Ет экспортын арттыратын жоба мақұлданды

Күні: , 21 рет оқылды

Қостанайлық «Зерновая индустрия» агрохолдингі Қазталов ауданының Талдыапан ауылдық округі аумағынан маусымына бес мың ірі қараны бордақылауға есептелген алаң салатын болды.

Аталған жоба кеше облыстық әкімдікте өңір басшысы Алтай Көлгіновтің төрағалығымен өткен инвестиция тарту жөніндегі кеңестің кезекті отырысында мақұлданды.

– Биыл кеңестің бес отырысы өтіп, 40 миллиард теңгені құрайтын 12 жоба қаралды. Бүгінгі басқосуда біздің өңірден мал бордақылау алаңын салуға ниетті инвестордың жобасымен танысатын боламыз. Біздің өңір,  негізінен, мал шаруашылығымен айналысатындықтан, бұл жоба облыс үшін өте тиімді болмақ. Ірі қара және ұсақ малдың еті мен ет өнімдерін экспорттау көлемі жыл сайын артып келеді. Бүгінде облыстағы «Кублей», «Жайық ет» секілді өндіруші кәсіпорындардың жұмысы жақсы жолға қойылды. Ендігі мәселе сол кәсіпорындарды қажетті шикізатпен қамту. Аталған жоба мал саны мен экспорт көлемін одан сайын арттыруға септігін тигізеді деп есептеймін, – деді облыс әкімі Алтай Көлгінов.

Жоғарыда аталған агрохолдинг жобасын біздің өңірде жүзеге асырушы «Мясная индустрия» ЖШС болып табылады. Мал бордақылау жобасының жай-жапсарымен агрохолдинг құрылтайшысы Әлжан Хабиев таныстырды.

– Қостанай облысындағы «Зерновая индустрия» агрохолдингінің меншігінде 100 мың гектар жер, 5500 бас асыл тұқымды Абердин ангус малының аналығы өсірілуде. Сондай-ақ бір маусымда 20 мың бас малды бордақылауға арналған кешен қалыпты жұмыс істеуде. Өзім осы облыстың тумасымын. Бұл өңірдің табиғи жағдайын жақсы білемін. Мүмкін Батыс Қазақстан облысының жерінің құнарлығы Солтүстік өңірлерге қарағанда төмендеу шығар. Бірақ бұл жердің мал бағуға қолайлы табиғаты, асыл тұқымды мал өсірумен айналысатын шаруашылықтардың көптігі және облыс кө-лемінде үлкен агрохолдингтердің болмауы бізді қызықтырған еді. Сондықтан Қазталов ауданы аумағынан маусымына бес мың бас малды бордақылайтын кешен салуды жоспарладық. Биылғы жылдың мамыр айынан бастап аталған жердің аумағын, құнарлылығын, сумен қамтылуын жан-жақты тексердік. Жобаның жалпы құны 2,5 миллиард теңге болса, соның 1 миллиарды құрылыс жұмыстарына жұмсалмақ. Ал есептелген қаражаттың 1,5 миллирад теңгесі айналым капиталына салынатын болады. Құрылыс жұмыстары келер жылдың сәуір айында басталып, қазан айында толығымен аяқталады деп күтілуде. Бордақылау кешенін салу кезінде 100 шақты адам жұмысқа тартылады. Кешен іске қосылған жағдайда 50 адамды тұрақты жұмыспен қамтиды. Бордақылаудың бір кезеңі бес мың бас ірі қараны қамтитын болса, жылына екі айналымда 10 мың бас бордақыланатын болады. Ісіміз оңға басып жатса, болашақта бордақыланатын мал басының санын 20 мыңға жеткізу жоспарымызда бар. Семіртілген малдың орташа салмағы 550-600 келі, барлық малдың тірілей салмағы 5 тонна, ал еттей салмағы 2,5 тоннаны құрамақ. Арнайы орындарда сойылған сиыр еті жартылай төшке, төрт бөлікке және ұсақ бөлшектелетін түрлерімен экспортталатын болады. Агрохолдинг өндірілген өнімді осы уақытқа дейін Ресей мен Өзбекстан елдеріне экспорттап келген болса, болашақта ет және ет өнімдерін Қытай мен Иран нарығына да шығару жоспарда бар, – деді Әлжан Хабиев.

Агрохолдинг өкілінің айтуынша, жобаға сәйкес осы желтоқсан айында жерді рәсімдеу, құдықтар қазып, сумен қамту, суармалы жерлерді зерттеу жұмыстары жүргізілетін болады. Келер жылдың қаңтарында бордақылау алаңын жобалап, сәуір айында құрылыс жұмыстарын бастау, мал азығы дақылдарын себу, шілде-тамыз айларында мал азығын дайындау, қазан айында бордақылауға қойылатын малдарды қабылдап, қараша айында бордақылау жұмысын бастау жоспарланған.

Бордақылауға қойылатын мал осы өңірдегі қожалықтардан қабылданатын болады.

Кешенге туылғанына 7-15 ай толған, салмағы 200-300 келі құрайтын малдар қабылданбақ.

Жобамен жан-жақты танысқан инвестиция тарту жөніндегі кеңес мүшелері аталған агрохолдингтің бастамасын бірауыздан қолдап, жұмысына сәттілік тіледі.

Нұрбек   ОРАЗАЕВ,

«Орал  өңірі»


«Кублей» Қытайға ет шығарады

Күні: , 70 рет оқылды

ҚР Сыртқы сауда палатасы баспасөз қызметінің хабарлауынша, батысқазақстандық «Кублей» ЖШС  Қытайға ет экспорттайтын болды.

Шанхайда импорт тауарлар мен қызмет түрлерінің «China International Import Expo» халықаралық көрмесі өтуде. Оған 130 мемлекеттен 2800 компания қатысып, өз өнімдерін ұсынып отыр. Көрмеге Қазақстаннан 302 компания қатысып, өндіріс, ауыл шаруашылығы, машина жасау, туризм және тағы басқа салалар бойынша тауарлар мен қызметтерін жарнамалауда.

Аталмыш халықаралық көрме аясында қазақстандық «Кублей» ЖШС мен «Karamay Yuguanfu Foreign Trade Co Ltd» (Қытай) арасында Қытайға 20 мың тонна сиыр мен қой етін экспорттау бойынша келісімшартқа қол қойылды. Мамандардың айтуынша, бұл серіктестіктің Қытайға ет шығару жөніндегі алғашқы келісімі.

Гүлбаршын   ӘЖІГЕРЕЕВА,

«Орал   өңірі»


Ангусты Дакотадан тасымай-ақ, Ақтөбеден «жалға» әкелуде

Күні: , 135 рет оқылды

Ақ Жайық өңірінде мыңғыртып  мал өсіруге барлық жағдай жасалған. Соңғы уақытта экологиялық тұрғыдан таза өнім саналатын етті сыртқа шығаруға мүмкіндік беретін бұрынғы «жабық» қақпалар ашылып жатыр. Енді ауыл-аудандағылар қарапайым сиырды емес, асыл тұқымды мал өсіруге ниетті. Биылғы тамыз айынан бастап көршілес Ақтөбе облысынан өңірімізге ангус тұқымды мал әкеліне бастады.

Көршілес облыстағы ет кластерінің бір тізбегі «АқТеп» ЖШС-мен облыс шаруашылықтарының арасындағы экономикалық байланыс, алысберіс нығая түсті. Бөрлі, Қаратөбе, Жаңақала, Сырым, Шыңғырлау аудандарының шаруашылықтары аталмыш серіктестіктен асыл тұқымды ангус сиырларын «жалға алып» өсіруде. Тез салмақ қосатын, еті мәрмәр болатын 2128 баспақ, соның ішінде 1999-ы аналық, 129-ы аталық мал әкелінген. Аудандардың ішінен ең көп мал алған – Бөрлі ауданы. Бұл аудандағы 6 шаруашылық 800 аналық, 48  бұқа  әкеліп, баптауда.

Облыстық ауыл шаруашылығы басқармасы басшысының орынбасары Сатқан Өмірзақовтың айтуынша, «АқТеп» өзінің «Ірі қараны жалға беру» ішкі бағдарламасы бойынша асыл мал өсіргісі келетін шаруашылыққа 100 аналықты және 6 бұқаны жеті жылға жалға береді. Оның үстіне серіктестік бұқаны екі жыл сайын жаңасына  ауыстырып  тұрады.

– Шаруагер жалға алған малды кері «АқТеп»-ке 7 жылда 100 қа-шар, 200 бұқашық етіп қайтаруы тиіс. Әрі ірі қараны төлі есебінен екінші жыл дегенде кері қайтаруды бастайды. АҚШ-тың Солтүстік Дакота штатынан ангус тұқымды 100 аналық алатын болсаңыз, оның әр басы сертификатымен  850 мың теңгеге шығады. Ал 100 бас 85 миллион теңге тұрады. Әрине, «АқТеп»-тің талабы қатаң, олай болмаса тағы болмайды. Бірақ серіктестіктің бағдарламасының арқасында Бөрлі ауданына 1 млрд. теңге тұратын асыл мал келді. Алдымен серіктестіктегілер мал алғысы келетін шаруагермен сөйлесіп, ол туралы ел-жұртпен пікірлеседі. Көшедегі көлденең көк аттыға асыл малды ұстата салмайтыны айдан анық. Малды жалға берушінің талаптары бойынша мал өсірушінің кемінде әр басқа 20 гектардан жайылым жері, жем-шөп дайындайтын базасы, техникасы сайма-сай болуы тиіс. Ангус тұқымды малға суды емін-еркін жүріп ішетіндей жағдай жасалуы керек. Бұл малға қысқы суықта қораның қажеті жоқ, ықтасын болса, жарап жатыр. Өйткені Солтүстік Дакота мен өңіріміздің климаты ұқсас. Ең басты артықшылығы, серіктестіктің ветеринар маманы асыл малды күтудің жай-жапсарын түсіндіреді, тегін кеңесін береді. Ал қажетті дәрі-дәрмек, дәрумендерін нарықтағыдай емес, өз қақына ұсынады. Шаруа адамы тек жалға алынған малды дұрыс бағып, мал басын асылдандыру жолында тер төге еңбектенсе жарады, – деді Бөрлі аудандық ауыл шаруашылығы бөлімінің басшысы Алтынбек Бексейітов. Оның айтуынша, ауданға әкелінген 800 аналықтан тараған малдың төлдерін, соның ішінде аталықтарын аудандағы өзге шаруашылықтардың ірі қарасын асылдандыру үшін әрі қарай тарату көзделуде.

Мамандардың айтуынша, «Ақ-Теп»-тің жеке бағдарламасының басты артықшылығы – ол екінші деңгейдегі банктер мен несие институттары сықылды малыңды да, мүлкіңді де кепілдікке сал деп қинамайды, пайыздық өсім деген жоқ. Орта есеппен 7 жыл ішінде 100 аналықтан 600 төл алынатын болса, соның 100 қашарын, 200 бұқашығын, яғни 10 айға дейін өсіріп, кері қайтарасың. Сонда өзіңде тең жарты мал пайдаңа қалады. Тағы бір айтарлығы, малды жалға берушіге кері қайтаратын 200 бұқашықтың асыл болуы міндетті емес. Мұны да мал баққан ағайынның  ұпайы  деуге  болады.

«Жақсыдан үйрен, жаманнан жирен» дегендей, осындай мүмкіндікті өңіріміздегі 5 ауданнан өзге аудандар да елеп-ескерсе жөн болар  еді.

Гүлбаршын   ӘЖІГЕРЕЕВА


Авиабилет құны арзандауы мүмкін

Күні: , 39 рет оқылды

2019 жылы елімізде авиабилет құны арзандауы мүмкін. Бұл туралы  курсив.кz порталы жазды.

Бұл әңгімені бұдан бұрынырақ, биылғы қыркүйек айында өткен Үкімет сағатында халық қалаулылары қозғаған болатын. Онда Инвестиция және даму вице-министрі Тимур Тоқтабаев алдағы жылы елімізде өндірілетін керосин көлемі жеткілікті болып, авиабилеттер құны 20-25%-ға арзандайтынын айтып, ел-жұртты қуантты.

Енді қазан айында БҚО активімен кездесу барысында ҚР Энергетика министрі Қанат Бозымбаев та айтылған ақпаратты растады. Оның айтуынша,  биыл Қазақстанға 300 мың тонна керосин сырттан тасымалданады, әзірге сырттан тасымалданатын керосинге  тәуелділік 45%-ды құрайды.

Елімізде жыл сайын 400 мың тонна  авиа керосин өндіріледі. Министрліктің ұсынған мәліметіне сүйенсек, биылғы жылдың аяғына таман  керосинге деген қажеттілік  650 мың тоннаға жетпек. Ал 2019 жылы еліміздегі керосин өндірісі 690 мың тонна көлеміне дейін өседі деп күтілуде. Қанат Бозымбаевтың сөзіне сүйенсек, алдағы жылы ұшақтар отандық керосинмен 100% қамтылып, оның бағасын да реттеу мүмкін болмақ. Сондай-ақ «Орал» халықаралық әуежайын стандартқа сай қылудың арқасында халықаралық рейстерді жиі ұйымдастыру мүмкіндігі туады. Министр «өз қолымыз өз аузымызға» жетіп, керосиннің бағасын белгілеуде тәуелсіздік алғанымызбен, бағасы арзан сұйықтық кедендік шекарасы жоқ, ортақ нарыққа «ағып» кетуі ықтимал деген  қорқынышын  жасырмады.

Биыл аталмыш министрлік өңіріміздегі мұнай өңдеуші  «Конденсат»  АҚ-мен  еліміздегі үш мұнай өңдеуші зауытпен қатар ішкі нарықтарға мұнай өнімдерін жеткізуді арттыру үшін қажетті шикізатпен қамтамасыз ету жөнінде меморандумға қол қойды. Сонымен қатар мұнай өңдеу зауытына магистральды мұнай құбырлары мен теміржол арқылы қазақстандық өндірушілердің мұнайын жеткізудің кестесі бекітілді. Бүгінде «Конденсат» ішкі нарыққа жоғары октанды бензин мен еуропалық сапалы дизель отынын өндіруде.

Гүлбаршын   ӘЖІГЕРЕЕВА


Депозиттердің шарттары өзгерді

Күні: , 146 рет оқылды

Биылғы жылдың  1 қазанынан бастап елімізде жеке тұлғалардың ұлттық валютадағы мерзімді және жинақ салымдары бойынша ең жоғары сыйақы мөлшерлемесі бекітілді. Мұндай жағдаймен салымдарды жіктеу халықтың жинақтары үшін жаңа мүмкіндікті қамтамасыз етіп, жинақты ұлттық валютада ұзақ мерзімде сақтауға ынталандырады және банктік нарықтағы қаржылық тұрақтылықтың шарттарын жасайды. Бұл туралы  ҚР Ұлттық Банкі хабарлады.

Ұлттық Банктің хабарлауынша, 1 қазаннан бастап жеке тұлғалардың жаңадан тартылған депозиттері бойынша шарттар өзгерді. Салымдар бойынша сыйақы мөлшерлемелері салымның түрі мен мерзіміне, мерзімінен бұрын алынуына және толықтырылуына байланысты болмақ. Осыған орай Қазақстанның депозиттерге кепілдік беру қоры жаңа ең жоғары сыйақы мөлшерлемелерін бекітті. Енді жеке тұлғалардың салымдары мерзімді, мерзімсіз және жинақ болып жіктеледі. Мерзімсіз салымдардың табысы төмен болады, бірақ салымшыларға өздерінің депозиттерін қиындықсыз шешіп алуға мүмкіндік береді. Мерзімді салымдардың «икемділігі» төмен, бірақ табысы жоғары болады. Салымшылар ең жоғары табысты жинақ салым арқылы ала алады, онда ақшаны мерзімінен бұрын алу бойынша жоғары талаптар қарастырылған. Салымның мерзімі сыйақы мөлшерлемесінің көлеміне әсер етеді. «12 айға теңгелік стандартты салым 12% сыйақы мөлшерлемесімен шектеледі, ал салымның қосымша опциясы бар депозит мөлшерлемені 11%-ға дейін төмендетеді», – деп  түсіндіреді  Ұлттық  Банк.

«Егер бұрын салымшылар депозиттері бойынша табыстылықты 12%-дан жоғары алмаса, қазір банктік салым шартының талаптарына сәйкес 12 және 24 айдан асатын жинақ салымдар бойынша 13-13,50%-ға дейін сыйақы ала алады. Салымды ұлттық валютамен және тиісінше ең жоғары сыйақы мөлшерлемені таңдағанда, салымшы инфляция кезінде 7,5%-ға дейін, 6% нақты кірістілікті қамтамасыз етеді», — деп хабарлайды Ұлттық Банк.

Шетел валютасындағы салымдар бойынша табыстылық өзгеріссіз қалады және 1%-дан аспайды.

Гүлбаршын ДЫБЫСҚАЛИҚЫЗЫ,

«Орал өңірі»


«Қорқыт дегенде осылай қорқыт деп пе едім?»

Күні: , 149 рет оқылды

Әлеуметтік желілерде жер, мүлік салығы бойынша берешегі бар салық төлеушілердің зәресін алған хабарлама тарап кетті. Онда қарыздың қандай шамада екендігіне қарамастан, мейлі, қарызыңыз 30 немесе 3000 теңге болса да, барлығына бірдей 8 АЕК көлемінде (19 840 теңге) айыппұл салынады делінген. Әнебір ертегіде айтылғандай, «Қорқыт дегенде осылай қорқыт деп пе едім?» деп көзін байлап, аңшылардың алдынан бір-ақ шығарған бөденеге ашуланған түлкідей боп жүрген жайы бар борышкерлердің. Бұл сыбыс әңгіменің тоқетерін Орал қаласы бойынша мемлекеттік кірістер басқармасынан анықтап білдік.

Мамандардың айтуынша, мұндай сыбысқа еш негіз жоқ. Салықтық берешегі бар жеке тұлғаларға салықтық берешегі туралы хабарлама табыс етілген күннен бастап 30 жұмыс күні өткен соң төлемеген немесе толық төлемеген жағдайларда салық мекемелері жеке тұлғаның берешегін өндіріп алу туралы салық бұйрығын шығарады және оны шығарған күннен бастап бес жұмыс күнінен кешіктірмей жеке тұлғаға жібереді.

— Жеке тұлға салықтық берешегін өтемесе, онда салық құрылымы жеке тұлғаға салық бұйрығы табыс етілген күннен бастап 5 жұмыс күнінен қалдырмай салық бұйрығын еліміздің атқарушылық iс жүргiзу және сот орындаушыларының мәртебесі туралы заңнамасында айқындалған тәртіппен мәжбүрлеп орындау үшін атқарушылық іс жүргізу құрылымдарына (органдарына) жібереді.

Сонымен қатар салық берешегі бар тұлғаларға банк мекемелерінде есепшот ашудан бас тартылады.

Сот орындаушылары мүлкін пайдалануға шектеу қояды және мүліктерін тартып алады, 20 АЕК-тен артық (48 100 теңге) берешегі бар тұлғаларға шетелге шығуға  шектеу қойылады, – деді аталмыш басқарма басшысының орынбасары Жанғабыл Сағынов.

Оның айтуынша, «1 қазанға дейін жер, мүлік және көлік салығын төлемегендерге 20 мың теңге (8 АЕК) шамасында айыппұл салынады» деген хабарлама жалған, Әкімшілік құқықбұзушылық кодексінде ондай нәрсе қарастырылмаған. Мерзімінен кешіккен салықшылар үстеме (пеня) төлейді. Күні бүгінге салықшылар жер және мүлік салығы бойынша қаладағы 91 мың жеке тұлғаға есептелген салық сомалары туралы хабарлама  жіберген.

Өзге мемлекеттерде, мысалға, Скандинавия елдерінде азаматтар табысының 60-70 пайызы салыққа кетеді. Бұл тұрғыдан қарасақ, жалпы біздің елдегі салық саясаты жұмсақ, либералды. Ұлы Отан соғысының ардагерлері мен оларға теңестірілген азаматтарға, «Даңқ», «Отан» ордендерімен марапатталған жандарға, «Алтын алқа» медалінің иегерлеріне, жалғыз тұратын зейнеткерлерге (өзге ешкім үй тіркеуінде болмауы керек) меншік құқығындағы барлық салық нысанының жалпы құнынан АЕК-тің 1000 еселенген  (2 405 000 теңге) шегінде жеңілдіктер қарастырылған. ҰОС қатысушылары мен мүгедектері және жеңілдіктер мен кепілдіктер бойынша оларға теңестірілген адамдар, соғыс  жылдарында тылдағы қажырлы еңбегі мен мінсіз әскери қызметі үшін бұрынғы КСРО ордендерімен және медальдарымен марапатталған азаматтар, мүгедектер меншік құқығындағы барлық салық салу нысанының жалпы құнынан айлық есептік көрсеткіштің 1 500 еселенген мөлшері шегінде (1 447 500 теңге) жеңілдіктерге ие.

– Салықтық мөлшерлемелер салық салу нысаны құнының, яғни үйдің немесе пәтер құнының 0,05 пайызынан 2 пайызға дейінгі шамасын құрайды. Қаладағы ескі үйлердегі  бір бөлмелі кей пәтерлер құны 2 миллион теңге болса, соның 0,05 пайызын салық ретінде тө-лейді. Егер 2 млн. теңгеден асса, онда 0,08 пайыз, яғни үйлердің, пәтерлердің құны артқан сайын көбірек салық төленеді. Мұны прогрессивті шкала бойынша төлеу дейміз, – деді  Ж. Сағынов.

Жұрттың көбі айыппұлдың қалай есептелетінін білгісі келеді. Мамандардың айтуынша, айыппұл шамасы негізгі салықтың көлеміне байланысты 1,25 еселенген түрінде салынады. ҚР Ұлттық Банкінің салық берешегіне қатысты дайын формуласы бар көрінеді.  Сол бойынша салық берешегін өтеудің шекті мерзімі аяқталғаннан кейін күніге бір, екі теңге деп дайын формула бойынша есептеледі. Сондықтан берешектің үстіне айыппұл жамамай, салықты 1 қазанға дейін мерзімінде өтеудің пайдасы бар.

Гүлбаршын ӘЖІГЕРЕЕВА,

«Орал өңірі»


ЖЕЛІЛІК МАРКЕТИНГ үрей мен үміт

Күні: , 148 рет оқылды

Бүгінде  әлеуметтік  желілерде  «желілік  маркетинг»  туралы  жарнамалардан көз сүрінеді.  Тіпті,  еліміздің  белгілі  әншілері де  аталмыш бизнеспен айналысып жатқанын жарнамалап,  тапқан  табыстарымен жиі бөлісетінді шығарды.  Жақында  «Инстаграмдағы»  жеке  парақшама Інжу есімді  қыз: «Сіз  жас  анасыз ба?  Бала  күтімімен  үйде отырған шығарсыз.  Сізге  арналған  жұмыс  ұсынғым  келеді.  Барлығы  заңды! Оқу жоспары тегін!  Жаңа  жоба!  Ешқайда бармайсыз.  Барлығы  ғаламтор арқылы. Толық  ақпарат  алу  үшін  менің  нөміріме  жазыңыз  немесе өз  нөміріңізді  қалдырыңыз», – деп  хабарлама қалдырыпты.  Осындай мәтінде  күніне  бірнеше  хат  келеді.  Мұндай  хабарламаға  мән  бермейтіндер  де,  толық  мәлімет алып,  кәсіппен  айналысатындар  да  жетерлік.

Ең алдымен, «ХХІ ғасырдың кәсібіне» айналып кеткен желілік маркетингтің тарихына зер салсақ. Желілік маркетинг американдық Карл Ренборгтің (1897-1973) есімімен тығыз байланысты. Оның идеялары бірнеше миллиард долларлық сауда айналымы бар желілік маркетинг саласына айналды. Карл 1927 жылы АҚШ-та тағамға арналған түрлі қоспаларды дайындауға білек сыбана кіріседі. Өнімді дайындау үшін көптеген минералдар, ақуыздар және басқа да пайдалы заттарды бойына жиған жоңышқаны таңдайды. Карл өз өнімдерінің сапасын тексеру үшін таныстарына тегін ұсынады. Алайда, ешқандай нәтиже болмайды. Оның достары қоспаларды алудан бас тартады. Сол кезде Карл тегін заттың құны болмайтынын ұғып, ойлап тапқан өнімдерін ақшаға сата бастайды. Бәрі жапа-тармағай сатып алады. Ренборгтың қоспалары туралы ақпарат бәріне тарайды. Таныстарының дос-жаран, туыстары қызығушылық танытып, Карлмен бетпе-бет кездескісі келеді. Барлығына өзі дайындаған қоспаны түсіндіре алмайтынын сезіп, не істерін білмей, басы қатып жүргенде, керемет жүйені ойлап табады. Ол дереу достарына тағамдық қоспалар жөнінде мағлұмат беруді ұсынады. Әр ақпаратқа ақы төлейтінін де жасырмайды. Карл ақпарат таратып, өнімінің сатылуына ықпал еткен кез келген адамның еңбегін бағаламақ боп шешім қабылдайды.

Сөйтіп, 1934 жылы Карл «CaliforniaVitamins» (Калифорния витаминдері) атты компания ашады. Жаңа сатылым жүйесі арқасында өнімді тұтынушылар ақпарат таратушыларға (дистрибьютор) айналып, компания жарнамаға 1 доллар да жұмсамастан, 7 миллион доллар табыс тапқан. Осылайша, желілік маркетинг дүниеге келген.

Статистикалық мәліметтерге сүйенсек, күн сайын әлемде елу және одан да көп адам желілік маркетингпен айналысып, миллионер атануда. Әлемде бес мыңнан астам желілік маркетингтік компаниялар бар. Олардың ішінде 2500-і АҚШ-та, Еуропада шамамен – 700, Малайзияда – 800, ал Қазақстанда елуден астам желілік маркетингтік компания жұмыс жасайды. Осы орайда жерлестеріміздің аталмыш кәсіп түріне көзқарасын білуді жөн санадық.

 

Айнұр  ҚУАНЫШҚАЛИЕВА,

Подстепный  ауылдық  Мәдениет  үйінің  басшысы:

– Желілік маркетингті желеу етіп, жылдам байып кетесің деген жеңіл ойдың жетегінде арбауға түсіп, жыл сайын жаңа атпен шығатын қаржылық пирамидаға бар тапқан-таянғанын салып, ақшасы күйіп, несиесін жаба алмай, ағайынмен керісіп жүргендер көп-ақ. Әлемде сауаттылық жағынан 11-орында тұрсақ та, қаржылық сауаттылығымыз ақсап тұр.

Менің ойымша, елімізде желілік маркетингке көзқарас дұрыс қалыптаспаған. Атын естісек, үркитін әдетіміз бар. «Заманың түлкі болса, тазы боп шал» демекші, желілік болсын, басқасы болсын, ең алдымен, тиын-тебен табу жолында құлшыныс, табандылық керек. Ақша аспаннан жаумайды, батпан құйрық та айдалада жатпайды. Базарда пакет сатып та байыған, мектепте бәліш таратып, баласын университетте оқытқан, пайдаланылған бөтелке жинап, қаланың қақ ортасынан пәтерлі болған адамдармен таныспын. Сонымен қатар желілік бизнеспен айналысып, едәуір жалақы алып, отбасын асырап, шетел асып, демалып жүрген құрбыларым да жоқ емес. Ендеше, еңбек еткен адамға желілік маркетинг – өте тиімді бизнес. Кез келген салада қажырлы еңбектің арқасында ғана жетістікке жетуге болады.

Айнұр  МҰҚАШЕВА,

Бала  күтімімен  демалыста  отырған  ана:

– Менің қос дипломым бар. Балаларымды бағып отырған соң, қазіргі таңда бар уақытымды желілік бизнеске арнап, табыс табудамын. Қосымша табыс кім-кімге де керек. Бір жалақымен барлық арманыңды орындау мүмкін емес. Бүгінде Америка, Еуропа сынды алпауыт елдер осы көп деңгейлі бизнеспен күн көруде. Осы бизнестің арқасында мен жылына 17 рет жалақы алып отырмын. Компания директоры да болдым. Көп достар таптым. Көшбасшы ретінде ашылып, өзгердім. Үш ұйықтасам түсіме кірмеген Еуропадағы Хорватияға тегін саяхаттап келдім. Алғаш рет теңізді көру, алғаш рет ұшаққа отыру,  табысты адамдармен танысып, командаммен қыдыру мен үшін тосынсый болды. Егер осы кәсіппен айналыспағанымда, уақытым текке кетер еді. Біз қарапайым өмірде де желілік маркетингпен айналысып жүрміз. Әдемі зат көрсек,  кино көрсек, соны достарымызға айтамыз. Көп деңгейлі маркетингте өз уақытыңды өзің басқарасың,  командаңа үйретіп, жетелегенің үшін авторлық гонорар аласың. Бір жылдың ішінде көтерілуге мүмкіндік бар. Өзіңнің,  отбасыңның,  ата-анаңның арманын орындап,  өмір сүру  салтыңды  өзгерте  аласың.

 

Бағдат  АДАЙХАН,

Теректі  аудандық  ішкі  саясат  бөлімінің  теологы:

– Қазіргі таңда ең өзекті мәселелердің бірі – желілік маркетингте жұмыс істеу. Негізі әр компанияның өзіне тән бизнес жоспары болады. Өз басым сол маркетингтік жоспармен қатар, өндіріп жатқан өнімдерінің құрамында доңыз майының бар-жоғын дұрыстап тексеріп, анық-қанығын түсініп алған соң ғана шешім қабылдау қажет деп есептеймін. Айналамызда «бай болудың оңай жолы» деп қаншама адам алданып, жиған-терген ақшасынан қағылып жатыр? Мұның бәрі – зерттеудің аздығынан орын алып жатқан жағдайлар. Алдап-арбау арқылы бизнеске шақыруға мүлдем болмайды. Ол шариғатымызға қайшы. Сондай-ақ пайыздық үстемемен табыс табу – күнә. Алла тағаланың «харам» деген нәрселерінен тыйылсақ, ісіміз берекелі болмақ. Көпке «күнә жасап жатсыңдар» деп күйе жағудан аулақпын. Қолға алып жатқан жұмысыңыздың ақ-қарасын ажыратып алу үшін Қазақстан мұсылмандары діни басқармасы шариғат және пәтуа  бөлімінің  ғалымдарымен хабарласқан жөн.

Замира  МОЛДАҒАЛИЕВА,

аудан  тұрғыны:

– Шынымды айтсам, желілік маркетингтен көңілім қалды. Кезінде бала күтімімен демалыста отырған құрбыларыма ілесіп, өзім де тіркелген едім. Ай сайын тауар алып тұру, ақша айналдыру үшін оны сату және артыңнан көп адам ілестіру қажет. Шығынға ұшырағаным болмаса, пайдасын көрмедім. Менің ойымша, ақшасы бар адамдарға ғана қолайлы сияқты. Бір танысым айтқанымызды тыңдамастан несиеге қомақты қаржы алып, үйін кепілге қойып, бір компанияға тіркелді. «Адам шақыру оңай ғой. Есесіне тез байып, күшті өмір сүреміз» деп бізді сөйлетпейтін. Барлық таныстарын да қарызға батырып, өзінің қатарына қосты. Қазір үйсіз-күйсіз пәтер жалдап күн көруде. Оның жағдайын көзіммен көрген соң, жүрегім шайлығып қалды.

P.S. Желілік бизнесте жұмыс істеу үшін ең бірінші кезекте ұйымдастырушылық қабілетің жоғары болуы тиіс. Адамдармен сөйлесіп, олардың көңілін тауып, бәрінің басын бір арнаға тоғыстыратын қасиетің болса ғана жұмысың алға басады. «Алма піс, аузыма түс» деп, аспанға қарап, жұлдыз санағаннан пайда жоқ. Жалпы, кез келген жұмыста сабырлық, төзімділік, табандылық және тынбай еңбектенудің арқасында ғана жетістікке жетуге болады. «Байлар мен кедейлер арасындағы жалғыз айырмашылық – олардың уақыттарын пайдалануында» деген екен әйгілі американдық кәсіпкер Роберт Кийосаки. Олай болса, қандай іспен шұғылдансақ  та, уақытымыздың  қадірін  біліп,  пайдамызға  асырайық.

Аягөз  АЙБАРҚЫЗЫ,

Теректі  ауданы


503,7 миллион теңге игерілмей қалған

Күні: , 89 рет оқылды

Бұл  жөнінде  БҚО  қоғамдық кеңесінің  кеңейтілген  отырысында былтырғы  облыстық  бюджеттің орындалуы  жөнінде  есеп  берген облыстық  қаржы  басқармасының  басшысы  Дулат  Имашев  хабарлады.

– 2017 жылға арналған облыстық бюджеттің түсімдер жоспары 119,0 млрд. теңгеге бекітілгенімен, нақтылау мен түзетулер нәтижесінде 26,2 млрд. теңгеге ұлғайтылып, облыстық бюджет 145,3 млрд. теңгеге толықты. Облыстық бюджеттің негізгі кіріс көздерін республикалық бюджеттен бөлінетін трансферттер мен субвенциялар және салықтық түсімдер құрады.

Республикалық бюджеттен ағымдағы нысаналы трансферттер және даму трансферттері 36,6 млрд. теңге сомасында қарастырылып, толықтай бюджетке түсті.  Субвенциялар 47,5 млрд. теңгеге алынды. Сонымен қатар облыстық бюджетке төмен тұрған бюджеттерден 916,3 млн. теңге  көлемінде нысаналы трансферттер қайтарылды. 2017 жылы жергілікті бюджеттен бөлінген бюджеттік кредиттердің 3,6 млрд. теңге сомасы немесе 100 пайызы өтелді. Жыл бойына облыстық бюджетке төрт нақтылау мен жеті түзету  жүргізілді.

Облыстық бюджеттің шығыс бөлігі 144,7 млрд. теңгеге немесе 99,7 пайызға орындалды. 503,7 млн. теңге игерілмей қалды. Оның ішінде 54,3 млн. теңге үнемделді. Орал қаласындағы үш мектептің құрылысынан 236,7 млн. теңге, Орал қаласының жылу электр орталығына тартылған магистральді газ құбырын тартудан 195 млн., жұмыспен қамтуды үйлестіру және әлеуметтік бағдарламалар басқармасы аутокөлік сатып алу бойынша конкурстық рәсімдерінің ұзақ өткізілуі және тауарлардың уақтылы жеткізілмеуінен 13,6 млн. теңге қаржы игерілмеді. Жалпы, игерілмеген қаржының ішінде нысаналы трансферттер 213,3 млн. теңгені немесе 42,3 пайызды құрады. 11 ауданға әлеуметтік-экономикалық мәселелерді шешуге толықтай 33,9 млрд. теңге көлемінде субвенция  аударылды, – деді  Дулат  Имашев.

Басқарма басшысының мәліметінше, қорғаныс саласына 0,7 млрд., қоғамдық тәртіп пен қауіпсіздікті қамтамасыз етуге 6,1 млрд. теңге жұмсалды. Облыстық ішкі істер департаментіне 4,03 млрд. теңге бөлінді. Оның ішінде 101 көлік құралын сатып алуға, Орал қалалық жедел басқару орталығына 100 бейнекамера және 147 санды IP-камера  сатып алынды. Төтенше жағдай құрылымдарының материалдық-техникалық базасын қамтамасыз  етуге 512,8 млн. теңге жұмсалды.  Сондай-ақ білім саласына бөлінген 20,1 млрд. теңге облыстық бюджет шығысының 14 пайызын құрады. Бұл бағытта арнайы білім беретін оқу бағдарламалары бойынша жалпы білім беруге 1,1 млрд. теңге бағытталды. Білім беру нысандарының құрылысына 6 млрд. теңге бөлінді. Денсаулық сақтау саласына 15 млрд. теңге бөлінсе, оның ішінде 1 млрд. теңгеге 19 нысан күрделі жөнделді. Медициналық ұйымдардың материалдық-техникалық базасын нығайтуға 2,5 млрд.  теңгеге  аударылды.

Жиында Дулат Имашев мәдени және әлеуметтік салалар, су, орман және ауыл шаруашылығына бағытталған қаражаттың игерілуі жөнінде баяндады. Ұлттық қор мен республикалық бюджет есебінен қаржыландырылған мемлекеттік бағдарламалардың іске асырылуы жөнінде айтты. Былтыр «Нұрлы жер» ауқымында 2,9 млрд. теңгеге 10 жоба толық жүзеге асқан. «Нұрлы жол» бойынша 7,2 млрд. теңгенің 13 жобасы 99,9 пайызға орындалды. Кеңейтілген отырыста облыстық қоғамдық кеңес мүшелері әлеуметтік нысандар құрылысы жүргізілер алдында қоғамдық бақылауды күшейту, туризм саласы бойынша бөлінген қаражаттың есебін нақтылауды  ұсынды.

Нұртай  ТЕКЕБАЕВ,

«Орал  өңірі»


Тексерістің азаюы, кәсіпкерліктің тынысын ашады

Күні: , 111 рет оқылды

Ақ Жайық өңіріне жұмыс сапарымен келген ҚР Ұлттық кәсіпкерлер палатасының төралқа төрағасы Тимур Құлыбаев «Алгоритм» технопаркінде облыстық кәсіпкерлер палатасы өңірлік кеңесінің отырысына қатысты. Кеңес отырысына облыс әкімі Алтай Көлгінов, облыстық кәсіпкерлер палатасы қызметкерлері, мемлекеттік құрылымдардың өкілдері және  кәсіпкерлер қатысты.

— Биылғы 1 мамырдағы мәлімет бойынша, жұмыс істейтін кәсіпкерлік субъектілердің саны 38,6 мыңды құрады, бұл өткен жылғыдан 4,5 пайызға артық. Шағын және орта кәсіпкерлік саласында жұмыс істейтіндер саны да артып, 113 мың адамға жетті. Бұл да былтырғы сәйкес мерзімдегі көрсеткіштен 5,5 пайызға көп. Салықтық түсімдер молаюда, ШОБ-тен 52 млрд. теңгеден астам түсті. Облыс бюджеті 185 млрд. теңгені құрайды, соның 53 млрд. теңгесі шағын және орта кәсіпкерліктен түседі. Мұнда өсім бар. Өткен жылғы өндірілген өнім 1,4 трлн. теңгені құрап, 2016 жылғы көрсеткіштен 150 млрд. теңгеге артық шықты. Облыстың  ӨЖӨ құрылымындағы шағын және орта кәсіпкерліктің үлесі 42 пайызды құрайды. Бұған мемлекеттік қолдаудың және кәсіпкерлердің белсенділігінің арқасында қол жетті. Кәсіпкерліктің дамуына кедергі келтіретін тосқауылдар алынуда, тексерістер азайды. Кәсіпкерлерге қызмет көрсету орталығымен 720 кәсіпкерге 820 қызмет көрсетілді. Даму институттары шағын несиелеу бойынша ырғақты жұмыс істеуде. Биыл Елбасының тапсырмасымен «Президенттің бес әлеуметтік бастамасы» бойынша ауылға бөлінетін  шағын несие көлемі екі еселенеді. Өткен  жылы 2 млрд. теңге болса, биыл 4 млрд. теңге ауылдағы шағын және орта кәсіпкерлікті дамытуға бөлінеді. «Бастау»  жобасы бойынша өткен жылы тек бес ауданда кәсіпкерлік негіздеріне 938 адам оқытылса, биыл 12 аудан мен Ақсай қаласында оқыту көзделген. Осының өзі кәсіпкерлікті жаңадан бастаған ауыл тұрғындарына үлкен көмек болады деп білемін. «Бизнестің жол картасы — 2020» бағдарламасы  бойынша 830 жоба мемлекеттік қолдауға ие болды, — деді  Алтай Көлгінов жиында.

Тимур Құлыбаев кәсіпкерліктің облыс экономикасының дамуына қомақты үлес қосып отырғанын атап көрсетіп, осындай басқосулардың озық тәжірибелерді талқылауға мүмкіндік беретінін айтты.

– Бес жыл бұрын жұмыстың басым бес бағыты белгіленді. Соның бірі – кәсіпкерлердің құқығы мен заңды мүдделерін қорғау. Бұл бағытта бірқатар жұмыс атқарылды.

Бас прокуратурамен кәсіпкерлердің құқығын қорғау бағытында  тұрақты негізде жұмыс жасалуда, кеңестер құрылды. Біз заңдылықтардың сақталуын қарап қоймай, мәселелердің қайдан туындайтынын зерттеп, мемқұрылымдардың кәсіпкерліктің дамуына кері ықпал ету мүмкіндіктерін азайту үшін тиісті заңнамаларға өзгерістер енгіземіз, — деді Тимур Құлыбаев. Оның айтуынша, «Атамекен» ҰКП Жоғарғы сотымен бірге жұмыстануда. Тәжірибе көрсеткеніндей, сот құрылымдары мемқұрылымдар мен кәсіпкерлер арасындағы істерді қарағанда ішінара мемлекеттік құрылымдардың ұстанымын жақтайды. Ендігі жерде соттардағы кәсіпкерлердің құқығын қорғау мәселесі бойынша сұрақтарды тұрақты түрде қарастыруға келісілген.

— Палатада кәсіпкерліктің түйткілді мәселелері бойынша тізілім жасалған. Қазірдің өзінде 570 сұрақ бақылауға алынып, оның 70 пайызы қаралып, шешілді. Өмір бір орында тұрмайды. Күн сайын бір мәселе алдан шығады. Статистиканың бақылап көріп отырмыз, соңғы жылдары тексеріс деңгейі 30 пайызға қысқарды. Кәсіпкерлікке жасалатын «қысым» төмендеді, — деген Тимур Асқарұлы.

Кездесу барысында облыстық кәсіпкерлер палатасының директоры Сәкен Карин палата жұмысының негізгі бағыттары жайында әңгімеледі. 2017 жылы палатаға 100-ден астам жазбаша өтініш түсіп, оның 50 пайыздан астамы оң шешілген. Палата жұмыс істеген жылдар ішінде кәсіпкерлердің 160 млн. теңге шамасында мүліктік құқықтары қорғалған.

— Агроөнеркәсіптік кешен бойынша өңірдің даму көрсеткіштері ұнамды. Облыстың ірі қара басын өсіру жоспарымен таныстым. Экспорттық әлеует бары анық. Іргеде Ресейдің бес облысы және Атырау облысы бар. Сондықтан ауыл шаруашылығы тауар өндірушілеріне өнім өткізуге көмектесу керек. Атырауға ет Астрахан жағынан және аздаған көлемде БҚО-дан келеді. Сондықтан ішкі кооперацияны дамытуымыз керек. Атырау мал азығына мұқтаж, оны осы жерде дамытуға болады, — деді Тимур Құлыбаев. Сондай-ақ төралқа төрағасы өңірлерде құрылыс және құрылыс материалдары қауымдастығын, БҚО-да сауда қауымдастығын құруды ұсынды. Оның айтуынша, құрылыс қарқынды жүруде, ал құрылыс материалдарының басым бөлігі сырттан сатып алынады. Яғни құрылысқа бөлінген қаржымен көршілес елдерді субсидиялаудамыз.

Жиында өңірлік кеңес мүшелері, «Отделстрой» ЖШС-ның директоры Валентина Михно өңірде инженерлік инфрақұрылым бойынша электрондық карта құруға, кәсіпкер Валерий Крылов «БЖК-2020» бағдарламасы шеңберінде ЕДБ-лардың несиелерінің пайыздарын субсидиялауға, «Шағын бизнес орталығы» ЗТБ-ның директоры Шолпан Жұматаева Астана қаласының тәжірибесі негізінде көше саудасын ұйымдастыруға, «Х. Қапанов атындағы халықаралық гимназия» ЖШС-ның директоры Хайдар Қапанов  жеке балабақшаларды жан басына қарай қаржыландыруға, «ОтауАлан» ЖШС-ның директоры Ляна Тұрсынова ыстық тамақ ұйымдастыруға, «Медцентр» ЖШС-ның директоры Рафхат Истаев жеке емхананы мемлекеттік қаржыландыруға қатысты  және өзгелері де сұрақтарына тиісті жауаптарын алды.

Гүлбаршын    ӘЖІГЕРЕЕВА,

«Орал   өңірі»


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика