай бойы қызметкерлердің жұмысқа келмей, басқа қызметке тұрып, сол жақта еңбек етуіне мүмкіндік беріп отырмыз. Ұжым мүшелерімен кездескен кезде әлеуметтік жағынан аз қамтылған, зейнеткерлік жасқа жақындап қалған жандармен де сөйлесіп, келісімге келдік. Қызметкерлер ешқандай дау шығармай, жағдайға түсіністікпен қарағанына ризамыз. Енді 2016 жылы не болатынын айту қиын. Біз жүз пайыз жеке меншік иелігінде болғаннан кейін тапсырыстың тиісті деңгейде болғанын қалаймыз. Егер олай болмаса, кәсіпорын өз жұмысын толығымен тоқтатады, – деді «Қамқор-Локомотив» ЖШС-ның атқарушы директоры және кәсіпорынның жұмысын тоқтату бойынша комиссияның төрағасы Әділбек Қанатбаев.

Баспасөз мәслихатына қатысқан Орал қалалық жұмыспен қамту және әлеуметтік бағдарламалар бөлімінің сектор меңгерушісі Әсия Құрманқұлованың айтуынша, аталмыш кәсіпорын қызметкерлері әзірге жұмыссыз болып табылмайды. Сол себепті оларға тұрақты жұмыс ұсыну мүмкін емес. Дегенмен де депо қызметкерлері кәсіпорын тараған жағдайда өздеріне ұсынылатын жұмыс түрлерімен танысып, тиісті әңгімелесуден өтулеріне болады. «Егер жаңа жылдан кейін кәсіпорын өз жұмысын тоқтатса, онда осы  мекемеде  нәпақасын  тауып  жүргендер жұмыспен қамту және әлеуметтік бағдарламалар бөліміне келіп, жұмыссыз ретінде тіркелуі керек, – деді Әсия Құрманқұлова. – Содан кейін жұмысынан айырылғандардың санатына алынып, оларға төрт ай бойы өтемақы төленеді. Сонымен бірге бос жұмыс орындар базасы арқылы тұрақты жұмысқа жолдама бере аламыз. Түрлі әлеуметтік, қоғамдық жұмыстарды да ұсынамыз».

Сәкен  ӘБІЛХАЛЫҚОВ,

«Орал өңірі»

Жақында Жаңақала ауылдық округі әкімінің аппараты «Үздік мекеме», «Үздік аула», «Үздік көше» байқауларын өткізді. Арнайы комиссия Ұзақбай Рахматуллин атындағы көшені жоғары бағалады.

Ұзақбай Рахматуллин – аудандық газет редакциясында көп жыл қызмет атқарып, қатардағы тілшіден редакторға дейін өскен, аудан әкімдігінде елеулі еңбек еткен, кішіге ізетін, үлкенге құрметін көрсетіп өткен азамат.

Үздік көшені анықтауда комиссия тазалыққа ерекше көңіл бөлді. Сосын абаттандыру жайы, тұрғындардың ұйымшылдығы, қоғамдық шараларға белсене қатысуы есепке алынды. Расында, жолы тақтайдай тегіс болмаса да, көшенің мұнтаздай тазалығы көз сүйсіндірді. Жолдың жиегінде шашылып жатқан тұрмыстық қалдықтар жоқ. Әрі үй біткеннің құрылысы әдемі, көшенің көркін бірнен-бірі асыратындай. Жұпар әже бастаған көше тұрғындарының ұйымшылдықтары, алғырлықтары бір төбе болса, мейрам кездерінде шараларға атсалысуы тіптен бөлек. Бұны аудан жұрты жақсы  біледі.

Алтынбек  ЕРМЕКҚАЛИЕВ,

Жаңақала  ауданы

Жұпар ҚАБДЕНҚЫЗЫ, көше тұрғыны:

 — Ұзақбай атамыздың атындағы көшенің үздік деп танылғанына өте қуаныштымыз. Бұл тұрғындар үшін зор мәртебе. 2004 жылдан бері осы көшеде тұрамыз. Көшеміз керемет. Көршілеріміз тату-тәтті. Енді көшеге ауыз су құбыры тартылса деймін.

Құрметті редакция, осы бір хатты жазсам ба, жазбасам ба деп ойланып-толғанып, ақыры жазуға бел будым. Бәлкім, менің басымнан өткен жағдай басқаларға сабақ болар.

Біз келіншегім екеуміз ерлі-зайыпты жұп ретінде бір шаңырақтың аясында 16 жыл бірге тұрдық. Сіздерге түсінікті болуы үшін бәрін басынан бастайын.

1992 жылы жасым 24-ке келгенде ел қатарлы үйлендім. Сүйіп қосылдық. Ол кезде мен Алматы кино техникумын енді бітіріп, алайда мамандығым бойынша жұмыс істемей, коммерцияға ден қоя бастаған кезім-ді. Ал қалыңдығым Гүлсім болса, ҚазПИ-дің студенті еді. Қалай үйленгендігім әлі күнге дейін жадымда. Әуелі «Аруақ риза болмай, тірі жарымас» дегендей, қалыңдығым екеуміз Алматының Райымбек батыр даңғылы бойындағы Райымбек атаның зиратының басына барып, тағзым етіп, дұға бағыштадық. Сосын мешітке барып, ақ некемізді қидырып, шағын той жасадық. Осылайша үйленіп, үй болдық. Күндер өтіп жатты. Елдің көбі сауда-саттық, базар арқылы нәпақа тауып, күндерін көріп жүрген кез ғой. Таң атса, мен базарға, келіншегім ҚазПИ-ге сабағына кетеді. Сөйтіп жүргенде тұңғыш қызымыз Әйгерім жарық дүниеге көрінді. Қызымның атын өзім қойдым. Бөбегіміз өсіп жатты. Келіншегім оқуын бітіріп, дипломын алды. Саудамыз жүйелі жүргендіктен, жағдайымыз жаман болмады. Әйелімді уақытша шаштаразға кіргізіп қойдым. Ондағы ойым «Үйрене берсін, кейін өзіміз шаштараз ашамыз». Өзім болсам базарда киім-кешек сатып жүріп, фотосуретке түсіруді де үйреніп алдым. Сөйтіп базардағы саудадан кейін кешкісін басталып, түн ауғанша жалғасатын ресторандардағы той-томалақтарды суретке түсіріп, кірісімізді еселей түстім. Осындай тынымсыз тірліктің арқасында алғашқы мәшинемізді алдық. Оған қоса, шағын үйімізді сатып, кең жер үй алдық. Бірақ үй болған соң шынаяқ шылдырламай тұрмайды екен. Сондай ұрыс-керістің бірінде мен үйден кетіп қалдым. Содан 2-3 күннен кейін үйге келсем, бір еркек отыр, ал әйелім оның шашын қиып әлек. «Мына кісі кім?» деген сұрағыма, жұбайым, «Бұл ағай біздің туысқан, Ақтөбе жақтан келді» деп қойды. Бұл 1998 жылы болатын.

Менің ойымда дәнеңе жоқ, әйелімнің айтқанына сендім. Содан әлгі кісі жөніне кетті. Мен үйде қалдым. Күндер өтіп жатты. Есіктің алдынан азық-түлік дүкенін салып, саудамызды қыздырдық. Сөйтіп жүргенде екінші қызымыз Гауһар өмірге келді. Енді әйелім қыздарыммен үйде, мен дүкенде, тынымсыз еңбек. Дүкеннің іші суық болғандықтан, өкпеме суық тиіп, екі ай ауруханаға да жатып шықтым. Шыққасын қайтадан сол тынымсыз тіршілік. Еңбекқорлығымның арқасында біраз ақша жиып және бір жаңа үй сатып алып, сонда көштік. Асыға күткен ұлымыз да көрінді жарық дүниеге. Атын Абылай қойдым. Абылайдың несібесі болар, шаруа онан сайын шарықтап, Алматыда бір емес, қос қонақүй ұстайтын жағдайға жеттім. Тасым онан сайын өрге домалап, бір Алматының өзінде бес үйім болды. Сөйтіп, «мынау» деген жігіттердің біріне айналдым. Тақымымда қымбат көлік, «не ішем, не кием?» деген проблема бізге жат. Бірді-екілі шетелге де саяхаттап үлгердік. Абылайымның сүндеттойын туған ауылыма барып, ат шаптырып, көкпар тартып, дүркіретіп өткіздік. Менің әке-шешем ертерек қайтыс болып кеткендіктен, ұлымның сүндеттойына ата-анамның кезінде сыйласқан замандастарын да шақырып, олардың батасын алдық.

Қымбат көлігімізді келіншегіміз екеуміз де айдай беретінбіз. Қолын қақпадым, «Салон красоты», «Дом моды» дей ме, әйтеуір, баратын жағына бара беретін. Кейде ондай жерлерге өзім апарып, әзілді-шынды «Менің келіншегімнің шашын әдемілеп беріңдер, қазіргіден бетер құлпырып кетсін» дейтінмін.

Өзі онсыз да әдемі бола тұра, біресе ерін дүрдитеді, біресе қас-қабағын өзгерте ме, әйтеуір өзін-өзі күтумен біржола әуейі болып алды. Сосын үйде отырып алып, Наталья Правдина дегеннің «Я все могу, я справвлюсь», «Я успешная женщина» деп аталатын мән-мазмұны күмәнді кітаптарын оқуға көшті. Әйтеуір маған сол кітаптар ұнамайтын. Мен келіншегіме «Сен осы кітаптарды оқымай-ақ қой. Оданша мені күт, маған қара. Мен саған не керектің бәрін тауып беремін. Таптым да, тауып та жүрмін, табамын да. Жағдайымыз керемет, жұрттың алды емеспіз бе?» десем, ол «Жоқ, мен енді баяғы Гүлсім болмаймын!» деп қыңырайып, менің сөзіме құлақ асуды қойды. Қит етсе, «Ажырасам да ажырасам!» деуді тым жиілетті. Мен болсам, «Сен ажырассаң, баяғыда түк жоқ кезімізде неге ажыраспадың? Қазір бізде бәрі бар ғой. Енді келіп, ажырасам деуіңе жол болсын?! Ағайын-туыс, дос-жаран, көрші-көлемнен ұят емес пе? Ауылға не бетімізбен қараймыз? Дүрілдетіп той өткізгеніміз кеше ғана емес пе? Қой мұныңды. Балалар да өсіп қалды. Бізде бәрі бар, тек ауызбіршілік керек. Бұрынғыдай менің айтқанымды тыңдап, менің айтқаныммен жүрсең, біз қазіргіден бетер дәулетке кенелеміз. Мен сені мен бала-шағам үшін тау қопарып, тас жарамын» деумен болдым. Бірақ ол айтқанынан қайтпады. Ақыры ажырасып тындық, мен үйден кеттім. Жоғарыда айттым ғой, бір Алматының өзінде бес үйім болды. Әйеліме ерегесіп, ұл-қызымды тентіретіп жіберуге арым жібермеді де, бір үй бала-шағама қалды. Сол кездері «Неге мен және бір әйел алып, оны және бір үй ғылып қойып, жалғанды жалпағынан баспадым?» деген ойға жиі берілдім. Сөйте тұра жұбайымды қимай, әрі перзенттерімді сағынып, аратұра бала-шағама соғып жүрдім. Үнемі кештетіп жұмыстан кейін соғатынмын. Мен барған кезде көбіне келіншегім үйде болмайтын. Бір күні әдейі түнделетіп бардым. Ол тағы үйде жоқ, менен кейін шамамен бір жарым сағаттан кейін келді. «Жақсы, менен құтылдың, енді неге балалардың қасында болмайсың? Бұл не қаңғыру түн ортасы ауғанша?» деп дүрсе қоя бердім. Тағы да ұрыс-керіс басталды. Қаншама қаным қайнап, жыным келсе де, қол жұмсамадым. Өйткені ол өзінің кінәсі мен күнәсін білмей, полиция шақырып, мені ұстатып жіберуден жүзі жанбайтыны анық. Оның үстіне екеуміз дүрдараз болып жүрген күндердің бірінде ол ағасын шақырып, ал ағасы «Егер қарындасымның бір тал шашы сенің кесіріңнен түсетін болса, менен жақсылық күтпе!» деп тепсініп кеткен-ді. Әйелімнің аярлығына қанша күйінсем де, «Шаңырағымның ортасына түскеніне қоса, қарап жүрмей сотталып кетермін» деп барынша өз-өзімді ұстап бақтым.

…Жаздың тымырсық бір кешінде бір-екі жолдас-жорамен салқын сыра ішпекке бір кафеге жолай бас сұққанбыз. Біз енді жайғаса бергенде сырт көзден тасалау түкпірдегі столдардың бірінде Гүлсімнің бейтаныс еркекпен мәз-мейрам болып отырғанын көзім шалды. Ештеңе бағамдап үлгермедім, дереу олар отырған столға таяп барып, «Бауырым, мына сенімен сылқытып шарап ішіп отырған келіншек менің әйелім. Мұның күйеуіне қоса, үш баласы бар» деп салдым. Әлгі ер-азаматтың ар-ұяты бар екен, менің сөзімді естісімен: «Оңбаған, сен маған күйеуім, үш балам бар» деп айтқан жоқсың ғой» деп, дүрсе қоя берді. Ал әйелім болса, «Ербол, мен саған бір көргеннен есім кетіп ғашық болып қалдым» деп мүләйімси қалғаны. Сонан бері оны иттің етінен бетер жек көріп кеттім.

Егер 16 жыл бірге тұрғанда, әйелім менен тоят таппаса, өз обалым өзіме дер едім. Оның аярлығынан көңілім суығанша менің келіншегіме деген ынтызарлығым бір бәсеңдеген емес. Айтпақшы, арамыз суып, үйде ұрыс-керіс жиілеген сәттердің бірінде, «Мен сенің көзіңе бұрын да шөп салғанмын» деп қарап тұр. Есіме баяғы келіншегім шашын қиып отырған еркекке сап ете қалды. «Сонымен бе?» деген сауалыма, айылын жимастан «Иә!» деп ежірейді.

Ажыраспас бұрын «Гүлсім, ақылға кел. Балалардың берекетін алмайық, оларды тірі жетім қылмайық» деп сағаттап жалынатынмын. Қазір сол есіме түссе, қарадай жыным келеді, «Мен еркекпін бе, езбін бе? Неменеге оның аяғына жығылып, соншама жалындым екен…» Қайыр-қош, сонымен шаңырағым шайқалып, отбасым ойран болды. Гүлсімнің және бір жағамды ұстатқан қылығы, айырылысқанымызға бір ай толмастан үйге бір жігітті кіргізіп алды. Не деген жылдамдық, не деген сұмдық?!? Әйеліме не шешесі (әкесі бұрынырақ қайтыс болып кеткен деседі), не бірде-бір ағайын-туысқаны «Гүлсім, шаңырағыңды шайқама! Сенің күйеуің отбасының берекетін алатын алқаш емес қой. Бала-шағасы үшін жанкешті еңбек ететін табысқой азаматтың қадірін біл!» деп айтуға жарамады.

Құрысыншы, ақымақ әйел жөн сөзге тоқтамай кетіп тынды. Алайда балаларымды ойласам, ет-жүрегім езіледі. Құлындарым менің!.. Обалдарың өз әкелерің жер басып тірі жүргенде, өгей әкеге көздеріңді жәудіретіп қойған ақымақ шешелеріңе дейін бе?.. Сендерді бір Құдайға тапсырдым…

Дәрмен ЖОЛДЫҚҰЛОВ,

Алматы қаласы

(автордың аты-жөні өзгертілді)

Бауыржан ФАЙЗОЛЛАҰЛЫ,

«Орал өңірі»

Бұл  шаңырақтың рухани  уығы болған  жоқ…

Дәрмен бұл хатын маған осыдан бірер жыл бұрын Алматыға бір барғанымда бір жолдас жігіттің үйінде жолығып, ас пен шайдың арасындағы үзілісте оңашалап ұсынды. «Газетке бассаң, көпшілікке жария етсең, бәлкім бәзбіреулерге сабақ болар» деген-ді ол. Бірақ іштей әне-міне реті келер деп жүргенде жаңағы хат менің жұмыс столымның суырмасында біраз уақыт жатып қалды. Биылғы маусым айында “Орал өңірі” газетінде Бөкей ордасы аудандық сотының бас маманы Асхат Амановтың «14 некенің 13-і бұзылды» деген мақаласы жарық көрді (“Оө”, №69, 11.06.2015). Осы материалда өздері сүйіп-күйіп қосылған жастардың не себепті ажырасатындығы бірсыдырғы айтылған. Былай қарасаң, Бөкей ордасы ауданының тұрғындары – 100 пайызға жуық өзіміздің ұлттың өкілдері. «Апырым-ай, қазақылықтың қаймағы бұзылмаған ауыл-аймақтағы жағдай осындай болса, орысқолдылау аудан-ауылға қоса, қала мен қаланың төңірегіне сәлем айт, ондашы» деп іштей қынжыласың. Міне, осы ой мені Дәрменнің басындағы жағдайды жұртқа жариялауға жетеледі. Дәрменнің өзі айтпақшы, «Бәлкім, бәзбіреулерге сабақ болар…»

Мен Дәрменді студент кезімнен білетінмін. Ол кезде ол да студент еді. Біздің курстың Бақытбек деген кітап саудасымен айналысатын коммерсант жігіті таныстырған еді бізді. Дәрмен сырт көзге ұяң, биязы мінезді көрінгенімен, сауда-саттыққа тез бейімделіп, коммерцияға келгенде жұмыртқадан жүн қырқатындай пысықтық танытты. Біздің журфактың жатақханасына жиі келіп тұратын. Кейін оның үйлену тойында да болдық. Көп ұзамай мен де шаңырақ көтердім. Дәрменнің отбасымен тонның ішкі бауындай араласып кетпесек те, кейбір ортақ жолдас-жораның үйінде қонақтықтарда бірге болып жүрдік. Бірді-екілі келіншегімен ол біздің үйде, біз де оның үйінде мейман болдық. Бүгіндері салқын ақылға салып қарасам, Дәрмен келіншегі екеуі әлгіндей басқосуларда тек дүние-мүлік туралы ғана әңгіме қозғайтын. «Естідіңдер ме, анау «Тойота» алыпты, осындай деген кісі «Мерседес» алып қана қоймай, жұрт көп жүретін жерден дүкен ашыпты-мыс. Пәленше әйелінің туған күніне бриллиант сақина сыйлапты, түгенше келіншегіне норковый шуба әперіпті-міс…» Әйтеуір екеуінің бар есіл-дерті дүние-мүлік болатын. Есесіне Дәрмен мен Гүлсімнің жақсы кітап, театрдағы сәтті қойылым немесе жаңа шыққан ән туралы пікірге пікір қосқанын естімеппін. Тіпті ол екеуінің ең болмаса бала тәрбиесі туралы ортаға салған ойлары да жадымда қалмапты. Демек, олардың шаңырағын ұстап тұратын рухани уық мүлдем болмағаны ғой.

Бүгіндері шаңырақ көтеріп, отау құрып, қосылған қос өзендей тағдырлары бір арнаға тоғысқан жастардың шаңырағының рухани уығы мықты болғай!

«Нұр Отан» партиясының «Кедергісіз келешек» атты жобасы еліміздің түкпір-түкпірінде кеңінен жүзеге асырылуда. Бүгінде аталмыш жоба мүмкіндігі шектеулі азаматтар үшін кедергісіз ортаны құру мен инклюзивті білім беру саласын дамытуда ықпалды екенін дәлелдеді. Бұған «Нұр Отан» партиясы облыстық филиалы қызметкерлерінің дүйсенбі күні ұйымдастырған іс-шарасы кезінде көзіміз жетті.

Аталмыш шараға өкілетті мемлекеттік  құрылымдар мен облыстық мәслихат депутаттары, ҮЕҰ және БАҚ өкілдері қатысты. Шара басталмас бұрын «Нұр Отан» партиясы облыстық филиалы төрағасының орынбасары Гүлназ Құлжанова  қатысушыларды аталмыш ұйымның мәжіліс залына жинап, «Кедергісіз келешек» атты жобаның маңызына тоқталды.

– Елімізде соңғы жылдары қолға алынған бұл жобаның мүмкіндігі шектеулі жандарға шынымен де пайдасы көп.  Тиімді жоба биыл да жалғасуда. Өткен аптада орталық аппараттың өкілдері келіп, осы бағыттағы жұмыс бойынша бізге бірқатар тапсырмалар берді.

Бүгінгі шара сол тапсырмаларды орындау мақсатында ұйымдастырылып отыр. Өздеріңізге белгілі, бұған дейін біз аталмыш жоба бойынша маусым айында қаладағы бірқатар нысандарды аралап, қоғамдық-партиялық бақылау жүргізгенбіз. Сол жолы кейбір қоғамдық орындарға мүгедек жандарға қызмет көрсету сапасын арттыру мақсатында өздері орналасқан ғимараттардың әлеуметтік инфрақұрылымын жетілдіру қажеттігін айтып, ұсыныстар жасадық. Араға екі-үш ай салып, яғни бүгін сол кездері жүргізген жұмысымыздың нәтижесін тексеріп көруге шешім қабылдадық. Осыған орай партияның жергілікті өкілдері жұмыс тобының қатысуымен 22 қыркүйек пен 8 қазан күндері аралығында қоғамдық-бақылау жұмысын жүргізбек. Ондағы біздің мақсатымыз – біреулерді  сынап-мінеп, жазалау емес, керісінше, қоғамдық орындарға ұсыныс жасап, оларға мүгедек жандарға қызмет көрсету сапасын  жақсарту жөнінде кеңес беру. Бұл жолы жұмысшы тобы №3 қалалық емхана, теміржол вокзалы, облыстық диагностика орталығы, аутопарк, әмбебап дүкені жанындағы СИТИ орталығы, облыстық халыққа қызмет көрсету орталығы секілді халық көп баратын орындардағы қызмет сапасын тексеруге шығады. Тексеру барысында жұмысшы тобы жаз айындағы ұсыныстарының жүзеге асырылу барысын бақылайды, – деді Гүлназ Мағжанқызы.

Бұдан кейін сөйлеген «Қазақ  зағиптар қоғамы» қоғамдық бірлестігінің «Орал» корпоративтік қорының төрағасы Мұрат Қадырбеков көпшілік көп жүретін орындарға жету үшін және мекемелердің жұмыс кестесімен таныс болу үшін мүмкіндігі шектеулі жандарға жағдай жасалуы керек екен деген пікірін жеткізді. Осыдан соң жұмысшы тобы аталған нысандарды аралауға кірісті. Алғашқы кезекте қалалық №3 емханаға барған жұмысшы тобы мүмкіндігі шектеулі жандарға қызмет көрсету жағдайын бақылау мақсатында кіреберістегі мүгедек жандарға арналған есіктің жанындағы қоңырауды басты. Бұған қа-пелімде жауап берген ешкім болмады. Арада біраз уақыт өткен соң ғана әлгі есік ашылып, жұмысшы тобы мұның себебін анықтауға мүмкіндік алды. Сөйтсе, әлгі қоңырау жұмыс істемейді екен, тексерушілер мұны тіркеу бөліміне және №19 және №20 бөлмелерге кіріп анықтады. Осы жағдайға байланысты олар аталмыш емхана басшысы Қашура Әжіғұловаға жолыққанда, ол кісі мұның себебін түрлі жағдаймен байланыстырды. Емхана қызметкерлерінің  сөзінше, қоңырау жөндеу жұмысы кезінде айырылып қалуы мүмкін немесе балалар ойнап жүріп басып, қоңырау істен шыққан. Бұдан соң жұмысшы тобы дәрігерлік жәрдемге дейін қызмет көрсететін №10 бөлмеге кірді. Бұл жерде олар әйелдер қаралатын креслоға мүгедек жандардың көтерілу мүмкіндігі қарастырылмағанын анықтады. Осы жерде Қашура Мұхтарқызы мүгедек әйелдерге арналған креслоға тапсырыс берілгенін айтты. Бір жақсысы, мұндағы дәретханаға мүгедек жандар еркін кіріп-шыға алады екен. Мекеме басшысы Қашура Мұхтарқызының айтуынша, дәрігерлік қызмет мүмкіндігі шектеулі жандарға бірінші қабатта көрсетіледі екен.

Және емханада оларды дәрігерлермен байланыстыратын арнайы қызметкер бар. Кездесу барысында Мұрат Қадырбеков емхана басшысынан науқастарды қабылдайтын бөлмелерге зағип жандар үшін дәрігердің аты-жөні мен қабылдау уақыты көрсетілген арнайы кесте даярлап ілуін өтінді және олардың сүрініп кетпеуі үшін бұдырлы плиткалар төселген жолдар жасалса деген тілегін жеткізді. Қашура Мұхтарқызы жұмысшы тобы тарапынан айтылған ескертпелерді қабыл алып, барлығын стандартқа сәйкес орындауға уәде берді.

Бұдан соң «Арба» мүгедектер қоғамының төрайымы Гүлмира Батпақұлова бастаған жұмысшы тобы №5 автобуспен теміржол вокзалына барды. Жұмысшы тобы жолда аталмыш автобустың пандусы талапқа сай жұмыс істемейтіндігін өз көздерімен көріп келді. Содан соң олар вокзалға келіп, мүмкіндігі шектеулі жандарға арналған кассаға жақындады. Бұл жерде де мүгедектерге қолайлы қызмет көрсетілмейді екен, өйткені мүгедек жандарға арналған терезе тарс жабық тұрды. Осыған байланысты жұмысшы тобы вокзал басшыларын шақыртып, терезенің не себепті жұмыс жасамай тұрғанын сұрады. Олардың сұрақтарына вокзал бастығының орынбасары Райман Ерліғасымова мен вокзал кезекшісі Светлана Абдуллаева күмілжіп, нақты жауап бере алмады. Әрі-беріден соң олар да №3 емхана қызметкерлері секілді, бар бәлені бұдан біраз уақыт бұрын өткен жөндеу жұмысына жаба салды. Вокзал қызметкерлері кассирден мүгедектерге арналған терезені ашуды сұрағанда, ол «Терезе үстелмен мықтап бітелген, мен қалай ашамын?» деп абыройды одан әрмен  төкті. Осыған қарап-ақ біз төменгі терезенің мүлдем  жұмыс  жасамайтынын шамаладық.

Бұдан соң жұмысшы тобын ілестіріп  вокзалдың асханасына барған Гүлмира Батпақұлова есіктің тарлығынан ішке ене алмады. Сол жерде мүгедектерге арналған демалыс бөлмесіне бас сұққанымызда, бұрышта тұрған арбаны көріп, бұл жерде мүмкіндігі шектеулі жандарға жақсы жағдай жасалған екен деп ойлап қалдық. Бірақ Гүлмира арба дөңгелегінің босап жатқанын көрсеткен кезде мұнда да көзбояушылықтың орын алғанын көрдік. Сондай-ақ перронға шығатын жердегі мүгедектерге арналған жол да көңілдегідей емес. Мұны көрген Гүлмира Алматы, Астана, Павлодар қалаларындағы вокзалдардағыдай бізде де мүгедектер үшін арнайы платформа жасалса деген тілегін жеткізді. Гүлмираның айтуынша,  жол жүргенде вокзал қызметкерлері оларға жақсы көмектесетін көрінеді. Вокзал қызметкерлерінің сөзінше, «Орал-Астана» бағытына жүретін пойызда мүгедектерге арналған арнайы купе бар көрінеді. Және осы вагонға билетті алдын ала сатып алуға жағдай жасалған. Осы жерде Гүлмира Батпақұлова мүгедектер атынан осындай арнайы купе «Орал-Алматы» бағытындағы пойызда да ұйымдастырылса деген тілегін жеткізді. Бір айта кететін нәрсе, теміржол қызметкерлері маусым айындағы «нұротандықтардың» ұсыныстарын шала болса да, орындапты. Бұлай дейтініміз, вокзалға кіретін жерде талапқа сай болмаса да,  пандус орнатылыпты. Гүлмираның айтуынша, ереже бойынша пандустың биіктігі 50, 70 және 90 см және ені 90 см болуы керек екен. Бұл жердегі пандустың биіктігі 70 см, ал ені 90 см, яғни талапқа онша сай келмейтін көрінеді. Бірақ мұндағы дәретхана мүмкіндігі шектеулі адамдарға әбден лайықталыпты, мұны арбаға таңылған жан бізге үлкен ризашылықпен жеткізді.

Шара соңында теміржол вокзалына тиіп тұрған базарға соқтық. Онда мүмкіндігі шектеулі жандарға арналған арнайы есіктер болғанымен, ондағы пандустар талапқа сай жасалмапты. Мұны Гүлмира арбасымен өзі жүріп көрсетті. Бұл жерден арбамен өту мүгедектер үшін қауіпті екен, өйткені олар тегіс емес пандустан өтерде бір жағына қарай қисайып құлап кетуі мүмкін. Қысқасы, бұл базардағы мүгедектерге арналған есік пен пандустардың аты бар да, заты жоқ болып шықты.

Ең соңында осы базардың тап қасында тұрған дәріханаға бас сұқтық. Бұл дәріханаға арбамен кіру тіпті мүмкін емес. Өйткені дәріханаға кіру үшін баспалдақтардан өту керек, оның үстіне есігі өте енсіз. Сондықтан  дәріхана сатушысы тұтынушылардан босаған кезде Гүлмира дәріханаға арбамен кіре алмай тұрғанын айтып, одан екі қорап лейкопластырьды сыртқа алып шығуын өтінді. Оған жауап ретінде сатушы әйел  «Дәріхананы иесіз тастап, сізге қалай барамын?» деп айқай салды. Соның алдында ғана Гүлмира өздеріне кейбір дәріханашылардың сыртқа шығып, сұраған дәрілерін әкеліп беретінін айтқан болатын. Өкінішке орай, бұл жолы дәріханашы Гүлмираның осы сөзін жоққа шығарды. Сырттағы дабырлаған дыбысты естіп шыққан дәріхана қожайыны екі жақты да сабырға шақырып, бұдан былай дәріханашылардың мүмкіндігі шектеулі жандарға сұраған дәрі-дәрмегін сыртқа шығып, өздері әкеліп беретінін жеткізді. Ол тіпті арбаға таңылған келіншекке өзінің жұмыс телефонын беріп, мүгедек жандар өзіне хабарласқан жағдайда, оларға дәрі алуға тікелей өзі көмектесетінін де айтты.

Қорыта айтқанда, «Кедергісіз келешек» жобасы бойынша «нұротандықтар» ұйымдастырған шара барысында инфрақұрылымды жетілдіру жұмысында көзбояушылықтың көп екенін байқадық. Тексеру жұмысы кезінде жұмысшы тобы жоғарыдағы анықталған жағдайларға байланысты мекеме басшыларына ескерту жасап, кемшіліктерді  түзетуді  тапсырды.

Айша ӨТЕБӘЛІ,

«Орал өңірі»

Кеше осындай тақырыппен облыстық қазақ драма театрында мұғалімдердің кәсіби мерекесіне орай форум өтті. Оған ардагер ұстаздар, білім беру ұйымдарының басшылары, мұғалімдер, облыс басшылығы мен депутаттар қатысты.

Биыл ұстаздардың кәсіби мерекесін атап өту түрлі акциялар арқылы мерзімінен бұрын басталып кеткен болатын. Қоғам назарын білім беру саласына аудару, педагогтың мәртебесін көтеру, азаматтарды өз ұстазын сыйлау мен қолдау мақсатында ұйымдастырылған «Ме-нің алғашқы ұстазым!» республикалық акциясы өңірімізде үлкен қолдау тапты. Барлық білім беру мекемелерінің оқушылары қоғамдық орындарда «Алғашқы ұстазыңды құттықта!» акциясын өткізіп, көптеген адамның ұстазын есіне түсірді. Сондықтан биыл ұстаздарға құттықтау легі толассыз болары анық. «Ұстазыма ақ тілекпен» ашық хат байқауы мен «Ұстазыма сыйлық» облыстық  қол-өнер байқауы ұйымдастырылды.

– Барша ұстаздарды кәсіби мерекесімен облыс әкімі Нұрлан Асқарұлының атынан құттықтаймын.

Ұстаз – үлкен тұлға.  Әрқайсымыз да ұстазымызды ұмытпай, жүрегімізде сақтауымыз тиіс. Ұстазымызға күн сайын ықылас таныта алмасақ та, төл мерекесінде құттықтап, бір марқайтып тастайық. Бұған оқушылардың республикалық «Алғашқы ұстазыңды құттықта!» акциясы да үлес қосуда. Ұстаздардың дендері сау болуын, жұмыста табысты болуын тілейміз, – деді облыс әкімінің орынбасары Бақтияр Мәкен.

ҚР Білім және ғылым министрлігінің Ыбырай Алтынсарин атындағы төсбелгімен облыстық дарынды балаларға арналған мамандандырылған мектеп-интернатының тарих пәні мұғалімі, директордың оқу ісі жөніндегі орынбасары Гүлайша Таңатова, Орал қалалық №17 мектеп директоры Тамара Рудич, Тасқала ауданы «Сәулет» мектеп-лицейі директорының оқу ісі жөніндегі орынбасары Баян Махимова, есту және сөйлеу қабілеті бұзылған балаларға арналған облыстық мектеп-интернатының бастауыш сынып мұғалімі Светлана Лунева марапатталды. Сондай-ақ Бақтияр Мәкенұлы дарынды балаларға арналған мамандандырылған қазақ-түрік мектеп-лицейінің директоры Алмас Мұқанов, дарынды балаларға арналған мамандандырылған С. Сейфуллин атындағы №11 облыстық мектеп-интернатының бастауыш сынып мұғалімі Ләззат Абдрахманова, Теректі аудандық №3 балалар саз мектебінің директоры Меруерт Ғаббасова, облыстық экологиялық-биологиялық орталығының директоры Фатима Кержикова, облыстық  білім басқармасының бөлім басшысы Светлана Темірғалиеваға ҚР Білім және ғылым министрлігінің «Білім беру ісінің құрметті қызметкері»  төсбелгісін  табыстады.

Қазақ-түрік лицейінің оқушысы, халықаралық, республикалық олимпиадалар мен ғылыми жобалардың,  жеңімпазы Диас Құлжанов Ақсай қаласындағы №3 балабақшадағы тәрбиешісі Жаңылай Бимағамбетованы, халықаралық «Невская палитра» байқауының жеңімпазы, С. Ғұмаров балалар шығармашылық мектебінің оқушысы Анна Ештокина Оралдағы №3 балабақшадағы тәрбиешісі Галина Мусатованы, Қазақ-түрік лицейінің 11-сынып оқушысы, халықаралық, республикалық олимпиадалар мен ғылыми жобалардың жеңімпазы Сәрсен Әділхан Орал қаласының №8 балабақшасындағы тәрбиешісі Айжан Кәрімғалиеваны қолынан жетелеп сахна төріне алып шықты. Баланың ілімге құштарлығы сонау балабақша қабырғасында оянатынын ескерсек, білімнің талай белесін бағындырып жүрген шәкірттердің балабақшадағы тәрбиешілерін ескерусіз қалдырмай, мерекесінде сый-құрмет көрсетуі құптарлық. Сондай-ақ «Алтын белгі» иегерлерін тәрбиелеп шығарған бастауыш сынып мұғалімдері де төрден орын тауып, оларға  арнайы  құрмет  көрсетілді.

Салтанатты шараның көрермені болып отырған ардагер ұстаздардың есімдері құрметпен аталып, оларға білім мекемелерінің басшылары гүл шоқтарын табыстады. Ғұмырын бала тәрбиесіне арнаған жандарға көрермендер тік тұрып қошемет көрсетті.

Облысымыздың кәсіптік-техникалық білім беру саласында 20-30 жылдан да көп еңбек еткен Ельмира Сәбитова, Талғат Бегалиев, Владимир Ружин, Исатай Оразғалиев, Светлана Герасимовалардың есімдері құрметпен аталып, сый-сияпат жасалды. Сондай-ақ ұстаздықты ұрпақтан-ұрпаққа жалғастырып келе жатқан педагогтар әулеттері сахнаға шақырылды. Отбасында 6 педагог бар қаратөбелік Айтқали Хайроллаұлының, әулетінің төртінші ұрпағына ұстаздық жалғасқан теректілік Мазур Валеевтің отбасына диплом, сыйлықтар табысталды.

Сондай-ақ білім саласын үнемі қолдайтын демеушілер де ұмыт қалмады. Облыстық ішкі істер департаменті «Мектепке жол» акциясы бойынша үшінші жыл қатарынан облыстың бес білім ошағына бір күндік табыстарын (жылына 5-6 млн. теңге) аударып келген. Департамент бастығы Махамбет Абисатов «Қамқор жүрек» аталымымен марапатталды. Мүгедек балалар ұйымдарына үш жылда 3 млн. теңгеден астам қаржысын бөлген «КазТрубПром» ЖШС-ның бас директоры Александр Быков, соңғы үш жыл бойы Чапаев мектебі оқушыларына арнайы шәкіртақы тағайындап, биыл «ГАЗель» көлігін сыйлаған жеке кәсіпкер Сағидолла Батайұлы және саланың тұрақты демеушісі «Айдана» ЖШС-ның директоры Аветик Амирханян да «Қамқор жүрек» аталымымен, естелік сыйлықтармен марапатталды.

Оқушылардың домбыра ансамблі, вокалдық және би топтары, әнші балдырған салтанатты шараның әрін келтіріп, ұстаздарының мерекесін нағыз думанға айналдыра  білді.

Нұрлыбек НҰРЛАНҰЛЫ,

«Орал өңірі»

Халықаралық мұғалімдер күніне орай  «Менің алғашқы ұстазым!» атты  республикалық акция  өткізілуде.

Қоғам назарын білім беру саласына аудару, педагог мәртебесін көтеру, азаматтарды  өз ұстаздарын  сыйлау мен қолдау  көрсетуге үндеу мақсатында ұйымдастырылған акцияға  мемлекеттік емес ұйымдар, ата-аналар және педагогикалық қауымдастық өкілдері, жергілікті атқарушы билік құрылымдары үлес қосуда. «Менің алғашқы ұстазым, мере-кеңізбен!», «Құттықтауымды қабыл алыңыз!», «Сыйлаймыз және жадымдасыз», «Ұстаздар, бар жақ-сылық сіздер үшін!» атты ұрандар-мен өтіп жатқан акция қыркүйек айының 21-інде басталып, 4-қазанға дейін жалғаспақ. Сонымен бірге  алғашқы ұстаздардың форумы, «Ұстазыңды құттықтауды ұмытпа!», «Алғашқы ұстазыңды құттықта!» «Ұстаз оқушылардың көзімен»,  «Менің алғашқы ұстазым!» тақырыптарында байқаулар, мектеп мұражайларының ашылуы, шығармалар, фотосуреттер, суреттер, мерекелік құттықтау хаттарын тарату да  ұйымдастырушылардың ұдайы назарында болмақ. Аймақтық, қалалық, аудандық білім саласының дамуына елеулі үлес қосқан ұстаздар марапатталып, мерекелік іс-шарада салтанатты түрде құттықтау, мадақтама, алғысхаттар, қаржылай сыйлық беру ұсынылады.

«Менің алғашқы ұстазым!» республикалық акциясы аясында  ең үздік бастауыш сынып мұғалімдерін марапаттау мақсатында алғашқы ұстаздар форумын өткізу жоспарланған.  Қыркүйек айының 21-30-ы аралығында өтетін аймақтық форумға республика мектептеріндегі үздік бастауыш сынып мұғалімдері, «Алтын белгі» иегерлерін дайындаған ұстаздар, халықаралық интеллектуалдық  байқаулар мен жарыстардың жеңімпаздары, ғылым, өнер, спорт, тағы басқа саладағы жетістікке жеткен мұғалімдер қатыса алады. Аймақтық форум бағдарламасында жергілікті атқару органдарының, үкіметтік емес ұйымдар, БАҚ өкілдерінің қатысуымен үздік педагогтарды марапаттау рәсімі мен шығармашылық ұжымдардың өнер көрсетуі  өткізіледі. Ғаламтор жүйесінде «Алғашқы ұстазыңды құттықта!» акциясы туралы беттер ашу ұсынылады.

Гүлжамал  ЖОЛДЫҒАЛИ,

«Орал  өңірі»

Суретті түсірген Медет ДОСЫМОВ

Кеше облыстық соғыс және еңбек ардагерлері кеңесінің төртінші пленумы болып өтті. Оған облыс әкімі Нұрлан Ноғаев қатысып, сөз сөйледі.

Пленумда ең алдымен ұйымдастыру мәселесі қаралды. Соған орай кезекті облыстық ардагерлер конференциясын 2016 жылы 24 ақпанда өткізу және Орал қалалық соғыс және еңбек ардагерлері ұйымы басқармасының төрағасы Кенжебай Нығметті облыстық ардагерлер президиумының мүшелігіне қабылдау жөнінде шешім қабылданды.

Сонан соң облыстық соғыс және еңбек ардагерлері ұйымы басқармасының төрағасы М. Мұхамбетов баяндама жасады. Оның айтуынша, облыстық ұйым ресми билік және қоғамдық ұйымдармен бірлесе отырып, талай істер тындырды және тындыра бермек. Әсіресе, жастарға отаншылдық тәрбие беруде жоспарлы істер жүзе-ге асырылып келеді. Соның ішінде Ақжайық аудандық ардагерлер ұйымының жұмысын ерекше атап көрсетуге болады. Мәселен, қазақтың тамаша ақыны Жұбан Молдағалиевтің туған жерінде және аудан орталығында оған ескерткіш орнатылған. Кеңес Одағының Батырлары Есен Орақбаев пен Михаил Абдоловтың да туған ауылында ескерткіші бар. Орал қаласы мен аудандарда, мектептер мен колледждерде жастардың соғыс және еңбек ардагерлерімен кездесулері өтеді. Олардың жастарға игі әсері болары сөзсіз. Орал қаласындағы әскери-техникалық мектеп директорының орынбасары Г. Мұқатаев басшылық ететін «Жас жауынгер» клубының жұмысы нәтижелі. Қазақ хандығының 550 жылдығы құрметіне арналған түрлі шараларға өзгелермен қатар ардагерлер де белсене қатысты. Дариян ауылдық округінде сол ауылдың соғыс және еңбек ардагерлері ұйымының төрағасы Х. Ерғалиевтің бастамасымен төрт соғыс ардагеріне ескерткіш ашылған. Келешекте төрт Социалистік Еңбек Еріне арналған ескерткіш ашылуы тиіс. Сондай-ақ «Қамтылмаған қария қалмасын!» іс-шарасы өту үстінде. Мұндағы мақсат – оралмандар мен кейбір ескерусіз қалған қарияларды есепке алып, оларға қамқорлық таныту. М. Мұхамбетов жұмыстағы жекелеген кемшіліктерді көрсете келіп, аға ұрпақ өкілдерін келешекте де белсенділік танытуға шақырды.

Жарыссөзге Жәнібек аудандық ардагерлер кеңесінің төрағасы  А. Уәлиев, Теректі ауданы Ақжайық  ауылдық бастауыш ардагерлер ұйымының төрағасы Т. Ашықов, Қазталов аудандық ардагерлер кеңесінің төрағасы У. Әбішев, «Жас Отан» жастар қанаты облыстық бөлімшесінің басшысы Н. Жолдасқалиев және басқалар қатысып, ой-пікірлерімен бөлісті.

– Ардақты ардагерлер, аға-апалар! Күн тәртібіндегі мәселе маңызды. Сіздер зейнетке шыққаннан кейін де еліміздің дамуы мен ұрпақ тәрбиесіне айтулы көп үлес қосып келесіздер. Бұл – сіздердің Отанның мүддесіне әрдайым адал екеніңізді көрсетеді. Әрине, қазір өскелең талапқа сай жас көп. Кейде оларға аға ұрпақтың көңілі толмайтыны рас. Ол заңды да. Өйткені жастарға талап қашанда жоғары болуы тиіс. Мына күрделі заманда бәріміз бірігіп, қазақстандық  қоғамның  ынтымағы  мен  еліміздің  дамуына  ұйытқы  болуымыз  шарт. Түрлі қауіп-қатерге де қарсы тұруымыз қажет. Өткенді ұмытпау керек, онсыз  келешек  жоқ. Сіздердің мол  тәжірибеңіз бен өмірлік үлгі-өнегеңіздің алдында бас иемін. Барлығыңызға амандық, саулық  тілеймін! – деді  облыс  басшысы  өз  сөзінде.

Пленум соңында марапаттау рәсімі өтіп, жиынға қатысушыларға деректі  бейнебаян  көрсетілді.

Серік   ИХСАНҒАЛИ      

1992 жылдан бастап тәжік-ауған шекарасында шиеленіскен күрделі ахуал қалыптасқаны тарихтан белгілі. Осынау сегіз жылға созылған әскери қақтығыстарға қатысқан ардагерлер Ұлы Жеңістің 70 жылдығына орай автошеру ұйымдастырды.

Көрші облыстың Шалқар, Алға аудандарынан басталып, Ақтөбе қаласы арқылы өткен автошеру Орал қаласына табан тіреді. Жеңіс алаңына гүл шоғын қойған соң, ардагерлер «Нұр Отан» партиясының ғимаратында жастармен кездесті.

«Ардагерлер одағы» (тәжік-ауған шекарасындағы жауынгерлік қимылдарға және әскери қақтығыстарға қатысушылардың) республикалық қоғамдық бірлестігінің төрағасы, доғарыстағы гвардия подполковнигі Мұрат Мұхаммеджанов қилы кезеңнен сыр шертіп, қазір әскери-патриоттық тәрбиені дамытуға зор көңіл бөлініп жатқанын айтты. Мәселен,  Маңғыстау, Атырау облыстарында «Қайсар» әскери-патриоттық клубының өңірлік лигалары барын мысалға алып, Орал қаласынан да ашуға ұсыныс жасады. Кейін дөңгелек үстел басында қоғамдық бірлестіктің облысымыздағы филиалына жетекшілік етуге старшина Мирлан Жұмашев бірауыздан сайланды. 1995 жылы 7 сәуірде Тәжікстанның Пшихавр шатқалында мождахеттермен болған ауыр ұрыста Қазақстанның Ішкі әскерінің құрама ротасы 17 жауынгерінен айырылды, 33 адам жарақат алады. Сонда қаза тапқан жерлесіміз сержант Радик Қаймулдиевті қаруластары құрметпен еске алысты. Тәжік-ауған шекарасында жанын шүберекке түйіп, қырағылық танытқандардың құрметіне Қызылорда, Астана, Шымкент, Атырау қалаларында ескерткіш ашылған. Қазір Ақтау қаласында осы мақсатта арнайы жер бөлінген. Онда ішкі әскер, шекарашы, десантшының қола мүсіндері тұғырға қатар қойылмақ. «Ардагерлер одағының» ұйытқы болуымен Тәжікстанның астанасы Душанбеде ашылған ескерткіш тақтаға 35 жауынгердің есімі жазылған. Подполковник Мұрат Мұхаммеджанов ҚР Білім және ғылым министрі Аслан Сәрінжіповпен кездескенін айтты. Ол кездесуде сәуірдің 7-сі мен мамырдың 9-ы аралығында «Ерлік айлығы» боп жариялануын, соның аясында оқу орындарында әскери-патриоттық шаралардың көптеп өткізілуін, яғни ҰОС, Ауған соғысына, тәжік-ауған шекарасындағы әскери қақтығысқа қатысушыларға, Чернобыль апатын жоюшыларға құрмет көрсетілуін ұсынған. 2013 жылы құрылған «Ардагерлер одағы» РҚБ мүшелігінде 8755 адам болса, біздің облыста 300-ге тарта ардагер бар. Жалпы, Мұрат Мұхаммеджанов мазасыз шекара бойында ТМД құрамындағы елдердің жүргізген бітімгершілік операцияларына қатысқан әскерлерімізге мемлекет тарапынан арнайы әлеуметтік жәрдемақы, жеңілдіктер қарастыру жөнінде жұмыстарды қолға алатындарын атап өтті.

Ерлік тағылымын үлгілеген ардагерлер жастармен кездесуінде қазақстандық патриотизмнің кең қанат жаюына үлес қосуды басты мақсат тұтқандарын айтып, елге тыныштық тіледі. Орал қаласынан аттанған автошерушілер Атырау облысынан өткен соң,  қыркүйек-тің 29-ы сапарын Ақтау қаласында аяқтайды.

Нұртай ТЕКЕБАЕВ