Чемпион жүлдесіне таласуда

Күні: , 79 рет оқылды

Орал қаласында XXXI жазғы Олимпиада ойындарының жеңімпазы Данияр Елеусіновтің жүлдесі үшін ересектер арасында бокстан халықаралық турнир басталды.

Құрметті қонақтар қатарында Данияр Елеусіновпен бірге оның әкесі әрі жаттықтырушысы Марат Елеусінов, халықаралық дәрежедегі спорт шебері, Қазақстанның еңбек сіңірген жаттықтырушысы  Мырзағали Айтжанов та бар. Облыстық дене шынықтыру және спорт басқармасының басшысы Әсия Аманбаеваның айтуынша, турнирге еліміздің аймақтарынан сегіз команда және Өзбекстан мен Тәжікстан спортшылары қатысуда.

— Біз облысымызда алғаш рет өзіміздің сүйікті чемпионымыз, бүгінде кәсіпқой бокста өнер көрсетіп жүрген Данияр Елеусіновтің жүлдесі үшін ашық турнир ұйымдастырып отырмыз. Мұндай жарыстар біздің спортшыларды шынықтырып, жаңа чемпиондар тәрбиелеуге себеп болады деп ойлаймын. Біздің спортшыларымыз жеңіс тұғырында Туымызды желбірете берсін. Ал мемлекетіміз спорттың дамуына жағдай жасай беретін болады. Облысымызда да  спорттың  дамуына ерекше көңіл бөлудеміз. Спортшыларымыздың денсаулығын шыңдап, ел ішінде, халықаралық ареналарда  жеңіске жетулеріне барлық жағдай жасаймыз. Өздеріңізге мәлім,  екі жыл бұрын Данияр Елеусінов атындағы бокс орталығын аштық. Бұл біздің жас спортшыларымызды ынталандыра түседі. Баршаңызға жеңістер мен жетістіктер тілеймін, — деді шараның ашылу  салтанатына қатысқан облыс әкімі Алтай Көлгінов.

Сондай-ақ шарада сөз алған Олимпиада чемпионы Данияр Елеусінов жерлестерінің спортқа қолдау білдіргендеріне ризашылығын айтты.

Галина  САМОЙЛОВА


«Ақжайық» «Қайраттан» айласын асырды

Күні: , 45 рет оқылды

Ел біріншілігінің ХХVІ турында ең тосын нәтиже Алматыда тіркелді.  Өткен жексенбіде «Қайрат» өз алаңында Оралдың «Ақжайығын»  қабылдады.

«Астанамен» чемпиондық атаққа таласып келе жатқан алматылықтар үшін бұл ойын маңызды еді. Ал оралдықтарға соңғы орындарға түсіп қалмау үшін ұпай ауадай қажет болатын.

Украиналық маман Сергей Зайцев жаттықтыратын батысқазақстандықтар ресейлік Андрей Аршавин сынды кілең ығай мен сығай ойнайтын қарсыластарынан ыға қойған жоқ. Бір қызығы, қос команданы байланыстыратын деректер бар еді.

Биылғы біріншілікті «Ақжайықтың» құрамында бастап, сұрмергенге айналған украиналық шабуылшы Адеринсола Эсеоланың жазда «Қайратқа» ауысқаны белгілі. Сол секілді Орал футболының түлегі Стас Покатилов (оның сыңары Владимир Покатилов осы бәсеке соңында «Ақжайық» сапында алаңға шықты) алматылықтардың  қақпасын  қорғады.

Бірінші тайм басында қонақтар белсенді болғанымен, көп ұзамай алаң иелері ойын тізгінін қолға алды. Дегенмен оралдықтар да қарап қалмай, қарымта шабуылға шығып отырды. Әсіресе, оң қанаттан Азат Ерсәлімов асырған пастан кейін сенегалдық шабуылшы Малик Маненің допқа аяғы дұрыс тимей қалды.

Ойынның екінші кезеңінде алматылықтар жиі шабуылдады. Осындай сәттерде украиналық қақпашы Евгений Боровик «Қайраттың» капитаны Бауыржан Исламхан мен А. Эсеоланың аса  қауіпті соққыларын қайтарып, екі мәрте  сейв  жасай  білді.

Матч аяқталуға 15 минуттай уақыт қалғанда, оң қапталдан А. Ерсәлімовтің берген добын Еркебұлан Нұрғалиев баспен қақпаға дәл түсірді. Бұдан кейін алматылықтар қанша тырысқанымен, есеп өзгерген  жоқ.

Ең бастысы, бұл кездесуде оралдықтар сауатты ойын өрнегін көрсетіп, тәртіп бұзбауға тырысты. Есесіне «Қайраттың» футболшылары үш мәрте ескерту алып тынды.

С. Зайцев чемпионаттағы үзіліс кезінде Ұлттар лигасында Латвия құрамасының сапында қос бірдей матч өткізіп келген Артур Карашаусксті бірден ойынға қосқан жоқ. Ол тек екінші таймда ғана М. Маненің орнына шықты. Ал Қазақстан жастар құрамасының мүшесі, жартылай қорғаушы Иван Антипов анасының өмірден озуына байланысты бәсекеге қатыса алған жоқ. Соған қарамастан, «Ақжайық» күтпеген жерден 1:0 есебімен «Қайратты» ұтып, тарихи жеңісіне қол жеткізді. Яғни премьер-лига аясында алматылықтарды сырт алаңда алғаш рет тізе бүктірді.

«Біз бұл жеңісімізді орны толмас қайғыға тап болған Иван Антиповқа арнағымыз келеді. Ко-манда барлық тапсырманы ойдағыдай орындады», деді «Ақжайықтың» бас бапкері Сергей Зайцев кездесу соңындағы баспасөз мәслихатында.

Бұл турда «Қайсармен» өз алаңында 0:0 есебімен тең ойнаған елордалықтар да ұпай жоғалтты. Қазір алматылықтардың бірінші орындағы «Астанадан» төрт бірдей ұпайы кем. Ал 29 ұпай жинаған «Ақжайық» турнир кестесінде жетінші орынға көтерілді. Дегенмен батысқазақстандықтарға босаңсуға болмайды. Олар ХХVІІ турда 23 қыркүйек күні өз алаңында ел чемпионы «Астананы»  қабылдайды.

Айта кетейік, өз алаңында Петропавлдың «Қызылжарынан» 0:1 есебімен ұтылып қалған Павлодардың «Ертісі» соңғы орыннан көтерілер емес. Қарағандыда «Атырауды» 2:1 есебімен жеңген «Шахтер» 10-сатыда келеді. Алғашқы үштіктен үміткер «Тобыл» мен «Жетісу» командалары Қостанайда 2:2 есебімен тең тарқасты. Шымкентте «Ордабасы» – «Ақтөбе» кездесуінде де 0:0 есебі тір-келді.

Ғайса  БӘЙМЕН


«Спортпен шұғылданғанның рухы жоғары»

Күні: , 60 рет оқылды

Сенбі  күні  П. Атоян  атындағы  стадионда  Орал  қаласының  күніне  орай  алғаш  рет  жартылай  марафон  өтті.  Жарысқа  Гиннес    рекордтар  кітабын  жеті  дүркін  жаңартқан  халықаралық  дәрежедегі  спорт  шебері,  Азия, Африка, Австралия  және  Америка  құрлықтарының  шөлейт  жерлерін  жалғыз  өзі  жүгіріп  шыққан  атақты  марафоншы  Марат   Жыланбаев  қатысты.

Бұл сенбіде көк жүзінде күлімдеген күн де жер-жерден келген желаяқтарға дем беріп, көрерменнің де жанын жадыратты. Жер-жер демекші, жарыста жерлестерімізбен қатар еліміздің Астана, Алматы, Павлодар, Ақтөбе, Атырау, Шымкент қалаларының, Италия мен Ресей елдерінің азаматтары да сынға түсті.  Марафон 5,25, 10,5 және 21,1 шақырымдар бойынша өтті. Ал балалар үшін стадион ішінде 440 метрге жүгіру ұйымдастырылды. Стадионнан бастау алған жарыста  желаяқтар Даумов көшесінен Шаған жағалауы, Карев көшесі, Достық және  Еуразия даңғылдары арқылы жүгіріп өтті. Жалпы, мың жарымға жуық  жан жарысқа шықты. Бұл марафонға облыс әкімі Алтай Көлгінов бастаған бірнеше лауазымды тұлға да қатысты.

– Жартылай марафонды алғашқы рет өткіздік. Алайда бұл соңғысы емес. Алдағы уақытта 42 шақырымдық толық марафон өткізуді жоспарлап отырмыз. Дуатлон өтті, енді триатлонға дайындаламыз. Оған біздің күшіміз жетеді, қатысушыларымыз да бар. Бұл марафонға тек өз өңірімізден емес, еліміздің қалаларынан, Ресей мен Италия елдерінің де азаматтары қатысты. Халықаралық жартылай марафон болды. Марафонға қатысушылардың барлығына алғысымды білдіремін. Баршамыз спортпен айналысайық! Елбасының өзі бізді спортпен шұғылдануға шақырады. Спортпен шұғылданған жанның рухы да жоғары болады. Орал – тарихи, жасыл, экологиялық таза, әдемі, жылы шырайлы, спорты дамыған қала. Арамыздан чемпиондар шығып, әлемдегі әдемі Ту – тәуелсіз Қазақстанның туын үлкен мәртебемен желбірете берсін, – деген облыс әкімі Алтай Сейдірұлы  қала қонағы, марафонға қатысқан Марат Төлегенұлына алғысын  білдірді.

Мәре сызығына жетіп, өзгелерден оқ бойы озық келген желаяқ жеңімпаздар марапаттарға ие болды. Алды-мен  балалар арасында Ярослав Килазев пен Элина Ихсанова жеңіс тұғырынан көрінді. 5, 25 шақырымда жү-гірген желаяқтар арасында Ақылбек Қабдолмәжит, қыздар арасында Кристина Шалигина  жеңімпаз атанды.  Ал 10,5 қашықтықта ерлер мен әйелдер арасында атыраулық Базарбай Дауталиев пен алматылық Диана Айдосова мәре сызығын бірінші кесті. Ең ұзақ қашықтық – 21,1 шақырымды  алматылық Алексей Гусаров 1:11:54  уақытта, ал әйелдер арасында оралдық  Салтанат Сүндетова 1:42:57 уақытта жүгіріп өтіп, І орын алды. Барлық жеңімпаз бен жүлдегер орын тәртібіне қарай 50 мың теңгеден 500  мың  теңгеге  дейінгі  сертификаттарға ие болды.

Жарысқа Орал қаласындағы «Fiesta» және «Шоқан» киім дүкендері, «Loft Flowers» гүлдер дүкені серіктес болғанын атап өту керек. Сондай-ақ  жүлделі орындар тұғырына көтерілген қыздарға «Әдемі» салоны сертификаттар табыстады. Жарыстың жалпы жүлде қоры 2,5 млн. теңгені құраған болатын.  Ал марафонға қатысу үшін 21,1 шақырымға 2 мың теңге, 10,5 шақырымға 1 мың теңге жарна төленген еді.  Жарна мен қайырымдылықтан түскен  қаражат оралдық бүлдіршін Ару Азаматтың ем алуына жолданатын болады. Марафон  нәтижесінде  550  мың  теңге  жиналды.

Ясипа   РАБАЕВА,

«Орал  өңірі»

Марат   ЖЫЛАНБАЕВ, Гиннес  рекордтар  кітабын жеті  дүркін  жаңартқан   марафоншы,  халықаралық  дәрежедегі  спорт  шебері:

– Жүгірудің Қазақстанда тренд болғанына қуаныштымын. Жүгіру Америка, Еуропа, Австралияда ұзақ жыл бойы кең танымал болған еді.  Мен 1990 жылдары сол елдерге барғанымда жүгіріп жүрген көп адамды көретін едім. Сол кезде Қазақстан мен Кеңес елдерінде жүгіретіндер  аз еді.

Америкада немесе Еуропада президенттер, әртістер, танымал  тұлғалар  таңмен  тұрып  жүгіреді.

Ақшаға бәрін сатып алғанмен, денсаулықты сатып алу мүмкін емес. Жүгіру тек сән үшін керек емес, жүгіру арқылы  әркім өз денсаулығын жақсартатыны белгілі.

Нағыз қолжетімді спорт түрі де осы жүгіру. Ең бастысы, жүгіру дегеніміз – мереке.

Бұған дейін Атырауда, Ақтауда жүгірген едім. Оралға 29 жыл бұрын келген екенмін. Қала көркейіп, еліміздегі экологиялық таза қалаға айналып, халқының саны да артқан екен. Жартылай марафонға еліміздің түкпір-түкпірінен әрі әр жастағы спортшылардың келгені де қызықты болды.  Баршаға денсаулық, бақыт тілеймін. Ең бастысы,  жүгіру сіздерге  ләззат  сыйлауы  керек.

Диана  АЙДОСОВА, Алматы қаласының  тұрғыны:

– Мен жеңіл атлетикамен 10 жылдан бері айналысып келемін. Олимпиада және Азия ойындарына, Әлем чемпионатына қатыстым. 2014-2016 жылдардағы юниорлар арасында

Азия чемпионы атандым. Қашықтықты  жеңіл жүгіріп өттім. Ауа райы  өте  тамаша  болды. Алған  әсерім  керемет.

Ақылбек  ҚАБДОЛМӘЖИТ,  БҚИТУ-дың  2-курс студенті:

– Марафон ұйымдастырушыларға алғысымды білдіремін. Осы секілді жақсы жарыстар өткізіліп тұрса деймін. Осыған дейін Оралда өткен көптеген марафонға қатыстым. Жеткен  жетістіктерім де мол.


Азиада жеңімпаздарына құрмет көрсетілді

Күні: , 53 рет оқылды

Сәрсенбі  күні  облыс  әкімдігінің  «Ақжайық»  залында  облыс әкімі  Алтай  Көлгінов  Индонезияның  Джакарта  қаласында  өткен  ХVІІІ  жазғы  Азиада  ойындарынан  жүлделі  оралған  оралдық  спортшылар  Алексей  Дергунов,  Андрей  Ергучев,  Павел  Липилинді қабылдады.

Облыс әкімі дүбірлі додада еліміздің намысын  абыроймен қорғаған спортшыларды жеңістерімен құттықтап, емен-жарқын әңгімелесті. Алтай Сейдірұлы 35 елдің арасында қазақстандықтардың тоғызыншы орынға табан тірегенін атап өтті. «Азиадада 15 алтын, 17 күміс, 44 қола медальға қол жеткіздік. Соның ішінде батысқазақстандықтар қоржынға екі алтын, бір күміс медальдардың түсуіне үлестерін қосты. Жетістіктеріңіз үшін алғыс айтамыз. Мұның барлығы күн сайынғы жаттығудың, ерен еңбектің  және биік рухтың арқасында мүмкін болды», – деді А. Көлгінов.

Спортшылар мемлекеттің тарапынан спортты дамытуға көңіл аударылып, өңірімізде  спортпен айналысуға барлық жағдай жасалып отырғанына  ризашылықтарын білдірді. Қабылдауға қатысқан БҚО дене шынықтыру және спорт басқармасының басшысы Әсия Аманбаева, байдарка мен каноэ бойынша ескек есуден облысымыздың жаттықтырушысы Александр Акушников спортты дамыту мәселелері төңірегінде  ұсыныс-пікірлерімен  бөлісті.

Облыс әкімі Елбасының бұқаралық спортты дамытуға көңіл бөліп отырғанын айта келе, алдағы уақытта да спорт саласына зор қолдау көрсетілетінін жеткізді. Спортшыларға келешекте жетістіктерге жете берулеріне тілектестігін білдіріп, оларға алғысхаттар табыстады.

Гүлбаршын   ӘЖІГЕРЕЕВА,

«Орал  өңірі»

*  *  *

Индонезияның  Джакарта қаласында  өткен  2018  жылғы   Азия  ойындарында   Қазақстан  қоржынына  екі  алтын,   бір  күміс  салған  оралдық  Алексей  Дергунов,  Андрей  Ергучев,  Павел  Липилин  сейсенбі  күні  елге  оралды.

Оларды Орал әуежайынан БҚО дене шынықтыру және спорт басқармасының басшысы Әсия Аманбаева, сондай-ақ спортшылардың тума-туыстары мен дос-жарандары салтанатты түрде   қарсы  алды.

Шарада Әсия Аманбаева спортшыларды жеңістерімен құттықтап, алдағы уақытта да биік белестерді бағындыруларына тілектес екенін  жеткізді.

– Жеңіске деген құлшынысымыз жақсы болды. Намысты қолдан бермеуге тырыстық. Енді 2020 жылы Токиода өтетін олимпиадаға дайындаламыз. Отбасымызды көрмегелі бірнеше ай болды. Қатты сағындық. Құрметтеп, қарсы алып жатқандарыңызға мың алғыс, – деді спортшылар.

Айта кетейік, еліміздің көк Туының көкке желбіреуіне себепкер болған Алексей Дергунов 500 метр қашықтыққа байдарка есуден (төрт кісілік) алтын алса, Андрей Ергучев 1000 метр қашықтыққа байдарка есуден (екі кісілік) күміс медаль еншіледі. Ал су добынан сынға түскен қақпашы Павел Липилин  алтыннан  алқа   тақты.

Есенжол   ЕЛЕКЕНОВ,

«Орал   өңірі»  


Ардагер теннисшілер сайысы

Күні: , 40 рет оқылды

Сейсенбі күні Конституция күніне орай ардагерлер арасында үстел теннисінен турнир өтті. Қаламыздағы үстел теннисі залында болған сайысқа жиырмаға жуық спортшы қатысты.

– Құрметті аға буын өкілдері, спортшылар, сіздерді Конститу-ция күнімен құттықтаймын! Елі-мізде заңнама, түрлі нормативтік актінің бәрі Ата Заңымыздың не-гізінде қабылданады. Өздеріңіз білесіздер, Конституциямызда адамның бостандығы, құқығы, білім алуы, денсаулығы бәрі де қамтылған. Осы Конституциямыздың аясында мемлекетімізде тұрақтылық пен береке-бірлік салтанат құруда. Еліміздің дамып, гүлденуіне үлестерін қосып келе жатқан ардагерлеріміздің алдында басымызды иеміз, – деді турнирдің ашылу салтанатында сөз алған облыс әкімінің орынбасары Ғабидолла Оспанқұлов. Спортшыларды БҚО ардагерлер кеңесінің төрағасы Мырзағали Мұхамбетов пен ҰОС ар-дагері Хамза Сафин де мереке-мен құттықтап, жеңіс тіледі. Жарыс нәтижесінде 50-59 жас аралығындағылар ішінен Геннадий Сұлтанов, 60-69 жас ара- лығындағылардан Серік Райым-құлов, 70 жастан жоғарылар тобынан Иван Сосновцев үздік болды. Ал аталымдар бойынша Ғибатолла Тілебалиев «ең жақсы ойыншы», Нелли Қазбаева «тех-никасы жоғары ойыншы» деп танылса, Қайыпхан Досқалиев «жеңіске деген ынтасы үшін» аталымына ие болды. Мәди   ЫҚЫЛАС

Полицейлер доп тепкен күн

Күні: , 62 рет оқылды

Жуырда  «Жастар»  стадионында ҚР  Конституциясы  күніне  орай  ІІБ қызметкерлері  арасында  шағын футболдан  жарыс  өтті.

Тартысқа толы болған жасыл алаң бәсекесінде жергілікті полиция қызметі жол-патрульдік полиция батальонының командасы І орын алса,  Шаған қалалық полиция бөлімі ІІ орынды иеленді. ІІІ орын айдауыл қызметі взводының коман-дасына  бұйырды. Сондай-ақ «Үздік шабуылдаушы» аталымы айдауыл қызметі взводының сержанты Айбек Ғабдоловқа, «Үздік қорғаушы» аталымы ІІБ КПб жедел уәкілі полиция аға лейтенанты Қанат Мұхтаровқа, «Үздік қақпашы» аталымы ІІБ ЖПҚ ЖППБ сержанты Рустам Ғұсмановқа берілді. Жеңіске жеткен командалар мен  аталымдарға ие болғандарға  «Динамо» спорт және дене шынықтыру қоғамының спорттық костюмдері мен  кубоктары  және  алғысхаттар  табысталды.   Гүламан  ИСМАҒҰЛОВА, Орал  қалалық ІІБ  баспасөз  қызметкері

Күніне 10 000 қадам жаса!

Күні: , 34 рет оқылды

Сенбі күні Орал қалалық мәдени және демалыс саябағында «Денсаулық жолы» акциясы шеңберінде «Денсаулық кепілі! – Будь здоров – Be healthy» ұранымен сау әдеттер марафоны кең ауқымда өтті.

Шараны облыстық қоғамдық денсаулық сақтау департаменті мен облыстық денсаулық сақтау басқармасы қалалық медициналық ұйымдарымен бірлесіп ұйымдас-тырды. Марафонды бастап, сөз сөйлеген облыстық қоғамдық денсаулық сақтау департаментінің басшысы Жайдар Құрманов, облыстық салауатты өмір салты орта-лығының директоры Зияда Молдағалиева және «Бәйтерек» ҚБ өкілі Светлана Постнова халықты өмір салтын ұстануға шақырды. – Бұл марафон денсаулық сақтау министрлігінен бастау алған болатын. Оған облыстағы денсаулық сақтау мекемелері қолдау білдіріп, осы іс-шараны ұйымдастырдық. Негізінен, халықтың назарын әр адамның денсаулығына өзі жауапты екеніне, салауатты өмір салтын ұстану қажеттігіне, дене қозғалысын реттеп, жаяу жүруге аударғымыз ке-леді. Әрине, мұндай бағыттағы шаралар алдағы уақыттарда да жалғасатын болады, – деді Жайдар Бисенбайұлы. Жаймашуақ табиғат аясында өткен шарада ме-дицина қызметкерлері халыққа күн сайын көп мөлшерде таза су ішудің және әр адам мүмкінді-гінше 10 мың қадамға дейін жаяу жүрудің пайдасы, тұзды шамадан тыс пайдаланудың денсаулыққа зияны жөнінде көрініс қойды. Осылайша тұрғындарға күн сайын белсенді қимылдауды, дәрумен-ге бай көкөністерді мол тұты-нуды насихаттады. Сондай-ақ емханалар қызметкерлері саябаққа келушілердің қан қысымын өлшеулеріне, салмағы мен бойының өлшемін білуге мүмкіндік жасады. Медицина қызметкерлері би-леген флешмобқа саябақтағы демалушылар да белсенді қатысты. Мүмкіндігі шектеулі жандар да бұл қызықты шарадан тыс қалма-ды. Сондай-ақ ақ желеңділердің  физикалық белсенділікті артты-ратын спорттық ойындары қызықты әрі тартысты өтті. Нәтижесінде жеңімпаз командалар ма-рапатталды. Ал шараны өткізуге «Мирлан», «Өнім» базарлары мен «Исаев» ЖК демеушілік көрсетті. Зияда Молдағалиева айтып өткендей,  «Денсаулық жолы» акциясы елімізде он жылдан астам уақыттан бері өтіп келеді. Маусым айында басталып,  тамызда аяқталатын марафон аясында барлық дәрігерлерді қамтыған мобильді топ шалғай аудандарға шығып, тұрғындарды қабылдаған болатын.  Екі ай көлемінде өткен медици-налық іс-шаралар  осы марафонмен түйінделді.   Ясипа   РАБАЕВА, «Орал   өңірі»

«Сары құрлық» додасында байдаркашыларымыздың бағы жана ма?

Күні: , 27 рет оқылды

Тамыздың 18-інде Индонезияда XVIII жазғы Азия ойындары басталғаны белгілі. Дүбірлі бәсекеде ел намысын қорғауға аттанған ұлттық құрама сапындағы 400-ден астам спортшының оны – батысқазақстандық.

Жалпы, Азия ойындарында Ақ Жайық атырабының спортшылары жақсы өнер көрсетіп, ортақ жеңіске өз үлестерін қосып келеді. Мәселен, 2014 жылғы Инчхондағы Азия ойындарында оралдықтар 2 алтын және 1 қола медаль еншіледі. Биыл да сол биіктіктен төмендемесе  екен  дейміз. Индонезиядан Андрей Дергунов, Алексей Ергучев (байдарка мен каноэ есу) сынды спорт-шыларымыздан ел алтын күтеді. Сондай-ақ жерлестеріміз академиялық есуден (Григорий Феклистов, Евгений Тацей), жеңіл атлетикадан (Георгий Шейко), садақ атудан (Алина Ілиясова), көгалдағы хоккейден (Д. Хайрушева, Э. Өтегенова, В. Ляпина) қоржынға жүлде салады деген үміт бар. Спортшыларымыз үшін биылғы жылдың ең басты додасы болып саналатын Азиаданың алғашқы күні қазақстандықтар бір алтын, бір күміс және екі қола медальға қол жеткізгені белгілі. «Алтынды» семсерлесуші Дмитрий Алексанин иеленді. Көптен күткен екінші алтын медаль құраманың қоржынына 23 тамызда түсті. Велоспорттан Алексей Луценко 150 шақырымдық топтық жарыста мәре сызығын бірінші болып кесті. Алексей келесі күні тағы да топ жарды. Бұл жолы ол велоспорттан жекелей сында 40 шақырымдық қашықтықта жеңімпаз атанды. 25-26 тамызда джиу-джиутсудан қос алтын бұйырды. Дархан Нортаев (62 келі) пен Руслан Исраилов (77 келі) Азия чемпиондары атанды. Кеше 6-алтын медаль түсті. Каратэші Гузалия Ғафурова 68 келі салмақта қарсыласының бәрінен басым екенін дәлелдеді. Отандастарымыз жазғы Азия ойындарында да, негізінен, боксшыларға үлкен сенім артатыны анық. Осыдан төрт жыл бұрын,  яғни 2014 жылы Оңтүстік Кореяда өткен Азиадада Қазақстан бокс-шылары 6 алтын, 1 күміс және 1 қола медаль иеленіп, жалпыкомандалық есепте бірінші орын алған болатын. Рингке енді шығып жатқан боксшыларымыз байрақты бәсекенің көркін қыздыра түсері анық. Әзірге бокстан 51 келіде әйелдер арасында сынға түскен Назым Қызайбай, ерлерден 59 келідегі Асланбек Шымбергенов ширек финалға жолдама алып отыр. «Сары құрлық» додасында бүгінгі таңда ел спортшылары 6 алтын, 8 күміс және 28 қола ме-дальмен жалпы есепте 11-орында келе  жатыр. Мәди   ЫҚЫЛАС

Президент жүлдесін сарапқа салды

Күні: , 30 рет оқылды

Жуырда «Ақжайық» ФК стадионында Қазақстан Республикасы Президенті Нұрсұлтан Әбішұлы Назарбаевтың жүлдесі үшін облыстық VI халық спорты ойындарының ашылу салтанаты болып, төрт күн бойы тартысты дода өткен еді.

Еліміз бойынша төрт жылда бір рет өтетін жарыс биыл өңірімізде алтыншы рет ұйымдастырыл- ды. Он екі аудан мен Орал қа-ласының құрама командалары спорттың 13 түрінен сынға түсті. Биылғы доданың бір ерекшелігі ойындар бағдарламасына спорт-тық бағдарлау және Street Workout спорт түрлерінің енуі болды. Жарыстың ашылу салтанатына сап түзеген спортшыларға облыс әкімінің орынбасары Ғабидолла Оспанқұлов  лебізін  білдірді. – Спорт мерекесі – әрқашанда халқымызды, соның ішінде жас-тарымызды бір арнаға біріктіреді әрі денсаулығымыздың кепілі. Соңғы жылдары салауатты өмір салтын ұстануды насихаттау бағытында өңірімізде спорттық шаралар жиі өткізіліп келеді. Еліміздің Тұңғыш Президентінің жүлдесіне арналған  жарыста ең мықты деген команданың жеңіске жетуін тілейміз. Республикалық жарыста облыс намысын қор-ғайтын командаға артылатын жүк те ауыр. Сол додаға қатысатын спортшыларымыздың жеңіспен оралуына тілекшіміз, – деді облыс әкімінің  орынбасары. Жарыстың бас төрешісі Тұрарбек Алтынбекұлының айтуынша, жарысқа қатысушы он үш коман- да құрамында 1400-ге жуық спортшы болды. Ойындар қаладағы 15 спортзал мен стадиондарда тартысты өтті. Ерлер мен әйелдер командаларының волейболы, шағын футбол, қазақ күресі, тоғызқұмалақ, үстел теннисі, жазғы президенттік көпсайыс, асық ату, жағажай волей- болы, воркаут, стритбол, спорттық бағдарлау және гір спортынан сынға түскен спортшылар- дың ойынына 125 төреші қазылық етті. Білекті де жүректі спортшылар өз ауданының намысын қолдан бермеуге тырысты. Мә- селен,  асық атудан І орынды Бөрлі ауданы командасы жеңіп алса, ІІ орынды ақжайық-тықтар иеленіп, үздік үштікті Сырым ауданының спортшылары түйіндеді. Ал воркаут спортынан Орал қаласының спортшылары үздік шығып, І орын иеленді. Өзге жүлделі орындарды Ақжайық пен Бөрлі аудандары өзара бөлісті. Қазақ күресінен бөрлілік палуандар ешкімге дес бермесе, Сырым мен Ақжайықтың спортшылары тұғырдың екінші-үшінші сатысынан көрінді. Жалпы, төрт күндік жарыста 269 ұпаймен Бөрлі ауданының командасы І орынды иеленіп, Елбасы жүлдесін ұтып алды. Енді олар қыркүйек айының 21-25-і аралығында Ақтау қаласында өте-тін республикалық халық спорты ойындарына қатысатын болады. Ал ІІ орынды 261 ұпай жинаған оралдық спортшылар алса, үшінші орын Ақжайық ауданына (223 ұпай) бұйырды.   Ясипа   РАБАЕВА, «Орал   өңірі»

Дружининді еске алған турнир

Күні: , 485 рет оқылды

17-19 тамыз күндері Орал қаласында шахматтан генерал-майор Анатолий Дружининді еске алуға  арналған халықаралық турнир өтті. Биыл алтыншы рет ұйымдастырылған сайысқа Қазақстаннан бөлек ТМД елдерінен келген әр түрлі жастағы 60 шахматшы қатысты. Олар шахматтың жедел және блиц түрлері бойынша сынға түсті.

«Самұрық-Қазына» ӘҚ мен Қазақстанның шахмат федерациясы және академик Шахмардан Есенов атындағы қор  жарысқа 875 000 мың теңге  (блиц турнир 475 000 мың) демеушілік жасады. Шарада облыстық дене шынықтыру және спорт басқармасы бас­шысының орынбасары Жеңіс Нығметуллин,  ҚР ҰҚК БҚО департаменті басшысының орынбаса-ры, полковник Саят Рахымжанов және Анатолийдің ағасы Вячеслав Дружинин сөз алып, Анатолий Михайловичтің аймақта осы спорт түрінің дамуына зор үлес қосқанын атап өтті. Байрақты бәсекеге қос бірдей гроссмейстер – оралдық Мұртас Қажығалиев пен тәжікстандық Фаррух Амонатовтың қатысуын ерекше айтуымыз керек. Жарыс қорытындысында «Рапид» аталымында М. Қажығалиев чемпион атанса, «Блиц» аталы-мында А. Өтеғалиев топ жарды. Есенжол   ЕЛЕКЕНОВ, «Орал   өңірі»

БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика