Жаңа қосымша іске қосылды

Күні: , 57 рет оқылды

Облыстық  ақпараттандыру, мемлекеттік  көрсетілетін  қызметтер  және  архивтер басқармасының жаңа орталығы қыркүйек  айында ашылған  болатын. Бейсенбі күні облыс әкімі  Алтай  Көлгінов аталған  орталыққа  арнайы келіп, онда қызмет ететін  мамандармен тілдесті.

Басқарма басшысы Сәкен Нұртазаевтың мәлімдеуінше, мұндағы барлық қызмет ашық форматта жүргізіледі. Орталықта әзірге 15 ІТ-маман қызмет етуде.

Алдағы уақытта кадр санын көбейту мақсатында жергілікті жоғары оқу орындарымен байланыс орнатылыпты. Осылайша жастар арасында жаңа технологиялар насихатталуда.

– ІТ Hub кіші индустриялық аймағында түрлі стартаптар ұйымдастырамыз. Ол жерде ұсынылатын тың идеяларды жүзеге асыратын боламыз. Бүгінде орталық қызметкерлері елуге жуық ІТ-жобамен жұмыстануда. Астана қаласындағы Назарбаев университетімен байланыс орнаттық. Жалпы, мамандар «Цифрлық Қазақстан» мемлекеттік бағдарламасын іске асыруға дайын. Мәселен, өңір экономикасының барлық саласын цифрландыру, халыққа мемлекеттік қызмет көрсету, ақпараттық-коммуникациялық технологиялар мен «Smart city» жобаларын дамыту бойынша жүйелі жұмыстарды жалғастырудамыз, – дейді Сәкен Рүстемұлы.

Жаңа орталықтың қызметімен танысқан облыс басшысы ІТ-мамандар тарапынан ұсынылған тың жобалар ескерусіз қалмайтынын  айтты.

– Қаламызда цифрландыру бойынша бірнеше жоба іске асырылуда. Тұрғындарға мемлекеттік қызмет көрсетудің сапасын арттыру ниетімен Оралда «Смарт Орал» орталығын аштық. Енді  2020 жылға дейін шалғайда орналасқан жүзге жуық елді мекенге талшықтық-оптикалық байланыс желісін, яғни ғаламторды жеткізуіміз керек. Мұның барлығына тек цифрландыру арқылы қол жеткізе аламыз. Сондықтан сіздердің кез келген тың идеяларыңызға қолдау көрсетуге дайынбыз. Бастысы, ұсынатын жобаларыңыз қолданушыларға ыңғайлы әрі түсінікті болуы керек. Жуырда ашылған ІТ-лицейде білім алып жүрген жас жеткіншектерге барып, дәріс оқып, оларды жаңа технологияға баулыңыздар. Ақпараттық технологиялар саласында бәсекеге қабілетті болу маңызды,  – деді Алтай Сейдірұлы.

Кездесу барысында жаңа «Смарт Орал» қосымшасы қолданысқа ұсынылды. Енді смартфон қолданушылары «ақылды қалаға» арналған қосымшаны «Play market» арқылы телефондарына жүктеп, пайдалы ақпараттарға қол жеткізе алады.

Айым  ТӨЛЕУҒАЛИ,

«Орал  өңірі»


Нан қымбаттамайды

Күні: , 81 рет оқылды

Күнделікті  тұтынатын  тауар  бағасын  негізсіз  өсіргендер  жауапкершілікке  тартылатын  болады.

Бұл туралы облыс әкімінің бірінші орынбасары Игорь Стексовтың төрағалығымен, өңірдегі нан өнімдерін өндіруші ірі кәсіпорындардың жетекшілерінің қатысуымен өткен жиында айтылды. Басқосуда әлеуметтік маңызы бар азық-түлік тауарларының тізіміне кіретін сұрыпты нан бағасын  бекіту  турасында  айтылды.

Аталған жиынға нан өнімдерін өндіруші «Антипов» ЖК, «Попков» ЖК, «Доценко» ЖК және «Желаев КХП» АҚ, «Белес Агро» ЖШС секілді ұн тарту мекемелері қатысты.

Өзекті мәселе талқыланған жиында ұн тарту кәсіпорындарында бірінші сұрыпты нан бағасын әр бөлкесінің құнын 70 теңге шамасында тұрақтандыру үшін ұн мөлшерінің жеткілікті екендігі айтылды. Бүгінде бірінші сұрыпты ұнның келісі 95-96 теңге шамасында. Аталған сала кәсіпорындарының басшылары нан бағасын қымбаттатпайтындықтарын  айтты.

Сондай-ақ «№1 нан зауыты» атынан жарияланған «Нан өнімдерін өндіруші барлық кәсіпорын нан бағасын өсіргелі жатыр» деген ақпаратты аталған кәсіпорын  басшысы  жоққа  шығарды.

– Бірінші сұрыпты нан бағасы 70 теңге көлемінде сақталады.

Басқа кәсіпорын басшылары атынан жалған ақпарат таратуға, өңір тұрғындарының тұрмыс деңгейіне тікелей әсер ететін алыпсатарлыққа жол берілмейді. Өзара келісіп, бағаны негізсіз көтерген жайттар тіркелген жағдайда арнайы тексерістер жүргізіп, заң шеңберінде жауапкершілікке тартатын боламыз, – деді  Игорь  Стексов.

Айта кетейік, биылғы жыл басынан бері әлеуметтік маңызы бар азық-түлік тауарларының бағасы 0,6 пайызға арзандаған. Атап айтқанда, картоп 24 пайызға (105 теңгеден 80 теңгеге), пияз 10,5 пайызға (95-тен 85 теңгеге),  жұмыртқа 17 пайызға (231 теңгеден 190-ға), күнбағыс майы 1,2 пайызға арзандаған.

Сонымен қатар халық күнделікті тұтынатын тауар бағасын тұрақтандыру мақсатында апта сайын ауыл шаруашылығы жәрмеңкесі ұйымдастырылуда. Жыл басынан бері 156 рет жәрмеңке өткізіліп, 480,7 миллион теңгенің  өнімі  сатылған.

* * *

Қараша айының алғашқы күні әлеуметтік желідегі тәуелсіз басылымдардың сайттарында Орал қаласында нан бағасы қымбаттағаны туралы ақпарат жарияланған болатын. Жұма күні туындаған түйткілдің түйінін шешу мақсатында нан өнімдерін өндіруші кәсіпорындарға пресс-тур ұйымдастырылды.

Бұқаралық ақпарат құралдары өкілдері алдымен өңірдегі нан өнімдерін шығаратын «Толецкий» жеке кәсіпкерлігінде болды. Кәсіпорын директорының орынбасары Антон Маркушиннің айтуынша, бүгінде нанның құны бұрынғысынша бірқалыпты бағада сатылуда.

– Біздің кәсіпорын өндіретін нан өнімінің бағасы биыл қымбаттамайды. Бүгінгі таңда бірінші сұрыпты нан 70 теңгеден, жоғары сұрыпты ұннан дайындалған нан  90 теңгеден сатылуда. Әрбір жеке кәсіпорын шығынға жұмыс жасамайтыны анық. Әзірге қоймадағы бар ұнды пайдаланудамыз.

Астықтың жаңа легін қандай бағамен алатынымыз әзірге белгісіз. Нан пісіруге қажетті қант бағасының келісі бұрын 180-190 теңге болса, қазір 122 теңгені құрап отыр. Оған электр  энергиясы, көгілдір отын, тасымал шығындары қосылады. Егер ұн бағасы биылғы жылдағыдай 10-15 теңгеге қымбаттайтын болса, нан бағасын осы қалыпта ұстап отырамыз деп еш кәсіпорын кепілдік бере алмайды, – дейді Антон Маркушин.

«Доценко» шаруа қожалығының құрылтайшысы Николай Трегубовтың айтуынша, нан бағасы жақын күндері қымбаттамайды. Себебі нан өнімдерін өндіруге қажетті астықты кәсіпорын өз егіс алқаптарында өсіреді екен. «Бүгінде қоймада астығымыз бар.

Қорымыз жеткен уақытқа дейін нан бағасын өсірмейміз. Бүгінде біздегі бір қап ұнның құны 4350 теңге тұрады. Наубайханада тәулігіне 1500-1800 бөлке жоғары сұрыпты, 1000-1100 дана бірінші сұрыпты нан пісіріледі», – деді Николай  Викторович.

Ал Орал қаласы әкімінің орынбасары Сергей Доляның айтуынша, әкімдік жанынан нан бағасын реттеуге байланысты арнайы комиссия құрылған. Кәсіпкерлік, ауыл шаруашылығы бөлімдері, қалалық әкімдіктің мамандарынан құрылған комиссия шаһардағы нан өнімдерін өндіруші кәсіпорындарды аралап шығып, талдау жасаған. Сондай-ақ кәсіпорын басшыларымен де тілдескен. Бүгінгі таңда бірінші сұрыпты астықтан пісірілген нанның бөлкесі 70 теңгеден, жоғары сұрыпты нан 90 теңгеден артық қымбаттамайтын көрінеді. Барлық кәсіпорын бірқалыпты жұмыс жасап жатыр. Астықтың қоры  да  жеткілікті.

Нұрбек   ОРАЗАЕВ,

«Орал   өңірі»


Аттың жұмысын істеп, тайдың жемін жейміз

Күні: , 106 рет оқылды

Оқырман   ойы

Мұғалімдік  қызмет үздіксіз ізденісті, уақыт ағымымен бірге дамуды талап етеді.  Әр сабаққа қажетті түрлі-түсті көрнекіліктер жасайсың немесе сатып аласың. Оған қоса жұмыс пен үйдің арасына қатынайтын  қоғамдық көлігі, түстігі және жеке отбасылық шығындары тағы бар. Өстіп жүріп, өзгенің ұл-қызын тәрбиелейсің әрі өз балаңды да қатарынан кем қылмай өсіресің.

Педагогтердің өзі мектепке дейінгі ұйым, мектеп, колледж және жоғары оқу орындарының мамандары болып бөлінеді. Аты білдей педагог болғанымен, жалақылары түрліше болып келеді. Соның ішінде жеке білім беру орындарындағы оқытушылардың жалақы мәселесі өзекті. Мысалы, мен колледжде арнайы пәндер оқытушысы ретінде небәрі 22 635 теңге жалақы аламын.  Студенттерге күн сайын 90 минут бойы жағымыз талып, дәріс оқимыз. Тақырыпты түсіндіретін көрнекіліктерімді сатып алу, ғылыми баяндамаларымды, одан қалса, ғылыми мақалаларымды жариялау шығындары бар. Кураторлық қызметке ешқандай қаражат қарастырылмаған. Бұл не масқара дейтін шығарсыз? Одан басқа топтағы студенттеріме кететін шығындарым белшемнен асады. Әлемдік деңгейде шетелдердегі педагогтердің айлық  жалақы мөлшерін зерттеген болатынмын.  Мысалға, Англия мен Норвегияда теңгеге шаққанда 1 500 000 теңге, Австралияда 1 200 000 теңге, Жапонияда 1 100 000 теңге, Канадада 1 000 000 теңге, Оңтүстік Кореяда 750 000 теңге, өз елімізде 21 000 теңгеден жоғары. Ащы болса да, шындық осы. Қазақстандық педагог шетелде бір жыл жұмыс істеп келсе, миллиардер болып кетер ме еді… Айтпағым, педагогтердің жалақы мәселесі дұрыс шешілсе екен.

Аида   ХАСАНОВА,

Орал   гуманитарлық  колледжінің   оқытушысы, педагогика  ғылымдарының  магистранты


«АРЗАНДАП» барамыз ба?

Күні: , 47 рет оқылды

Оқырман   пікірі

Қазір  маңдайында  «арзан»  деген  жазуы  бар дүкендерді  көшеден  жиі  кездестіретін  болдық  соңғы екі-үш жылда.  Жауыннан  кейінгі саңырауқұлақтай  «қаулап өсіп», қаланың  әр бұрышында қаптап  бой  көтерді.

Алыстан еріксіз назарыңды аударып, менмұндалап шақырып тұрады. Сосын да шүлен таратып жатқандай, солай қарай ұмсынып, кіріп-шығып жатқан адам қарасы мол.

Нарық заманы болған соң дүкен сыртына не жазса да, «қазаншының» өз еркі. Сол нарықпен бірге ере келген «маркетинг» деген заманауи ұғым неғұрлым көбірек пайда тауып, адам тарту үшін қандай айла-шарғыға да бара беруге «пәтуа» қылады. Сондықтан біреуге пәлен деп пәлсапа соғуға моральдық, заңдық құқығымыз жоқ.

Дегенмен сол «Арзанның» ішіндегінің бәрі расымен арзан ба? Соған бас қатырып жатқан жан баласы жоқ. Арзан болған күннің өзінде сапасы сын көтере ме? Аты арзан екен деп, затына үңіліп жатқан тағы ешкімді көрмейсің. «Арзанның сорпасы татымайды» деп қазақ бекер айта ма?

Қазіргінің саудасы «алдап сатсаң да, арбап сатсаң да, қалай болғанда да мал тап» деген қағидаға сүйенеді. Содан да саудагерлер «арзан» деген сөзді қармаққа ілген жауынқұрттай құлшына пайдалануға құмар. Айналып келгенде, сол қармаққа түсіп жатқандардың көбі қалтасы жұқа, көңілі жүдеу қараша халық екені түсінікті. Ал ислам мәдениетінде сауданың өзі әділ, адал болуы қатты ескеріліп отырған. Тауардың қандай да бір кемкетігі болса, ол тұтынушыға міндетті түрде алдын ала мәлім етілген. Өкінішке қарай, біз сол ар-абыройды саудаға салмайтын дәстүрлі түп-тамырымыздан қол үзіп бара жатқандаймыз.

Жағдайы төмен ағайын бірді бірге жалғай алмай отырған соң арзан екен деп, иісі қолқаңды қабатын сапасыз, кейде тіпті саулығыңа қауіп төндіретін зиян дүниелерді тұтынуға мәжбүр. Ал мұның салдары талғамсыздыққа, жадағайлыққа, тексіздікке бастайтынын екінің бірі ұғып жатқан жоқ. Арзан деп сабылып жүріп, өзіміз де «арзандап» кетпесек екен дейсің…

Әбу   НАСЫР,

Орал  қаласы


Жатақхана «жыры» бітер уақыт таяу

Күні: , 95 рет оқылды

Батыс Қазақстан облысында 2250 студент жатақханаға мұқтаж. Оның 500-і  жоғары оқу орнында, 1750-і колледжде оқиды. Жастардың түйткілді мәселесіне орай Елбасы «Бес әлеуметтік бастамасында» «… Бәрімізге белгілі, басқа қаланың жастары қаланың шетіндегі ескі үйлерді жалдауға мәжбүр. Осыдан кейін сапалы білім алу туралы сөз қозғау мүмкін бе?», – деген болатын. Бұл олқылықтың орнын толтыру үшін Мемлекет басшысы жоғары оқу орындары мен колледж студенттеріне жатақхана салуды тапсырды. Соған орай өңірде қандай жұмыстар қолға алынды және қай оқу орындары жатақханамен қамтылмақ?

Өзекті   мәселенің   оң   шешімі

Жатақхана салу мәселесі бойынша облысымызға арнайы іссапармен келген «Қазақстандық мемлекеттік-жекеменшік әріптестік орталығы» АҚ басқармасы төрағасының орынбасары Талғат Матаевтың айтуынша, студенттерді жатақханамен қамту мемлекеттік тапсырыс және мемлекеттік-жекеменшік әріптестік аясында жүзеге аспақ. Яғни жеке кәсіпкер меншігіндегі бос тұрған ғимараттарды, мәселен, мемлекет меншігінде, банкте кепілдікте тұрған мүліктер мен бұрынғы қонақүйлерді студенттер үйіне айналдыруға мүмкіндік беріледі. Егер жаңадан салынған құрылыс болса, мемлекеттік тапсырыс шеңберінде кәсіпкерге әр студент үшін 122 айлық есептік көрсеткіш көлемінде, ал құрылыс қайта салынған нысан болса, 47 айлық есептік көрсеткіш бойынша өтемақы төленеді. Аталған жоба студенттердің жатақханаға деген сұранысын қанағаттандырумен қатар, кәсіпкерлерге де зор мүмкіндік тудырмақ.

– Жатақхана дегенде ешбір жағдай жасалмаған, тар бөлме емес, студенттің бос уақытын тиімді өткізетін, қажетті қызметті алуына мүмкіндік беретін студент үйі болуы керек. Қаржыны дұрыс бөліп, тиімді жұмсаған кезде мемлекеттік-жекеменшік әріптестік жобалары өзін-өзі тез ақтайды.

Студенттер үйінде ғаламторға қосылған компьютер, жаттығу залдары және асхана, шаштараз, дәріхана болғаны дұрыс. Осы бағытта кәсіпкерлерді жобаға атсалысуға шақырамыз. Өйткені мұндай ұсыныс кәсіпкерлер үшін тиімді. Біздің орталық кәсіпкерлерге жаңа жатақхана құрылысын салумен шектелмей, дайын тұрған бос ғимараттарды студенттер үйіне айналдыруға қолдау білдіреді. Бұл үшін мемлекет барлық мүмкіндікті қарастырған. Келісімшарт мерзімі аяқталған соң ғимаратты кәсіпкер өз үлесіне алуына немесе коммуналдық мекеме ретінде тіркетіп, келісімшартқа отыруына болады, – дейді Талғат Матаев.

500   орындық   жатақханалар

Облыстық білім басқармасының басшысы Шолпан Қадырованың мәліметінше, Орал қаласында салынатын жатақханалар құрылысының жобалық-сметалық құжаттары жасақталуда. Мәселен, Орал қаласының А. Тайманов көшесі, 221-үй мекенжайында орналасқан Батыс Қазақстан индустриалды колледжінің жанынан 500 орындық жатақхана бой көтермек. Жатақхана құрылысына арналған жер учаскесінің ауданы –  1,9 гектар.

Жобаның жалпы құны  32 986,0 мың теңгені құрайды. Қазіргі таңда мемлекеттік сатып алу рәсімдері жүргізілуде. Жобалаушы – «Газсервис и К» ЖШС. Жобалау мерзімі сегіз айға жоспарланған. Бұл екі тоғыз қабатты 500 орындық жатақхана жоба бойынша Батыс Қазақстан индустриалды колледжіне, Құрманғазы атындағы саз колледжі және Орал қаласының газ, мұнай және салалық технологиялар колледжі мен Орал ақпараттық технологиялар колледжінің студенттеріне берілмек.  Сондай-ақ  Орал қаласындағы Еуразия көшесі, 238-үй мекенжайында орналасқан Орал политехникалық колледжіне 150 орынға шақталған бес қабатты жатақхана салу жоспарланған. Жатақхана құрылысына арналған жер учаскесінің ауданы – 0,212 гектар. Облыстық бюджеттен жобалық-сметалық құжаттар жасақтауға 2500,0 мың теңге бөлінген. Қазіргі таңда мемлекеттік сатып алу рәсімдері жүргізілуде.  Сондай-ақ Бөрлі ауданында да студенттер жатақханасы салынбақ. Яғни Ақсай техникалық колледжіне тиесілі 150 орындық жатақхана құрылысының жобасы бойынша мемлекеттік сатып алу рәсімдері жүргізілуде. Жатақхана құрылысына арналған жер учаскесінің ауданы – 0,38 гектар.  Жобаны «Газсервис и К» ЖШС жасауда.

М. Өтемісов атындағы Батыс Қазақстан мемлекеттік университеті – өңіріміздегі  іргелі оқу орындарының бірі. Аталмыш білім ордасының студенттері үшін келесі жылы тоғыз қабатты 500 орындық  жатақхана бой көтере бастамақ. Бүгінгі таңда университетте 1026 орынға арналған үш студенттік жатақхана бар. Бұл жатақханалар студенттер сұранысының  70  пайызын  қанағаттандырып отыр. Мұнда әлеуметтік жағдайы төмен, жетім және мүмкіндігі шектеулі, сондай-ақ көп балалы отбасынан шыққан студенттерге жатақхана бірінші кезекте беріледі және университетке қабылданған бірінші курстың студенттері мен «серпіндіктер» жатақханамен толық қамтылуда. Өңірдегі медицина мамандарын даярлайтын Батыс Қазақстан жоғары медициналық колледжінің студенттеріне де 500 орындық жатақхана салу жоспарланғанын айта кетелік.

Жатақхана  салудың  әлемдік  тәжірибелері

Өзге мемлекеттерде жатақхана мәселесі қалай шешімін тапқанын білу үшін ғаламторды шарлаған едік. АҚШ, Англия, Германия секілді алпауыт мемлекеттерде студенттік жатақханалар құрылысын кәсіпкерлер мен жеке компаниялар өз демеушілігімен салады екен. Мемлекет өз тарапынан салыққа жеңілдік жасайды. Мәселен, АҚШ-та жеке кәсіпкер мемлекеттен жер алып, жатақхана салды делік. Сосын құрылысқа жұмсаған шығынын студенттердің төлемақысы есебінен қайтарып алады. Ондағы кәсіпкерлер жатақхананы көбіне қонақүй секілді салуға ниетті. Өйткені ғимаратты оқу жылы кезінде студенттер үйі есебінде, жазғы демалыста саяхатшылар үшін қонақүй ретінде пайдалануда. Шетелдік оқу орындарында өзге мемлекеттен келген студенттерге арналған арнайы бір бөлім жұмыс істейді. Онда студенттің оқу үлгерімі қаралып, сұранысқа орай университеттің жатақханасынан немесе оқу орнына жақын маңнан пәтер табуы-на көмектеседі. Сондай-ақ студенттің оқу үлгерімі қандай екенін тұратын жатақханасынан да аңғаруға болады екен. Нашар оқитындар қарапайым секциялы жатақханада орналасса, сабақ үлгерімі жақсыларына бассейні, фитнес залдары бар жатақхана бұйырады. Бұл студенттердің оқу үлгерімін жақсартуға  ынталандыру мақсатында жасалған жағдай көрінеді.

Осындай игі дәстүрлер өңірімізде жүзеге асып, заманауи  жатақханалар  салынса, білім қуып келген жастардың уайымы  сәл де болса,  бәсеңдер еді.

Гүлсезім   БИЯШЕВА,

«Орал   өңірі»


Мобильдік қосымша арқылы дәрігерге жазылуда

Күні: , 23 рет оқылды

Биылғы  жылдың қаңтар  айынан  бастап  облыс  бойынша пилоттық  режімде  қағазсыз медициналық  құжат айналымына  көшу  басталып,  Орал  қаласындағы  барлық  35  медициналық  мекемеде «Қазмединформ»  жүйесі  енгізілді.  Қазіргі  таңда медицина  саласының  7  мыңнан астам  қызметкері  аталған  жүйені  жұмыс  барысында пайдалануда.

Бұл туралы Өңірлік коммуникациялар қызметінің ақпарат алаңында өткен баспасөз мәслихатында Батыс Қазақстан облыстық денсаулық сақтау басқармасы басшысының міндетін атқарушы Нұрданат  Беркінғали  мәлімдеді.

Орал қаласындағы 6 емханада және Деркөл дәрігерлік амбулаториясында енгізілген «Қазмединформ» электрондық кезекті басқарудың біріктірілген жүйесін күні бүгінге дейін 1,5 миллионнан астам адам қолданып үлгерді. Сонымен қатар 2017 жылдың қараша айынан бастап іске қосылған k-vrachu.kz мобильдік қосымшасын қолданушылар қатары артып, бүгінгі күні 21 мыңнан асқандығы айтылды. Аталған мобильдік қосымша көмегімен өзіңіз тұратын мекенжай бойынша қызмет көрсететін емхана дәрігерлерінің қабылдау кестесімен таныса аласыз, аймақтағы медициналық ұйымдарды қарап, оларды картадан табасыз, үйде дәрігерге қоңырау шалуыңызға болады, дәрігердің қабылдауына жазылуға, қажет болған жағдайда жазбадан бас тартуға, дәрігерге бару туралы хабарландырулар мен ескертулерді алып тұруға, сондай-ақ  ЭЦҚ арқылы тіркеліп, амбулаториялық картаңызды және талдау нәтижелерін көруге болады.

Бүгінгі күні өңіріміздегі 383 медициналық мекеменің 263-і интернет желісіне қосылған. Интернет игілігінен тыс қалған шалғай аудандардағы 120 нысанды желіге қосу бойынша жұмыстар жүргізілуде. 2020 жылға дейін өңіріміздегі барлық медициналық мекеме толықтай интернет желісіне қосылады деп күтілуде.

ҚР Еңбек және халықты әлеуметтік қорғау министрлігімен бірлесе қолға алынған мүгедектікті анықтауды цифрландыру бойынша жоба қаламыздағы №3 емханада жүзеге асырылуда. 25-тен астам адам игілігін көріп үлгерген аталмыш жобаны алдағы жылдары өңіріміздегі барлық емхана іске  асырады  деп  жоспарлануда.

Биылғы жылдың 1 қазанындағы жағдай бойынша 54 маман жұмысқа қабылданып, 60 пайыздан астамы аудандарға жолданды. Соның ішінде 17 жас маман баспаналы болса, барлығы дерлік көтермеақы алған. Ал облыс көлеміндегі дәрігерлер үшін «7-20-25» мемлекеттік бағдарламасы аясында баспаналы болуға субсидия бөлінуде. Жуырда ғана онкологиялық диспансерде Қадағалаушы кеңес отырысы өтіп, нәтижесінде үш жас маманның үй алуына алғашқы төлем ретінде  субсидия бөлу жөнінде шешім қабылданды.

БҚО әкімдігінің қолдауымен бюджеттен қаржы бөлініп, соның арқасында грант иеленген 50-ден астам жас маман 6-7 жылдан кейін өңіріміздегі білікті мамандар қатарын толықтырып, өзара жасалған келісімшарт негізінде бес жыл бойына облыс көлеміндегі мемлекеттік медициналық мекемелерде қызмет ететін болады. Сонымен қатар жергілікті бюджет есебінен бөлінген грант бойынша білім алып жатқан 28 резидент екі-үш жылдан кейін облыс дәрігерлерінің қатарын толықтырады.

Аяужан   КЕРЕЕВА,

«Орал   өңірі»


Эфирлік  сандық  телевизия

Күні: , 2 рет оқылды

немесе   мемлекеттік   хабар   таратудың   жаңа   стандарты

«Цифрлық  Қазақстан»  мемлекеттік  бағдарламасы аясында  Цифрлық  эфирлік  телерадио  хабарларын тарату  бағдарламасын  жүзеге  асыру  қолға  алына бастады.  Цифрлық  эфирлік  көшу  әкімшілік-аймақтық бірлік  мерзіміне  сәйкес,  ҚР  Ақпарат  және  коммуникация  министрлігінің  Жарлығы  бойынша  №262 13. 06. 2008  ж. қолданыстағы  хабар  таратудың   ұқсас  желілерінен  кезең-кезеңмен  ажырату  арқылы   іске  асырылмақ.  Айта  кету  керек,  сандық  телевизияға  ауысу – «Женева  2006»  халықаралық  келісімі  аясында  жүзеге  асқалы  отыр.

Мемлекеттік  бағдарламаны  атқарушы  Ұлттық оператор  «Қазтелерадио»  АҚ  болып  табылады.

Жобаның  негізгі  мақсаттары:

— қала және елді мекен тұрғындарының арасындағы ақпараттық теңсіздікті азайту арқылы телеарналар санын көбейту. Осылайша ақпаратқа қолжетімділікті арттыру көзделіп отыр;

— ҚР аймағында отандық телеарналарды көру аясын кеңейтудің негізінде мемлекеттің ақпараттық қауіпсіздігін арттыру;

— ҚР жалпы телеконтент нарығында отандық телеарналардың хабар тарату үлесін көбейту;

— тұрғындарға және телеарналарға қызмет көрсетудің, сондай-ақ бейне және дыбыс сапасын халықаралық талапқа сай болуын қамтамасыз ету.

Бағдарлама нәтижесінде Қазақстан Респубикасы тұрғындарының 99,8%-ы  көпбағдарламалы телехабар таратудың жоғары сапалы цифрлық желісіне тегін қол жеткізетін болады. Осыған дейін хабар таратудың ұқсас желілерінде ел тұрғындарының жартысы орта есеппен 5 телеарнаны ғана көрген болса, эфирлік сандық хабар тарату бағдарламасын іске асыру барысында қабылданатын каналдар саны айтарлықтай артады. Мұндағы басты факторлардың бірі  Қазақстан ТРК облыстық хабар тарату желісінің жұмыс жағдайын барынша жақсарту болмақ.

Цифрлық  хабар тарату негізінде облыс орталықтары 30-ға тарта телеарнаны көру мүмкіндігіне ие болса, ал қамту аймағы шегіндегі елді мекендер 15 телеарнаны тамашалайтын болады. Көрермен үшін бұл бейне және дыбыстың жаңа сапасы болмақ. Айталық, ұқсас желілерде хабар алу кезінде болатын артық дыбыстар мен кедергілерге жол берілмейді.

Цифрлық хабар таратудың артықшылықтары мұнымен шектелмейді. Олай дейтініміз, ерекшелігі басым жаңа бағдарлама мәзірі екі тілде (қазақ, орыс тілдерінде) жасалған, хабарлардың электронды бағдарламасы, көрерменді жаңалықтармен, өзгерістер және профилактикалық  жұмыстар туралы тв-пошта арқылы теледидар экранына хабарлама жіберілетін болады.

Эфирлік цифрлық телевизияның басымдықтарына тоқтала кетсек. Мәселен, жалпыға бірдей қол-жетімді каналдардың бірінші және екінші мультиплекс бойынша абоненттік төлем алынбайды.

Тұрғындардың телеэкранында көмескілік мүлдем болмайды, сонымен қатар көрсету сапасы жоғары телеканалдарға  жеке пакет алу мүмкіндігі беріледі. Бұған қоса дәстүрлі телевизияда таңсық саналатын ақпараттық қызмет түрлері іске қосылады, төтенше жағдайлар туралы хабардар ету және тағы басқа. Қарапайым теледидарды DVB-T2/MPEG-4 форматтағы цифрлық құрылғыға және дециметрлік диапазонды антеннаға жалғау арқылы цифрлық эфирлік телехабар тарату желісіне қосылуға болады.

 Хабар таратудың ұқсас желілері сияқты цифрлық эфирлік телевизия жалпыға бірдей қолжетімді, тегін әрі қосылуы қарапайым болғанымен, бейне және дыбысты өте жоғары сапада ұсынатын болады.

Эфирлік телехабар таратудың цифрлық желісінің айрықша басымдықтарының бірі – жиілік ресурстарын тиімді пайдалану арқылы көрсетілетін арналардың санын көбейту болып табылады. Бір жиіліктегі сәйкес бағдарламаның орнына 15 цифрлық арналар топтамасының толық пакет (мультиплекстер) ұсынылады. Сонымен қатар эфирлік телехабар таратудың цифрлық желісі негізінде әзірге «аналог» жоқ саналатын (телегид, телетекст, субтитр және т. б.) сияқты электронды қызметтер қатарын ұсыну ұйғарылып отыр. Бұған қосымша телехабар таратуды сапалы дамыту мақсатында (HDTV-жоғарғы сападағы телевизия, интерактивті ТВ және т. б.) жаңа мүмкіндіктерді қолға алу көзделуде.

Бір сәтке отандық телевизия тарихына тоқтала кетсек, 1958 жылдың 8 наурызында негізі қа-ланған Қазақ телевизиясы 1992 жылы «Қазақ ССР Мемлекеттік телерадиосы», «Қазақстан» Мемлекеттік телерадиокомпаниясы, деп қайта ұйымдастырылды, ал 1995 жылы «Қазақстан» республикалық телерадиокорпорациясы болып ресми аталды.

Тәуелсіз Қазақстанға жаңа ақпараттық кеңістік қажет болды. Тәуелсіздікпен бірге жаңа агенттік «Хабар» құрылды. 1997 жылы Хабар тәулігіне 14 сағат хабар таратудың мүмкіндігіне қол жеткізді. Десек те, қазіргі заманның көрермені үшін дәстүрлі телеарнаның хабар тарату мүмкіндігі жеткіліксіз болып отыр. Кабельді және жерсеріктік хабар тарату желісінің дәстүрлі телеарнамен салыстырғанда аясы кең, мүмкіндіктері шектеусіз екені анық. Кабельді телевизия технологиясының мәнісі көрерменді сапалы жиілікпен қамтамасыз етуінде болып отыр.

Тоқсаныншы  жылдардың орта шенінде кабельді телевизияның локальді бренді саналатын «Алма-ТВ», «Секател» және «Қазорталық ТВ» Алматы мен Астана және Қарағанды шаһарына аяқ басты. Дәл осы жылы жерсеріктік хабар тарату желісі —  «Жарық» құрылып, елді мекендердің тұрғындары «Қазақстан» телеарнасын көре бастады.

1995 жылы ұлттық хабар тарату жерсеріктік хабар таратуға ауыстыру туралы жарлық шықты. Қазақ елі экватор үстінде қалықтаған ғарыштық жерсерік белгілерін алу мүмкіндігіне ие болды. Пираттық хабар тарату контентін қадағалауға индустрия сол кезде қауқарсыз еді. Ақпараттық қауіпсіздікке қауіп төніп, арзанқол және ұрлықы контент локальді брендпен бәсекелестікке сай бола алмады.

2012 жылы Қазақстан аналогты желіден сандық хабар таратуға ауысты. Осы уақыт аралығына дейін еліміздегі телекөрермендер саны 2, 3 миллионға жетті.

2018 жылдан бастап Қазақстанда эфирлік сандық хабар тарату кезең-кезеңмен жүзеге асыру арқылы аналогты хабар таратудан түбегейлі бас тарту жоспарланып отыр. Теле және радиоарналар цифрлық эфирлік хабар тарату желісінде телерадиокомпаниялар мен телехабар тарату операторлары арасындағы келісімге сәйкес қызмет көрсететін болады.

Цифрлық эфирлік телерадио-хабарларын таратуға көшу мерзімдері кезеңмен жүргізілетін болады. Мәселен, 2018 жылдың қазан айында Маңғыстау облысы, желтоқсан айында Жамбыл, Оңтүстік Қазақстан облыстары қамтылады. Ал алдағы жылдары Атырау, Қызылорда, Алматы облыстары, сондай-ақ Шығыс Қазақстан, Павлодар, Солтүстік Қазақстан, Қостанай, Қарағанды облыстары да жоспарда бар. Бұдан кейінгі кезең бойынша Батыс Қазақстан, Ақмола, Ақтөбе облыстары, Астана және Алматы қалаларын қамту көзделіп отыр.

Экономикалық тұрғыдан алып қарағанда, цифрлық хабар тарату – телекоммуникациялық қызмет түрлеріне жол ашу арқылы жиілік спекторын үнемді қолдануға мүмкіндік береді. Отандық телеарналарды цифрлық сапа көмегімен эфирлік телехабар таратудың сандық желісі бойынша облыс орталықтарының тұрғындары 30 телеарнаны цифрлық сапада көреді, ал елді мекендердің тұрғындары цифрлық сападағы 15 телеарнаға абоненттік төлемсіз қол жеткізетін болады. 2019 жылға дейін бағдарлама бойынша цифрлық жүйемен ел тұрғындарының 95%-ын қамту жоспарланып отыр. Қалай десек те, отандық телевизия саласының заман талабына сай ұқсас хабар тарату жиілігін толықтыру немесе хабар таратудың цифрлық жүйесімен толықтай алмастыру – уақыт талабы.


«Ел тарихын тұлғалар жасайды»

Күні: , 27 рет оқылды

«Патриотизм – кіндік қаның тамған жеріңе, өскен ауылыңа, қалаң мен өңіріңе, яғни туған жеріңе деген сүйіспеншіліктен басталады»

(ҚР Президенті Н. Ә.  НАЗАРБАЕВТЫҢ  «Болашаққа бағдар:  рухани жаңғыру» бағдарламалық мақаласынан)

Сейсенбі күні Орал қаласындағы Салтанат сарайында «Рухани жаңғыру» бағдарламасы аясында туған жерінің игілігі үшін жарқын істерімен танылған өңір меценаттарын «Жомарт жүрек –  2018»  сыйлығымен  марапаттау  форумы  өтті. Шара барысында биылғы жылы меценаттардың көмегімен «Туған жер» бағдарламасы аясында жүзеге асқан және болашақта іске асырылатын Орал қаласы, сондай-ақ 12 аудан әкімдіктерінің әлеуметтік  жобаларының  көрмесі  ұсынылды.

Форумға облыс әкімі Алтай Көлгінов, қала және аудан әкімдері, облыстық мәслихаттың депутаттары, басқарма басшылары, зиялы қауым өкілдері, меценаттар мен үкіметтік емес ұйымдардың жетекшілері қатысты.

– Ақ Жайық – ата дәстүрінен айнымаған, салтына берік, ұлттық құндылықтарды қадір тұтатын қасиетті өңір. Бізде елдің қамын өз мүддесінен биік қойып, атамекеннің  абыройын асқақтатып жүрген азаматтар аз емес. Елбасы Нұрсұлтан Әбішұлы Назарбаев «Болашаққа бағдар: рухани жаңғыру» бағдарламалық мақаласында «Туған жерге, оның мәдениеті мен салт-дәстүрлеріне айрықша іңкәрлікпен атсалысу – шынайы патриотизмнің маңызды көріністерінің бірі» деп атап өтіп, нақты міндеттер жүктеді. Ел тарихы тұлғалар арқылы жасалатынын ескерсек, Ақ Жайық өңірінде көптің алғысына бөленіп жүрген жандар жеткілікті. Бұл – атадан келе жатқан игі дәстүрдің бүгінгі жалғасы, қазақы қасиетіміздің айқын белгісі. Ағайынға болысу, әлсізді демеу, жасы кішіні қолдау – адамзатқа тән мейірімділік пен кеңдіктің көрінісі. Қазіргі таңда «Рухани жаңғыру» бағдарламасы алты принципке негізделіп, алты арнайы жоба, алты кіші бағдарлама арқылы жүзеге асырылуда. Аз ғана уақыттың ішінде қыруар жұмыстар атқарылды. Ең бастысы, туған өлкесін дамытуға белсене кіріскен жандардың қатары көбеюде. Осы уақытқа дейін облыс бойынша 60 әлеуметтік нысан пайдалануға берілді. Әсіресе, өңір меценаттары спорт, денсаулық, білім салаларына көбірек көңіл бөліп келеді. Қазіргі таңда облыстағы әрбір елді мекенде спорт кешендері мен балалардың ойын алаңдары, мектептерде арнайы кабинеттер жабдықтап, материалдық-техникалық әлеуетті жаңарту, аудандық музейлерді тың дүниелермен толықтыру, жөндеу жұмыстарын жүргізу, ескерткіштер орнату секілді шаралар атқарылуда. Бізге сонымен қатар республикалық қорлардың да көмегі тиюде. «Самұрық Қазына Траст» ұлттық қоры мен «Асыл мирас» қайырымдылық қоры облысымыздағы спорттық-әлеуметтік инфрақұрылымдардың дамуына зор үлес қосты. Биылғы жылы да «Атамекен» кіші бағдарламасы аясында 134 меценаттың қатысуымен 166 жоба жүзеге асырылып, түрлі деңгейде шаралар өтті. Оның 138-і ауылдық округтерде, 20 жоба аудандық деңгейде, сегізі облыс орталығында жүзеге асты. Елбасы Нұрсұлтан Әбішұлы Назарбаев биылғы бесінші қазандағы халыққа Жолдауында да «Рухани жаңғыру» бағдарламасы одан әрі жалғасатынын атап өтті. Аталған бағдарлама аясында өңірімізде іске асырылған қайырымдылық және әлеуметтік маңызды шараларға жұмыла қатысқандарыңыз үшін  сіздерге шынайы ризашылығымды білдіремін, – деді Алтай Көлгінов. Содан соң облыс басшысы өңірдің, ауыл-аймақтың дамуына зор үлес қосып жүрген бірқатар меценаттарға «Жомарт жүрек» сыйлығы мен алғысхат табыс етті.

«Жыл меценаты» аталымымен «Автокомбинат» ЖШС-ның директоры Валерий Голоухов, «Жылдың әлеуметтік жауапты ұйымы» аталымы бойынша «Uniserv» ЖШС-ның бас директоры Нұрғазы Сәтбаев, «Алтын ұя» аталымымен «Конденсат» АҚ директорлар кеңесінің төрағасы Валерий Жүнісов марапатталды. Ал «Туған өлке» аталымы бойынша «Отделстрой» ЖШС-ның директоры Валентина Михно, «КТК» ЖШС-ның директоры Сержан Айтжан, «БелесАгро» ЖШС-ның директоры Мұрат Жәкібаев, «Батыс Пауэр» ЖШС-ның директоры Жасұлан Жақыпов және Батыс Қазақстан облысының  этномәдени  бірлестігі  марапатталды.

Валерий Голоухов басшылық ететін «Автокомбинат» ЖШС «Рухани жаңғыру» бағдарламасы аясында өз қаражаты есебінен «Әмбебап дүкеннің» маңында тынымбақ салып, қала күніне тарту жасады.

Кәсіпкер бұл жұмысқа 58 млн. теңге жұмсаған. Ересектердің тынығуы мен балалардың ойнауына арналған тынымбаққа арықтар тартылып, су құбыры жүргізіліп, жасыл  желек  пен  екпе  шөп  егілді.

– Бүгінде кәсіпкерлікті дамытуға мемлекет тарапынан зор қолдау көрсетілуде.

Өз  ісін дамытамын деген жанға түрлі мемлекеттік бағдарламалар мен жеңілдіктер  қарастырылған. Соның қайтарымы ретінде өңірдегі әлеуметтік маңызды жобаларды жүзеге асыруға, мәдениет пен спорт, білім саласын дамытуға жеке кәсіп иелері де атсалысу керек. Біз ар-ұятты, отансүйгіштікті, өз елін, жерін, қаласын шынайы сүйетін өскелең ұрпақ тәрбиелеуіміз керек, –  деді кәсіпорын басшысы Валерий Голоухов. Сонымен қатар шара барысында өңіріміздің өркендеуіне елеулі үлес қосып жүрген 14 батысқазақстандық облыс әкімінің ал-ғысхатымен марапатталды. Олардың қатарында «ГазПромПроект» ЖШС-ның директоры Михаил Кульпин, ақжайықтық «Сәбит» шаруа қожалығының жетекшісі Ерболат Құрманғалиев, Бөрлі ауданындағы «АқсайБизнесСтрой» ЖШС-ның бас директоры Анвар Агаев сынды бір топ жомарт жандар бар.

Айта кетейік, аталған форумда облыс бойынша үздік деп танылған 29 меценатқа 11 аталым бойынша «Жомарт жүрек» сыйлығы табысталған болатын. Сахна төріне көтерілген облыстық мәслихаттың хатшысы Мәлік Құлшар, Қазақстан Республикасының еңбек сіңірген қайраткері, ақын Ақұштап Бақтыгереева, «Нұр Отан» партиясы облыстық филиалы төрағасының бірінші орынбасары Серік Сүлеймен, өлкетанушы, елге сыйлы қария Жайсаң Ақбай құттықтау сөз сөйлеп, бірқатар меценатты «Жомарт жүрек» сыйлығымен марапаттады.

Биылғы жазда «Асыл мирас» орталығының бастамасымен Орал қаласында аутизм дертіне шалдыққан балаларға жәрдем беруге арналған көпбейінді орталық ашылған болатын. Орталық 15 жасқа дейінгі аутистік спектр дертіне шалдыққан балаларды қабылдайды. Орталық әдістемесі халықаралық зерттеулерге негізделген. Ғылыми кеңесшілер ата-аналарға ақпараттық және психологиялық қолдау көрсетеді. Осындай игі бастаманы қолға  алған «Асыл мирас» орталығының негізін қалаушы Болат Өтемұратов «Жүректен жүрекке» аталымы бойынша марапатталды.

– Қайырымдылық танытып, әлеуметтік маңызы бар жобаларды жүзеге асырғандығыңыз үшін өңір тұрғындары және өз атымнан зор алғыс айтамын. Сіздердің азаматтық ұстанымыңыз бен ұлтжандылығыңыз, жанашырлығыңыз көптеген қазақстандықтарға үлгі болмақ, – деді меценаттардың бірін марапаттаған Ақұштап Бақтыгереева.

Ал «Әлеуметтік саланың дамуына қосқан үлесі үшін» аталымын иеленген «Самұрық Қазына» акционерлік қоғамы  550 миллион теңгеге 11 спорт қалашық салды. Сол игі бастаманың нәтижесінде 20 мыңнан астам батысқазақстандық заманауи жабдықталған спорт алаңдарында жаттығуға мүмкіндік алды.

Маңызы зор шараға арнайы шақырылған еліміздің танымал әншілері Айгүл Иманбаева мен Қазбек Қасымның орындауындағы әндер мерекелік кештің шырайын аша түсті.

Нұрбек   ОРАЗАЕВ,

«Орал   өңірі»

Медхат ҚАМБЕТОВ,

БҚО әкімі аппаратының «Қоғамдық келісім» КММ-ның басшысы, «Туған өлке» аталымының иегері:

– Біздің  облыста  53  этномәдени  бірлестік болса, соның 16-сы облыс орталығында орналасқан. Бірлестіктер күнделікті жоспарлы жұмыстарынан тыс туған ел мен жерге жақсылық жасаудан тартынған емес. Биылғы жылдың көктемінде Зеленов ауданына қарасты Көшім ауылдық округінің Өркен ауылына «Достық» бағын сыйға тарттық. Бұл жұмысқа шаһардағы барлық этномәдени бірлестіктер жұмыла атсалысты. Өз қаржыларына салынған баққа 360 түп ағаш отырғызылды. «Бірлесе көтерген жүк жеңіл» дегендей, бұл берекелі іс ынтымақтың, бірліктің арқасында жүзеге асқан игілік.

Роберт ИРМЕНОВ,

«Орал Полимер» ЖШС директоры, «Әлеуметтік саланың дамуына қосқан үлесі үшін» аталымының иегері:

– Біздің компания ұзақ жылдан бері көп қабатты тұрғын үй салумен айналысады. Бүгінге дейін өз қаражатымыздың есебінен облыс орталығында 20-дан астам көп қабатты тұрғын үй салдық. Соңғы жылдары жергілікті әкімшілікпен бірлесіп, мемлекеттік-жеке меншік әріптестік аясында ескі үйлердің орнына жаңа көп қабатты тұрғын үй салумен айналысудамыз. 2016 жылы қыс мезгілінің қарсаңында Орал қаласындағы төрт пәтерлі тұрғын үй өртеніп кеткен болатын. Панасыз қалған тұрғындарға көмек қолымызды созып, өртенген үйдің орнына су жаңа баспана салып бердік. Еңбегіміз еленіп, осындай марапатқа ие болғанымызға қуаныштымын.

Нұрдәулет АЙБОЛАТОВ,

Қазталов ауданы Қошанкөл ауылындағы Ғ. Бегалиев атындағы мектептің оқушысы, «Батыл жүрек» аталымының иегері:

– Мен ата-анаммен Қошанкөл ауылында тұрамын. Әкем Асқар Аткешев – жеке шаруа. Анам Гүлжан Сисенова – мектепте мұғалім. Үйдегі үш ұлдың кенжесімін. Биылғы 5 мамырда тоғанға батып бара жатқан үш жасар баланы құтқарып қалған едім. Сол себепті бүгін үлкен марапатқа ие болдым. Өте қуаныштымын. Бірақ мен ол кезде мақтану немесе марапат алуды мақсат тұтқан жоқпын. Бар ойым сол баланың өміріне араша түсуде болды. Ол жерде менің орнымда болған әрбір жан сәбиді құтқаруға бел буатыны анық. Дегенмен, менің аз да болса, ерлігімді ескеріп, марапатқа ұсынған аға-апаларыма ризамын.


Батыс Қазақстан облысының аумақтық (облыстық) сайлау комиссиясының жаңа құрамын қалыптастыру туралы Батыс Қазақстан облыстық мәслихатының ХАБАРЫ

Күні: , 21 рет оқылды

«Қазақстан Республикасындағы сайлау туралы» Қазақстан  Республикасының Конституциялық Заңының 10-бабының 3-тармағына сәйкес Батыс Қазақстан облыстық мәслихаты аумақтық (облыстық) сайлау комиссиясының жаңа құрамын қалыптастыру  үшін ұсыныстар қабылдау басталғанын хабарлайды.

Осыған байланысты саяси партиялардан аумақтық (облыстық) сайлау комиссиясының құрамына үміткерлер туралы ұсыныстарын қабылдау 2018 жылдың 1 қарашасынан 16 қарашасына дейін  белгіленеді,  белгіленген мерзімде саяси партиялардан ұсыныстар болмаған жағдайда өзге қоғамдық бірлестіктердің  ұсыныстары  қабылданады.

Үміткерлер туралы ұсыныстарды Батыс Қазақстан облыстық мәслихаты мына мекенжайда: Орал қаласы, Достық даңғылы, 201-үй, 301-бөлмеде сағат  9.00-ден 18.00-ге  дейін  қабылдайды.

Аумақтық (облыстық) сайлау комиссиясының құрамына ұсынылатын үміткерлер сайлау туралы   Конституциялық Заңының 10-бабы 2-1 тармағының  талаптарына  сәйкес  болуға  тиіс.

Көрсетілген мерзімде саяси партиялар мен басқа да қоғамдық бірлестіктер   сайлау комиссиясына ұсынылатын үміткерлердің тізімдерін облыстық мәслихатқа жолдайды, оған мына құжаттарды жалғайды:

1) сайлау комиссиясының құрамына үміткерді ұсынғаны туралы саяси партия органы немесе басқа да қоғамдық бірлестіктердің, жарғысына сәйкес тиісінше өкілеттіктері бар олардың құрылымдық бөлімшелері мәжілісінің хаттамаларынан суырмаларды;

2) саяси партияның немесе басқа да қоғамдық бірлестіктің, олардың құрылымдық бөлімшелерінің әділет органдарында тіркелгені туралы құжаттың  көшірмесін;

3) аумақтық (облыстық) сайлау комиссиясының жұмысына қатысуға келісім беруі туралы үміткердің облыстық мәслихатқа өтініші;

4) құжаттарды толтырарда анкеталық деректемелерде қателіктер жіберілмеуі мақсатында облыстық мәслихат ұсынылатын үміткердің өтінішіне жеке куәлігінің  көшірмесін  қоса  жолдауды  сұрайды.

Облыстық  мәслихат  хатшысы  М. ҚҰЛШАР


Ешкімнің нұсқауынсыз жұмысшыларын қуантты

Күні: , 24 рет оқылды

Елбасы  «Қазақстандықтардың  әл-ауқатының  өсуі:  табыс  пен  тұрмыс  сапасын  арттыру»  атты  Жолдауында  отандастарымыздың  әл-ауқаты,  ең   алдымен,  табыстарының  тұрақты  өсімі  мен   тұрмыс  сапасына байланысты  екендігін   атап   көрсетті.  Үкіметке  2019  жылдың  1  қаңтарынан  бастап  ең  төменгі  жалақыны  1,5 есе,  яғни  28  мыңнан  42  мыңға  дейін  өсіруді  тапсырды.  Сонымен  қатар «Бұл  барлық  сала  бойынша түрлі меншік  нысандарындағы  кәсіпорындарда жұмыс істейтін  1  миллион  300  мың   адамның  еңбекақысын  тікелей  қамтиды», – деп  айқын көрсетіп берді.  Бұл  бастаманы  Ақ  Жайық өңіріндегі  ірі  мекеме-кәсіпорындар  бірден  іліп  әкетті. Солардың бірі  «Желаев  нан комбинаты»  АҚ  басшылығы  ешкімнің  нұсқауынсыз,  өз  бастамаларымен  ең   төменгі  жалақы  мөлшерін  көтеруге  шешім  қабылдады.

Желаев нан өнімдері комбинаты» АҚ ұжымында  560 адам еңбек етіп, нәпақасын тауып жүр. Аталмыш АҚ-ның директоры Эдуард Федорченконың айтуынша, Елбасының тапсырмасына орай алдағы 2019 жылды күтпей-ақ, ең төменгі жалақы алатын жұмысшылардың жалақысын 10%-ға көтеруге шешім қабылданған. Қазіргі уақытта комбинатта ең төменгі жалақы мөлшері – 50 мың теңге болса, ондай көлемдегі жалақыны 26 адам алады. Олар негізінен техникалық қызметкерлер, аула сыпырушылар,  асхана  қызметкерлері.

– Акционерлік қоғам басшылығы жыл сайын еңбеккерлердің жалақысын өсіріп отырады. Мысалға, 2017 жылы ұжымдағылардың жалақысы 20%-ға өсті. Биыл тағы 10 пайызға көтеріп отырмыз. Жыл соңына таман және құрылтайшылардың жиналысынан кейін 2019 жылға жалпы қызметкерлердің жалақысын өсіру мүмкіндігі қарастырылмақ. Жылма-жыл еліміздің, өңіріміздің және комбинаттың игілігі, өркендеуі жолында тер төгіп жүрген еңбеккерлеріміздің табысын молайтып, қолдап отырамыз, – деді аталмыш АҚ-ның директоры Эдуард Федорченко.

Бүгінде Желаев комбинаты макарон өнімдерінің 20-дан астам түрін өндіреді. Макарон өндірісі желісінің қуаттылығы айына 4 мың тоннаны құрайды. Желаев астығы өзінің сапасымен ертеден танымал. Оны өндіру қуаттылығы айына 7,5 мың тонна шамасында. Комбинаттың  өнімдері өз елімізде, қала берді Ресейде үлкен сұранысқа ие. Сондай-ақ оралдық комбинаттың өнімдері Түркіменстанға, Өзбекстанға, Тәжікстанға, Ауғанстанға  экспортқа  шығарылуда.

Биылғы жыл басында кәсіпорынның №3 макарон фабрикасында қуаттылығы сағатына 2 мың келі өнім шығаратын жаңа италияндық «РАVАN» желісі орнатылды.  Қазір жаңа құрылғы қуатын толықтай пайдалануға жетісті. Онда жылына 14 мың тоннадан астам макарон өнімдері шығарылуда. Аталмыш фабрикада 80 адам жұмыс істейді. Э. Федорченко жаңа макарон цехын салуда мемлекеттің көмек-қолдауы болғанын, яғни цех құрылысына және ондағы құрал-жабдықтарды орнатуға жұмсалған шығын мемлекет есебінен өтелгенін айтты. Ендеше, Желаев комбинаты иелерінің бизнестің қоғам алдындағы әлеуметтік жауапкершілігін сезінуі, өз қызметкерлерін  қамқорлауы  да  көңілге  қонымды.

– Тыңнан қосылған цехта сапалы астықтан макаронның жаңа 12 түрі өндіріледі. «Мартин», «Честная цена» және өзге де сауда белгісімен сағатына 2 тонна, бір күнде 30 тоннаға дейін өнім өндіреміз, төрт ауысыммен жұмыс істейміз. Елбасының тапсырмасымен жалақымызды өсіріп жатыр, қуаныштымыз. Табысыма көңілім қанағаттанады, – деді №3 макарон фабрикасының ауысым технологы Шынар Шүңірекова. Әріптесінің сөзін ауысым шебері Леонид Гехт та қолдады. Өйткені табыстың, яғни жалақының тұрақты өсімі  әр жұмысшыға қуаныш сыйлап, оның отбасының тұрмыс-тіршілігін жақсарта  түсері  анық.

Гүлбаршын   ӘЖІГЕРЕЕВА,

«Орал   өңірі»


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика