Қос ауданда жаңа әкім

Күні: , 50 рет оқылды

ҚР  Президенті  Әкімшілігі мен  Теректі  аудандық  мәслихатының  келісімімен  ротация  бойынша  Теректі  ауданының  жаңа  әкімі  болып Әділ  Жоламанов  тағайындалды.

Облыс әкімі  Алтай  Көлгінов аудан  активіне  жаңа  басшыны  таныстырды.

Әділ Тауфиқұлы Жоламанов 1968 жылы туған, білім жоғары, «Евразия» Батыс Қазақстан менеджмент және тілдер институтын экономист-бухгалтер, «Евразия» академиясын құқықтану бакалавры мамандықтары  бойынша  бітірген.

Еңбек жолын 1989 жылы сәулет жоспарлау  технигі  болып  бастаған.

Әр жылдары:

– Сырым аудандық салық комитетінің салық инспекторы, бас салық инспекторы, төраға орынбасары, төрағасы;

– Теректі ауданы бойынша салық басқармасының басшысы (2007-2011 ж. ж.);

– Теректі аудандық экономика және қаржы бөлімінің басшысы (2011-2012 ж. ж.);

– Сырым  ауданы  әкімінің  орынбасары;

– БҚО ауыл шаруашылығы басқармасы басшысының орынбасары болып қызмет істеді.

2015 жылдың маусым айынан бастап бүгінге дейін Ақжайық ауданының әкімі болды.

Айта кету керек, Теректі ауданының әкімі болған Кәрім Жақыпов денсаулығына байланысты өз еркімен қызметінен кетті. Облыс әкімі Алтай Көлгінов оған атқарған қызметі үшін алғыс айтып, зор денсаулық,  табыс  пен  сәттілік  тіледі.

*   *   *

Қазақстан  Республикасы  Президентінің  кадр  саясаты  жөніндегі  Ұлттық  комиссиясының  ұсынысы  және  ҚР  Президенті  Әкімшілігі  мен  Ақжайық  аудандық  мәслихатының  келісімі  бойынша  Ақжайық  ауданының  әкімі  болып  Қалияр  Айтмұхамбетов  тағайындалды.

Облыс әкімі Алтай Көлгінов аудан  активіне  жаңа  басшыны  таныстырды.

Қалияр Шадиярұлы Айтмұхамбетов 1969 жылы туған, білімі жоғары, Батыс Қазақстан ауыл шаруашылығы институтын агроном, Батыс Қазақстан инженерлік-гуманитарлық университетін құқықтану мамандықтары бойынша бітірген.

Әр жылдары:

– Шыңғырлау ауданында совхоз директорының жастар ісі жөніндегі орынбасары, агрономы;

– Шыңғырлау ауданы әкімі аппаратының ішкі саясат және әлеуметтік бөлімінің бас маманы, жұмыспен қамту және әлеуметтік  бағдарламалар бөлімінің басшысы;

– Шыңғырлау ауданы әкімі аппаратының басшысы, бұдан кейін Шыңғырлау ауданы әкімінің орынбасары болып қызмет істеді.

2017 жылдың тамыз айынан бастап БҚО жұмыспен қамтуды үйлестіру және әлеуметтік  бағдарламалар басқармасының басшысы болды.


Жаңа тағайындау

Күні: , 77 рет оқылды

Конкурстық комиссияның шешіміне сәйкес Орал қаласы әкімінің орынбасары лауазымына Сергей Евгеньевич Доля тағайындалды.

Білімі жоғары. Батыс Қазақстан ауыл шаруашылығы институтын инженер-механик  мамандығы бойынша  тәмамдады.

Әр  жылдары:

– «Оралэнерго» АҚ Орал қалалық филиалының бақылаушысы, учаскенің  бастығы,  учаске  шебері;

– «Батыс Қазақстан электр желілерін таратушы компаниясында» бақылаушы, инженер, сервис  бастығы, қалалық филиалдың бас инженері.

Ал 2013 жылдың қаңтарынан бүгінге дейін «Батыс Қазақстан электр желілерін таратушы компаниясы» АҚ қалалық филиа-лының  басшысы  қызметін  атқарды.


Қазақстан Республикасының Президенті Н. Ә. Назарбаевтың Қазақстан халқына Жолдауы

Күні: , 136 рет оқылды

ҚАЗАҚСТАНДЫҚТАРДЫҢ ӘЛ-АУҚАТЫНЫҢ ӨСУІ:

ТАБЫС ПЕН ТҰРМЫС САПАСЫН АРТТЫРУ

Құрметті қазақстандықтар!

Біз тәуелсіздік жылдары көп жұмыс атқардық. Экономикасы қарқынды дамып келе жатқан заманауи прогрессивті мемлекет құрып, бейбітшілік пен қоғамдық келісімді қамтамасыз еттік. Сапалы әрі тарихи маңызы зор құрылымдық, конституциялық және саяси реформалар жүргіздік. Қазақстанның халықаралық беделінің артуына және оның аймақтағы геосаяси рөлінің күшеюіне қол жеткіздік. Біз өңірлік және жаһандық проблемаларды шешу ісіне зор жауапкершілікпен қарайтын жауапты әрі қалаулы халықаралық серіктес ретінде танылдық.

Қазақстан ТМД және Орталық Азия елдері арасынан «ЭКСПО – 2017» халықаралық көрмесін өткізу үшін әлемдік қоғамдастық таңдап алған бірінші мемлекет болды. Біз Еуразия өңірінің қаржылық, іскерлік, инновациялық және мәдени орталығы ретінде қалыптасуын қамтамасыз етіп, жаңа елордамыз – Астананы салдық.

Халық саны 18 миллионнан асып, өмір сүру ұзақтығы 72,5 жасқа жетті.

Біз берік экономикалық негіз қалыптастырдық. Соңғы 20 жыл ішінде елімізге 300 миллиард АҚШ доллары көлемінде тікелей шетел инвестициясы тартылды. Экономиканы өркендетудің негізі саналатын шағын және орта бизнес нығайып келеді. Дүниежүзілік Банктің бизнес жүргізу жеңілдігі рейтингісінде Қазақстан 190 елдің ішінде 36-шы орынға көтерілді.

Біз әрдайым сыртқы сын-қатерлерге дер кезінде назар аударып, оларға дайын бола білдік. Соған байланысты мен елімізді жаңғырту жөнінде қажетті бағдарламалық бастамалар жасадым. Олардың жүзеге асырылуы табысты дамуымыздың негізгі факторына айналды.

Біздің стратегиялық мақсатымыз – 2050 жылға қарай әлемдегі озық дамыған 30 елдің қатарына қосылу.

2014 жылы еліміздің инфрақұрылымын жаңартатын «Нұрлы жол» кешенді бағдарламасын іске асыруды бастадық.

Үш жыл бұрын «100 нақты қадам» – Ұлт жоспарын жарияладық.

Содан кейін еліміздің Үшінші жаңғыруына кірістік. Оның басты міндеті – Қазақстанның жаһандық бәсекеге қабілеттілігін қамтамасыз ететін экономикалық өсімнің жаңа моделін құру. Еліміздің орнықты дамуы өмір сүру деңгейін одан әрі арттыруға деген зор сенім ұялатады.

Біз жаңа міндеттерді атқаруға дайынбыз.

 

Құрметті отандастар!

Соңғы кездері әлемдік саяси және экономикалық трансформация үдерістері күшейе түсті. Әлем қарқынды түрде өзгеріп келеді. Мызғымастай көрінген жаһандық қауіпсіздік жүйесінің тұғыры мен халықаралық сауда ережелері бұзылуда. Жаңа технологиялар, роботтандыру мен автоматтандыру еңбек ресурстарына және адам капиталының сапасына қатысты талаптарды күрделендіруде. Қаржы жүйелерінің мүлде жаңа архитектурасы түзілуде.

Бұл орайда қор нарықтары кезекті қаржы дағдарысына алып келуі мүмкін жаңа «сабын көбігін» үрлеуде.

Бүгінде жаһандық және жергілікті проблемалар тоғыса түсуде. Мұндай жағдайда сын-қатерлерге төтеп берудің және мемлекеттің табысқа жетуінің кепілі елдің басты байлығы – адамның даму мәселесі болып отыр.

Үкімет, әрбір мемлекеттік органның, мемлекеттік компанияның басшысы жұмыс тәсілдерін өзгертуі қажет. Қазақстандықтардың әл-ауқатының өсуі  басты басымдыққа айналуы тиіс. Мен лауазымды тұлғаның жеке тиімділігін және қызметке лайықтылығын дәл осы өлшемге сәйкес бағалайтын боламын.

* * *

Қазақстандықтардың әл-ауқаты, ең алдымен, табыстарының тұрақты өсімі мен тұрмыс сапасына байланысты.

 

І. ХАЛЫҚ ТАБЫСЫНЫҢ ӨСУІ

Адам еңбекқор болып, өз кәсібін жақсы меңгергенде және лайықты жалақы алуға немесе жеке кәсіп ашып, оны дамытуға мүмкіндік болған кезде табыс артады.

Мемлекет пен адамдардың күш біріктіруінің арқасында ғана біз Жалпыға ортақ еңбек қоғамын құра аламыз.

Біріншіден, Үкіметке 2019 жылдың 1 қаңтарынан бастап ең төменгі жалақыны 1,5 есе, яғни 28 мыңнан 42 мыңға дейін өсіруді тапсырамын. Бұл барлық сала бойынша түрлі меншік нысандарындағы кәсіпорындарда жұмыс істейтін 1 миллион 300 мың адамның еңбекақысын тікелей қамтиды. Бюджеттік мекемелерде жұмыс істейтін 275 мың қызметкердің еңбекақысы көбейіп, орта есеппен 35 пайызға өседі. Осы мақсаттарға 2019-2021 жылдарда  республикалық бюджеттен жыл сайын 96 миллиард теңге бөлу керек.

Осыған орай енді ең төменгі жалақы ең төменгі күнкөріс шегіне байланысты болмайды. Ең төменгі жалақының жаңа мөлшері бүкіл экономика ауқымындағы еңбекақы өсімінің катализаторына айналады.

Төмен жалақы алатын қызметкерлердің еңбекақысын көтеруге қатысты бұл бастаманы ірі компаниялар қолдайды деп сенемін.

Екіншіден, бизнесті өркендетудің тұрақты көздерін қалыптастырып, жеке инвестицияны ынталандыру және нарық еркіндігін қолдау керек. Дәл осы бизнес арқылы жаңа жұмыс орындары ашылып, қазақстандықтардың басым бөлігі табыспен қамтамасыз етіледі.

БІРІНШІ. Біз 2010 жылдың өзінде «Бизнестің жол картасы – 2020» бағдарламасын іске қостық.

Өңірлерге жұмыс сапарым барысында мұның тиімділігіне көз жеткіздім.

Бағдарламаның қолданылу мерзімін 2025 жылға дейін ұзарту керек. Осы бағдарламаны жүзеге асыру үшін жыл сайын қосымша кемінде 30 миллиард теңге бөлуді қарастыру қажет.

Бұл 3 жыл ішінде қосымша кемінде 22 мың жаңа жұмыс орнын ашуға, 224 миллиард теңге салық түсіруге және 3 триллион теңгенің өнімін өндіруге мүмкіндік береді.

ЕКІНШІ. Экономикада бәсекелестікті дамыту және тұрғын үй-коммуналдық шаруашылығы мен табиғи монополиялардың қызметі үшін белгіленетін тарифтер саласында тәртіп орнату мақсатымен батыл шаралар қабылдау керек. 

Коммуналдық қызмет пен табиғи монополияларды реттеу салаларында тарифтің жасалуы және тұтынушылардан жиналған қаржының жұмсалуы әлі күнге дейін ашық емес. Монополистердің инвестициялық міндеттемелеріне тиімді мониторинг пен бақылау жүргізілмей отыр.

Үкімет 3 ай мерзім ішінде осы мәселемен айналысып, бәсекелестікті қорғау функциясын елеулі түрде күшейте отырып, монополияға қарсы ведомствоның жұмысын реформалауы керек.

Бұл – маңызды мәселе, ол бизнес үшін кететін шығынның артуына, адамдардың нақты табысын азайтуға әкеп соқтырады.

ҮШІНШІ. Бизнесті заңсыз әкімшілік қысымнан және қылмыстық қудалау қаупінен қорғауды арттыра түсу керек.

2019 жылдың 1 қаңтарынан бастап салық заңнамасының бұзылуы жөніндегі қылмыстық жауапкершіліктің қолданылу шегін, айыппұлды өсіре отырып, 50 мың айлық есептік көрсеткішке дейін арттыруды тапсырамын.

Сондай-ақ негізгі міндеті көлеңкелі экономикамен күрес болуға тиіс Қаржы мониторингі комитетіне функцияларын бере отырып, Экономикалық тергеу қызметін қайта құру қажет.

Біз «қолма-қол ақшасыз экономикаға» бет бұруымыз керек. Мұнда жазалаушы ғана емес, сондай-ақ бизнестің қолма-қол ақшасыз есеп айырысуын қолдау сияқты ынталандырушы құралдарға да сүйенген жөн.

Салық және кеден саласындағы ақпараттық жүйелер интеграциясының аяқталуы әкімшілендірудің ашықтығын арттырады.

Үкімет үш жыл ішінде экономикадағы көлеңкелі айналымды кем дегенде 40 пайызға қысқарту үшін нақты шаралар қабылдауға тиіс.

Бизнес өз жұмысын жаңадан бастау үшін 2019 жылдың 1 қаңтарынан бастап салықтың негізгі сомасы төленген жағдайда өсім мен айыппұлды алып тастай отырып, шағын және орта бизнес үшін «салық амнистиясын» жүргізуге кірісуді тапсырамын.

ТӨРТІНШІ. Экспортқа бағытталған индустрияландыру мәселесі экономикалық саясаттың негізгі элементі болуға тиіс.

Үкімет өңдеу секторындағы экспорттаушыларға қолдау көрсетуге баса мән беруі қажет. Біздің сауда саясатымызда селқостық болмауы тиіс. Оған біздің тауарларымызды өңірлік және әлемдік нарықта ілгерілететін белсенді сипат дарыту керек. Сонымен бірге халық тұтынатын тауарлардың ауқымды номенклатурасын игеріп, «қарапайым заттар экономикасын» дамыту үшін кәсіпорындарымызға көмектесу қажет. Бұл экспорттық әлеуетімізді жүзеге асыру тұрғысынан ғана емес, сондай-ақ ішкі нарықты отандық тауарлармен толтыру үшін де маңызды.

Үкіметке өңдеу өнеркәсібі мен шикізаттық емес экспортты қолдау мақсатымен алдағы 3 жылда қосымша 500 миллиард теңге бөлуді тапсырамын.

Басымдығы бар жобаларға қолжетімді несие беру міндетін шешу үшін Ұлттық банкке кемінде 600 миллиард теңге көлемінде ұзақ мерзімге қаржы бөлуді тапсырамын.

Үкімет Ұлттық банкпен бірлесіп, осы қаражаттың көзделген мақсатқа жұмсалуын қатаң бақылауды қамтамасыз етуі керек. Ірі әрі серпінді жобаларды жүзеге асыру үшін шетелдік инвесторлармен бірлесіп, инвестиция салу қағидаты бойынша жұмыс істейтін Шикізаттық емес секторға бөлінетін тікелей инвестиция қорын құру мәселесін қарастыру қажет. Сондай-ақ көлік-логистика және басқа да қызмет көрсету секторларын ілгерілету жөніндегі жұмыстарды жандандыру керек.

Бай табиғатымыз бен мәдени әлеуетімізді пайдалану үшін сырттан келетін және ішкі туризмді дамытуға ерекше көңіл бөлу қажет. Үкімет қысқа мерзімде салалық мемлекеттік бағдарлама қабылдауы тиіс.

БЕСІНШІ. Агроөнеркәсіп кешенінің әлеуетін толық іске асыру керек.

Негізгі міндет – еңбек өнімділігін және қайта өңделген ауыл шаруашылығы өнімінің экспортын 2022 жылға қарай 2,5 есе көбейту. Мемлекеттік қолдаудың барлық шарасын елімізге заманауи агротехнологияларды ауқымды түрде тартуға бағыттау қажет. Біз икемді әрі ыңғайлы стандарттарды енгізу және ауыл шаруашылығы саласындағы беделді шетелдік мамандарды – «ақылды адамдарды» тарту арқылы саланы басқарудың үздік тәжірибесін пайдалануымыз керек. Ауыл кәсіпкерлеріне шаруашылық жүргізудің жаңа дағдыларын үйрету үшін жаппай оқыту жүйесін қалыптастырған жөн.

Үкіметке алдағы 3 жыл ішінде осы мақсаттарға жыл сайын қосымша кемінде 100 миллиард теңге қарастыруды тапсырамын.

АЛТЫНШЫ. Инновациялық және сервистік секторларды дамытуға ерекше көңіл бөлген жөн.

Ең алдымен, «болашақтың экономикасының» баламалы энергетика, жаңа материалдар, биомедицина, үлкен деректер, заттар интернеті, жасанды интеллект, блокчейн және басқа да бағыттарын ілгерілетуді қамтамасыз ету қажет. Еліміздің жаһандық әлемдегі орны мен рөлі келешекте нақ осыларға байланысты болады.

Үкіметке Назарбаев Университетімен бірлесіп, нақты жобаларды анықтай отырып, әрбір бағыт бойынша арнайы бағдарламалар әзірлеуді тапсырамын. Университет базасында жасанды интеллект технологиясын әзірлеумен айналысатын ғылыми-зерттеу институтын құру сондай жобалардың бірі бола алады.

ЖЕТІНШІ. Нақты экономиканы өркендету үшін қаржы секторының рөлін күшейтіп, ұзақ мерзімді макроэкономикалық тұрақтылықты қамтамасыз ету қажет.

Бағаның өсуі, қаржыландыруға қолжетімділік, банктердің орнықтылығы, міне, осы мәселелер көбіне қазір жұрттың қызығушылығын тудырып отыр.

Ұлттық банк Үкіметпен бірлесіп, қаржы секторын және нақты секторларды сауықтыру, инфляцияға қарсы кешенді саясат жүргізу мәселелерін жүйелі түрде шешуді бастауы керек. Қалыптасқан жағдайда экономиканы, әсіресе, өңдеу секторы мен шағын және орта бизнесті несиелендіруді ұлғайту өте маңызды.

Сондай-ақ зейнетақы активтері мен әлеуметтік сақтандыру жүйесінің ресурстарын басқару тиімділігін арттырып, баламалы қаржы құралдарын – құнды қағаз нарығы, сақтандыру және басқа да салаларды нақты дамыту керек.

Бизнесті шетел инвестициясымен, капиталға қолжетімділікпен қамтамасыз ету ісінде «Астана» халықаралық қаржы орталығы маңызды рөл атқаруы тиіс.

Біз жеке сотты, қаржы реттеуішін, биржаны арнайы құрдық. Барлық мемлекеттік органдар мен ұлттық компаниялар осы алаңды белсенді пайдаланып, оның тез қалыптасуына және дамуына атсалысуы керек.

* * *

Аталған шаралардың тиімді жүзеге асырылуы жалақының өсуі мен жаңа жұмыс орындарының ашылуы есебінен қазақстандықтардың табысын арттырады. Бұл үдерістер әрдайым Үкіметтің басты назарында болуы тиіс.

 

  1. ТҰРМЫС САПАСЫН АРТТЫРУ

Әл-ауқатымыздың екінші бір сипаты – өмір сүру деңгейінің артуы.

Білім берудің, денсаулық сақтау саласының, тұрғын үйдің сапасы мен қолжетімділігі, жайлы және қауіпсіз жағдайда өмір сүру мәселелері әрбір қазақстандық отбасына қатысты. Осыған орай Үкімет әлеуметтік секторға, қауіпсіздік пен инфрақұрылымға мән бере отырып, бюджет шығыстарының басымдықтарын қайта қарауы тиіс.

БІРІНШІ. 5 жыл ішінде білім, ғылым, денсаулық сақтау салаларына барлық көзден жұмсалатын қаражатты ішкі жалпы өнімнің 10 пайызына дейін жеткізу қажет.  

Қаржыландыруды халыққа қызмет көрсету сапасын елеулі түрде арттыруды қамтамасыз ететін тиісті реформаларды жүзеге асыру үшін бағыттау керек.

ЕКІНШІ. Мектепке дейінгі білім беру сапасын түбегейлі жақсарту керек.

Ойлау негіздері, ақыл-ой мен шығармашылық қабілеттер, жаңа дағдылар сонау бала кезден қалыптасады.

Білім беру ісінде 4К моделіне: креативтілікті, сыни ойлауды, коммуникативтілікті дамытуға және командада жұмыс істей білуге басты назар аударылуда. Бұл салада біліктілік талаптарын, оқыту әдісін, тәрбиешілердің және балабақшадағы басқа да қызметкерлердің еңбегіне ақы төлеу жүйесін қайта қарау қажет.

Білім және ғылым министрлігі әкімдіктермен бірлесіп, биыл тиісті «Жол картасын» әзірлеуі керек.

ҮШІНШІ. Орта білім беру жүйесінде негізгі тәсілдер белгіленген, қазіргі кезеңде солардың орындалуына баса назар аударған жөн. 

Назарбаев зияткерлік мектептерінің оқыту жүйесі мен әдістемесі мемлекеттік мектептер үшін бірыңғай стандарт болуы тиіс. Бұл мектеп білімін реформалаудың қорытынды кезеңі болады.

Білім сапасын бағалау жүйесі халықаралық стандарттарға негізделуі тиіс. Орта мектептердің өзінде балаларды мейлінше сұранысқа ие мамандықтарға бейімдеп, кәсіби диагностика жүргізу маңызды. Бұл оқытудың жеке бағдарын жасауға және оқушы мен мұғалімнің оқу жүктемесін азайтуға мүмкіндік береді.

Балалар қауіпсіздігінің маңыздылығын ескеріп, бүкіл мектеп пен балабақшаларды бейнебақылау жүйесімен қамтамасыз етуді, мектеп психологтарының жұмысын күшейтуді және басқа да дәйекті шараларды жүзеге асыруды тапсырамын.

Білім алудың қолжетімділігін арттыру мақсатымен оқушыларға орын жетіспейтіні, мектептердің үш ауысымда оқыту және апат жағдайында болу проблемалары мейлінше сезіліп отырған  өңірлер үшін Үкіметке 2019-2021 жылдарға арналған бюджеттен қосымша 50 миллиард теңге қарастыруды тапсырамын.

ТӨРТІНШІ. Келесі жылы «Педагог мәртебесі туралы» заңды әзірлеп, қабылдау қажет деп санаймын.

Бұл құжат мұғалімдер мен мектепке дейінгі мекемелер қызметкерлері үшін барлық игілікті қарастырып, жүктемені азайтуға, жөнсіз тексерістер мен міндеттен  тыс функциялардан арашалауы тиіс.

БЕСІНШІ. Жоғары білім беру ісінде оқу орындарының маман дайындау сапасына қатысты талаптар күшейтіледі.

Біз гранттардың санын көбейттік, енді жауапкершіліктің кезеңі келді.

Жоғары оқу орнының табыстылығын бағалаудың басты критерийі – оқу бітірген студенттердің жұмыспен қамтылуы, жалақысы жоғары жұмысқа орналасуы.

Жоғары оқу орындарын ірілендіру саясатын жүргізу қажет. Нарықта жоғары сапалы білім беруді қамтамасыз ететіндері ғана қалуға тиіс. Назарбаев Университетінің тәжірибесіне сүйеніп, үздік шетелдік топ-менеджерлерді жұмысқа тарту арқылы әлемнің жетекші университеттерімен әріптестік орнату маңызды.

Қазіргі білім инфрақұрылымының базасында Назарбаев Университетінің үлгісімен өңірлік жаңа жоғары оқу орнын құру қажет деп санаймын.

АЛТЫНШЫ. Медициналық қызмет сапасы халықтың әлеуметтік көңіл күйінің аса маңызды компоненті болып саналады. 

Ең алдымен, әсіресе, ауылдық жерлерде алғашқы медициналық-санитарлық көмектің қолжетімді болуын қамтамасыз ету қажет.

Алғашқы медициналық-санитарлық көмек көрсететін қызметкерлерді ынталандыру үшін 2019 жылдың 1 қаңтарынан бастап ауруларды емдеу ісін басқарудың жаңа тәсілдерін енгізген учаскелік медицина қызметкерлерінің жалақысын кезең-кезеңмен 20 пайызға көбейтуді тапсырамын. Осы мақсаттарға келесі жылы 5 миллиард теңге бөлінеді.

2019 жылдың 1 қаңтарынан бастап барлық емхана мен ауруханалар медициналық құжаттарды қағазсыз, цифрлық нұсқада жүргізуге көшуге тиіс. Бұл 2020 жылға қарай бүкіл тұрғынның электронды денсаулық паспорттарын жасауға, кезектерді, бюрократияны жоюға, қызмет көрсету сапасын арттыруға мүмкіндік береді.

Осыған дейін жасалған кардиологиялық және нейрохирургиялық кластерлердің тәжірибесін пайдаланып, 2019 жылы Астанада Ұлттық ғылыми онкологиялық орталықтың құрылысын бастау керек. Осылайша біз көптеген адам өмірін сақтап қаламыз.

ЖЕТІНШІ. Өңірлік деңгейдегі резервтерді тауып, бұқаралық спорт пен дене шынықтырудың қолжетімділігін арттыру қажет.

Үкіметке және әкімдерге кем дегенде 100 дене шынықтыру-сауықтыру кешенін салуды тапсырамын. Сондай-ақ қолданыстағы, әсіресе, мектептердегі спорт ғимараттарын тиімді пайдаланып, дене шынықтырумен айналысу үшін аулаларды, парктерді, саябақтарды жабдықтау қажет.

СЕГІЗІНШІ. Ұлт саулығы – мемлекеттің басты басымдығы. Бұл – қазақстандықтар сапалы азық-түлікті пайдалануға тиіс деген сөз.

Бүгінде халықты сапасыз әрі денсаулыққа және өмірге қауіп төндіретін тауарлар мен көрсетілетін қызметтерден қорғайтын тұтас саясат жоқ. Үкіметке шаралар қабылдауды және осы жұмысты ретке келтіруді тапсырамын.

Келесі жылдан бастап Тауарлар мен көрсетілетін қызмет сапасын және қауіпсіздігін бақылау комитеті жұмысын бастауға тиіс. Оның қызметі, ең бастысы, азық-түлікке, дәрі-дәрмекке, ауыз суға, балалар тауарына, медициналық қызмет көрсетуге сараптама жүргізуді қамтитын болады. Бұл үшін заманауи зертханалық базаны қамтамасыз етіп, білікті мамандар штатын қалыптастыру қажет. Бұл орайда тұтынушылардың құқықтарын қорғайтын қоғамдық ұйымдарды институционалды тұрғыдан күшейтіп, оларды белсенді пайдаланған жөн.

Біз әрдайым бизнеске көмек көрсетеміз, бірақ адам, оның құқықтары мен денсаулығы маңыздырақ. Мемлекет әкімшілік кедергілерді азайту барысында көптеген тексерістен, рұқсат беру және басқа да рәсімдерден бас тартты. Сондықтан ұсынылатын тауарлардың, көрсетілетін қызметтердің сапасы мен қауіпсіздігі үшін бизнес қоғамдастығы да жауап береді.

Жалпы, бизнес пайда табуды ғана емес, сондай-ақ мемлекетпен бірлесіп, азаматтарымыздың қауіпсіздігі мен жайлы тұрмысын қамтамасыз етуді де ойлауы керек.

* * *

Халыққа сапалы әлеуметтік қызмет көрсету ісі тұрғын үй жағдайын жақсарту, еліміздегі кез келген елді мекенде жайлы әрі қауіпсіз өмір сүру сипатындағы мол мүмкіндіктермен үйлесімді түрде толыға түсуі тиіс.

 

III. ӨМІР СҮРУГЕ ЖАЙЛЫ ОРТА ҚАЛЫПТАСТЫРУ

Жайлылық дегеніміз – ең алдымен, тұрғын үйдің қолжетімділігі, ауланың әдемілігі мен қауіпсіздігі, тіршілікке және жұмыс істеуге қолайлы елді мекеннің және сапалы инфрақұрылымның болуы.

БІРІНШІ. Сапалы әрі қолжетімді тұрғын үй.

Бүгінде біз тұрғын үй құрылысына зор серпін беріп отырған «Нұрлы жер» бағдарламасын табысты іске асырудамыз. Тұрғын үй ипотекасының қолжетімділігін арттыратын жаңа ауқымдағы «7-20-25» бағдарламасы қолға алынды.

Әкімдерге жергілікті бюджет есебінен жеңілдетілген ипотека бойынша алғашқы жарнаны ішінара субсидиялау мәселесін пысықтауды тапсырамын. Мұндай тұрғын үй сертификаттарын беру біліктілігі жоғары педагогтер, медицина қызметкерлері, полицейлер және өңірге қажетті басқа да мамандар үшін ипотеканың қолжетімділігін арттырады.

Сондай-ақ халықтың әлеуметтік тұрғыдан әлсіз топтары үшін ірі қалаларда жалдамалы тұрғын үй құрылысын ұлғайту қажет. Бұл шаралар 250 мыңнан астам отбасы үшін тұрғын үй жағдайын жақсартуға мүмкіндік береді.

Бюджет есебінен салынатын жаппай құрылыс алаңдарына арналған инженерлік инфрақұрылым жүргізуді қоса алғанда, мемлекет бес жыл ішінде 650 мың отбасыға немесе 2 миллионнан астам азаматтарымызға қолдау көрсетеді.

ЕКІНШІ. Еліміздің аумақтық дамуына жаңа тәсілдер енгізуді қамтамасыз ету қажет.

Бүгінде жетекші елдердің экономикасы көбіне жаһандық қалалар немесе мегаполистер арқылы танылады.

Әлемдік ішкі жалпы өнімнің 70 пайыздан астамы қалаларда түзіледі.

Біздің өз тұрмыс салтымыз тарихи қалыптасты, моноқалалары мен шағын облыс орталықтары бар аграрлы экономика басымдыққа ие болды. Сондықтан 18 миллион халқы бар ел үшін миллионнан астам тұрғыны бар 3 қаланың болуы,  соның ішінде 2 қаланың тәуелсіз Қазақстан дәуірінде осы қатарға қосылуы  – үлкен жетістік.

Астана мен Алматы еліміздегі ішкі жалпы өнімнің 30 пайыздан астамын қазірдің өзінде қамтамасыз етіп отыр. Бірақ қалалардың инфрақұрылымы кәсіпорындар мен тұрғындардың жедел өсіп келе жатқан қажеттіліктеріне сай бола бермейді.

Соңғы жылдары біз «Нұрлы жол» бағдарламасы бойынша республикалық маңызы бар инфрақұрылым қалыптастырдық.

2015 жылдан бастап 2400  шақырым автомобиль жолы салынды және қайта жөнделді. Бұл жұмыстар жалғасуда және 2020 жылға дейін қосымша 4600 шақырым жол пайдалануға беріледі. Енді өңірлік және қалалық инфрақұрылымды жүйелі түрде дамытқан жөн. Осы мақсатқа орай биыл қаржыландыру көлемі артты: жергілікті маңызы бар жолдарға 150 миллиард теңгеге дейін, ауылдық жерлерді сумен қамтуға 100 миллиард теңгеге дейін қаражат бөлінді.

Әкімдер осы қаражаттың есебінен өңірлердегі мейлінше өткір проблемаларды шешуге күш жұмылдыруы керек. Үкімет бұл міндетті жүйелі қолға алып, қосымша инфрақұрылымдық мәселелер тізімін жасап, жобаларды бағалап, оларды қаржыландыру көздерін іздеп табуы қажет.

Жаңа мектептер, балабақшалар, ауруханалар құрылысын елді мекендерді дамыту жоспарларымен ұштастыру қажет, сондай-ақ бұл секторға жеке инвесторларды тарту үшін жағдай жасаған жөн. Сонымен қатар «инфрақұрылым адамдарға» моделінен «адамдар инфрақұрылымға» моделіне бірте-бірте көшу қажет. Бұл елді мекендерді ірілендіру ісін ынталандырып, бөлінетін қаражатты пайдалану тиімділігін арттыратын болады.

Әрбір өңір мен ірі қала бәсекеге қабілеттіліктің қолда бар басымдықтарын ескеріп, өзіндік орнықты экономикалық өсу және жұмыспен қамту моделіне сүйене отырып дамуы тиіс. Осыған орай тірек саналатын ауылдардан бастап республикалық маңызы бар қалаларға дейінгі түрлі елді мекендер үшін өңірлік стандарттар жүйесін әзірлеу керек.

Бұл стандарт әлеуметтік игіліктер мен көрсетілетін мемлекеттік қызметтердің тізімі мен қолжетімділігінің, көлік, мәдени-спорттық, іскерлік, өндірістік, цифрлық инфрақұрылыммен қамтамасыз етілудің нақты көрсеткіштерін және басқа да мәселелерді қамтуы тиіс.

Экологиялық ахуалды жақсарту, соның ішінде зиянды заттардың таралуы, топырақтың, жердің, ауаның жағдайы, қалдықтарды жою, сондай-ақ онлайн түрінде еркін қолжетімді экологиялық мониторинг жүргізу жүйесін дамыту жөніндегі жұмыстарды күшейту қажет.

Мүмкіндігі шектеулі тұлғаларға арналған «кедергісіз орта» қалыптастыруға зор мән берілуі тиіс.

2019 жылдың 1 қыркүйегіне дейін еліміздің басқарылатын урбанизациясының жаңа картасына айналатын еліміздің 2030 жылға дейінгі аумақтық-кеңістіктік дамуының болжамды схемасын әзірлеуді тапсырамын.

Практикалық шараларды жүзеге асыру үшін нақты іс-шараларды, жобаларды және қаржыландыру көлемін көрсете отырып, Өңірлерді дамытудың 2025 жылға дейінгі прагматикалық бағдарламасын әзірлеуді тапсырамын.

Өңірлік дамудың аталған аспектілері іске асырылу мерзімдері 2025 жылға дейін ұзартылуға тиіс «Нұрлы жол» және «Нұрлы жер» мемлекеттік бағдарламаларында ескерілуі керек.

Біріншісі көлік инфрақұрылымын дамытуға, екіншісі коммуналды және тұрғын үй құрылысындағы міндеттерді шешуге бағытталуы тиіс. Бұл бағдарламалардың «екінші тынысын» ашу керек.

ҮШІНШІ. Құқық қорғау органдарының жұмысына терең және сапалы өзгерістер қажет.

Қауіпсіздік тұрмыс сапасының ажырамас бөлігі болып саналады.

Ішкі істер органдарының қызметкерлері қылмыспен күресте «алдыңғы шепте» жүреді, көбіне өз басын қатерге тігіп, азаматтарды қорғайды. Сонымен қатар қоғам құқық қорғау органдарының, ең алдымен, полиция жұмысының түбегейлі жақсаруын күтіп отыр.

Үкіметке Президент Әкімшілігімен бірлесіп, «Ішкі істер органдарын жаңғырту жөніндегі жол картасын» қабылдауды тапсырамын. Реформалар 2019 жылдың 1 қаңтарынан бастап жүзеге асырыла бастауы тиіс.

Біріншіден, Ішкі істер министрлігінің штаттық санын оңтайландырып, полицияны өзіне тиесілі емес функциялардан арылту қажет.

Үнемделген қаражатты полицейлердің жалақысын көбейтуге, олардың тұрғын үй және өзге де әлеуметтік мәселелерін шешуге бағыттаған жөн.

Екіншіден, полиция қызметкерінің жаңа стандартын бекітіп, мансаптық ілгерілеу, сондай-ақ полиция академиялары арқылы кадрларды даярлау мен іріктеу жүйесін өзгерту керек.

Қызметкерлердің бәрі қайта аттестациялаудан өтуі тиіс. Тек үздіктері ғана қызметін жалғастырады.

Үшіншіден, халықпен жұмыс істеудің жаңа заманауи форматтарын енгізіп, полицияны бағалаудың критерийлерін түбегейлі өзгерткен жөн.

Полицияның жұмысын сервистік модельге көшіру қажет. Азаматтар санасында полицейлер жазалаушы емес, керісінше, қиын жағдайда көмек көрсетуші деген түсінік орнығуы керек.

Қалалық және аудандық ішкі істер органдары жанында Халыққа қызмет көрсету орталықтарының қағидаты бойынша азаматтарды қабылдау үшін қолайлы жағдай жасау қажет. Қазақстанның бүкіл қалаларын қоғамдық қауіпсіздікке мониторинг жүргізу жүйелерімен жабдықтау керек.

Қоғам тарапынан білдірілген сенім деңгейі және халықтың өзін қауіпсіз сезінуі полиция жұмысын бағалаудың негізгі өлшемдері болуы тиіс.

ТӨРТІНШІ. Сот жүйесін одан әрі жаңғырту.

Соңғы жылдары көп жұмыс атқарылды, дегенмен басты міндет – соттарға деген сенімнің жоғары деңгейін қамтамасыз ету шешімін таппай отыр. Сонымен қатар құқық үстемдігі – біздің реформаларымыздың табысты болуының негізгі факторы.

Біріншіден, сот жұмысының заманауи форматтарын және озық электронды сервистер енгізуді жалғастырған жөн.

Жыл сайын 4 миллион азаматымыз  сотта қаралатын іске қатысады. Бұған қаншама күш пен қаражат жұмсалады! Уақыт пен ресурстардың орынсыз шығынын талап ететін артық сот рәсімдері қысқаруы тиіс. Бұрын адамдардың жеке өздерінің келуі талап етілсе, қазір оны алыстан жүзеге асыруға болады.

Екіншіден, сот жүйесінің сапалы дамуын және кадрларының жаңаруын қамтамасыз етіп, үздік заңгерлер судья болуға ұмтылатындай жағдай жасау керек.

Үшіншіден, әсіресе, бизнес пен мемлекеттік құрылымдар арасындағы сот арқылы шешілетін дау-дамайды қарау кезінде түсінікті әрі болжамды сот тәжірибесі керек, сондай-ақ судьяларға заңсыз ықпал ету мүмкіндіктерін жою қажет.

Жоғарғы сотқа Үкіметпен бірлесіп, жыл соңына дейін тиісті шаралар кешенін әзірлеуді тапсырамын.

* * *

Кез келген реформаларды іске асыру барысында өзінің барлық іс-қимылын халықтың әл-ауқатын арттыруға арнайтын жинақы әрі тиімді мемлекеттік аппарат маңызды рөл атқаратын болады.

 

  1. АЗАМАТТАР СҰРАНЫСЫНА БЕЙІМДЕЛГЕН МЕМЛЕКЕТТІК АППАРАТ

Жаңа кезең жағдайында мемлекеттік аппарат қалай өзгеруі тиіс?

БІРІНШІ. Мемлекеттік органдар қызметінің тиімділігін түбегейлі арттыру.

«Сапа» – мемлекеттік қызметші өмірінің жаңа стилі, ал өзін-өзі жетілдіру оның басты қағидаты болуға тиіс. Жаңа формацияның мемлекеттік қызметшілері мемлекет пен қоғам арасындағы алшақтықты қысқартуы тиіс. Бұл арқылы тұрақты кері байланыс орнығып, мемлекеттік саясаттың нақты шаралары мен нәтижелері қызу талқыланып, жұртшылыққа түсіндіріледі.

Мемлекеттік басқару академиясы Назарбаев Университетімен бірлесіп, «Жаңа формацияның басшысы» бағдарламасын және басшылық қызметтерге тағайындау кезінде арнайы қайта даярлаудан өткізетін курстар әзірлеуі қажет. Үздік шетелдік компанияларда жұмыс тәжірибесі бар немесе әлемнің жетекші университеттерінде білім алған жеке сектордағы кәсіби мамандарды тарту маңызды.

Биыл біз 4 мемлекеттік органға жалақы төлеудің жаңа моделін енгіздік. Барлық пилоттық жобалар жақсы нәтижелер көрсетіп отыр. Мемлекеттік қызметке қызығушылық артты, әсіресе, өңірлік деңгейде оның өзектілігі жоғары.

Тиімсіз шығындарды оңтайландыру және басшылық құрамын қысқарту есебінен төменгі және орта буындағы қызметкерлердің жалақысы 2-2,5 есе өсті. Кадрлардың жұмыстан кетуі 2 есе қысқарды. Беделді жоғары оқу орындарын бітірген түлектерді қоса алғанда, біліктілігі жоғары кадрлардың жеке сектордан келуі 3 есе артты. Мемлекеттік қызмет істері агенттігінде орталық аппаратқа арналған конкурс бір орынға 28 адамға дейін, ал өңірлік құрылымдарда бір орынға 60 адамға дейін өсті. Маңғыстау облысының әкімдігіндегі 1 бос орынға енді 16 адам, ал Әділет министрлігінде орта есеппен 13 адам үміткер болып отыр.

Астанада мемлекет-жеке меншік әріптестік аясында іске асырылып жатқан жобаларды қаржыландыруға қатысты жаңа тәсілдер есебінен ғана 30 миллиардтан астам теңге үнемделді.

Еңбекақы төлеудің жаңа моделіне көшу үшін мемлекеттік органдардың басшыларына «бюджеттік-кадрлық маневрді» жүзеге асыруға құқық бердім. Олар үнемделген қаражатты қызметшілердің жалақысын арттыруға бағыттау мүмкіндігін алды.

Қазіргі уақытта көптеген мемлекеттік органдар жаңа модельге көшуді қалап отыр. Ең бастысы, олар мұны тек жалақыны көбейту ғана емес, бәрінен бұрын жұмыстарының тиімділігін арттыру деп түсінуі керек.

Еңбекке төленетін қаржының өсімі бюджет шығысын, соның ішінде  бағынышты мекемелердің шығыстарын оңтайландыру және үнемдеу есебінен өтелуін бақылауда ұстауды тапсырамын. Бұл жерде аталған жобаның беделін түсірмес үшін формализм мен теңгермешілікке жол бермеу қажет.

ЕКІНШІ. Осы күрделі кезеңде бөлінетін әрбір теңгенің қайтарымының мол болуына қол жеткізу керек.

Тексерістер нәтижелері айқындап отырғандай, құрылыс құны кей жағдайда жобалық құжаттар әзірлеу кезеңінде-ақ арттырылып көрсетіледі. Соңына дейін жеткізілмейтін немесе перспективасы жоқ екені әуел бастан белгілі болған жобалар бар. Егер жүктелген іске жауапкершілік танытатын болсақ, бюджеттің жүздеген миллиард теңгесін үнемдеп, тұрғындардың нақты қажетіне бағыттауға болады.

Үкімет тиімсіз әрі уақтылы емес шығындарды болдырмай, шығыстарды оңтайландырып, қаражатты үнемдеу үшін жүйелі шаралар қабылдауы қажет.

ҮШІНШІ. Сыбайлас жемқорлықпен белсенді күрес жалғасатын болады.

Біріншіден, көрсетілетін мемлекеттік қызметтер аясында мемлекеттік қызметшілердің тұрғындармен тікелей қарым-қатынасын азайтуға қол жеткізген жөн.

Жер қатынастары мен құрылыс саласындағы бюрократтық рәсімдер жұртшылықты мазалайтын мәселелердің бірі болып саналады. Бұл салада ашықтық жоқ, халық пен бизнес ақпаратқа толық қол жеткізе алмай отыр.

Жер қоры мен жылжымайтын мүлік нысандары туралы мәліметтердің бірыңғай ақпараттық базасын жасауды тапсырамын. Осы мәселе бойынша тәртіп орнатып, жерді нақты инвесторларға беру керек! Бұл – бір ғана мысал.

Жұрттың және бизнес қоғамдастығының наразылығын туғызатын басқа да бағыттар бойынша тиісті жұмыстар жүргізу керек.

Жалпы, 2019 жылы көрсетілетін мемлекеттік қызметтердің 80 пайызы, ал 2020 жылы кемінде 90 пайызы электронды форматқа көшірілуі тиіс. Сол үшін Мемлекеттік көрсетілетін қызметтер туралы заңды жедел жаңарту керек.

Екіншіден, қарамағындағы қызметкерлер сыбайлас жемқорлыққа қатысты құқықбұзушылық жасаған жағдайда бірінші басшылардың жеке тәртіптік жауапкершілігін күшейту мәселесін пысықтау қажет.

Сонымен қатар адал жұмыс істейтін қызметкер тексерушілерден қорықпауға тиіс.

Үшіншіден, «Сыбайлас жемқорлықтан ада өңірлер» жобалары аясында елорданың жемқорлыққа қарсы стратегияны жүзеге асыру жөніндегі тәжірибесін тарату керек.

ТӨРТІНШІ. Үкімет пен барлық мемлекеттік органның жұмысында формализм мен бюрократияны азайту қажет.

Соңғы кездері Үкіметтегі, мемлекеттік органдардағы ұзақ отырыстар мен кеңестердің саны еселеп артып, сондай-ақ құжат айналымы елеулі түрде көбейді. Үкімет әкімдердің және олардың орынбасарларының қатысуымен күніне 7 кеңес өткізетін кездері де болады. Олар қай кезде жұмыс істейді? Мұны доғарып, бұл мәселені ретке келтіру керек.

Өздеріне нақты міндеттемелер алуға және солар үшін жария түрде есеп беруге тиіс министрлер мен әкімдерге шешім қабылдау еркіндігін ұсыну қажет. Еліміздің 2025 жылға дейінгі дамуының стратегиялық жоспарының әзірленген көрсеткіштер картасы бұған негіз болуы тиіс.

БЕСІНШІ. Қойылған міндеттерді тиімді жүзеге асыру үшін реформалардың жүргізілуіне бақылау механизмдерін күшейту қажет.

Үкімет пен мемлекеттік органдар жыл соңына дейін дамудың аталған барлық мәселесін қамти отырып, нақты индикаторлар мен «жол карталарын» әзірлеуі тиіс, сондай-ақ реформаларды іске қосу үшін қажетті заң жобаларының бәрін Парламентке уақтылы енгізуі керек. Өз кезегінде Парламент оларды сапалы әрі жедел қарастырып, қабылдауы тиіс.

Реформалар мен негізгі стратегиялық құжаттардың жүзеге асырылу барысына мониторинг жүргізіп, бағалау үшін қажетті өкілеттіктер бере отырып, Президент Әкімшілігінде Ұлттық жаңғыру офисін құруды тапсырамын. Бұл офис статистикалық көрсеткіштерге мониторинг жүргізуден бөлек, Экономикалық ынтымақтастық және даму ұйымының тәжірибесіне сәйкес, тұрғындар үшін өзекті мәселелер жөнінде халық пен бизнес өкілдері арасында тұрақты түрде сауалнама жүргізуді қамтамасыз етеді. Офис әрбір бағыт бойынша қалыптасқан  жағдай жөнінде маған үнемі баяндап отырады.

Үкіметтің әрбір мүшесі, мемлекеттік органдар мен компаниялардың басшылары алға қойылған міндеттердің орындалуына дербес жауап беретін болады.

 

  1. ТИІМДІ СЫРТҚЫ САЯСАТ

Қазақстанның табысты жаңғыруын қамтамасыз ету үшін бастамашыл белсенді сыртқы саясатты одан әрі жүзеге асыру қажет.

Біздің бейбітсүйгіш бағытымыз бен осы саладағы нақты айқындалған қағидаттарымыз өзін-өзі толық ақтап отыр. Қазақстанның Ресей Федерациясымен қарым-қатынасы мемлекетаралық байланыстардың эталоны болып саналады. Толыққанды интеграциялық бірлестік әрі әлемдік экономикалық қатынастардың белсенді мүшесі ретінде қалыптасқан Еуразиялық экономикалық одақ табысты жұмыс істеуде. Орталық Азия өңірінде өзара ықпалдастықтың жаңа парағы ашылды. Қытай Халық Республикасымен жан-жақты стратегиялық серіктестігіміз дәйекті түрде дамып келеді. «Бір белдеу – бір жол» бағдарламасы Қытаймен қарым-қатынасымызға тың серпін берді. Менің қаңтар айындағы Вашингтонға ресми сапарым және Президент Дональд Трамппен жүргізген келіссөздерім барысында Қазақстан мен АҚШ-тың XXI ғасырдағы кеңейтілген стратегиялық серіктестігі жөніндегі уағдаластыққа қол жеткізілді.

Біз сауда және инвестиция саласындағы ірі серіктесіміз – Еуропа Одағымен қарқынды ынтымақтастығымызды жалғастыра береміз. ТМД елдерімен, Түркиямен, Иранмен, Араб Шығысы және Азия елдерімен өзара тиімді екіжақты қатынастар дамып келеді.

Ақтау қаласындағы саммитте қабылданған Каспий теңізінің құқықтық мәртебесі туралы конвенция Каспий маңы елдерімен ынтымақтастықтың жаңа мүмкіндіктеріне жол ашады.

Қазақстан Біріккен Ұлттар Ұйымының Қауіпсіздік Кеңесіндегі миссиясын абыроймен аяқтап келеді. Сирия жөніндегі Астана процесі бейбіт жолмен реттеу және осы елдің дағдарыстан шығуы жөнінде тиімді жұмыс жүргізіп жатқан бірден-бір келіссөздер форматына айналды.

Сонымен қатар қазіргі күрделі жағдайда Қазақстан Республикасының сыртқы саясаты бейімделуді және ұлттық мүддені прагматизм қағидаттарына сәйкес ілгерілетуді талап етеді.

* * *

Барлық кезеңде де табысқа деген нық сенім мен халықтың бірлігі ғана ел тағдырын шешкен. Бірлескен күш-жігеріміздің арқасында ғана біз ұлы асуларды бағындыра аламыз.

 

 

VІ. ӘРБІР ҚАЗАҚСТАНДЫҚТЫҢ ЕЛІМІЗДЕГІ ӨЗГЕРІСТЕР ҮДЕРІСТЕРІНЕ АТСАЛЫСУЫ

Әрбір қазақстандық жүргізіліп жатқан реформалардың мәнін және олардың Отанымызды өркендету жолындағы маңызын жете түсінуі тиіс. Реформаларды табысты жүзеге асыру үшін қоғамымыздың ортақ мақсатқа жұмылуы аса маңызды.

«Рухани жаңғыру» бағдарламасы жаппай қолдауға ие болып, қоғамдағы жаңғыру үдерістеріне зор серпін берді. Бұл бастаманы әрі қарай жалғастырып қана қоймай, оның аясын жаңа мазмұнмен және бағыттармен толықтыру қажет.

Жастар мен отбасы институтын кешенді қолдау мемлекеттік саясаттың басымдығына айналуға тиіс. Жастардың барлық санатын қолдауға арналған шараларды толық қамтитын әлеуметтік сатының ауқымды платформасын қалыптастыру керек.

Келесі жылды Жастар жылы деп жариялауды ұсынамын.

Біз ауылдық жерлердің әлеуметтік ортасын жаңғыртуға кірісуіміз қажет. Бұған арнайы «Ауыл – ел бесігі» жобасының іске қосылуы септігін тигізеді. Бұл жоба арқылы өңірлердегі еңбекке қатысты идеологияны ілгерілетуді қолға алу керек.

Бойскаут қозғалысы сияқты «Сарбаз» балалар-жасөспірімдер бірлестігін құрып, мектептерде әскери-патриоттық тәрбиенің рөлін күшейткен жөн.

«Өз жеріңді танып біл» жаңа бастамасы аясында еліміздің өңірлері бойынша жаппай мектеп туризмін қайта жаңғырту керек.

Бүгінде халықтың әлеуметтік көңіл күйін айқындайтын негізгі салаларда теңдессіз шаралар ұсынылып отыр.

Бастамалардың қаржылық көлемі 1,5 триллион теңгеден асады, ал жиынтық әсері одан да көбірек. Бұл халықтың өмір сүру деңгейін арттыруға зор серпін береді. Бұл – ең сенімді әрі тиімді инвестиция.

 

Қымбатты қазақстандықтар!

Халқымыздың бақуатты өмір сүруі және еліміздің озық дамыған 30 елдің қатарына қосылуы – Тәуелсіз мемлекетіміздің мәңгілік мұраты. Біз қашан да заман сынына тегеурінді іс-қимылмен төтеп беріп келеміз. Бұл, ең алдымен, ел ынтымағының арқасы. «Ынтымақты елдің ырысы мол» дейді халқымыз. Бүгінгі кезеңнің де талабы оңай емес. Бірлігіміз мызғымаса, ынтымағымыз ыдырамаса, біз үшін алынбайтын асу, бағынбайтын белес болмайды.

Мен әрбір Жолдауымда халықтың әлеуметтік жағдайы мен тұрмыс сапасын жақсартуға ерекше мән беріп келемін.

Қазіргі «7-20-25», «Нұрлы жол», «Нұрлы жер» және басқа да мемлекеттік бағдарламалардың басты мақсаты – халқымыздың тұрмыс сапасын жақсарту.

Қазақстанның бағындыратын биіктері әлі алда. Осы жолда халық сенімі рухымызды жігерлендіріп, бойымызға күш-қайрат дарытады. Сол сенімді ақтаудан артық мұрат жоқ!

   

Мәлік  ҚҰЛШАР, облыстық  мәслихаттың  хатшысы:

– Елбасымыз Нұрсұлтан Әбішұлы Назарбаевтың Қазақстан халқына Жолдауы  халқымыздың әлеуметтік жағдайын жақсартуға, тұрмысын түзетуге арналған. Біздің көңілімізге қонғаны – білім, денсаулық саласында жұмыс істеп жүрген жерлестеріміздің жалақысының көбейетіні. Сондайақ аймақтарды дамыту үшін арнайы бағдарламалар жоспарлануы да ел ішіне тың серпіліс берері сөзсіз. Өйткені біздің облысымыз өндіріспен бірге ауыл шаруашылығын да дамытып отыр. Болашақта аймақтарда өндіріс орындары мен әлеуметтік нысандардың салынуы  сол жердегі өндірістің дамуына тікелей байланысты болады.  Бұл жұмыстардың  барлығы да біздің ауылдарымыздың дамуына, халқымыздың тұрмысының түзелуіне үлкен әсер етеді деп ойлаймын. Келесі жылдың «Жастар жылы» деп жариялануы жастардың өміріне тың серпін береді деп білемін. Сондай-ақ «Ауыл – ел бесігі» деген үлкен бағдарламаның қабылдануы біздің облысымыздағы ауылдардың қарыштап дамуына, халқымыздың әл-ауқатының артуына тікелей  әсер  етеді  деп  санаймын.

Галина ВОЛКОГОН, Шыңғырлау аудандық  мәслихатының хатшысы:

– Жолдау маған өте ұнады. Мемлекет басшысы  халықтың көкейінде жүрген көптеген мәселелерге тоқталып, медицина, білім беру, тұрғын үй шаруашылығы саласына ерекше көңіл бөлді. Жолдауда көтерілген мәселелерің барлығы да ауыл мен аудан, облыста да кездеседі. Елбасы  Жолдауының жалғасын тапқаны қуантады. Елбасы  ұсынған «Нұрлы жол», «Нұрлы жер» бағдарламалары бойынша атқарылып жатқан жұмыстардың нәтижелерін көріп жүрміз. Үйлер салынып, жолдар жөнделуде. Бұл Жолдауында да «7-20-25» бағдарламасы бойынша тапсырмалар берді. Ал  тұрғын үйге қол жеткізуге мүмкін-дік беретін бұл бағдарламаның жастар мен жас отбасылар, жалпы  халқымыз үшін маңызы зор.  Бүгінде  «7-20-25»  бағдарламасы жұмысын бастады және әрі қарай жалғасын табады деген үміттемін. Жер мәселесіне көңіл бөлгенін ерекше айтып өтер едім. Медициналық қызмет көрсету мен білім беру сапасына тоқталды. Мектепке дейінгі білім беруді ерекше атап өтті. Мұндай Жолдаулар бізге қажет  және  біз  Елбасын  толықтай  қолдаймыз.

Арыстанғали ҚОЙЫСОВ, соғыс  және  еңбек  ардагері, Жаңақала ауданы:

– Кеше  теледидардан Елбасымыз Нұрсұлтан Назарбаевтың Қазақстан халқына дәстүрлі Жолдауын үлкен қанағаттанарлық сезімде отырып тыңдадым.

Президентіміз ел ахуалына қысқаша тоқтала келіп, міндеттерді кең саралап берді. Биылғы Жолдаудың ерекшелігі – Қазақстан халқының тұрмыс сапасын жақсарту, әлеуметтік мәселелерге ерекше басымдық берді. Алдағы жаңа жылдан бастап еңбек адамдарының жалақысы өсетін болды. Шағын және орта кәсіпкерлікті дамыта беру, бәсекелестікті кү-шейте түсу, кәсіпкерлік саланы қолдау мен қорғау  мәселелеріне  тоқталды.

Маған ұнаған мәселе – өз өнімдерімізді сапалы өндіріп, әлемдік саудаға шығаруға басымдық бергені болды. Халықаралық нарыққа өз өніміміз  көбірек шықса, соғұрлым  басқа ел тауарына тәуелдігіміз азаяды. Ол ел тұрмысының жақсаруына оң әсер етеді. Осы бағытта өндірілген өнімді өңдеу ісін жетілдіре түсуді тапсырды. Сол сияқты туризмді жетіл-діру мен  инновациялық дамудың маңызына баса назар аударды.

Қаржы саясаты, бюджеттің шығысын дұрыс жоспарлау, білім мен денсаулық саласына  үлкен мән беріп,  нақты міндеттерді белгіледі. Жол, халықты баспанамен қамту, құқық қорғау  құрылымдарымен мемлекеттік қызмет ісін жетілдіру де қалыс қалған жоқ. Қысқасы, Елбасымыздың биылғы Жолдауы да ел үшін аса құнды,  халық  толық  қуаттайды  деп  сенемін.

Құрманғазы ҚУАНЫШӘЛИЕВ, Тайпақ орман және жануарлар дүниесін қорғау жөніндегі мемлекеттік мекемесінің директоры, аудандық мәслихаттың депутаты, Ақжайық ауданы:

–  «Төртінші өнеркәсіптік революция жағдайындағы дамудың жаңа мүмкіндіктері» атты өткен қаңтардағы Жолдауда технологиялық, экономикалық және әлеуметтік салалардағы терең де қарқынды өзгерістер кезеңіндегі әлемге бейімделуге байланысты Елбасымыз Нұрсұлтан Назарбаев 10 басым міндетті алға қойғаны мәлім. Осы орайда елімізде ұлан-ғайыр істер қолға алынып, рет-ретімен жүзеге асырылуда. Соның бәрін одан әрі шыңдап, қанаттандыру үшін тәртіп, реттілік салтанат құруы тиіс. Мен Президенттің жаңа Жолдауы жайында осылай түйіндер едім.

Жаңа Жолдауда, бір сөзбен айтсақ, жер-жерде, барлық мемлекеттік құрылымда заңдылықтың үстем тұруы өзек болып тартылды. Онсыз, әрине, әлемдегі ең өркендеген 30 елдің қатарына қосыла алмаймыз, жаһандағы ғылыми-техникалық прогресс көшінен артта қаламыз. Елбасы «көлеңкелі экономикамен» күреске ерекше назар аударды. Экономикалық тексеріс қызметінің құрылатыны қазақстандықтардың ойынан шықты деп білемін. Бұл, айталық, салықтың мезгілінде, тіпті мүлдем төленбеуі секілді кесірлерге тосқауыл қойып, нөсердің арасымен су болмай өтуге тырысушылардың аяғын жиюына әкеледі. Тәртіп деген сол.

Шағын және орта бизнесті қолдауға қатысты алдағы кезде ауқымды іс-шаралар орындалатыны да көңілімді өсірді. Аудандық мәслихаттың депутаты ретінде түрлі кәсіп иелерімен қарымқатынаста жүргендіктен, олардың көкейкесті мәселелерінен біршама хабардармын. Жаңа Жолдау жер-жердегі кәсіпкерлерге тың ұмтылыс береді деп санаймын.


Облыс және Орал қаласы әкімдіктеріндегі тағайындаулар

Күні: , 101 рет оқылды

Кеше  өңір  басшысы  Алтай  Көлгінов  аппарат  жиналысында облыс  әкімі  аппаратының  жаңа  басшысын  таныстырды.

Бұған дейін Батыс Қа­зақстан облысы әкімі аппаратына басшы­лық жасаған Қанат Қанаев­тың ҚР Президенті Әкімшілігі­нің мемлекеттік инспекторы қызметі­не ауысуына байланысты ор­нына жаңа басшы келді. ҚР Президенті Әкімшілігінің келісімі бойынша Батыс Қазақ­стан облысы әкімінің өкімімен Рахымжан Ержанұлы Исақұлов облыс әкімі аппаратының басшысы болып тағайындалды. Ра­хымжан Ержанұлының білі­мі – жоғары. «Болашақ» бағ­дар­ламасымен Роял Холловей Лондон университетін «Эконо­мика және менеджмент бака­лавры» мамандығы бойынша тәмамдаған. Жас көшбасшы­­лар бағдарламасы аясында Жа­пония үкіметінің гранты негізінде Саяси зерттеулер ұлт­тық институтының «мемлекет­тік басқару магистрі» маман­дығында оқыды. ҚР Президен­ті Әкімшілігінде әр түрлі қыз­мет­тер атқарған. Бұған дейін ҚР Президенті Әкімшілігі мемлекеттік бақылау және аумақтық-ұйымдастыру жұмысы бөлі­мін­де мемлекеттік инспектор қыз­метін атқарды. Қанат Қанаевтың атқарған қызметі үшін алғысын білдірген облыс әкімі «2016 жылдың мамыр айынан бері облыс әкімі аппаратының басшысы болған Қ. Қанаев қызмет атқар­ған уақытта Елбасының кадр таңдаудағы талаптары, атап ай­тар болсақ, меритократия қа­ғидасы қатаң сақталып, «орта­лық-өңір», «өңір-орталық» және облыс орталығы-аудандар» ротациялау жүйесі сәтті жүзеге асырылды» деп атап өтті. Айта кетейік, осы аралықта мемлекеттік органдарға 100-ге жуық, оның ішінде облыс әкі­- мі аппаратының 32 қызметке­рі бас­шылық лауазымға осы қа­ғидаттарға сай тағайындалды. Қызметі бойынша жоғарылаған азаматтардың 95 пайызы – жергілікті кадрлар. Конкурстық комиссияның шешіміне сәйкес Батыс Қазақстан облысының құ­рылыс басқармасының басшысы лауа­зымына Алтынбек Кеңесұлы Қайсаға­лиев тағайын­дал­ды. А. Қайсағалиевтің білімі – жоғары. Л. Гу­милев атындағы Еу­разия ұлттық уни­вер­ситетінің «құ­ры­лыс» мамандығын­да, Қа­зақ экономика, қар­жы жә­не халық­аралық сауда уни­верситетінің «мем­- лекеттік жә­­не жергі­лікті бас­қа­­ру» мамандығында оқы­ды. «Бо­лашақ» бағдарламасымен Бат университе­- тін (Ұлы­­бри­тания) «менеджмент техноло­гиясы» ма­ман­дығы  бойынша  тәмам­даған. Әр жылдары: – ҚР Президенті Әкімшілігінің мемле­кеттік бақылау мен аймақтық-ұйымдасты­ру бөлімінің консультант,  инспекторы; – «Нұр Отан» халықтық-демократия­лық партиясы орталық аппараты хатшы­лы­ғы­ның  меңгерушісі; – Орал қаласы әкімі аппараты басшысы; – Алматы қаласы кәсіпкерлік және ин­дустриалдық-инновациялық даму басқар­масы  басшысының  орынбасары; Бүгінге дейін  Орал қаласы  әкімінің  орын­басары  қызметін  атқарды.   Конкурстық комиссияның шешіміне сәйкес Орал қаласы әкімінің орынбасары лауазымына Бекжан Нұрланұлы Тоқжанов тағайындалды. Б. Тоқжановтың білімі – жоғары. Батыс Қазақстан ауыл шаруашылығы институты «бухгалтерлік есеп және аудит» мамандығында, Батыс Қазақстан ин­же­нерлік-гуманитар­лық уни­верситеті­нің «құрылыс мате­риалдарын, бұйым­дары мен конструкцияларын өндіру» ма­мандығында оқыды. Әр жылдары: – Орал қаласының тұрғын үй-комму­нал­дық шаруашылық, жолаушы көлігі және автомобиль жолдары бөлімінің мемлекеттік коммуналдық жол пайдалану кәсіпор­нын­да – пайдалану учаскесінің инженері, пайдалану бөлімінің бастығы; – Орал қаласы экономика және бюд­жеттік жоспарлау бөлімінің бас маманы; – Орал қаласы құрылыс бөлімінің бас маманы; – Орал қаласының тұрғын үй-комму­нал­дық шаруашылық, жолаушы көлігі және автомобиль жолдары бөлімі басшысының орынбасары; Бүгінге дейін Батыс Қазақстан облыс­тық энергетика және тұрғын үй-коммунал­дық шаруашылық басқармасы басшысының орынбасары  қызметін  атқарды.   Конкурстық комиссияның шешіміне сәй­кес Орал қаласы әкімінің аппарат басшысы лауазымына Ерболат Нұрлан­ұлы  Кәрімов тағайындалды. Е. Кәрімовтің білі­мі – жоғары. А. Пушкин атындағы Батыс Қазақстан мемле­кет­тік универси­тетінің «Құқық және эконо­мика негіздері»,  «Құ­қық және экономика» пәнінің мұғалі­­мі мамандығында, қа­­зақ-орыс халық­ара­лық университеті «юрис­­­­пруденция бакалавры» маманды­ғын­да  оқыды. Әр жылдары: – Орал қаласы әкімі аппаратының мемлекеттік-құқықтық жұмыстар бөлімінің бас маманы,  бас инспекторы; – Орал қаласы әкімі аппаратының ұйым­дастыру-бақылау, кадр жұмысы және мем­лекеттік қызмет көрсету мониторинг бө­лімінің  бас маманы; – Орал қаласының тұрғын үй-комму­нал­дық шаруашылық, жолаушы көлігі және автомобиль жолдары бөлімінің мемлекет­тік-құқықтық  меңгерушісі; – Бөрлі ауданының тұрғын үй-ком­му­налдық шаруашылық, жолаушы көлігі жә­не автомобиль жолдары бөлімі меңге­рушісінің орынбасары; Бүгінге дейін Орал қаласы әкімі аппа­ратының мемлекеттік-құқықтық жұмыс­тар бөлімінің  басшысы  қызметін  атқарды.

Облыс  әкімінің  баспасөз  қызметі


Жаңа басқарманың алғашқы басшысы

Күні: , 159 рет оқылды

Бүгін  облыс  әкімінің  орынбасары  Миржан  Сатқанов жаңадан  құрылған  ақпараттандыру,  мемлекеттік көрсетілетін  қызметтер  және  архивтер  басқармасының басшысын  таныстырды.  Конкурстық  комиссияның шешіміне  сәйкес  Батыс  Қазақстан  облысы  ақпараттандыру,  мемлекеттік  көрсетілетін  қызметтер  және   архивтер  басқармасының  басшысы  лауазымына  Сәкен  Рүстемұлы  Нұртазаев  тағайындалды.

Сәкен Рүстемұлы Нұртазаев – 1985 жылы дүниеге келген. Білімі жоғары. 2007 жылы Қазақстан-Британ техникалық университетін инженер-технолог мамандығы бойынша, 2011 жылы Стерлинг университетін менеджмент мамандығы  бойынша  тәмамдаған.

Еңбек жолын 2007 жылы «КазТрансГаз «Аймақ» өндірістік департаментінің жетекші маманы қызметінен бастады. 2009 жылдан бастап мемлекеттік қызметте, ҚР Мемлекеттік қызмет істері агенттігі басқармасының сарапшысы болды. 2010-2012 ж. ҚР Президентінің жанындағы Мемлекеттік басқару академиясында (Астана) сектор меңгерушісі, 2012 жылдан бастап ШҚО әкімі аппаратының бас инспекторы, Шемонаиха ауданы әкімінің орынбасары, Семей қаласы әкімінің орынбасары, 2016 жылдан қазіргі күнге дейін Орал қаласы әкімі аппаратының басшысы болып істеді. Бұл қызметте «Ашық әкімдік», «Smart city» жобаларын дамыту бойынша мемлекеттік қызмет көрсетудің цифрландыру саласына  жауап  берді.

Еске салсақ, Елбасының «Цифрлық Қазақстан» бағдарламасын жүзеге асыру мақсатында облыс әкімі Алтай Көлгіновтің өкімімен жаңадан ақпараттандыру, мемлекеттік көрсетілетін қызметтер және архивтер басқармасы құрылған болатын. Аталған басқарма өңір экономикасының барлық салаларын цифрландыру, халыққа мемлекеттік қызмет көрсету, ақпараттық-коммуникациялық технологиялар мен «Smart city» жобаларын дамыту бойынша  жұмыстарды  жалғастыратын  болады.

Облыс  әкімінің  баспасөз  қызметі


Білім бақылау департаментінде жаңа басшы

Күні: , 371 рет оқылды

ҚР Білім және ғылым министрлігінің бұйрығымен Нұрлан Сабыров БҚО білім саласындағы бақылау департаментінің басшысы болып тағайындалды.

Департаменттің жаңа басшысын ҚР БҒМ Білім және ғылым саласындағы бақылау комитеті басшысының міндетін атқарушы Ғалымжан Жұмашев таныстырып, жұмысына сәттілік тіледі.

– Бүгінде Ақ Жайық өңіріндегі білім жүйесі жақсы жолға қойылған. Білім және ғылым министрлігі қабылдаған барлық нормативтік актіні орындау, соның ішінде жаңа білім бағдарламаларын жүзеге асыру бойынша нәтижелер жаман емес. Алдағы Ұлттық бірыңғай тестілеуден де жоғары баға аламыз деген үміттеміз. Бұлардың барлығы қарапайым мұғалімнен бастап, сала басшылығында жасап отырған жандарға дейінгі әріптестеріміздің атқарып жүрген еңбектерінің арқасы деп есептейміз. Нұрлан Меңешұлы – аудан басқарған, облыстық білім басқармасында жауапты жұмыс жасаған,  яғни бұл жүйені жақсы меңгерген маман. Оның білімі мен тәжірибесі осы саланы әрі қарай дамытуға септігін тигізеді деген үміттеміз, – деді шара барысында облыс әкімінің орынбасары Ғабидолла Оспанқұлов.

Өз кезегінде Нұрлан Сабыров жаңа қызметті адал атқаруға  тырысатынын жеткізіп, сенім білдірген жандарға ризашылығын айтты.

Ясипа  РАБАЕВА,

«Орал  өңірі»


Тасқала ауданына әкім болып Алдияр Халелов тағайындалды

Күні: , 178 рет оқылды

Бүгін, 4 маусым күні, ҚР Президенті Әкімшілігі мен Тасқала ауданының мәслихатының келісімімен ротация бойынша Тасқала ауданына жаңа әкім тағайындалды. Бұған дейін Бөрлі ауданының әкімі болып Алдияр Халелов қызмет ақарған.

Жаңа аудан басшысын облыс әкімі Алтай Көлгінов аудан активіне таныстырды.

1958 жылдың 11 қыркүйегінде Орал облысы, Жәнібек ауданы «Қайрат» совхозында дүниеге келген. Білімі жоғары. 1981 жылы, Жамбыл гидромелиоративті – құрылыс институтын «Гидромелиорация; инженер – гидротехник» мамандығы бойынша бітірді.

1981 жылдың қыркүйек 1988 жылдың қыркүйек айлары аралығында Приурал ауданы, Трекин ауылындағы Желаев аудандық арнайы ауылшаруашылық бірлестігінің аға инженер-гидротехнигі, кәсіподақ ұйымының төрағасы.

1988 жылдың қыркүйек 1990 жылдың қаңтар айлары аралығында Приурал ауданы, Рубежин ауылындағы М.Маметова атындағы колхозының партия комитетінің хатшысы.

1990 жылдың қаңтар 1996 жылдың желтоқсан айлары Приурал ауданының Трекин  ауылдық кеңесі төрағасы, Трекин ауылдық әкімшілік басшысы, Трекин ауылдық округінің әкімі.

1996 жылдың желтоқсанынан 1997 жылдың тамызына дейін Приурал ауданы әкімінің бірінші орынбасары.

1997 жылдың тамыз айынан 2002 жылдың сәуір айына дейін Зеленов ауданы әкімінің орынбасары.

2002 жылдың сәуір-мамыр айлары Батыс Қазақстан облысы лицензиялау және сәулет – құрылысы аумақтық басқармасы филиалы бас маманының міндетін атқарушы.

2002 жылдың мамыр 2011 жылдың қараша айларында Зеленов ауданы әкімінің орынбасары қызметін атқарған.

2011 жылдан 2016 мамыр айына дейін Шыңғырлау ауданының әкімі болды.

2016 жылдың мамыр айынан бастап Бөрлі ауданының әкімі болды.

Облыс әкімінің баспасөз қызметі


Бөрлі ауданына жаңа әкім тағайындалды

Күні: , 123 рет оқылды

Кеше 4 маусым күні ҚР Президенті Әкімшілігі мен Бөрлі ауданының мәслихат депутаттарының келісімімен ротация бойынша Санжар Әлиев Бөрлі  ауданының әкімі болып тағайындалды.

Облыс әкімі Алтай Көлгінов Бөрлі аудандық мәслихатының кезектен тыс сессиясына қатысып, аудан активіне жаңа әкімді таныстырды.

Санжар Жұматайұлы Әлиев 1978 жылы туған. Білімі жоғары, 2000 жылы Қазақ мемлекеттік аграрлық университетін экономист-бухгалтер,  2002 жылы Орталық Азия университетін заңгер мамандықтары бойынша бітірген.

2001-2002 жылдары ҚР Білім және ғылым министрлігінің бюджетті жоспарлау және қаржы департаменті бас маманының міндетін атқарушы, бөлім бастығы, индикативтік және қаржылық жоспарлауды жиынтық талдау және қаржы басқармасының жетекші маманы.

2002-2012 жылдары қаржы полициясында,  Ақмола, Солтүстік Қазақстан, Павлодар облыстары бойынша экономикалық қылмысқа және сыбайлас жемқорлыққа қарсы күрес департаменті бастығының орынбасары қызметтерін атқарған.

2012 жылдан ҚР Президенті Әкімшілігі құқық қорғау жүйесі бөлімінің сарапшысы, инспекторы.

2013 жылғы 18 қарашадан Тасқала ауданының әкімі.

Облыс әкімінің баспасөз қызметі


ҚР Президенті Нұрсұлтан НАЗАРБАЕВ: «Бөкей ордасы мен Жәнібекке жол салынады»

Күні: , 212 рет оқылды

Мемлекет басшысы Нұрсұлтан Назарбаев Батыс Қазақстан облысына жұмыс сапары барысында өңірдегі іргелі кәсіпорындарда болып, сондай-ақ жұртшылық өкілдерімен кездесті.

 

Жаңа  технология – табыс  кепілі

Президент алдымен «Квант» ЖШС-ның цехында жиынтық жиһаз жасаудың технологиялық үдерістерімен танысты. Мұнда кәсіпорынның қазіргі қаржы-шаруашылық жағдайы туралы мәлімделіп, өндіріс ауқымын ұлғайту және дайын өнім тізбесін кеңейту жоспары жөнінде айтылды.

Индустрияландыру картасына енгізілген жиһаз фабрикасын ашу үшін (жоба құны – 1,1 млрд. теңге) кәсіпорынға кезінде «Бизнестің жол картасы – 2020» бағдарламасы аясында мемлекеттен қолдау көрсетілген болатын. Мұнда германиялық Nomag фирмасының жабдықтары орнатылған. Жиһаз фабрикасында жатын, ас үй және балалар гарнитурлары, басқа да түрлі жиһаздар шығарылады. Жұмсақ және жиынтық жиһаз үшін пенополиуретан мен матрастар да өндіріледі.

Фабриканы аралау кезінде Батыс Қазақстан облысының әкімі Алтай Көлгінов Нұрсұлтан Назарбаевқа өңірдің әлеуметтік-экономикалық даму барысы, соның ішінде өнеркәсіп секторының, шағын және орта бизнестің қазіргі ахуалы мен болашағы жөнінде баяндап берді.

Бұдан бөлек кәсіпорын аумағында Елбасына индустриялық-инновациялық даму бағдарламасы аясында жүзеге асырылып жатқан жобалар таныстырылды. Атап айтқанда, фин технологиясы бойынша тұрмыстық қатты қалдықтарды қайта өңдеу жүйесін жаңғырту, ірі қара мен ұсақ малдың терісін өңдеу, нан және макарон өнімдерін өндіру, химия өндірісі, дизель отынының компоненттерін сумен тазалауға арналған  жобалар  бар.

Елбасы одан кейін Зеленов ауданы Щапов ауылында орналасқан «Жайық Агро LTD» ЖШС-ның құс фабрикасына ат басын бұрды. Жылына 7200 тонна құс етін өндіретін фабрика өткен жылы Президенттің қатысуымен болған телекөпір барысында іске қосылған. Өнімнің 90 проценті ішкі нарыққа жіберілсе, 10 проценті сыртқы  нарыққа  шығарылады.

Қабырғаға және шатырға арналған материалдарды, шыны және металл бұйымдарын шығаратын «Агран» зауытында кәсіпорынның қазіргі дамуы және мемлекеттік инвестициялық бағдарламаларға қатысу арқылы оның өндірістік қуатын арттыру жайы сөз болды. Президент кәсіпорынның өндірістік үдерісімен танысып, дайын өнім үлгілерін көрді.

Сонымен қатар «Мясодел» және «Кублей» брендтерінің ет өнімдерін дайындаумен және өндірумен айналысатын жергілікті кәсіпорындардың жұмыстары да назардан тыс қалған жоқ.

Елбасы «Батыс Қазақстан машина жасау компаниясы» АҚ-да көмірсутегі шикізатын өндіру және тасымалдау саласында пайдаланылатын құрылғылар мен жабдықтар жасау үдерісімен танысты. Президентке кәсіпорынның технологиялық қуаты, сондай-ақ зауытта жасалған қорғаныс өнімдері – атыс қаруы мен оқ-дәрі үлгілері  көрсетілді.

«Орал – Қазақстан бойынша  экологиялық  жағынан ең  таза  қала»

Өндіріс нысандарын аралап болғаннан кейін Мемлекет басшысы Орал қаласындағы жаңа алаңға келді. Мұнда облысымыздағы Қазақстан халқы ассамблеясы мүшелерімен және зиялы қауым  өкілдерімен  жүздесті.

2016 жылы пайдалануға берілген аталмыш алаң құрылысының жобалық құны 1,4 млрд. теңгені құрайды. Қала тұрғындарының демалуына, мәдени-көпшілік шаралар өткізуге арналған алаңның жалпы ауданы 7,0222 га. Алаңның қыдыруға арналған аумағы мен отыратын орындары жалпы алғанда 8-10 мыңдай адамды сыйғыза алады.

Ел Президенті осы жерде мемлекеттік тұрғын үй бағдарламасының іске асырылуы, сондай-ақ Орал қаласын одан әрі дамыту жоспарымен танысты.

Мемлекет басшысына ескі үйлерді бұзып, орнына жаңа үй тұрғызу, сондай-ақ әлеуметтік сала нысандарының құрылысына инвестиция тарту барысы жөнінде мәлімдеме жасалды. Сонымен қатар облыс әкімі Алтай Көлгінов «Ақылды қала» тұжырымдамасы аясындағы жобалардың іске асырылуы туралы да баяндады.

Жаңа алаңдағы сәулетті құрылыстарға көңілі толатындығын жеткізген Елбасы көпшілік тарапынан қойылар сұрақ, көтерілер мәселелер болса, тыңдауға әзір екенін айтты.

– Аса қымбатты Нұрсұлтан Әбішұлы! Бізді, әсіресе, қуантатыны – наурыз айында Парламентте мәлімдеген бастамаларыңыз. Әрбір отбасын баспанамен қамтамасыз ету мүмкіндігі ашылып жатыр. Бұл, әрине, үлкен әлеуметтік мәселе екені даусыз. Сіз жастардың болашағына көп мән бересіз. Оларға сапалы білім беру, қала берді өзінің кәсібін ашу, студенттерді жатақханамен қамтамасыз ету секілді бастамаларыңыз да көкейге қуаныш ұялатады. Сондықтан да ақсақалдардың атынан сізге үлкен рақметімді айтып, ризашылығымды білдіргім келеді. Батысқазақстандықтар сіздің барлық игі бастамаңызды қолдайтынына сеніміміз кәміл, – деді Батыс Қазақстан облысы Қазақстан халқы ассамблеясының ақсақалдар кеңесінің төрағасы Рахметолла Сүйербаев.

Кездесу барысында сөз алған Қазақстан Жазушылар одағы БҚО филиалының төрайымы, ақын Ақұштап Бақтыгереева бастаған зиялы қауым өкілдері, сондай-ақ этномәдени бірлестік жетекшілері Елбасы саясатына қатысты ризашылықтарын білдірді.

– Ақ Жайық өңіріне әдейі ат басын бұрып келіп тұрмын. Еліміздің қиыр батысында жатқан ағайынсыздар. Сондықтан мен ылғи көңіл бөліп отырамын. Шекарада тұрған елдің жағдайы жақсы болуы керек. Қалаларымыз жылдан жылға дамып, еліміз өркендеп келеді. Өндіріс ілгерілеп келеді. Жаңа ғана шағын, орта деңгейдегі кәсіпорындардың тыныс-тіршілігімен таныстым. Қазіргі таңдағы керегі де осындай жұмыс орындары. Өйткені аса ірі кәсіпорындардың заманы өткен. Өңірлеріңізге «Болашақ» бағдарламасымен білім алған жас әкімді тағайындағаныма да біраз уақыт өт-ті. Ағылшын тілін білу арқылы инвестиция тартып, түрлі жобаларды жүзеге асыруға тырысып келеді. Жаңа алаңның көрінісі тамаша. Бұл жерге сенбіліктерде молырақ тал егіп, әлі де көгалдандыруға мән берген жөн. Орал – Қазақстан бойынша экологиялық жағынан ең таза қала. Ұзақ өмір сүру үшін қажетті негізгі ұстанымдардың бірі – қай жерде қолайлы болса, сол жерде өмір сүру. Экология таза, қалғаны өзімізге байланысты. Адам денсаулығы жақсы болуының 90 проценті өзіне, ал қалған 10 проценті дәрігерлерге байланысты. Мен көп жылдан бері ел басқарып келемін. Жайық өңірі – шаруашылыққа қолайлы мекен. Батыс Қазақстан облысы – бұрыннан бері ірі қара етін өндіруші аймақ. Жаңа ғана ет өңдеуші зауытта болдым. Онда малдың сүйегіне дейін пайдаға асырып жатыр. Менің бес әлеуметтік бастамамның бірі – тұрғындарды қолжетімді баспанамен қамту. Пәтері бар тұрғындар бұл бағдарламаға ілікпейді. Бұл бастама жұмыс жасайтын, алайда пәтерге қолы жетпей жүрген жанұяларды баспанамен қамтуға бағытталған, – деген Елбасы бес әлеуметтік бастаманың және еліміздегі жастарға, шағын кәсіпкерлікке туғызылып отырған жағдайдың қолайлы тұстары  туралы  кеңірек  әңгімеледі.

– Ал Достық үйлерінің жұмысы – біздің саясатымыздың маңызды бағыты. Қазақстан – халқының татулығымен барлық елге үлгі. Бұл – біздің ең ұлы жетістігіміз. Бақыт дегеніміз – ынтымағы жарасқан елде өмір сүру, балаларды соғысқа жібермеу. Біздің аталарымыз бірінші дүниежүзілік соғысты, төңкерісті, азамат соғысын бастан өткерді. Әкелеріміз болса, екінші дүниежүзілік соғысқа тап келді. Аштық пен саяси қуғындаудың да теперішін көрді. Ал біздің буын бақытты ұрпақ, 74 жылдан бері бейбіт өмір кешіп келе жатқанымыздың ұлы бақыт екенін ұмытпауымыз керек.

Шекарадағы елдермен бейбіт қарым-қатынас ұстанып отырмыз. Сыртқы және ішкі тыныштық дамуға қолайлы мүмкіндік туғызады. Елімізде мұнай мен газдың қоры болуына байланысты индустриалды саясатты да жүргізіп келеміз. Алайда бұлардың бағасының қалай өзгеретінін көріп отырғандықтан, өндірістің өзге түрін де дамытуымыз керек. Инфрақұрылымға келетін болсақ, Саратов бағытына жол салынуда. Бөкей ордаға қатынайтын ішкі жолдардың құрылысын жеделдету үшін Үкіметке тапсырма берілді, – деді  Мемлекет  басшысы.

Жаңашыл  жастарға – жол  ашық

Оқушылар сарайына барған Президент алдымен балғын боксшылармен емен-жарқын әңгімелесті. Жас былғары қолғап шеберлері болашақта осы Батыс Қазақстан облысынан шыққан Рио олимпиадасының чемпионы Данияр Елеусінов сияқты әлемдік жарыстарда топ жаруға  уәде берді.

Сондай-ақ осы сарайда БҚО әкімінің орынбасары Ғабидолла Оспанқұлов өңірде денсаулық сақтау және білім беру саласында жүзеге асырылып жатқан цифрландыру жобаларымен таныстырды. Елбасы бұл жөнінен Батыс Қазақстан облысының алда екендігін, осы бағыттағы жұмыстарды жалғастыру керектігін  атап  өтті.

Нұрсұлтан Назарбаев сонымен қатар жаңашыл жастармен де кездесті. Жас кәсіпкер, «Fiesta» дүкендер желісінің директоры Асхат Рамазанов «Бастау» коворкинг орталығында жаңа жобалар мен идеяларға жол ашылып жатқанын мәлім етсе, «Qayir» қайырымдылық қорының жетекшісі Алпамыс Шәрімов ұлттық өнер мен мәдениетті әлемдік деңгейге шығару бағытындағы ойларымен бөлісті. «AQJAYIQ» телеарнасының редакторы Нина Павлычева «100 жаңа оқулық» жобасы бойынша қазақ тіліне аударылған «Медиа этика» кітабын оқып, көкейге түйгендігін айтса, 1991 жылы Президент есімін қойған Нұрсұлтан Сақпаев ұшқыш болуды бала кезден армандағанын, қазір соның орындалып жатқанын жеткізді. Сол секілді М. Өтемісов атындағы Батыс Қазақстан мемлекеттік университетінің студенті Зарина Ықсанова Президенттің  «Бес әлеуметтік бастамасы» аясында облыста жаңадан жатақханалар салынып жатқаны жастар үшін үлкен қуаныш екендігін жеткізді. Осы орайда облыс әкімі Алтай Көлгінов өңірде жеті, соның ішінде Оралда алты жатақхана салынып жатқанын атап өтті.

Елбасы жастарға қазіргі уақытта мемлекет тарапынан мол мүмкіндіктер жасалып отырғанын айтып, оларға жаңашылдық жолында табыс тіледі.

«Мектептер мен университеттер ғылыммен айналысуға бағдарланып отыр. Қазіргі жағдайда адам өмір бойы білім алуы тиіс. Бес-алты жылдан кейін бүгінгі көптеген мамандық жойылып, орнына жаңа мамандықтар пайда болады. Біздің бар үмітіміз – жастарда. Қарқынды дамып келе жатқан әлемнен қалып қоймауымыз үшін не істеу керектігін сіздер әрдайым ойлап жүресіздер деп сенемін», – деп түйіндеді  сөзін  Мемлекет  басшысы.

Өңір  көрсеткіштері  өсіп  келеді

Сапарының соңында Елбасы Батыс Қазақстан облысының әлеуметтік-экономикалық даму мәселелері жөнінде кеңес өткізді. Жиында облыс әкімі Алтай Көлгіновтің 2017 жылдың және биылғы бірінші тоқсанның қорытындылары бойынша өңірдің даму барысы жөніндегі есебі тыңдалды.

Сонымен қатар облыс әкімі Қазақстан Президентінің мемлекеттік және салалық бағдарламалар аясында берген тапсырмаларының орындалуы туралы баяндады.

Басқосуда Нұрсұлтан Назарбаев өңірде дайын өнім шығару ісінің жолға қойылғанын айтып, мемлекеттік әлеуметтік бағдарламалардың іске асырылу барысына оң  баға  берді.

«Бүгін облыстағы нысандарды аралап көрудегі мақсатымыз – мемлекеттік бағдарламалардың, соның ішінде жақында қабылданған «Бес әлеуметтік бастаманың» іске асырылу барысымен танысу. Оларды жүзеге асыру қоғам өміріне оң әсерін тигізеді», – деді Қазақстан Президенті.

Елбасы «Қазақстан – 2050» стратегиясының мақсаттарына қол жеткізу ісінде барлық облыстың атқарып жатқан жұмыстарының маңызды екенін айтты.

Мемлекет басшысы Батыс Қазақстан облысының экономикалық дамуының негізгі көрсеткіштері өсіп келе жатқанына тоқталып, өңір тұрғындарының әл-ауқатын арттыруға бағытталған жұмыстарды жалғастыру қажеттігін атап өтті.

Азаматтардың әл-ауқаты тұрғын үй құрылысына да байланысты болады. Соңғы бес жылда облыста бір жарым миллион шаршы метр тұрғын үй пайдалануға берілгені қуантарлық жайт. «Бес әлеуметтік бастаманы» іске асыру арқылы біз құрылыс қарқынын арттыратын боламыз», – деді Нұрсұлтан  Назарбаев.

Қазақстан Президенті шағын және орта бизнеске қолдау көрсету, ауыл шаруашылығын дамыту мен ауыл шаруашылығы өнімдерін қайта өңдеу мәселелеріне, сондай-ақ өзін-өзі жұмыспен қамтығандардың проблемасына тоқталды.

Елбасы облыс басшылығына экономиканың жаңа секторларында заманауи өндіріс орындарын ашу жөніндегі жұмыстарды жандандыруды және өңірде жұмыс істеп жатқан кәсіпорындарды одан әрі дамытуды тапсырды.

«Ірі инвесторларды тартуға бағытталған жұмыстарды жалғастырудың да маңызы зор. Мәселен, менің АҚШ-қа сапарымнан кейін америкалық ірі бизнесмендер тобы Қазақстанға келіп, келіссөздер жүргізіп жатыр. Біз үшін олардың инвестициясы, технологиялары және нарығы маңызды», – деді Мемлекет басшысы.

Нұрсұлтан Назарбаев жаңа технологияларды пайдалану арқылы облыста «жасыл» экономиканы дамытудың қажеттігін атап өтті.

Мемлекет басшысы ауыл жастарын жұмыспен қамту мәселесіне тоқталып, оларды мемлекет қабылдаған бағдарламаларды жүзеге асыру үдерісіне тартуды тапсырды.

Қазақстан Президенті шағын және орта бизнес секторындағы диспропорцияға назар аударды.

«Орал қаласы мен Бөрлі ауданы шағын және орта бизнес өндіретін бүкіл өнімнің 90 процентін өндіріп отыр. Қалған 11 ауданға 10 процент тиесілі. Адамдарға бизнеспен айналысуды үйретіп, кәсіпкерлерді қолдауға арналған қандай мемлекеттік бағдарламалар бар екенін көрсету керек. Бизнесті дамыту үшін қолайлы жағдай жасау қажет», – деді Нұрсұлтан Назарбаев.

Мемлекет басшысы, сондай-ақ экспорт көлемін арттыру үшін өңірдің шекара маңы әлеуетін белсенді пайдалануды тапсырып, облыс ішінде көлік инфрақұрылымын дамытудың маңызды екенін атап өтті.

Жиында Бөкей ордасы мен Жәнібек аудандарына қатқыл табанды жол салу мәселесі де сөз болды. Орал қаласынан бұл аудан орталықтарына дейінгі 500 шақырым жолдың бүгінде 200 шақырымы жаңа кейіпке енді. Елбасы жолдың қалған бөлігін асфальттауға қаржы бөлу жөнінде Үкіметке тапсырма бергенін атап өтті.

– Бөкей ордасына туристерді апарамыз, көрсетеміз деп отырмыз. Ал жөнді жол болмаса, оларды қалай жүзеге асырамыз? Сондықтан осы мәселені қолға алып, бәріміз бірге шешетін боламыз, – деді Нұрсұлтан Әбішұлы.

Айта кету керек, жол бірден салынбайтыны анық. Оған қаржы бөлуге, жобалық-сметалық құжаттамаларды дайындауға біраз уақыт кетеді.  Дегенмен де көптен бері көтеріліп келе жатқан мәселенің шешімін таба бастағаны қуантады.

Жиын соңында Қазақстан Президенті өңірдің даму қарқынын сақтауды және жұмыс сапары барысында берілген тапсырмалардың жүзеге асырылуын бақылауға алып, қамтамасыз етуді тапсырды.

Ғайсағали  СЕЙТАҚ,

Нұртас  САФУЛЛИН,

Сәкен  ӘБІЛХАЛЫҚОВ

Суреттер  www.akorda.kz   сайтынан алынды


Басқарманың жаңа басшысы

Күні: , 78 рет оқылды

Кеше облыс әкімінің бірінші орынбасары Игорь Стексов облыстық ішкі саясат басқармасының ұжымына жаңа басшыны таныстырды.

Конкурстық комиссияның шешіміне сәйкес Батыс Қазақстан облыстық ішкі саясат басқармасының басшысы лауазымына Нұрлыбек Даумов тағайындалды.

Нұрлыбек Жасқайратұлы Даумов 1981 жылы туған. Білімі жоғары. 2002 жылы Батыс Қазақстан мемлекеттік университетін тәмамдаған.

Ол әр жылдары:

– облыстық ішкі саясат басқармасында жетекші, бас маман, бөлім басшысы;

– облыс әкімі аппаратында әлеуметтік-мәдени даму мәселелері жөніндегі инспектор;

– ҚР Мәдениет министрлігінің қоғамдық-саяси жұмыс департаментінде сарапшы (Астана қаласы);

– облыстық жастар саясаты мәселелері басқармасында бас маман, бөлім басшысы;

– облыстық ішкі саясат басқармасы басшысының орынбасары қызметін атқарды. Осыған дейін Орал қалалық ішкі саясат бөлімінің басшысы болып істеді.

Облыс  әкімінің баспасөз  қызметі


БҚО, Орал қаласы, Мұхит көшесі, 57/1
zhaik_presscenter@mail.ru
oral_oniri@inbox.ru
support@oraloniri.kz

Орал өңірі" газетінің бас редакторы: 51-25-80
Бас редактордың орынбасарлары: 24-17-08, 54-18-08
Жауапты хатшы: 54-38-22
Тілшілер: 50-66-88, 51-50-34
Жарнама бөлімі: 51-51-09
Яндекс.Метрика