Қазақстан Республикасы Президентінің Жарлығы

Күні: , 194 рет оқылды

Үзінді

Қазақстан  Республикасының  мемлекеттік  наградаларымен  наградтау  туралы ҚАУЛЫ  ЕТЕМІН:

  1. Мемлекеттік және қоғамдық қызметте cіңірген еңбегі, елдің әлеуметтікэкономикалық және мәдени дамуына, халықтар арасындағы достық пен ынтымақтастықты нығайтуға қосқан елеулі үлесі үшін мыналар наградталсын:

«Парасат»  орденімен

Өтеғұлов Кәрім Тәжімағанбетұлы – «Батыс Қазақстан облыстық тарихи-өлкетану музейі» МКҚК филиалы Ақпәтер тарихи-өлкетану музейінің меңгерушісі

Чудров Яхия Киндашұлы – «Батыс Қазақстан электр желілерін таратушы компаниясы» АҚ директорлар кеңесінің төрағасы, Орал қаласы

«Құрмет»  орденімен

Жақыпов Кәримолла Қабенұлы – «Құрылысгаз» ЖШС директоры, Орал қаласы

Қонысбаева Бибігүл  Тишанқызы – Батыс Қазақстан облысы әкімінің орынбасары

Манкеев Мұхтар Наурызбайұлы – «Финдік Бизнес Хаб» компаниясының директоры,  Батыс  Қазақстан  облысы

Нупов Құндыз Шамахұлы – «КАТЭК» жобалық және инжинирингтік компаниясы»  ЖШС  бас  директоры

Ренато Мароли – «Қарашығанақ петролеум оперейтинг б.в.» компаниясының бас директоры, Батыс Қазақстан облысы Бөрлі ауданы

III дәрежелі  «Еңбек  Даңқы»  орденімен

Булеш Серікқали Қадржанұлы – «Көшім» ЖШС аға табыншысы, Батыс Қазақстан облысының  Жаңақала  ауданы

Ихласов Ермек Төлепұлы – «Аксайгазсервис» АҚ машинисі, Батыс Қазақстан облысының  Бөрлі  ауданы

Өтепбергенов Бисембі Жексенұлы — «Батыс Қазақстан электр желілерін таратушы компаниясы» АҚ электрмонтаждаушы-машинисі, Орал қаласы

«Ерен  еңбегі  үшін»  медалімен

Балтаев Ержан  Талғатұлы –  «Орал» әлеуметтік-кәсіпкерлік корпорациясы» ҰК» АҚ Басқарма төрағасы, Батыс Қазақстан облысының  Орал  қаласы

Горшков Александр Алексеевич – «Мемсараптама» РМК Батыс Қазақстан облысы бойынша филиалының сарапшысы, Орал қаласы

Ғұбайдуллин Бауыржан  Файзоллаұлы – «Батыс Қазақстан облыстық қоғамдық-саяси «Орал өңірі» газетінің бас редакторы,  Орал қаласы

Демеубаев Ерлан Мейрамұлы – «Адал Арна» ЖШС құрылтайшысы, Орал қаласы

Кульдяев Владимир Филиппович – «Кульман» ЖШС директоры, Орал қаласы

Кульпин Михаил Павлович– «Газпромпроект» ЖШС директоры, Орал қаласы

Қожжанов Жұмажан – «Батыс Қазақстан облыстық ерікті мүгедектер қоғамы» ҚБ төрағасы, Орал қаласы

Мусин Тілеген Теміржанұлы – «Муса» ШҚ басшысы,  Батыс Қазақстан облысының Жаңақала  ауданы

Мусина Жансая  Ғалымжанқызы – ақын, Орал қаласы

Өтегенов Еркін Бекмұратұлы – «Ғ. Құрманғалиев атындағы Батыс Қазақстан облыстық филармониясы» МКҚК әншісі, Орал қаласы

Рахметова Гүлзада Жәрдемқызы – Батыс Қазақстан облысы әкімі аппаратының бөлім басшысы

Сабыров Бейбіт Құрметұлы – «Қарашығанақ петролеум оперейтинг б.в.» компаниясының қазақстандық бизнесті дамыту жөніндегі басқарушысы, Батыс Қазақстан облысы

Саратов Данильбек Алиевич – «Вайнах» шешен-ингуш мәдени-ағарту қоғамының  төрағасы, Орал қаласы

Сариева Ұлдай Қабошқызы – «Аруана – Жайық» қоғамдық қорының төрайымы, Орал қаласы

Солодилов Вячеслав Юрьевич – «Яик Орал казактарының одағы» ҚБ төрағасы, Орал қаласы

Халиолла Бауыржан   Ергенұлы – «Батыс Қазақстан облыстық мәдениет және өнер орталығы» МКҚК директоры, Орал қаласы

«Шапағат»  медалімен

Қожақов Біржан Морякұлы – «Демеу» мүгедектерді қолдау қоғамы» қоғамдық бірлестігінің төрағасы, Орал қаласы

«Қазақстанның  еңбек  сіңірген қайраткері»  құрметті  атағымен

Хасанова Жаңылсын Мақсотқызы – «Ғ. Құрманғалиев атындағы Батыс Қазақстан облыстық филармониясы» МКҚК әншісі, Орал қаласы

Қазақстан  Республикасының Құрмет  грамотасымен

Ахметсафина Шаттыгүл Қапиятоллақызы – «Қазталов аудандық орталық ауруханасы» МКК Бостандық ауылдық дәрігерлік амбулаториясының фельдшері,  Батыс  Қазақстан  облысы

Бисенғалиева Жанар Нұрболатқызы – «Тасқала аудандық мәдени-демалыс орталығы» МКҚК  директоры,  Тасқала  ауданы

Витман Виктор Александрович – «Ғ. Құрманғалиев атындағы Батыс Қазақстан облыстық филармониясы» МКҚК артисі, Орал қаласы

Джумахметов Руслан Болатұлы – «А. Островский атындағы драма театры» МКҚК  артисі, Орал  қаласы

Попов Максим  Михайлович – М. Өтемісов атындағы Батыс Қазақстан мемлекеттік  университетінің  доценті,  Орал  қаласы

Санкаева Мирует Болатқызы – «Бәйтерек» Батыс Қазақстан облыстық қоғамдық бірлестігінің басқару төрайымы, Орал қаласы

Сұлтанов Серік Уәлиұлы – Батыс Қазақстан облысы әкімі аппаратының бас инспекторы, Орал қаласы

Төреғалиева Тұрсын Елтайқызы – «Жалпы білім беретін Абай орта мектеп-балабақша кешені» КММ директоры,  Батыс Қазақстан  облысының  Сырым  ауданы

Шәріпқалиев    Қуаныш    Нұрхатұлы – «Аққу» жеке кәсіпкерлік жетекшісі, Батыс Қазақстан облысының Бөкей ордасы ауданы

Шүйіншәлиева Мира Хамзақызы – Орал қалалық қоғамдық-саяси «Жайық үні»  газетінің  директор-редакторы.

  1. Осы Жарлық қол қойылған күнінен бастап қолданысқа енгізіледі.

Қазақстан   Республикасының  Президенті   Н. Ә. НАЗАРБАЕВ

Астана, Ақорда, 2017 жылғы  5  желтоқсан  №594


Тәуелсіздіктің тегеурінді жемісі

Күні: , 76 рет оқылды

Жуырда М. Өтемісов атындағы БҚМУ-да «Қазақстан Республикасының Тәуелсіздігі – халықтың рухани жаңғыруының қайнар көзі» атты өңірлік ғылыми-тәжірибелік конференция өтті. Оған ғалымдар мен студенттер қатысты.


Алқалы басқосуды БҚМУ-дың жанындағы «Рухани жаңғыру» институтының директоры, тарих ғылымдарының докторы, доцент Әсет Тасмағамбетов ашты. Ол биыл ел Тәуелсіздігінің 26 жылдығы аталып өтетіндігін айта келіп, оның мән-маңызына кеңінен тоқталды. Әрі қарай сөз кезегі осы жоғары оқу орнының ғылыми жұмыстар мен халықаралық байланыстар жөніндегі проректоры Олег Юрьевке берілді. Облыс әкімі аппараты жанындағы «Қоғамдық келісім» коммуналдық мемлекеттік мекемесі басшысының орынбасары Жамал Ихсанова да мерекемен құттықтап, университеттің ғалымдарын, педагогика ғылымдарының докторы Владимир Саловты, тарих, экономика және құқық факультетінің деканы Галина Нестеренконы, әлемдік тарих және әлеуметтік-саяси пәндер кафедрасының меңгерушісі Алтынай Жорасованы БҚО Қазақстан халқы ассамблеясының секретариаты атынан алғысхаттармен марапаттады.

Конференцияда облыс орталығындағы жоғары оқу орындарының ғалымдарының, этномәдени бірлестік жетекшілерінің баяндамалары тыңдалды. Шараны М. Өтемісов атындағы БҚМУ-дың ректоры, педагогика ғылымдарының докторы, академик Асхат Иманғалиев қорытындылады.

 

Сергей ПОГОДИН,

БҚО Орыс мәдени орталығының төрағасы:

– Мен үшін 16 желтоқсан ерекше күн. Өйткені, Алматы қаласындағы 1986 жылғы 17-18 желтоқсан күндері жастар шеруіне мен де қосылдым. Сондағы ахуалды көзім көрді, жаным сезінді. Біз іштей жастардың жағында болдық. Өкініштісі сол, жас ұрпақ бұлқынысының қайғы-қасіретпен аяқталғаны белгілі. Соған қарамастан 16 желтоқсан өзім үшін тек қайғы ғана емес, қаһарман жастар үшін мақтаныштың да күні. Сондықтан аталған күн – мен және достарым үшін басты мереке. Ол – біздің ортақ тағдырымыздың бір парағы. Бұл күнді бәріміз де жадымызда ұстауымыз керек.

 

Жаңабек ЖАҚСЫҒАЛИЕВ,

М. Өтемісов атындағы БҚМУ-дың доценті, тарих ғылымдарының кандидаты:

1991 жылы ел халқының 40 пайызын құраған қазақтың биыл 71 пайызға жетуі – Тәуелсіздіктің тегеурінді жемісі. Алайда бөрікті аспанға атып, қуануға әлі ерте. Өйткені мемлекет құраушы қазақ ұлты сонау отаршылдық заманнан қалған алауыздық, жалтақтық, сатқындық сынды кесір қылықтардан толық арылып болған жоқ. Ондай жат мінезден толық құтылу үшін қазақтың кемінде екі, қалаберді үш ұрпағы ауысуы қажет. Сондықтан қазақ даласында отаршылдық кезеңде өткен үш жүздей ұлт-азаттық көтерілісі жеңілгесін, біздің өткен ғасырдағы Алаш зиялылары тек елді ағарту жолында ұстады. Олар Әлихан Бөкейханов, Жаһанша мен Халел Досмұхамедовтер және басқалары сонымен бірге орайы келгенде, саяси күрестен де тартынбады. Мәселен, солардың бірі – Әлімхан Ермеков Мәскеуде билік басындағылармен саяси тартысқа түсіп, жат қолында кеткен туған жердің басым бөлігін қайтаруға ұйытқы болды. Өткен ғасырдың жиырмасыншы жылдарында ол бар болғаны 29 жаста еді. Міне, Тәуелсіздік күні сондай аяулы азаматтарды еске түсірген жөн.

 

Бақтылы БОРАНБАЕВА,

БҚИТУ-дың доценті,

тарих ғылымдарының кандидаты:

– Қазақтың тарихы сан мыңдаған жылға созылып жатыр. Сақ дәуірінен бері ата-бабамыз азаттық үшін аянбай күрескен. Алайда қалмақпен болған 150 жылдық жанталас және онан кейінгі отаршылдық кезең қазақты есеңгіретіп кетті. Оның зардабы әлі де сезіледі. Қазақ ұлты енді ғана өзінің ұлттық бейнесін анықтауға кірісті. Қазір Қазақстанның әлемдегі беделі зор. Ендігі мақсат – Тәуелсіздікті нығайтып, оны баянды ету жолында барлық күшімізді аямауымыз қажет.

Серік ІЗБАСАРҰЛЫ,

«Орал өңірі»


Ардагерлермен ой бөлісу

Күні: , 139 рет оқылды

Облыс әкімі Алтай Көлгінов облыстық ардагерлер кеңесінің төрағасы Мырзағали Мұхамбетов, 80 жасқа толған еңбек ардагерлері Нұрлан Ізтілеуов және Сағи Алдыбергеновтермен кездесті.


Ардагерлерді қоғамдық өмірге араластыра отырып, ұрпақ сабақтастығын жалғастыру – негізгі мақсат. Осы тұрғыда биыл бірқатар жұмыстар атқарылды. Атап айтар бол-сақ, облыстық «Ардагерлерді ардақтайық!» жобасы аясында «Үлкенге құрмет, кішіге ізет», «Жүз нақты көмек» сияқты тағы да басқа шара жүзеге асты. Оған жергілікті атқарушы құрылым, бизнес өкілдері, әлеуметтік қызметкерлер және студент жастар белсенді қатысқан болатын. Биыл ҚР Ардагерлер қозғалысының 30 жылдық мерейтойы өңірімізде де кеңінен аталып өтті.

Кездесуде облыс әкімі еңбек ардагерлерімен атқарылған жұмыстарға тоқталып, алдағы жылы бірлесе жүзеге асыратын жобалар бойынша кеңесті. Сонымен қатар А. Көлгінов еңбек ардагерлерін мерейлі жастарымен құттықтап, өңіріміздің экономикалық өрлеуіне қосқан еңбектері үшін алғыс білдірді.

– Сіздерді еліміздің Тәуелсіздік күні қарсаңында 80 жас мерейтойларыңызбен шын жүректен құттықтаймын! Азаттығымыздың алғашқы жылдарында аянбай еңбек етіп, жас ұрпаққа үлгі болдыңыздар. Бейбіт еліміздің тұрақты дамуының арқасында бүгінде бейнетті жылдарыңыздың зейнетін көріп отырсыздар. Отбасыларыңызға амандық тілеймін! – деді облыс әкімі.

Ардагерлер мемлекеттің тарапынан атқарылып жатқан жұмыстарға ризашылығын білдіріп, нақты қолдауларға алғыс білдірді. Сондай-ақ облыста ауыл шаруашылығы саласында жүзеге асырылып жатқан жұмыстарды, қала мектептері мен ауылдағы білім ошақтарының арасындағы айырмашылықтарды жою туралы бастамаларды қолдап, өңір дамуына оң бағаларын берді.

Облыс әкімінің баспасөз қызметі


Пилоттық жоба қажет

Күні: , 80 рет оқылды

«Нұр Отан» партиясы облыстық филиалында мемлекеттік бағдарламаларды іске асыру жөніндегі жергілікті атқарушы органдар басшыларының қатысуымен өңірлік деңгейдегі партиялық тыңдау өтті.


Тыңдалымды «Нұр Отан» партиясы облыстық филиалы төрағасының орынбасары Гүлназ Құлжанова жүргізді. Басқосуда Қазақстан Республикасының агроөнеркәсіптік кешенін дамытудың 2017-2021 жылдарға арналған мемлекеттік бағдарламасы аясында облыста атқарылып жатқан жұмыстар туралы мәселе қаралды. Алдымен облыстық ауыл шаруашылығы басқармасы басшысының орынбасары Сатқан Өмірзақов агроөнеркәсіп кешенін дамытудың мемлекеттік бағдарламасын іске асыру барысы туралы баян етті.

Ағымдағы жылы ауыл шаруашылығы саласын қолдауға басқармаға бюджеттен 8 млрд. 819,6 млн. теңге бөлінген болса, бұл өткен жылғы деңгейден 11 пайызға артық. Баяндамашы айтып өткендей қазір облысымызда ауыл шаруашылығы саласында алты мыңнан астам ауыл шаруашылығы құрылымы бар. Өсімдік шаруашылығы бойынша алынған өнім мөлшерін атап өткен Сатқан Ержанұлы дәнді дақылдар алқабынан алынған астықтың орташа өнімділігі гектарына 14,7 центнерді құрайды деді. Бірінші қарашадағы мал өнімдерінің өндірілуін өткен жылдың сәйкесті кезеңімен салыстырғанда артқаны байқалады. «Сыбаға» бағдарламасы бойынша 53 шаруашылық 784,3 млн. теңге несие алған болса, «Құлан» бағдарламасымен 18 шаруашылық 503,4 млн. теңге несие рәсімдеген. Ал жеті шаруашылық «Алтын сақа» бағдарламасы бойынша 55,1 млн. теңге несие алып отыр. Облыста ірі қара мал етінің экспорттық әлеуетін арттыру бағдарламасының орындалуы 73,7 пайызды құрап отыр. Биылдан бастап қолға алынған «Нәтижелі жұмыспен қамтуды жә-не жаппай кәсіпкерлікті дамытудың 2017-2021 жылдарға арналған салалық бағдарламасы» аясында республикалық бюджеттен 1 млрд. 474,0 млн. теңге қаражат бөлінген. Күні бүгін бұл қаржының 1 млрд. 437, 7 млн. теңгесі игерілген. Осының нәтижесінде облыста 290 жаңа жұмыс орны ашылып отыр. Сатқан Ержанұлы өз сөзінде қайта өңдеу өндірісінің көлемін арттыру мақсатындағы инвестициялық жобаларға да тоқталды.

Ал облыстағы суармалы жерлер жөнінде баяндаған облыстық табиғи ресурстар және табиғатты пайдалануды реттеу басқармасы басшысының орынбасары Махамбет Ықсанғали лиманды суару жүйелеріне тоқталды. Мәселен, өткен жылы басталған суару аумағы 2354 га құрайтын Сырым ауданындағы «Өлеңті лиманды суару жүйесін жаңғырту» жобасының құрылыс-монтаж жұмысы аяқталуда. Ал 1980 га жерді лиманды суаруға мүмкіндік беретін Жәнібек ауданы Ақоба ауылдық округі Ащыөзек өзенінің бойындағы Әбділман және Соркөл лиманды суару жүйелерін қалпына келтіру жұмыстары жүргізілуде. «Қазіргі таңда коммуналдық меншіктегі су қоймалары ауылдық округ әкімі аппараты теңгеріміне тапсырылған. Ал ауыл әкімі аппараттарында су объектілерін пайдалану үшін білікті мамандар мен арнаулы техниканың болмауы қиындық тудырады. Осы ретте, облысымыздағы коммуналдық меншіктегі 28 су шаруашылығы нысанын, атап айтқанда 5 су қоймасы, 3 суландыру каналы мен 20 лиманды суару учаскелерін республикалық меншікке беру жұмыстары жүргізілуде», – деді Махамбет Ықсанғали. Облысымызда 162 мың га көлтабандық (лиман) және 51 мың га тұрақты суармалы жер есепте бар. Ел Үкіметі тасқын суларды сақтау, жинақтау және тарату бойынша шалғайдағы жайылымдарда мал суаратын суландыру құрылғыларын (құдықтарды) қалпына келтіру және жайластыру бойынша жоспар бекіткен болатын. Осы жоспарға сәйкес облысымызда 2017-2021 жылдар аралығында еріген қар және тасқын суды жинақтау үшін 22 су айдыны бойынша құрылыс жұмыстары және қалпына келтіру жұмыстары, сондайақ 2017-2019 жылдар аралығында шалғайдағы жайылымдарда мал суаратын 99 суландыру құрылғыларын жайластыру көзделген.

Баяндамашыларға сұрақтар қойылып, тұшымды жауаптар алынды. Облыстық мәслихат депутаты, «Нұр Отан» партиясы облыстық филиалының сайлауалды бағдарламасының “Аграрлық сектор” бойынша партиялық кураторы Нұрлан Серғалиев өз ойын ортаға салды. Облыста мал басын көбейтумен қатар, ірі қара мен ұсақ малдың алаңсыз жайылатын жайылымының болуын да назарда ұстау қажет екенін баса айтты. Сонымен қатар мемлекеттік-жеке меншік әріптестік бойынша ауыл шаруашылығы саласында пилоттық жобаны қолға алу, суармалы жерлерді, су қоймаларын жандандыру бойынша ұсынба айтылды. Партиялық тыңдауға «Нұр Отан» партиясы облыстық филиалының Саяси кеңесі және Саяси кеңесі бюросының мүшелері, облыстық мәслихат депутаттары, облыстық мемлекеттік атқарушы органдар басшылары, облыстық филиал қызметкерлері қатысты.

Ясипа РАБАЕВА,

 «Орал өңірі»


Елдіктің еңсесін тіктеген елордаға – 20 жыл

Күні: , 83 рет оқылды

Елбасы бас қаланың іргесін қалауға атсалысқан азаматтармен кездесті.


Мемлекет басшысы Нұрсұлтан Назарбаев елорданың Астана қаласына көшуінің 20 жылдығына арналған салтанатты іс-шаралар-ға қатысты, – деп хабарлады Президенттің баспасөз қызметі.

Қазақстан Президенті Астананың іргесін қалауға алғашқы болып атсалысқан азаматтармен кездесті. Мемлекет басшысы ЭКСПО конгресс-орталығы ғимаратында елорданың Астана қаласына көшуінің 20 жылдығына арналған «Президент және Астана» атты фотокөрмені аралап көрді. Елбасы фотокөрме жұмысымен танысқан соң, осы мерекеге арналған отандық және шетелдік эстрада жұлдыздарының салтанатты концертін көруге барды.

«Егемен Қазақстан»,

№238,

11 желтоқсан, 2017 жыл

* * *

Жексенбі күні шаһардағы Абай алаңында Астана қаласының 20 жылдығына арналған мерекелік шара өтті.

Мерекелік басқосуда облыс әкімі Алтай Көлгінов әлемнің әдемі қалаларының қатарына енген Астананың Алматыдан Ақмолаға көшірілу тарихы мен қазіргі дамуы туралы айтты.

– Осыдан 26 жыл бұрын еліміз тәуелсіздікке қол жеткізсе, 20 жыл бұрын Елбасы Нұрсұлтан Әбішұлының Жарлығымен Астананы Алматыдан Ақмолаға көшіру туралы тарихи шешім қабылданды. Астана – әлемнің әдемі қалаларымен терезесі тең қала. Бұл жерде саяси маңызы бар шешімдер қабылдануда. Сол кезде Ақмолада 250 мыңдай адам тұрса, қазір ол төрт еседен астам өсті. Елордаға қарап Қазақстанның басқа қалалары бой түзеуде. Астана қаласында мыңдаған жас білім алуда, еңбек етуде. Онда жастардың білімді де білікті ұрпақ болып өсуіне барлық жағдай жасалған. Бұл – тәуелсіз еліміздің тұрақтылығының жетістігі деп білемін. Батыс Қазақстан облысында да тұрғындардың игілігі үшін білім, мәдениет, денсаулық, спорт нысандары бой көтеруде. Еліміз дамып, көркейіп келеді. Айтулы мереке құтты болсын! Астанамыз жайнап, өркендей берсін! – деді облыс басшысы Алтай Көлгінов.

Содан соң өңір өнерпаздары Астананың 20 жылдығына арнаған өнерлерін ортаға салды.

«Әуен», «Әдемі» тобының өрендері әуелете ән шырқаса, «Батыс» тобы «Ұлы дала биімен» көрермендерді тәнті етті. Жастардың «Астана – 20» атауымен қойған флешмобы да әсерлі сахналанды.

Гүлсезім БИЯШЕВА,

«Орал өңірі»


«Атамекеніміздің алдындағы перзенттік парызымызды өтейтін уақыт жетті»

Күні: , 135 рет оқылды

Кеше Назарбаев зияткерлік мектебінде «Туған өлке – тірегім» форумы аясында ашық пікірталас алаңы шарасы өтті. ТЕDTalks форматында болған шараға облыс әкімі Алтай Көлгінов, біздің танымал жерлестеріміз Парламент Сенатының депутаты Бірғаным Әйтімова, альпинист Мақсот Жұмаев, өнер қайраткері, әзілсықақшы Тұрсынбек Қабатов, «Қазақстан – 2050» қозғалысының жетекшісі, кәсіпкер Мұхтар Манкеев, «Қазақстанның 100 жаңа есімі» жобасына енген өнерпаз Саида Қалықова қатысты. Сондай-ақ бұл жиынға саясаткер, сарапшы Саясат Нұрбек, Нұрлан Өтешев те арнайы келді.


Шараны ашқан облыс әкімі шақыруды қабыл алып, Ақ Жайыққа келген жерлестерімізге, қонақтарға ризашылығын білдіріп, Елбасымыз «Болашаққа бағдар: рухани жаңғыру» бағдарламасында білімнің салтанат құруына ерекше тоқталғанын жеткізді. Сол себепті бұл пікірталас алаңы Назарбаев зияткерлік мектебінде өткізіліп отыр.

– Білімнің салтанат құруы үшін мектептер заман талабына сай, олардың материалдық-техникалық базасы мықты, педагог кадрлардың біліктілік деңгейі жоғары болуы керек. Бұл бағытта облысымызда тиісті іс-шаралар жүріп жатыр.

Тек биылдың өзінде 24 білім мекемесі салынып, пайдалануға берілуде. Ғимарат тұрғызғаннан кейін онда сапалы білім берілуі тиіс қой. Ол да жоспарға сай атқарылуда. Мен өзім осы Назарбаев мектебінің қамқоршылық кеңесі-нің мүшесі болып табыламын. Сол себепті оқу жылы ішінде бұл мектепке қана емес, өңірдегі басқа да білім ұяларына барып, түрлі шараларға қатысуға тырысамын. Шынымды айтсам, мұндай кездесулер өте қызықты өтеді. Оқушылардың білім дәрежесінің жоғары екенін байқаймын. Таяуда ешкімге айтпастан дарынды балаларға арналған мамандандырылған С. Сейфуллин атындағы №11 облыстық қазақ мектепинтернат кешеніне бардым. Алдын ала айтсаң, мектеп әкімшілігі дайындалып, оқушыларға «мынадай сұрақ қой, былай істе» деп, біраз әуре-сарсаңға түсері анық. Сөйтіп «Рухани жаңғыру» аясында оқушылармен кездесіп, үш тілде ашық, емен-жарқын жүздестік, маған өте ұнады. Жалпы батысқазақстандықтар жоғары оқу сапасымен ерекшеленеді. Осынау жетістік бірінші кезекте біздің педагогтарымыздың еңбегі. Біз осы деңгейден төмен түспеуіміз қажет.

Мен бүгінгі шараға өзімнің оқитын кітаптарымды да алып келдім. Кітап оқуға уақыт жоқ деген сөз – өтірік. Ниет болса, уақыт табылады. Әрине, бірінші кезекте жұмыс қой. Әркімнің атқарар өз міндеті бар. Дегенмен кітап оқуға уақыт табуға болады. Шетелге бара жатқан достарым кейде не әкелейін деп сұрағанда кітап қосып жіберемін. Әкелгеннен соң қызыға оқимын. Мен көбіне іссапарға шыққанда жолда, әуежайларда кітапқа бас қоямын, – деген Алтай Сейдірұлы өзі тұрақты оқитын кітаптарын көрмеге қойып, әрқайсысына бөлек-бөлек шолу жасап таныстырып шықты. Олардың ішінде Абайдың, Елбасымыздың және шетелдік ойшылдардың, саясаткерлердің, экономистердің еңбектері бар.

Содан кейін сөз алған ҚР Парламент Сенатының депутаты Бірғаным Әйтімова Елбасының «Болашаққа бағдар: рухани жаңғыру» бағдарламалық мақаласын алғаш оқып шыққанда үлкен әсер алғанын жеткізді. Сол кезде бұрын Білім министрі болып жүргенінде жағдайы бар азаматтарға мешітпен бірге мектеп те салуға көңіл бөлейікші деп өтініш жасаған кездерінің есіне түскенін де баяндады. Ол кездерде туған жеріне, туған өлкесіне бір жақсылық жасаса, мұны жерлестік, рушылдық деп қабылдап, сыпсың сөздердің болғаны да жасырын емес. Мемлекет басшысының бұл бағдарламалық мақаласы осындай келеңсіздіктердің тамырына балта шабары хақ. Яғни бұған дейін Президентіміз қазақстандықтардың еңбек етіп, ақша тауып, дәулетін арттыруына мүмкіндік берсе, енді осы жинаған қаржысының бір бөлігін туған жердің, атамекеннің алдындағы азаматтық парызын өтеуге жол ашып беріп отыр. Сондықтан кеше сабақ беріп, біздің осындай жағдайға жетуімізге себепші болған, қазір ауылдағы зейнеткердің біріне айналған мұғаліміміздің үйінің шатырын жөндесек, не көп жыл көрші болып, жақсылығын аямаған көрші-көлемге су не газ тартып берсек, болмаса ауылымызға жол, көпір салуға немесе мектепке, балабақшаға заманауи сыныптар ашуға көмек көрсетсек, нұр үстіне нұр емес пе?! Туған жерге деген махаббатты құр сөзбен емес, нақты іспен көрсететін уақыт жетті!

– Жаңа мен облыс әкімінің үш тілде мүдірмей сөйлеген сөзін тыңдап, шетелден алған жоғары білім деңгейін, заманауи ой-өрісін, креативтілігін көріп жан дүниемді мақтаныш сезімі кернеді. Ал кітаптарының тұрсаукері тіптен тамаша болды. Міне, осындай оқыған-тоқығаны мол іскер жастың туған өңіріме басшылық жасауы мен үшін үлкен қуаныш, – деді Бірғаным Сарықызы.

Пікірталас барысында көпшілік демін ішіне ала тыңдаған спикерлердің бірі – Саясат Нұрбек болды. Ол «Рухани жаңғыру» бағдарламасындағы бәсекеге қабілеттілік, білім турасында әңгіме өрбітті. Оның айтуынша, қазақ халқының рухани жаңғыруының тарихы тереңде. Кәрі тарих қойнауында қаншама соғыс, қырғын, түрлі оқиғалар болды, қаншама ұлт жойылып кетті. Ал қазақ соның бәрінен аман шықты. Бұл геосаяси, геоэкономикалық өзгерістерге дайын болып, қиыннан қиыстырып жол тауып, бүгінге дейін жетуіміздің бір көрінісі.

– Қазір әлем қатты өзгерді. Дүниежүзінде үш топқа бөлінетін мемлекеттер қалды. Бірінші топқа үлкен технологиялық толқындар әкелетін, яғни технологиялық өзгерістер жасайтын елдер жатады. Оған АҚШ, Қытай, Ұлыбритания сынды мемлекеттерді кіргізуге болады. Екінші топқа енетіндер бұл – технологиялық өзгерістер шыққаннан соң оларды жедел әрі тиімді пайдаланып, өздері пайда көретін мемлекеттер. Мәселен, бұл санатқа Оңтүстік Корея сынды елдер кіреді. Бұл елдің интеллектуалды әлеуеті жоғары. Сол себепті технологиялық өзгеріске қарап түрлі жерде өз нарықтарын қалыптастырады. Бүгінде Оңтүстік Кореяның ІЖӨ көлемі 1,7 трлн. доллар. Ал үлкен держава, жер көлемі үлкен, халық саны көп, инфрақұрылымы дамыған, табиғи қазба байлығы мол Ресейдің ІЖӨ 1,5 трлн. доллар. Яғни шағын ғана Оңтүстік Корея Ресейден бірнеше есе көп өнім өндіріп, жұмыс ұсынып отыр. Технологиялық не интеллектуалды әлеуеті төмен елдер үшінші топтың еншісінде. Олар желкенсіз қайық секілді. Қай жақтан толқын соқса, сол жаққа қарай тербеліп кете береді. Бұл мемлекеттер технологиялық өзгерістерге амалсыз көндігеді. Басқа жол жоқ. Сол себепті Елбасы 2010 жылдан бастап республикамызда интеллектуалды технологиялық үрдісті дамыту туралы айтып келе жатыр.

Бүгінгі таңда бұл мәселенің өзектілігі тіптен артты, – деген Саясат Нұрбек мемлекетіміздің бұл бағытта көштен қалмауы үшін қазақстандықтардың заман талабына сай жаңғыруы қажеттілігін атап өтті.

Ортаға шыққанда көпшілік қошеметпен қарсы алған танымал жерлесіміз Тұрсынбек Қабатов рухани жаңғыруды стереотипті жою ретінде қабылдайтынын айтты. Ұлтымыздың бойындағы кешігу, өзгені кекету, еріншектік, артық сөйлеу сынды рухани дерттерді емдеу үшін жасалған шара.

– Қазір бізде мындай бір стереотип бар. Кім Елбасын, ел тізгінін ұстаған азаматтарды жамандаса, Үкіметті сынаса, әкімге қарсы шықса, сол батыр. Ал мақтасаң «ой, бұл жағымпаз» деп шыға келеді. Біз осындай қылықтардан арылуымыз керек, – деді Тұрсынбек Қабатов. – Бұрын түрлі бағдарламалар шыққанда қасында міндетті түрде орысша аудармасы болатын еді. Мұнда жоқ. Ол орысша да «Рухани жаңғыру». Таяуда бір орыс отандасымыздан Елбасымыздың осы бағдарламалық мақаласының аудармасын сұрасам, ол «разноцветный беркут» деп жауап берді. Мейлің жыла, мейлің күл… Бүгін өзімнің туған өлкеме, мынадай әдемі мектепке, тамаша шараға келіп, қуанып отырмын. Сахнада, қабырғалардағы безендірулерде бірде-бір орыс сөзі жоқ. Мұның өзі рухани жаңғыру!»

Шара барысында сондай-ақ даңқты жерлесіміз, альпинист Мақсот Жұмаев, Мұхтар Манкеев, Нұрлан Өтешев те аталмыш бағдарлама турасында өз ойларын айтып, соның аясында атқарып жатқан іс-шаралары жөнінде пікір өрбітті.

* * *

Қадыр Мырза Әли атындағы мәдениет және өнер орталығында және Оқушылар сарайында «Туған өлкем – тірегім» форумы аясында оқыту семинарлары өтті. Республикалық жобалық офистен арнайы келген бас менеджерлер Бауыржан Ерешов, Екатерина Шугрева, Нұрлан Өтешов «Рухани жаңғыру» бағдарламасының маңыздылығы жөнінде насихат жұмыстарын жүргізді.

Оқыту семинарларына аудан, қаладан білім, мәдениет, спортқа жауапты мамандарға қоса, осы саланың жетекші мамандары барлығы 150-ге жуық адам қатысты. «Рухани жаңғыру» бағдарламасының төрт құрамдас бөлігінің бірі «Рухани қазына» бағдарламасы туған өлкенің салт-дәстүрлеріне, тарих пен мәдениетіне құрмет тұтып, қызығушылық туғызу мақсатында жасалғандығы жөнінде сөз қозғаған Екатерина Шугрева ауылдардағы кітапхананы модернизациялаудың жастар үшін тиімді екендігін ерекше атап өтті. «Болашақ» корпоратив қорының директоры, облыстық мәслихаттың депутаты Салтанат Тұманбаева кәсіби қабілеттілікті арттыру, жас мамандарды дайындау бойынша бұған дейін 7 семинар өткендігін тілге тиек етті.

– «Рухани жаңғыру» бағдарламасының өзі «Тәрбие және білім», «Атамекен», «Рухани қазына», «Ақпарат толқыны» деп аталатын төрт құрамдас бөліктен тұрады. Ұйымдастырып жатқан оқыту семинарларында аталған бағдарламалардың маңыздылығы, негізгі индикаторлары жөнінде кеңінен мәлімет берілуде. Біз өңіріміздегі қызметкерлерді өзге қалаларға жібергеннен гөрі, Астана, Алматы қалаларынан мамандар шақырып, жергілікті қызметкерлерді оқытып алғанды жөн санаймыз, – дейді Салтанат Асқарқызы.

* * *

Кеше Орал қаласындағы салтанат сарайында «Жомарт жүрек – 2017» меценаттар форумы өтті. Форум басталмас бұрын Елбасының «Болашаққа бағдар: рухани жаңғыру» бағдарламалық мақаласындағы «Туған жер» бағдарламасы ауқымында келесі жылы облыста жүзеге асатын жобалар көрмесі болды. Орал қаласы мен аудан әкімдері форумға қатысушыларды жобалар барысымен таныстырды. Біздің аймақта 1230-ға жуық меценат бар. Олар биылғы жыл ішінде 851 қайырымдылық шарасына қолдау көрсеткен. Соның нәтижесінде 12 200-ден астам адамға 136 млн. теңге көлемінде қайырымдылық көмегі жасалған.

– «Туған жер» бағдарламасы ауқымында 600-ден астам жоба ұсынылды. Көрмеге соның 260-тан астамын іріктедік. Жыл соңына дейін ұсынылатын жобалар саны көбейеді деп күтілуде. «Рухани жаңғыру» аясында еліміз бойынша «Жомарт жүрек – 2017» меценттар форумы Орал қаласында алғаш ұйымдастырылуда. Туған жерін абаттандыруға кез келген азамат үлес қоса алады. Олардың қаражаты «Ақжайық» қорына жиналады, – деді көрме кезінде облыстық «Рухани жаңғыру» жобалық кеңсесінің жетекшісі Салтанат Тұманбаева.

Облыс әкімі Алтай Көлгінов форумға қатысушылармен бірге көрмеде ұсынылған жобалармен танысты. Мысалы, 2018 жылы Зеленов ауданының Январцев ауылында жеке кәсіпкер В. Середаның демеушілігімен 7 млн. теңгеге спорт алаңы салынбақ. Бөкей ордасы ауданында өлкетану бағытында энциклопедия жарық көрмек. Тасқаланың Ақтау ауылындағы мектеп түлектері 1,5 млн. теңгеге күрес залын ашуға бекінген. Жаңақала ауданындағы Мәстексай ауылы жанынан ағатын Қараөзен бойындағы түбекке салынатын саябақты «Нұртем» ЖШС қаржыландырмақ. «Караванный путь» ЖШС директоры Замир Ықсанов Орал қаласында 565 млн. теңгеге жүзу бассейнінің құрылысын қолға алуды жоспарлаған.

Көрмеден кейін «Жомарт жүрек – 2017» меценаттар форумы басталды. Форумға арнайы келген меймандар арасында ҚР Парламенті Сенатының әлеуметтік-мәдени даму және ғылым комитетінің төрайымы Бірғаным Әйтімова, Сенат депутаты Нариман Төреғалиев, әлемге танымал скрипкашы Марат Бисенғалиев, «100 жаңа тұлға» жобасына есімдері енген пианист Саида Қалықова, ҚазИИТУ ғылыми-білім кешенінің құрылтайшысы Ақсерік Әйтімов, Зеленов аудандық ауруханасының медбикесі Елена Шушлебина болды.

– Мемлекет басшысы «Болашаққа бағдар: рухани жаңғыру» мақаласында «Туған жер» бағдарламасы жалпы ұлттық патрио-тизмнің нағыз өзегіне айналады» деп айшықтап берді. Әрбір Қа-зақстан азаматы үшін туған жерінің көсегесін көгертуге атсалысу – парыз. Халқымызда «Жақсының жақсылығын айт, нұры тасысын» деген сөз бар. Осы игі істі асыруда бүгінде батысқазақстан-дықтар да шет қалмады. Рухани жаңғыру аясында биыл облыста 2,5 млрд. теңгеге 62 жоба жүзеге асты. Оның ішінде, жетеуі – білім, біреуі – денсаулық сақтау, оны – инфрақұрылым нысандарын, тоғыз жоба спорт саласын дамытуға бағытталды. Яғни, екі мәдениет үйі жөнделсе, 16 шағын сәулеттік нысан мен ескерткіш орнатылды. 13 қайырымдылық шарасы ұйымдастырылды, – деді форумда облыс әкімі Алтай Көлгінов. Облыс әкімі қоғам алдындағы әлеуметтік жауапкершілігін сезіне түскен бизнес-қауымдастық өкілдері мемлекеттің дамуына өз үлестерін қосуда екенін айтты. Мысалы, облыс орталығында жеке кәсіпкер Александр Аитов 178 млн. теңгеге спорт кешенін тұрғызды. Қазталовта «Дархан» ШҚ-ның жетекшісі Нұрлыбай Жолдыбаев фельдшерлік амбулаторияның жаңаруына көмектесіп, қажетті құрылғылармен жабдықтады. Тәуелсіздік күні қарсаңында кәсіпкер Мұратбек Мұхамбедиевтің демеушілігімен «Рухани жаңғыру» музейі ашылады деп жоспарлануда. «Samruk-Kazyna Trust» қоры да әлеуметтік жобаларды жүзеге асыруға мұрындық болуда.

«Рухани жаңғыру» аясында туған жерге деген сүйіспеншілігін нақты істермен дәлелдеуге құштар азаматтар көбеюде. Жомарт жерлестеріміз биыл 1,6 млрд. теңгені «Ақжайық» қорына аударған. Келесі жылы осы қаражатқа біраз жоба жүзеге аспақ. Форумда ҚР Парламенті Сенатының әлеуметтік-мәдени даму және ғылым комитетінің төрайымы Бірғаным Әйтімова өңірдің дамуына үлес қосуды мақсат еткен меценаттар көбейе түсетініне сенім білдірді.

Айта кетейік, «Туған жер» бағдарламасы бойынша облыста үш ірі нысан бой көтереді. Облыс әкімінің орынбасары Ғабидолла Оспанқұлов пен Орал қаласының әкімі Мұрат Мұқаев осы жобалар барысымен таныстырды. Келесі жылы Орал қаласының маңындағы «Жайық қалашығын» ашық аспан музейіне айналдыру жоспарлануда. Оның кіреберісінде салтанатты ғимарат салынады. Қаланың мәдениет және демалыс саябағында «Қазақстанның киелі жерлерінің картасы» кешені ашылмақ. Яғни, Шаған өзені бойында Астана қаласындағы «Атамекен» Қазақстанның картасы» этно-мемориалдық кешені үлгісінде ауқымды жұмыс жүргізіледі. Онда еліміздегі киелі нысандардың үлгілері орналастырылады. Сонымен қатар шаһарда заманауи үлгіде мүгедек балаларды оңалтуға арналған облыстық орталық салынбақ.

Форумда бір топ меценат «Жомарт жүрек – 2017» аталымымен және облыс әкімінің алғысхатымен марапатталды. Олардың арасында ірі кәсіпорындар мен құрылыс комбинаттарының басшылары, жеке кәсіпкерлер мен жергілікті мәслихат депутаттары бар. ҚР альпинистер құрамасының капитаны, әлем бойынша биіктігі сегіз мың метрден асатын 14 таудың шыңын бағындырған жерлесіміз Мақсұт Жұмаев «Батыс Қазақстан облысының құрметті азаматы» атағын иеленді.

Сәкен ӘБІЛХАЛЫҚОВ,

Гүлжамал ЖОЛДЫҒАЛИ,

Нұртай ТЕКЕБАЕВ,

«Орал өңірі»


Облыс бюджеті нақтыланды

Күні: , 68 рет оқылды

Сәрсенбі күні облыстық мәслихаттың кезектен тыс XV сессиясы өтті. Күн тәртібінде «2017-2019 жылдарға арналған облыстық бюджет туралы» шешімге өзгерістер мен толықтырулар енгізу, «2018-2020 жылдарға арналған облыстық бюджет туралы», жергілікті мемлекеттік-жеке меншік әріптестік жобаларының тізбесін бекіту, облыстық мәслихаттың өзге де бірқатар шешімдеріне өзгерістер енгізу мәселелері қаралды. Сессияға облыс әкімі Алтай Көлгінов арнайы қатысты.


Күн тәртібіндегі алғашқы мәселе бойынша баяндама жасаған облыстық экономика және бюджеттік жоспарлау басқармасының басшысы Қайсар Маңқараев 2017 жылға арналған облыстық бюджетті 3,3 млрд. теңгеге толықтыру мәселесін нақтылауды ұсынды. Бұл қосымша қаражаттың 1 млрд. теңгесі әлеуметтік блок шығындарына және аталмыш сала нысандарын дамытуға жұмсалмақ. Атап айтқанда, мәдени-көпшілік шаралар ұйымдастыруға 7 млн., Деркөл ауылындағы 600 орындық мектептің құрылысын қаржыландыруға 35,4 млн. теңге, сондай-ақ республикалық бюджет трансферті есебінен 300,6 млн. теңге емдік дәрі-дәрмек, вакциналар және өзге де имуннобиологиялық препараттар сатып алуға бөлінген. Зеленов ауданы Дариян ауылындағы жалпы білім беретін орта мектептің құрылысын жалғастыруға және Орал қаласы Деркөл кентіндегі 600 орындық мектеп құрылысының екінші кезеңіне 582,2 млн. теңге қарастырылған. Сондай-ақ, Орал қаласындағы 300 оқушыға арналған №4 мектептің құрылысын аяқтауға 250,5 млн. теңге бағытталған. Ауыл шаруашылығы, ветеринария және қоршаған ортаны қорғауға 1,8 млрд. теңге қарастырылған. Оның 1,2 млрд. теңгесі республикалық бюджет трансферті есебінен асыл тұқымды мал шаруашылығын дамытуды, мал шаруашылығы өнімдерінің өнімділігі мен сапасын арттыруды субсидиялауға және «Агробизнес – 2020» бағдарламасы шеңберінде өңірдегі агроөнеркәсіптік кешенді қолдауға бөлінген.

– Бір жылдың ішінде облыстық бюджет төрт рет нақтыланды. Нәтижесінде осы жылғы жергілікті бюджет 145 млрд. теңге болды.

Бұл өткен жылмен салыстырғанда 35 млрд. теңгеге көп. Бүкіл трансферттерді есептейтін болсақ, өңір бюджеті 182 млрд. теңгені құрады. 2016 жылғы жағдаймен салыстырсақ 14 млрд. теңгеге көп. Халықты сумен қамту мәселесі өте өзекті. 55 елді мекенге республикалық, сондай-ақ жергілікті бюджет есебінен бөлінген қаражатқа су өткіздік. 35 елді мекенге газ өткізілді. Орталықтандырылған судың көрсеткіші облысымыз бойынша 37 пайыз болса, жыл соңында 43 пайызға жетеді. Келесі жылға тағы 50 елді мекенге су жүргізу жобасын дайындаудамыз. Алты аудан бойынша 35 елді мекенге газ тартылуда. Оның да жұмысы бітуге таяу. Жол мәселесі өте күрделі. Бес жүз шақырым жолды жөндеу жұмыстарының басым көпшілігі биыл бітеді. Оның ішіндегі ең үлкен жобаға «Нұрлы жол» бағдарламасымен 10 млрд. теңге қаражат бөлінді. Қазір Саратовқа баратын жолдың жетпіс шақырымы жөнделді, қалған отыз шақырымы келесі жылы бітеді. Бүгін телекөпір арқылы ауыл шаруашылығына қатысты үлкен жобаны Елбасына баяндап, аштық. Ірі құс фабрикасы іске қосылды. Бұрын он мың тонна құс етін импорттайтын болсақ, енді жеті мың тоннаға дейін өзіміз шығаратын боламыз. Алты бірдей ирригациялық құрылғы іске қосылды. Тұрғын үй бағдарламасына келсек, он төрт көп қабатты үй салынып жатыр. Ауылдық жерлерде 188 тұрғын үйдің құрылысы жүруде. Тұтастай алғанда 1700 пәтер. Оның 1500-і осы жылдың аяғына дейін иелеріне тапсырылмақ. Әлеуметтік сала бойынша 16 білім беру, 19 денсаулық сақтау нысанына күрделі жөндеу жасалуда. Бұл жұмыс та жыл соңына дейін толық тәмамдалмақ. «Нұрлы жол» бағдарламасымен облыс орталығында төрт бірдей жаңа мектеп салынуда. Өңірде жалпы саны 24 білім нысанның құрылы-сы жүріп жатыр, оның оны жеке балабақша. Орта, шағын бизнес өңірлік жалпы өнімде 42 пайызды құрайтын болса, 2020 жылы 43,5 пайызға жеткіземіз деп отырмыз. Ал 2025 жылы бұл көрсеткішті елу пайызға жеткізу туралы Президенттің тапсырмасы бар, – деді сессия барысында сөз алған облыс әкімі Алтай Көлгінов.

Сессияда облыстық мәслихат депутаты Қатауолла Ашығалиев бүгінгі қолданыстағы нормативтік құқықтық актілердің кемшілігі салдарынан облыстық жолдардың құны мен сапасы үйлеспейтінін баса айтты. Ол осы орайда әлемдік деңгейде экономикасы алға дамыған мемлекеттердің оң тәжірибелерін кідіртпей қолданысқа енгізу керектігі туралы ұсыныс жасады. Облыс әкімі тәжірибелі шаруашылық адамының тарапынан көтерілген бұл мәселені қолдап, айтылған ұсынысты Қаржы министрлігіне жеткізуге дайын екенін айтты. Ол осы бағыттағы мәселелерді шешуді мемлекеттік сатып алу туралы заңға өзгерістер енгізуден бастау керек екенін, бүгінгі таңда еліміздің Қаржы министрлігі аталмыш бағыттағы жұмыстармен айналыса бастағанын жеткізді.

2018-2020 жылдарға арналған облыстық бюджет жобасы өңірдің 2018-2022 жылдарға арналған әлеуметтік-экономикалық даму болжамы негізінде дайындалған. 2018 жылғы облыстық бюджет (республикалық бюджеттерден қарастырылған нысаналы трансферттер мен кредиттер есебімен) 105,9 млрд. теңге көлемінде айқындалған. Түсімдер мен шығыстар бойынша 2019 жылға – 83,4 млрд. теңге, 2020 жылға – 92,9 млрд. теңге қарастырылып отыр.

Әлеуметтік қолдау, денсаулық сақтау және білім беру, өмір сүру деңгейін жақсарту облыстық бюджеттің негізгі бағыттары болып табылады.

Нұртас НАБИОЛЛАҰЛЫ,

«Орал өңірі»


Тағзым мен аманат

Күні: , 142 рет оқылды

Тәуелсіздік күніне орай «Тәуелсіздік құндылықтары: өткенге тағзым, болашаққа аманат» ғылыми-тәжірибелік конференция өтті.


Басқосуға Қазақстан Республикасы ұлттық инженерлік академиясы облыстық филиалының төрағасы, «ҚазИИТУ» ғылыми-білім кешенінің құрылтайшысы, техника ғылымдарының кандидаты, академик Ақсерік Әйтімов төрағалық етті. Конференция жұмысына облыс әкімінің орынбасары Ғабидолла Оспанқұлов, Қазақстан Республикасы Парламент Сенатының депутаты Нариман Төреғалиев, Астана қаласындағы Еуропа құқығы мен адам құқығы жөніндегі сараптау институтының директоры Марат Башимов, облыстық мәслихат хатшысы Мәлік Құлшар, «Нархоз университетінің» экономика және менеджмент мектебінің деканы, профессор Самажан Өмірзақов, сонымен қатар көрші Ресей елінің және қазақстандық ғалымдар, оқытушылар мен студенттер қатысты. «Бүгінгі ғылыми-практикалық конференцияның маңыздылығын өте жоғары бағалаймыз. Өйткені біздің ел болып дамып отырғанымыз тәуелсіздігіміздің тұғырлы болуының нәтижесі деп есептейміз. Экономикалық дағдарыс кезеңінен аман-есен өтіп, Елбасының салиқалы саясаты арқасында қазақ елі бүкіл мемлекеттің арасында жақсы көрсеткіштерге қол жеткізіп отыр», – деп әлеуеті артқан 30 елдің қатарына ену жолында тер төгу қажеттігін айтқан облыс әкімінің орынбасары Ғабидолла Оспанқұлов Ақсерік Сарыұлын «100 жаңа есім» жобасына енуімен құттықтап, облыс басшысы Алтай Көлгіновтің марапатын табыс етті. Бұл конференцияның мақсаты – тәуелсіздіктің құндылығы мен мазмұнын ұғындыра отырып, жастардың бойында патриоттық, мәдени құндылықтарды қалыптастыру болды.

Пленарлық мәжілістегі мазмұнды да мағыналы баяндамалар арасында «Нархоз университеті» мен «ҚазИИТУ» ғылыми-білім кешені алдағы уақыттағы өзара әріптестік байланыста болу үшін меморандумға қол қойды. Ғылым мен білімнің дамуына үлес қосқан бір топ адамға қоғамдық марапаттар мен атақтар жөніндегі республикалық кеңесі, «Бейбітшілік әлемі» халықаралық бірлестігі және SOS Киндердорф халықаралық қоғамдық ұйым марапаты тапсырылды. Конференцияның екінші бөлігінде еліміздегі қазіргі заманауи ғылыми техниканың дамуы және өзекті мәселелері жөнінде баяндамалар оқылды. Шара оздырылған сәтінде, «ҚазИИТУ» ғылыми-білім кешенінің ғылыми-инновациялық жобаларының көрмесі ұйымдастырылды.

Ясипа РАБАЕВА,

«Орал өңірі»


Құрметті батысқазақстандықтар!

Күні: , 106 рет оқылды


Сіздерді тұңғыш Президент күні мерекесімен шын жүректен құттықтаймын! Биыл бесінші жыл қатарынан мейрам ретінде аталып өтілетін тұңғыш Президент күні – халқымыздың бірлігін бекемдей түсетін мемлекеттік деңгейдегі мерекеге айналды. Елбасымыздың Тәуелсіз Қазақстанның қалыптасуы мен даму кезеңіндегі еңбегін халқымыз әрдайым жоғары бағалайды.


Бүгінде Қазақстан қарышты дамуы дүниежүзін таңғалдырған, өзіндік айқын бағыты бар егемен ел ретінде қалыптасты. Елбасы Нұрсұлтан Назарбаевтың көрегендігі мен жүргізіп отырған саясатының арқасында әлеуметтік-экономикалық, рухани-мәдени дамуда зор жетістіктер көп.

Әсіресе, биылғы жыл Елбасының Қазақстан халқына арнаған «Рухани жаңғыру: болашаққа бағдар» бағдарламалық мақаласымен және 100-ден аса мемлекеттің қатысуымен өткен «ЭКСПО – 2017» халықаралық көрмесімен ерекшеленді. Еліміздің осындай биік белестерден көрініп, жыл сайын дамудың жаңа сатысына көтерілуі – туған халқының көреген көшбасшысы, жарқын істердің жасампаз ұйытқысы Елбасы мен оған қолдау көрсеткен халықтың бірлігінің нәтижесі екені сөзсіз.

Сіздерді тұңғыш Президент күнімен тағы да шын жүректен құттықтай отырып, дендеріңізге саулық, отбасыларыңызға амандық, тәуелсіз Отанымыздың өркендеуі жолындағы еңбектеріңізге толағай табыс тілеймін.

Құрметпен, Батыс Қазақстан облысының әкімі       А. КӨЛГІНОВ


Білім басқармасында жаңа басшы

Күні: , 129 рет оқылды


Конкурстық негізде  ҚР Білім және ғылым министрлігінің келісімімен Батыс Қазақстан облысының білім басқармасының басшысы лауазымына  Шолпан Маратқызы Қадырова тағайындалды деп хабарлайды облыс әкімдігінің баспасөз қызметі.


Шолпан Маратқызы 1991 жылы А. С. Пушкин атындағы педагогикалық институтты бітірген.

Еңбек жолын 1991 жылы Жымпиты орта мектебінің мұғалімі ретінде бастаған.

1994-1995 жылдары Орал педагогикалық колледжінің оқытушысы, 1995-1998 жылдары Сырым ауданының білім бөліміндегі тәрбие орталығының директоры, 1998 жылдан бастап Дәулеткерей атындағы өнер институтында түрлі қызметтерде болды. Ал 2000-2002 жылдар аралығында Батыс Қазақстан облыстық педагогикалық кадрлардың біліктілігін арттыру және қайта даярлау институтының әдіскері болып қызмет жасады. 2002 жылдан бастап Батыс Қазақстан облыстық білім басқармасының бөлім басшысы қызметін атқарған. 2009-2011 жылдары Орал қаласындағы есту және сөйлеу қабілеті бұзылған балаларға арналған облыстық арнаулы мектеп-интернат кешенінің директоры болған. Ал 2011 жылдан бүгінге дейін физика-математика бағытындағы Назарбаев зияткерлік мектебінің Орал қаласындағы филиалының директоры қызметін атқарды.

Облыс әкімі А. Көлгінов білім басқармасының басшысына Елбасы Н. Ә. Назарбаевтың «Болашаққа бағдар: рухани жаңғыру» бағдарламалық мақаласында әлемнің дамыған 30 елінің қатарына кіру үшін ең қажеттісі – білімнің салтанат құруы туралы айтқанын баса көрсетіп, бірқатар тапсырмалар жүктеді. Соның ішінде Назарбаев зияткерлік мектептеріндегі білім берудің озық үлгілерін облыс мектептеріне енгізу бағытында жұмыстануды, қала мектептері мен ауыл мектептері арасындағы алшақтықты болдырмау мақсатында шалғай ауылдардағы шағын жинақталған мектептерде электронды оқытудың заманауи құралдарын қолдануды, кең жолақты интернет жеткізу бағытындағы жұмыстарды жүргізуді, мектеп мұғалімдерінің біліктілігін арттыру жұмыстарын ұйымдастыруды және жүзеге асыруды тапсырды.

zhaikpress.kz


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика